Головна

Василь СУРАЗЬКИЙ

О ЄДИНОЙ ИСТИННОЙ ПРАВОСЛАВНОЙ ВЂРЂ И О СВЯТОЙ СОБОРНОЙ АПОСТОЛСКОЙ ЦЕРКВИ ОТКУДУ НАЧАЛО ПРИНЯЛА И КАКО ПОВСЮДУ РАСПРОСТРЕСЯ

ПРЕДСЛОВІЄ

Бога благого благостію, по благодати господа нашего Исуса Христа и по дЂйству святого духа. Иже от божественных писаній извЂстившеся и прелесть діаволю ощутивше и мрачных лукавых сЂтєй єго избЂжавше, не терпят прочеє инЂм не преподати, да не от невЂдєнія в пагубныя єреси впадше, своєго спасенія отпадут.

Понеже бо враг плевел свой пшеницы уподобляти извыче, и сим сластолюбивых неутверженых человЂк души, яко птицы силом, в свою погибель ловит, насЂявши много душегубных єресей през лукавых сосудов своих розтлЂнных человЂк. Мы же, ощутившіє прелести єго, с пророком к господу вопієм, глаголюще: «Благословен господь, иже не дасть нас в ловитву зубом их. Душа наша яко птица избавися от сЂти ловящих: сЂть сокрушися, мы же избавлени быхом».

Сего ради мало нЂчто о истинной вЂрЂ писанієм предложихом. Аще бо и сами єсмо ку дЂланію тоя лЂнивы; но никтожє должен сый нерадЂнієм скрывати истину.

Яко во єдиный истиный в трсицы поклоняємый бог єсть, а не много богов (яже пога.нстіи народи, от бЂсов прельщаєми, иногда в почитаніє многобожія испадоша), также и єдина истиная вЂра, а не много вЂр (яко отщепенцы, с подущенія шатанского в различныя єреси укланяющеися, во много роздробляючи превращати ту обыкошя). Но якоже єдиный бог истинен єсть и не отмЂняєтся никогдаже, сице и вЂра в єдиного истиного бога всєгда непреложна и невредима пребываєт.

Точію сами отступницы, вЂры поврежаючися, в вЂчныя мукы со діяволом осужаются. Ибо лжа ничтож ино, толко то, што не єсть, котора похибенем истотного состоится.

Якоже бо оскудЂнієм здравія настаєт недуг или отшествієм свЂта бываєт тма, — сице сластолюбієм и прочими страстьми недугующе оскудЂваєт здравіє душевноє. От сего убо, впадающе в темность проклятых єресей, лишаємся истиного свЂта, погрЂшающе єдиной правой вЂры. Нашедшу же свЂту, без вЂсти тма погибаєт; тако и єреси, понеже от лжи суть составлены, обличенієм от истиныя вЂры, так яко от свЂта тма, исчезают.

О чом ширєй со вниманієм прочитающи з самого того писаній, єже о вЂрЂ и о прочих, в книжицы сей написаних, зрозумети мощно єсть. Аще бо и не всякому угодно обрящется, наипачеже прелщеным богоборцем и ругателем православія, но ради присных во вЂрЂ православних христіян сія написана бышя, да не от невЂденія нЂцыи прелестію вражією у того волю уловлени будут.

Не просто бо всЂм повелЂно предати, но «сія (рече апостол) предажд вЂрным человЂком, иже доволни будут и инЂх научити». И аще кто не єсть вЂрен, таковый ниже слышати єсть достоин. Житіє бо растлЂнно имущим, скотом уподобльшимся, не повелЂ господь бисарєй помєтати.

Мнози бо слышят и прочитают божіє євангеліє и апостолская ученія и никакоже розумЂют истину. О таковых великій Павел глаголет: «Аще закрыто благовЂствованіє наше, тогды в таковых, которіє на згиненіє идут, закрыто єсть, в которых печалованє вЂка сего заслЂпило разумы их».

Конєц предисловію.

...О БРАЦЂ, СИРЂЧЬ — О ЖЕНИТВЂ ПРЕЗВИТЕРОВ И ДІЯКОНОВ

Правило пятоє святых апостол глаголет: «Презвитер или діякон своєя жены да не отпустит извЂтом благовЂрія; аще же отпустит, да отлучен будет священства. Пребываайже и не хотяй паки пояти єя, да извержется». Якоже и в посланіях до Тимофея и Тита пишя, свЂдЂтелствуєт о сем, глаголя: «Старцом бо (сирЂчь — презвитером) трезвеном быти, чистым, цЂломудреным. Также и старицам (рекше — женам их) честным в украшеніи святолЂпнЂ цЂломудреным, чистым, мужелюбицам, чадолюбицам» и прочая.

Єще о сем и в заповЂдєх апостолских, Климентом, папою римским написаных, в гла†17 доводне писано обрящеши.

Сего ради и шестый святый вселенскій собор, на нем же перзоначалник бысть блаженый Агафон, папа римскій, в правилах своих утверждают о сем, пачеже в правилЂ 13 сице глаголют: «Понеже в римстєй церкви в чину правила предано увЂдахом: хотящим сподоблятися поставленія, діяконом или презвитером, обЂщеватися им, яко ктому со своими женами не совокуплятися.

Мы же, древнєму послЂдующе правилу апостолского Упевненія, и чину священных муж по закону сожитієм, и отнынЂ целом быти повелЂваєм, никакоже им ко своим женам совокупленія наразрушающе, ни лишающе их друга к другу во врЂмя подобно приближенія».

ТЂмже я†єсть, яко и в сем римлянє, не храняще прєданія святых апостол и богоносных отец утверженія и клятвы нерадяще, своя нЂкая умышленія составляют, так, яко и в прочих вєщах обрЂтаются претворяюще.

О НЂЯКОМ ЧИСТЦЮ,
ЄГО ЖЕ РИМСКИИ ИМЯНУЮТ «ПУРГАТОРІУМ»

НигдЂже убо отнюд в святых писанях не обрЂтаєтся, абы по смерти покаяніє или очищеніє грЂхов быти мЂло, окром здЂ, донележе в тЂлЂ пребываєм. «НЂсть бо, рече, в смерти поминай тебЂ, в адЂ же кто исповЂстьтися». Єже бо аще здЂ в тЂлЂ пребывая что сЂєм, сіє пакы во пріидущеє в воскресеніє мертвых с тЂлом и пожнем. ЗдЂ бо єсть врЂмя дЂланія и тружданія. В будущем же за труд мзда, и комуждо по дЂлом єго воздаяніє.

Яве бо, яко и дЂвам оным пяти буим, украшеным добротою дЂвственою, точію за єже масла свЂтЂнія ради свЂщ своих не приняли в сосудЂх своих, сирЂчь — в тЂлЂ пребывая, милосердієм єже к нищим не просвЂтиша добродЂйства своєго, — затворися дверь женихова. И не повелЂважт им: «ИдЂте преждє очистЂтеся пламенем огняным, а потом внидете в чертог мой», но єже «не вЂм вас» глаголя, далече отсылаєт.

Разбойнику же, паки покаявшуся, висящу на крестЂ: «Днесь со мною будеши в рай» глаголет Христос, а не до чистителного огня отсылает. И притча богатого и убогого ясно являєт розность, яко душа умерших каждо абіє постигла мЂста своєго, ова убо геєну, оваже нЂдра Авраамля, и яже посредЂ имать утверженая пропасть велія, возбраняющеє им яже ко друг другу стремленіє. «Єда, рече, мертвыми вториши чюдеса? Єда повЂсть, кто в гробЂ милость твою и истину твою в погибели? Єда познака будут во тмЂ чюдеса твоя, и правда твоя в земли забвєней?»

Погибель же и тма, и земля забытая, мука вЂчная имянуєтся, идЂже господь не присЂщаєт. «Изыйдут бо, рече, из гроб сотворшеи благая в воскресеніє живота, а сотворшеи злая — в воскресеніє суда». И паки: «И идут сіи в муку вЂчную, праведницы же — в живот вЂчный».

ТЂм же я†єсть, яко прелщаются на ложный чистец уповающіи. Яко же бо живота вЂчного царство небеснеє безконечно єсть, єгоже бо, рече, царствію нЂсть конца, — тако и мука вЂчна и безконечна єсть. ИдЂже бо, рече, червь их не умираєт и огонь их не угасаєт. ДобрЂйши ти, рече, єсть внити в живот хрому и бЂдну, нежели д†руцЂ и д†нозЂ имущу ввержену быти в огонь вЂчный.

Якоже вЂчного живота обители суть многы, по достоанію комуждо творящих волю господню уготованы, я'ко сам господь свЂдЂтелствуєт, глаголя: «В дому отца моєго обители многи суть», — тако и вЂчноє муки противу злобы коєгождо, похоти своя исполняющих и волю вражію творящих уготовася мученіє, огонь негасимий, червь неусыпающий, пропасть глубокая, тма кромЂшная, гроза несогрЂемая, и прочая противу злобы когождо лукавых дЂл єго. «НЂсть бо неправда у бога, єлицы беззаконно согрЂшишя, беззаконно и погибнут», сирЂчь — во вЂкы мучатся.

Што бо за суд имать быти поганом и не знающим бога?! Они же скверными беззаконними дЂлы своими, сами осудишяся в вЂчныя муки, уготованыя діяволу со всЂми, творящими волю єго. Сего ради и глаголет: «Не воскреснут нечестивій на суд», сирЂчь — не воскреснуть судитися, но мучитися.

А єже божественного апостола приводят писаніє, мняще о чистцу глаголющеє, и сим прелщаются, єже написа сице: «Основанія бо иного никтоже может положити, паче лежащого, єже єсть Исус Христос. Ащели кто будуєт на основаній сем злато, сребро, каменій честных, дрова, сЂно, тростіє, когождо дЂло явлено будєт. День бо явит, зане огнем открываєтся. И когождо дЂло яково єсть, огонь искусит. И єго же дЂло аще пребудєт (сирЂчь — шкоду подыймет), сам же сгіасется, но якоже огнем».

Явно єсть, яко здЂ апостол о учителєх пишет и о ученій когождо их. Єсли кто истино от божественных Христовых словес учя, благыми дЂлы утворяєт, обрящется дЂло таковаго, яко злато и сребро огнем пробуємо невредимо, но и чистЂйшеє бываєт. Сего ради и мзду пріимет, в царствіи небесном — живот вЂчный.

Ащели кто свЂта сего мудрованієм научаєт и плотским любострастієм прелщаяся утворяєт, сЂй дрова и стеліє будуєт, иже огнем искушаємо не постоит, но согоряєт и погибаєт. Ибо от лжи ничтоже истино бываєт.

Сего ради будующіє от сих тщету пріємлют, пусты сущи и ни коєа же помощи от таковых дЂл не имЂют. ТЂмже и в огни спасающися вЂчно мучими бывают.

Се єсть спасеніє таковых, о нєм же апостол здЂ воспоминаєт, яко николиже скончатися или погибнути в огни сущим, но вЂчне тамо пребывати, якоже и праведным в царствіи небеснем водворяася вЂчне радоватися. Яко пророк глаголет: «Душа их во благых водворятся».

Якоже бо здЂ спасеніє огнем, муку апостол наричет, такожде и в євангелій господь глаголет: «Иже аще розорит єдину заповЂдей сих малых и научит тако человЂкы, мній наречется в царствіи небесном». Мній же разумЂєтся — «осужден в муку», яко же блаженныи учители истолковашя.

Како бо не послЂдняго безумія прелєсть обрящется се, єже мнЂти спасеном быти, и в царствіи небесном сих глаголати, иже суєтная и погибающая зиждут и прочих сим соблазняющи?! Аще бо заєже кто речет брату своєму юроде, повинен єсть геєнЂ огняной, — то не множає ли повинен єсть таковый, иже заповЂдь разорит и соблазнит сим прочих?!

«Силніи, рече, силнЂй испытани будут», и єму же множає дано, множає и взыщется от него.

Сего ради заущая таковых облудноє мниманьє, сам господь глаголет: «Иже аще соблазнит єдинаго от малах сил, вЂрующих в мя, унє єму єсть, да обязавши камень жерновный на шію свою, потоплен будєт в глубинЂ морстЂй».

ТЂмже и апостол, глаголяй: «Єже сам спасется, такожде якожде огнем», по сєм сло†привєд, глаголя: «Не вЂстє ли, яко храм божій єсте, и дух божій живет во вас. Аще ли кто храм, божій растлит, растлит сего бог». Там же и о плотском свЂта сего мудрованію свЂдЂтелствует.

Аще ли яко змышляющыи чистєц глаголют, иже по изшествіи от тЂлеси до дня судного в чистительном огни поляруются души, да рекут же убо и о прочих, их же живых день судный постигнєт, єгда господь со силою и славою многою пріидєт судити живых и мертвых: како и когда имут очищатися? Или с преждє очищающимися, како мощно будєт зровнатися тым, их же живых судный день застанет?

Понеже с пришествієм господним купно и осужденіє от божественных уст єго на вся изнесется, праведным в наследіє вЂчнаго небесного царствіа призывая, грЂшных же в мукы безконечныя отсылая.

«ВсЂ бо, рече, не успнем, всЂ же иамЂнимся вскорЂ, во мгновєнію ока».

Аще ли во мгновєнію ока, их же живых судный день застанет, измЂняєтся, то како в чистцу сим поляроватися мощно будєт?! Не достає бо им врЂмени на сіє! По судЂ бо затворится дверь, яко никомуже замедливщу мощно будєт тамо внити. Сего ради и глаголет: «Буди увЂщаася з суперником своим скоро, дондеже єси на пути с ним, да не предаст тебе суперник судій, и в темницу повержен будєши. Аминь, глаголю тобЂ, не изыдеши оттуду, дондеже воздаси послЂдній кодрант».

Суперник грЂх єсть; путь же — житіє се глаголется; здЂ увЂщеватися покаанієм, узнаваючи грЂхи очищати; темницу же муку наричет, воздааніє же послЂдняго кодранта — вЂчное мученіє глаголет; послЂднєє бо во истину, яко к тому нЂсть мощно кому изыити от нєго.

Аще и весь мір приобрящет кто, ничтоже может дати отмЂны за душю свою. ЗдЂ убо, воистину здЂ, донележе в тЂлЂ сем прєбываєм, всякому правовЂрному настоит очищеніє, раздаянієм в милостыню убогым от своих трудов собраноє, плачем и слєзами омывающе грЂхи, и воздержанієм сластей плоть утончевающе, и похоти єя умерщвляюще всякыя скорби находящіа на ны крЂпко претерпЂвающе. Се єсть истинный чистєц, а не тамо по разлученіи души с тЂлом, идЂже врЂмя покаянію нЂсть, точію ожиданіє праведного суда божія, и єже с тЂлом содЂянная когождо по дЂлом воспріятія.

Якоже бо сам господь наш Исус Христос не словом точію научи, но самими дЂлами показа. Сего ради и божественных ученик сзоих хотяй близь себе во царствіи своєм быти, не до чистцу на он свЂт отсылаєт, но послЂдующе Христу господу своєму здЂ страдати повелЂваєт, яко да и прочих от юности содЂланых страстєй совлєкшися, муками и томленієм очистятся здЂ, да тамо непорочни с Христом господом обрящутся. «ИдЂже, рече, аз єсмь, тамо и вы будете». ТЂмже и предглаголет им: «Предани будете в скорби и убіют вы, и будете ненавидими всЂми языки имени моєго ради. ПретерпЂвый же до конца, той спасен будєт».

Аще бо и верховній божественній апостолы Петр и Павел, в правилах своих о памяти усопшых написали, но о таковом, яко змышленом, чистцу отнюдь не споминають нигдЂже.

О памяти бо по усопших пачеже в правилЂ своєм четырнадесятом сице глаголють: «Творите усопшим третины в псалмЂх и молитвах, воскресшого ради триднєвно, и девятины на воспоминаніє сущих здЂ и усопших; и четырдесяте дни по Ветхому закону; якоже в жидовстіи людіє плакахуся Моисея ради; и на всяко лЂто памяти им творЂте; и от имЂній их раздавающе нищым, на воспоминаніє их.

Се же о благовЂрных глаголем. За нечестивого же, аще и всего мира богатство раздаси нищым, никоєя ползы не сотвориши єму. Єму же бо живу сущю, враг бЂ богу, явЂ, яко и по смерти, ибо нЂсть неправда от бога. Праведен бо господь и правду возлюби, и се человЂк, и дЂло єго».

Зрите убо, яко и вину назнаменашя, чего дЂля памяти творити подобаєт? Ксєму же по усопших творяще памяти, и с благочинієм собирающися, от сих убо и живій ползуются. Кождо бо их конец житія своєго помышляюще, и дЂла усопшого вспоминающе уцЂломудряются, по глаголющему: «Благо ходити в дом плача, нежели в дом пира». Такоже и от имЂній усопшого раздавати нищым полЂзнЂє, нежели в сластолюбіи оставившым є изживати.

ТЂмже всяко я†єсть, яко не от божественного писанія чистєц изобрЂтаєтся, но от человЂческих умышленій составися, пачеже от высокомысленого Оригена ¹, он же преждє потоки ученія источи, послЂдиже, на своє велемудріє уповая, падеся, хулныя глаголы о ХристЂ спасителю нашем отригнул. Сего ради божія помощи обнажися, яко от идоложрец ят бысть, не стерпЂвши мук, верже ливан на жертвище, и пожрЂт идолом. И за сіє слабости ради своєя срамляася, не точію человЂком нечестивым, но и самим бЂсом свободитися от мук глаголет, конєц мукам быти блядуще.

Латини же, яко и в прочих скори суще с твердЂйшого во слабшеє уклонятися, тако и здЂ, Оригеново ученіє пріємше, изволяюще с ним по смерти чиститися паче, нежели здЂ, єже стЂлом содЂяных покаянієм исправлятися, и недоволни суще древними развращенми, но и в нинЂшніє врЂмена разоряюще постановеньє, духом святым преданоє, дни празничныє поотмЂняли, веліє смущеніє и печаль правовЂрным содЂлывающе. Яко и самый той день спасителныя пасхи, с прочими празникы, послЂдующими єму, человЂческыми умышлєньми своими превратишя, с богоубійцами іюдеими, яко в прЂсноку, так и в празнованью соєдиняющеся.

Кто бо от правовЂрных здрав смысл имЂя, паче же неразвращенными мысльми в святых писаніих воспитаный, не имать сего блуженія познати?! Яко и нинЂшняго лЂта преждє врЂмени, марта шестнадцатого, єже никогдаже нє бысть, в 14 луны равно со іюдеи празноваху пасху, в он же день господь наш Исус Христос на крестЂ висял, в пятый же надесят в гробЂ положен бысть. В тыє дни плакати подобаєт, а не с богоубійцами жидовами веселитися. Яко о том доводне в листЂ том єсть выписано, єго же по отщепєнст†их от нас єже в празниках пятого лЂта написано. Который по сєм нижей єсть здЂ написав. Аминь.

О ПРЕМЂНЕНІЮ ДНЕЙ И ПРАЗНИКОВ

...Сего ради святыє богоносныє отцы, учители наши, принявши от святых славных и всехвалных Христовых апостол тот же, а не иншій чин або порядок, духом святьш постановеный, цЂло и всякым способом ненарушоно соблюдши, также и нам христіяном всЂм, в обдержаніє неотмЂнно, на вЂчныє лЂта подали. А на первом вселенском соборЂ, за первого христіянскаго царя Великого Константина, в триста и осмнадцать лЂт по вознесенію ХристовЂ, в градЂ Никейском собору бывшого, што от святых апостол словне были приняли и цЂло, неуломно всєгда от рожаю до рожаю ховаючи выполняли. То на оном первом соборЂ христоименитым людєм, зложивши ведлуг азбуки литерми таблицу или круг, єже о пасцЂ, што мы Пасхальєю называєм, на пятсот тридесят и д†льтЂ оборочаючійся, нЂколи некончаємый, писанієм предали: у тридцяти и пяти днєх, в двох мЂсяцах обыходячи, ведлуг полноты луны, оныє три дни — пяток, суботу и недЂлю, для причил многокрот вышей мєнованых заховываючи, которая послЂ порознанья з ночью дня, в который колвєк с тых тридцати пяти днєй, первая недЂля или воскресеніє по полню припаднєт, починаючи от мЂсяца марта дня двадцять второго до мЂсяца априля дня двадесять пятого, уставили в таковом часЂ или врЂмени, по вся лЂте аж до скончанія свЂта пасху празновати, ни вышей от двадцать второго дня мЂсяца марта превосходя, ани теж от двадцать пятого дня мЂсяца априля низходя; но в тых тридцати пяти днєх, в который колвєк водлуг полноты луны первая недЂля припаднєт, обыходити.

МЂсяц же называєтся не лунный бЂг, который дня мЂрити, ани им владнувати не может; єдно ночью, яко писаніє свЂтчить, луну и звЂзды на владность ночи. Но мЂсяц именуєтся обход солнечный, от єдиного знаку или знамени небесного до другого знаменья. Которых знаков єсть дванадцать. По которых солнце по вся лЂта ходячи, от початку єдиного знаменья до другого приходит за тридцать днєй, и за десять часов, и за полчаса.

А так от єдинаго кождого с тых дванадцати знамень, за так много днєй и часов, всєгда неотмЂнне проходячи, рок кончаєт.

Што враховавши в каждом знаменю бЂгу солнечного, по тридцати днєй, и по десяти часов, и по полчаса, во всЂх дванадцати знаменах чини днєй триста шестьдесят пять, и чверть дня, єже єсть шесть часов. Што ся именуєт год или лЂто. С которых чвертєй дня или шести часов на четвертоє лЂто вчиняєтся день, єгоже високостом названо, яко от штук или от годин, от бЂгу солнечного збываючих, составляєтся.

И бываєт року того с прибылым тым днем триста шестьдесят днєй и шесть. День бо з ночью называєм єсть днем, ведлуг божественнаго писанія: «Бысть, рече, вечор, бысть утро, день єдин». Который в собЂ маєт двадцать четыре часов неотмЂнно всєгда. В котороє бо время коликими часы день паче нощи избываєт, толикими часы нощ оскудЂваєт. А в коє врЂмя коликими часы нощ паче дня изобилуєт, толикими часы такожде день умаляєтся. Николи бо то на єдиной мЂрЂ не стоит, но всєгда движется, изобилуя и оскудЂвая.

Толко, яко ся поменило, двадцатма четырма часы всєгда нощ и день исполняєтся, вЂчне никогда в том не отмЂняєтся.

Прото не от днєй, ани от ночей оная шесть годин, рекше чверть дня, над дни збываючая, на четвертоє лЂто день збытній причиняют, но от личбы того кресу, от которого солнце зачинаєт бЂг свой, и за колко днєй и часов знамена обышедши, зася до того ж кресу, от которого бЂг зачало, приходит, и паки знову бЂг зачинаєт.

Мянуєм же зачало бЂгу солнечного от того часу, яко ся день з ночью по веснЂ зровнаєт, о чом ся вже доводне с початку написано. А иж солнечного бЂгу в каждом знаменю по тридцати днєй и по десяти часов и по пулчасу рахуючи, тогды, што над тридцат днєй збываючіє полєдинасты годины, не могут в каждом знаменю на зуполный день сходитися або раховатися.

Того дЂля фолкгуючи и догожаючи тому, положено в мЂсяцЂх, водлЂ которых всЂ свята обходим, во єдиных по тридцати, а в другых по тридцати одному дню, меркуючи, абы она десять часов обыходу солнечного в каждом знаменю, што над тридцять днєй збываєт, в дни ся помЂрила и пораховала.

Якож, кгды зочтеш або врахуєш всЂ мЂсяцы солнечныє, ведлуг обходу церковного, то єсть марта днєй тридцять один, априля 30, мая 31, іюня 30, іюля 31, августа 31, сентября 30, октября 31, ноября 30, декабря 31, генваря 31, а остатнего февруарія дней двадцать осмь, — обрящеши также в лЂть днєй 365, а з оных получасов, што над тую десять годин в каждым мЂсяцу по полгодины збывают, тогды во всєх дванадцати мЂсяцЂх збираєтся часов шесть, єже єсть чверть дня. С котороє четвертаго лЂта, яко ся вже рекло, учиняєтся день.

А луна каждая, за двадцать девять днєй и полдня, и за полдня, и за полчаса, и за пятую часть часа, всю двадцать знамен небесных претєкаєт. С которых солнце, яко ся вже поменило, толко єдно знамя за тридцать днєй и за полєдинасты годины проходит. Сего ради знайдуєтся луна теченієм своим каждого мЂсяца солнечного превышаючи или упережаючи, двадесятьми и єдиным часом, и чотирма пятинами, рекше пятыми частьми часа.

Тогды за все лЂто, то єсть за дванадцатькроть отновляючися луна, учини збытних днєй десять, и часов двадцать один, и три пятых части часа. Которыє солнце оставляєт или отдаєт на всяко лЂто неотмЂнно. Бо яко в «Шестоденцу» ², в чвартом сло†єсть писано, иж в четвертый день луна сотворена, яко пятнадцати днєй будучи совершена или досконала, а пристало єй в четвертий день сотвореной, яко чотырех днєй будучи, явитися.

А прото, што на он час, яко была сотворена, над чотыри дни одинадцать днєй перебрала, тыє на всяко лЂто отдаєт солнцу, бЂг бо или обыход лунный считаючи, каждую луну по двадцать девяти днєй и по полдни, чини в году днєй триста пятьдесят чотыри.

А солнечный обыход, каждый мЂсяц рахуючи по тридцать днєй и по полєдинаста часа, тогды от кресу, отколя солнце бЂг свой зачинаєт, зась до того ж кресу чини днєй триста шестьдесят пять и часов шесть. О чом ся вже споминало. Отнявши теды лунного бЂгу днєй триста пятьдесят чотыри от солнечных трех сот шестидесяти пяти днєй, зостає солнцу одиннадесят днєй, от бЂгу лунного збываючих.

С которых в трех лЂтах вчиняєтся тринадесятая луна, и надто дней три, а часов чотыри, и десятая часть часа.

Єдин бо путь или шествіє солнцу и лунЂ, по вся лЂта неотмЂнно по тых дванадцати знаменах небесных, по которых луна, яко меншый круг, дванадцать крот за лЂто, єже єсть за цЂлый рок обтечет, и на другій рок єще десятьма днями, и двадцатьма єдиньїм часом, и трима пятыми частьми часа превосходит, ним солнце, яко болшій круг, один раз, то єсть за целый рок, тыє всЂ знамена обыйдєт.

Которыє всю жизнь або пожитки человЂчи содержать; их же назвисками именують: овен, телец, близнец, рак, лев, дЂва, вага, скоропія, стрЂлец, козорог, водолєй, рыбы.

Не мнимай же, иж бы што таковаго с тых помененых животов или быдлят в обытаніи небесном быти мЂло? Ничого бо так грубого в небЂ не єсть, ни овец, ни быков, ни львов и прочіих бестий. Воистину бо было бы от грубых грубЂє, єсли бы бЂзсловесніи скоти небом рядити мЂли, яко баснословят халдей и прочіи звЂздочетцы. Но ведлуг солнечного по тых дванадцати знаков небесных обыходу называются оныє знамена имены предреченными.

Овен бо первоє знамя, в неже глаголется быти мир сотворен, в котороє солнце близко весны єсть, для того речено, иж яко овен животноє бедрами не силно, маючи нЂчто впередЂ крЂпости, также и послЂдняя солнца в то время немощно, студенію крЂпости єго умаляємЂ, а предняя иж лЂто зрять, нЂчто крЂпости, сирЂчь теплоты, мають. Або яко овен зимЂ лежить на сторонЂ лЂвой, на весну же начинаєт лежати на сторонЂ правой, также и солнце пред тым часом пребывает на лЂвой сторонЂ тверди, то єсть на полудни, а в то время входит на сторону десную, иже єсть сЂвер.

Второє — бык, для того речено, иж єсть моцнЂйши овна, также крЂпчає єсть силою солнце в то время, яже к нам упереженєм.

Третєє — близнец речено, зане в то время мощ солнца двоится. Начинаєт бо быти тепло и сухотворителнє. и в то врЂмя всякіє речи неболшей множатся: птицы бо и животныя плоды производят. Остатьняя бо часть весны єсть.

Четвертоє — рак речено, зане животно єсть, вспят ходящеє. Также и солнце в то время вспят грядет, отходя от нас, в полуночной етранЂ продолжаючи день.

Пятоє — лев речено, понєже бо силнЂйшеє от прочих животных. Сего ради и царя звЂрєм земным нарицают єго. Тако и в то врЂмя всякіє сЂмена, плоды и быліє до совершенного возрасту и силы доспЂвше, крЂпостію состоящися дебелЂють.

Шестоє — дЂва речено, остатняя часть лЂта. Яко бо дЂва ничтоже ражаєт, сице и врЂмя то неплодно, нового ничого не родит, толко роженоє согрЂвати творит.

Сєдмоє — вЂсы или вагы, от ровности в том знаменю ночи с днем речено. Зане солнцу тут стоящу нощ и день равно завЂшени суть.

Осмоє — скоропія, иже ядовито єсть и жалит. Также и врЂмя то болЂзниво єсть, для неравности воздуха. Споранку бо студень дотьшаєт, а в полудни теплота пр'изнояєт.

Девятоє — стрЂлец. Зане в то врЂмя от работ упразнившися, частЂй ловитвою забавляются. Єсть бо остатняя часть осени.

Десятоє — тур или козорог речено єсть, яко на високих горах или в глубоких роздолах пасется. Также тогды солнце на превысочайшом стопню к полудню удаленієм от полночныя страны ночь продолжаєт и студень умножаєт.

Єдинадесятоє — водолєй речено. Зане врЂмя то мокростью и вЂтры обфитующи.

Дванадесятоє и остатнєє — рыбы речено. В то бо время водам створившимся єсть врЂмя риболовства. Остаток бо зимы кончаєтся, пакы солнце дошедши кресу, зровновавши день з ночью, бЂг рочній зачинаєт.

Луна бо творит мЂсяцы, а солнце лЂто обыходом своим от кресу зась до того ж кресу, за днєй 365, и за чверть дня, рекше за шесть часов. Четырма врЂменами или отмЂнами, то єсть: весною, лЂтом, єсенью и зимою, — круг року вЂнчаєт, всєгда неотмЂнно вЂчне.

Аще бо и называєм преречоныє знамена животными, по них же солнце всєгда шествіє своє творит, тогды не милимся. Заисте бо водлуг зряженья содЂтеля всЂх и творца, путЂшествуа в них солнце, повельнієм божіим, в едином кождом знаменю особливую моц содЂлываєт: в єдином плоды прозябаєт, в другом растит, в другом созрЂваєт, в другом жатву творит, птицы и многіє безчисленыє животы розмноживаєт,

в других теплоту велію, в других мокротню збытнюю, в других зимна и прочіи потреби кончаваєт и николи ся не отмЂняєт, ни зимы в жатву, а ни теж лЂта в зиму; но всєгда по повелЂнію божію, во врємя подобноє исполняєт, по писанію: «Яко той рек, и сталося, той росказал, и сотворилося»; приказаньє положил, абы з кресу не выступовали.

Да и от сего обличатся суємудреніи дерзопреступницы. Єсли бо повЂдают, якобы над той солнечный бЂг, о котором ся вже поколку кроть споминало, то єсть над триста шестьдесят пять дней и часов шесть, єще штось малих часцов или дробниц в каждом року збываючи от Никейского собору до нынЂ, за тысячу двЂстЂ сєдмдесят лЂт прибыть мЂло днєй десять, — то пред тым, от сотворенья свЂта до Никейского собору за пять тысяч осм сот двадцять сєдм лЂт, мусяло прибыть днєй чотырдесят и шесть.

До которых теперешнюю причиненую днєй десять приложивши, учини солнечного обыходу два мЂсяцы збытних без чотырех днєй. Тогды бы с початку свЂте поровнаньє дня з ночью мусяло быть часу веснЂного у генуарію, в котором обходим свята: обрЂзаніє господнє и святая богоявленія. А осеннєє поровнанє ночи зо днем мусяло быть во іюлію по святых апостолЂх Петру и Павлу.

Што явная єсть лож и облудность мудрецов свЂта сего. О которых пророк, споминаючи, мовит: «Реклом беззаконникам, — не беззаконуйте, и согрЂшающым, — не возносите рога и не воздвигайте на высокость рога вашего, ани мовте на бога неправды. Бог бо судія єсть: сего понижаєт, а сего подвышаєт».

Єсли бы так было, яко баснословят мудрЂцы свЂта сего, жебы ся днєй причинити мЂло, тогды бы и она хотя ж попудная жидовская пасха от нашеє истиноє христіянскоє пасхи отдалится мусяла; але яко пред тим, так и ныне, водлє свядЂцтва и правила самих святых апостол, котороє єсть напередЂ написано, завжды перед нашею во єдиной мЂрЂ пасха их бываєт. Толко иж наша христіянская пасха послЂ поровнанья завжды по полнотЂ луны в пєрвую недЂлю бываєт. А жидозе, в который колвєк день полная луна припаднєт, в той день свою пасху празнуют, а тым колко днєй или болш тыдня нас упережают. А иногды от прибылоє луны не могучи потрафить перваго мЂсяца, у в остатнєм зимы займуючи свєтят, за што суть от мудрых жидов ганьбени. Яко ся спродку о том споминало.

А иж от створенья свЂта до нынешнєго врЂмени проминуло лЂт седм тысящ девятьдесят и седм, было бы вжды в писмЂ сзетом о том спомянено. Бо и мЂсяцы бы ся мЂшать мусяли, также и день святыя пасхи. Но того никако в святом письмЂ показати не могут, окром своими суємудреными змыслами, водлуг прелести звЂздочетноє, не от бога халдЂєм и єгиптяном открытое, но от самых злых и человЂконенавистных бЂсов, на изгиненьє вЂрующим им. О которых пророк пише под подобенством вавилонскоє дочки, мовячи: «Стани теды нинЂ з волхвы твоими и з многыми чары твоими, которым змолоду ся научила, єсли могут тобЂ помочи. Працуйся в порадах своих; нехай станут и спасут тебе звЂздочетцы небесныє, смотряючи звЂзд, нехай тобЂ скажут, што маєт на тя пріити; о то всЂ, яко хворостіє, огнем погорят, и своєго живота не выбавят от пломени».

Єсли бо и личбу лЂт от створенія свЂта дерзопреступницы в нынєшніє врЂмена помЂшали и скоротили; но от старых кройник своих властных обличени будут. Которіє также описуют лЂта от сотворснія свЂта, яко мы всєгда благодатію божією без преткновенія и доднесь содержим.

Сего ради православным христіанам не подобаєт в прелести их уклонятися, но всею силою от того удалятися. Которыє нЂкоим скудоумным о нашых покушаются глаголати, показуючи, якобы и пред тым перечиняли, отмЂняючи день святыя пасхи. Што никгды не было. Єсли толко то споминают, што нЂкоторыє по трикрот о пасцЂ были поблудили, также яко и они тепер блудят. Но тыє хоч з великым встыдом и помстою божією, предся опустившы блуды, зася приворочалися к правдЂ. Боже, дай, жебы ся и они так нинЂ узнали...

Василь СУРАЗЬКИЙ

Василь Суразький (Острозький) — так прийнято називати автора полемічного трактату «О єдиной истинной православной вЂрЂ...», виданого в Острозі в 1588 р. Львівський історик І. З. Мицько доводить, що за цим ім'ям стоїть Василь Андрійович Малюшицький. Дослідник розкрив і деякі біографічні дані цього українського культурно-освітнього діяча і видавця (див.: Мыцко И. З. Украинский писатель-полемист Василий Суражский — сподвижник Ивана Федорова. — В кн.: Федоровские чтения. 1979. М., 1982, с. 18 — 23). Народився не пізніше середини 50-х років XVI ст., одержав добру освіту. В 1575 — 1581 рр. він уже на службі у князя Костянтина Острозького. Як діяльний член Острозького літературно-наукового гуртка, брав участь у підготовці до видання Острозької біблії (1581), «Маргарита» Іоанна Златоустого (Острог, 1595); «Правила кстиннаго живота христіанского» (Псалтир з возслідуванням, Острог, 1598). Був «строїтелем» (управителем) Острозького шпиталя, суразьким старостою (в м. Суражі, недалеко від Острога). Є підстави вбачати у свідченні «Антиризиса» (Вільно, 1600) про «пана Василя, старосту суражского й пана Вишенского» факт знайомства і співробітництва Василя Суразького з Іваном Вишенським. Безумовним є те, що трактат Василя Суразького «О єдиной... вЂрЂ...» справив великий вплив на Івана Вишенського. Помер Василь Суразький після 1620 р.

О єдиной истинной православной вЂрЂ и о святой соборной апостолской церкви, откуду начало приняла и како повсюду распростреся. — Книжка вийшла друком у Острозі в 1588 р.

Відомі публікації: Памятники полемической литератури в Западной Руси. Пб., 1882, кн. 2, с. 601 — 938 («Русская историческая библнотека», т. VII).

Подається в уривках за цим виданням.

¹ Оріген (бл. 185 — 254) — ранньохристиянський філософ і теолог, засновник біблійної філології, один з «отців церкви». З 217 р. очолював християнську школу в Александрії, уроженцем якої був. Намагався використати античну філософію (систему Платона) для обгрунтування християнських догм, за що у 231 р. його звинувачено в єресі. Переїхав до м. Кесарії (Палестина), тут його кинули до в'язниці, де він умер від тортур. Автор понад 2000 творів. У 543 р. був на вселенському соборі засуджений як єретик. Під впливом його ідей перебувало багато мислителів середньовіччя.

² «Шестоденца» («Шестиднев») — твір Іоанна Екзарха Болгарського (кінець IX — початок X ст.), в якому трактується біблійна легенда про створення світу, подаються різні історичні відомості та філософські й природничі уявлення.

Головна