Уклінно просимо заповнити Опитування про фемінативи  


Головна




Іван ВИШЕНСЬКИЙ

Книжка

Послання до Домнікії

Послання Іову Княгиницькому



КНИЖКА


КНИЖКА ИОАННА МНИХА ВИШЕНСКОГО ОТ СВЯТОЙ АФОНСКОЙ ГОРЫ. В НАПОМИНАНИЕ ВСЂХ ПРАВОСЛАВНЫХ ХРИСТИЯН, БРАТСТВАМ 1 И ВСЂМ БЛАГОЧЕСТИВЫМ, В МАЛОЙ РОССИИ В КОРОНЂ ПОЛСКОЙ ЖИТЕЛСТВУЮЩИМ ИНОЧЕСКОГО ЧИНА ОБЩЕЖИТЕЛЯМ, АРХИМАНДРИТАМ, И СВЯЩЕННОИНОКАМ, И ЧЕСТНЫМ МОНАХАМ, И ИНОКИНЯМ ВСЂМ, СЕСТРАМ НАШИМ, И ПРОЧИИМ ТЩАТЕЛЯМ ЦЕРКОВНЫМ, БЛАГОДАТЬ ГОСПОДА НАШЕГО ИСУСА ХРИСТА И ЛЮБЫ БОГА ОТЦА И ПРИЧАСТИВ СВЯТОГО ДУХА 2 БУДИ СО ВСЂМИ ВАМИ. АМИНЬ.



Посылаю вам термину о лжи, которая над истиною у вашей земли царствует, и бог от всЂх сторон и частий християнства хулится, духи ж лукавий поднебеснии (к ним же нам брань, по Павлу) 3 в християнст†нашем владЂют, отнюду же за невЂрие и бесплодие наше попущени есмо в запустЂние з нашею православною вЂрою. И если ся не почуете и не справите, знаючи да знаете, яко и в конец благочестие наше запустЂет, оставшии ж в безвЂрии вси погибнут. Уготован бо сосуд гнЂва божия на вашу землю пролитися, чому забЂгайте покаянием и исправлением вашим яже ко богу скоро. Понеж нЂсть незбожнЂйшее, хулнЂйшее, и несправедлившее, и нечистшее землЂ ни в поганьствЂ, як же ваша земля. Прото, молю вас, спасайтеся образом Лота, избЂгша из Содомы во Сигор, — Сигор же ест покаянне и очищение от грЂха — сицевым образом, яко ту послЂди о очищений церкви реклося, найдете. А егда сие исправите, чаю на милость божию, яко призрит на нас паки милосердным оком и благочестие наше воздвигнет, и всЂх, в нем благочестно живущих, спасет, и царства небесного наслЂдниками быти сподобит, еже нам всЂм получити, господи, дажд. Аминь.

Сию же термину, начисто преведши, и иншим всЂм знати о том дайте, понеж не о лычко или о ременец идет, але о цЂлую кожу, се ест о спасение душ наших и да не погибнем и дочасне и вЂчне от бога жива.

В грЂшницех от всЂх первЂйший, Во злобЂ от всЂх прелукавЂйший, В страстех от всЂх безчестнЂйший, В злонравии от всЂх богатший, В вЂрЂ же от всЂх неменший, И в покаянии не послЂднЂший.

Спасения вашего вам истинный желатель, Иоанн инок з ВишнЂ от святой Афонской горы рукою власною писал.



ОГЛАВЛЕНИЕ ПИСАННОГО В КНИЖЦЕ СЕЙ, КРАТКОСЛОВИЕ


1. Обличение диявола-миродержца и прелестный лов его вЂка сего настоящого.

2. Писание до князя Василия 4 и всЂх православних християн, ознаймуючи, як восточнои вЂры вЂрнии на опоцЂ или на камени вЂры Петровы неподвижно и непрелестно стоят, и врата адова их одолЂти никако же не могут, прочии ж вси отпали в прелест, заблудили и в ад адовыми враты затворени сут; в нем же и погреб невЂрию папы римского и ему послЂдующих.

3. Порада, како да ся очистит церков Христова, заплюглавленная лживыми пастырями и нечистым житием оных и всЂх им послЂдующих, и которий смрад поганский возлонравствися в християнах; зде и о поруганию иноческого чина от свЂтских и мирского жития человЂк и что ест тайнство иноческого образа, лЂпоутвария и прочая.

4. Писание до всЂх обще, в Лядской земли 5 живущих, да ся покают к богу, показуючи, каковы плоды Лядской земли жителей.

5. Писание к утекшим от православнои вЂры епископам о имени згоды в книжках от них выданое, показуючи, яко тая згода не таковыми, яко ж они, безплодными в вЂрЂ и житии, чинена и еднана быти мает, но святыми и духовного разума достигшими, и на прочая хулы, лож и клевету, от них на благочестие и ему послЂдующих рыгненую, отповЂд и обличение, откуду сию мудрость и разум постигли, которым так безбожне мудрствовати ся отрули.

6. ИзвЂщение краткое о латинской прелести, заблуждении от пути истинного, лжи и хоробЂ смертоносного и погибелию вЂчною смердящого мудрования, еже о вЂрЂ, о церкви, о началствЂ, о ложном чистцу и прочая.

7. О еретиках, что ест имя «ересь» 6 и что «благочестие».

8. Загадка философам латинским.

9. СлЂд краткий, приводящий к постыжению и изучению художества, приводящего ко царствующей безсмертной и вЂчной правдЂ.

10. Новина, или ВЂсть, о обрЂтении тЂла Варлаама 7, архиепископа Охридского града, в градЂ Велис убитого и в рЂку Вардар въвръженного.





О ЧИНУ ПРОЧИТАННЯ СЕГО ПИСАННЯ


Первое убо да будет прочитател искусен, в чтении бЂглый и быстрый в зраку, не повторяючи и заикаючися на одной РЂчи два крот или три, але в мЂру ровно словом по пути речений изображенных да ступает, на запятых мало застановляется, а на точках, прошедше двЂ-три или колко может вмЂстити точок, паче же где бы ся речение розумЂния кончило, там духови да отпочивает, отдыхает и постоювает, ато для того, абы и простым безкнижным слухачам розум реченых явлен и вмЂстен был.

Второе, соборно созвавши братию православных в школу рано по проспаний нощном, доколя еще молва мирская смущение и попечение на мысль бодрую и здравую не взыйдет и не оболЂет промыслом земным и доколя еще чрево не наладовано гноем снЂдных, тогда да ся читает.

Третие, не обременяти слухи немощных многочтением, но власт тридесят или больше листков прочитати, та же кончати и, закладку заложивши, на другий поранок слухачов на таковый же пир и чест духовную просити, и так, поранок поранками проходячи, дондеже совершит пир книжного речення, собрание умолити, яко да наченши и совершат слуханием здравое и трезвое мысли, что же приобрящут отсюду, мню, сами искусом увЂдят, если добре выслухают.

ТобЂ же, прочитателю, трудолюбия ради от владыки Христа будет мзда болшая стократ, нежели твой труд. И тобЂ, священиче, за собрание собора вторая равно постигнет. Аще ли же сам поревнуеши и первую восхитити, сам собою потрудитися, се ест и прочитати и братию собирати, не зазрим ти сего приобрЂтения талантоплодного. Господь до тебе поспЂшит и поможет. Аминь.

Се же вездЂ по соборах братских тако же да ся исправляет, идЂже сие писание доидет, яко да познают християне, что ест наша простая восточных вЂра и что других отщепенцов хитрое безвЂрие.





КО ПРОЧИТАТЕЛЮ НАЕДИНЂ СЕГО ПИСАНЯ


Напред тебе от тое прелести остерегаю, любимый прочитателю, да не ищеши зде хитростей слогов сплетенорЂчных наказания еллинского, але слЂд существа правды, в ней же живот вЂчный затворен ест, да щупаеши, да знаеши. Не минай скорогонцем, яко пустое коло вЂтрное, очима пробЂгаючи, от мЂста на мЂсто вперед писаного, але застановляйся на ступенях, о лжи и истинЂ рЂченых, судом мысльным и, увидЂвши, яко истина от лжи попирается погибелными сынами, жалуй, проплач и богу ся помоли, яко да даст всЂм заблуждшим на пут спасеный возвратитися и во розум истинный прийти. А о собЂ аз и сам свЂдителство вам даю, яко грамматичкого дробязку не изучих, риторичнои игрушки не видах, философского высокомечтателного ни слыхах. Мой ест даскал простак, але от всЂх мудрЂйший, который безкнижных упремудряет; мой даскал простак 8, который рыболовци в человЂколовци претворяет; мой даскал, которий простотою философы посмЂвает; мой даскал, которий смирением гордость потлумляет. ТЂмже, если хочеш на пут збавенный улучити, послухай и, если хощеши царство небесное обрЂсти, моцне дуфай. А если тя дух тщеславия наказания латинского 9 преборет и сей простотЂ моей не увЂруеши, вЂдаючи, запевне вЂдай, яко живота вЂчного не наслЂдуеш.







ГЛАВА 1


Обличение дияеола-миродержца 10 и прелестньт лов его вЂка сего скоро погибающего, от совлекшагося с хитроуплетеных сЂтей его голяка-странника, ко другому, будущому вЂку грядущого, учиненое


Евангелие от Матфея 11, глава 4:


И поят его диявол на гору высоку зЂло и показа ему вся царствия мира и славу их и глагола ему: «Сия вся тебЂ дам, аще, пад, поклониши ми ся». Тогда глагола ему Исус: «Иди за мною, сатана! Писано-бо ест: «Господу богу твоему поклонитися и тому единому послужити».

Вопрос. Тут теды, коли ся звытязство над прелестию твоею, сыну геенский, от Христа избавителя стало и смертию конечно царство твое лукавое мира сего обважено и показано (через вЂру и крещение во имя отца и сына и святого духа) всему свЂту ест, пытаю тя, як будеш зас тое гнЂздо миролюбия в вЂрных и крещеных вити и основание невЂрия языческого фундовати.

ОтповЂдь прелестника диявола-миродержца. Сталося звытязство от Христа над царством моим, признаваю, але от облеченых в имя его зовемых християн мало и велми мало, и то еще от свЂжей памяти по вознесений его на небеса чяст нЂкая, тою теплотою вЂры разждеженная, нЂгде-нЂгде от рода християнского на звытязство моего царства обралася. А нынЂшнего вЂку зась в клюбу нЂвЂрия первого зовемое християнство впало, и одным способом с поганци некрещеными мир любят и царство и роскоши его насытитися прагнут и еще болше, нежели погане, похоти телесные своволного и нечистого жития своим злым житием исполняют. А што пытаеш, якобы по Христо†звытязст†миролюбием во християнстве вшрубоватися есми мЂл, а тое пытати не треба. Таковою ж хитростию, прелестию, мечтанием и усоложением блеску и красоты свЂта того, яко же и прежде пришествия Христова. Ибо Христос образ толко побЂждати хотящим мира дал, показал и научил и сам собою изобразил, прелести же моего лживого царства мнЂ не отнял и не погубил, ато для того учинил, абы самовластие человЂческое в том искусЂ, борбЂ и пробЂ вЂка того настоящого досвЂдчалося, очищалося и на живот вЂчный нсполеровало. Але вижу, мало ся их обирает и знаходит на той тЂсный гостинец хотячих и любячих ходити; ти ж всЂ пали и поклонилися славЂ, царству, красотЂ и любви вЂка того настоящого, мною владомого. От началных и до послЂдних, от духовно зовемых и до простых, от властей и до подручных — всЂ полюбили тот мечт, блеск и пестроту красоты царства моего миреного, которую есми на горЂ Христови обнажил и показал. И всЂ нынЂшнего вЂка до того моего царства розум, мысль, любов сердечную и всю крЂпость телесную привязали, прилЂпили и приспоили сут так моцно, иж их только смерт, от бога посланная, от любви моего царства розлучити может, а другое ничтоже. И зась тое ж мовлю и показую, што при ХристЂ мовилем и показовал: хто чого ищет у мене, миродержца, аще, пад, поклониши ми ся, вся тебЂ дам.

Вопрос . Што ж ми даеш, дияволе? Именуй, да знаю наперед.

ОтвЂт. Дам ти нынЂшнего вЂка славу, роскош и богатство. Если хочеш быти преложоным, духовно зовомом, от мене ищи и мнЂ угоди, а бога занедбай; бо от того не леда як таковые достоинства дарованы бывают, а я скоро тобЂ дам. Если хочеш бискупом быти, пад, поклони ми ся, я тобЂ дам. Если хочеш арцибискупом быти, пад, поклони ми ся, я тобЂ дам. Если хочеш кардиналом быти, пад, поклони ми ся, я тобЂ дам. Если хочеш папЂжем быти, пад, поклони ми ся, я тобЂ дам. И другим всЂм, меншим преложенствам, пробощствам и поповствам в приходЂх и наданях, не так гойных и богатых, прагнучий, падши, поклонЂте ми ся, я вам дам. И до вас, мирской власти и титулу земного моего царства прагнучим, тое ж мовлю, аще, падши, поклоните ми ся, я вам вся сия прагненная вами подам. Если хочеш войским, подкоморим или судиею быти, пад, поклони ми ся, я тобЂ дам. Если хочеш каштеляном быти, пад, поклони ми ся, я тобЂ дам. Если хочеш старостою быти, пад, поклони ми ся, я тобЂ дам. Если хочеш воеводою быти, пад, поклони ми ся, я тобЂ, дам. Если хочеш гетманом или канцлЂром быти, пад, поклони ми ся, я тобЂ дам, буди досконалий угодник мой, я тобЂ дам. Если хочеш королем быти, обЂщайся мнЂ на офЂру в геену вЂчную, я тобЂ и королевство дам. И другим всЂм меншим дикгнитарствам и преложеньствам тое ж мовлю, аще, пад, поклоните ми ся и чого попрагнете от земных и дочасных, я вам дам. Тако ж и до вас, простых и неславных во моем царствЂ, мовлю: «Аще, падши поклоните ми ся, знайду я по вашей мЂрЂ и простотЂ чим вас обогачу и в прелест моего вЂка уплутаю. Если хочеш идолопоклонником, сребролюбцем и лихоимцем быти, я тебе мытником, купцем и корчмарем учиню; там твою волю и прагненя забавлятися, доколя здохнеш, привяжу и моцно до самого исхода, не мылячися з помыслом от лихоимства отодрати прикую. Если хочеш хитрецем, майстром, ремесником рукодЂлным быти и других вымыслом превозыйти, чим бы еси и от сусЂд прославитися и грошики собрати могл, пад, поклони ми ся, я тебе упремудрю, научу, наставлю и в досконалост твоего прагнення мысл твою приведу. Если хочеш похоти телеснои насытитися и господарем дому, древа и землЂ шмата назватися, пад, поклони ми ся, я твою волю исполню, я тобЂ жену приведу, хату дам, землю дарую, тое ярмо на твою шию повЂшу и твою мысль в бЂдЂ, неволи, скорби, мятежи, попечений, фрасунку и уставичном промыслЂ погребу, я тебе стражу, слугу, неволника и вязня женЂ учиню, я тобЂ всю мысль у жоны похотное студнЂ привяжу, толко поищи, попрагни и мнЂ ся поклони, вся сия аз тобЂ дам».

ОтвЂт странника от лица всЂх прелщаемых от диявола. ВЂм, дияволе, як ты все тое реченное даси, если ся тобЂ поклоню, але пойду искати и в зерцалЂ учення Христова глядЂти, тая твоя данина на пожиток ли или на погибел вЂчную будет, на славу ли или на безчестие вЂчное ся превратит, на долго ли или на малый час ся в руках попЂстует, а потом з дароносцем посполу знагла погибает и ищезает. Даси ми, дияволе, быти папЂжем, кардиналом, арцибискупом и другим нЂкоторым духовного стану именоносцем, але што за пожиток с того дарованя, коли от тебе диявола, за гордост з небес на дол зверженного, тое достоинство прийму, а не от небесного бога, которий велми заслужоным и от духа святого посвященным таковые преложенства стану духовного даровати звыкл, а не тым, которые, як псы встеклые, бЂгают, ищут, да стан духовный или имЂние оного угонят и поимают. Што за пожиток с того дару, коли я сам и от тебе, диявола, того попрагнул и поискал, а не бог небесний мене на тое достоинство везвал и избрал. Што ж за пожиток с того духовенства, коли я горшей поганца злое и нечистое житие прохожу и в калу чревное похоти и сластолюбия ся валяю. Што ж за пожиток с того священства, коли я имени святости не знаю и с иновЂрци ровно мудростию, образом и житием ся знахожу. Што ж за пожиток с той власти пастыркои, коли я раб, неволник и вязень вЂчный грЂхови ест есми, за который в геену вЂчную отиду. Што ж за пожиток с той дочаснои славици, коли я вЂчне посоромочон буду. Што ж ми за пожиток с той малое роскоши, коли я во вЂки в огни печи и скважитися буду. Што ж ми за пожиток с тых сел, и имЂней, и богатства великого, коли я наг и гол, без всего того, в пеклЂ седЂти буду. Прето вЂдай о том, дияволе, иж я поповского преложенства и стану от вышнего и до послЂднего стопня, от тебе дарованого, не прагну и тобЂ ся поклонити не хочу. Господу богу ся единому поклоню и тому единому послужу. Иди за мною, сатана! Даси ми зась, дияволе, быти кролем, канцлером, гетманом, воеводою, старостою, каштеляном и другим нЂкоторым дикгнитаром и преложоным власти мирскои твоего дияволского царства. Што ж за пожиток с того твоего дарованого поганского началства, коли я християнство страчу и живота вЂчного отпаду. Што ж ми за пожиток с того твоего мирского титулу, коли я царства небесного титул погублю. Што ж ми за пожиток с того голоса кролевства, канцлерства албо воеводства, коли я сыновство божие страчу, безсмертный титул. Што ж ми за пожиток с твоее малое славицы временное тытулку и гнилых и суетных уст хваления, коли я от божое вЂчное славы отврЂжен буду, титул помазанства божия погублю и похвалы ангельских уст отпаду. Я теды, дияволе, таковое власти и титулу от тебе не ищу, тобЂ ся поклонити не хочу. Господу богу единому ся поклоню и тому единому послужу. Иди за мною, сатана! Даш ми зась, дияволе, купцем, лихоимцем, мытником и корчмаром быти, да тым лихоимством и упражнением розум свой погребу и ослЂплю. Што ж за пожиток с того твоего дару, коли свЂта истинны науки слова божия видЂти не могу и вкусити сладости его ся не сподоблю. Прето да знаеши, дияволе, як я от тебе того идолопоклонного титулу и забавы жития моего в нем не требу, тобЂ ся не поклоню. Господу богу единому поклонюся и тому самому послужу. Иди за мною, сатана! Даш ми зась, дияволе, ремесльником хитрым и славным быти, да межи сосЂди славнЂйшим, годнЂйшим и честнЂйшим быти, грошики собЂ зберу, фолварки покуплю, домок приоздоблю. Што ж за пожиток с того всего твоего дарохитрства, коли я простоты Исусовы навыкнути не могу. Што ж ми за пожиток з славы и чести сусЂдское, коли я в лику пророк, патриарх, апостол, мученик и добре богу угодивших славитися не буду. Што ж ми за пожиток з многих фолварков и оздоб домку, коли я красных дворов горного Иерусалима 12 не узрю и не во едином кутику в оном посидЂти не сподоблюся. Прето я от тебе, дияволе, тое майсторЂи славы и чести не требую, грошиков збирати, фолварков и домков куповати не хочу, тебЂ ся не поклоню.

Господу богу единому поклонюся и тому самому послужу. Иди за мною, сатана! Даш ми зась, дияволе, убогому и неславному человЂку, утЂху и похот телесную, жону, даш ми домок и землицю, даш ми смуток и бЂду, да свой розум в той забавЂ, фрасунку и стараня домового, земленного и женского погребу. Што ж за пожиток с тое утЂхи и похоти телесное, коли я утЂшителя духа святого витати во своем кгмаху сердечном николи ся не сподоблю. Што ж за пожиток с тое жоны, коли я Христа, жениха, своей ложници сердечной пришедшого упокоитися и спочинути, видЂти не могу. Што ж ми за пожиток с того домку, коли я в палацу небесного мЂста Иерусалима седЂти не буду. Што ж за пожиток с тое малое землици и кгрунтику, коли сторичное заплаты, реченное Христом в царствии небесном а оставление сих, не прийму и живота вЂчного наслЂдником и дЂдичем быти не могу. Прето да знаеш, дияволе, як я от тебе жоны, дому, земли дочасное не прагну, тобЂ поклонитися не хочу. Господу богу, во троици славимому, поклонюся и тому единому послужу нынЂ, все время жития моего и во вЂки вЂков. Аминь. Иди за мною, сатана, изчезни и пропади сам и з царством своим прелестным! Аминь.





ГЛАВА З


Буди ж вам извЂстно правовЂрным, як сего ради попущена есмо в сей искус, зане ж поеретичихомся вси обиталници Малои Русий и от бога устранихомся далече, к невЂрию и зложитие припрягше, тЂмже возвратЂмся к богу, паки, да бог к нам ся приближит; он бо ест всЂгды близ, грЂхи ж наша далече нас отлучают от него, сего ради покаймося сани в своих согрЂшениях, кождо суд собЂ сотворите. Посем и благочестие правовЂрия церкви нашее така исправити совЂт вам, истинен и неблазнен, даю


ПервЂе да очистите церков от всяких прелестей и забобонов еретических и, без пестроты, в простотЂ сердца бога хвалЂте; латинский смрад пЂсней из церкви изжденЂте, простою же нашею пЂснию рускою поюще бога благодарЂте. Посем до вЂри нашой восточной православной без всякого вонтпеня всЂм сердцем, душею и смыслом ся приложЂте, еретичество и невЂрие всякое от себя отвержЂте. Иконное поклонение с учтивостю почитайте и в домех, идеж пребывайте, образ матери божои с превЂчным ее младенцем на стЂнах в концу трапезы вашее пригвоздЂте. Крестом Христовым, до церкви пришедши, креститися не соромЂйте; абовЂм нынЂ християне Малои Русий поеретичЂли, як креста Христова, славы своеи, на нем же нам спасение содЂяся, соромЂются. И не толко в церкви, але и на трапезу сЂдаючи, крестом ся знаменайте; если бы и латина или еретики быти с тобою ся прилучили, не соромЂйтеся рода прелюбодЂного жизни сея, да не посрамлени будете на вселенском позорищи, ибо нашее вЂры тайнства увесь мир вмЂстити не может, иншои же вЂры всЂ суть прелести. На трапезЂ без молитвы (свински) ясти не начинайте, як же ныне оскотЂли есте. По наядении зась благодарение по уставу церковному творЂте. До церкви на правило соборное ходЂте и в всем по уставу церковному (ни прилагающе от своего умысла что, ни отимающе безстудием, ни раздирающе мнЂнием) творЂте и по закону нашему християнскому жизнь сю проходЂте; еже бо дух святый уфундовал вмЂстившими его усты, тамо поправы гнилых земных помысл не потреба. Евангелия и Апостола в церкви на литургии простым языком не выворочайте. По литургии ж для зрозуменя людского попросту толкуйте и выкладайте. Книги церковные всЂ и уставы словенским языком друкуйте.

Сказую бо вам тайну великую: як диявол толикую зависть имает на словенский язык, же ледве жив от гнЂва; рад бы его до щеты погубил и всю борбу свою на тое двигнул, да его обмерзит и во огиду и ненавист приведет. И што нЂкоторие наши на словенский язык хулят и не любят, да знаеши запевно, як того майстра дЂйством и рыганем духа его поднявши творят. Ато для того диявол на словенский язык борбу тую мает, зане ж ест плодоноснЂйший от всЂх языков и богу любимший: понеж без поганских хитростей и руководств, се ж ест граматик, рыторык, диалектик и прочих коварств тщеславных, диявола вомЂстных, простым прилежным читанием, без всякого ухищрения, к богу приводит, простоту и смиренне будует и духа святого подемлет. «Во злоковарную же душу, — рече Премудрий, — не внийдет премудрост», што нынЂ латинская злоковарная душа, ослЂпленная и насыченная поганскими тщеславными и гордыми догматы, страждет, которая божие премудрости и розума духовного, смирення, простоты и безлобия вмЂстити никакож не может. ТЂмже блюдЂте, православний, от тое трутизны дЂти свои, зане да знаете, истинно вам мовлю, идеж дух любви сим поганским, мечетным, мира сего угодным догматом прилнет, тот запевне в вЂрЂ погрЂшит а згола и от благочестия отпадет: што есте нынЂ вы явно пострадали, егда есте на латинскую и мирскую мудрост ся полакомили, тогда есте благочестие стратили, во вЂрЂ онемощили и поболЂли и ереси породили, и в него ж крестихомся прогнЂвали. Чи не лЂпше тобЂ изучити Часословец 13, Псалтыр 14, Охтаик 15, Апостол 16 и Евангелие с иншими, церкви свойствеными, и быти простым богоугодником и жизнь вЂчную получити, нежели постигнути Аристотеля и

Платона и философам мудрым ся в жизни сей звати и в геену отити? Разсуди! МнЂ ся видит, лЂпше ест ани аза знати, толко бы до Христа ся дотиснути, который блаженную простоту любит и в ней обитель собЂ чинит и там ся упокоивает. Тако да знаете, як словенский язык пред богом честнЂйший ест и от еллинскаго и латинского. Се же не басни сут. Но нынЂ о том довод широкий чинити мЂста не маю, абовЂм о очищений церкви нашей православной ся рЂч зачала и далей точити будет.

На священический степен по правилах святых отец да восходят, а не по своих волях, похоти плотской ради, имЂния и панства сан да восхищают. И всякого такого, котрий сам наскакует, не приимуйте и от короля данного без вашого избрания изжденЂте и проклинЂте: не в папЂжа бо вы крестилися и не в королеву власт, да вам дает волки и злодЂи, разбойники и антихристовы таинники. ЛЂпше бо вам без владык и без попов, от диявола поставлених, до церкви ходити и православне хранЂти, нежели с владыками и попами, не от бога званными, у церкви быти с тое ся ругати, и православне попирати. Не попы бо нас спасут, или владыки, или митрополиты, але вЂры нашои тайнство православное с хранением заповЂдей божиих — тое нас спасти мает. Прето вы пастыря собЂ такого избирайте; прежде назнаменайте нЂколико особ от жития и разума свЂдителствованных, яко сут благоговЂйны и правовЂрны, таж узаконЂте собЂ день и пост и сотворЂте бдЂние, совокупившихся в церков, и молитеся богу, да вам даст и открыет пастыра; его же жребием от сих речених искушайте. Бог же милостивий моления вашего не презрит, вам пастыра даст и объявит, которого приемши за пастыря, тогда свЂтскую власт (се ест короля, да вам того подаст) ищЂте, которого если не схочет вам подати и не послухает вас, узрите его скоро до конца оглохнувша и онЂмЂвша: зане поставлен суд прав судити, а не своее вЂры прелесть фолкговати. Толко вы к богу истинною ся обратЂте: все тое вам бог чудотворне устроит. Сих проклятых владик никакож не приимуйте и молЂтеся, да отгнани будут, аще ли же власт свЂтская не хощет, узаконЂте собЂ день молитвеный по всЂх градЂх и помолЂтеся богу. Тогда узрите игрушку короля вЂры папы римского, хто владЂет над православними, Дурною Русю и в неволи будучими греками.

Двоженцы и церкви купление очистЂте. МонастырЂ, на благочестие наданые, от фолваркового имени на общее житие пременЂте, зане нынЂ владыкове проклятые фолварки собЂ починили з общих монастирев и мисливства прекормлюют в них, а не душЂ, спасаемые на живот вЂчный. Иноческого чина не поруговайте, но и сами ся богу молЂте, да в том чину жизнь свою скончаете, як же первые предки ваши, которие еще в благочестии ненарушеном были и милость божию при собЂ близко мЂли. А нынЂ вы, отродки их, егда попремудрЂли, тогда и бога стогнали, и благочестие стратили, и з иноческого чина ся смЂете и духом проклятого диявола хулите. Или не вЂдаете, бЂдници, если бы не было истинных иноков и богоугодников межи вами, уж бы давно, якож Содома и Гоморра, жупелом и огнем у Лядской земли есте опопелЂли. Да что ради ся ругаеш из слЂда скорбного по животу вЂчному, еда ты что добро твориш, на пути пространном и погибелном стоячи, еда бог на твою пыху многослужную и на твою трапезу среброполмисную, и на твои потравы богатоутворенные и на твое черево сластолюбивое, и на твои хорты и выжлы сытые, которими ся тЂшиш и веселиш, глядит. ВЂру ми ими, если бы вас иноки пред богом не заступали, уже бысте давно з всею потЂхою своею мирскою изчезли и погибли. Прето прошу тя, любимый мой брате, потерпи мя мало: хочу с тобою о том побесЂдовати и тебе от тое прелести освободити, да избЂжиши гнЂва и суда божия за тое твое ругание и смЂяне.

Начало ж оттоля чиню. Чому ся ты, римлянине, смЂеш з духовного иноческого чина? Ты ж ми, вЂдаю, отповЂси: «Для того ся смЂю, иж каптур, или страшило на голо†носит, што мы зовемо клобук, и зась смЂюся, иж волося долгое носит и не подголився, и зась: простое одЂне носит, шито некшталтовне, як в мЂх оболокся, и зась: поясище нЂкчемное скураное или ремЂнное, черевичище нЂмаш на што погледЂти или чоботища невытертыи, аж гадится погледЂвши на них, а до того, хлоп простый, не знает и поговорити с чоловЂком, коли его о што запытаеш». То ест твои розум, мирянине, о иноческом чину и убире.

ОтповЂдь. Тую тайну иноческого чина убиру я тобЂ открыю, толко прошу тя пилне послухай.

Каптур тот, или страшило, а по нашому клобук, которому хвост висит на задЂ, праведно ест назвати страшило. Чому? АбовЂм страшит и много причин замыкает в собЂ. Первое, страшит бЂсы. Для того, иж крест Христов на рамо взял, из мира вызулся и печать на голо†поставил, што юж в мир обратитися не мает, тым клобуком знати даючи. И як бы нЂкий голос, так и потрясане того хвоста дияволу отповЂдает, мовячи: «Порожне ся трудиш, бореш и прелщаеши мя, дияволе, да ся до макгерки, тобЂ угодное, обращу. Уже мя не узриш, дияволе, перекривляючи макгерку то на той, то на сей бок, шию напяливши, як индийский кур, да пыху свою в моей голо†(где образ божий седит и панует) показуеши и на свое угодное моею головою куда хочеш поворочаеши и напинавши». Што диявол видячи, иж тот хвост клобучный отнял ему пожиток пыхы головное, и боится и безчестится от так нЂкчемного, незвиклого, некрасного, нЂкому нелюбимого, мирским брыткого, на посоромачене мирскои красоты духовне вымышленого строю ношеня того клобука. Боится для того, абы тот клобук многих на живот вЂчный от макгероносцев не половил и в мудрование небесное не вовлек, посоромочается зас, иж юж отмЂны частое в купованю шапок и в выбираню, которая красшая и на голо†кшталтовнЂй стоит (да ся зрителем приподобает, косичку или пЂрце запявши), не мыслит и о угождении человЂком в приподобаню образа, или головы, мысль свою о том не упражняет, але юж мыслит, як мир тот до конца возненавидит и ко будущему вЂку дЂлы добрыми ся уготовит. Се ест первая причина того клобука. Вторая причина: посромочует красоту и пестроту мироугодных и красоту любячих своею шпетностю и нЂкчемностю. Третяя причина: ругает и безчестит мир, зане не любят его очи мироугодные, што нецудный кшталт ношеня вымышлен. Четвертая причина: смЂется явно з шапок и макгерок чирвоных и чорных, кутнорованых и голых, ато тым, иж тыи ко приподобаню человЂческом ся носят, а сей к приподобаню единому богу. То ся рекло о клобуцЂ.

О волосю зась — одно: для того инок голо†зазрости попустил, абы был шпетный на видЂню головном. Другое: для того, абы женскую плоть во огыду и мерзость на себе воздвигнул для неблажненя взроку; обычай бо ест мирским на облупленую голову носячого подголенца, виструганого, мылом вишарованого и вымакглеваного, пилне смотрЂти и мыслью похотною (если и не самым тЂлом) блудити. А на оброслого, косматого и неумытого и ко любви не прикислого, если и позрит, однак от мерзячки некрасного образа помыслом скоро отскочит и не согрЂшит. Третяя причина: для того оброслую голову носит, абы был розный от облупенца и образом, и одеждою, и житием; ов бо из мира изыйде и ко будущему вЂку мыслию пелкгримуе, а подголенец в мир странствует и мир мысленно в собЂ розширяет и множит; ов о богу и животЂ вЂчном ся поучает, а гологлавец, како да человЂком ся приподобает, а для того, як небо от земля, так голая голова от косматой мыслию, достоинством, годностю и учтивостю пред богом далече отстоит. Се ест причина косматого волося.

А о одежди, иж некшталтовную и як мЂх вшитую инок носит, вопрошу я тебе перво о тайнст†жития нашего в мирЂ сем, потом ти и о одежди отповЂдь дам. Вопрос. Скажи ми, любимый ругателю, чогб дЂля родился еси и пришол в мир сей, — да живеши или да умреши? А если же, родившися, хотЂл еси мертв быти, а не вЂчне жити, чему еси ся и родил? Чому тя тая окаянная утроба и выпустила, — коли на смерть, а не на живот? Тут, знаю, на то не вмЂеш отповЂсти, что ест смерть и что ест живот. Але потерпи мало, я тобЂ тот узлик короткими словы розвяжу. Смерть ест рожденому се, иж мир сей любят и тому мысль свою приковали суть и водлуг тЂла живут и мудруют, которие трупа своего боготворят и, як идола, розными фарбами, так и сего трупа розными шатами пестрыми украшают, одЂваючи перемЂняют и ненасычоную любов к прелести шматя того злотоглову или ядамашку, шкарлату и инших сукен, скупостию тым подобных, привязали суть и на том мечтании всю мысль свою истощили суть, ко богу же и ко будущему вЂку, — никако же позрЂти, ани позрЂти не могут. Ато для того; иж в смерти сей вЂка сего помыслом плывати изволяют, а за тым от тоя смерти жизни сея на будущую вЂчную смерть восхищают, — то ест рождение на смерть. На живот зас родитися — тако, которий изшедши из утробы в мир сей и дошедши досконалого взросту, коли юж мысль розсуждати злое от доброго силу мает. Тогда и той розсудит, як скоро от жития сего преходит и вся красная мира сего, если и не хочет оставити, мусит и з собою ничтоже не понесет тут теж их уживати и мысль свою в них погребсти, безсмертие погубит и от живота вЂчного и славы божия отпадет. Та же, смысливши и розсудивши в собЂ тот гостинец, возмет мир сей и в нем всЂ красоты, пестроты и прелести повержет и возненавидит славу, честь и достоинство мира сего обезчестит, поплюет, потопчет и посмЂет с помыслом своим, якож з нЂкой темници на свЂт свободы к богу смотрЂти и о жизни вЂчной поучатися и мыслити вырнет, одною свиткою, мЂхом шитою и некшталтовною, ся одЂет на надежду бога живого, с той ямы мирское на ровнину выскочит, тогда мыслию ни о чом другом ся не фрасует ани старает, толко як славу господа своего узрит, ему угодит и с ним в вЂки царствовати будет. Таковый на живот в мир сей родился и тут о бозЂ жизнь живет и по смерти с богом вЂчне жити будет. Тебе ж, смЂшнику з иноческои некшталтовнои одежи, вопрошу, что ти ползует красная и кшталтовная одежда, коли темница вЂчная тя с нею покрыет. Что тя ползует злотоглавовая делЂя, коли ад тя с нею пожрет? Что тя ползует алтембасовый копеняк, коли геена тя в надра своя тя с ним приимет? Яко зас сопротивно: что повредит от тебе посмЂянного мЂхом шитая и некшталтовная одежда, коли присносущный узрит, коли царство небесное получит, коли радости отца и сына и святого духа ся сподобит? Или не вЂдаеш, смЂшнику, яко на врожденных женами болшом тая мЂхом шитая и некшталтовная одежда изображена ест;

«Облечен бо был, — рече, — Иоанн в одежду от влас велблюжд». То видиш, иж не мовит: «Убран, як идол, красно», — але просто облечен, яко покаянню проповЂдник. А покаянне пестроты не потребует; довлЂет ся тЂло кающееся, толко да ему наготу покрыеш. Прето хто хочет ся покаяти, — мЂхом щитую одежду хочет оболочи, а если ни покаяння не имает, и царствия божия не узрит. Если бо царие, Давид и иншие, попелом головы свои посыповали, и веретищем ся одЂвали, и на земли голой ся помЂтали, и постом внутрнюю свою мертвили, и кости свои сушили, каючися пред богом, як да получат милость от него, а ты што розумЂеш о собЂ выбритвивши потилицю, макгерку верх рога головного повЂсивши, косичку или пЂрце верх макгерки устромивши и делЂю на собЂ перепявши, плече одно вышше от другого накокорЂчивши, як полетЂти хотячи, — тобЂ ли покаяння не треба? ВЂру ми йми, еще болши от других потреба, зане дворское злое житие всЂ> границы прироженя и цноты кгвалтует. Досыт теды о одежды некшталтовнои ся рекло.

Уже о поясЂ речи хочу. РемЂнный зас пояс для того инок носит, яко да убиет и уморит под ременем телесное кожи внутр криючиеся страсти, похоти и всякия прагненя грЂхолюбивое, придавляючи кожу кожею, и зас для того пряжкою замыкает черево, стягнувши моцно, да в мЂру наладует тую шкуту или комягу утробную; бо кгды ее переладует, тогда ум сном и лЂностию погружается и утопает, а егда в мЂру бремя наложит, тогда лацно плывати может, то ест молитися, читати без забавы сна. А о некрасотЂ пояса: тую ж силу мает, што и камилавка. О поясЂ досыт уже.

Уже ступим до невытертых черевиков или чобот. Тые для того инок так носит, да тебе, мирянина, от себе отженет и мирен будет. Бо если бы красного што на собЂ носил, ты бы на него милейко поглядовал, и говорити з ним прагнул, и порожными бесЂдами зачепал, а в том бы ему перешкоду и забаву, мысль отторгаючи от памяти божия, чинил. А коли видиш, иж болото мает на черевицЂх, и твои очи не звыкли того смотрЂти неохендозства, тогды бЂгаеш от него, мерьзячи тым неоздобным строем, чому он и рад, як да свободно богу ся молит. И зас для того нехорошую обув носит, яко да безпечне на змию, скорпию и всю силу вражию наступит и аспиду и василиску голову сокрушит; бо если бы хорошую обув любил, еще бы помыслом в миру ся знаходил и той силы бы наступати на змию и на скорпию и всю силу вражию не получил, и в годности мудрования мирского с тобою, дворянином, в одной господЂ бы ся знайшол. Але стой ты, крывоногий бачмажниче и з своею крывоножною бачмагою, ци можеш нею так попрати силу вражию, яко тот невытертый черевичище. Мнимаю, што тя омылит тая надЂя. Ато чем? Для того, иж сила вражия внутри, в долинЂ пяты твоеи бачмаги, сЂдит, и она тот строй вымыслила и с тебе ся всЂгды явне смЂет, коли ты ноги в бачмаги вволочеш. А трафит ти ся перед паном стояти, тогда сила вражия не попущает ти ровно ногами стояти, але подтыкает тя, да переплЂтаеш ногами, то тую то сюю наперед поставляючи и на пяту зас выворочаючи; ато сила вражия куда хочет ногами твоими поворочает для того, иж власть в ногах твоих мает и сама под пятою сЂдит. А черевичище невытертое иноково не так, але як стало на одном мЂсцу от вечера перед богом на молитву, тогды, як камень неподвижный, доколь аж ден освЂтит, стоит и бЂсы от тои коморки, где ся молит, далеко отганяет — тую силу мает нехорошая обув инокова.

Еще остало о простотЂ о невмЂетности заживаня бесЂд мирских иноку. Тое призназаю ти, што еси рекл, як не вмЂет инок з дворяны, смЂхотворци, курцыаны, шкурты и блазны, говорити. Ато для чого? Для того, иж он тые бесЂды и прожномовства уморил, убил и память тую мирских справ запамятанем погреб и в простоту от мирских хитростий ся преселил, толко да с богом и ко богу мыслию и памятию будет. Ты теды, дворянине или мирянине, што знаеш и як он ест дурен и не знает ничого? Албо не вЂдаеш, иж твоя бесЂда, и хитрость, и многословие глупством есть пред богом, по Павлу: «Премудрость бо мира сего, — рече, — кглупство есть пред богом» и зас: «Если ся кто мнимает быти мудр в вЂцЂ сем, нехай ся учинит глупым, яко ничого незнаючим, тогда будет мудр». А ты для чого, брате, посмЂваеш инока — или для того, яко он ест прост в хитрость, а ты мудрец в лукавство? То где тая мудрость ся узяла, которая смЂху и руганя учит, не знаеш? Да ли не вЂдаеш, иж то не ты ругаеш ся и смЂеш з инока, але тот, который мЂстце своей владности собЂ уфундовал в тобЂ, тот, который, опановавши мысль твою, там сЂдит, а том начиню владЂет, розказует и оборочает куда хочет волю и мысль твою. Тот то мирский цар тобою смЂется з инока, которому житием своим ему служиш, угожаеш и во всем волю его выполняеш. Тот то тобою смЂется з инока, который июдейским родом смЂялся и ругал с простака незлобивого, инокова господина Христа. И где ж еси тое в писаний знайшол или от которого учителя, писание читаючого, то еси слышал, яко повелЂвает не толко з инока, сына божия, але и з простого християнина, еще ярма и креста не вземтиаго и вослЂд бога не изшедшого, и не толко с християнина, але и з иновЂрца, жида и поганца, да ся смЂеш и ругаеш? Или не вЂдаеш, иж житие се плача и подвига ест, а не смЂху и утЂхи; «ВсЂ бо, — рече, — святий, плачуще, из мира сего идоша», — а если святые, плачуще, из мира изидоша, и тобЂ ли, грЂшнику, не подобает за грЂхи плакати. Видиш ли, яко еси окраден от того злодЂя, што хитро ровы рыет и ямы подкопывает, да, внутр влЂзши, скарб цноты и уцтивости украдет! Видиш ли, як еси розбить от того розбойника, которий в дубро†ся крыет и на могилу часто взбЂгает, выглядуючи, да нЂкоторого купца православного во вЂрЂ оружием ереси безбожия розбиет. Видиш ли, яко еси зъеден от того волка, который под оборою лежит, пилнуючи, да нЂкоторая овца спосрЂд вЂрных и единогласных мнЂманем ся на двор з загороды выхватит, да ю поймает и обЂд собЂ еретичества з нее учинит! А што ж инок не вмЂет бесЂдовати с тобою? Албо его пытаеш о дияволских прилогах? Албо его пытаеш о борбЂ духа с тЂлом и безпрестанном мечтании мысльном? Албо его пытаеш о скорбех внутрених, алчи и жажди? Або его пытаеш о войнЂ помысла с духи лукавыми поднебесными? Албо его пытаеш о подвизЂ молитвеном тЂла и мысли? Албо его пытаеш о том, в чом живот вЂчный крыется? Или не вЂдаеш, як в том житии, котрого ти живеши, еще ни во снЂ тобЂ о том приснитися не может? Или не вЂдаеш, иж в тых многих мисах, полмисках, приставках, чорных и шарых, червоных и бЂлых юхах, и многих скляницах, и келишках, и винах мушкателах, малмазиях, алякантах, ревулах, медах и пивах розмаитых тот смысл еще мЂста не имает? Или не вЂдаеш, яко в статутах, констытуциях, правах, практыках, сварах, прехитренях ум плавающий того помысла о животЂ вЂчном подняти и вмЂстити не может? Или не вЂдаеш, яко в смЂхах, руганях, прожномовствах, многомовствах, кунштах, блазенствах, шидерствах розум блудячий того помысла о животЂ вЂчном видЂти николи ся не сподобит? Или не вЂдаеш, яко зе псы братство принявший, с хорты, окгары, выжлы и другими кундусы 17 — и о них пилность и старане чинячий, абы им боки полны, хребты ровны и гладки были, того помысла о животЂ вЂчном видЂти не может? Или не вЂдаеш, як на тых гордых бадавЂях, валахах, дрыкгантах, ступаках, единоходниках, колысках, лектыках, брожках, каретах, котчиих 18 труп свой пременяючий о животЂ вЂчном мислити, вмЂстити не может? Или не вЂдаеш, яко в замках, мЂстах, селах, полях, кгрунтах, границах, розширенях мысль блудячая о царствии божом мыслити не может? Или не вЂдаеш, як многопредстоящим гологлавым, трепЂрным и многопЂрным макгероносцем, шлыком, ковпаком, кучмам 19 высоконогим и низкосытым слугам, дворяном, воином, жолнЂром цвЂтнопестрым и гайдуком-смертоносцем радуючийся о царствии божом не толко мыслити, но ни помечтати не может?

Тут ся, вЂм, устрашиш и речеш, яко ученици Христу, егда им рекл, як неудоб богатии внийдут а царство небесное; отповидЂли ученици с ужасом: «Если так ест, як мовиш, господи, то кто может спасен быти?» И зас речеши: «ВсЂ ли власти и цареве, бывшии и хотячии быти, погибли и погибнут?» На тое ти коротко отповЂм и тот узлик скоро розвяжу. Истину тобЂ мовлю, што мало ся их и спасло и спасет, и всЂх тых личбою знаемо, которие на спасение в той жизни вЂк свой богобойне изнурили и плоды християнства в собЂ показали, а другий всЂ погански, тирански, мучителски и неучтиве жили и погибли и памят по собЂ своих справ злых на хулу и поругание вЂчное оставили, а благочестивые царие и на небеси и на земли нынЂ от уст богохвалных ся прославляют. Што ж ест плод власти, чим бы ся спасти могла? Да знаеши! То ест первое: смиренне, — розумЂючи то о собЂ, иж нЂмаш ся чим гордити, за што пытан и истязан хочет быти, если бы не ведлуг волЂ божей повЂреное ему до часу добре и пристойне не устроил, яко добрый и вЂрный шафар пана своего. Второе: меншост и послЂдност, — розумЂючи то о собЂ, если и высоко сЂдит и вышше всЂх глядит, але земля и прах с низкими ровно ест, и тое ж: албо и горшей во гробЂ от червей тот труп постраждет. Третее: безхвалие, — розсуждаючи в собЂ, иж нЂмаш ся чим хвалити, што во вЂки не пребывает и скоро ся отмЂняет, и в конец изчезает и погибает. Четвертое: милост, щедрост, добронравие и добродЂтел, — солнечного круга подобие носячи, всЂм свою утробу ко змилованю отворяти и всЂх своим оком недостатки и потребы досвЂдчати, озаряти, дозирати и тых потребы наполняти. Пятое: благоговенство, — и то ест: учтивост, боязнь и встыд заховати и всЂгды при собЂ имЂти к богу и святым. Се же ест христоносцев, пут скорбный взявших: молити, просити, припадати, блажити, утЂшати, почитати, велбити и хвалити, — яко в слЂд божий изшедших. Ато для того, як да и ему будут поспЂшници до ласки божое, которое сам знайти не может за забавою власти и ряду миру чинячого. Тым обычаем таковый властелин, корол или княз, спастися может: приложивши до доброго жития суд и правду и не на свою добродЂтел мирскую, але на тыи сиромахи, с хвостами каптуровыми ходячие и мЂхом шитую одежду, поясище ремЂнное, черевичища невытертые носячие (яко да посилуют милость божию молитвами простити такому господару или князю грЂхи, елико яко человЂк согрЂшит з неосторожности мирское забавы), надЂючися и уфане певное маючи. Так бовЂм и первые благочестивые царие християнские (в церковных историях знаходимо) чинили, пЂшо в пустыню драбантовали и там о ХристЂ забавляючихся на помоч или о причину к богу своею покорою собЂ еднали, и сухого хлЂба з ними ся причащали, и еще похвалу тому гощеню и честованю тым обычаем чинили, мовячи: «НЂколи же, — рече, — царская многосмышленная трапеза так мя не усолодила и во любовный насыток не пришла, яко ж твой сухий хлЂб и тое зелийце, честный отче!» — и тако, благословение приемши и ласку собЂ у них зъеднавши, в свои полаты с миром ся возвращали, и царство (богу поспЂшествующу) мирно и добре строили, и спасение получили. А нынЂ межи ляхи князеве руские всЂ поеретичЂли и християнства истинное вЂры отступили и еще на слЂд божий хулят и ропщут, иноческий чин ругают, посмЂвают, злословят, лжут, клевещут, судят, мръзят, безчестят и до конца ненавидят и, учинивши тое плодоносне, еще спастися сподЂвают.

Не надЂйтеся, не надЂйте спасения, если ся до тых клобуков з любовию не обратите. Я вас упевняю и тую тайну открываю вам: если б тые каптуроносци межи вами не были, юж бы есте давно погибли, юже бы есте тые власти давно потратили, уже бы есте тот декрет, на июдея Христом реченкый («Се оставляется дом ваш пуст»), давно отнесли! Але тые клобучники вас перед богом заступают, иж милость божия терпит безбожност вашу, очекиваючи вас, да ся возвратите на покаяние и во первый чин благочестия устроите. А если бы тые межи вами не были или не будут, — разумЂюци, разумЂйте! — иж як слина зчезнете и запустЂете! А если не вЂриш моему реченню, глядячи наперед, обозришся назад за себе — в недавно прошлых часЂх што ся стало — и вЂруй! Не пуст ли ся стал Слуцких дом 20, егда в папЂжа хитрого увЂрили, а простоту рускую отбЂгли! Во истину пуст, и поколЂня благочестивого рода уже там не обладает!

Але речеши: «Другий?» И тое слово от несмыслства мовячи: «Ато ли ся латинЂ щастит и шанцует в славЂ, в можности, в розширеню машкарского и комедийского набожества, четверорогатыми исусоругателми розтягненого и умноженого? Признаваю ти тое, иж так ест. Але потерпи: тот узлик хитросвязаный радою божею тобЂ розвяжу. Не буди (одно) лаком, скоро узрЂвши чячку, попрагнути ее, бо тя зрадит як Адама, но розсуди первое, если на пожиток ти ест и живот, а не на пакост и смерт. Щастится папЂжеви? Але ци не умрет? Или папЂж не умирает для щастя? Як розумЂеш? Але, вЂм, Же тое знаеш и ты, яко папЂж умирает також, як и той, которий щастя нЂмает, и горше. А горше чем? Для того, по Давиду, «иж смерть ест грЂшникам люта». А грЂшник ест, которий мирского щастя ся наел, от которого розпукнутися и нагле здохнути мусит. Для того ест тая смерть — лютая. А егда щасливый люто умирает, где ж его щастя? Пошло ли з ним или ту другим на прелест остало? Знаемо всЂ, иж тут у нас, живых» остало. А егда з ним не пошло окаянное ж то щасте, — и недостойно ест, да его тым именем завемо, але пристойнЂ его мордырем называти. Ато для чого? Для того, иж смертию лютою человЂки убивает и во смерть вЂчную на муку отсылает. Што ся показало на оном щастливом богатом, который бЂдника Лазаря, перед вороты лежачого, пребачал? А коли от того весели и триумфу радости мирское порван, тогды зараз во адЂ ся знашол, тогды зараз во огнь ввержен был, тогды зараз в препалене утробы сытое, сластолюбное, винолюбное, многопитное на прагнене капли воды достиг. Чого не получил тым, иж щастя з собою от мира не уволок, але его, рад не рад, в миру оставити мусЂл? Щастилося и Стефану, кролю полскому 21, але чи не умер? Албо з собою кролевство полское затягл? Не видимо ли всЂ, як ту все цЂло зоставил, толко сам в земленые надра впроважон? Щастится и нынЂ латинЂ, але ци не помрут? А егда помрут, где ж их щастя, где их слава, где их памят? Не со шумом ли погибнет и погибла? и чим же прославил Костянтин Острозкий 22, которий простоту християнскую отбЂг и хитрост мирскую папЂжское вЂры, як чачку прелестную, ухватил? Не скоро ли щез и пропав? А чем плод по собЂ не оставил? Для того, иж християнство стратил. Потерпи теды конец и других, потерпи, а не лакомся на початок того щастя. Терпит бог латину, тое таемници не знаеш, але Руси не терпит, але змЂнников руских искореняет. Чему ся лакомиш на щастя убываючее? Лакомся на благословенне божие живячее! Не мовлю ти, да не имаеши ничого от житейских. ИмЂй, але от благословения божия, яко ж Авраам, а не от лжи и хитрости, мятлярства и прокурацыи, як папЂжники. Зане благословенне божие на домЂх православных християнских почивает, а на прелестных вЂрах мира сего щастя панует, которого от християнского рода прагнучий з домом ся искореняет. Для чого? Для того, иж благословення божия отступает, вЂру к богу погубляет и надежди во бога отбЂгает, на мирское ж щастя очи вытрЂщает и, видЂвши тую чачку прелестную, лакомится и обЂма руками сердца и помысла хватает и оную трутизну, як Адам, красно во видЂние и добро во снЂд овощие того щастя зедает и по насыченю ся отрувает, нагле здыхает и от ласки божее и нынЂ и вЂчне отпадает. Чи не лЂпше ж от благословения божия, если и мало што мЂти и со богом всЂгды быти, нижли мирским щастем ся обогатити и бога, тут во мирЂ и по смерти, вЂчне ся отлучити? Авраам благословенний под дубом жил, а царства щастя мирского околичные, богатые в скарбы, в войска и в тумулт людский, в замках, в палацах, злотом угафтованых, были, але Авраам от всЂх лЂпший, цнотливший и своим малым, от бога ему данным, над царскими незличоными скарбы богатшим был. Ато чему? Для того, иж богу угодил. Тые щастя царств или уживаючие их исчезли, пропали, а он и нынЂ с памятию живет. Чем ся лакомиш на щастя папЂжово, а не лакомишся на благословенне божие? Не много ли было в странЂ Авситидстей 23 богатых и славных, щастя мирского? Але человЂка не было, толко Иов; але богу угодника божия не было, толко он. Чем ся лакомиш на щастя, не от бога данное, а не лакомишся на благословение божие, от бога исходящее на достойных? Не много ли было богатых и славных, щастя мирского во Ниневгии градЂ, але Товий не было, толко един; але богоугодника не было, толко он! И што ж тя уетрашают царства, слава и можност околичных, коли сут безбожны? Чом ся ужасаеш, коли бог с тобою? Чом ся тревожиш, коли господь сил с нами? С нами бог, восточными! РазумЂйте, языци, и ты, прегордая латино, и покоряйся, як с нами бог! Если бо гордостию и превозможете, от тресущного божества побЂждени будете, як з нами бог; и иже аще совЂт совЂщаете, разорит и господь, як з нами бог; и слово, еже аще возглаголете, не имат пребывати в вас, яко з нами бог!

Зас оборачаючися к тебЂ, ругателеви иноческого чину, и чудуюся тому твоему незносному осЂдланю тым тяжким и бременоносным сЂдлом глупства. Чем ся ты смЂеш з инока, иж он не умЂет с тобою говорити и трактовати, як пустое коло мльшное, крутячи а выворочаючи безпожиточный тот язык! А што ж ты здорового знаеш, да говориш? А што ж за пожиток иноку от твоеи бесЂды? А от кого ж ся ты научил, да бесЂдуеш добре? Албо ест у сатаны правда? Албо ест у Велиара 24 смирение? Албо ест у князя тмы свЂт? Або ест у диявола скруха и убозство? Да ли не знаеш, иж тые в миру владЂют? Да ли не знаеш, иж тые мирских учят? Да ли не знаеш, иж тые дворян упреумудряют? Албо не знаеш, иж инок ся от тых вырвал? Албо не знаеш, иж инок от тых утек? Албо не знаеш, иж инок перед тыми бЂгает? Албо не знаеш, иж тые инока всЂгды гонят? Чем же ся ты, любимый брате, ругаеш з инока, иж с тобою не умЂет бесЂдовати? Албо мнимаеш, иж ся ты чого пожиточного в замтузЂ научил? Албо мнимаеш, иж ты што цнотливого у курвы слышал? Албо мнимаеш, иж ты што богобойного от шинкарки навык? Албо мнимаеш, иж ты што розсудного от дудки и скрипки и фрюярника розобрал? Албо мнимаеш, иж ты от трубача, сурмача, пищалника, шамайника, органисты, рекгалисты, инструментисты и бубенисты што о дусЂ и духовных рЂчах коли слышал? Албо мнимаеш, иж ты от псих пастырев, мысливцов или водовозов, возниц или скачомудрец, кухаров или пирогохитрецпекаров што о богословии навыкл? Чем ся ругаеш, брате дворянине, з инока, иж не вмЂет с тобою говорити? А што ж ты маеш за скарб розуму, да инок с тобою говорит? А што ж за пожиток говорки или бесЂды иноковы с тобою? А чого ж ся инок от тебе научит? Ты зас инока послухати не хочеш? Если тобЂ инок о своем каптурЂ, или страшилЂ клобуцЂ сказовати начнет, прагнучи тебе по любви християнской братской в тот клобук оболочи, да и ты сын божий будеши и слЂд Христов возмеши, бЂсы страшиши и в мирЂ от мира поруган будеши и вЂнец нетлЂнный во царст†небесном прияти хощеши, ты, тое от инока слышавши, як от змия бЂжиши. Што ж хочеш, да инок говорит з тобою или котрои мудрости премудрЂйшое от инока слыти хочеши? Толко то, чим и како да ся спасеши и князя тмы вЂка сего да избЂгнеши и в пристанище спокойное и затишное Христово улучичиши. И чого ж ся тобЂ, брате милый, хочет от инока? Што ж лЂпшее тобЂ на свЂтЂ хочет даровати инок, яко бЂсЂду о том каптурЂ, или страшилЂ хвостатом, который и царство божие знаходит? Не ругай же ся, брате милый, з инока, да не поруган в вЂки будеши и липа инокова господина не узриши, и яко ругател и смЂхотворец в геену отидеши! Што ж инок не умЂет говорити с тобою, коли ты инокови бесЂды не приймаеш и, як пес встеклый, от своею пожитку и спасения бЂгаеш? Если зас ты што иноку сказовати хощеши, не маеш ничого такового в скарбЂ сердца своего, чим бы еси инока ползовати могл, але еще бы еси его своими повЂстми и до конца отрул. Уже бо инок от твоего смрада твоеи премудрости свЂтское своеи начине душеносное очистил, твой розум, которий ты носиш, изблювал, извращал, исплювал и тот сосуд душевный слезами помыл, постом, молитвою, скорбми, бЂдами, трудом и подвигом выжег, выпЂк и выполеровал и новое чистое насЂння богословия посЂял. И того ли ради, брате милый, ругаеши инока! И того ли ради дурным зовеши и посмЂваеши инока! Не видиши ли, яко от того ругателя проклятого поруган еси! Не видиши ли, як от того смЂхообрЂтателя посмЂян еси! Или не вЂдаеши, если бы не вмЂл инок с тобою говорити, болшее его невмЂлое молчане, нежели твоя изученная философия! Не видищи ли, иж тот на пути живота вЂчного стоит, а ты еще на пути погибелном мирском стоиши! Не видиши ли, яко той ест херувим и серафим, на нем же почивает вышний цар, а на тобЂ еще почивает мирский княз и любов свЂта сего и утЂха его! Яко ся не ужаснеши, посмЂвателю инока Христа, — в котором сЂдит Христос! А коли начинье посмЂваеши, то и сокровище, в нем лежащее, безчестиши, то ест самого Христа, и которое чести достоин будеши за тую твою смЂлость и вшетечный обычай. ВЂру ми ими, если с того руганя, смЂху и хулы не останеши и покаяння за то не учиниши, по смерти не с християны, але з содомляны в одной обители и кгмаху ся знайдеши. Не ругайся, да не поруган будеши! Не смЂйся, да не посмЂян будеши! Не безчести, да не обезчещен будеши!

Але зас речеши, яко зло житие мают иноки: по корчмах ходят и упиваются, и по господах обЂды чинят, и приятелство собЂ з мирскими еднают, и до того грошЂ збирают и на лихву дают. О, если грошЂ збирают и на лихву дают и если бы и на лихву не давали, але при собЂ ховали и купа до купы привязовали, грош до гроша для розмноженья прикладали, таковых кромЂ общого жития поединковых иноковгрошолюбителей нЂст достойно иноки едиными називати, бо будет лож крытися в имени. Ты его едным зовеш, и он не сам, але з дияволом-грошовладателем, и будет хула на иноческое имя, але его смЂле можеш назвати тым именем — июда, раб и лестец, друг и предател 25, образом во апостолЂх, а дЂлом в зрадах, образом в спасаемых, а дЂлом в пропадаемых, образом в учениках, а дЂлом в пропадаемых. «Продам бо, — рече, — Христа и приобрящу имЂния». Подобный бо и сей грошолюбивий инок чинит глас: «Отвергуся, — рече, — обЂтници своего пострига и соберу грошЂ». А о обЂдах и напитю, если того грошового грЂха инок не чинит и не имает ничого в своем схованю, а трафится ему от того чрева и от того горла звытяжитися, тому нн мало не чюдуйся, и я тому вЂрую, що трафляется и то в нашей земли иноку, иж часом и переначует в корчмЂ. Не все бо пшеница в посЂяню ся знаходит, але знайдеш другую ниву, которая болшей куколю, нижли пшеницЂ народит. Тако ж и межи иноки: в доспЂянию на звытяжство того чрева мало их ест. Тому не дивуйся, абовЂм подвиг и борба ест жизнь тая, которое ты не знаеш, бо еще еси на войну не выбрався, еще еси доматур, еще еси кровоед, мясоед, волоед, скотоед, звЂроед, свиноед, куроед, гускоед, птахоед, сытоед, сластноед, маслоед, пирогоед; еще еси периноспал, мякоспал, подушкоспал; еще еси тЂлоугодник; еще еси тЂлолюбител; еще еси кровопрагнител; еще еси перцолюбец, шафранолюбец, имберолюбец, кгвоздиколюбец, кмиколюбец, цукролюбец и других бреден горко- и сладколюбец; еще еси конфактолюбец; еще еси чревобЂсник; еще еси гортановстек; еще еси гортаноигрател; еще еси гортаномудрец; еще еси Детина; еще еси младенец; еще еси млекопий, — яко же ты хочеш бЂду военника, бьючогося и боручогося, у цицки матернее дома сидячи, розсудити?

Не видиш ли, что рече Павел коринфянам 26: «Молоком вас, — рече, — напоилем, а не цЂлым и твердим кусом стравы». Ато чему? «Для того, — рече, — иж еще не могли есте стравити и нынЂ еще не можете, бо злый, детинный розум маете». Ов бо зовется папЂжник, ов зас нынЂ з евангелия вылЂз, евангелиста 27, ов зас недавно выкрещенный, ов зас суботник 28. Не плотсти ли есте? Што ж вам поможе сивизна и красная борода, коли ж розум детиноигралский маете? А Павел не так радит, мовячи: «Не дЂти, — рече, — быванте умы, но злобою младенствуйте, умы же совершени бывайте». Не тое ли ты детинское мудрование страждеши, русине бывший, благочестивый християнин прежде и цЂломудрец Малои Русий, мовлю, с ляхи живущий, и нынЂ одетинЂл еси и раздЂлився, отступивши от Христа, на Кифу, Павла и Аполлоса 29 раздЂлився нынЂ на папЂжника, евангелика, нововыкрещенца и суботника. Не видите ли, иж подетинЂли есте а не толко подетинЂли, але смЂле мовлю, што и побЂснили, понеж в прелест заблудили. Або не видиш, иж в православной вЂрЂ немаш иншых вымышленых тщеславных нововынайденых тытулов и назвыск всего Востока и круга мирского сторонах собору, толко одно имя, в Антиохии апостолы поданное, «християнин» 30. Не зовутся вси языки, крещенные в имя отца и сына и святого духа, иншим именем, наченши от восходных сторон и до западных не доходячи, где православний со папЂжники смЂшаются, яко у Венеции, КрытЂ и других нациях, и на полудне и полночи кождый отмЂнный своим голосом зовомый язык, а меновите греци, арапи, сЂверани, серби, болгаре, словяне, арабанаши, мултяне, богданци, москва и наша русь, — толко «християнин». А чем не зовутся патриаршник, царогородец, ани ерусалимец, ани олександриец, ани антиохиец, где головний столы патриархов наших мЂсто содержат? Ато чем не зовутся тым именем? Для того, иж Павел очистил тую прелест, мовячи (як и коринфянам мовил албо мовит): «РоздЂлился Христос или Павел розпялся по вас или Петр или Аполлос?» Подобное и сему: албо в патриархи мы крещены есмо или во имя черьвоснЂдна человЂка, тлЂнию и смраду подлежаща, яко нынЂ латина, здерши хвалу з бога, и на папЂжа вкладают, мовячи: папЂжское вЂры, рымское вЂры, деснократци дияволские, евангелское вЂры, нововыкрещеннои вЂры, суботскои вЂры. «Или не вЂдаете, — рече Павел, — яко мы не достойны того титулу собЂ накладати». Ато чем? «Для того, иж мы толко слуги и приводци до того целю, то ест вЂры, а сами мы и Петр и другие ничто ж есмо, толко заплату ведлуг своеи праци и стараня кождый приимет». Тое теды видЂвши и зрозумЂвши постановене апостолское, патриархи наши не смЂют своя овца, послЂдующих им, и в свое имя и в свой тытул приволокати и натягати, але еще их от тое прелести (як апостол коринфяны) остерегают и, себе смиряючи, о собЂ овцам своим сказовают, мовячи: «Иж мы, — рече, — ничого ест; есмы толко приводци вас крещенных на збавене и водлуг своее пилности и стараня нашего о вас, овцах наших, заплату приимемо. А если бы и мы погрЂшили в чом, и не заховалися водлуг пристойности стану нашего, и узаконенее нам зкґвалтили и не выполнили, горше нежели вы, простаки, осуждени и в геену ввержени будемо».

Видиши ли, детино руский, в колысцЂ роскоши колишучийся, иж ты не знаеш, як ся инок з черевом бьет, товчет, мучит и борет, а ты его хулиш и клевещеш, напившася раз видЂвши. А тое войны, дома ростягаючися, не знаеш? А тое борбы, достатками всякими обсталевавшися, не вЂдаеш? Слыхал ли еси нЂколи, в той колысцЂ роскошной колышучися, от мамы или от тата или паки от попа о том словЂ, Павлом реченном, як «дух, — мовит, — воюет на тЂло, а тЬло на дух; тые друг другу противятся и борутся один з одным доты, аж которые з тых звытязство над которым приимет: или тЂло над духом, или дух над телом?» Яко ж ты хочеш познати тое и розумЂти, коли ты увес тЂло, коли ты увес кров, — а тЬло и кров, по Павлу, царства божия не наслЂдит! Видиши ли, детино руский, в колысцЂ роскоши колышучийся, як не знаеш тое войны черевное иноковы, которого хулиш и ругаеш, а сам в пелюхах смраду несытства всЂгды ся валяеш? Не чудуй же ся, детино руский, видЂвши напившогося инока, абовЂм в борьбе стоит и запасу ходит. И много ся трафляет, як двом борцем боручимся: то тому, то сему наверх вискочити, а того под себе подгибати, то тому зас зысподу вимкнутися и верхового наспод перевернути. Так и наше тЂло — от землЂ земля — земленого тя тяжару и покарму прагнет; дух зас горЂ вытягнутися з того мяса ищет, але его тот гной и сласти телесные связали и не пущают и еще болший прагнути придавляет; диавол зас тЂлу пособляет и на душу борет, и многокрот от похотей телесных розигравшийся борец з помочником дияволом на погибел душевную из вЂры выбЂгает и в турское обрЂзанство впадает. Ато чинит одно для мясочревохотного и другое для туркинЂ красное, да на мяких постелях спит и безфрасунливую жизнь живет. Изали ж для тых отпалых слЂд Христов и пут живота вЂчного упразнися и погибе? Никако ж! Безсловесно ест тако розумЂти: путь бо Христов цЂл стоит, а тые на погибел, от своеи похоти и несталости вЂк сей дочасний незлюбивши, отпадают. Што и вы в своеи земли недавно дострадали! Тые епископи ваши з сытыми требухами и з много наполнеными скрынок и шкатул червоных — албо розумЂеш, на покуту, убозство, крестоношене и совлечене мира и похотей его к папЂжови отбЂгли? ВЂру ми ими и сам бач, иж не для того. Але дла чого? Аби оный глас богатого, до себе самого мовячий, угонили, и они тую раду в собЂ так же урадили. Яко ж? Ото так: «РазорЂм благочестивое вЂры житници! Наши скринки и шкатулы наполненые, и сожиздЂм болшие скриниска, поклонившися папЂ. ВЂмы бо, коли мы толко вЂры своее отступимо, тот князь мирский, папа, наши скриниска наполнит, тот наше прагненя ненасычонное утолит, тот нашк похоти, безпрестани кипячие, установит и загамует. Тогда будемо волност мЂти по своей воли жити. Тогды будемо што хотЂти чинити, коли нас не будет нЂхто глядЂти. Тепер в нас тая дурная Русь жития чистого ищет, тепер в нас цноты, учтивости и доброго сумненя видЂти прагнет, чаго мы нЂмаемо, и для того всЂгды ся от них соромЂемо. Але яко учинЂмо? К папЂ римскому бЂжЂмо. И з того сорома ся выкрутимо, и на Русь, да ся поклонят папЂ, бЂду навалимо, и свое желанием исполнимо, и речемо души нашей: «Душе, имаши многа блага, лежаща на лЂта многа, яжд, пий, веселися, не бойся никого, скачи и грай». Добре есте урадили, добре есте вынашли. А коли вас тое «добре» зрадит, а коли вас што вас спротивного в том постановеню вашом стрЂтит, а коли вам тую раду оный голос («Безумче, в сию нош. душу твою исторгнут от тебе, а яж еси утотовал, кому будет!») посЂчет? Так бо, рече, всякому трафится, который в мир богатЂет, а не в бога. Изали ж для тых отпалых епископов наша християнская вЂра оскудЂла или нарушилася? Изали ущербок нЂкий в слЂду спасеное дороги приняла? Никако же! Тые сами, из вЂры выбЂгши, во яму безвЂрия впали и от себе собЂ смерт зъеднали, а наша вЂра чистая цЂла и здорова стоит. Тако теды и ты от инока не погортайся, если бы еси его и напившася видЂл. Толко з вЂры к папЂжу да не бЂжит! И доколя тот хвост на голо†носит, покаятися может. А што ты, брате милый, знаеш? И уж ты его пиюча и едуча видел и осудил, а он зась, отшедши з корчмы в свою келию, тот кус смачный и куфел оплакав и отжаловав, и прощение от бога приял. Яко ж ты смЂеш прежде судии суд на божия раба чинити? Не суди ж, брате, да не осужден будеши, и обрати свои очи помысла на себе самого.

Як ся усправедливиш богу з того корчмарства, которое всЂгды во адЂ чрева своего носиши и которое смачнЂйшее пиво, мед или вино коштуючи, тое горлом глытаеши, а которое ти не любо, тое подлЂйшим черевом, возницким, мысливским, давати повелЂваеши, и своего бревна, в очах сумнЂня лежачого, видЂти не хощеши, а на порохно братнее видЂти его широко очи продрал еси. Видиш ли, што страждеши, а болезни ощупати не можеши! Тому неборакови в месяц раз трафится напитися и то без браку: што знайдет, горкое ли или квасное пиво албо мед, тое глощет, толко бы тую поганку-утробу насытити и утЂшити могл; а по насыченю зас терпит, в келию влЂзши, доколя ся ему другий такий празник трафунком намЂрит. А в тебе што середа — рождество череву, а што пятница, то Великдень, весЂля празнованя жидовского, кроме другых, разрЂшеных дний, мовлю. А пред ся себе видЂти не хощеши, але на бЂдника хулный язык вывернул еси! А если бы и так было, жебы от бЂсов змаменого инока в корчмЂ пиючи видЂл еси! Однак день або два забавившися, зас на покуту и плач в келию бЂжит и за злые два дни 40 дний добрых намЂщает; постит, альчет и страждет, за долг грЂховный покутою платит и отмщает. А ты всЂгди в корчмЂ живеши и сам шинкарем еси; корчмы запродаещи, людские сумнЂня опоиваеши, скупостию корчемного торгу з Афраимами. жидовскими 31 людское чрево оцЂневаеши, а пред ся тое поганство видЂти не хощеши и очи суда себе не видати зажмурил еси. Видиши ли, в якой пивници содомской седиши! И руки и ноги отпил еси и до конца обезумЂл еси, а того зас не видиши, иж за твоим черевом бочки з пивами, барила з медами, барилка з винами, шкатулы з фляшами, наполненными вином, малмызею з горЂлкою горкодорогою волочат. А пред ся тое корчмарство свое видЂти не хочеши, але на бЂдника зубы наострил еси! А што ж ты болшей над других человЂк о собЂ розумЂеши или что ты болше от других в собЂ вмЂстити мнимаеши? Не земля ли ты от землЂ, яко и сиромах убогий и голый? Не дух ли в тобЂ оживлячий Того трупа, яко и убогого? Не голова ли в тебе на том Же мЂстцю стоит, што и убогого? Не очи ли, слух, вкус, ноздри, ногы в том же порядку розсажены, Што и убогого? Не губа ли, зубы, язык, горло в тых же гранилах стримит, што и убогого? Не сердце ли, чрево, утроба, слезен, кишки и проход в тобЂ ся знаходит так же, яко и в убогом? Не смерть ли тебе поглонет, так же и убогого? Не в земленные ли надра тебе уволокут так же, як и убогого? Не судом ли испытан будеши за житие вЂка сего так же, яко и убогий? Что о собЂ велемудруеши? Что ся возносиши? Что ся хвалиши? Что ся, як порхавка, надымаеши? Або для того, што нынЂ тым гноем тЂла пануеши? О, горкое твое панство! О, окаянная твоя роскош! О, бЂдное ж твое весЂле! Умри толко, узриш того панства пожиток, узриш темницю несвЂтимую и тму кромЂшнюю, узриш черв неусыпающий, узриш ад с пропастью глубокою, узриш рЂку огненную, и конечную геену, и скрежет зубный, которые твоему панству ся уготовили, если их тут в тЂлЂ покаянием и покорою з добрым житием от себе не отженеши И не освободишися, противные, християнские, учинки чинячи и цЂломудреную жизнь вЂка сего живучи. Не ругай же ся, бЂдниче пане, иноческому чину, сыном царства небесного, не ругай! Бо далеко хлоп от шляхтича розност мает. Хто ж ест хлоп и неволник? Толко тот, которий миру сему, яко мужик, яко хлоп, як поиманец, як неволник, служит, которий образ и кшталт вы, панове, носите для того, иж мира сего хлопи и неволници есте, и ему вЂк свой в службЂ аж до смерти изгубляете и сами з ним погыбаете! Хто ж ест шляхтич! Тот, которий з неволЂ мирское к богу вырнет и совышше ся от духа святого породит, по Иоану: «Елици же, — рече. — прияша его, даст им власт чадом божиим быти, вЂрующим во имя его, иж не от крови, ни от похоти плотския, ни от похоти мужеския, но от бога родишася». Видиш ли шляхетство вЂры нашее! Которий от бога ся породит, тот ест шляхтич. А вы сопротивно перевернули всЂ писма в той безбожной земли и, от крови и похоти, от смрада родячиеся, пошляхтЂли и попышнЂли есте и божиих рабов поругаваете! Молю теды вас, того ся обычая останте и покаание за зле пожитое время учинЂте, а бог мира да вам поспЂшит и поможет. Аминь.

О иноческом чину реклося досыт; зась о очищенню церкви, докончаючи, речем. Празничные ярмарки, што вы зовете соборами, очистЂте, як в ЖидичинЂ и в горах святого Спаса 32, зане же ест мерзско богу, иж диявол вмЂсто его чести и хвалы под титулом божиим собЂ чинит вшетеченствы и пиянствы и торгами купецства, — ибо рече: «Дом мой, дом ест молитвы, а не вертепу и корчмы и ярмарку». Празник бо ест твой таковый не християнский, але дияволский. Коляды з мЂст и з сЂл учением выженЂте; не хочет бо Христос, да при его рождест†дияволские коляды мЂстце то мают, але нехай собЂ их в пропаст свою занесет. Щедрый вечер з мЂст и з сЂл в болота заженЂте, нехай з дияволом сЂдит, а не с християн ся ругает. ВолочЂлное по воскресении 33 з мЂст и з сЂл выволокши, утопЂте; не хочет бо Христос при своем воскресении славном того смЂху и руганя дияволского имЂти. На Георгия-мученика празник дияволский на поле изшедших сатанЂ офЂру танцами и скоками чинити разорЂте; гнЂвает бо ся на землю вашу Георгий мученик, што нЂмаеш християнина православного, которий би руганье тое дияволское очистити и изгнати могл. Пироги и яйца надгробные 35 в ОстрозЂ и где бы ся то знаходило упразнЂте, да ся в християнст†тот квас поганский не знаходит. Купала на Крестителя 36 утопЂте и огненое скаканя отсЂчЂте; гнЂвает бо ся Креститель на землю вашу, што ся на день памяти его попущаете дияволу ругатися вами з вас же самых. Петр и Павел молят вас, если хочете от них ласку мЂти, да потребите и попалите колыски и шибеницЂ на день их, чиненые по Вольню и Подолю и где бы ся толко тое знаходити мЂло; мерзко бо им на землю с небеси смотрЂти на тое дияволское позорище християнским людем збираючися. И другие прелести, которие бы были, очистЂте и тое писане всЂм до ушу пропустЂте. Не бойтеся для того ляха, але убойтеся ляхова творца, которий и ляхову и нас всЂх души в своей горсти держит и доколя он хоче, дотоля нам дыхати, жити и дЂяти што мы хочем или изволяем, на добро или на зло, попущает, а потом, соверщивши тайнство жития нашего, зла или добра, от жизни сея восхищает и на будущее позорище и обличение суда приносит. И тот бо страх ляхов за безвЂрие ваше на вас попущен, да ся познаете, если есте християне или еретики. Прето ознаймую вам, если послухаете в том не мене, але бога, пошлет вам бог мир и лЂта блага и прохладна, пошлет вам бог нЂкую утЂху ко утЂшению вашему душевному и телесному от вышше скоро. А если не послушаете, чист аз от крови вашее. ВЂдаючи теды, вЂдайте, яко погынете и дочасне и вЂчне. От чого вас, Христе царю, захбвати, на покаяние же привести рач.

Аминь.




ГЛАВА 4


ТобЂ, в земли, зовемой Полской, мешкаючому всякого возраста, стану и преложенства народу, рускому, литовскому и лядскому, в раздЂленых сектах и вЂрах розмаитых, сей глас в слух да достиже


Ознаймую вам, як земля, по которой ногами вашими ходите и в ней же в жизнь сию рождением произведени есте и нынЂ обитаете, на вас перед господом богом плцчет, стогнет и вопиет, просячи сотворителя, яко да пошлет серп смертный, серп казни погибелное, яко же древле на содомляны, и всемирного потопу 37, которий бы вас выгубити и искоренити (яко да не скверните болшей оную антихристовым безбожным невЂрием и поганским, нечистым и несправедливим житием вашим) могл, — изволяючи лЂпше пуста в чистотЂ стояти, нежели вашим безбожством запустошона от хвали всесильного бога, создателя и творца небеси и демли, быти.

Где бо нынЂ в Лядской земли вЂра, где надежда, где любов, где правда и справедливост суда, где покора, где евангельские заповЂди, где апостолская проповЂдь, где святых законы, где хранения заповЂдей, где непорочное священство, где крестоносное житие иноческое, где простое благоговЂйное и благочестивое християнство? Не все ли превратися в паче всЂх язык нечистых нечистЂйшее житие и без$Ђрие! И почто и именем християнским себе гласити безстуднЂ дерзаете, егда силы того имени не храните, ниж дЂлным постижением сохранити того имени свойство учитися не хощете? О окаянная утроба, которая таковых сынов на погибел вЂчную породила и на соблазнь прелестного свЂта сего выпустила!

Днес бо во Лядской земли священики всЂ, яко ж древле нЂкогда Елзавелины (а не небесного бога) жрецы 38 — черевом, а не духом офЂруют. Панове зас над бога богами вышшими над своими поручными поддаными ся починили и над творца, ровным зданием образа своего всЂх почтившаго, судом беззаконным вознеслися, безсловесных естество вышшею ценою (в своих антихристового закона правах над люд божий, им до часу под власт злецоный) оценили. ВмЂсто зас евангельское проповЂди, апостолское науки, и святых закона, и ограниченя цноты, и учтивости сумненя християнского нынЂ поганские учители, Аристотели, Платоны и другие тым подобные машкарники и комедийники, в дворах Христа бога владЂют. ВмЂсто зас смирения, простоты и нищеты гордост, хитрост, матлярство и лихоимство владЂет. ВмЂсто зас суду и правды несправедливост, лож, крывда, прехитреня, препрене, потвар, лицемЂрие, лест и кгвалт антихристов владЂет. ВмЂсто зас вЂры, и надежди, и любви безвЂрство, отчаяние, ненавист, зазист и мерзост владЂет.ВмЂсто зас цЂломудреного жития конечное вшетеченство, плюгавство и нечистота скверная владЂет.

Покайтеся убо, всЂ жителя тоя земли! Покайтеся, да не погыбнете двоякою цогибелию, и вЂчною и дочасною, от скорого гнЂва божия нагло! Аще лн же не хощете, тогды к вам, стаду православному, християнскому роду, мовлю: будЂте готови отлучитися от того погибелного антихристова и содомского рода, да есте истинною новый Израиль, а не с поганци погане. Где бо в поганЂх таковый плод нечистый, яко ж нынЂ в Лядской земли видится? СтосугубнЂй некрещеные в имя отца и сына и святого духа, прелщеные от дияволского слуги и лжепророка Махомета, турки честнЂйшие ест пред богом в судЂ и правдЂ якой-такой, нежели крещеные ляхи, которые на евангельскую науку сопротивно борют и оную своим злым житием и гордостию антихристового духа пожерши попирают!

Прето вЂдаючи вы о сем, православний християне, не скорбЂте! Господ бо ест с нами, и аз убо есм с вами. ИмЂйте убо вЂру и надежду в бога жива крЂпку и непоколЂбиму! На панов же ваших руского роду, на сыны человЂческия, не надЂйтеся! В них же нЂст спасения. ВсЂ бо бога живого и вЂры яж в него отступили, прелести же еретической, любви духа тщеславного, жизнолюбию и лихоимству ся поклонили. В них же не благоволит господь по реченному: «А егда обинется, не благоволит душа моя о нем». ТЂмже да отступит-от неправды всяк именуяй имя господне. Будите убо готови на приятие Исуса, который нынЂ у вашей земли нЂмает где главу подклонити. Духи бо нечистий поднебеснии везде во естест†зовемых християн гнЂздятся и царствуют: прелстили, прехитрили и от бога различными ересьми десно и шуе естество человЂческое открали и вслЂд себе отволокли сут. Як нынЂ нЂст хвалы богу ни мало з Лядской землЂ, и христианство вконец исчезе и погибе. ВсЂ бо настоящого вЂка гонят, да ся его благыми удовлят и насытят. О будущого же вЂчное наслаждение мислити и искати в жизни сей — и памят тую уморили и, яко ж камень, ко оной жизни онечувствЂли суть. Обаче где ся толко от вас обрЂтает истинный священик, инок цЂломудр и мирского жития християнин православний, которий от труда своего житие свое, богобойне живучи, а не от лихоимства языческого, окормляет и правду видЂти алчет и жаждет? Даст вам бог по желанию вашому. Не скорбЂте убо, но потерпЂте мало. Грядый бо приидет и не закоснит.

Да проклята будут владыки, архимандрити и игумени, которие монастирЂ позапустЂвали и фолварки собЂ з мЂст святых починили, и сами толко з слуговинами и приятелми ся в них телесне и скотски переховывают, на мЂстах святых лежачи, грошЂ збирают, с тых доходов, на богомолци Христови наданных, дЂвкам своим вЂно готуют, сыны одЂвают, жоны украшают, слугы умножают, барвы справуют, приятелЂ обогачуют, кареты зиждут, возники сытые и единообразные спрягают, розкош свою поганскию исполняют. А в монастырЂ рЂк и потоков непрестанно в молит†к небесному кругу текущих иноческого чина по закону церковному видЂти нЂсть, и вмЂсто бдения, пЂсни и молитвы и торжества духовного — псы выют, гласят и ликуют. Где нынЂ правило по уставу святых в Лядской земли в церкви видЂти и слышати хощеши, то есть вечерню, павечерницю, полунощницю, завтредню, 1 час, 3 час, 6 час, 9 час, книжное поучение закона день и нощ? Не все ли превратися в поганское безвЂрие, и слЂд християнского жития исчезе и погибе? Владыки безбожные вмЂсто правила, и книжного чтения, и поучения в закони господни день и нощ над статутами и лжею увесь вЂк свой упражняют и погубляют и вмЂсто богословия и внимання настоящого жития — прелести, хитрости человЂческия, лжи, щекарства и прокураций, дияволского празднословия и угождения ся учат.

О земле запустЂлая и зарослая тернием безвЂрия и безбожия! О образе божий, по подобию зданный, како погребеся от славы нетлЂнной и вЂчной жизни небесного царства во жизни сей, скоро ищезающей! О человЂче окаяный, како, чести сзоее отбЂгши, и ко безсловесных скотох несмыслству припрящися и усвоитися изволил еси! О християнине реченный, како помазание крещения в божество божеством духа миролюбием сим посмрадил еси! О сыне вЂрою небесного бога, како сыном дияволским плоды дЂл своих преименоватися изволил еси! О царское священие, языку святый, людие обновлення, како во поганское и еретическое безвЂрие превратился еси!

К тебЂ ж, земле Лядская, с плачем глас Исаин 39 мовлю: «И како быст блудница град вЂрный Сион полн суда! В нем же правда успе, в нем же нынЂ убийци. Сребро ваше непотребно. Корчемници твои смЂшают вино с водою». Еже ест образ лядского священства; священници бо твои смЂшают истинное слово божие со лжею, с похлЂбством, ласканием, лицемЂрием, лестию и человЂкоугождением, оводнЂвающе винную истину водою лицемЂрия и лести, чесанием слухов, а не бодением и убиением грЂха, внутр сердца приемого, истинною обличения. Князи твои закону божию не покаряются, — обещници татем, любяще мзду, гоняще за посулами, сиротам не судяще и суд вдовиц не внемлюще! Сего ради се глаголеть владыка господь Саваоф 40: «О, горе моцным и преложоным в Лядской земли! Не престанет бо ярост моя на противност их и суд лукавства их! И противления над ними учиню, и наведу руку мою на них, и розпалю бЂдами и искусом в чистоту. Не хотящих же покаятися и от того злонравствия преложитися — и до конца погублю, и памят имени их во вЂки затрачу, и отиму всЂх безаконых от тебе, и всЂх гордых смирю. И будет крЂпост их, яко паздерие згребное, и дЂла их, яко искры огнены. И сожегутся беззаконници и грЂшници вокупЂ, и не будет угашаяй».

О, лютЂ, страно грЂшна, людие полны грЂхов, племя злое, сынове беззаконии! Остависте господа и разгнЂвасте святого Израилева, отвратистеся вспят! Что и еще уязвляется, прилагающе безаконие ко безаконию? От главы и до ног острупЂли есте! От началник, от священик и до простих онечистЂли есте! ОсмраднЂли есте гноем миролюбия! Образ божий огноили есте! НЂст мЂста цЂлого от грЂховного недуга — все струп, все рана, все пухлина, все гнилство, все огонь пекелный, все болЂзнь, все грЂх, все неправда, все лукавство, все хитрост, все коварство, все кознь, все лжа, все мечтание, все сЂнь, все пара, все дым, все суета, все тщета, все привидЂние — сущее ж нЂст ничтоже. НЂст где плястра приложити на исцЂление нЂкоея части. Все смертоносный грЂх, все пеклом, адом и гееною вЂчною смердит!

Покайтеся убо бога ради, покайте, донелиже покаянию время имате; по смерти бо сего обрЂсти не можете. Что толико онечувствЂли, одебелЂли и окаменЂли сердцем и помыслом есте? Еда не вЂруете, яко помрете? Аще украдает вам диявол тую память и ослЂпляет вас миролюбием, а вы прибЂгнете с памятию народивших вас и предков ваших. Где ся подЂли и в которую сторону отшли? Не померли ли? Не и вам же ли там подобает отити и также помрете? А егда и вы мусите, хочь и не хочете, так же, як и родители ваши, помрЂти, готовЂте ж ся на исход ко будущему вЂку! ГотовЂте дЂла, готовЂте чистое житие, готовЂте богоугождение! Да егда повелит вам маятель от сея жизни преходити, да имате тое готово з собою. Да будет тое сокровище при вас на смертной постели, да видите тое собрание свое, егда душа с тым окаянным тяжаром тЂла розстатися хощет и утЂшитеся! Нехай буде тое сокровище ваше вам послом до надр Авраамлих. Яко да готует покой и мЂсто отпочиненя, мЂсто прохладное, мЂсто покойное, мЂсто затишное, отнюду же отбЂже всяка болезнь, печал и воздыхание, идеже присЂщает свЂт троичного божества, идеже жизнь безконечная, радост неизреченная, весЂле непостыжимое, идеже лици святых, лици патриарх, лици древле богу угодивших, лици пророк, лици апостол, лици мученик, преподобных, праведных, во постЂ, молит†и подвизЂ просиявших, пустынное воспитание, честное воскормление и оживотворение духа святого дЂйством и благодатию, их же подражатели во подвизЂ быти и наслЂдниками чести и жребия их получити вас подоби, Христе царю, которому ти приносится от всея твари честь и поклонение со отцем и святым духом и нынЂ и присно и во вЂки вЂком. Аминь. Иоан инок з ВишнЂ от святои Афонскои горы прочух от Лядской землЂ, сиреч Малои Русий, како напали на вас злоереси. Того ради послахом отца нашего Саву проигумена от святых Павел 41. А вы же, Христовы християне, приимЂте его со радостию и милостиню сотворите, — того ради молим вашей милости.





ГЛАВА 5


Велможным их малостям, панам арцибискупу Михайлу и бискупам ПотЂю, Кирилу, Леонтию, Деонисию и Григорку 42 совышше памят покаяния, страх геены и будущого суда низпослатися от всевидящого ока троичного божества, отца и сына и святого духа, Иоан мних з ВишнЂ от святои Афонскои горы усердно вам зычит


Ознаймую вашим милостям, иже достигло мя вашего подвига (труда, ревности и тщания) писание, зовемое «Оборона згоды з латинским костелом и вЂрою, Риму служачею» 43, вами, ходотаими и будовничими тое мененое згоды, от руского народа клЂченое. И видЂвши тое, велми почудихся не простим малым чудом, але со удивлением великим и ужасом, разсуждаючи в собЂ сам в затворЂ, темницЂ безмолвия, сЂдячи: яко како и откуду бы ваши милости такое ласки, дару блаженства и святости доспЂти могли? Чого и я частю свЂдом, як есте таковых почестий и благодати отгорЂ николи не искали ани просили, и слЂда Христова скорбного не топтали, и пелкгримаций ко горнему Иерусалиму забавою молитвы умное не творили, а так, знагла, без заслуги жадное от бога, тую годност, зацност и достоинство дару привлащати (як бы запевне от небесного откровения) собЂ смЂете и оную згоду, вЂры тайнство со безвЂрством тосуючи, мЂшаете и споиваете. Если бо земного закона обычай таковый власти господские, цареве или кролеве, обыходити и заживати звыкли, иж кроме заслуги, чести и дикгнитарства или преложенства в подвыщшеню титулу даровным обычаем никому дармо не дают ани возвышают, аж то добре угодник их им заслужит, то колми о небесных дарах, от божества исходящих, не без заслуг и порядку законного дарованы бывают, розумЂти маемо. Почудившися теды тому достаточне и абым и на бога хулного мнеманя не поднес и, вам в простоть своей правду мовячи, не согрЂшил, поидох искати слЂда евангелского, приводячого до познаня явного, которым таковые справы, живота вЂчного таемници, от бога поручены и отправованы быти ся даруют. А если бы иначей, а не тым способом, хто того дару доспЂти ся хвалил и вЂрою шафовати хотЂл, такового антихристова слугою и тайником его божественное Евангелие называет. Который же ест слЂд, до того дару цыля приводячий, пилне прошу, послухайте, показати вам не прокурацкое фантазии выкрутами, але самими усты Христа бога нашего, рекшими от святого Евангелия, хощу! Не для похвалы выграня препирателного (як же мирская мудрост звыкла проходити) то чиню, але для спасения моего и вашего, о котором, бог вЂсть, яко же и о своем ревную.

ВЂдомост тую вам короткими словы открываю. Начало же вслЂд бога из мира изшедших и того дару доспЂти хотящих тых ступнев пять.

Первое — вЂра крещеная во имя отца и сына и святого духа; второе — при вЂрЂ узаконеные заповЂди исполнити, по реченному от господа, егда послав на проповЂдь учеников по воскресении глаголя: «Шедше, научите вся языки, крестяще их во имя отца и сына и святого духа»; таже паки учаще их блюсти вся, «елика заповЂдах вам»; третее — крест Христов на рамо взяти и душа своея во мир сем отрещися, по реченному от господа: «Аще кто хощет в слЂд мене ити, да отвержется себе и возмет крест свой и послЂдует ми» и паки:«Аще кто не возненавидит душа своея, не может быти мой ученик»; четвертое — дом, села, имЂния, сородство и мирское дружество оставити, по реченному от господа:

«Всяк, иже оставит дом, села, имЂния, отца, матер, братню, сестры имени моего ради сторицею восприимет и живот вЂчный наслЂдит» и паки:«Любяй отца, матер, сына или дщер паче мене, нЂсть мене достоин»; пятое — конечная нищета, по реченному от господа:«Аще хощеши совершен быти, иди продажд имЂния своя и дажд нищим и имЂти имаши сокровите на небеси и, взям крест, последуй ми».

В том конечном обнищеню ученици, послЂдуючи Христу, еще не могли тайнства вЂры навикнути и притчей Христовых зрозумЂти, для чого и приходят, пытаючи господа: «Чему, рече, во притчах глаголеши народом якобы рекучи, которых и мы постигнути сокровенный разум не можемо?» ОтвЂща Исус, рече им: «Вам ест дано вЂдати тайны царства небесного, то ест обнажившим мысль свою от мирских справ и вослЂд мене изшедших, а мирским еще притчами и завЂсою, то ест покрытыми повЂстьми. Ато чему? Для того, их нё вомЂстят духовного разума, а не толко мирские не вомЂстят, але и вы, о ученици, если ж и вослЂд мене изишли есте, нищету конечную понести изволили есте и ко страстем моим, мнЂ послЂдуючи, приспЂваете, вЂры тайнства вомЂстити не можете. Много бо, — рече, — имам глаголати вам, но не можете носити нынЂ. Егда же приидет утЂшител, его же аз от отца вам послати хощу, тот вам отверзет вЂдомост всю моих справ». Таже по воскресении отверзает им ум разумЂти писание закона, пророк и псалмов, реченных о нем, и еще тайнства вЂры вомЂстити не могуг. Таже паки рече им: «Сядте вы здЂ во градЂ ИерусалимстЂм, дондеже облечетеся силою совыше». И убо сам на небеса отходит, духа же святого во уреченный час на апостолы посылает. По принятю же духа святого уже все вЂдают и беспечне вЂры тайнство проповЂдуют и спасением людским (з невЂрства до вЂры приводячи) шафуют. Который слЂд нашои вЂры православнои пастыри и учителие вселенские, святне отци, ощупавши, сами тым способом на стан священический возшедши, и иншим такожде восходити узаконили, — о чом Дионисий Ареопагит 44 достаточне пише, знати даючи, як не досыт на том, если бы и тые пять степеней, вослЂд бога изшедшие, которых вышше поменил есм, исполнил, а свыше от духа святого ся не посвятил, истинным законным священиком и знателем достаточным тайнства вЂры быти не может. А понеже того тайнства вомЂстити не может, як же таковый вЂрою шафовати важити ся смЂет? Явно ест, яко такая дерзост богопротивна и духа антихристова плода овощ, воля и дЂло, Таже и порядок Дионисий Ареопагит описал. по том пятом стопню, то ест конечной нищетЂ, хотящому священство постигнути и тайнство вЂры разумЂти иначей, — рече, — не мощно, толко прежде подобает ему ся очистити; очистившижся, просвЂтитися; просвЂтившижся, совершитися, — о чом читай Дионисия Ареопагита «О священноначалии» и узриши, иж правду мовлю.

Тут теды ставши, вопросил бых вас, згоду вЂры вяжучих, что ест степен совершения, о котором Дионисий рекл? Але вЂм, иж не толко отповЂдЂти ми силы совершения мЂры не можете, але не знаю, самые голые слова, Дионисием реченные, если коли в книзЂ его проходили есте. Вопросил бых вас, что ест просвЂщение, але вЂм, иж ни мякнути отповЂди ми дати о нем не знаете. Вопросил бых вас, что ест труд очищения, але вЂм, иж вам ни снилося о том. Якож вы явные во образЂ быти звыклые ступнЂ ко приближению небесного бога знати маете? А не толко вы не знаете, але и ваши папы и исусоругатели, зовомые езуиты, о том ни писнути ми справы дати не могут. Ато чем? Для того, иж поганские еще догматы (Аристотелев, Платонов и прочиих), кусаючие Исусовы простоты, Петровы вЂры, Иоанновы чистоты, Иакового беззлобия и прочиих апостол безхитрства вомЂстити, ниже помыслити не могут. А не толко ко благодати духа святого приводячих порядках мЂры, если вас вопрошу, отповЂдити ми не можете, але и от тых пят телесно узаконеных степеней, о невыполненю их, егда вас вопрошу, соромЂтися будете. Еднак, я вас вопрошу, хоч вы ся за правду на мене фрасовати схочете, лЂпше богу и правдЂ его, нежли ласце вашой смертной, в том догодити хотячи.

Покажите ми убо, о згоду вяжучии, где которий з вас первый степен сам собою выполнил и в вЂрЂ, основаной в непорушенном фундаментЂ, со исполнеными заповЂдми ся знашол? Не ваши милости ли вЂру дЂлы злыми наперед еще разорили? Не ваши милости ли прагненя лихоимства пЂнежного и достатку мирского жерело похотий в собЂ роспустили и насититися никакож не можете и еще болшею алчбою и жаждею, свЂцких достатков прагнучи, оболЂли есте? ПокажЂте ж ми, о згоду вяжучии, где который з вас, в мирском житии будучи, оных шест заповЂдей, от Христа узаконених, сам собою исполнил, то ест алчных прекормил, жаждных напоил, странных упокоил, нагих одЂял, болным послужил, в темницах навежал? Не ваши милости ли тых шест заповЂдей не толко в мирском чину разорили есте, але и нынЂ, в мнЂмаючемся духовном, непрестанно разоряете?

Не ваши милости ли алчных оголоднЂваете и жаждными чините бЂдных подданых, той же образ божий, што и ви, носячих; на сироты церковные и прекормлене их от благочестивих християн наданих лупите и з гумна стоги и обороги волочите; сами и з своими слуговинами ся прекормлюете, оных труд и пот кровавый, лежачи и сЂдячи, смЂючися и граючи, пожираете, горЂлки препущаные курите, пиво трояковыборное варите и в пропаст несытного чрева вливаете; сами и з гостми ся своими пресыщаете, а сироти церковные алчут и жаждут, а подданые бЂдные и своеи неволи рочнего обходу удовлЂти не могут, з дЂтми ся стискают, оброку собЂ уймуют, боячися, да им хлЂба до пришлого урожаю дотягнет.

Где который з вас странных в дом ввел, упокоил, ублажил, ноги авраамски страннику умыл? Не ваши милости ли сами нынЂ у мнимаючимся духовном чину из странных ся пугаете, хулите, поносите, ненавидите, злословите, клевещете? Што ся показало с тых уст, смродливую згоду вяжучих, которые тым духом ругали, мовячи: «А што ж сут патриархи или кгрецкие владыки? Жебраки, волоцуги, змаменники!» Видите ли вашого мудрования странноприимство!

Где есте нагих одЂвали? Не ваши милости ли сами обнажаете, из оборы конЂ, волы, овцЂ у бЂдных подданых волочите, дани пЂняжные, дани пота и труда, от них вытягаете, от них живо лупите, обнажаете, мучите, томите, до комяг и шкут безвременно, зимою и лЂтом, в непогодное время, гоните, — а сами, як идоли, на одном мЂсцу присЂдите или, если и трафится того трупа отидолотворенного на другое мЂсце перенести, на колысках, як бы и дома сЂдячи, безскорбно преносите, а бЂдные подданне и ден и ноч на вас трудят и мучат; которых кров, силы и праци и подвига выссавши и нагых в оборЂ и коморЂ учинивши, вырванцов ваших, вам предстоящих, фалюндышами, утрфинами и каразиями одЂваете, да красноглядством тых слуговин око накормите, а тые бЂдные подданые и простои сермяжки доброи, чим бы наготу покрыти могли, не мают! Вы их пота мЂшки полны грошми золотими, талярми, полталярки, орты, четвертаки и потройными напыхаете, сумы докладаете, в шкатулах мЂсца, где бы которой особЂ с тых помененых годное было починати, росправуете, а тые бЂдници шелюга, за што соли купити, не мают.

Где есте болным послужили? Не ваши милости ли болных еще сами от здоровых чините, биете, мучите и убивате? Пощупайся тылко в лысую головку, ксенже бискупе луцкий 45, колко еси за своего священства живых мертво ко богу послал, одных сЂканою, других водотопленою, третих огнепалною смертю от сея жизни изгнал? Так розумЂю, иж памятаеш, ваша милость, всЂх тых, если схочеш покаятелное исповЂди правду стригнути. Воспомяни и Филипа, маляра многопЂняжного. Камо тые румяные золотые по его неволном отходЂ осталися и в чием нынЂ везеню сЂдят?

Где есте в темницах посЂщали? Не ваши милости ли в темницах за правду затворяете и бЂды людем християнским терпЂти еднаете? Не ваши милости ли и Никифора 46 добре посЂтили и в темницу затворити исходотаили есте, яко да со лжею беспечне пануете и обличения на свое отступление со папою своим от оного уст не относите? Але так вЂдайте, если и язык человЂчий умолкнет, але зрител видит от горЂ долних, и узрите все свое нынЂшнее тогда, егда, тайнство жизни сея выполнивши, в страну будущого вЂка отидете. Тогда все ся вам тое открыет, чого нынЂ ощупати и видЂти (за окраденям слЂпоты мира сего и славы его) не можете.

Але тепер забаву о том чинити мЂсца не маю, толко путем повЂсти идый, о степенях евангелских реч совершити и наявно показати, яко есте их сами собою попрали и потоптали, хочу.

ПокажЂте ми, о згоду вяжучие, где кой з вас мира ся отрек, крест Христов на рамо взял и душу свою в жизни сей возненавидЂл? Не ваши милости ли болшую помпу и тайнство своволного жития вЂка сего в себЂ нынЂ изобразуете, болшие достатки в мниманом духовном, нежели в мирском чину, угонили есте, славы и богатства дотиснулися есте, чого в мирскум чину не имЂли есте, тучнитеся, кормите, питаете, насыщаете чрево розкошными снЂдми, гласкаете гортань смачнЂйшими кусы, услаждаете, смакуете, мажете, собЂ угождаете, волю похотную во всем исполняете?

ПокажЂте ми, о згоду вяжучии, где который з вас оставил дом, села, имЂния, маетност, сородство и мирское житие господа ради. Не ваши милости ли того ради и бискупства ся докопали, яко да сокровище болшее имЂней, маетност, скарбов пЂняжных и прибытков в церкви божой знайдете, слуг личбою двояко и трояко, нежли перво есте мЂли, умножите; славою вЂка сего коронуетеся, в достатках беспечальных и розкошных, як в маслЂ, плаваете, дочки богатым вЂном. бискупским обвЂнуете, зятей панами пышногордшими почините и своих повинных церковным, сиротским, убозским, и слЂда Христова держачихся добром обогатЂли есте, титулы им славнЂйшие у свЂта сего починили есте, от войских на подкоморих, от подкоморих на судЂй, от судЂй на каштеляны, от каштелянов на старосты, от старост на воеводы переворочаете?

ПокажЂте ми, о згоду вяжучии, где который з вас тот конечный степень Петрова гласа исполнил: «Се мы, — рече, — оставихом вся и вслЂд тебе идохом, — что убо будет нам», слышавше от учителя, яко неудоб богатии вниидут в царство небесное. Не ваши милости ли болшей нынЂ маете, нежли перво есте имЂли, и богатшими и пышнЂйшими есте, нежли перво есте были? А если неправду мовлю, отвалЂм тот надгробный камен и узрим явно все житие ваше першее в мирском стану и нынЂ рекомо в духовном, хто што перво был и что имЂл и хто тепер ест и што мает.

Начну ж от мирославнЂйших. Перво его милость каштелян Патей, если и каштелянства титул догонил, але толко по чотыри слуговины и во одежди, якая барва вомЂститися могла, за собою волочил, а нынЂ, коли бискупом зостал, перебЂжит личба и десятковая и барва скуподорожшая и славнЂйшая. Так же и его милость арцибискуп, коли простым Рогозиною был, не знаю, если и два слуговины переховати на службу свою могл, а нынЂ личбою перебЂжит и десяток, барвою повно с першим. Так же и Кирило, коли попом простым был, толко дячка за собою волочил, которому кермашами пирожными заплату чинил, а нынЂ, коли бискупом зостал, догонит слугами и барвою первых. Так же холмский, коли в Луцку жил, саксоном и майдебурским правом свое черево кормил , а нынЂ, коли бискупом зостал, мусит быти и слуговин собЂ набыл. Так и Григорко, коли дворянином Рогозиным был 48 и хлопчика не мЂл, а нынЂ и тот тепер, коли бискупом зостал, в чере†ширший, в горлЂ сластолюбнЂйший, в помыслЂ высочайший, в достатку богатший и в слуговинах доволнЂйший. А пинского в первом житию не зналем; але по нынЂшнем показуется, што и тот, як и другие, так же единою бо вижу, яко не вслЂд Христа, но вслЂд свЂта сего пелгримацию всЂ вышреченные трудят.

Тут теды вас вопрошу в доконченю тых пяти стопней. ПокажЂте ми, о згоду вяжучии, откуду есте тое годности вЂрою шафовати доспЂли, коли плоды вЂры сами собою есте разорили и самую вЂру обесчестили и поругали. Не видите ли, нендзные мудрцеве, што рек Христос: «Если хто не отречется себе и своеи души, не может быти мой ученик?» А коли не может быти его ученик, як же тот вЂры познати тайнство может? А коли вЂры тайнство познати не может, як же таковый вЂрою шафовати смЂет? Видите ли, згоду вяжучие, вашу самых вЂру, яко воскресению мертвых не вЂруете! Видите ли вашу смЂлост, яко во отчаяние воверглися есте! Видите ли вашу слЂпоту, яко во погибел миролюбия угрязли есте! Видите ли вашу премудрост, яко во прелести вЂка сего утонули есте! Видите ли ваш подвиг, труд, ревност и тщание, яко да настоящого вЂка благая погоните, о будущого же памят, теплоту, страх и боязнь уморили есте!

Но, о возлюбленнии, вЂруйте, вЂруйте, яко будет суд, и страшный суд, и так страшный, яко и нынЂ, егда бы ся вам очи сердечние створили, устрашившися судии страшного видЂнием, бЂгали бысте голы, як мати вас народила, от тых бискупств и от титулу того и санов тых, которых есте в РимЂ наздобывали, за шматину или вЂхоть бы есте не вмЂнили!

Але што ж, коли вмЂстити мир и его любов и державца оного вам не попустит. Прето я з повинности своеи християнскои вас остерЂгаю, навпоминаю, молю, прошу и ногам ся вашим кланяю, — бЂгайте в Сигор от Содомы, да не жупел и огонь геенский в том невЂрию вас постигнет, бЂгайте на покаяние, донели же время вЂка вашего продолжися вам, — по смерти бо покаяния не обрящете! Аще не можете великое подвига покаянне показати, поне дух свой в праваславной вЂрЂ испустЂте, да не от всЂх частей бога отпадете. Истиною бо вам мовлю, истиною, яко аще не покается и в православие истинным помыслом, сердцем и душею не возвратитеся, во огни геенском вЂчном купно и с папами вашими клокотати и кипЂти будете, которого да вас освободит сын бога живого, пришедый в мир грЂшники спасти. Аминь.

О возлюбленнии! Если бы есте видЂли и вЂдали того диявола, умного борителя, которому под царство подпали есте, вЂдаю, яко о честь папину и кролевскую не дбали бысте и, ни единого рода любодЂйного в вЂцЂ сем не соромЂючися, зас ко благочестию скоро, яко добрые и мужственные воини, возвратилися бы есте. Се бо ест храброго воина: и поползнутися, и зас укрЂпитися, и на мЂсци своем стати. Але не видите и не вЂдаете, яков ест тот диявол и як уловляет, прелщает, прехитряет и от пути спасителного отвлачит! Для чого вы, се вЂдаючи, соромЂетеся возвратитися в свое достоинство благочестивое вЂры? Чи не болшей же будет сором на вселенском позорищи, пред тмы тмами ангел, архангел, начал, властий, престол господский сил, херувим и серафим, так же и естества человЂческого — патриарх, пророк, апостол, мученик, преподобных, праведных и всЂх богу добре угодивших, пред которыми всЂми наша вся содЂянная и тайная открыются и сором чинити будут вЂчного безчестия? Там того бы ся нам сорома убояти потреба, а нынЂ покаятися, да не поставлени будем з нашего нынЂшнего жития безплодием пред оным страшным и нелицемЂрным судиею. Тамо бо не толко вам, але ани собЂ папа и корол помочи не могут и ровно з иншими всЂми и найубожшими голо предстанут и от дЂл своих или славу или бесчестие вЂчно приимут. А чем же ся их соромЂете и для их встыду царствия божия отпасти (и лица господа нашего не видЂти) хочете? «Аще бо, — рече, — кой постыдится мене и моих словес в родЂ сем прелюбодЂйном и грЂшном, и сын человЂческий постыдится его во предстоянии тмам ангелских сил пред отцем небесным». Я тылко с повинности своеи и любви християнскои што знаю, то вам открываю и утаити от вас не хощу. Вам же послухати и сотворити волно, — як хощете, тако творЂте, волю и самовластие имате.

Сие же речение мое толко о имени згоды т.ои вашои книжки, ксендзове бискупи, реклося, показуючи, як басномудрецами мирскими, статутового, прокурацкого, каштелянского, надутого, сварливого и телесного мудрования разуму вЂра шафована быти не мает, не может и не будет. И если бы помощию Велияра от таковых ходотаев в таковых речах в малЂ времени што и зшиватися начало, еднак скоро ся зас роздирает и в конец исчезает, — не толко тая самая згода, але и едначеве згоды с памятию своею во вЂки пропадают и погибают. Што ся трафило и тому баламутови Исидору мудрому 49 (суетногонцеви славы мирскои), ему же ваши милости подражатели есте ся стали, которого в книжках своих залецаете, як и того згода, ним клЂченая, розвалитися поневоли мусЂла. Ато чему? Для того, понеже основания духа святого премудрости не мЂла, без которого фундаменту клЂтка от леда вЂтрца розвалитися мусит. И тот бовЂм Исидор мусит быти по сак, як и ваши милости, до Риму бЂгал. Но о том много и забаву чинити не хощу. Единою бовЂм того Исидора тая ж мудрость плотская, которая и ваши милости в тщую славицу мира сего взбудила, в гору высокомыслия двигнула и взнесла. И тоеж чести и достоинства был, которого и ваши милости, и тоеж безплодное житие жил, которое и ваши милости, и так же своих си и вЂка сего (а не яже Христа Исуса) искал и гонил, як же и ваши милости, и тую ж заплату за свой подвиг в пеклЂ приимет, як же и ваши милости приняти хочете, если ся не покаете и з выпалого благочестия зас скорым обращением не вшрубуете.

А о прочиих баснях прокурацких, в ваших книжках оголошеных, княжата бискупи, ни упражнятися на басни, вам отповЂдати не хочу. Скоро бо углянул есми у тое ваше писание, зараз познал есми мудрость ваших милостей рЂчницкую, а не божию, зараз познал есми учителя фантазии ваших милостей, свЂтолюбца, а не мироненавистника Христа, зараз познал есми мистра ваших милостей, славолюбца, а не обещещенного Христа, зараз познал есми ректора ваших милостей, саколюбца, селолюбца, злато- и сребролюбца, а не нищого сирамаху, бездомника, не имущего где главу подклонити, Христа. А для того, видЂвши иж тую игру ваши милости скачете, которое ноту дудка диявол вашим милостям заиграл, отповЂдати на басни не хочу; видЂти танцоводца змию прелести, вслЂд которое ваши милости поступуете и крочите, Духа чистого мудрования в заба†смрода свЂцкого препираня упражняти не хощу. Еднак же, выбравши нЂкоторые артикули, от ваших милостей на православных сопротивоборно и хулно реченые и на бога гордым духом рыгненые, поставивши их рядом на своем мЂсцу, каждого стиха зособна, пытати ваши милости буду и показати хочу вам, як тот дух заразливый, вами реченный, с пекелной отхланЂ вылетЂл, и пеклом смердит, и в пеклЂ гнЂздо мает, и там почивает и живет, и в вЂки жити будет, если ся не покает.


Имена стихом згоду вЂры клЂтячих.

1.Яко в костелЂ римском не пытаются бискупове своих овечок в премЂнах и вымыслох своих, которых в костел вносят, але што постановят, то кажут своим овечкам держати, а они теж слухают пастырев своих, — так же бы и в Руси быти мело. 2. Як дурные и бесчестные патриархи ничого славного и пожиточного, приежджаючи, в земли сей не чинят; як Иеремия учинил, толко хлопов простых, швецов, седелников и кожемяков над епископов преложил и увес порядок церковный, от духовенства отнявши, свЂцким людем в мод дал, в чом великое уближене власти епископской учинил. 3. Яко от неволник до пана, яко от страдалцев патриархов оторвавшися до свободного и нЂким невладомого папы пристати волЂли. 4. Яко то не чудо ся стало, иж з вина вода ся учинила в згодной мши римское вЂры попа на правосдавное вЂры престол отправованой, але так, омылкою и трафунком, ся тое прилучило.

На тые чотыри артикулы дух благочестия молчати мя не оставил, — ато для того, иж хула в них крыется на бога, которую свЂтом правды обголити и наявно всЂм показати хощу, яко тая хула ест курва и вшетечница, а не цнотливая дЂвица и панна. А другие басни блюзнЂрства телесного и мирского мудрования, в той книжце блекотаные, претерплю и ни за што поличу и вмЂшо, для того, иж язык тое брЂдив, што ему дух лукавьш шептав, а не што его мысль разсуждения чистого, от умного существа образа божия плынущия, наставляла. Того дЂля другие самохвалства, возношения и напинаня себе и з папою своим князей бискупов на рамЂ терпения без отповЂди перенесу, не чудуючися их самохвалию, по простой приповЂдце нашои братии россив, як мовят: каждая, рече, лишка свой хвост хвалит, и зас: тое мовит, говорит, што и любит и рад видит, и зас: о том ся и поучает, за чим гонити хочет, як бы тое прагненое ухватити могл, и еще нЂкоторый от святых рече: о нем же бо кой внутр поучается, рече, о сем и язык движим имат. Так же и ваши милости, ксендзове бискупи, тое славите в своем писаню, што есте возлюбили и тому ся поклонили, тое зас хулите, от чого есте утекли и возненавидЂли, тое износите от своего сокровиша, што есте в сховане сердца вложили и вмЂстили; ту пЂснь козлогласуете, которое ноту есте ся изучили и нынЂ учите. Прето я ся тому писаню хулному, на православное вЂры вЂрных от вас змышленому, ни мало не чудую, згажаючися з нЂкоторым от святых, до которого прийде нЂкий брат и рече со удивлением: «Слышал ли еси, честный отче, яко онсица брат в таков и таков грЂх впадеся?» ОтповидЂл ему отец святый: «Не чудуйся, — рече, — друже милый, падежи не чудуй, але раднЂй и барзЂй тому чудуйся, кто может от грЂха повстати, чудуйся, — мовит, — великим чудом, кто может из сЂтей сидла и уплетения грЂховного выплестися и вымотати». Так же и я не чудуюся, ваши милости ксендзове бискупи, клеветЂ, хулЂ, бесчестию и лжи, глаголемой вами на благочестие. Але бым ся болше чудил, да бых могл щирост, правду и суд, от вас мовленый, слышати. Которых догмат есте ся не учили, слЂду бразды истинны мыслию есте не прочертали, скорбный путь оное ступами трудными розсуждения есте не трудили и не ступали, тЂснотою ж истинного житня и безмолвия до розума Христова есте ся не тиснули.

ТЂмже и не чудуюся тому, яко истину хулите, а лож, чого ся есте изучили, славите. Тако бо Спас ко иудеям рече: «Како вы можете добро глаголати, зли суще?» Так же и аз, ваши милости, подобно Спасову реченню мовлю: «Како вы можете истину глаголати, в сопротивоборной школЂ на истину учившися». А если неправду мовлю, розсуди, любимиче, дай мЂсто судови, а не дияволу и гнЂву, отвори книгу совЂсти и узриш явно все тое, што я мовлю, — а если сам не хочеш тое книги створити и мною мовленому вЂрити, пытаю вас, где в законЂ и правдЂ учили есте ся день и нощ, которого Давид блаженыи зовет, где «Господи, кто обитает в жилищи твоем» — псалма 14 плоды дЂлом пролЂзли есте? ПрочтЂте пилно в той книзЂ сумненя своего и видите не сопротивное ли школы учення тым плодом истинным проходили есте, не в сварах ли, препираниях, прехитренях, преборенях прокурацких и велерЂчницких, лжею истину пребороти всегда учачися, увес вЂк свой изнурили есте. Не днес ли каштеляны, дворяны, жолнЂрми, воины, кровопролийцами, прокураторми, курцияны, корчмарами, купцами, медвЂдниками, а утро — попами, а поутру — бискупами, а поутру утрешнем — арцибискупами починилися есте. Како вы можете истину глаголати, о школЂ, истину учащей, ни слыхавши? Еще ли речеши, яко неправду мовлю, яко в сопротивоборной школЂ на истину училися есте и днес тоеж мудрости учением дышете, а не толко сопротивным учением дышете, але и явственно на истину борете, але уже и граници истины и ограды законные, истиною оточенные, сами собою поламали, попреворочали и подгвалтовали есте. Ато як? Понеже дЂрами през ограды, силою, посулами, вылыганям, человЂкоугождением и другими козньми в церков Христову (а не слЂдом закокным) Удрали есте ся и началствуете. А если сами не видите, зас створити книги совЂсти вашее на показане вам мною реченного мушу, яко да правда вотмЂ лжи вашее не сЂдит, але на свЂт, наявно всЂм, вырнет. ПокажЂте ми, о бискупи, где который з вас иноческого жития степен, ко Христу и духовному разуму скорбным путем ведущий, сам собою пролЂзл, без которого искуса — закон мовит — епископ быти не может. Тот закон есте попрали и внивеч обернули. Ато чему? Для того, иж не толко искуса иноческого не знаете, але ни того самого голого имени, што ест инок, не слыхали есте, и як перво в мирскум стану, так и нынЂ бо рекомо в духовном албо и двояко горше мирскими есте и мирско живете и мудруете. Где который з вас дияконский степен многолЂтным искусом священодЂйства служебного по законе прошол? Тому и сами признаете, иж ся от вас гвалт стал, в котором забавы не толко не чинили есте, але, не знаю, епископством если не попередили есте его. Где который з вас священство по закону узаконеному постигл? Тое и сами признаете, иж от вас згвалчено ест. Где который з вас епископство от вышнего звання, дарования и освящения и от всенародного избрания гласа восприял? Тое и сами признати мусите, яко згвалтили есте. А коли ґвалт закону церковному от всЂх сторон починили есте, признайтеся сами, не сопротивно ли на истину лжею вашею борете. Мусите, хоч и не хочете, бо ся со лжею пред истиною укрыти, ани утаити не можете, а коли в такой школЂ лживой учили есте ся и нынЂ учитеся. Паки спасов глас к вам мовлю, како вы можете добро глаголати, зли суще? Смотрите пилне и розчтЂте книги сумненя своего, не на вас ли нынЂ, якож древле на иудеев за згвалченя закона божия Исаин глас кличет, мовячи: «Слыши, небо, и внуши, земле, яко сыны родих и вознесох, сии же отвергошася мене!» Видите ли, як вы бога отверглися есте! Видите ли, яко вы добро глаголати, зли суще, не можете! Видите ли, яко вы, из вЂры благочестия в невЂрие нечестия и своволного жития выбЂгши и для того покрыти свою ганбу и соромоту вЂчную хотячи, лжею на истину борете, истину топчете и попираете, благочестие православное вЂры хулите! Но убо того не достигнете, на што усадилися есте. Истины лжею пребороти не зможете и сами исчезнете и погибнете, а истина живет и жити будет во вЂки. Прето не чудуюся вам, ксендзы бискупи, яко того ради православних хулите, которых отбЂгли есте. Иначей быти не может, и поневоли хулити мусите, бо хулникови и служити приказалися есте. Время же приспЂло уже на тые артикули, от вас реченные, вас вопросити и показати, правду ли есте то рекли или лож, добрым ли духом или злым.

Начало же оттуду чиню. Вопрошаю убо вас, ксендзове бискупи, из благочестивое вЂры избЂгшие, дадите ми свЂдителство от писания евангелского, апостолского и святых богоносных отец, где есте ся того дощупали и дочитали, яко да стадо словеснее, крещенное во имя отца и сына и святого духа, познавши вЂру, закон своея вЂры, благочестия тайнство, в предЂлах непреложных ограды законное стоячее, в слЂд волков, на розшарпане сумненя их чистого, послЂдуют и зедатися новыми вымыслы в церков вносити хотячих, як в римском костелЂ (которого есте похвалили, чинят) попустят. Не сам ли владыка Христос рекл: «ВнемлЂте себЂ от лжепророк, иже приходят к вам во одеждах овчих, внутр же сут волци и хищници!» и паки: «От плод их познаете их». До кого рекл Христос «внемлЂте себЂ»? До стада словесного. Что ест «внемлЂте себЂ»? То ест «стережЂтеся». От кого? От лжепророк. Кто сут лжепророци? То ест пастыри и наставници. Як же их велиш устеречи? Ото так: если и в одежди овчей и смиренной приходят, але от зубов волчих познаете их; от мудрования правого или сопротивного зрозумЂете их; от новин и вымыслов, от себе, а не от закона, изнесеных, явны будут вам, а до того и от жития, нехристиянски проходячого, ощупаете их. Добре, господи, остерегл еси нас. А коли их познаемо, што нам подобает учинити? Тое: внимати собЂ от них, не слухати их, ниже послЂдовати им.

Пытаю вас на тое, ксендзове бискупи, вЂруете ли Христу, яко закон осторожности от лживых пастырей стаду овцам даде, или не вЂруете? А если вЂруете, чем же вы на стадо хулите, як за спробованными и досвЂдчоными волками вслЂд ходити не хотят и марне и нагло потратити душ своих не попущают? Видите ли, як Христу и Евангелию его не вЂруете, понеже на стадо, Евангелию послЂдуючее, хулите.

Пытаю вас зас, ксендзове бискупи, где пастирям тая власт назначена и узаконена, яко да вслЂд блуду и новых вымысл, собою набытых, из оборы законное, вЂчне уфундованое, овца вытягают и в свою погибел (если сами в ней утонути злым мудрованием и нечистим житием изволивши) и тых вовлачат? и вас где узаконено, яко если видит овца пастыря от окрадения душегубца в ров невЂрия впадша, или во огнь ереси вскочивша, или в водЂ прелести утонути умысливша, яко да и овца вслЂд пастыря в тые погибелные мЂста за оным вскакует и явственно погибает? Не сам ли рече Христос: «Аще и око десное и началнЂйшее соблажняется, изверзи е»? Ато чему? Для того, иж лЂпше тобЂ и з одным оком в рай или в царство небесное, нежели со двЂма в геену отити. Хто ж ест око в тЂлЂ церковном? То ест вожд и наставник. Чему ж вы на тЂло церковное хулите, яко око гнилое, гноем миролюбия засмердЂлое, с посродку себЂ тЂла здорового измЂтуют и вслЂд его не послЂдуют, лЂпше хотячи безславных члонков, сами о собЂ в царство небесное, нежли соочима слЂпыми или наставниками прелщеными в геену внийти? Видите ли, яко Евангелию христову не вЂруете, понеж на тЂло церковное судом зависти и неправды хулите!

Пытаю вас зас, годит ли ся стаду всякого пастыря слухати, который имя собЂ пастырства угонил, а до овчарнЂ не пастырски, дверми, от бога званием и народным избранием, во овчарню стада входит, але тайно дЂрою и через законный плот, злодЂйски, лжею, куплениною и заслугою мирскою, для згубы, а не для спасения овец, влазит? Не сам ли рече Христос: «Не входяй дверми во двор овчий, но прелазяй инудЂ, тат ест и разбойник»? Чем же вы на стадо христово хулите, яко овчарню законную от злодЂев и разбойников пилне стерегут, яко да душ своих марне не потратят, и егда не дверми вшедших, але дЂрою влЂзших, ощупают, таковых за пастырев не приимут, гласа их, яко чуждого, слухати не хощут и вон зганяют? Видите ли, яко Евангелию не вЂруете, понеж на овца правомудруючие хулите!

Пытаю вас зас, где пастырем власт дана болшей што мудровати над овца вЂрные и крещеные во имя отца и сына и святого духа? Того ни единым писанием не покажете; толко тоеж, як и пастырем: «Аще любите мя, заповЂди моя соблюдЂте; а не любяй мя, заповЂдей моих не соблюдает». Пытаю вас зас, имают ли пастыре власт што нового в церков законную, вЂчным фундаментом писання, чина и благообразия укгрунтованую, уставы . неподвижными огороженую, от своего вымыслу мирского вносити и столпы основы закона неподвижного преправовати или на негрунтовное и пропастное мЂсто преносити и увес фундамент законний потрясати албо отмЂняти? Того ни единым писанием не толко не покажете, але еще и проклятство на смЂющих ся того важити услышите. Блаженный Павел рече: «Аще кто благовЂстит вам инако, а не якоже благовЂстихом, — анафема; или и ангел с небесе — анафема». Такожде и святые, Павлу послЂдуючи и церков законом ограничивши, яко да проповЂд евангелская внутр цЂло пребудет, рекоша: «Иже приложит и отимет — проклят». И зас: «Не прелагай предЂла, их же дух святый усты богоносными отци помЂрил, ограничил, закопал, утвердил и непреложны в вЂки быти ознаймил». Видите ли, яко вы предЂла тые сами собою поламали, закону, и Евангелию, и учению святых ґвалт, явно всему свЂту, учинили и, по апостолу Павлу, сопротивно и ново благовЂствуете; треклятии от церкве и закона церковного будучи, а пред ся стадо, в оборЂ правовЂрия цЂло и здорово стоячее, хулите! Видите ли, як совершенные слуги антихристовы есте!

Пытаю вас зас, чем бы и для котрое причины словесное стадо пастыря (если ж не право ходит и трутизною ереси, а не правым евангелским мудрованием их кормити хочет) глядЂти и обличити не мЂло? А чему ж Павел стадо наупоминает, абы и сами в добродЂтел Павлову достигали и тым слЂдом не ходячих и образа Павлова не носячих, прозрЂвше, не приймали и с таковыми ся никакож не общили: к филипписиом тако рече: «Подобни мнЂ бывайте, братие, и смотряйте не тако ходящих, яко имате образ наш; мнози бо ходят, их же многажды глаголах вам, нынЂ же и плача глаголю, враги креста Христова, им же кончина — погибел, им же бог — чрево и слава — во студ их, иже земная мудрствуют». Видите ли, яко овца добре чинят, Павла в том слухаючи: таковые, которые не сут подобни Павлу и которым бог — чрево, и которые мирское мудрствуют и которые славы вшетечное свЂта сего ищут, — проглядуют, а позвавши их, не приимуют, изганяют и общитися з ними, яко со враги креста Христова (для которых и сам Павел плакал), не хотят. Видите, чого ради Русь хулите, а латину хвалите, — яко Русь дурная, если и малое порохно ереси во своей церкви ока, от лжеименных пастырей запорошити хотячих, ощупают, зараз очищают и вон измЂтуют, а у латины лжеименные пастыре целым бервеном вымыслов новых зЂницу спасения людского завалили, а прописнути и промовити за истинну нЂмаш кому. Ато чему? Для того, иж яко мертви всЂ овци в той долинЂ костелного бесловесного послушенства ока бервеном власти пастырское привалены сут и в нечувст†и безгласии сЂдят и о спасений своем, збавенны ли будут или ни, не вЂдают, толко, як ся кому трафит, безсмысенно и скотски умирают.

Пытаю вас зас, добре ли в том латинские овца чинят, иж пастырей, если и направо ходячих, видят и, сопротивно закону божию и евангелскому мудруючих, знают и, в блудЂ прелести валяючихся явно, видят: оных не толко не остерегают и не обличают и смрада их ся не гнушают, але еще во всем ся им повинуют и вслЂд оных, если жив погибел, запевне вЂдаючи, идут, за ними безрозмысльне послЂдуют и тую ж погибел, што и пастыре, душам своим относят. Тут, вЂм, речете, своей хоробЂ догожаючи, добре чинят. Але ми тое «добре», не голословне, але писанием, покажЂте и зас того «добре» пожиток ми покажЂте, то ест — будут ли збавени овца, яко вслЂд волков, блазнителей, злодЂев и разбойников, по Христову гласу, и злых дЂлателей и псов, по Павлу, послЂдуют, — але, если чинят добре, иж во слЂд таковых пастырей послЂдуют, чем же их пастыре от шуее страны на страшном судищи не освобожают, чем же о собЂ за сЂбе отвЂт дати хощут, по Павлу: «Кождо бо, — рече, — о собЂ отвЂт даст пред богом».

А егда истязан и пытан кождый за свое житие будет, што ж за пожиток слуханя тых овец, которые вслЂд пастырей своих, во погибел ведущих, и сами з ними в тую ж пропаст впадают и погибают. Што ж за пожиток молчаня тых овец, которые, ради невЂдомости своего збавеня, за пастырским слЂдом йдучи, в геену огня вЂчного трафляют и погибают? Што ж за пожиток с повинованя пастырского тых овец, которые, если дЂла, доброго жития и правое вЂры нЂмают, пастырми от оного страшного гласа, судиею реченног.о («отидЂте от мене, проклятий, во огонь вЂчный, уготованный дияволу и ангелом его»), освободитися не могут?

Видите ли, иж не добре римские овци чинят, што о своем спасений не дбают. Видите ли, иж не добре римские овцн чинят, што куревником и дворяном безвстыдным над собою владЂти допущают. Видите ли, иж не добре римские овци чинят, што новинами трутизн, закону противных, ден по ден пасучися, пастырем своим о правдЂ евангелской молчат. Видите ли, як тые пастыре овцам на страшном судЂ ничого помочи не могут. А не толко овцам своим, але и собЂ самым могут ли што помочи, скажЂте ми и научите мя о том, молю вас! ВЂм, вЂм, вЂм, яко бЂднЂйший и срожший еще глас, нежели простаки, пастыре услышат и за ходотайство погибших душ со своею погибелию отвЂт невымовный дати хотят, и сугубое сторицею приложение муки приимут, и срожшее каране праведним судом божиим отнесут; але овцам пастырская великая бЂда и мука их малой бЂдЂ и муцЂ пожитку и утЂхи бынамнЂй не принесет. Доволно овцам свое страдание и мучание за грЂхи и выступки терпЂти и в собЂ самых скорб и горест тую слышати! А пастыре если и велми строго и бЂдно за себе и за овци свои мучитися будут, что ж за пожиток овцам от их великобЂдного мучения, коли их меншему помочи не могут и отраду и прохлаждение ни едино дати силы не мают! Видите ли, ксендзове бискупи, яко неслушне того прагнете, яко да звычаем римским над росскими овцами владиете! Видите ли, яко слЂд антихристов ухвалили есте и себе ни в чом не гледЂти заказуете, блуду же и вымыслом, от мистра диявола вами изученых, словесним, образ божий и подобие носящим, овцам, безгласно, яко же скоту, послЂдовати повеливаете! Видите ли, яко сами, от которых бы ся образ чистоты, паненства, невинности, чистои вЂры и доброго сумненя в облюбеници церкви Христа бога показати мЂл, прелюбодЂйцами, вшетечниками и куревниками стали есте ся и, от жоны законное венчалное вЂры восточное украдшися, до зантуза вшетеченства римского отбЂгли есте! Суди сам, если неправду мовлю. Том вам першую баснь вашу, як хотЂли есте по-римски над Русю владЂти, одправил.

СтупЂм зас до второго стиха, которого червоными словы для того повторяю, абы судеве и чителници добре присмотровалися образу, як соромЂтися и румянЂти тот щекун будет, коли его солнце праведное своею истинною освЂтит и пригрЂет. Имя же тому стиху тое: Яко дурный, неславный и непожиточный был приезд Иеремия патриархи 50; ато тым, иж хлопов простых, швецов, седелников и кожемяков над епископов преложил и увес порядок церковный, от духовенства отнявши, свЂцким людем в моц дал, в чом великее уближене власти епископской учинил. Глава 6.

В том стиху, реченном от вас, ксендзове бискупи, показуетеся еще быти поганы, а не християны. А понеже християне нЂсте, як же ся духовными звати или славити смЂете! Албо не вЂдаете, что ест дух и духовный? Духовный ест, иже духовное дЂет, мудрствует и глаголет. Да знаете! Чем же ся вы духовными зовете, а телесне и погански мудрствуете и глаголете и самого Христа, сына божия, царя над цари небесного, науку и образ смиреномудрия показавшего, своею гордостию и хулою попираете? Ато як? Для того, иж лЂпшими ся над другими чините и от плоти и крови порождением, а не от бога свыше, хвалите. А Иоанн евангелист не тых, которые ся в злотоглововых подушках и китайчаных пелюхах родят, блажит, але которые ся от бога свыше родят, сих вЂрными и зацными быти розумЂет, мовячи: «Елици же, — рече, — прияша его, даст им власть чадом божиим быти, вЂрующим во имя его, иже не от крови, ни от похоти плотския, ни от похоти мужския, но от бога родишася». Як же ся вы духовными, а не толко духовными, але и вЂрными звати можете, коли брата своего, во единой купели крещения — вЂрою и от единое матере — благодати ровно з собою породившегося, подлЂйшим от себе чините, уничижаете и ни за што быти вмЂняете, хлапаете, кожемякаете, сЂделникаете, швецами на поругане прозываете? Добре, нехай будет хлоп, кожемяка, сЂделник и швец, але воспомянЂте, як брат вам ровный во всем ест. Для чого? Для того, иж во едино треипостасное божество и одным способом з вами ся крестил, и одною благодатию и даром вЂры облечен ся стал, и одною печатию духа святого на християнство запечатай ест. А подвигом и вЂрою дЂлною, если ж и одного отца и матере, вЂры и крещения есте, может быти кожемяка от вас лЂпший и цнотливими. Откуду то познаемо? Оттуду: Два сынове были у одиного отца Исаака и матери Ревеки — Иаков и Исав 51; Иаков же был лЂпший и цнотливший, хоч молодший, а Исав зас горший и подлЂйший, хоч же старший.

Ато чему? Для того, иж Иаков богу угодил и благословение приял, а Исав чрево и похоть над благословение божие предпочтил и от бога отвержен был.

Пытаю теды тебе, ругателя имени, чим ты лЂпший от хлопа. Албо ты не хлоп такий же, скажи ми! Албо ты не тая ж матерня, глина и персть, ознайми ми! Албо ты не тое ж тЂло и кров! Албо ты не тая ж жолчь, хракотины, слина и тлЂние! Или ачей ты от камене утесан и не маеш кишок и слюзу хлопского в себЂ, ознайми ми! Или ачей ты костяный, так, без тЂла, родился еси, дай ми знати о том! Зас пытаю тебе и не оставлю, питаючи, чим ти лЂпший над хлопа, — повЂж ми и свЂдоцтво дай, не гордую хулу и дмение, але божественного гласа писанием покажи. А егди показати не можеши, яко ты каменный, костяный или навет и золотый, толко такий же гной, тЂло и кров, яко и всяк человек, чим же ся ты лЂпшим показати можеши над хлопа? Явно, яко ничим другим, толко хулою и величанием гордости пред человЂки, а пред всевидящим оком — окаяннЂйший и всЂх тварей безчеснЂйший еси. «Всякое бо, — рече, — высокое во человЂцЂх мерзко и нечисто ест пред богом». А коли ты показати то не можеши, яко ты лЂпший над хлопа, а сам ся гордостию чиниши, як же ты духовным или навет и християнином простым зватися можеши? Видите ли, як дух антихристов, ваши мЂхи надув, и усты гордо дыхает и рыгает. Видите ли, яко не толко духовными, але ани простыми християны зватися вам не годит и не достоит. Ато чему? Для того, иж на Христа самого и учение его борете, плотским рождением, славою и богатством хвалите и духовними пастырми быти называете, а братню свою и христову подлЂйшими от себе и не толко подлЂйшими, але и ни за што их пред своею гордостию быти розумЂете. Того ради показати то не хитростию речництва, але божественным писанием хощу, як не естесте не толко духовные, але ниже простые християне, и хто вас християнами звати бы хотел, и тот не ест християнин.

Начало оттуду. Христос бог, слово небесного отца, превЂчно рожденый сын, во послЂдняя лЂта, яко ж свЂдителствуют евангелисты и богословци, Григорий, Василий, Златоустый в «БесЂдах» и прочии вси, о богословии гласящие, восхотЂвши тую тайну, от вЂк сокровенную в бозЂ, миру открыти и плотию на земли межи земными ся родити и от земных земное тЂло на себе взяти, для того нищих, а не богатых, безчесных, а не славных, простых, а не хитрых родителей собЂ избирает; теслю, а не короля или воеводу отцем именует; во вертепЂ, а не в замку или палацах ся родит, во яслех скотских, а не на ложах или одрах коштовных, на соломищу и гнои, а не на подушках скупых ся покладает; пелюшищами простими, а не тонкодорогими ся повивает. То толко о рождению небесного царя, земнородным на обновление нетлЂния рождшагося, показалем. Ато для чого так чинит, то ест послЂднЂйше, безчеснЂйше и неславнЂйше ся родит? Для того, мовит, абы мира сего гордост, пыху, славу и могутство тым безчестием убил, уморил и до конца стлумил. Для того ся так нищетно родит, абы потом в замках, палацах и коштовных дворЂх родячиеся над тых, которые ся в хлЂвЂ родят, не возносили и лЂпшими не чинилися. Для того ся теселским сыном зовет, абы тые, которые сут королевские и княжацкие сынове, над кожемячиных сынов не возносили и лЂпшими не чинилися. Для того на гною во вертепЂ, без слуг, в пелюшицах ся родит, абы тые, которые на подушках мяких, в замках, дворах и коштовных гмахах, при многу слуг и дворян, в тонких китайках и у полотнах флямских ся родят, над убогих, сиротски, голо, без достатку всякого родячихся лЂпшими не чинилися. А коли сам цар небеси и земли земнородным образ таковый сам собою показал тому смиренню, персть земленую, яко да ся гноем тЂла не возносит, научил, тое кичение и надутост пыхи мирской отсЂкл, чим же ся вы, ксендзове бискупи, над братиею своею лЂпшими чините и на них хлапаете и кожемякаете? Видите ли, яко еще християне не естесте, як же вы пастырми и духовными зватися можете? То ест щирый фалш, зрада, подступок, лож на духовное имя и хула на всесилного бога, чим ся вы зовете! «Елици бо, — рече, — во Христа крестистеся, — во Христа облекостеся». Тако ли есте ся в Христа облекли? ПокажЂте ми Христову одежду на собЂ, — его ли будет или антихристова? Да гдЂ ж Христос на своих учеников хлапав и кожемякав? Не сам ли рече предобрый: «Яко аз, — рече, — братия моя, яко раб и служай между вами вам есм». И зас: «Хотяй быти велик, да будет мний, и тогда будет велик». Видите ли, яко еще, поганци есте, а не християне, и меноватися именем християнским не можете, если и всхочете! Ато чем? Для того, иж поганство зо всЂх сторон на вас кличет, волает, вопиет и зовет, мовячи: «Ото сут нашого кореня плодове, образом, житием, вЂрою, мудрованием и бесЂдою!» Том вам показал, яко християне нЂсте.

Тепер зас о приездЂ патриаршином мовити буду тым способом. Пытаю вас, бискупи, для которои причины патриархи нашого приездне славный и не пожиточный вам видЂти бы ся мЂл в тые край мешканя нашого? Албо для того бысте розумЂли непожиточне приехати ему, иж он видЂл церков Христову заплюгавленую нечестивыми пастырми чревопасными, мЂста хвалы божия позалЂганую властию мирскою и мучителством поганским зневоленую, злым и нечистым житием поруганную, похуленую и до конца обещесченную, и видЂл, яко волци пастырообразные на стер†церковного лихоимства моцно сЂдят и заюшилися сут; изгнати если бы их от того стерва и хотЂл, смерти звЂролютства оных избЂгнути бы не могл. Што ж чинит? Созывает стадо словесное, овци Христовы, будь кожемяки, сЂделники, швецы и всякого стану, чина и возраста православних християн; созвавши сих, мовит к ним тыми словы: «Спасайтеся, братия моя, сами, а пастырми спастися не можете». Чему? «Для того, иж они о спасений не толко вашем, але и о своем ни мало не мыслят. Уже пастыре ведлуг свЂта сего пелгримуют, уже пастыре князю вЂка сего на службу его приказалися сут, уже пастыре о вЂчный живот, и ваш и свой, ничого не дбают, уже пастыре нынЂшний вЂк выжити, выроскошовати, выславитися, выгордитися, выбогатитися, вымудритися умыслили сут. Спасайтеся, братия моя возлюбленная, вЂрное стадо Христово, роде избранный, языку святый, царское священие, людие обновления, российский благочестивый народе, сами. Спасайтеся вЂрою; спасайтеся заповЂдми евангелскими; спасайтеся законом отческим; спасайтеся чистым и цЂломудрым житием! ПребудЂте в церкви, пребудЂте во оградЂ, пребудЂте в законЂ, пребудЂте во согласии, едности и любви».

ПовЂжте ж ми тое, о клеветници, того ли ради патриаршин неславный и безпожиточный приезд быти сказоваете, яко овца своя соузом любве, закона, вЂры и единомыслия едностию связал, совокупил, утвердил и угрунтовал. То ли и Христа дурным и непожиточне до Иерусалима пришедшого наречете, который, видЂвши архиерее и пастырЂ безплодные, мЂста церковные в широких реверендах позасЂдалые, обЂдов и вечерей торжественных пилнуючие, по торжищах славноходящие, воскрылия реверенд за собою волочащие, з оных духовенство духовное церковного строения и ряду зодравши, на простых сЂтоткателей рыболовов вложил, послЂди же и кожемяк в тое достоинство увлекл. То ли и Христос для того от вас будет дурным и непожиточным назван, як и патриарха? Видите ли, як от вас дух антихристов, хулнолживый и клеветный, дышет. Видите ли, яко заразою смердячою пекелною дышет. Видите ли, яко лжете на патриарху, якобы неславно и непожиточно приехати мЂл и немудро в своем приездЂ собЂ поступовал. Пытаю вас о том, который может быти мудрЂйший, пожиточнЂйший и славнЂйший, яко тот, который, да не убита будет нагло душа от разбойников, устережет. Пытаю вас о том, который может быти мудрЂйший и славнЂйший и пожиточнЂйший, як тот, который о злодЂях, да не украдено будет душевное богатство, ознаймил. Пытаю вас о том, который может быти мудрЂйший, славнЂйший и пожиточнЂйший, як тот, который от волчего душегубства, яко бы ся скрыти и в зубы прелести не увязнути, научит. Видите ли, яко патриаршин приезд славный и пожиточный был и ест. Видите ли, яко патриарха не дурен, але премудрЂйший от премудрых вЂка сего был и ест. Том вам показал о славном, пожиточном и мудром приездЂ патриаршином.

ПоступЂм зас для чого патриарха ряд церковный на хлопы, кожемяки, сЂделники и люди свЂцкие вложил, а бискупы в том достоенстзЂ пренебрегл и голыми тое чести быти показал и обелженьем власти им конечное учинил. Пытаю вас, бискупи, скажЂте ми тое: Христос владыка бог, коли спасение проповЂдати вселеннЂй послати хотЂл, архиереев ли иерусалимских на тое достоинство избирал, Анну и Каияфу 52 ли тою годностию почтил и оных ли на тую службу оную возвал. Албо не вЂдаете, иж тые его убили, албо утаилося вам тое, иж тые его осудили, албо не слышали есте о том, иж тые, да убиют скоро и безчестно будет на него инстиговали, албо не читали есте о том, иж тые ся з него ругали, смЂяли, хулили, лгали и повЂсити узаконили? Але когда добрый владыка на проповЂд выбрал простых хлопов, смиренных нищих, беззлобивых рыболовов, кожемяк и тым церков свою поручил, в шафунок спасенне человЂческое, досвЂдчивши их быти вЂрными, злецил, — так же властне и патриарха, слЂда Христова держачися, учинил; тым, которых быти не еретиками, не отщепенцами, не развратниками благочестия досвЂдчивши, церков Христову и своего пастырства моц строения злецил и як ей хранити от ереси антихристового учения научил, и Анны и Каияфы оставил, архиерее, широкореверендные и на лектыках колышучиеся, пренебрегл, а бискупи, саки по РимЂ гонячие, ни за что быти и розумЂтися осудил. Видите ли, яко патриарха слушне и пристойне учинил, як на простых вЂрных, свЂтских людей, православных християн церков Христову вложил и строение в ней поручил.

Але вы, бискупи, по тому вашему обличению што учините, вержетеся, вЂм, зас до того надыманя, мовячи: тые хлопи простые в своих кучках и домках сЂдят, а мы пред ся на столах епископских лежимо; тые хлопи з одное мисочки поливку албо борщик хлепчют, а мы пред ся поколко десят полмисков, розмаитыми смаками уфарбованых, пожираем; тые хлопи бЂтцким албо муравским кгермачком ся покрывают 53, а мы пред ся в гатласЂ, ядамашку и соболЂх шубах ходимо; тые хлопи сами и панове и слуги собЂ суть, а мы пред ся предстоящих барвяноходцев по колко десят маемо; перед тыми хлопи нЂхто славный шапки не здоймет, а перед нами и воеводы здыймают и низко кланяются.

На тое кокошене, панове бискупи, вам отповЂм так: архиерее они, Христа убившие, подобные вам, не на мЂстах ли епископских седЂли так же, яко и вы, але хлопи Христовы лЂпшие от них были и нынЂ суть; они чрево не так же ли ладовали, яко ж и вы, але хлопи Хркстовы, алчющие правды, лЂпшие от них были и нынЂ суть; тые трупи не так же ли ?мяко и коштовне убирали, яко ж и вы, але простаки Христовы, одноризные, лЂпшие от них были и нынЂ суть; тые предстоящими не так ли ся были окружили, яко ж и вы, але хлопи Христовы, самослужные собЂ, лЂпшие от них были и нынЂ сут; тых Пилаты и Ироды не так же ли почитали и перед ними уклякали, як же и перед вами, але хлопи Христовы, гоненые и оплюваные, обесчещенные, поруганые, посмЂяные, битые и убитые, — лЂпшие и цнотлившие и славнЂйшие от них были и нынЂ суть. Так же и вы, панове бискупи, сЂдите на мЂстах епископских, але на достоинст†и учтивости не сЂдите; селами владЂете, але вашими душами диявол владЂет; пастырами ся зовете, але есте волки; священными ся зовете, але есте проклята; епископами ся именуете, але есте мучители; духовными ся быти розумЂете, але есте поганця и язычници; хвалитеся, Павловым словом боронячися, попом благочестивым и мовите, як вы попи, а мы епископи, не ко попом, мовит, речено: «Внимайте себЂ и всему стаду, в нем же вас дух святый поставил епископи пасти церков господа и бога», але ко епископам.

Тут ставши, буду вас пытати силы того слова. ПриидЂте, приидЂте, вси позорищници, на видЂние духа антихристова гласа и узрите его, як ся будет румянЂти и соромЂти, коли его сонце праведное пригрЂет и обличит! Пытаю вас, лживые бискупи, чим ся вы хвалите, — чим не были, ни естесте и николи не будете. СкажЂте ми тое первое голое слово, Павлом реченное, что ест «внимайте себЂ» и кую силу тое внимане мает, а потом и до духа святого, ставящого епископы, поступимо. Але вЂм, о том вниманю не толко вы, богочревци, але и всЂ философи мирские, посполу з вашими машкарники исусоругателми, то ест зовемыми езуиты, сложившися, силы того слова «внимайте себЂ» ознаймити ми не можете, — раз†не мовлю истинного богослова, в пустыни искус безмолвным претерпЂвшого, бЂсы мыслено преборовшого и ко богу око душевное прозрЂти проочистившого, плоти и крови совлекшогося, от такового толко силу того «внимай себЂ» услышати могу, а от богокорчемника и мудреца, в миру пресловутого, никакож, А коли того первого слова не знаете, чим же ся вы над попы превозносите и станом епископским славити смЂете?

Пытаю зас, дух ли святый вас поставил епископы пасти церков господа и бога или дух антихристов пасти чрево и множити несытое лихоимство. Не явно ли всему свЂту, яко самого преисподнего Велиара дух вас поставил и его жертовное лакомство! Чим же ся вы над попов православних вышшими во спасений душевном чините? ВЂм, яко вышшие есте, и я вам признати мушу, але чревом роскошнЂйшим и горлом сластолюбнЂйшим, и помыслом пышнЂйшим, и лихоимством несытЂйшим. Тым есте вышшии от попов православних, а не спасением душевным! А спасением душевним не толко от попов, але и от простых свЂцких православних так далеко меншими и послЂднЂйшими есте, яко из Иерусалима до Рима и далЂй. И хвалитеся тым титулом епископским, а не достоинством, мовячи, яко не имают власти духовенство православных (егда с предЂлов законних виступите и от жоны власнои своеи, церкви вЂры восточнои, до курвы римскои на блуд отбЂгати хочете и оную вшетечницу, наблудившися там з нею, и еще тайно до чистого ложа облюбеницЂ церкве Христовы приволокати изволите) вас низлагати, измЂтовати и кляти. Так вЂдайте, не толко очи здоровые ока гнилого усмотрити и осудити могут и власт имают, але и само тЂло церковное, то ест простые християне, по Христову гласу, скверноначалника изверечи, осудити и прокляти власт имают, да не с тым блазненым оком, или пастирем, в геену внийдут. А священици православнои вЂры, поборници благочестия, в своем степени неподозренные, таковую силу, власт и началство имают правду евангелскую боронити и о ней ся до крове заставляти, яко же сам Христос и апостоли его и прочии. И аз убо, многогрЂшный мних Иоанн, первей вас навпоминаю, да ся ко богу обратите и покаяние за дерзнутое вами и другого злого жития, плоды достойные показавши, сотворЂте. А если не хочете, проклинаю вас от отца и сына и святого духа, да есте прокляти нынЂ и в будущий вЂк. Аминь.

ПовелЂте ж, панове бискупи, тоей гры, мною реченной, по сзоей смерти спробовати. Если ся ваш труп розсыплет До общого всЂх воскресения, тогда узрят тне гладячий пробовници, што ест наша православних вЂра и якая сила клятвы нашее вЂры. Видите ли, бискупи, яко потвар, клевету, лож и хулу на святого духа наносите, славячися от оного стан епископский приняти, о чом дух свят николи не мыслил, Да вас, его хулников, епископами становит. Не явно ли ест всему позору ангелскому и человЂком, живущим на земли, яко сами есте тое бискупство (миролюбием у миром владЂющого духа, со небесе соверженного за гордост) угонили и того всЂми виды и образы своими безплодного и нехристиянского жития, быти вас епископами благословившого, показуете, а не святого духа, не оного первого речення Павлом, от духа святого поставленныи, еже пасти церков господа и бога, але послЂднего, — еже не щадЂти стада. Присмотритеся толко пилно, створивши зерцало сумненя своего, не ваш ли то образ и пристригане бород, на смЂх чорту пекелному пристроеное, Павел ознаймил, мовячи: «Аз бо, — рече, — вЂм се, яко внийдут волци тяжци во вас, не щадяще стада». Что ест «внийдут»? То ест: силою, помощию, хитростю, человЂкоугождением и лихоимством влЂзут, вдерутся, вкрадут и втиснут кгвалтом в началство. Что — «волци тяжци»? То ест: началствуемые мнимые пастыри, драпежници, лихоимци, идолопоклонници сребролюбия и невЂрием еретици. Что ест «нещадЂние стада»? То ест: погребение ума пастырского в пожитках дочасных, которые волну овечую лупят, дерут и молоко крвавого их поту пьют и всЂгды ся з них наситити ищут, и оных паствою евангелскон проповЂди истинны по должному закону пастырскому не пасут и от глада словесныя овца Христовы поморили сут.

РозглядЂте ж свой образ в том зерцалЂ, панове бискупи, не вас ли то Павел по поставленЂх духом святым епископЂх сказал. Не вы ли то влЂзли, не вы ли то волци тяжци, не вы ли то не щадите стада! А если бысте розумЂли от духа святого поставлены быти, покажЂте ми тые плоды, ко поставленю приготованые, которых Павел изобразил, к Тимофею тыми словы мовячи: «Подобает, — рече, — того степеня епископского прагнучому первое быти непорочну, таже единой женЂ мужу, трезвену, цЂломудру, благоговЂнну, чесну, страннолюбиву, учителну, не пияници, не бийци, не сварливу, не мшелоимцу, но кротку, независтливу, не сребролюбцю, своего дому добрЂ правящу, чада имуще в послушании со всякою чистотою; аще бо кто своего дому не умЂет правити, како о церкви божий прилежати возможет; — не новокрещену, да не разгордЂвся, в грЂх впадет и в сЂть дияволю. Подобает же ему и свЂдителство добро имЂти от внЂшних, да не в поношение впадет и в сЂть неприязнену». Если теды вас дух святый поставил, покажЂте ми хоч одно овощийце от того выличеного и реченного Павлом єпископу сотворити и выконати должного. Не толко не покажете, запевне вЂм, але еще, коли всхочу на кождый плод вашого жития спротивные дЂла обличати, оскверню воздух поднебесный и отрую голосом слухи людские. Еднак же дарую вам всЂ плоды, в серединЂ сЂдячие, которых, вЂм, иж ани снилося вам, да бысте их творити дЂлом хотЂли, — а о переднем и послЂднем вас пытати буду.

ПокажЂте ми убо, о бискупи, были ли есте коли, хотячи стану епископского, непорочни. Знаєте ли силу того слова, што ест «непорочен»? Не толко не были есте, небожята, непорочными нЂколи, але есте еще и нынЂшняго жития, рекомо в духовном стану, различньїх злоб пороками тое непороченство убили, уморили и запамятаням погребли, и не што другое, толко порок во вас царствует. Пытаю вас зас о той послЂдней добродЂтели, покажЂте ми, о бискупи, хто давал за вами свЂдителство от внЂшних, як есте на той степень достойни и як есте житием добрым исполнили всЂ тые добродЂтели, Павлом реченные. «Подобает бо, — рече, — ему и свЂдителство имЂти от внЂшних, да не в поношение впадет и в сЂть неприязнену». Хто ж давал за вами сзЂдителство от православных, скажЂте ми? А если показати не можете или не хочете, тогды я вам показати хочу, хто давал за вами свЂдителство.

Первое вам посвЂдчили румянцЂ, то ест чирвоные золотые з бЂлыми великими таляры, полталярки, орты, четвертаки и потройники. Ато як? Ото так, што славнЂйшим секретарям и рефендарям, похлЂбцям и тайным лгарям его королевской милости, абы ся причинили и свЂдчили, яко години человЂк на панствованя бискупских доходов и пожитков и своволного и вшетечного мешканя на тых имЂнях и селах, бискупству належачих, за которую причину тому, особЂ, завивши в папЂрец сто или як ся трафит чирвоных золотых, в руку тыць, другому зас тых же шафранцюв очелюбных, завивши так же, в руку тыць; одправивши же румянолюбцув, потом ступЂмо до понеславнЂйших особ, тым зас, ворочки понаполнявши, овым — великих бЂлых таляров, овым — зас полталярков, овым — ортов и четвертаков, тому в руку тыць, овому тьщь и сему тьщь, а писародрачЂ юж не бракуют и потройники з грошами берут и дерут. Тые ходотаи, панове бискупи, за вами свЂдчили, яко есте годни на своволное житие сел епископских; свЂдчил зас поклон, нЂкоторая тисяча чирвоных в кишеню королевскую; а до того свЂдчило вам ваше злое сумнЂня, иж есте ся обЂщали вЂры отврещися и антихристу поклонитися, што и скутком есте постигли и желаемое исполнили. И учинивши тое плодоносне, мовите, яко не имают власти православные епископы, священици и общий народ, вас прокляти. Мают и мают, небожата, и юж есте прокляти и геєну вЂчную запевно наслЂдуете, если ся не покаете. Волно вам не вЂровати, але умры тылко, тогда узриши, если лгу или правду мовлю. Видите ли, нендзнороскошници, где заплынули есте. Видите ли, яко на глубокий вир, римскую прелест, натрафили есте, в которой вЂчно утонути мусите, если ся не покаете.

Тим вам показал, як не дух святый вас поставил епископами, але несытство, лакомство и лихоимство; показалем пожиточный приезд патриаршин; показалем, для чого на свЂтских людей церков Христову патриарха преложил. Тому второму артикулу сталося досыт, уже ступим до третего. В третем стиху замыкается причина, для которои, патриарху одбЂгши, папЂжу поклонилися есте и тому служити изволили есте. Тое и выкладати или изблювати вашея мудрости дЂло и отрыгане хулное нам сопротивно не потреба, але и сами посвЂдчити, признати и утвердити вашу рЂч и учинок мусим, яко для того есте патриарху отбЂгли и до папЂжа пристали, як есте сами рекли.

Речение же ваше таковый подобный образ носит. Яко от убогих до богатого, яко от простых до хитрого, як от безславного до славного, яко от неволник до самого сваволного, яко от смиренных до гордого, яко от бЂдных до бЂду чинячого, яко от страдалцов до мучителя, яко от ничого не маючих до миром пануючого, яко от поточцев евангелских до рЂки пекелнои, яко от уничиженых во мирЂ до вЂком сим царствующого, яко от алчущих правды до властию свЂта сего пресычоного, яко от члонков Христовых патриархов, отторгшихся до головы антихристовы, папы, прибЂгли есте и тому поклонили есте ся, и тому послужити изволкли есте, и того части и жребия нынЂ и в будущем вЂцЂ участниками быти попрагнули есте. Признаваем вам без всякой забавы, иж для того так учинили есте, як и сказали есте.

Еще остало о чудЂ вина, в воду претвореного от ксендза латинскои вЂры, на православнои вЂры престолЂ мшу служачого, которое чудо не чудом быти розумЂючи, але омылкою ся так стало, ксендзове бискупи своею прокурациею, як на трибуналЂ у ЛюблинЂ 54, у православных з вЂры и мниманя выкрутити и вывернути и вылгати хочут. На тое вам, панове бискупи, так отповЂм: махлюйте як хочете, махлюйте и лжЂте и тую ж лож другими подпорами неправд боронЂте, пред ся истинну премахлевати и превратити не зможете, и што ся стало, истиною то чудо ся стало. А то откуду вЂм, понеже сам на той час у ваших краях нЂсм был? Знаю то от овде святогорского чуда, што ся от латины так же попущением божим часу нЂкоторого у Святой горЂ стало, для чого на увЂрение историю пристья латинского до Святои горы, дЂев и плодов их, которые овде починили, выписавши, посылаю вам, с которои зрозумЂете сами, омылка ли то там была, тому вину, в воду претвореному, или истина.

ПрисмотрЂте ж ся, ксендзове бискупи, тому чуду овдешнему, што ся стало за ради осквернения мши лживое латинское, на благочестивЂх престолЂ служеной, и, присмотрившиеся тому достаточне, вЂруйте ж, што и в Берестю истинною тое чудо ся стало, иж з вина вода ся показала на обличение нечестия вашего, и не махлюйте выкрутами прокурацкими у вЂры истиного мниманя православных, яко омылкою тое ся стало, а не чудо. Истиною чудо и велие чудо! Але вижу, толико антихрист вас вЂком тым ослЂпил и омрачил, яко ни тым самым чудом, от Христа явственно показанным, уцЂломудритися и в чувство и в страх приити не хочете и еще сопротивно на истину лож махлярскую улЂпили есте, мовячи, яко омылкою ся так стало. Но убо вы лжЂте, як хочете! Ваш вЂк, ваше лживо царство, ваша суетная слава, ваша безценая роскош, ваше идолокланяемое могутство, ваша поганская владност и началство, ваше все, еже вЂк сей внутр себе крыет, сей вам служит и вами владЂет и навЂки владЂти будет. Але нехай толко от сея жизни изгнани будете, тогда будете видЂти, што будете мЂти; тогда будете видЂти, яко на истину лжею бороти, оную тлумити и попирати; тогда будете видЂти ректора и учителя вашего, от которого есте ся тым розумом отрули; тогда будете видЂти коронодавца жизни сея, от которого есте ся во вЂцЂ сем вЂнчали; тогда будете видЂти царство властеля вЂка сего, от которого есте ся прославили; тогда будете видЂти, егда покрывало душевное, дебелством плотским приваленое, на с.мерти ся вам открыет, — а нынЂ творЂте, як хочете.

А што посылаете православных до скаржиных книг 55, а правилца руские уничижаете и поруговаете, мовячи, иж в них ничого антихристова вымыслу не знайдет, а в скаржиных и презобилно, то правду есте рекли, иж так ест. Але то чуднЂйшая, иж тые маленкие правилца руские до великого вас пекла угнали, ато еще чуднЂйшая, иж для тых маленких правилец руских вы утечи от Христа до антихриста мусЂли, и то теж чуднЂйшая, иж тые маленкие правилца руские 56 соромоту вЂчную и нынЂ и в будущом вЂцЂ вам зеднали. Ато чему? Для того, иж не по их повелению, але злодЂйски и волчеобразно в церков Христову есте влЂзли и, чим нЂсте были, зватися есте смЂли — пастыри, священики, епископы, которые правилца, не терпячи тое крывды и того голоса вашого имени, дотоля ж вас кликали, крычали и волали, аж вас с того мЂсца, с тое чести и достоинства изогнали. И для того ли их зовете маленкими, што лживое священство. показали, обявили, обличили, осудили и до конца обелжили? Видите ли, яко потвар на них, маленкими быти розумЂючи, змышляете. Видите ли, яко болших, от всея вселенныя наполненых зобравши писм, над тые маленкие (которые великую лож до грунту потлумляют и на свЂт фалш оное выставуют и всЂм, яко да ся стерегут неправды, знати дают) показати не можете. Видите ли, як их от зависти, гнЂва и вражды, яко маленки сут, потваряете, а они сут высоки, а они сут толсти, а они сут велики, а они красни. Ато чему? Для того, иж истина в них сЂдит, для того, иж бранты: золото, срЂбро, камЂня дорогое, то ест щирост, суд и правда, в них царствует. Але вы, пред ся оных зацност и достоинство занедбавши, православных до Скарги заганяете. Позволю вам и того, нехай пойдут! СкажЂте ж ми тое, знайдут ли там у Скарги правду, знайдут ли там суд и справедливост. Или утаило ся вам тое, яко православные многокрот и без личбы прибЂжище до Скарги творят, а послухаючого их правды знайти не могут? Или не вЂдаете того, яко православные всЂгды наслЂдуют, а справедливости своему утиску, бЂдЂ и крывдЂ никако же отнести не могут? Или не слыхали есте того, яко православные Скаргу всЂгды пилнуют, а от Скарги о правдЂ николи слыхати не могут? Ато чему? Для того, иж тые великие книги сумнЂня своего перед ними затворил, оглох, онЂмЂл, суду праведного в них показати не хочет, своеи вЂрЂ прелести догажаючи. Чого ж далЂй православных до Скарги бЂгати нудите, которые всЂгды СкарзЂ служат и вЂк свой, служачи, изгубили сут, а справедливост выслужити никако же не могут? Чого ж далЂй у православных хочете? Уже и вашу волю исполняют, во слЂд Скарги всЂгды трудятся, а вытрудити, выпросити, выжебрати и выплакати собЂ у Скарги справедливости никако же не могут. Оставте же теды православным дорогу до великих книг скаржиных показовати, коли в них и найменшои правды нЂмаш. Нехай православные у маленких правилец при правдЂ Дома сЂдят, нехай дома у маленких правилец истины пилнуют, нехай дома маленкими правилцами ся спасают, которыми без вонтпеня всякого спастися чают и запевне спасут. А вы юж там з великими скаржиными, яко хочете, так себЂ поступайте, а вы юж там як хочете, так мудрствуйте, а вы юж там як хочете, так ся дмЂте, напинайте, кокошЂте, вгрру возносЂте и вылЂтайте. Будите собЂ кромЂ нас, мы же со Христом богом нашим и нынЂ и в будущем вЂцЂ, даст бог, запевне быти ся сподобимо, которому чест и хвалу, и благодарение, и поклонение возсылаем со отцем и святым духом, нынЂ, и присно, и во вЂки вЂков. Аминь.

А если бы зас хто, не вмЂстивши духа святого разума, котрый лож без всякого гласкания и лицемЂрства обличати звыкл, и на мене от зависти потвар вложити хотЂл, мовячи, яко доразливе и ущипливе в том писаню мовит, — на тое вам так отповЂм. Научилемся от Христа истины без похлЂбства, лож лжею, волка волком, злодЂя злодЂем, разбойника разбойником, диявола дияволом звати. Сам бо преблагий бог, егда сопротивно истинЂ боручих рода еврейского видЂл, рекл им: «Вы отца вашего диявола есте и похоти отца вашего творите». Ато як? Для того, иж во истинЂ не стоите и убийства прагнете, которому кореню диявол отец, яко во истинЂ не стоит и человЂкоубийца ест. Научилемся зас от Иоанна Богослова сопротивно науце евангелской мудруючого — антихристом и его предидучим — лжепророками звати. Научилемся прелщенными от внЂ благочестивой веры мудруючих от Петра, Иуды и Павла апостолов звати. Научилемся и псом безстидным наскакаючого на благочестие хулою безрозмыслне от Павла звати; он бо тот глас изнесе, мовячи: «БлюдЂтеся от псов и злых дЂлателей, то ест от лжеименных пастырей, которые у виноградЂ Христо†робитися подняли, а оного сами ж запустошили и тернием беззаконного жития заростили». Нехай же теды дух святый тые уста затворит и онЂмЂти даст, которые бы тое писаня мое завистию хулити хотЂли, которие от источника истинного начерпавши тот поточок малый от мене в ваши предЂла пущен ест; але хоч же ся видит малый, однак чаю на бога, яко алчущих и жаждущих правду видЂти достаточне напоит, насытит и удовлит. О сем до здЂ.

Будет зас и тая похвалка у противных: «Волно ти, мовячи там заочне и в далеком кутЂ, хоч же и правдою, о нас так беспечне ширмовати, але коли бы еси тут был и тобЂ бы есмо тот язык, яко и Никифору, затворили 57 и прописнути не дали».

На тое вам одповЂм. Не для далекости от вас будучи, я правду смЂле мовлю и правдою вас постигаю, але за правду и умрЂти изволяю, аще бог дарует, да знаете, и помолЂтеся богу, да вас сподобит иж зраковиднЂ от мене реченное слышати. Аз бо желаю, но еще волЂ божей на се нЂст, а о себЂ наскаковати, безстуднЂ, песски, яко же вы на поповство, без волЂ божей не хощу; научих бо ся благоговЂти ко благоговЂнному и от оного повеления ожидати. Аще и братская любов православных християн с предЂлов естественных мя вытягает, яко и анафема, молюся за них быти, по Павлу, аще бы в чесом на православии пострадати мЂли, желая с ними всЂгды ся знаходити, и если бо аще и не плотию, но вЂрою, любовию и духом всегда есм с ними. Обаче и телесным совокуплением желаю усердно, но не у воля божия быти сему приспЂ, будет же и скоро, даст бог, точию да очистят и изметут церков Христову по реченному им от мене. Але то чуднЂйшая, иж ся вы послуханям правды не хвалите, але крывдою и звитязством правду хелпите; хвалитеся затворами темничными, битьем и забитям хвалитеся, обелженям мирским, яко июдеи, мнимаючи обелжити Христа, але Христос Христом и богом ся зовет пред ся, и ест, и июдеи погибелными сынами ся зовут, сут и будут. Так же и вы, слЂда их держачися, рабом божим творите. Добре, творЂте и жидом послЂдуйте, и мы нехай Христа подражаемо и от вашего мучителства стра.ждемо. Таковый бо вам и ключ ко отверзению царства небесного Христос оставил, яко да от погибелных сынов в вЂцЂ сем страждемо, мовячи: «Аще мене изгнаша и вас изженут, аще мене обесчестиша и вас обесчестят, аще мене убиша и вас убиют, яко нЂст ученик над учителя, ниже раб над владыку, довлЂет бо вам тое ж страдати, што и я страдал», — рече. ПрисмотрЂте ж ся, не тое ж ли апостоли, мученици и вси благочесно живущии страдали сут, страждут и страдати хочут, а волхвы, чародЂе и мудреци свЂта сего превознесени сут, по Павлу, успЂвающе на горшее.

Не страште ж теды и мене, панове бискупи, антихристом и его мукою, бо ся его з ласки божои не бою и, ради вашего антихристова страха, святое троици, отца и сына и святого духа, отступити не хочу и, даст бог, тою же силою укрЂпляем совышше, не отступлю. Албо мнимаете и Никифоров язык, которого затзорили есте и не слышите его, вашу неправду обличающий, яко нынЂ молчит и безгласен ест? Так вЂдайте, иж болшей тепер на вас крычит и обличает, нижли перво, коли в затворЂ не был. Затворили есте его в Малборку, да не видит Кракова, Лвова и Варшавы и прочиих мЂст, але от презацнЂйшого града, горняго Иерусалима, затворити есте его не могли. Тамо ему ходити и палацы небесные оглядовати чистою молитвою всЂгды волно. Затворили есте его от лица королевского, воеводского и вас всЂх, роскошников свЂта сего, яко да вас не видит, але от лица отца и сына и святого духа и тмы тмам предстоящим позору ангелского затворити есте его не могли, тамо ему смотрити свЂтлост славы неприступного божества и премирных сил небесных всЂгды волно. Не затворен ли был и Иоанн в ПатмЂ-остро†57, але в том затворЂ сына в нЂдрЂх отчиих узрЂл и оттоль болшей благословити и обличати лож начал? Тако же и вы мнимали есте затвором утолити язык Никифоров, а того не вЂдаете, иж тым вязеням ваших панов, бЂсов воздушных поднебесных, болшей мучит, сЂчет, уморяет и вас, им служащих, так явно и голосно обличает, иж аж тот крык, аерные воздухи прелетЂвши, всЂ небесные круги приникнувши, у престола святои троицы ся опирает и ваше мучителство и неправду до конца обнажает, — голу, безобразну, безвстыдну, як едину машкару и курву вшетечную, всему свЂту, на земли и на небеси ясну чкнит, обличает вас пред отцем и сыном и духом святым и всЂми небесными силами, яко за благочестие, вЂру, закон, правду и суд на вас, богопротивных, учиненый, и предЂла учтивости своей згвалтивших, в темницу затвора утвержен ест. Обличает вас на земли, я.ко вы правдЂ сопротивници, гонители и мучители есте ся стали; лжи же антихристовы поборници, вЂрные слуги и таинники, секретар и заступники быти ся показали; оного правды слышати не претерпЂвши, у вязене поганством тиранским есте угнали. А коли ся християны зовете, чом же не терпите и на собЂ всякия досады, которые бы ся случили, с благодареннем не преносите, але сопротивно отмщаете, взаем стосогубнЂ и злым восплачуете, мучите, томите и убиваете, а пред ся християны именоватися смЂете? Не явная ли то лож, прелест и хула на християнское имя! Видите ли, як християны нЂсте. Не холпите ж ся тым, латинници, антихристово племя и наслЂдие, як вы православных мучити, катовати, бЂду творити и безчестити силу, власт и началство, от антихриста вам дарованное, имате, кгдыж вы тым тиранством побЂдити терпения нашего не можете, вЂры нашои православнои от нас выстрашити и нас в свое поганство уволочи всуе и прожне мыслите, — мы бовЂм не прелюбодЂйчищами есмо антихристова ложа, але власные сынове божии, крещенные в имя отца и сына и святого духа правдивым крещением. Запевно вЂдайте!

Нехай вас тсе гордое дмуханг, и пышное фукане, и широкословное блекотаня, грозное розказанье, и толстое отрыгане того вашого выкрыканя (яко мы прелюбодЂйчищами быти бы мЂли от своей вЂры) не упевняет! Нехай вам надЂи и оттухи (яко не дочекате того николи по Руси) не чинит! Хиба кто, по Павлу, смертную мудрость вЂка сего возлюбивши и вшетеченством паче честного ложабока житие вЂка сегс приходит изволивши, к вам отбЂжит и согласитися схочет. О таковом не мовимо. Волно ест и самовластие человЂку, кой хощет спастися или погибнути, умрети или живь быти, сыном божиим или сыном дияволским быти — сие на произволении человЂком лежит. А от православных убо и в жизнь вЂчную нареченных, восточнои церкви послушных сынов — не надЂйтеся, папы римские, кардиналы, арцибискупи, бискупи и всякое лживое священство латинского почту! Не надЂйтеся, власт мирская, королЂ, и всякое преложенство, и всяк послушник папы римского, як з вами ни в чом ся соглашати православные не хощут и папЂ поклонитися не изволят. Не надЂйте ж ся нынЂ, не надЂйтеся завтра, не надЂйтеся по завтрию, в приидущее время и в вЂки вЂков. Аминь.




ГЛАВА 8

Загадка философам латинским, лядским 59, также и вслЂд

тых погнавшимся, от лакомства прелестного, младенцам

бЂлобрадым руским 60


СкажЂте ми, о премудрии, от ваших хитростей и художеств граматычных, диалектичных, риторичных и философских 61, яким способом Христос простаком, ему послЂдующим, отверзе ум разумЂти писание? Ато так было; Лука мовить 62: «По воскресении, ядши с ними, рече им: «Сии суть словеса, яже глаголах вам, еще сый с вами, яко подобает скончатися всЂм написаным в законЂ Моисео†и пророцЂх и псалмЂх о мнЂ». Тогда отверзе им ум розумЂти писания и рече им: «Яко тако писано ест» и прочая. ПочерпЂте же от своеи премудрости филоеофскои и открыйте ми тые врата, которие до розума духовного отверзаются, и каковы тые врата и в котором мЂсту главном замкнены суть, достаточне скажЂте, и како ся отворяют, ключ ми ознаймЂте! Если тое малое скажете ми извЂстно, буду розумЂти, яко ползует вас тая брЂдня, за чим ся гоните. А если не згаднете тои простои и безхитрои загадки, и не от вымыслу практичного, но от истины, яко сама в собЂ ест глаголемое, тогда, оставивши философи латинские, к тебЂ, брате мой русине, з словом ся оборочаю и раду здоровую и пожиточную (за спасение душевное) даю. Останте бЂгати вслЂд латины и учения их, бо, утомившися трудом прелести, невЂрием, яко же и они, запевне поздыхаете! Але лЂпше дома в благочестии, если и немного знаючи, седЂти, да с отцом и сыном и святым духом нераздЂлни и нынЂ и тамо будете. Аминь.







Іван ВИШЕНСЬКИЙ


Іван Вишенський — найвизначніший український письменник-полеміст кінця XVI — початку XVII ст. Біографічних відомостей про нього мало. Народився між 1533 — 1550 рр. у містечку Судова Вишня на Львівщині, де здобув початкову освіту. Жив у Луцьку та Острозі. В 70 — 80-х роках XVI ст. переселився на Афон (Греція), що став тоді найбільшим духовним центром православ'я. У монастирях Афона Вишенський був послушником, ченцем, а під кінець життя аскетом-пустельником в одній із келій над Егейським морем. Загалом на Афоні він прожив близько 40 років аж до своєї смерті у 20-х роках XVI ст. У 1604 — 1606 рр. Іван Вишенський перебував на Україні, був гостем львівського братства та свого приятеля Іова Княгиницького.

До нас дійшло 16 творів Івана Вишенського в різних рукописних списках. Ще у 1599 — 1600 рр. Іван Вишенський частину своїх творів переписав у спеціальну «Книжку», яку він готував до друку в Острозькій друкарні. «Книжка» складалася з передмов і десятьох послань; сюди, зокрема, ввійшли: «Оглавление писанного в книжце...», «О чину прочитання сего писання», «Ко прочитателю наединЂ сего писаня» і десять «глав», що є, власне, окремими творами — «Обличение диявола-миродержца...» (1599 — 1600), «Послання князю Василю Острозькому...» (1599 — 1600), «Порада» (1599 — 1600), «Писание до всЂх обще, в Лядской земли живущих» (1588), «Писание к утекшим от православкой вЂрн єпископам» (1598), «ИзвЂщение краткое о латинских прелестях...» (1588 — 1589), «О єретиках» (1599 — 1600), «Загадка философам латинским...» (1599 — 1600), «СлЂд к постижению и изучению художества...» («СлЂд краткий») (1599 — 1600) і «Новина, или ВЂсть...», яку не вважають оригінальним твором Вишенського. Після 1600 р. полеміст написав ще кілька творів: «Краткословный отвЂт Феодула... Петру Скарге» (1601), «Послания Домнікії» (1605), «Зачапка мудрого латынника з глупым русином» (1608 — 1609), «Послання львівському братству» (1610), «Послання Іову Княгиницькому» (1610), «Позорище мысленное» (1615 — 1616).

Спадщину полеміста прийнято поділяти на твори, написані до Брестської унії 1596 р., та твори, написані після неї, хоч усі вони мають багато спільного. Через те, що свої твори Іван Вишенський писав за межами батьківщини, вони мають здебільшого форму «послань» чи «писань», адресованих або всьому народу, або певним особам, що видно із самих назв. Письменник неодноразово звертався до земляків і просив, щоб його «послання» читали «совокупно», тобто громадою, переписували, а оригінали повертали назад. Про те, що твори полеміста розповсюджувалися в рукописах, свідчить кілька списків, які дійшли до нас, зокрема найбільш повний так званий Підгорецький рукопис XVII ст. Поширювалися в рукописах твори Івана Вишенського і в Росії. Один із списків, що зберігається в Саратовському університеті, датується 1862 р.

Хоч Іван Вишенський і готував свої твори до друку, однак за його життя було опубліковано анонімно 1598 р. в острозькій «Книжиці» тільки послання «От святой Афонскои горн скитствующих», що, як гадають дослідники, є першим варіантом «Писания к утекшим от православной вЂри єпископам». А потім ім'я Івана Вишенського майже на 250 років забулося, і тільки 1865 р. М. Костомаров у «Актах, относящихся к истории Южной и Западной России» опублікував чотири твори письменника. Це дало поштовх С. Голубєву, І. Франкові, Г. Житецькому до дальших розшуків і публікацій його послань.

Книжка. — Це назва збірки творів Івана Вишенського, яку він сам уклав і підготував до друку за типом острозької «Книжиці» 1598 р., що являла собою збірник послань александрійського патріарха Мелетія, «соборного послання» князя К. К. Острозького та послання до єпископів Івана Вишенського, вміщене тут анонімно. Однак «Книжка» Вишенського з невідомих причин не була видана. Вперше її опублікував разом з іншими шістьма творами І. П. Єрьомін у згадуваному академічному виданні, до якого було додано археографічний огляд творів полеміста, різночитання їх, словник та поему І. Я. Франка «Іван Вишенський».

Реконструюючи тексти творів письменника на основі найдавнішого і найвірогіднішого Підгорецького рукопису XVII ст., І. П. Єрьомін враховував різночитання в інших рукописах, а також в пізніших публікаціях, в яких допущено чимало помилок. При науково-критичному виданні творів Івана Вишенського дослідник дотримувався, за його твердженням, таких правил: «Тексти друкуються із збереженням всіх особливостей орфографії рукописного оригіналу; титли розкриваються, всі виносні букви вводяться в рядок; буква ъ у кінці слів не подається; не подається вона і в середині — в словах типу миръский, фаръбами, иновЂръца, философъского, книжъного і т. п.; юс малий і а йотоване замінюється буквою я; і та ї замінюються буквою и; юс великий, оу та 8 — буквою у; омега замінюється буквою о; фіта — буквою ф; псі — буквами пс; іжиця — буквами в або і, в залежності від слова; буква Ђ всюди збережена, тому що вона відповідно української вимови могла вимовлятися як і. Пунктуація прийнята сучасна. Всі тексти друкуються у виправленому вигляді; виправлення вносяться у текст з відповідним застереженням у різночитаннях» (* Вишенский Йван. Сочинения. Подготовка текста, статья и комментаряи И. П. Еремина. М. — Л., 1955, с. 279.).

Згодом всі названі тексти полеміста були передруковані у виданні Вишенський Іван. Твори (К., 1959), за яким тут і подаються окремі тексти та уривки з них. Враховуючи те, що в одних і тих же творах трапляється різнобій у написанні окремих слів, у нашому виданні вони уніфіковані (наприклад: диавол подано всюди диявол, христианский — християнский, рымский — римский, амин — аминь, святаго — святого, будущаго — будущого, геенна — геєна тощо). Подвоєння чи неподвоєння суфікса «нн» у словах типу: очищення, очищенья, очищеня; пом'якшення через «ь» у словах типу: альбо — албо, южь — юж, есьте — есте, вельможа — велможа, галько — тилко, як і деякі інші фонеми та орфограми, максимально збережено за оригіналом.

За виданням «Вишенский Иван. Сочинения» була зроблена перша спроба перекладу творів полеміста сучасною українською мовою (Вишенський Іван. Твори. К., 1986), здійснена В. О. Шевчуком.

Між назвами творів в «Оглавлении писанного в книжце...» і самими творами Івана Вишенського є деяка розбіжність. Крім того, «Обличение диявола-миродержца» подається як «Глава 1», «Порада» — «Глава 3», «Писание до всЂх обще, в Лядской земли живущих» — «Глава 4», «Писание к утекшим от православнои вЂры єпископам» — «Глава 5», «Загадка философам латинским» — «Глава 8».

1 Братства — релігійно-національні організації українських і білоруських міщан. У XV! — XVII ст. існували в Києві, Львові, Луцьку, Острозі, вели боротьбу проти національно-релігійного гніту з боку польської шляхти та уніатської церкви, виступали за обмеження деспотичної влади церковних магнатів. При братствах відкривалися так звані братські школи, які відіграли велику роль у розвитку всієї української культури; з братських шкіл вийшли майже всі відомі українські та білоруські письменники XVI — XVII ст.

2 Причастив святого духа — обряд у християнстві, який називають ще євхаристією. Відбувається під час літургії (обідні), кили церковники дають віруючим «вкусити самого тіла і крові Христової» у вигляді


хліба та вина, завдяки чому віруючі ніби єднаються з богом, «очищаються від гріхів».

3 Павло і Петро — апостоли, що їх вважають проповідниками християнства й авторами Нового завіту Біблії — Євангелій. Вони досить часто згадуються у творах Івана Вишенського, на послання яких посилається полеміст як на авторитетні для християн вчення.

4 Писание до князя Василия. — Йдеться про Острозького князя Василя-Костянтина (1526 — 1608), київського воєводу і власника величезних маєтностей на Київщині, Волині та Поділлі.

5 Лядской земли. — Тут мається на увазі Польська держава.

6 Єресь — релігійна течія, ворожа панівній церкві. В епоху середньовіччя єресі були релігійною формою протесту проти деспотизму і зловживання духовною владою; єретик — прихильник тої чи іншої єресі. Іван Вишенський мав на увазі відступників від православ'я і взагалі від християнської віри.

7 Новина, или ВЂсть, о обрЂтении тЂла Варлаама... — Йдеться про охрідського архієпископа Варлаама в Македонії, якому турки відрубали голову 28 травня 1598 р. у місті Велесі (Югославія), а тіло викинули до річки Вардар, що впадає в Егейське море.

8 ...мой даскал простак... — Йдеться про Ісуса Христа.

9 ...наказания латинског о... — Мається на увазі давньогрецька філософія.

10 Диявола-миродержца. — Диявол (грецьк.) — наклепник, спокусник; за релігійними уявленнями — головний із «злих духів», втілення злого начала на землі, володар пекла. Вишенський та інші полемісти дияволом часто називали папу римського.

11 Евангелие от Матфея... — Євангеліє — друга частина Біблії, основними авторами Євангелія вважають чотирьох проповідників християнства: Матфія, Марка, Луку та Іоанна.

12 ...горного Иерусалима... — тобто рай.

13 Часословец (часослов) — богослужебна книга релігійних пісень та молитов.

14 Псалтир — книга церковних пісень (псалмів), що є частиною Біблії. Як і Часослов, був довгий час книгою для навчання грамоти.

15 Охтаїк (Октоїх або Восьмигласник) — богослужебна книга церковних пісень на весь тиждень, що поділялися за способом співання на вісім голосів.

16 Апостол — богослужебна книга, що містить діяння і послання апостолів, учнів та послідовників Христа.

17 ...с хорты, окгары, выжлы и другими кундусы... — Мова йде про породи мисливських собак.

18 ...на тых гордых бадавЂях, валахах, дрыкгантах, ступаках, единоходниках, колысках, лектыках, брожках, каретах, котчиих... — Ідеться про породи коней та різновиди колясок і візків.

19 ...макгероносцем, шликом, ковпаком, кучмам... — назви різноманітних головних уборів.

20 ...Слуцких дом... — Маються на увазі можновладні князі Слуцькі, які перейшли на бік польського короля і покатоличились.

21 ...Стефану, кролю полскому... — Йдеться про Стефана Баторія (1533 — 1586), князя семиградського, а потім короля польського, який підтримував єзуїтів.

Острозький Костянтин — син згадуваного князя К. В. Острозького, зрадив батьківську православну віру і став католиком. Помер бездітним, що, на думку Вишенського, було карою божою за ренегатство.

23 ...в странЂ Авситидстей... — місто в Передній Азії; біблійний персонаж Іов жив у землі Хус на заході Палестини, а Товій-ізраїльтянин — у місті Ніневії, що на р. Тігр.

24 Велиар — синонім диявола, сатани.

25 ...июда, раб и лестец, друг и предател... — Юда Іскаріот (Юда з Каріота) — за біблійною легендою, один із 12 апостолів Христа, який запродав його за 30 срібників, а потім повісився. Цей образ став символом зрадництва.

26 ...рече Павел коринфянам... — Мова йде про широковідоме в богословській літературі послання апостола Павла жителям м. Корінфа у Греції.

27 ...євангелиста... — Євангелістами звали протестантів-лютеран і кальвіністів.

28 ...суботник. — Суботники — одна із сект, близька до іудаїзму або так званих жидовствуючих.

29 ...на Кифу, Павла и Аполлоса... — Тут гра слів: кифа — камінь, скеля; петра — скеля; Аполлос — іудей з Александрії, один із перших проповідників християнства.

30 ...в Антиохии апостоли поданное, «християнин». — Вважають, що перші послідовники Христа — християни — збиралися в м. Антіохії.

31 ...торгу з Афраимами жидовскими... — Йдеться про м. Афраїм (Єфраїм), неподалік Єрусалима, де нібито фарисеї і первосвященики вистежували Христа.

32 ...як в ЖидичинЂ и в горах святого Спаса... — Йдеться про ярмарки під час свят біля Жидичинського монастиря поблизу Луцька та монастиря в гірському селі Спас на Самбірщині, де у XVII ст. був осередок перемишлянських православних єпископів.

33 ВолочЂлное по воскресений... — віншування після великодньої неділі, коли дарували за поздоровлення калач і крашанки — «волочильне».

34 На Гергия-мученика празник... — День святого Георгія (Юрія) припадав на 23 квітня ст. ст.

35 Пироги и яйца надгробные... — Йдеться про «проводи» на другий понеділок після великодня, коли на могили клали пироги, паски, яйця та інші їстівні продукти.

36 Купала на Крестителя... — Купала чи Купайло — персонаж дохристиянської міфології слов'ян. Свято Купала відзначалося в ніч з 24 на 25 червня ст. ст. Молодь купалася в річках чи ставках, стрибала через вогнища, дівчата плели вінки й пускали їх за водою, водили танки, співали купальських пісень, прославляючи весну, молодість, кохання. Пізніше свято Купала співпало з церковним святом Іоанна Хрестителя.

37 ...всемирного потопу... — Мається на увазі біблійна легенда про всесвітній потоп, коли був знищений увесь рід людський і все живе на землі, за винятком Ноя, його синів Сіма, Хама, Іафета та їхніх жінок і «всякої тварі по парі», що врятувалися, за велінням бога, в ковчезі.

38 ...Елзавелины... жрецы... — жерці Вельзевула (Веалзевула), тобто сірійсько-фінікійського божества. Згодом слово «Вельзевул» стало синонімом слова «Сатана», що його залюбки вживали у своїй творчості українські мандровані дяки XVIII ст. та письменники XIX ст.

39 Ісаія — біблійний персонаж; йому приписувалося авторство кількох книг Біблії.

40 ...господь Саваоф... — За Біблією, одне з численних імен бога (Саваоф, Єгова, Ягве, Яхве та ін.).

41 ...посла хом отца нашего Саву, проигумена от святих Павел... — Напевно, йдеться про ченця Саву, що ходив з Афону на Україну та приніс до Львова згадуване «писание» Івана Вишенського.

42 ...арцибискупу Михайлу... — Михайло Рогоза (? — 1599) — один із головних ініціаторів Брестської церковної унії, київський православний митрополит (з 1589 р.), а після зради уніатський митрополит (з 1596 р.); ...бискупам ПотЂю... — Іпатій Потій (1541 — 1613) — єпископ володимирський (до 1599 р.), згодом уніатський митрополит (1600 — 1613); ...Кирилу... — Кирило Терлецький (? — 1607) — спочатку пінський і турівський (з 1572 р.), а потім луцький і острозький (з 1585 р.) єпископ; ...Леонтию... — Леонтій Пельчицький (?) — єпископ пінський і турівський (з 1585 р.); ...Деонисию... — Дионисій Збируйський (?) — єпископ холмський (з 1585 р.); ...Григорку... — Григорій Заборовський — єпископ полоцький і вітебський.

43 ...«Оборона згоды з латинским костелом и вЂрою, Риму служачею»... — неточна назва книги Іпатія Потія, написаної в оборону Брестської унії 1596 р.

44 Дионисий Ареопагит — афінський церковний діяч (І ст. н. е.), автор книги «Про церковну ієрархію».

45 Пощупайся тилко в лисую головку, ксенже бискупелуцкий... — Луцький єпископ Кирило Терлецький справді був лисий, що, за народними прикметами, означало дуже хитру людину.

Никифор — повноважний представник константинопольського патріарха на Брестському соборі 1596 р. Коли регенати проголосили унію, він разом з іншими прихильниками православ'я прокляв їх і відлучив від церкви. Єзуїти звинуватили його в шпигунстві й за наказом короля кинули до Марієнбурзької фортеці, де Никифор був замучений.

47 ...саксоном и майдебурским правом свое черево кормил... — Натяк на те, що Діонісій Збируйський до висвячення на єпископа був юристом (саксон — скорочена назва зведених записів феодального права в Саксонії; магдебурзьке право — середньовічне міське право, що виникло з XIII ст. у німецькому місті Магдебурзі й поширювалося до XVIII ст. у Польщі, Білорусії, на Україні та в інших країнах і окремих містах).

48 ...Григорко, коли дворянином Рогозиным был... — Григорій Заборовський до висвячення на єпископа був протонотарієм (секретарем) митрополита М. Рогози.

49 Што ся трафило и тому баламутови Исидору мудрому... — Йдеться про московського митрополита грека Ісидора (з 1436 р.), який підписав акт про об'єднання православної і католицької церков на Флорентійському соборі 1439 — 1440 рр.

50 ...Яко дурный, неславный и непожиточный был приезд Иеремия патриархи... — Мається на увазі приїзд на Україну та в Росію глави православної церкви константинопольського патріарха Ієремії в 1588 — 1589 рр. Ієремія дозволив українським братствам і мирянам контролювати церковників, що викликало незадоволення з боку вищого духовенства, яке воліло приховувати свої негожі діла від очей світських людей. Можливо, Ієремія хотів цим запобігти масовому зрадництву західноукраїнського духовенства, яке переходило задля власної вигоди до греко-католицької, уніатської віри. Іван Вишенський, з одного боку, критикував розпорядження Ієремії, а з другого — сам підтримував ідею контролю над церквою і висував тезу, що й миряни можуть займати духовні посади, якщо вони вірні православ'ю.

51 ...отца Исаака и матери Ревеки — Иаков и Исав... — Ісаак, Ревекка, Яків та Ісав — біблійні образи. Старший брат Ісав продав молодшому Якову своє первородство за хліб і сочевичну юшку; певно, звідси і пішла приповідка про сочевичну юшку.

52 Анна и Каияф — іудейські первосвященики. Зять Анни Каіаф (вважають, що це прізвисько первосвященика Йосифа) під час суду над Христом порадив його покарати смертю, а потім переслідував його послідовників.

63 ...бЬтцким албо муравским кгермачком ся покривают... — тобто носять одяг з дешевого грубого сукна.

54 ...на трибуналЂ у ЛюблинЂ... — Люблін — місто в Польщі, де 1569 р. була проголошена Люблінська унія про об'єднання Литви і Польщі в одну державу — Річ Посполиту.

55 ...посилаєте православних до скаржиньїх книг... — тобто до трактатів польського єзуїта Петра Скарги.

3(1 ...правилца руские... — канонічні церковні правила, запроваджені 1509 р.

57 ...язык, яко и Никифору, затворили... — Йдеться про вже згадуваного екзарха Никифора, якого замучили єзуїти в Марієнбурзькій фортеці-тюрмі.

58 ...Иоанн в ПатмЂ-островЂ... — Один із учнів Христа Іоанн Богослов — автор послань, Євангелія та Апокаліпсису — був висланий з Рима на о. Патмас.

69 Загадка философам латинским, лядским... — Маються на увазі латинські й польські церковні автори, що виступали проти православ'я.

60 ...младенцам бЂлобрадым руским — іронічний натяк на українську православну шляхту.

61 ...от ваших хитростей и художеств граматичних, диалектичных, риторичных и философских... — Ідеться про схоластичні науки в католицьких латинських богословських школах, що поступово впроваджувалися (сім «вільних наук») і в братських школах на Україні для дійовішої боротьби з вишколеними єзуїтами.

62 ...Лука мовить... — Лука — один із авторів Євангелія.








Головна


Етимологія та історія української мови:

Датчанин:   В основі української назви датчани лежить долучення староукраїнської книжності до європейського контексту, до грецькомовної і латинськомовної науки. Саме із західних джерел прийшла -т- основи. І коли наші сучасники вживають назв датський, датчанин, то, навіть не здогадуючись, ступають по слідах, прокладених півтисячоліття тому предками, які перебували у великій європейській культурній спільноті. . . . )



 


Якщо помітили помилку набору на цiй сторiнцi, видiлiть ціле слово мишкою та натисніть Ctrl+Enter.

Iзборник. Історія України IX-XVIII ст.