Попередня     Головна     Наступна





ЛІТОПИС РАЧИНСЬКОГО


Опис рукопису



ЛЂтописец Великого князства Литовъского и Жомоитъского


Сталося ест воплощене сына божого от духа святого з благословенное девицы чыстое МарЂи от почаку А сотвореня свЂта лЂта Б пяттисечного пятьсотного двадцать Б шостого. Одного часу панство Рымское было под цэсаром Августом, которыи же не толко одному Рыму, ино и всему свЂту пановал. Яко же вышэи писано, иж часу цэсарства Августова сын божыи воплотился, а В часу ТивирЂя цэсара, второго по Августе, на кресте волную муку прынял для збавеня и откупенья роду чоловЂческого. За которого ж ТивирЂя вси рЂчы и пророчэства пополнившы, по встани з мертвых вступил на небо и сЂл на правицы в бога отца, отколе ж дня судного маеть прыити судити жывых и мертвых и отдати кождому водле заслуги его. По смерти ТивирЂя цэсара был цэсарэм Гаиос, а по Гаиосе Г КлавдЂи, а по КлавдЂи царствовал сын его Нерон, которыи же Нерон был пан окрутныи a невъставичныи, иж властную матку свою и доктора своего навышшого Сэноку бэз кождое прычыны ку смерти прыправил, и колко раз казал мЂсто Рымское запаливать, a ни для чого иншого, толко для того, иж бы ся тому дивовал a потеху мЂл. А Д княжатом и паном рымским, шляхте и всему посполству крывды и втиски великие чынил, для чого ж всякии подданыи его, для великого окрутенства и невставичности его, не был нихто пэвэн a ни бэзпечон не толко имЂнеи албо скарбов, але и здоровя своего. A так многие, опускаючы имЂнья и скарбы свое, втекалися до розмаитых земль, наслядуючы справедливого упокою.

Где ж одно княжа рымское именем Палемон, которыи же цару Е \л.266.\ Нерону был кревныи, забрался з жоною и з дЂтми своими, и c поддаными, и скарбы своими, c которым жо княжатем пятсот шляхты, также з жонами и з дЂтми и з многими силами. И взявшы з собою одного остронома, которыи ся знал по звЂздах, и пошли y кораблех морем по заходу солнъца, хотечи собЂ знаити на земли мЂстцэ слушное, гдЂ бы ся мели поселити a мешкати c покоем. A c тыми шляхты чотыры рожаи, навышшые имены, именем c Китаврус Довспрунъкг Ж, a c Колюмнов Прешпор, a з Руси Ульянус, a з Рож Екътор. A так оные люди не малыи час по мору ходили и прышли Межиземского мора, и пошли до реки до Шума и тою рекою Шумою в море окиян, и морем окияном дошли до реки устья, где Немон упадываеть y море окиян. И потом пошли рекою Немном уверх, оли ж y море Малое, которое называется море Немновое, a для тое прычыны тое море Немъновое называется, иж в тое море Немон упадываеть дванадцатма устьи, a кождое зоветься особным именем, межы которыми ж устьи одно зовется Кгилья. И пошли тым устьем уверх, и дошли цэлого Немна, гдЂ вже он сам увесь у-в одном мЂстцу течеть, и верх Немна дошли до реки Дубисы. Яко ж вшедъшы в тую реку Дубису, и нашли над нею горы высокие и ровнины великие, и дубровы роскошные и розмаитых объфитостеи наполнено y звЂрех розного рожаю, то ест напервеи туров, зубрев, лосеи, оленеи, сарн, рысеи, куниц, лисиц, бЂлок, горностаев и иных розмаитых рожаев. И тэж y реках великую офитость рыб непосполитых, иж не толко тые рыбы, которые ся в тых реках плодять, але множество рыб розмаитых a дивных прыходять з мора за тою прычыною, иж недалеко устье Немновое, гдЂ Немон y море впадываеть. Над которыми ж реками, над Дубосою и над Немном, и над Юрою, там ся поселили и почали розмножыватися, и оное мешкане их над тыми реками вельми ся им подобало, и назвали тую землю Жомоить. \л.227.\



А Так в рукописи ББ Против этих слов на поле 5526 В На поле: Tywiryi cesarz wtory po Awguscie Г Нa поле: Smierc Tywersia cesarza, był cesarzem Haios Д Переделано из другой буквы Е Ha поле: Палемон . Ж c переделано из другой буквы





О княжати Палемоне и o трех сынов его


Князь Палемон вродил трех сынов: старшыи Борк, a другии Кунас, a третии Спэра. Старшыи же сын, Борк, вчынил город на рецэ Юре, и зложоно имя того княжати поспол з рекою; имя рецэ Юра, a княжати Борк, и назвал тот замок Юръборк. A середнии сын, Кунас, прышол на устье \146\ реки Невяжы, гдЂ она впадываеть y Немон, и тут учынил город и назвал его именем своим, Куносов город. A третии сын, Спэра, потпол далеи y пущу ко всходу слонца и, перешедъшы реку Невяжу и реку Святую, и третюю реку, Шырвинту, знашол озеро, луками и розмаитым деревом украшено, где ж злюбившы и над тым озером поселилъся, и тое озеро именем своим назвал, Спэра. И пановал многие лЂта, и был вельми ласкав подданым своим, и потом умер бэс плоду. И подданые его, милуючы его, и подле рымского обычаю вчынили собЂ балъвана и назвали его Спэра на паметь его З. И потом оные люди, мешкаючы около него, и почали ему оферы чынити и за бога его мЂти, и потом, коли тот балван сказилъся, и они тое озеро и мЂстцо хвалили и мЂли за бога И. И по нем межы собою господара не мели и мешкали без пана.

По малых же часех умреть брат его, которыи мешкал на Юрборъку, не маючы детеи, и брат его Кунос озметь и тую часть брата своего Борка и город Юръборк, и в тои части его будеть пановати. И оное княже Кунос мЂл двух сынов, одного Кернуса, a другого Кгинбунта. И пануючы ему в земли Жомоитскои, почал ся множыти и розшырати и выходити на реку Велю, в землю Завельскую. И перешодъшы реку Святую вышеи и нашол мЂсто вельми хороше, и сподобалося ему тое мЂстцо вельми. Тогды он там поселил сына своего Кернуса, и назвалося тое местцо по Кернусе Керново К, a потом Кунус умре. И по нем почнеть сын его Кернус пановати на всеи земли Завельскои по границу Латыгольскую и по Завельскии Брасълавль, оли ж по реку Двину. A брат его Кгинбунт на Юрборъку и на Ку\л.228.\нусове, и на всеи земли Жомоитскои. A в тот час, гдЂ Кернус пановал на Завельскои стороне, люди его тые, што за Велею осЂли, игривали Л на трубах дубасных, и прозвал тот Керънус берег своим языком властным, по-латыни: Литус, где ся люди его множать, a трубы, што на них играють, — туба. И дал имя тым людем своим языком по-латине, зложывшы берег c трубою: Литусба. И простые люди не вмели звати по латине и почали звати Литвою, и от того часу почали звати панство Литовское и множытися от Жомоити. И князь великии Кернус пановал на Литве, a князь Кгинбунт на Жомоити, и не малыи час пановали и жыли межы собою во-в покои. И князь Кернус не мЂл сынов, толко одну дочку, именем Пояту. И будучы он y старости своеи и не хотечы панства своего от дочки своее отдалити, и прынял до неи, и М зятем своим его вчынил собЂ c Китавруса именем своим Кируса, сына Довпрункгова з Дявильтова, и сам умер. А по нем начне княжыти на земли Литовскои тот зять его c Китаврус Кгирус. A Кгинъбунт, пануючы на Жомоити и умер, a сына своего Монтвила зоставить на князьстве Жомоитском. И Монтвил много лЂт княжыл на Жомоити и мЂл двух Н сынов, одного Немоноса, a другого Скиръмонта. A в иншых тых жэ называ: Викента и Ердвила.

И часу панованья Монтвилова повстал цар Батыи и пошол на Рускую землю, и всю Рускую землю О звоевал, и князеи руских постинал, a иншых y полон повел, и столец всее Руское земли город Киев зъжог ипуст учынил. A князь великии киевскии Дмитр, боечыся великое силы и моцы его, збЂг c Киева до города Чернигова, и потом довЂдалъся, што город Киев сожжон и вся земля Руская спустошона. И слышал, иж мужыки мешъкають без господара a зовутся дручане. И он, собравшыся з людми своими, и пошол ко Друцку, и землю Друцкую посЂл, и город Друческ зарубил, и назвалъся великим князем друцким. И в тот час доведался великии князь Монтвил жомоитскии, иж Руская земля спустошона и князи руские розогнаны, и он, давшы воиско сыну своему Еръдивилу, и послал з ним панов П своих радъных, напервеи c Колюмнов Трумъпя, \л.229.\ a другого з Уръсинов именем Эикъшыса, a третего з Рож именем Кгровжыса. И зашли за реку Велю, и потом перешли реку Немон и нашли в чотырох милях от реки Немна гору красну, и сподобалося им, и вчынили на неи город и назвали его Новгородок Р. И вчынил собЂ князь великии в нем столец, и назвался великим князем новгородским. И пошедшы з Новагородка и зарубил город Городно, и потом пошол до Берестья и нашол БерестЂи и Дорогичын, и Мельник от Батыя спустошоны и покажены, и он тые городы зарубил С и почал на их княжыти. A потом умер князь великии Монтвил жомоитскии.



З На поле: Балван И На поле: Bałwany chwalili К Ha поле: Керново Л На поле: Grały dubasny. Litus М Переделано из другой буквы Н На поле приписка тем же почерком, каким писан текст: помылка в лЂтописцЂ О На поле: Воеване от Батыя року по нароженю пана Христуса. Ниже: Город Одрудк П Буквы. па переделаны Р Ha поле: Новгородок заложено С На поле: Городно, Берестеи, Дорогичын



По нем сЂл на великом княженьи Жомоитском Викент. A другии вышереченыи сын его, Ердивил, почнеть мешкати и пановати на Новегородцы и на тых вышеиреченых городех. И подавал паном своим, которые з ним вышли, островы и пущы: Грумпю дал остров коло реки Ошмены, \147\ которое тепер зоветься Ошмена, и все прылежачое к Ошмене, што тепер князи и панове в повете Ошменском держать. А Эикъшнэви дал остров, которыи по нем назван Т ест Эишышки, и все прылежачое к повЂту Эишышскому. A Кгровжу дал остров, которыи его именем назван ест, Кгровжышки, и увесь повЂт Кгровъжыскии. И c Трумпя народился Кгаштолт, a з Эикъша народился Довоина, a з Кгровжа народился Монъвид, a потом умер Т.

Пануючы великому князю Викенту в Жомоитскои земли, a Ердивилу y Новегородцэ и в ыншых городех. Потом умер князь великии Викен УФ. И по нем начнеть княжыти Жывинбут c Китаврусу, князь литовскии, обема тыми княжаньи, Литвою и Жомоитью, a Ердивил на Новегородцэ и на всих тых городех руских. И много лЂт княжывшы Ердивил на тых городех и умер, и по нем почал сын его княжыти Мингаило.

По смерти пак отца своего князь великии Мингаило, собравшы \л.230.\ воиско свое, и поидеть на город Полтэск, ино мужы полочане, которые вЂчем справовалися, як Великии Новгород и Псков. И напервеи прышли к городу их, реченому Городъцу, и мужы полочане, собравшыся c полъки своими, и стрЂтили их под Городцом. И великии бои и сЂчу межы собою мЂли, и поможеть бог великому князю Минкгаилу Х, и побил мужеи полочан наголову, и город их зъжог на имя Городец, и город Полтэск возметь, и зостал великим князем полоцким. И будучы ему великим князем новгородским и полоцким, пановал много лЂт и вмер. И оставил по собЂ двух сынов своих, одного Скирмонта, a другого Кгинвила, и Скирмонт почнеть княжыти на Новегородъцы, a Кгинвил на Полоцку. И поиметь Кгинвил дочку y великого князя тверского y Борыса именем Марю, для которое ся окрестил y рускую вЂру, и дали ему имя Борыс. И мЂл c нею сына именем Рогволода, которого назвал руским именем Василеи. И тот Кгинъвил, реченыи Борыс, вчынил город на имя свое на рецэ Березыни и назвал его Борысов. И будучы ему русином, был велми набожон и вчынил цэрков каменую в Полоцку святое СофЂи, a другую святого Спаса, девичыи манастыр уверх реки Полоты от города y полумилю, a третюю цэрков — манастыр на Бельчыцы святого Борыса и ГлЂба. И пануючы ему в Полоцку был ласкав на подданые свои и дал им волность вЂчем ся судити и в ззон звонити, и по тому ся справовати, як y Великом Новегороде и Пъскове, и што князь Борыс мЂл в тою жоною сына Рогволода, нареченого Василя. И по нем почнеть княжыти сын его Василеи y Полоцку, a сам умер. И князь Василеи княжечы на Полоцку мЂл сына ГлЂба a дочку ПарасковЂю. И тая ПарасковЂя обецалася дЂвство свое заховати в цэлости до жывота своего и пострыглася в чернцы y светого Спаса y манастыры над Полотою, и мешкала там сем лЂт, богу служечы и книги пишучы на цэрков. A потом забралася до Рыма, и в Рыме мешкаючы богу служыла пилне, и мешкала колко год, и осветилася, которую называють санкта \л.231.\ Прекседыс, и по-рускии ПаросковЂя, которои же в Рыме и костел збудован на имя ее святое, там жэ ее и положыли. A брат ее, князь ГлЂб полоцкии, y молодых лЂтех своих, кнежывшы y Полоцку немного лЂт, и вмер, и положон ест y Полоцку y святое СофЂи, y Полоцку со отцэм своим у-в одном гробе. A полочане почали по тому справоватися, як y Великом Новгороде и в Пъскове, a пана над собою не мЂли.

Скирмонъту ж кнежечы на Новегородцы. И князь Мъстислав луцкии и пинскии почнеть вальку c князем Скирмонтом, хотечы его выгнати з отъчызны своее, з Берестя a з Мельника, и з Городна, и з Новагородка. И Скирмонт пошлеть послов своих до великого князя литовского, што вышол c Китавруса, до Жывинбута, просечы его, абы помоч дал ему напротивко руси. И князь великии литовскии Жывинбут пошлеть ему на помоч сына своего старшого Куковоитя со всими силами своими литовскими и жомоитскими. И поидеть князь великии Скирмонт c Куковотем и со всими силами напротивку Мъстислава, князя луцкого и пинского. И на сеи стороне реки Яселъды поразить князь Скирмонт князя луцкого и пинского наголову и всю раду рускую, толко князь Мстислав в малои дружыне ледве сам утек y город Луцко. A князь великии Скирмонт возметь город Пинск и город Туров. И заплакала Русь великим плачом, иж так окрутне вси побиты от бозбожное литвы ЦЧ. И князь великии Скирмонт, сына великого князя литовского Жывинбутова Куковотя чостовавшы и даровавшы безчысленое множество золота и серебра и боръздыми конми, и отпустил почстиве до отца его, до великого князя Жывинбута литовского. И коли Куковот прыидеть до отца своего Жывинбута, и не много пры отцы своем побывшы, и потом князь великии Жывинбут литовскии и жомоитскии умер. Тогды сын его Куковот сЂл на великом кнежени Литовском и Жомоитском.



Т—Т Подчеркнуто киноварью; na поле запись: Grawż y Montwił nowi. Kto bił УФ Ha поле: Кгаштолт, Довоино, Монъвид Х Ha поле: Минкгаило ЦЧ На поле: Русь побита от литвы \148\



Будучы пак в тот час царем завольским именем Булаклаи, и прыслал послов своих до великого князя Скирмонта, штобы ему выходы его давал и баскаки \л.232.\ его ховал по тым городом по тому, як c тых городов хожывали за предков его, князеи руских. И князь великии Скирмонт под тое поддатися не хотЂл, и тым послом его носы, губы и ушы урЂзати казал и до него отпустил Ш. И тот цар на лЂто, собравшыся з многими силами своими и оръдами татарскими, и пошол на Рускую землю и много зла Рускои земли учынил. A князь великии Скирмонт, собравшы вси воиска Щ свои, и подкал его на границы своеи y Коидонове Э, и поразил того цара, и всю рать татарскую побил, и самого цара убил, и з звитяжством великим пошол на Рускую землю, и взял город Мозыр, Чернигов и Стародуб, и Корачев Ю и со всими в цэлости, звитяжство одержавшы, вернулъся назад. И мЂл князь великии Скиръмонт трех сынов: старшыи Тронята, другии Люборт, третии Писимонт. Князь великии Скирмонт y великои старости своеи умер, a сын его Люборт сядеть на Корачеве и назовется князь корачевскии, a Писимонт на Турове сядеть, a Тронята на Новегородцэ; и пановали на тых городех много лЂт.

B тых лЂтех мати князя великого литовского и жомоитского Куковотева Поята умерла y великои старости своеи. И князь великии Куковоить, милуючы матку свою, и вчынил балвана Я на образ ее, чынечы еи паметку, и поставил того балвана именем матки своее Пояты вышеи озера Жослии, которыи же образ хвалили и за бога его мели. A потом тот балван зъгнил, и на том мЂстцы липы выросли, и тые липы хвалили и за бога их мЂли во имя тое Пояты, оли ж и до сего дня. A затым князь великии литовскии и жомоитскии Куковоить, милуючы подъданых своих, и сам умер. И зоставил по собЂ сына на великом кнежени Литовском и Жомоитском именем Утенуса А, которыи же сын, милуючы отца своего, великого князя Куковоита, и вчынил балъвана на паметь \л.233.\ отца своего Б и поставил его на горе однои над рекою Святою недалеко Дявилтова, которого ж хвалили и за бога мели. A потом тот балван згнил и там гаи вырос, и люди тым хвалили и прозвали его именем пана своего Куковоита.

Троняте пануючы на Новегородцэ В, и в тот час цар завольскии Курдас повстал з многими силами татарскими на Руские земли. И князь Тронята зберется з братею своею, c князем Писимонтом туровским a c князем Любортом карачевским, и со всими силами, и к тому обослалъся c князми рускими, c князем Семеном Михаиловичом друцким Г и c князем Давыдом Мъстиславовичом луцким, и Светославом киевским. И собравшыся c одного, и пошли против цара Курдаса и всее рати его завольское. И поткалися c ним за Мозырем на реце Окуневъцы, и вдарылися в полки межы собою, и вчынили бои вельми великии от пораня оли ж до вечора, и поможеть бог великому князю Троняте и князем руским: цара Курдыса и все воиско наголово побили, ледве сам цар y малои дружыне втек. И в том бою убили двух братов князя Тронятиных: князя Писимонта туровского a князя Люборта корачевъского, a князя Семена Д сына князя Е друцкого Михаила, a князя Давыдова сына луцъкого Анъдрея, и иных бояр много побили Ж. И князь великии Тронята, звитяжство одержавшы и добытку великого, золота и серебра, и каменя, и жэмъчугу, и шат дорогих набравшы З, и пошол y свою землю, a князи руские также y свои городы пошли. И пануючы князю Троняте не мало лЂт И, потом умер, и зоставил сына по собе на великом кнежени Новгородском Олькгимонта К. И кнежыв Олькгимонт не мало, потом умер, и зоставил по собЂ сына именем Рынкголта на великом кнежени Новгородъском. И кнежечы Рынкголту не мало лЂт на Новегородцы и на иншых городех руских Л, и вчынять змову межы собою князи руские, почати вальку против великого князя Рынкголъта, и хотечы его согнати з отчызны своее, городов руских, напервэи Светослав киевскии, a Лев володымеръскии, и Дмитреи друдкии. И собравшыся вси тры \л.234.\ полки, и пошли против великого князя Рынкголъта, и взяли тые руские князи татар на помоч собЂ от цара заволского М неколко тисеч татар. И князь великии Рынкголът потъкал их на рецэ Немне на Могильнои, и вчынил з ними бои вельми великии, и билися межы собою велми Н крЂпко, почоншы от пораня оли ж до вечера О. И поможе бог великому князю Рынкголту, иж князеи руских и всю \149\ силу их и орду татарскую наголову побил и сам, звитяжство одержавшы, з великим весэльем и добытком золота и серебра, и з великим набытем скарбов и прышол к своим городом.



Ш Нa поле (другим почерком): Послов зле ушановаго Щ a переделано из другой буквы Э На поле: Коиданов границы Литвы Ю На поле: Литва Русь повоевала Я На поле: Балван Пояты


А На поле: Утенус Б На поле: Балван Куковоита В На поле: Тронята Г На поле: Князь друцкии Д Следующее затем слово нового зачеркнуто Е Написано над строкой Ж На поле: Выграние битвы не без пролитя крови своее З Написаио над строкой И На поле: Тронята К На поле: Олкгимонт Л На поле: Рынкголт М Первое o переделано из другой буква П Написано над строкой О На поле: Битва c татары на Могилнои y Немна



И прышедшы до Новагородка рознемогъся и вмер без плоду; тут ся доконал род княжати рымского Палемона. A иные поведають, рекучы, бытот Рынкголт, прышедшы з оного побоища до Новагородка, и был y Новегородцы, и яко бы мЂл уродити трех сынов, и зоставить по собЂ на великом кнежени Новгородъском именем Воишвилака. Ино далеи o том Воишвилаку не пишеть П.




О княжати литовском Швинъторозе, сыне Утенусове Р


По смерти Рынкголтове панове, жалуючы господара своего прырожоного, и взяли собЂ господарем великого князя литовъского и жомоитского, сына Утенусова c Китаврусу, Швинъторога. И мало кнежывшы Швинторогу на Новегородъцы и на руских городах, и отец его, князь великии литовскии и жомоитскии Утенус, умер, и сын его Швинъторог по смерти отца своего начнеть кнежыти на великом кнежени Литовском и Жомоитском, и Новгородском, и Руском. И вродил Швинторог сына Скирымонта О. И обереть собЂ великии князь Швинъторог мЂстцо на пущы велми хорошо подле реки Вельи, гдЂ река Вилня упадываеть y Велю, и просил сына своего Скирымонта Т, абы на том местцу было жъглищо вчынено, гдЂ бы его мертвого сожгли. И прыказал сыну своему, жебы по смерти его на том мЂстцу, гдЂ бы его зъжог, всих князеи \л.235.\ литовских и знаменитых бояр сожъжено было, и штобы вже нигдЂ инъде тЂла мертвых не были зъжены, толко там, бо и перед тым жыгали тЂла мертвых на том мЂстцу, хто гдЂ умреть. И прыказавшы тые слова сыну своему Скирымонту, князь великии Швинъторог и вмер.




О великом князе Скирымонте


Великии князь Скирымонт У зостал по отцы своем на Великом князстве Литовском, Жомоитском и Руском. И подлуг прыказаня отца своего на том мЂстцы, на усти реки Вилни, гдЂ y Велью упадываеть, вчынил жъглищо, и там тЂло отца своего зъжог, и коня его, на котором еждчывал, и шату его, которую ношывал, и милосника его, на которого он был ласкав, и сокола, и хорта его зъжог. И от тых часов князи великие литовские тЂла их на том мЂстцу жыгали, и для того тое мЂстцо от тых часов прозвано Швинторога, на имя того великого князя Ф. И коли которого князя великого литовского албо пана сожжено было тЂло, тогды пры них кладывали ногъти рыси албо медвежи для того, иж вЂру тую мели, яко бы судныи день мЂл быти, и так знаменали собЂ, иж бы бог мЂл прыити и седЂти на горЂ высокои, и судити жывых и мертвых, на которую ж гору трудно будеть узыити бэз тых ногътеи рысих албо медвежых, и для того тые ногти подле их кладывали, на которых мЂли на тую гору лЂзти и на суд до бога ити. И так, ачколвек поганы были, a въжды потом себе знаменали и в бога одного вЂрыли, иж судныи день мЂл быти, и вЂрыли з мертвых въстаню Х и одного бога, которы мЂл судити жывых и мертвых Х.




О мужах латыгольских, як прышли y Жомоить \л.236.\


Пануючы великому князю Скирымонту Ц, и собралися мужы латыголове, которые седели над берегом морским, окияном морем, и прышли в землю Жомоитскую, и шкоды многие почынили, и кровопролитья в людех жомоитских от них много стало. И князь Скирмонт, собравшыся з силами своими, и поидеть на них в землю их и их самых выстинал, a иншых y полон вывел, и землю их пусту вчынил. И в тот час по выеханю князя великого Скирмонта з земли Латыгодьское Ч, прышли нЂмцы з-за моря до тое ж земли Латыголское, и тую землю засели, и панове тои латыголе зостали, и назвалися Ифлянты. И потом много лЂт пановал великии князь Скирмонт и зоставил двух сынов, Трабуса a Коликгина, и Трабус почнеть кнежыти на земли Жомоитскои, a Коликгин на земли Литовскои и Рускои, и кнежыл много лЂт и вмер. И почнеть по нем кнежыти сын его Роман. И по малом часе умре князь великии жомоитскии Трабус, дядко князя Романов Ш.



П На поле: Скончэне роду Палемонова и кнеженса их на Рынкголто Р Заголовок отчеркпут от предыдущего текста рядом штрихов, сделанных киноварью. Ниже приписка киноварью: Wtora psamika (!) na litewskie panowanie na Litwie С ы переделано из и Т Ha поле: того Скирымонта инде пишэ Скирмонтом У На поле: Скирымонт Ф На поле: Швинторога назвэско Х—Х Написано после заставки более мелким почерком Ц На поле: Скирымонт Ч Л переделано из другой буквы; на поле: Ифлянтов прышли от НЂмцов Ш На поле: Трабус a Коликгин, Роман



И по нем \150\ почнеть кнежыти князь великии Роман на земли Жомоитъскои и Литовскои, и Рускои. И Роман мЂл пяти сынов: старшыи был Нарымонт, другии Довмонт, третии Гольша, четвертыи Кгедрус, пятыи Троиидень.




О пяти сынех Романовых


По смерти великого князя Романа Щ почнеть кнежыти сын его старшыи Нарымонт, и вчынил город Кернов, и знесеть столец свои з Новагородка до Кернова, и почнетъ кнежыти, и назовется великии князь литовскии и новгородскии, и жомоитскии. A брат его Довмонт седить на отчызне своеи, на Утене, и назовется князем утенским. A третии брат его, Кгедрус, зарубил город и назоветь его именем своим Кгедроити, и прозоветься князем кгедроитьским. A четвертыи брат его, Гольша, передшы Э реку Велю, и нашол гору \л.237.\ красную межы горами над рекою Вилнею y мили от устья реки Вельи ЮЯ, гдЂ упадываеть в реку Велю, против Раконтишок, и вчынил город, и назоветь его именем своим, Гольшане. И немного бывшы там, и ездечы оттоль y ловы y пущу за десеть миль от того города своего, и наидеть гору красную и ровънинами великими объляглую и обфитостями наполъненую, и сподобалося ему там, и он там поселилъся, и на тои горе учынил город над рЂчкою Кораблем, и перенесеться оттоле, и там почнеть кнежыти, и назоветься князем гольшанским. A пятыи брат, Троиидень, мешкал пры брате своем, великом князи Нарымонъте. И довЂдался князь великии Нарымонт, што ж князи ятвезъские померли, a люди их мешкають без господара. И князь Нарымонт поидеть на них, и они не противечыся поддалися и поклонилися ему, a так он, оставшы им господарем и вземшы их, дал брату своему Троииденю за вдЂл. И князь великии Троиидень А наидеть гору красную над рекою Бебрею, и сподобалося ему там вельми, и зарубил город, и назоветь его Раигород, и прозоветься князем ятвезским и доиновъским. И будучы ему там на кнежени, великие вальки чынил з ляхи Б и з русю, и з мазовшаны, и завжды зыскивал, и над землями их силные окрутенства чынил, што нижеи описуеть y рускои кроиницэ, иж горъшыи был тым землям и окрутнеишыи на них, нижли Антиох сирскии и Ирод иерусалимскии, и Нерон рымскии, што так был окрутныи и валечныи. Князь же великии Нарымонт поиметь жону y ифлянтского реченого Флядры, дочку его, и брат его Довъмонт y того же Флядры другую дочку его. И немалыи час жывучы, рознеможется жона князя Домонътова утенского и вмерла. И князь великии Нарымонт, слышавшы смерть невЂстки своее, жаловал вельми, и будучы сам немоцон, и послал жону свою до брата своего Довмонъта, жалуючы жалости его. И коли прыехала жона Нарымонтова до Утены, жалуючы девера своего, князя Довъмонта, и князь Довмонт, видевшы невЂстку свою, возрадовался вельми, и рекл так: «МнЂ было жоны искати, a се \л.238.\ мнЂ бог жону дал». И понял ее за себе. И в том стала великая брань и ростыржъка межы братею, великим князем Нарымонтом и князем Довъмонтом В. И князь великии Нарымонт, видечы жалость свою великую, иж брат его жону его за себе кгвалтом взял, и обослал братю свою, князя Кгедроитя и княза Гольшу, и князя Троииденя, и тестя своего, Флядра ифлянтского. И собравшыся з братею и со всими людми своими, и потягнул на брата своего, князя Довмонъта, и обогнал его y городе его Утене. И порозумел князь Довмонт, што ся не мог ему оборонити, и просил горожан своих, абы ему не подали города, поколь бы он прошол воиско Нарымунтово. И сам спустилъся з города, и прошодшы воиско Нарымунтово, и побежыть и прыидеть к городу Пъскову. Ино мужы пъсковские, видечы его мужа добра и честна и розумна, и взяли его собЂ господарэм и назвали его великим князем пъсковским Г. A Нарымунт, узявшы город Утену и жону свою, и княжыл Д на Кернове и на Новегородцы, и на Жомоити, a Довъмонт на Пъскове, и обадва немалыи час кнежыли. Троиидень пак поиметь жону y княжати мазовэцкого, дочку его, и мЂл з нею сына, реченаго Рымонта. И коли сын его Рымонт доростал лЂт своих, и отець его Троиидень дал его для науки языка руского до Льва Мъстиславича, которыи заложыл город во имя свое, Львов. И мешкаючы Рымонту y князя Льва, и навчылся языка руского, и сподобалася ему вЂра хрестиянская и окрестилъся, и врозумЂл, иж тот свЂт ничого не ест, и опустившы свЂт и пострыгъся в чернъцы, и названо имя ему Василии Е, a прозвищом Е Лаврыш. И будучы ему в чернъцох, прышол до дядка своего Нарымонта и просил его, абы ему дал в Новогородском повЂте мЂстцо на пущы подле \151\ реки Немна, гдЂ бы собЂ манастыр збудовати мЂл, и он ему допустил.



Щ На поле: Нарымонт, Довмонт, Кгедрус, Гольш Э Так в рукописи ЮЯ Так в рукописи; д. б. Вилни


А На поле: Троидень (д переделано из з) Б На поле: Валки з ляхами В На поле: Домонт жону брата своего Нарымонта взял Г На поле: Домонт принят от псковян за господара Д кня написапо над строкой Е—Е Написано на поле c выносным знаком



И он собЂ там манастыр збудовал, и поставил напервеи церъков святого Воскресенья, и оттоле прозвано Лаврышов манастыр Ж. И будучы ему y манастыры, дядко его умреть, и панове \л.239.\ литовские и жомоитские взяли собЂ великим князем Троиденя З. И пануючы великому князю Троиденю, и князь великии Довмонт, прышодъшы зо Пъскова, возметь город Полътэск и почнеть княжыти на Пъскове и на Полоцку. И жаль ему было того велми, иж брат меншыи осЂл панство y Литве, и почал o том мыслити, як бы его мЂл o смерть прыправити. A в тых часех пануючы Троиденю, умерли ему обадва браты, князь Гольша a князь Кгедрус. A з оное вышеиписаное вазни князь великии Довмонт направил шесть мужыков на брата своего Троиденя забити, яко ж он шол бэзпечне собЂ з лазни в Новгородку, и тые мужыки его зрадне забили. A сам Довмонт, собравшыся з людми своими пъсковскими и полоцкими, и потягнул до Литвы, хотечы быти князем литовским и жомоитским. И реченыи чернец Лаврыш, по-литовскии зовемыи Лаврымонт, a по-рускии Василеи и жалуючы смерти великого князя Троиденя, отца своего, и оставившы чын чернеческии и прышол до панов. И собравшыся со всякими силами своими литовскими, и потягнул противко Довмонта, хотечы помстити кров отца своего. И направившыся c полъки своими, и потъкалися з Довмонтом над озером, и коли зышлися полки c обу сторон, и был межы ними бои и сЂча великая c поранку, оли ж до вечера, и поможеть бог Лаврышу, и все воиско дядка своего Довмонта наголову поразил и самого его убил, и город Полтэск взял. И вернувшыся назад к стольцу отца своего до Кернова, и рек паном: «Коли мнЂ бог дал помстити кров отца своего, я свЂта того отрекаюся, взял есми на себе чорную рызу, a господарства я не хочу. Возмите собЂ господарем, кого воля ваша будеть. A вед же я ражу вам: ачъколвек ест братя моя, Гольшын сын Олькгимонт, a Кгедрусов сын Кгинвил. Ино еще они малы суть, не годяться на панство, бо дядко мои Нарымонт, коли сЂл на Великом князстве Литовском, гэрб свои Китаврус зоставил брати своеи, a собЂ вдЂлал герб — чоловека на кони з мечом И, а то знаменуючы \л.240.\ через тот герб пана дорослого лЂт, хто бы мог боронити мечом отчызны своее. A про то оберыте собЂ господара доброго, хто бы мЂл боронити того панства, Великого князства Литовского. И так ми ся видить, иж бы к тому был годныи Витеня, которыи был маршалъком у-в отца моего». И панове не хотели переступити рады a воли господара своего прырожоного, сына великого князя Троиденева, вчынили так: видечы мужа мудрого a годного Витеня, которыи был з рожаю, a c поколенья c Колюмнов, з ымЂня деръжачого в Жомоити, реченого Аиракгола, взяли его собе великим князем литовским и жомоитским, бо князь великии Троидень, будучы в Жомоити, ехал через имЂнье его Аиракголу и узрал оного Витеню еще малым младенцом, и вбачыл оное дитя обличем велми хорошо и възросту цудного, играючы з дЂтми малыми, и взял его к собЂ. И был y него коморником, и будучы в него в коморе кождую реч цудне a радне панскую ховал и справовал. A так он, бачечы цноту его и доброе заховане, вчынил его в себе маршалъком, и был в него милосником и всяким справцою, и затым по смерти его взяли его на Великое князство Литовъское. Тут ся доконал род c Китаврусов a начало великое княжэнье Витенево, род великих князеи литовских c поколеня a з роду c Колюмнов К.




О великом князи Bитeнe


Будучы великому князю Витеню на Великом князстве Литовском, Жомоитском и Руском, и иановал много лЂт, оли ж до старости своее во-в покою, и родилъся ему сын Кгимидин. A потом умер князь великии Витеня, a после его сЂл на великом княжени Литовском, Жомоитском и Руском вышеиреченыи сын его Кгимидин. \л.241.\




О великом князи Кгидимине


Будучы великому князю Кгидимину Л по смерти отца своего Витеня на Великом князстве Литовском, Руском и Жомоитском, и седечы на стольцы отца своего на Кернове. И пановал немного лЂт по смерти отца своего, повстали против его нЂмцы, пруси и лифлянты, и втегнули з великим множеством людеи своих в землю Жомоитскую, хотечи ее собЂ осЂсти.



Ж На поле: Манастыр Лаврышов З На поле: Троидень И На поле: Гэрб в Литве: Погоня. Витеня К На поле: Законченье княженя в Литве з роду и гэрбу Китавруса. Далее отчеркнуто несколько штрихов, сделанных киноварью, и несколько слов по-польски Л На поле: Кгидимин



И князь Кгидимин не поспел так рыхло собрати воиска своего против нЂмцов и послал старшого гэтмана своего з \152\ малыми людми на город Куносов, умоцняючы его от нЂмцов, a тот был гэтман его на имя Кгаштолът з роду c Колюмнов М. И нЂмцы того гэтмана его обогнавъшы, и тот город Куносов обълегли, и з великих дЂл усего его збили, и того гэтмана c того города звели и в полон его повели, и землю Жомоитскую посЂли. И князь великии Кгидимин вчынить умову з нЂмцы o того гэтмана своего, и дал за него трыдцать тисечеи золотых Н. И на другиигод, собравшы вси свои силы литовские и руские, и пошли на НЂмцы. НЂмцы, ифлянты и прусове, и жомоить з собою вземшы, и поткали великого князя Кгидимина на рецэ Ошмене, на сеи стороне Жэимов д†мили. И поможеть бог великому князю Кгидимину, иж нЂмцов усих наголову поразил, a жомоить от немцов отступили, и прыступили к господару своему прырожоному Кгидимину так, иж нЂмцов всих наголову побили и все воиско нЂмецкое. И тут, звитяжъство одеръжавшы над нЂмцы, и жомоить к собЂ взял, и пошол c тыми силами и з жомоитью в землю Немецкую, и взял город Тилжу a другии Ракгнету, и иншых городов много побрал, и землю всю спустошыл О и в полон повел, и невымовное множество кровопролите в НЂмцох учынил и звитяжство одеръжавшы, и з великим весэлем y свою землю прышол. \л.242.\




О великом князе Кгидимине и o битве c князем Володымерем володимерским


И впокоившы землю от нЂмцов Жомоитскую, и пошол на князи руские, и прыиде напервеи к городу Володымеру. И князь Володымер володымерскии, собравшыся з людми своими , и вчынить бои великии c князем великим Кгидимином. И поможеть бог князю великому Кгидимину, иж князя Володымера володымерского самого убил и воиско его все побил, и город Володымер озметь П. И потом поидеть на князя Льва луцкого. И князь Лев услышал, што князя Володымера литва убила и город Володымер узяли, и он не смЂл против его стати, и побежыть до князя Романа, до зятя своего, ко Бранску. A князи и бояре волынские били челом великому князю Кгидимину, жебы в них пановал и господарем в них был, a земли их не казид Р. И князь великии Кгидимин, укрепившы их прысягою и оставившы намЂстников своих в них, и там почнеть княжыти. A потом на зиму пошол до Берестя и з Берестя вси воиска свои роспустил, a сам y Берести зимовал. И скоро Велик день минул, и он, собравшы вси свои силы литовские, жмоитские и руские, и на другои недЂли по Велицэ дни поидеть на князя СтаниславляС киевъского и, прышодшы, возметь город Овручыи и город Жытомир. И князь Станиславль киевскии, обославшыся c князем Ольгом переяславским и c князем Романом бранским, и c князем волынским, которого князь великии Кгидимин выгнал з Луцъка, и собралися вси y великом множестве людеи, и спотъкалися вси c князем великим Кгидимином на рецэ на Ръпени под БЂлым городом, в шести милях от Киева. И вчынили бои и сЂчу великую, и поможеть бог великому князю Кгидимину, побъеть всих князеи руских наголову, и воиско их все побито на пляцу зостало, и князя Льва луцъкого, и князя Ольга переяславского убили Т, и в малои дружыне Станиславль киевъскии и з Романом бранским утекуть до Бранска, a князь великии Кгидимин оступить \л.243.\ БЂлъгород. И горожане видечы, иж господар их з воиска побЂг проч, a воиско все наголову побито, и они, не хотечы противитися воиску так великому литовскому, и передалися з городом князю Кгидимину, и прысягу вчынили служыти к Великому князству Литовскому. И затым князь великии Кгидимин пошол со всими силами своими до Киева и обляжеть город Киев, и кияне почалися ему боронити У. И лежал князь великии Кгидимин под Киевом мЂсец, a затым здумали межы собою горожане киевские, иж моцы великого князя не могли терпети и болш того без господара своего, великого князя Станиславля киевского. И въслышали тое, иж господар их Станиславль втек от Кгидимина и воиско господара их побито, a в них заставы князь их никоторое не зоставил. И они, змовившыся одноемыслне, и подалися великому князю Кгидимину Ф, и пошодшы з города со кресты игумены, попы и дъяконы, и ворота городовые отворыли, и стрЂтили великого князя честно, и вдарыли ему чолом, и поддалися служыти ему, и прысягу свою великому князю Кгидимину на том дали, и били чолом великому князю Кгидимину, штобы от них отчызны их не отнимал.



М На поле: Кгаштолт гэтман поиман; слова c Колюмнов сверху и снизу отчеркнуты киноварью Н Ha поле: Кгаштолт окупен з вязенъя за 30 тисячеи золотых О На поле: Кгидимин нЂмцов побил П На поле: Кгидимин Русь побил; далее другим почерком: и Володимер взял Р Ha поле: Волынь Кгидимин опановал С Буквы ля переделаны Т На поле: Кгидимип русь и княжат их побил У Нa поле: Кгидимин Киева добывает Ф На поле: Подали Киев



И князь Кгидимин пры том их зоставил и сам \153\ честно у город Киев уехал Х. И въслышали тое прыгородки киевские, Вышегород, Черкасы, Канев, Путивль, Слеповрод, што кияне передалися з городом, a господаря своего слышали, иж втек до Бранска, a воиско его все побито, и вси прышли до великого князя Кгидимина, и c тыми вышеиречеными прыгородки киевъскими подалися служыти, и прысягу на том дали великому князю Кгидимину Ц. И переяславлене слышали, иж Киев и прыгородки киевские подалися великому князю Кгидими[ну] ЦЦ, a господар их, князь Олг, от великого князя Кгидимина убит, и они, прыехавши, и подалися з городом служыти великому князю Кгидимину, и прысягу свою на том дали Ч. И князь велики Кгидимин, взявшы Киев и Переяславль и вси тые прыгородки, \л.244.\ и посадил на них князя Миндовгова сына Олькгимонта, великого князя Гольшанского, a сам з великим весэлем до Литвы прыехал.




О князи Станиславли киевском, которого выгнал князь Кгидимин c Киева


B тот час будучы князю Станиславлю киевскому y Бранску, выгнаному от великого князя Кгидимина, и прыслал к нему князь рэзанскии Иван. Будучы y старости своеи, просечы его, абы до него ехал и дочку в него понял, именем Ольгу, бо сына не мЂл, дочку толко одну, и по смерти его, абы был великим князем резанским. И князь Станиславль до него ехал, и дочъку в него понял, и по смерти его был великим князем резанским Ш. A князь великии Кгидимин, прогнавшы князеи руских и от немец землю свою упокоившы, и пановал много лЂт во-в покои.




О великом князи Кгидимине, як Троки зарубил и Вилню


Некоторого часу поехал князь великии Кгидимин з столца своего, c Кернова, в ловы за пять миль за реку Велью, и наидеть y пущы гору красную, дубровами и ровнинами обляглую, и сподобалося ему вельми, и он там поселился, и заложыл город, и назоветь имя ему Троки, гдЂ тепер Старые Троки, и c Кернова перенесеть столец свои на Троки. И в малых часех поехал после того князь великии Кгидимин в ловы от Трок за чотыри мили, и наидеть гору красную над рекою Вилнею, на которои знаидеть звера великого тура, и вбъеть его на тои горе, гдЂ тепер зовуть Туря гора. И велми было позно до Троков ехати, и станеть на луцэ на Швинторозе, \л.245.\ гдЂ першых великих князеи жыгали, и обночовал тут. И спечи ему там, сон видел, што ж на горе, которую зывали Крывая, a тепер Лысая, стоить волък желЂзныи великии, a в нем ревуть, як бы сто вильков. И очутилъся от сна своего и мовить ворожбиту своему, именем Лиздеику, которыи был наиден у-в орлове гнезде, и был тот Лиздеико y князя Кгидимина ворожбитом наивышъшым, a потом попом поганским: «Видел деи есми сон дивныи» и споведал ему въсе, што ся ему у-во сне видело, И тот ЛиздЂико мовить господару: «Княже, волк великии жэлЂзныи знаменуеть — город столечныи тут будеть, a што в нем внутры ревуть, то слава его будеть слынути на весь свЂт Щ. И князь великии Кгидымин назавтрее ж, не отеждчаючы, и послал по люди и заложыл город, один на Швинъторозе Нижнии, a другии на Крывои горе, которую тепер зовуть Лысою, и наречеть имя тым городом Вилня Э. И збудовавшы городы перенесеть столец свои c Троков на Вилню, и вчынить першым воеводою y Вилни гэтмана своёго Кгаштолта с Ю Колюмнов Ю, которыи был поиман от нЂмцов на Куносове. И кнежыл князь великии Кгидимин много лЂт на князстве Литовском, Руском и Жомоитском, и был справедливыи, и много вальк мевал, и завъжды зыскивал, и пановал фортунливе, оли ж до великое старости своее.




О великом князи Кгидимине и o семи сынех его


Будучы великому князю Кгидимину Я пры старости своеи, и сплодил сем сынов, a осмую дочку, именем Ганну, которую дал до Ляхов в малженство сыну Казымерову Владиславу Локетку, коли писано от божого нароженя тисеча трыста двадцатого году. И будучы князь великии Кгидимин y великои старости своеи, и пры своем жывоте розделил всих сынов своих, и пяти сынов своих посадил на вдЂлех, \л.246.\ то ест старшого сына Монтивида на Корачове да на Слониме, a Нарымунта на Пинску, a Олкгирда на Креве, a к тому князь витебскии сынов не мЂл, толко дочку, и он \154\ за Олкгирда дал дочку свою и прынял его y землю Витебскую.



Х На поле: Кгидимин Киев осЂл Ц На поле: Прыгородки киевские подалися Кгидимину ЦЦ B рукописи Кгидими Ч На поле: Переяславпь подался Ш На поле: Станиславль зостал князем резанским Щ На поле киноварью: Лиздэико; чернилами: Лиздеико ворожбит Э На поле: Вильно збудоваио Ю—Ю Приписано над строкой. На поле: Кгаштовт с. Трумпя урожоныи воевода первшыи Я На поле: Кгидимин



A Коръяту дал Новгородок, a Люборту дал Володимер и Луческ, и землю Волынскую. A старшых А двух сынов своих посадил на великих князствах: Евнутя на стольцы своем на Вилни и на Великом князстве Литовском, a Кестутя на Троцэх и на всеи земли Жомоитскои. И розделившы их сам почестне умер. И пануючы Кестутю на Троцэх и на Жомоити, и вслышал дЂвку на Полонъдзэ Б, именем Бируту В, которая ж дЂвка богом своим подлуг обычаю поганского пошлюбила чыстость ховати, и сама была хвалена от людеи за богиню. И прыехал там князь Кестути сам, и сподобалася ему вельми, иж была велми красна тая дЂвка и розумна, и просил ее, абы ему была малжонкою, и она не хотЂла прызволити, и отказала ему, иж «я пошлюбила богом своим чыстость ховати до жывота своего». И князь Кестутеи взял ее моцно c того мЂста и провадил ее до стольца своего y великои почестности до Троков. И обославшы братю свою, учынил великое весэле з братьею своею, и понял тую панну Бируту собЂ за жону. И ездечы князю великому Кестутью от Троков за милю, и сподобалося ему мЂстцо велми подобно межы озер, и он там поселилъся, и город заложыл, и назвал его Новые Троки, и перенесеть столец свои на Новые Троки з Старых Троков. A сын его Витовт родилъся y Старых Троках, и на том мЂстцу, гдЂ родился Витовт, сам по смерти отца своего Витовт и Кестутеи ВВ костел заложыл y Звестоване панны Марыи, и мнихи уставил закону того, што y Кракове ест кляштор святого Авъкгуштына на Стынцу.




О князи Олькгирде и о Кестути


По смерти великого князя Кгидимина князь Олкгирд a князь великии Кестутеи были межы собою y великои милости \л.247.\ и в ласцэ, a князь великии Евнутеи был межы их y болшои почестности и княжыл на Вилни Г. И не полюбился князю Олькгирду ГГ Евнутеи, и змовили межы собою так братья: як бы его зъсадити з Вилни и одному межы их сЂсти на Вилни. И змовившы рок вдЂлали, которого дня наехати на Вилню и засЂсти город под братом своим, князем великим Евнутьем.

ЛЂта 6873 [1365] Д, a от нароженя Хрыста 1365 князь великии Олькгирд з Витебска борздо прыспел ДД, a князь великии Кестутеи угнал y город Вилню, и князь великии Евнутеи со страху выбежыть з города Вилни, и втечеть y гуры бос, и там озябеть y ноги. И нявшы его там, прывели до братьи и посадили его за сторожою. Тогды великии князь Кестутеи рече брату своему, великому князю Олькгирду: «ТобЂ годится, брате, князем великим на Вилни быти; ты межы нами старшыи брат, я c тобою заодно жыву». И посадить его на Вилни, на Великом князстве Литовском Е, a Евнутью дал Жеславль. И змовить межы собою князь великии Кестутеи a князь великии Олькгирд, што всеи братьи послушнои быти великого князя Олькгирда Ж, a што прыдобудем собЂ городов албо волостеи, то все наполы поделити. A быти им y великои милости и в ласцэ аж до смерти, и прысягу собЂ на том дали, иж не мыслити зла один другому. Также были y тои справедливости, оли ж до жывота своего. У великого князя Олькгирда сынов было дванадцать: от первое жоны пять, a от другое, тверанъки, сем. A то суть имена их: Анъдреи, Дмитреи, Костянтин, Володимер, Федор, Корыбут, Скрыгаило, Якгеило, Корыгаило, Лукгвени, Швитрыгаило З. А у великого князя Кестутья сынов было шесть. A любили межы собою сынов своих князь великии Олькгирд князя великого Якгеила, a князь великии Кестутеи Витовта. И так змовили межы собою, иж и по нашом жывоте тые два будуть на Великом князстве Литовском княжыти». И князь великии Витовт также y великои милости были з Якгеилом пры отцох своих. Потом князь великии Олькгирд умре в лЂто божого нароженя 1377. Пановал на Вилни дванадцать лЂт. A князь великии Кестутеи, \л.248.\ не хотечы шлюбу брата своего зменити, князя великого Олкгирда, и посадить братанича своего на Вилни князем великим Якгеила Олкгирдовича И.



А B Арх тых; на поле: Кгидимин сынов делил Б з переделано из другой буквы В На поле: Кестуть, Бирута ВВ Так в рукописи Г На поле: Евнутеи княжыл на Вильни ГГ B K Олькгирду и Керстутю Д B тексте даты везде обозначены буквами славянского алфавита ДД Так в рукописи; в K не приспЂл Е На поле: Олкгирд княжыл на Вилни Ж B K далее: a то собЂ так умовили З Далее чистое место на 10 букв; перечислено только одиннадцать имен И На поле: Якгеило княжыл на Вилни



НЂхто пак был перед тым y князя великого Олкгирда паробок невольныи, холоп, звали его Воидилом. Перво был пекарем y великого князя Олкгирда, a потом он собЂ дал ему постЂль слати и воду собЂ пити давати, потом пак полюбилъся ему, и дал ему Лиду держати, и повел его y добрые дни. И потом, по жывоте князя \155\ великого Олькгирда, князь великии Якгеило повел Воидила велми высоко, и дасть за него сестру свою рожоную, княгиню Марю, што была за князем Давыдом. И князь великии Якгеило князю великому Кестутю, дядку своему, жалость великую вчынил, иж братанну его, a свою сестру, за холопа дал. И был тот Воидило y великои ласцэ y князя великого Якгеила, и почне тот Воидило з нЂмцы соимы чынити и листы ся записывати a стояти против великого князя Кестутя К. НЂхто пак был ифлянскии кунтор, именем Авкгуштын. Тот кунтор князю великому Кестутью споведал: «Ты того не вЂдаеш, што велики князь Якгеило посылаеть к нам часто Воидила и вжо записался з нами, як маеть тебе избавити городов, a ему бы ся достали з его жоною, сестрою князя великого Якгеила». И князь великии Кестутеи вЂдал тое, што князь великии Витовт гаразд жыветь c князем великим Якгеилом, и почнеть Кестутеи жаловатися сыну своему Витовту, мовечы: «Ты з ним гаразд жывеш, a Якгеило вже записался з нЂмцы на нас». И князь великии Витовт речеть отцу своему, великому князю Кестутью: «Не вЂр тому, отче, бо того межы нами нЂт, заню ж Якгеило жыветь со мною гаразд». Потом пак вчынил великое знаме: дасть князь великии Якгеило Полтеск брату своему Скиргаилу Л, и полочане прыняти его не хотели на Полътеск. И князь великии Якгеило пошлеть воиско литовское и руское з братом своим Скиргаилом к Полоцку, и оступять город Полътеск, и мистр немецъкии пошлеть нЂмъцов на помоч добывати города Полоцъка. И князь великии Кестутеи почнеть опять жаловатися, плачучы, сыну своему, князю великому Витовту, на Якгеила, рекучы: «Иж сестру твою, a мою братанну дал за холопа Воидила и з нЂмцы записался нас воевати, a то мнЂ з НЂмец явлено. \л.249.\ A другое: c ким мы воюемся? З нЂмцы. И они им Полоцка добывають. A то тэж поведано, иж им стояти на нас з нЂмцы». И князь великии Витовт откажэть отцу своему, великому князю Кестутю, рекучы: «Я тому еще не вЂру».




О великом князи Кестутю и o великом князи Якгеиле


Потом князь великии Витовт поехал к Дорогичыну, и князь великии Кестутьи, собравшы силу свою, и со всим своим двором y зброях и вженуть y город y Вилню, и поимаеть князя великого Якгеила и з братею его и з матерю, и тые листы знаидеть y него, што ся з нЂмцы записали, и пошлеть гонца своего к сыну своему, князю великому Витовту, к Дорогичыну, поведаючы ему, иж таковое ся дЂло стало. И тот гонец знаидеть князя великого Витовта М y Городне М, и князь великии Витовт послышал тое, и за один день прыбежыть з Городна до Вилни до отца своего, князя Кестутья. И речеть Кестутеи сыну своему Витовту: «Ты мнЂ не вЂрыл, сыну, o ce тые листы, што з нЂмцы записался на нас князь великии Якгеило, нижли в том нас бог остерег. A князю великому Якгеилу ничого есмо не вчынили, скарбу есми не рушыл a ни стад, a сам Якгеило y мене в нетстве ходить за малою сторожою, a отчызну его, Витебск и Крево, и вси мЂста, што отец их держал, то все ему отдаю, и ни во што ся не вступую, a то все учынил есми для свое головы, остерегаючы себе в том, послышал есми, што на мене лихо мыслять». И князь великии Якгеило вельми ся урадовал прыезду великого князя Витовъта, и на тых мЂст дасть князь великии Якгеило прысягу князю великому Кестютю и сыну его Витовту на том, што николи не противитися a ни стояти против их, a завжды y их быти по волности y своем дому. И князь великии Кестутеи отпустил его з матерю его и з братею, и со всим его скарбом, и со всими статки, a Воидила обЂсил. И князь великии Якгеило поидеть напервеи до Крева, a князь великии Витовт провадил его до Крэва, a потом c Крева поидеть до Витебска. \л.250.\ A князь великии Кестутеи, сЂдшы на Вилни, и пошлеть до Полоцка два паны литовских з воиском. И Полочане, услышавшы тое, урадовалися и крыкнули на рать Скиргаилову, и люди ратные от Скирыгаила отступили и пошли до Вилни до князя великого Кестутя. A князь Скиргаило пошол в НЂмцы y Ифлянты з малым воиском. A князь великии Кеистуть поидеть к Новгородку СЂвЂръскому Н, a князя Витовта оставить c князем Корыбутом y Литве. A князь великии Якгеило мЂл з Витэбъска c Кеистутем же поити посполу, и в рыхлом часе прысяги свое забыл, и не О шол ему на помоч, и намовил панов виленских, жебы засЂли Вилню.



К Далее чистое место на 6 — 7 букв Л На поле: Скиргаило княжыл на Полтеску М—М Витовта написано на поле; после Городне чистое место на 5 — 6 букв Н Первое Ђ переделано из э; при переделке первое c частично занято новой буквой О e переделано из другой буквы



A князь великии Витовт в тот час был y Троцэх, и князь великии Якгеило з Витебъска борздо прыбежыть до Вилни з воиском. И князь великии Витовт пошлеть к Новгородку СЂверъскому ко отцу своему Кестутю. И мистр прускии, услышавшы тую реч, и поидеть на помоч ратью великою князю Якгеилу наборъзде. И то услышавшы князь великии Витовт, иж прусы и нЂмцы \156\ до Вилни тягнуть, a князь великии Якгеило з Вилни до Троков идеть воиском великим зниматися з нЂмцы, и князь великии Нитовт ис Троков выбежыть и з матерю своею и поидеть к Городну. A князь великии Якгеило прыступить к Трокам, и трочане подалися П ему. И князь великии Кестутеи борздо к Городну прыидеть к сыну своему и тут знаидеть жону свою и пошлеть ее к Берестю, надЂючыся на мазовецкого, зятя своего, князя Януша, a сам князь великии Кестутеи поидеть в Жомоить, а сына своего Витовта оставить в Городне. Тогды князь Януш мазовецкии, забывшы доброе прыязни тьстя своего, князя великого Кестутя, и поидеть воиском к Дорогичыну, и Дорогичын озметь и осадить, и Сараж звоюеть, и Каменец возметь, и подступить под Берестеи. И Берестя не вземшы поидеть проч, и осадить Дорогичын и Мельник. И князь великии Кестутеи, собравшы всю жомоитскую силу и многие люди, и поидеть под Троки, и прыидеть к рецэ Вельи, \л.251.\ a князь великии Витовт, собравшы воиско по всеи отчызне своеи, поидеть з Городна на помоч отцу своему, и соимуться воиска на Вельи вышеи Ковна д†мили. Тут воиско Кестутево перевезлися и поидуть к Трокам и оступять Троки. И прыидеть вЂсть ко князю великому Кестутю, што князь великии Якгеило идеть з Вилни з великим воиском, и з ним рать немецкая и ифлянтская. Ино перед тым нЂмцы были на обе стороне непрыятели князю Р великому Якгеилу Р, бо перед тым ифлянтская рать ходила на помоч князю Скиргаилу полоцъкому, a потом з мистромъ немецким пруская рать прыходилак С ТрокомС, а то вже третии раз ифлянтская рать c ними же прыходила; a тому знаки ест, што з ним заодно стоять против князю Кестутю. И выехал на битву князь великии Кестутеи з сыном своим, князем великим Витовтом, против великого князя Якгеила. И еще ся воиска не сняли межы себе за тры або за чотыры стрельбища, на тых мЂст прыженуть князи и бояре от великого князя Якгеила до князя великого Кестутя и почнуть пытати князя великого Витовта, штобы з ними поговорыли. И почнуть говорыти князю великому Витовту: «Князь великии Якгеило послал нас к тобЂ, штобы еси нас зъеднал со отцэм своим, што быхмо мЂли мы свое, a вы свое, a битвы и кровопролитя жебы не было межи нас, a ты бы прыехал до брата своего князя великого Якгеила, a мы тобЂ прысягу дадим, што тобЂ чысто опять y свое воиско отехати, нехаи бы межы вас добрыи конец стался». И князь великии Витовт отказал, иж «я прысягу вашу y вас беру, але до нас жебы такъже Скиръгаило переехал, a прысягу бы нам дал, a я к вам еду». И они послали до князя Скиргаила, и прыехал князь Скиргаило, и прысягу дал князю Витовту, и князь великии Витовт поехал до князя великого Якгеила к его воиску, a полъки стоять, ничого межы собою не почынають. И князь Якгеило почнеть просити Витовта, рекучы: «Брате милыи, зъеднаи нас, штобы не было кровопролитья». И князь Витовт прысягу узял y князя Якгеила, што отцу его, князю великому \л.252.\ Кестутю, з Якгеилом зъехатися и опять чысто розехатися. И еще князь великии Витовт речеть князю Якгеилу: «Пошли, брате, еще ко князю великому Скиргаилу, штобы он дал прысягу князю великому Кестутю, отцу нашему, иж бы ему было прыехати чысто и опят зася отехати, и дал бы нам прысягу от себе». Князь Скиргаило з Витовтом прыидеть ко князю великому Кестутю, и дасть прысягу Скиргаило князю великому Кестутю от князя великого Якгеила и от себе. И князь великии Витовт c князем великим Кестутем, отцом своим, обадва поедуть y воиско Якгеилово, на тые прысяги надЂючыся. И князь Якгеило тые прысяги переступил, и рек так: «Поедьмо до Вилни и там докончаем свое прысяги». И за тым воиска ничого не почынали и оставили. И як до Вилни прыехавшы, там князь великии Якгеило князя великого Кестутья, дядю своего, оковавшы, до Крева послал и всадил y твержу Т, a князя великого Витовта оставили были y Вилни. И там y Креве князя великого Кестутя удавили пятое ночы коморники князя Якгеиловы, одного звали Прокъшою, што ему воду давал, a другии был Мостев брат a Кучук a Лисица Жебентяи. Так ся конец стал князю великому Кестутю.



П Буквы по переделаны из не Р—Р B K князю великому Кестутью и князю великому Якгоилу С—С Написано над строкой Т На поле: Якгеило прысяги не держал: князя Кестутья удавили



По смерти князя великого Кестутя пошлеть князя великого Витовта князь великии Якгеило в нятство до Крева з жоною и велить тверъдо стеречы, a то все помщываючыся Воидила. Князь великии Витовт седЂл y Креве за сторожою y коморе, a жонъкам двема прызволено было ходити до коморы; и княгиню c ним посадили, a положывшы их вон выходять, a сторожа завжды около была. И княгиня великая Витовтовая слышала от людеи, што князь Витовт маеть долго седЂти c нею, и змыслила собе: «Як жонъки будуть нас покладати, тогды тобЂ одное жонки плате ускладшы, выити вон з другою жонкою, a тои жонцэ остати бы ся з нею y коморе». И Витовт, \157\ послухавшы жоны своее порады, и нарадился y жончыно платье, и вышол вон з другою жонкого, и спустится \л.253.\ з города, и втечеть до Немец к мистру до Маранина городка. А сторожи тое видели и не догадалися, довнимали жонка вышла з жонкою. И князю великому Витовту, мешкаючи там y НЂмцох, прыехали там князи многие и бояре литовские, и почнетъ Витовт воевати землю Литовъскую c помочю немецкою. A в тот час князь великии Якгеило и з матерю своею были y Витебъску, a брат его Скиргаило y Троцэх был. И князь великии Витовт повоевал много земли Литовское, a князь великии Якгеило и брат его Скиргаило не могли стояти против великого князя Витовта, бо y Витовта болшая сила была. Тогды князь великии Якгеило перепросил князя великого Витовта и дасть ему Луческ со всею землею Волынскою и c Подольем, a y Литве отчызна его ТТ. И князь великии Витовт покору свою учынил перед старшым братом своим Якгеилом и прынял Луческ со всею землею Волынскою и Подолскою У.

И потом короля польского Владислава y жывотЂ не стало, a сына жадного не мЂл, толко одну дочку мЂл, на имя Едвигу. И почали поляки часто посылати послы з Кракова ко князю великому Якгеилу, рекучы, жебы прынял крещене старого Рыму a понял в них кролевну Едвигу собЂ жоною и стал бы в них королем y Кракове, на всеи земли Лядскои. И князь великии Якгеило раду собе учынил з матерю своею, княг[и]нею Ульяною, и з братьею своею, и со всими князи и бояры Литовское земли, и поехал до Кракова y Полскую землю Ф. Там же сам крестилъся и братя его, и князи, и бояре, и понял собЂ кролевну Едвигу, и корунован был. И оттоль почала креститися литва y лядъскую вЂру або рымскую, и прыслал арцыбискуп бискупа до Вилни на Литовскую землю, и от тых часов почали костелы ставити по всеи земли Литовскои, Тое ж зимы королю будучы y Кракове со всими князи и бояры литовъскими. \л.254.\




О князи АндрЂи полоцком


Потом пак сталася новина: прыидеть князь АндрЂи полоцкии з воиском немецким и з ифлянты и со всею латыголою, и воевали и пожъгли много сел и мЂст, a городом литовским ничого не вчынили и вернулъся y свою землю. Тое ж опят зимы князь Светослав смоленскии учынить собЂ съем и раду c князем АнъдрЂем полоцким: князь Андреи y Литву, a Светославль к Оршы. И зъехавшыся много лиха хрестяном учынили, не по-хрестиянскии мучыли люди немилостиво, имаючи и запирали у-в ызбах и зажыгали, a иншых людеи под стену головами клали, ланъцуги великими хоромы подънимаючи, и з заду люди жъгли, a иных жонок и мужыков и малых дЂток на колье тыкали, a иных мук не могли выписати, которые муки хрестяном чынили. Таковых мук ни Анътиох сирскии Х a ни Ульян законопреступъник, и тые поганъцы таковых мук над хрестияны не Ц чинили, a городом не могли ничого учынити и вернулися опят y свою землю.




О князи Светославли смоленском


Тое ж опят зимы великого посту почал мыслити князь Светославль смоленскии з бояры, и поидуть ко Мстиславлю, и стануть под городом города добывати, a в землю Мстиславскуго пошлють воиско, и много кровопролитя сталося над хрестяны. И милостивыи бог не хотЂл того терпЂти, што братю свою, кров хрестиянскую не по-хрестянскии мучать.




О князи Скиргаиле и o князи великом Витовте, як пошли на князя Светославля смоленского


Тогды князь великии Скиргаило и князь великии Витовт прыехали \л.255.\ з Ляхов от брата своего, князя великого Якгеила, и услышали, што князь СвЂтославль Ч смоленскии был под Витебском, a потом к Оръшы прыходил, a под Мъстиславом стоечы, города добывал. И змовили князь Скиргаило a князь великии Витовт з братею своею, князем Костентином и Корыбутом, и c князем Семеном Лынкгъвеничом, и рекли так: «Боже вышнии, поможы нам над непрыятелъми нашими. Мы зла никому не вчынили, a он з нами в доконаню будучы и в твердои прысязе, и переступил свою прысягу, и нашу землю воюеть, и кров хрестиянскую проливаеть».



ТТ На поле: Волынь Витолтови и Литвы дано У Буквы лскою написаны над строкой Ф На поле: То се дЂяло по наро[жению] Христа 1377. Якгеило корол полскии. Бискуп Х Написано над строкой Ц Написано над строкой Ч Буквы вЂт переделаны из других букв



И поидуть братья на него, надЂючыся на бога и на свою справедливость, и поехали борздо ко Мъстиславлю. И князь Светославль, стоечы под Мстиславом добываючы города, и услышал тое, што идеть на него Скиргаило \158\ с князем великим Витовтом и з братею своею, и собравшы воиско свое, и поидеть против их. И як полки ступилися и начнуть битву, и бог створытель поможеть по пророка Давыдову слову: «Обратиться Ш болезнь его на главу его, и на верх его неправда его снидеть» Ш. И поможеть бог святыми словы князю великому Витовту и Скиргаилу и их брати поразити князя Светославля, и сам князь Светослав побежыть со всими князи и бояры смоленскими. И тут немалое учынилося диво, побито множество князеи и бояр, и самого князя Светославля убили, и сына его, князя Юря, зрубали Щ. И князь Скиргаило князя Юря от ран выгоил и прывез его к городу Смоленску к матеры его, княгини Светославовои, и посадить его на великом кнежени Смоленском. И сами пошли проч, князь великии Витовт c князем Скиргаилом, y свою землю Литовскую.

И почнеть Скиргаило кнежыти на Троцэх, a до Вилни прыслал в тот час король полскии старосту своего, лядъского пана Э. A князь великии Витовт тогды держал Луческ и всю землю Волынскую, a в Литовскои земли тогды мЂл отчызну свою. И стало Витовту велми смутно и жалость великая, иж перед тым y Литовскои земли дер\л.256.\жавцы чужого не бывало, и многим волостям литовским прыслухаючы ему. Тогды Витовт учынить собЂ раду з многими князи и бояры литовъскими. A Скиргаило тогды ехал к Полоцку, a князь Витовт поехал до Вилни, хотечы Вилню засести. A князя Витовта тогды не хотели пустити до Вилни, оли ж бы королю Якгеилу дали прысягу и Скиргаилу. И Витовт тогды не вземшы Вилни, и поидеть до Немец к мистру c кнегинею своею и c князи, и бояры своими, и з немецъкою силою почнеть оттуль воевати Литовскую землю. И вжо князь Витовт Литовское земли половину взял, по реку Велью, и Полтэск город подался ему. И взнал тое князь Скиргаило, иж не могуть против Витовту стояти и Литовское земли одержати.

И поидеть князь великии Витовт з немецкими силами до Вилни, и стрЂтить его князь Скиргаило з воиском на рецэ на Вели y городка. И ступилися воиска, и вдарылися, и поможеть бог князю великому Витовту, и побежыть воиско Скиргаилово, и побито их много. A иных жывых поимано и в нетство повели, князеи и бояр: князя Семена Евнутевича a князя ГлЂба Светославовича, князя Ивана Илвовича, и иных князеи много поимали. И поидеть князь великии Витовт к Вилни s воиском своим, и оступить город Вилню, и почнуть напервеи Крывого города добывати, и розбили пушками Крывыи город, и Скиргаилова брата Олкгирдовича убили Ю. A короля полского была застава лядская на Вышшом городЂ, и не пустили князя Витовта y город. И князь Витовт Крывыи город вземшы и землю Литовскую звоевавшы и опят вернулся в НЂмцы.




Князь Витовт кнежну свою отдал за вели\л.257.\кого князя московского Василя Дъмитровича


Того же лЂта до князя великого Витовта послы прышли от великого князя московского Василя Дъмитровича. И князь великии Витовт дал кнежну свою ЗофЂю Я за князя Василя Дъмитровича и отпустить ее з Марыина городка, a c нею послал князя Ивана Олкгимонтовича со Кгданска. И пошли c кнежною морем y кораблех, и прыехали к Пъскову. И пъсковичы им великую честь дали и провадили их до Великого Новогорода. Такеж и новогородъцы великую честь им давали, оли ж до Москвы. A князь Василеи послал против их братю свою: князя АндрЂя Володимеровича и иных князеи и бояр. И стрЂтили кнежну ЗофЂю з великою честю. Тогды был з ними свещэнъныи митрополит Кипрыян з многими владыками и архымандрыты, игумены, и со всими свещенъники. И стрЂтили ее честно со кресты перед Москвою, и был собор великии и венчанье, и было чести и весэля досыть, иж не можеть выписати.



Ш—Ш Написано полууставом Щ На поле: Русь побита от литвы Э На поле; Скиргапло до Вилни; старостою ляха дано Ю Далее пустое место на 12 — 14 букв Я Ha поле: Княжна ЗофЂя






О князи Витовте, як король польскии Якгеило прыслал до него, просечы его


Такеж князю Витовту, будучы в НЂмцох в мистра, в Марыином городку, прыслал к нему король полскии Якгеило, рекучы: «Брате милыи, больш того не кази земли Литовское и не пустошы отчызны свое и нашое, a поиди к нам y еднане и y великую братскую прыязнь, возми собЂ великое кнежене Вилню и сядь на столцы дядка своего, великого князя Олкгирда, и великого князя Кестутя, отца своего». И князь великии Витовт слышавшы тое, и вчынить собЂ раду c князьми своими и паны литовскими, c князем Юрем Нарымунтовичом БЂльским и c князем \159\ Иваном Олькгимонтовичом, и c тыми ся порадил, и поидеть y Литву и сядеть на великом кнежени Литовъском y Вилни А. И были \л.258.\ рады вся земля Литовская и Руская. A князт. Корыбут Олькгирдович новгородскии Б почнеть на то радити и в непослушенстве быти y князя великого Витовта, и почнеть воиско свое збирати. И ступилися воиска на мЂсте на Докудове, и сталася им битва, и побежыть воиско Корыбутово, и побито их много, и сам Корыбут убежыть y Новгородок СЂверскии В, и ту была княгиня и дЂти его. И князь великии Витовт, собравшы воиско, и оступить Новгородок, и взяли его, а Г князя Корыбута и княгиню, и дЂти его в нятство взяли Д. A потом княгиня Олкгирдовая умерла, и король польскии прыслал Витебъска держати соколъничого Е своего Федора Весну. A князь Швитрыгаило тогды еще молод, и будеть Федор Весна деръжати Витебск c прыказаня короля Якгеила Ж. И Швитрыгаило не мог терпЂти, што Федор Весна держыть Витебск не з его послушенства, и князь Швитрыгаило город Витебск засЂли Федора Весну убил. Тогды было королю Якгеилу o том жалость великая, и писал до брата своего Витовта, иж бы он тое помстил. И князь Витовт узял з собою Скиргаила и собрал воиско великое литовское, и поидеть к городу к Витебску на князя Швитрыгаила. И напервеи Витовт пошол ко Друцку, и друцкие князи стрЂтили Витовта з великою честю, и вдарыли ему чолом, и почали служыти. A оттоле князь великии Витовт прыидеть к Оршы; оръшане y городе затворылися два дни, a потом город узяли. И оттоле Витовт прыступил к городу Витебску, и князь Швинтрыгаило y городе затворылся, и почал Витовт города Витебска добывати. И тут же прышол к Витовту Светославич ЖЖ смоленскии, и вдарыть чолом князю Витовту. И почали твердо добывати города, и витблене не могли терпЂти и далися Витовту. И князь Швитрыгаило выидеть вон з города и вдарыть чолом князю великому Витовту. И князь Витовт вземшы город Витебъск и осадитъ, a сам поидеть до Вилни З.




Як князь Витовт пошол к Подолю и Подолье взял \л.259.\


Тое ж опят весны поидеть князь Витовт к Подолю, a князь Володимер Олькгирдович тогды был y Киеве и деръжал Киев И и не хотЂл покорытися князю великому Витовту. И князь великии Витовт, пошодшы, и взял город Жытомир. И прыидеть к нему князь Володимер, и князь Витовт Киев от него отнял и дал ему Копыль держати К, и на Киеве посадил Скиргаила. И сам Витовт поидеть на Подолскую землю, a Скиргаилу велел князь Витовт к Черкасом поити и к Звинегороду. И князь Скиргаило c помочю божю и князя Витовътовым прыказаньем взял Черкасы и Звинигород и вернулъся до Киева. И будучы князю Скиргаилу в Киеве, был нЂхто y Киеве Фома чернец Изуф, держал намЂстницство от митрополита y святое СофЂи. Тогды князь Скиргаило усхочеть поехати в ловы за Днепр, и тот Фома почнеть просити князя Скиргаила на митрополии двор на честь, и князь Скиргаило до него заехал. И тот Фома дал князю Скиргаилу зЂлье отравное пити, и князь Скиръгаило того не вЂдаючы. И c того пиру поехал y ловы за Днепр к Милославовичом, и там y ловех розболЂлося на канон крещеня, y четверг, и на тых мЂст до Киева прыехал немоцон, и болел сем ден, и вмер y середу Л. И кияне вси понесли его на головах, свещенницы пЂли отходные пЂсни, со свещами, з города c Киева до святое Богородицы Печерское, и положон ест князь Скиргаило чудныи и добрыи подле гроба святого Феодося Печерскаго. И князь великии Витовт послал князя Ивана Олкгимонтовича на Киев, a князя ГлЂба Светославовича отпустил к Смоленску М, a князю Юръю Светославовичу Жаславль дасть. И князь ГлЂб Светославович седечы на Смоленску и будеть непослушон князя великого Витовта, и князь Витовт послал к нему послы o справу, и он ся того не справил. И князь великии Витовт со всими силами поидеть к Смоленску на князя ГлЂба Светославовича, и як прыидеть к Смоленску, так ГлЂб подастся ему з городом Смоленским Н, и князь Витовт дасть Смоленск князю Василью Борысовичу, a князю ГлЂбу дасть \л.260.\ город Полоныи, a сам поидеть y Литву. Тое ж зимы князь великии Витовт пошлеть князя Семена Лынкговича з многим воиском смоленским на князя Ольга резанского, и они, ехавшы, много спустошили земли Резанское, и опят вернулися y свое князство Литовское. A тогды зима была велми люта.



А На поле: Витовт на князстве Ли[товском] Б Написано над строкой В Написано над строкой, буквы ве нечетко; на поле c выносным знаком еще раз СЂверскии Г Написано по букве к Д и переделано из ъ Е чо переделано из других букв Ж На поле: Швитригаило ЖЖ B Арх. Юри Светославич З На поле: Витовт Витебск взял И Написано иад строкой К На поле: Витовт Киев взял y Володимера Олкгирдовича; Скиргаило Л На поле: Скиргаило. Скиргаило отрут М На поле: Иван, ГлЂб Н На поле: Смоленск Витолт взял



Тое ж зимы на весну прыехал до князя великого Витовта князь великии московскии \160\ Василеи Дмитрэевич до Смоленска y великии пост. И учествовал его князь великии Витовт, и многие коштовные дары подавал ему: ланцуги золотые, поесы золотые, соболи, дорогими кубъками золотыми и бахматы. И даровавшы его розмаитыми дарми и многоцэнным коштом О в золотых седлех и в зброях, и отпустил его к Москве з великою честью, a сам поехал до Литвы.




О Подольскои земли


Коли Витовт пошол y поле з литовъским воиском и побил татар и князеи татарских на имя Хачея a Колобута П, a Дмитрея. A тые тры браты татаръские, отчычы и дЂдичы Подольское земли, и завЂдали от них отаманы a прыеждчаючы дани в них бирали у-в отаманов c Подольское земли Р. A князь Корят, брат князя Олькгирдов, держал Новгородок Литовскии, a в того Корята чотыры сыны были: князь Юри a князь Александро, a князь Костентин, a князь Федор. И тые княжата Коръятовичы князя Витовтовою помочю и волею пошли y Подольскую землю. A тогды y Подолскои земли не было еще ни одного города мурованого a ни деревяного. Тогды тые княжата Корятовичы, пришедшы y Подольскую землю, вошли y прыязнь з отаманы и почали боронити их от татар и дани татаром не почали давати. Непервэи нашли собЂ тверъжыцу на рецэ на Смотричы, \л.261.\ и тут собЂ город Смотрыч удЂлали, a в другом местцы на Смотрычы ж город Бокут поставили. A потом, ловечы y ловех, и прыгодилося им стадо оленеи наехати на том мЂсте, гдЂ тепер Каменецкое мЂсто лежыть. И тые княжата розселилися на том мЂстцу и город змуровали Каменец, a c того вси городы Подольские помуровали и оселилися тые Корятовичы. A потом один брат их отехал до вгорского кроля, князь Костентин, и там умер, a князя Юря волохове убили, a князя Александра татарове убили. И як тых трех братов не стало, ино их четвертыи брат y Литве держал Новгородок, князь Федор, и к тому еще держал Гомеи. И пошодшы з литовским воиском засядеть Подольскую землю к Литве С.




О князи Витовте, коли засел на великом княжени Литовском


Такеж коли князь великии Витовт осЂл на всеи земли, на великом княжени Литовском Т. И князь Федор Коръятович не хотЂл был служыти князю Витовту со всею землею Подольскою, и князь Витовт пошол со всею землею Литовскою к Подолью. И князь Федор Коръятович услышал тое и побежыть к угром, a городы осадить волохи, и вгоръскии дасть ему помоч на Витовта У. A князь Витовт церво пошол до Браславля и Браславль взял, a потом прышол до Каменца Подольского и на другии день Каменец взял, потом Смотрыч и Бокут УУ вынял, и Черленыи городок, и вси городы побрал, и воеводу князя Федорового поимал, и по всим городом подольским свои старосты посадил.




О польском короли Якгеиле, як просил Подолья


Потом пак король польскии Якгеило почал просити брата своего, князя Витовта рекучы: «Брате милыи, дал тобЂ бог великую честь, добыл еси земли Подольское литовскими \л.262.\ сидами, a c чужых сторон нихто тобЂ не помогал, учыни тэж ты мнЂ честь, даи ми половицу земли Подольское y пЂнезях». И князь великии Витовт дасть королю y двадцати тисечеи копах грошеи Каменец город, a к тому Скалу, Смотрыч и Черленыи городок, a в ыншых городех подольских свои старосты посадил: на Браславли a на Сокольцы, и на ВЂницы. A король тые городы в тых пенязях дасть пану Ф князях Спытку Ф держати. Коли пак князь великии Витовт бился c татары, тогды пана Спытка татарове убили Х, a пани Спытковая вдовою зостала, a дЂтки малы были. И король опят почал прысылати до великого князя Витовта, што «еси дал нам половину земли Подольское, и мы тые городы дали пану Спытку y двадцати тисечеи копах грошеи. A так тепер пани Спытковая вдовою зостала a дЂтки малы, a от татар земли никому боронити. Отдаи моих двадцать тисеч коп грошеи, a городы свое к собЂ возми». И князь великии Витовт послал королю двадцать тисеч коп грошеи паном Немиром a Дмитром Васильевичом, лоским ХХ боярыном, a городы свое побрал за себе, и старосты свое на тых городех посадил, дворанина своего на имя Гроновского Ц. A потом дал Подолье пану Петру Монткгирдовичу, а по пану Петру дал Дэдикголду Ч,



О Далее чистое место на 10 букв П т переделано из другой буквы Р Ha поле: Подоле было татарское С На поле: Подолье к Литве Т На поле: Витовт княжыл на князстве Литовском У На поле: Витовт Подоле взял от князя Федора УУ Так в рукописи; в Рум. Скалу Ф—Ф Так в рукописи Х На поле: Спытко ХХ Так в рукописи; в C луцким Ц На поле: Гроновскии Ч э переделано из другой буквы; на поле: Дэдикголт



и потом дал пану \161\ Дэдикголъту Смоленск, a Подолье Довкгирду Ш. И пан Довкгирд держал тые городы до смерти великого князя Витовта. A коли Витовта y жывотЂ не стало и, прыехавшы, ляхове пана Довкгирда c Каменца созвали к собЂ y раду, и до рады его не допустили, и забили, a Каменец засЂли и иншые городы подольские. И до сих часов тым Подолье за ляхи зашло, и тепер деръжать Щ.




О князи Витовте, як пошол воевати Мир-Тиклуя


Того же лЂта князь Э великии Витовт пошлеть Промчыслава и князя ГлЂба Светославовича на Тимир-Тиклуя, a сам князь великии Витовт со всим воиском за ним поидеть Э. A цар Тактомыш \л.263.\ со всим людом поидеть Витовту на помоч. Литва, нЂмцы и ляхове, и татарове, и c ним было князеи пятдесят, и была сила ратных вельми великая. И пошли на цара Тимир-Тиклуя татарского. И похвалился на орду Витовт рекл: «Подемо пустошечи землю Татарскую и забиимо цара ТимиръТиклуя, и осадим царя Токтомыша на царстве его, a Тактамыш мене посадить на всеи земли Рускои». И мовившы то и пошли татар воевати. A в том часе поспЂеть Тимир-Тиклуи цар з многими силами татарскими, и стрЂтилися c князем Витовтом на поли на рецэ на ВорсклЂ, и была им битва великая лЂта 6907, месяца августа дванадцатого дня. И долго вельми билися, и побили татарове Ю Витовтово воиско. И князь великии Витовт побежыть y малои дружыне. И цар ТимирТиклуи поидеть под Киев, и стоял под Киевом тры дни Я, и кияне дали за себе окуп, тры тисечы рублев литовских. И Тимир-Тиклуи татарскую орду роспустил по Великому князству Литовскому воевати оли ж до Великаго Луцка, и много лиха учынили великои земли Литовскои, и опят пошли y свою землю. A которых побито князеи литовских имена: князь АндрЂи Олькгирдович полоцкии a брат его князь Дъмитреи браньскии, князь Иван Дъмитреевич, князь Андреи, пасынок его, князь Иван Борысович киевскии, князь ГлЂб Светославович смоленскии, князь ГлЂб Корятович a брат его князь Семен, князь Михаило Подъберезскии a брат его князь Дъмитреи, князь Федор ПатрыкЂевич БЂльскии, a пан Спытко краковскии.

Того же году князь Юреи Светославович a князь Ольг резанскии прышли к Смоленску, и была в тот час замятня великая: инъшые хотели взяти господарем Витовта, a другие хотЂли взяти князя Юря, отчыча. Тогды Юреи змовилъся з смолняны, и смолняне не могли терпети великое налоги из ляхов, прыняли собЂ отчыча, князя Юря, и город ему отворыли А, и князь Роман бранскии в тот час был тут. Тогды велЂл был Витовт того Романа убити, и намЂстника своего послал к Смоленску, и они намЂстника Витовтова поимали, a бояр смоленских и друцких, которые не хотели мЂти отчыча, \л.264.\ князя Юря, тых всих постинали в лЂто 6909. И князь великии Витовт тое ж осени прыходил к Смоленску на князя Юря и стоял много под Смоленском, и не взял города, пошол опят y свою землю, вземшы перемире. A в тот час была y Смоленску великая замятня, и много людеи посекли, которые Б спрыяли Витолту Б, и мор был великии на люди. Того же году воевали татарове около Киева В, и манастыр Печеръскии собрали и выжгли месяца июня. Того же году в НовегородЂ был мор силен велми и на Москве, и в Лавзе Г, и в Порхове, и во Пъскове, и в Торжку, и в Тверы, и в Дъмитрове, и по всим руским волостям Д.

Того же году на БлаговЂщэне y понедЂлок на страстнои недЂли было знамя великое: яко бы у-в обед веремя звЂзды ся явили, як бы в ночы, и солнъцэ потемнЂло, и страх был великии на земли Рускои. Того же лЂта Москва згорЂла и Смоленск. A князь великии Витовт собрал вси владыки Литовское земли: полоцкого, черниговъского, туровского, луцкого, володимеръского, и тыми владыками поставил y Великом князстве Литовском митрополита на имя Грыгоря з Болгарское земли Е.




О князи Дашку Федоровичу, коли Кремянец взял



B лЂто 6926 [1418]. Князь Дашко ФедоровичЖ взял Кремянец y великии четверг. И князь великии Витовт сам не ехал ЖЖ, a пошлеть наперед себе двух панов своих, Дъмитрея a Данилья, рекучы: «Передаитеся ему служыти, a коли я прыеду к городу, и вы узвод отпустите на мост». И они от Витовта прыехали, и звЂрылися им, и воевода их любовно прынял, a того нихто не знал a ни вЂрыли, \162\ што они прыехали города добывати и засЂсти.



Ш На поле: Довкгирд Щ На поле: Ляхове Подолье взяли Э—Э B H прииде князь Витовът к Смоленьску, a преже промче слова, рекше: «На Темирь-Кутлуя ида». И выеха к нему князь ГлЂб Святославичь не в мнозЂ Ю Ha поле: Татары Я Ha поле: Тимир-Тиклуи Витовтово воиско поразил


А Ha поле: Князь Юря Б—Б Приписано na поле и над строкой В На поле: Татары Г Так в рукописи; в K ЛадозЂ Д Bmopoe o переделано из и Е На поле; Митрополит напервЂ Ж На поле: Дашко ЖЖ B K наехал



И Дашко тогды в ночы прыехал, a з ним только десеть чоловЂков \л.265.\ люду зброиного. И на тых мЂст узвод отсекли и на мосту его положыли, и въехавшы Дашко c товарышы своими, Кондрата воеводу вбили, и жолнеров королевских побили, и князя Швитрыгаила выпустили з желез, бо седЂл на Кременцу деветь лЂт. И оттоле Швитрыгаило, собравшыся, c прыказанем Витовтовым, шедъшы, Угорскую землю спустошыл и городов много побрал, и Луческ Великии взял и [у] З волынских князеи и [у] З бояр пятьсот конеи взял и до Витовта прывел.

B лЂто 6912 [1404]. Прыходил князь Витовт, a c ним князь Семен, князь Швитрыгаило со всею силою своею к Смоленску, и стояли под городом тры месецы, и пошли проч y свою землю не взявшы города Смоленска.

B лЂто 6912, a от божого нароженя 1404 ЗЗ году. Князь великии Витовт c Корыбутом a з Лукгвенем, и з Швитрыгаилом Олькгирдовичы, и со всею силою прыиде к Смоленску, и князь Юреи затворылся в городе со всими смолняны, и князь великии Витовт стоял всю весну, a города не взял, a волостям много зла вчынившы и пошол y свою землю. A потом князь Юреи Светославович смоленскии поехал ко князю Василью московскому не в мнозе дружыне, a княгиню свою и бояр зоставил в городе и прыказал им себе ждати на тры роки, a сам, прыехавшы на Москву, просил князя великого Василья, абы ему помоч дал, и князь Василеи обецался ему на помоч людеи своих послати, и самого князя Юря задеръжал в себе на тые роки, норовечы тестю своему великому князю Витовту. И коли он был на Москве, в тот час Витовт, собравшы силу многую, и прыиде к Смоленску, и смолняне князя Юря не дождавшы на роки, и не могучы терпети от голоду, город Смоленск подали Витовту. Тогды было последнее взятье Смоленску от Витовта в Петров пост; двадцать шостого дня \л.266.\ июня в четверг взял Витовт город Смоленско и все Смоленское княщене И, и оставил y Смоленску свои намЂстники, и ляхом дал держати.

B лЂто 6936 [1428]. Ходил князь великии Витовт к Новугороду Великому со всим воиском, и много зла вчынил, a города не взявшы и опят пошол до Литвы.



З Добавлено редакцией ЗЗ Цифры написаны буквами славянского алфавита; над ними другим почерком и другими чернилами цифры арабские И На поле: Витовт взял Смоленско






Похвала o великом князи Витовте


Князь великии Витовт держал князство Литовское и Руское и иные многие земли. И будучы ему y Веяиком Луцку и хотЂл был на себе коруну взложыти, ино непрыятели его поляки того ему не допустили, коруны узложыти. B тот час Витовт прызвал к себЂ короля польского Якгеила и цэсара рымского, и великого князя Василья московского, зятя своего, и короля угеръского c королевою, и князь великии тверскии Борыс Александрович был, и мистр прускии и ифлянтскии. A от иншых земль послы великие были: от Ивана царигородского послы прыходили, от великого князя рэзанского послы прыходили, a Одоевские князи сами были, от Великого Новагорода и от Пъскова послы прыходили, и от ордынских цареи и [от] волохов от воеводы послы прыходили. И мешкали вси тые гости y великого князя Витовта сем недЂль, a оброку им выходило на страву на кождыи день по пятисот бочок меду, по пятисот яловиц, по пятисот баранов, по пятисот вепров, по сту зубров, а по сту лосеи, a иных рЂчеи и чысла не было. Тогды цэсар рымскии з Витовтом y великои милости были. И там y Луцку Витовт тые гости честовал и даровал розмаитыми дарми коштовными. И от того ся была утвердила великая милость межы ними, иж не можеть и выписати, o чести и o дарех того великого господара славного Витовта. И которые земли на востоцэ або на западе, вси прыходечы кланялися великому князю Витовту. И цар турецкии давал ему честь великую и дары \л.267.\ многоцэнные часто прысылывал к силному господару Витовту, и другии цар, царогородскии, и тот з ним y великои ласцэ был. И ту тэж Ческое королевство и Вгорское, и Польское великую честь держали над славным господарем Витовтом, и король дунскии великую славу и дары давал славному господару великому князю Витовту и брату его великому королю Якгеилу, деръжечы ему столец Польского королевства. Коли славныи господар Витовт на которую землю гнЂв мЂл и которую землю хотЂл казнити, корол полскии Якгеило завжды ему помоч давал. И цары татарские служыли ему, и сами своими головами на помоч ему ходили и слухали его. Также и князь великии московскии y великои милости был з ним, и княжата немецкие слухали его и помоч давали на битву, гдЂ ему была потреба. И еще господар земли Малъдавское и воевода \163\ волоскии были его послушны во всем. И князь великии резанскии и князи Одоевъские y великом послушенстве были, и Великии Новгород, и великии Пъсков вси были послушны великого князя Витовта. Цары и князи y великои ласцэ з ним были, a иные служыли ему и честь великую, и дары многие прыносили ему не толко по вси лЂта, але на кождыи день. И был князь великии Витовт силныи господар и славен по всим землям, и много цареи и князеи служыли y двору его. A иншые, прыеждчаючы, кланялися ему, просечы собе в него цара на царство Ордынское. Он напервеи дал им цара до орды Солтана. И тот Солътан седЂл на царстве, и николи не смЂл противитися силному господару, и оставившы царство и ехал на иншое мЂстцо царствовати. И князи ордынские послы свои посылали до славного господара, просечы собЂ иного цара. И он им дал иного цара, малого Солтана. И тот малыи Солтан будучы на царстве, не смЂл ослухатися славного господара, гдЂ коли велел ему кочевати, он там кочевал. И по малом часе тот цар князем ордынским не люб был, и они иншого цара собЂ просили y славного господара Витовта, и он им дал царем Давлед-Бердея. И тот Давлед-Бердеи на царстве вмер, a князь великии Витовт в тот час был y Киеве. И прышли к нему князи ордынские, послы, до Киева з многими дарми и просили собЂ иного цара, и он им дал цара Махмета. И мешкавшы князь великии \л.268.\ Витовт в Киеве, и оттоль опят поехал до Великого, Луцка и там ся розболел князь великии Витовт, и ростустил князеи своих и бояр з великою честью. A король польскии Якгеило в тот час был c князем Витовтом y Луцку.

B лЂто 6938 [1430], a от божого нароженя 1430. Умер князь Великии Витовт y Луцку месяца октябра 23 дня на день святого Якова брата господня по плоти. A пановал на Великом князстве Литовском и Руском трыдцать сем год. Того же году по смерти князя великого Витовта прыехавшы ляхове пана Довкгирда c Каменца Подольского позвали к собЂ на раду и, не допускаючы его до рады, убили, и Каменец засЂли, и все Подоле забрали, што и тепер деръжать. Того же году сЂл на Великом князстве Литовском князь великии Швитрыгаило Олькгирдович, и пановал толко два годы и месец, и пошол к Полоцку княжыти.




О Жикгимонте, як Литву деръжал


Литва взяли собЂ князем великим литовским великого князя Жыкгимонта Кестутьевича, брата рожоного Витовтового, и посадили его на Вилни и на Троцэх в лЂто 6941 [1433], месяца сентябра 1 дня. A Швитрыгаило в тот час был y Полоцку и пошол на Смоленск, и князи руские, и бояре, и вся земля посадили Швитрыгаила на Великом князстве Руском. Тое ж осени князь Швитрыгаило собрал силу великую, и князь великии тверскии Борыс Алексанъдрович дал ему на помоч брата своего, князя Ерослава, со всею силою своею. И пошол князь Швитрыгаило на Литву, и не дошедшы Вилни за шесть миль стояли под Ошменою недЂлю. И князь великии Жыкгимонт прышол з литовскою силою, и была им битва на Ошмене декабра осмогонадцать ИИ дня, и помог бог великому князю Жыкгимонту, и побили их, a иных поимали, князя Юря Лынъкгвеневича убили, a князя Юря К Семеновича \л.269.\ поимали, Федка Одинцэвича, a пана Дидикголда поимали, и иных великое множество людеи побили и поимали.



ИИ B K, Рум. 8 декабря, в Е 18 декабря К B K Василя






О князи Швитрыгаиле, як воевал Литву


Тое ж зимы другии раз князь Швитрыгаило собрал силу великую рускую и пошол на Литву, и повоевали Литовское земли великое множество, и побили, a иных в полон повели. Того же лЂта князь Швитрыгаило, собравшы великую силу рускую и мистра ифлянтского со всими ифлянты поднял собЂ на помоч, и князь великии тверскии дал ему силу свою на помоч, и пошли моцно в Литовскую землю. И ночевал за полъторы мили от Вилни в Рудомине и, минувшы Вилню, пошли на Старые Троки, и стоял под Старыми Троками чотыры дни, и не добывшы пошол проч искати князя великого Жыкгимонта и воиска литовского. И стоял y Эишышках чотыры дни, и пошол проч опят y свою землю. И напервеи прышол до Крева и стоял два дни, и добыл города мурованого Крева, и выжог огнем, и людеи много посекли и в полон повели. И оттоль пошол на Молодечно. И прышла до него вЂсть, што литва идеть y погоню, и князь великии Швитрыгаило послал на литву князя Михаила, воеводу киевского, и иных князеи много руских, и побили пана Петра Монкгирдовича гэтмана и всю литву, a иных жывых поимали. И оттоль пошол Швитрыгаило к Жеславлю, и за один день Жеславль взяли, и мЂсто выжгли, a людеи много в полон повели, и много лиха подЂлали \164\ Великому князству Литовскому, и пошли y свою землю Рускую. И прышол к Борысову, и там поимали князя Михаила Ивановича Полочанского КК на рецэ Березыни и послали его к Витебъску, и там велели его втопити, a поимали его невинного человека. A потом мистр ифлянтскии пошол y свою землю, a князь Швитрыгаило великии к Лукомлю пошол. И там воиско свое роспустил, князеи и бояр, a сам за ся пошол до Киева. На тую же осень князь великии Жыкгимонт, собравшы силу великую, литву и ляхи, и пошол на Рускую землю, и стал подо Мстиславлем месеца \л.270.\ сентябра шостогонадцать дня, и стоял под городом чотыры недЂли, и города не взявшы опят вернулся y свою землю.




О князи Швитрыгаиле


На лЂто Швитрыгаило, собравшыся c князи рускими и з бояры, и со всею силою рускою, и пошол на Литву. И мистр ифлянтскии и c кунторы своими прышол к Швитрыгаилу на помоч, и знялися из Швитрыгаилом y Врасловля. И в тот час мокрость великая от дождчу нашла на землю, и затым не могли ехати до земли Литовское, и Швитрыгаило пошол y свою землю, и роспустил воиско y Полоцку, a сам поехал до Киева. На третее лЂто князь Швитрыгаило зъжог митрополита y Витебску на имя Гарасима, и потом собралъся со всею силою своею y Витебъску c князи и бояры рускими, и пошол к Браславлю по Завельскои стороне. И тут прыспЂл к нему мистр лифлянтскии со всими силами своими, и пошли от Враславля к Вилькомирю. И князь великии Жыкгимонт послал напротивко их сына своего, князя Михаила, и со всими силами своими литовскими и з ляхи, бо король польскии послал ему на помоч осм тисечеи людеи конъных. И поткал князь Михаило з воиском своим Швитрыгаила месяца генвара Л первого дня за Вилькомиръю на рецэ, и была межы их битва великая. И помог бог Жыкгимонту и сыну его Михаилу, и побили Швитрыгаила и всю силу его наголову, и много князеи побили, a иных жывых поимали. Убили тогды братанича Корыбутова Жыдимина a князя Ерослава Лынкгвеневича, князя Михаила Семеновича, князя Михаила вяземского Илвовича, и ифлянтского мистра самого, и маршалъка его, и много кунторов, и всих ифлянтов побили, a иных поимали, межы которыми было много ракушан и словаков М, и чехов; a жывых поимали князеи двух y головах, князя Ивана Володимеровича киевъского a брата князя Федора Корбутовича, и иных Н много жывых поимали яко руси, так и нЂмцов. \л.271.\




О князи Михаиле, Жыкгимонтове сыне


После того побоища на третеи недЂли князь великии Жыкгимонт собрал свою силу литовскую и послал сына своего, князя Михаила, на Русь. И прышедшы князь Михаило стоял под Витебъском шесть недель, и не взявшы города проч пошол. После того тое ж зимы князь великии Жыкгимонт собрал усю силу литовскую и панов послал под Полътеск. И прышедшы воиско стояло под Полоцком недЂлю, и не добывшы города пошли проч. На другое лЂто полочане и видьблене, не слышечы собЂ ни от кого помочы, подалися князю великому Жыкгимонту, и почал пановати князь великии Жыкгимонт на князстве Литовском и Руском О.

B лЂто 6946 [1438] П. Был голод великии, по селам и по городом звЂры людеи едали, a в городе y Смоленску по мЂсту и по улицам собаки людеи едали, головы, руки и ноги человечые псы по улицам волочывали, люди людеи едали, матки дЂток своих ели от великого голоду, a в пост y великии мясо едали по селом и по волостям, a в тот час четверть жыта была по тры копы грошеи. И много лиха того году вчынилося по всеи земли Литовскои и Рускои, и много кровопролитья сталося, брат брата своего рожоного убивал, и мор был велми великии на люд, иж o таковом страху люди старые не могуть паметати.



КК В К Голшанского Л Так в рукописи; в E сентября М Первое o переделано из другой буквы Н Написано над строкой О На поле: Полоцк и Витебск поддалися великому князю лит[овскому] П Так еще в К, Рум.; в E 6942-го







О князи великом Жыкгимонте, як его зарезали


B лЂто 6948, a от божого нароженя 1440. Князя великого Жыкгимонта Кестутьевича y Tpoцэх зарЂзали y вербъную недЂлю перед обЂдом один з дому князеи Чорторыских, але з волею всих панов и князеи литовских, a пановал на Литовском панстве сем год \л.272.\ и шесть месецэи; то от Витовтовы смерти до Жыкгимонтовы смерти десеть лЂт. И была в тот час замятня великая y земли \165\ Литовскои. А Смоленск на тот час держал пан АнъдрЂи Сакович от Жыкгимонта Кестутьевича, и почал смольнян прыводити ку прысязе, мовечы: «Коли кого князем литовским посадять на Великом князстве, вам от Литовскои земли не отступати, a великого князя литовского вам собЂ за господара мЂти, a мене вам быти послушным до того часу, поки князь великии на Литве сядеть на Вилни и на Троцэх». И владыка смоленскии, князи и бояре, и чорные люди на том прысягнули, што им пана Андрея держать y себе воеводою почестно на Смоленску. То пак по Велицэ дни на святои недели в середу здумали чорные люди смольняне, и раду собЂ учынили, реместники промежку себе, то ест ковали, кожемяки, шэвцы, месники, котелники пана Анъдрея сослати силою з города, a прысягу свою зменити. И нарЂдилися ПП y зброи, з влочнями, з луки, c косами, c топорами, и зазвонили y звон ратныи. И пан Анъдреи почал ся радити з бояры смоленскими, со всим двором своим, и нашол Р на них з древъцы на конех, и была им битва в городе на день святого Борыса и ГлЂба, и побили много чорных людеи, и побогли чорные люди от пана АндрЂя. И тои ночы пая АндрЂи з города выехал з жоною, и бояре c ним смоленские были. И после того замятня была великая y Смоленску, и поимали смольняне маршалъка смоленского Петрыку и втопили его y Днепр, и цосадили собЂ воеводою y Смоленску князя АндрЂя Дорогобужского.




О раде панов литовских, як собЂ господара взяли на Великое князство Литовское


B лЂто 6948, a от божого нароженя 1440. Князи и панове и вся земля Литовская, дорадившыся, и взяли собЂ князем великим Казимера Якгеиловича, сына королевского, з Ляхов, и посадили почстиве на столечных городех, на Вилни и на Троцэх, и на всеи \л.273.\ земли Литовскои и Рускои. И в тот час прышол князь Юрыи Лынкгвеневич з Новогорода y Литву, и князь великии Казимер дал ему отчызну его, Мстиславль. И бояре смоленские прыехали к Смоленску з Литвы, и чорные люди смольняне не пустили их в город, и бояре розехалися по своим селам. И затым была битва великая бояром c чорными людми, и заперлися чорные люди на городе, и взяли собе господарем князя Юря Лынкгвеневича, и князь Юрыи поимал бояр смоленских и пооковал их, a имЂня их подавал своим бояром.

B лЂто божого нароженя 1432. Умер в Польщы король Якгеило РР.

ЛЂта божого нароженя 1434. Обрали поляцы на королевство Польское сына его Владислава, которыи же Владислав был королем польским и угерским и фортунъне c турками вальчыл, многокроть их побивал, a потом сам з воиском польским и угэрским под Варною от турков поражон и забит, лЂта божого нароженя 1444 С.

По смерти короля Владислава, забитого под Варною, y тры лЂта, то ест лета божого нароженя 1447, взяли на королевство Польское поляцы князя великого литовского Казимера Якгеиловича и коруновали его в недЂлю на завтреи по святом Яне Крестителю в Кракове. И был Казимер королем польским и великим инязем литовским, руским и жомоитским Т.



ПП Ђ переделано из другой буквы Р Так в рукописи; в K пошол РР Король Ягайло умер в 1434 г. С На поле: Смерть Владислава Якгеиловича Т На поле: Казимер Якгеилович, корол полскии, великии князь литовскии У Буквы лит переделаны из других букв



Тое же осени на запусты Филиповы прышло воиско литовское У к Смоленску, и стояли под Смоленском полътрети недЂли, мЂсто и цэркви выжгли и город взяли, людеи великое множество выстинали, и манастыры выжгли, и много лиха Смоленскои земли вчынили. A князь Юрыи еще перед прыходом их к Смоленску, побоявшыся, зъехал на Москву. Того же году зима была велми люта и метелицы безпрестани з морозом завжды была, и много людеи з стюдени померло по селам и по городом, бо велми великая стюдень, a снег был велми велик, иж за многие лЂта не было снЂгу так великого и зимы так велми лютое. \л.274.\ A вода тое весны была велми велика y Смоленску, усе мЂсто понела была, мало штось не дошла вода была до Покровское торы.




О московском побоищы


Того же лЂта князь великии Казимер не мирен был c князем великим московским. И прышодшы москвичы c татары казанскими звоевали Вяземскую землю. Тое ж пак зимы князь великий Казимер, сам будучы y Смоленску, послал воевод своих, князеи и панов литовских, против тото воевати Московское земли, извоевали Козелеск, Верею, Калугу, Можаиско, и много лиха вчынили Московъскои земли, и много людеи y полон повели y Литовскую землю. И москвичы, \166\ собравшыся за деветь днеи, погналися за литвою, и, догонившы, билися з литвою. И помог бог литве, иж побили много москвич литва, и много жывых поимали и прывели их к Смоленску ко князю великому Казимеру, и вчынили тогды князи и панове великую честь князю великому Казимеру королевичу.

A московского князя великого не было в тот час на Московскои земли, ходил к Муромлю битися c царем Махметем и з сыном его Монтяком. И там тэж побили москвич наголову, и самого князя Василя московского и можаиского князя Ивана поимали, и иных князеи и бояр много побили, a иных жывых поимали. A была им битва на Суздали y манастыра святого Спаса. И была тогды Москва y великом страху. A потом цар Махмет и сын его Монтяк дали князя великого московского на окуп, и взяли за него великое множество рублев и соболеи, и мир з Москвою в тот час взяли. Того же году князь великии Казимер з московским перемире взял и прысягу промежку себе вчынили, иж покою межы их землями быти. И будучы Казимеру Якгеиловичу королем польским и великим князем литовским и руским, и жомоитским, и пануючы ему фортунливе на тых панствах, и мЂл в себе шести сынов на имя Владислава, Казимера, Ольбрахта, Александра, Жыкгимонта a Фрыдэрыка. \л.275.\ Владислав, сын короля Казимеров старшыи, зостал напервеи королем ческим, a потом был королем угерским и ческим.

B лЂто божого нароженя 1482. На уведене пресвятое Богородицы взяли татарове Киев и воеводу киевского пана Ивана Ходкевича и c панею, и з сыном паном Александром взяли, и пусто вчынившы, замок сожъгли, и сами пошли проч.

ЛЂта божого нароженя 1492, июня семого дня. Умер король польскии и великии князь литовскии Казимер Якгеилович y Городне, пановавшы фортунне на королевъстве Польском лЂт 45, a на великом кнежэньи Литовском лЂт 52, бо был первеи на князство Литовское взят, ниж на королевство Польское семма годы.

Того же року 1492. Взяли собЂ поляцы на королевство Польское сына короля Казимерового Яна Ольбрахта, которого потом волохове з воиском его лядзъким поразили на Буковине лЂта божого нароженя 1497 таким способом, иж и волоскии воевода узял c королем Ольбрахтом мир, и кгды король Олбрахт воиско свое роспустил и сам безпечне ку Коруне шол, волохове его воиско зрадне поразили, иж самого хорого ледве до Польски отпровадили. A князь великии литовскии Александро Казимерович з литвою на тот час под Браславлем был, бо также королю Альбрахту на помоч шол. Того же року божого нароженя 1492. Александра, сына короля Казимерового, Литва на князство Литовское господарем собЂ взяли. A четвертыи сын короля Казимера, Казимер, первеи отца своего, короля Казимера, y Вилни умер лЂта божого нароженя 1483 и похован ест y Вилни в костеле святого Станислава Ф. \л.276.\ Пятыи сын короля Казимеров, Жыкгимонт, остал княжатем опавским и кглокговским лЂта божого нароженя 1500. A шостыи сын короля Казимеров, Фрыдэрык, был бискупом краковским и кардыналом.

ЛЂта божого нароженя 1500. Великии князь московскии воевал Рускую землю, и князь великии литовскии Александро послал воиско свое литовское, и зехалося воиско литовское з московским на Ведрошы, и учынили межы собою бои и сечу великую, и побила москва литву, и многих жывых поимали, то ест тых панов поимано: пана Грыгоря Остиковича, воеводу троцкого, князя Костянтина Ивановича Острозского и иных людеи добрых немало. Того же лЂта князь московскии забрал вси замки Сиверские и всю Сивер, y головах замки Бранеск, Стародуб, Новгород Сиверскии, Трубеческ, Чернигов, Путивль и иных по Сиверы замков всих шестьдесят.

ЛЂта божого нароженя 1501. Умер в Торуню король польскии Ян Ольбрахт, был королем польским лЂт осм и месецэи осм, вЂку своего року 40 и месец 1.

Того же року 1501. По смерти короля польского Ольбрахта Казимеровича взяли собЂ поляцы на королевство великого князя литовского Александра Казимеровича. И будучы Александру королем польским и великим князем литовским, руским, пруским и жомоитским, был велми ласкав \л.277.\ на подданых своих, щодробливе их всяким датком и дары опатруючы, за которым обранем Александра на королевство Польское зъедночене ся стало Коруне Польскои з Великим князством Литовским.

ЛЂта божого нароженя 1505. Король Александро был на соиме в Берести c паны-радами Коруны Польское и Великого князства Литовского, и был в тот час король гнЂвен на панов литовских за даньем справы и намовою Михаила Глинского, и не смЂли панове литовские до Х короля \167\ до замку ходити, боечыся карности. Аж панове лядзъкие гнЂв королевъскии перепросили, звлаща Ян з Ласка, канцлЂр корунныи. A вед жэ y Заберезинского за тым гнЂвом воеводъство Троцкое взято и дано Миколаю Радивилу, подчашому Великого князства Литовского. A потом панове литовские, справуючыся вЂрность подданства своего явными знаки оказовали, a на Михаила Глинского того доводили, иж он сам подступок господару своему учынити и тое панство, Великое князство Литовское, осести хотЂл.



Ф На поле: И тот, пишут, же был велми ласкав и датны Х д переделано из o



Того же року 1505. Татарове перекопские з царем своим Мэнды-Кгиром землю Литовскую и Рускую воевали и великую шкоду в тых панствах уделали, людеи сто тисечеи в полон взяли.

ЛЂта божого нароженя 1506. Король Александро росхорЂлся, иж его повЂтрэе рушыло, в которои хоробе нЂякиись Балинскии от Олькуша, славныи лЂкар в коруне Польскои, был прыпроважон до Вилни, и там жэ, королю лЂкарства чынечы, горш здорове его псовал, яко нЂкоторые розумели, иж то чынил з направы Михаила Глинского. И в тот час татарове y землю Литовскую вторгнули, против которых за намовою Михаила \л.278.\ Глинского, сам король Александро велми хорыи рушылся з Вилни до Лиды, и оттуль з Лиды для хоробы своее далеи ехати не могучы, противку татар отправил воиско литовское, a над ними гэтманом Станислава Кишку. Которыи гэтман Кишка вельми ся росхорЂл, иж для хоробы своее и на коню ехати не мог и, поручывшы врад свои гэтманскии Михаилу Глинскому, все воиско литовское противку татар выправил. A татарове y Клецка кошом стояли, и там же под Клецком над Цэпрою была битва Литве c татары y спасов пост, и помог бог литве, иж татаров наголову побили, a иншые, которые втекали, много их в рецэ потонуло. И кгды короля Александра хорого до Вильни прынесли в лекътыцэ, маючы вЂдомость o том король, иж татаров побили, велми ся радовал и также з доброю паметью c тым свЂтом и з слугами своими ростался того року вышеи помененого 1506. МЂл вЂку своего лЂт 45, пановал на королевстве Польском лЂт 4, месецэи 8, a на князстве Литовском пановал лЂт 14, месецы 2. ТЂло его поховано ест y Вилни в костеле святого Станислава в капълицы подле брата его королевича Казимера.

Того же року 1506. Обрали собЂ литва великим князем литовским княже опавское и кглокговское Жыкгимонта Казимеровича, которого потом року 1506 месеца генвара и поляцы собе королем взяли, и был Жыкгимонт королем польским и великим князем литовским, руским и жомоитским.

Бискуп виленскии Табор умер в лЂто божого нароженя 1507 ХХ.



ХХ B E 1508 г.



Князь Костентин Иванович Острозскии з везэня з Москвы прыбег до Литвы в лЂто божого нароженя 1508. Того же году в Литве князь Михаило Глинскии Заберезинского забил таким способом, иж видел Глинскии, же был от всих опущон. C тое неласки королевское, маючы сэрцэ скрвавеное против Янови Заберезинскому, розумеючы, то з его прычыны быти. Скоро король выехал з Литвы на сэим до Петрыкова, зостал в Литве; угледевшы свои час зъехал на Яна Заберезинского, маршалъка великого до двора его, которыи ест через рэку от мЂста Городна концу мосту, o пер\л.279.\шои године в ночы взял его з ложа y однои кошули, и казал стяти турчыну, своему слузе. Голову его через мЂсто Городно на древцу нести казал, потом y озеро в колку милях укинено. РозумЂл тому Глинскии, иж порушыл короля и паны литовские, прыятели небожчыковы, против собЂ. Збирал прыятели одны кревные, другие за пенязи так з руси, яко з литвы, звлаща брата Василя Глинского, которыи ему подал замки королевские и свое люди, к тому за пЂнези прынявшы умыслил моцю королю отпирать. A потом обачылся, иж моцы такос мЂти не мог, зъехал до Москвы з скарбы и з прыятелы своими до князя великого московского Василья Ивановича. И много в тот час замков руских подали великому князю московскому, то ест князь Михаило Мъстиславскии подался з городом своим Мстиславлем, князи Друцкие подалися з городом своим Друцком, Оръшу, Крычэв и Мозыр за прыводом Глинского Москва были осЂли.

Король Жыкгимонт, будучы в тот час в Полщы, послышавшы o том, и казавшы ся собрати воиску литовскому и полскому люду служэбному, жолнЂром, над которыми гэтманом полным был Фирлеи з Яновъца, первеи воиско литовское выправил, a потом и сам пошол за Михаилом Глинским. О чом услышавшы Глинскии, не смЂючы ждати на замкох руских короля Жыкгимонта, побЂг к Москве, a тые князи, князь Михаило Мъстиславъскии и князи друцкие з городы своими, a к тому Оръша и Крычев, и Мозыр опят подалися королю Жыкгимонту. И бьтла y Литве после \168\ Глинского замятня велми великая, и панов тых имали, которые з Глинским мешкали горазд, a нЂкоторых шляхту и мучоно. Короли Ц Жыкгимонт вже замъки руские успокоившы, a Глинского от МЂнска отстрашывшы, бо был вже МЂнска Глинскии добывати почал, гэтмана литовского Кишку в землю Московъскую з воиском для пустошэня и каженя земли Московское послал, которое воиско не мало волостеи Московъских мечом и огнем попустошывшы и воиско московское прогнавшы, в цэле вернулися. Зачым князь великии московскии Василеи Иванович слал до короля, просечы o перемире, и одержал то, иж прыняли перэмире до жывотов своих, вязни c обу сторон собЂ поворочали, князю Михаилу Глинскому жону и прыятели з Литвы до Москвы пустили, которых прыятелеи князя Михаила Глинского, яко в кроиниках польских пишэть, o двЂсте назад до короля з Москвы повтекало. И кгды король Жыкгимонт воиска свои роспустил, тогды воиска назад идучы y свою землю трафили воиско татарское недалеко от Слуцка, и тое воиско татарское за помочю божю литва побили. И так того року звышъ\л.280.\писаного тисеча пятсот осмого от непрыятел своих, москвы и татар, литва покои з ласки божое одержали.

ЛЂта божого нароженя 1509. Поляцы волохов поразили.

ЛЂта божого нароженя 1510. Татарове воевали в Лит†и цэло до орды звернулися.

ЛЂта божого нароженя 1512. Прынесена королю Жыкгимонту в малжэнство Барбара, дочка Стэфана, воеводы седмикгродского, o которои пишуть кроиникарэ, иж была великое побожности и цноты. Того же року литва и поляцы воиско татарское на Лопушне побили, над литвою был гэтманом князь Костентин Острозскии, a над поляками Миколаи Каменецкии. Там, пишуть, татаров збитых двадцать чотыры тисечы от малого воиска польского и литовского бо, яко пишуть кроиникаре, иж польского и литовского воиска большеи не было, толко шесть тисечеи, гдЂ значна ласка божя была, кгды ж шеснадцать тисечеи вязнев отгромили, и корысти великие, конеи татарских около десети тисечеи взяли. По которои битве цар перекопъскии c королем згоды потребовал, и для упэвненья покою сына своего Дзалалъдына до Литвы в закладе дал, которыи сын его в Литве борздо вмер, зачым тэж и покои и татары не долго трвал. Князь великии московскии Василеи, забывшы перемиря и прысяги своее, до панъства Руского Ч воиско свое всылал и шкоды непрыятельским обычаем чынил, и сам з воиском своим московским под Смоленъск прыходил и, не добывщы города, на тот час проч одышол.

ЛЂта по нароженю Исуса Хрыста сына божего 1513. Королю Жыкгимонту уродилася дочка c королевое Барбары в Познанью, которую названо Едвига. Того же року y Вильни замок надольныи згорЂл, которыи на он час деревеныи был. \л.281.\

ЛЂта божого нароженя 1514. Месеца мая 16 дня за тыидень по святом Миколе по весне у-во второк прышол князь великии московскии под Смоленск и стоял под городом, добываючы и быочы з дЂл дванадцать недЂль. Король Жыкгимонт, услышавшы тое, пошол боронити Смоленъска. З Вилни выехал месеца июля двадцать второго дня в суботу за неделю перед спасовыми запусты, и смольняне, не дождавшы обороны, за пракътыками и пострахами Михала Глинского, подали замок Смоленск князю великому московскому месеца августа первого дня. A в тот час на Смоленску был воеводою от короля Ш Сологубович, a был под панованьем литовским Смоленск от того часу, як его Витовт взял до поданья московскому девеносто Щ лЂт Э; в Э кроиницэ полскои сто.



Ц Так в рукописи Ч Так в рукописи; д. б. Литовского Ш Далее чистое место на 7 — 8 букв Щ деве приписано над строкой Э—Э Приписано на поле c выносным знаком Ю Так в рукописи; очевидно, д. 6. Днепре



На тот чяс король уже был y МЂньску, кгды Смоленск подано. И мало на том маючы, московскии послал люди, воиско великое, к Оръшы и ко Друцку, росказавшы им глубоко воевати землю Литовскую. A король Жыкгимонт пошол з МЂнска к Борысову, и з Борысова послал против воиска московского гетмана своего, князя Костенътина Ивановича Острозского, з воиском. И сторожовые полъки литовского воиска з сторожовыми полъки московскими споткалися на Бобрэ рецэ, и там всю московъскую сторожу побили и много жывых поимали, и на Дрови Ю также москву били и жывых поимали. И нашол князь Костенътин воиско московское за Оршою городом, за Днепром, на рецэ Кропивницы, и переброившыся со всим воиском и з дЂлы через Днепр, и вдарылися воиска межы собе y пятницу месеца сенътябра осмого дня на самыи празник рожества пречыстое Богоматеры, и был бои велми великии, бо не ровно было: москвы y пять кроть большеи, нижли литвы. И помог бог королю Жыкгимонту и воиску литовскому, иж москву наголову побили, и воевод што настаршых усих поимали, на имя князя Михаила Ивановича \169\ Булъгокова а брата его рожоного князя Дъмитрея, a Ивана АндрЂевича Челядина, князя Ивана Дъмитреевича Пронского, Дмитрея Васильевича Китаева, Данила АндрЂевича Плещэева, Ивана a Володимера Семеновых детеи Колычова, князя Борыса и сына его князя Петра Ромадановских, князя Ивана Семеновича Селеховского, князя Борыса и князя Ивана сына Стародубского, князя Петра Путятича a братанича его князя Семена Ивановича, a Онъдрея Семеновича сына Колычовова, Борыса \л.282.\ Ивановича Плещэева, Ивана Васильевича Кулешова, Филипа Ивановича Киселева, Юря Дъмитрэевича Лысъцова, Анъдрея Филиповича Нащокина, Ивана Андреевича Еропъкина, Матфея Ивановича Унукова, ТимофЂя Дъмитрэевича Чубарова, князя Юря Ивановича Диву, Ивана Дмитреевича Копъника, Артема Лупандина, Неклюда Паръфеньевича Баръдина, Андрея Полуятовича Обънеева, Кобъца Митина, сына ясельничого Будая Кучукова, Федора Ивановича Новосельцова, Семана Я Федоровича Вузского, Грыгоръя Борысовича Безумного, Микиту Озаръева, a детеи бояръских и иных много жывых поимали и до короля Жыкгимонта жывых прыведено всих y личбе трыста осмдесят. Детеи бояръских тых всих по замкох литовских послано y везэне, a простых людеи, которых жывых поимали, нЂльзе и выписатимножества для. A князь великии московскии в тот час был y Смоленску, и услышавшы то, иж людеи его наголову побито, и многие воеводы и дЂти боярские жывы поиманы, побоялъся сам и побЂг з Смоленъска к Москве, а замок осадил москвою, a смолнян всих вывел к Москве и там имимЂнья подавал на МосквЂ, амосквичом подавал имЂнья y Смоленъску. Потом y чотырох недЂлях князь Костентин Иванович Острозскии з воиском литовъским ходил под Смоленско, замъку не взял, мЂсту и волостям Смоленским много лиха вчынившы и опят верънулися до своее земъли y Литву.

ЛЂта по нароженю Исуса Хрыста сына божего 1515. Зъезд цэсара хрестиянского c корольми, то ест польским, вгорским и ческим y ВЂдню. Того ж року и смерть королевое Барбары.

ЛЂта божого нароженя 1517. Король Жыкгимонт послал воиско литовское и жолънеров, ляхов много, a гетманом над воиском князь Костентин Иванович Острозскии, a над жолънЂръми был пан Свирщовскии, и ходили под Опочъку, и много лиха Московскои земли вчынили, a города не взявъшы и вернулися y свою землю. \л.283.\

ЛЂта по нароженю Исуса Хрыста сына божого 1518. За намовою цэсара Максымилияна прынесена в малъженство королю Жыкгимонту Бона c краев Влоских, з Апульлии, з мЂста Бару, дочка Яна Сфорцыэго, княжати мэдыолянского, и корунована на замъку Краковском в костеле великом остатку днеи квЂтневых через аръцыбискупа гнЂзненского Яна з Ласка.

ЛЂта по нарожешо Исуса Хрыста сына божего 1519, месяца августа. Татарове, вторъгнувшы до земли Бэлъзъское, великие шкоды чынили, зачым собравшыся поляцы, до которых и князь Костентин Острозскии приехал А, маючы не много пры собЂ литвы и руси; билися c татары y Сокаля, преможени и побити суть нашы от великости татаров Б.

ЛЂта по нароженю Исуса Хрыста сына божьего 1520, месяца августа 1 дня. Уродилъся королю Жыкгимонту сын c королевое Боны, которому имя дано Жыкгимонт вторыи, a прыложывшы до того имя цэсарское Август, названо его Жыкгимонт Август. На тот час, кгды ся родил Август в Кракове, король Жыкгимонт был в Торуню.

ЛЂта божого нароженя 1521. Мистр прускии за прозбою своею одержал c королем перемире до чотырох лЂт. \л.284.\

ЛЂта божого нароженя 1523. Посол московскии прыходил до короля Жыкгимонта до Кракова в пятисот конеи и постановил c королем перемире на пять лЂт.

ЛЂта божого нароженя 1524. Был великии утиск в Руских краинахоколо Львова от турков и татар, непооднокроть уторгненье чынечы В, иж Премысльскую землю всю попалили, Саноцкую, Львовскую, Бэлзскую, Подольскую огнем и мечом попустошыли, окрутные морды и великие шкоды чынечы, межы которыми в мужских уберах и невЂст татарских нЂколько убили.



Я Так в рукописи


А Написано над строкой Б На поле: Побиты нашы y Сокаля В На поле: Утиск руских краин \170\



ЛЂта по нароженю Исуса Хрыста сына божего 1525, месяца марца 10 дня. ВоитЂх, прускии мистр, будучы от короля Жыкгимонта перво валькою утисненыи, того дня звышменованого голъд в Кракове посеред рынку королю Жыкгимонту чынил, и от того часу вже княжа пруское голъдовником короля польского и великого князя литовского сталъся Г, и мистром пруским писатися не почал, капицу мнишъскую и плащ c крыжыком з себе скинул, и в малъженство за себе понял сестру короля дунского. A перед тым мистрове пруские жон не мевали.

ЛЂта по нароженю Исуса Хрыста сына божого 1526. Маючы король Жыкгимонт вЂдомость, иж кгданщане противко ему бунты въщынають и росказаня его не суть послушни, a на здоровъе его потаемне стоять, для чого месяца апрЂля по великодни того року звышменованого король со всим двором своим и c паны-радами до Кгданска прыехавшы значные подобенства того умыслу их видял, в чом за поводом слушным будучы узнани, карность на собЂ утерпели, иж их стяли первЂишести, a потомсеми; \л.285.\ старшых постинано Д, a инъшых по замкох у везене розослано, другие за море повтекали. Того же року звышписаного, зараз по смерти Януша княжати мазовецъкого, король Жыкгимонт в князство Мазовецкое и в мЂсто Варшову, столицу того князства, увезалъся ленным правом, и от того часу князство Мазовецкое ест прылучоно до коруны Польское Е.

ЛЂта божого нароженя 1527. Татарове перекопские воевали князство Литовское, и король послал против их воиско литовское, a над воиском гетманом князя Костентина Острозского. Тогды, погонившы, князь Костентин Иванович Острозскии з воиском литовским татар побил на Ольшаницы зиме Ж. Того же року цара завольского пущоно з Литвы по Велицэ дни, которыи седЂл в ЛитвЂ.

ЛЂта божого нароженя 1528. Король Жыкгимонт c королевою Боною прыехал до Литвы c Польщы напервеи. Того же року всю землю Литовскую пописывали.

ЛЂта по нароженю Исуса Хрыста сына божъего 1529. Королевича молодого Жыкгимонта Августа на великое княжене Литовское Литва обрали на день светого Луки эвангелиста, a ему в тот час было деветь лЂт З. Того же року права писаные даны всеи земли Великого князства Литовского на светыи Михал от короля Жыкгимонта Старого. \л.286.\

ЛЂта божого нароженя 1530. МЂсто и замок Виленскии горЂл, иж ся великая a значная шкода ІмЂсту Виленскому от огню на тот час стала.

ЛЂта божого нароженя 1530. Жыкгимонт вторыи Август, сын Жыкгимонта короля, вже на он час будучы великии князь литовскии, за жывота отца своего на королевство Польское был помазан и корунован месяца февраля двадцать первого дня, a ему в тот час было лЂт десять И. Того же року татарове прыходили y Литву, которые суть побиты от жолънеров, пЂнежных людеи, над которыми был гетманом князь Иван Дубровицкии, a побито их на врочыщах на Голъ†и на Полозорьи.

ЛЂта божого нароженя 1531. Поляцы волохов поразили y Обэртына, гдЂ значное звитяжство над волохи и корысть одержали, то ся дЂяло року звышписаного месяца августа дня двадцать второго, гдЂ, пишуть, иж пятьдесят дЂл c тое битвы поляцы взяли, опроч малых, a вязнеи больш тисечы К.

ЛЂта божого нароженя 1533. Князь Костентин умер по взятьи в небо панны Марыи.

ЛЂта божого нароженя 1534, инъдикта семого сходечы. Князь великии московскии вмер, a король Жыкгимонт послал воиско свое литовское, и гетман великии пан виленскии, пан Юрыи Миколаевич Радивил, лежал з воиском великим y Могилеве, a воеводу киевского посылал к Стародубу; под Стародубом Овчыну погромили, a под Радогощом Л. \л.287.\

. . .Тивунство Виленское дано пану ВоитЂху Юндилу.

Маршальство дворное дано пану Ивану Горностаю.

Того ж лЂта прышла саранча на Лядскую землю и на Литовскую, около Берестия и около МЂнска, и Свержна, и Коидонова, Ивенца, и около Вилни видели летаючых, и поели жыто и ярыну, и траву. Сее же все сталося для грехов нашых М.

ЛЂта божего нароженя 1542. Месеца октябра 10 дня, инъдикта первого, з овторка на середу четвертое годины в ноч бысть знаменье на небеси: явилися стольпы свЂтълые як огонь, многие ходили, много збиралися у-в один столъп великии и розышлися, одны пошли на полъноч и там погибли, a другие пошли на полудень, и тые отшедъшы погибли Н.



Г На поле: Голд мистра пруского Д На поле: Кгданщан стинано Е На поле: Прылучене Варшавы до коруны Полское з Мазовшэм Ж На поле: Поражка татаров на Олшаницы З На поле: Обрано короля Августа на панство Литовское И На поле: Жыкгимонт Август на короловство Полское [взят и корунован К На поле: Поражка волохов Л Так в рукописи; фраза не закончена; далее недостает листа М На поле: Пожеване жыта и травы от саранчы Н На поле: Знамене на небе \171\



Того же году пан Станислав Ольбрахтович Кгаштольт, воевода троцкии, умер c понедЂлъка на овторок пятое годины в ноч, за тыидень перед божим нарожэнем.

ЛЂта божего нароженя 1543. Месеца апреля 11 дня, индикъта первого, пан Матеи Воитехович Яновича, староста жомоитскии, умер на третеи недЂли по Велицэ дни.

ЛЂта 1543. Месеца мая 15 дня y суботу, шостое недЂли по Великодни, индикта первого, ЭльжбЂта королевна, дочка короля рымского Фэрдынанда, цэсара Карла пятого братанъка, прынесена до Польски до Кракова в малжэнскии стан Жыкгимонту Августу, королю польскому молодому, почстиве и охэндожне, з радостью всих обыватэлев Коруны Польское и Великого князства Литовского; в недЂлю была корунована, a в понедЂлок дана королеви в малженство О.

ЛЂта божего нароженя 1544. Месеца генвара 24 дня, индикта второго, y четверг перед полуднем могло быть за годину \л.288.\ было знамение: прышло темность великая, праве яко бы ся мЂло змеркати, и солънъцэ было видети, яко бы серп або мЂсец молодыи, рогами стоял на заход слонца, a потом было видети рогами на всход. И видели д†звездЂ в тот же час на заход от слонца, одна бЂла, a другая черлена. A всего того могло быти полътори годины, a потом темность одышла проч, a тая темность была прышла от заходу слонца П.

Того же лЂта 44. Прыехал король старыи Жыкгимонт до Берестья на десятои недели по Великодни y середу c Польски, a сын его, король молодыи, з Вилни перед святым Ильею y середу ж, и был сэим великии y Берэстьи, и c того соиму спустил король старыи сыну своему Жыкгимонту Августу, королю молодому, Великое князство Литовское по Покрове пречыстое Богородицы y тыидень, индикта трэтего и врады роздавшы, поехал король старыи до Ляхов, a молодыи король Жыкгимонт Август з своею королевою поехал до Вилни Р.





A врады в тот час розданы тым особам нижэи описаным, то ест


Пану Грыгорю Грыгоревичу Остиковича панство Виленское.

Князю Янушу Дубровицкому воеводство Троцкое.

Пану Ерониму Ходкевичу панство Троцъкое.

Пану Миколаю Яновичу Радивилу маршальство земъское.

Пану Александру Ходкевичу воеводство Новгородское С.

Князю Семену Пронскому воеводство Киевъское.

Пану Станиславу Петровичу Кишчычу воеводство Витэбское.

Пану Миколаю Юревичу Радивилу подчашое.

Пану Яну Яновичу Радивилу краичое.

Пану Грыгорю Ходкевича подкоморе.

ЛЂта божего нароженя 1545. Месеца июня y Петров пост, за две недели \л.280.\ перед святым Петром y понедЂлок, y Вилни умерла королевая молодая королевая ЭльжбЂта, и погреб ее был y святого Станислава, y каплицы велебного Казимера, месеца августа 24 дня y понедЂлок, a на завтрэе у-во второк обыход был з марами, a мар было трыдцать Т. Того ж году, месеца августа 31 дня, инъдикта третего, король молодыи Жыкгимонт Август дал староство Жомоитское пану троцкому пану Ерониму Алексанъдровичу Ходкевичу У.



О На поле: ЭльжбЂта кролевна прынесена в малженство королю Августу П Слово написано над строкой; на поле: Темность и солнъцэ, яко бы серп оказалосе было Р Ha поле: Старыи король Жыкгимонт опустил панство або князотво Литовское королю молодому Августу С На поле: Раздаванье врядов паном литовским Т На поле: Смерть короловос ЭльжбЂты У На поле: Милость короля Жыкгимонта Августа з Барбарою Радзивиловною



Потом король Август, кгды поховал тЂло королевое малжонки своее, будучы пан молодыи, не могучы здеръжати прырожоное хтивости своеи ку бЂлым головам, почал миловати панию Барбару Радивиловну, которая остала вдовою по пане Станиславе Ольбрахтовичу Кгаштолъте, воеводе троцком, и мешкала на тот час пры матцэ своеи, пани Миколаевои Радивиловои, пани виленскои, и брате своем пану Миколаю Радивилу, подчашом. И король почал до нее ходити ночъю, куды собе хожэнье был учынил c полацу аж до дому ее, и там в нее бывал часто. И было то слышать по всеи земли Польскои и Литовскои, и братья ее просили короля, абы того перестал и до сестры их не ходил, и тое неславы дому их не чынил. Король им обецал через то до нее не ходити и не ходил немалыи час, потом кревкости прырожоное далеи терпети не мог, и пошол за ся до нее ночъю, и одно само треть. A панове Радивилове того пилне стерегли, \172\ и кгды король до сестры их ушол, они того ж часу там до короля прышли и мовили ему: «Милостивыи королю, не мЂл еси через то до сестры нашое ходити, a тепер для чого еси прышол?» Король им поведил: «А што вЂдаете, можэть теперешнее прыистье мое ку сестре вашеи вчынити вам большую славу, честь и пожыток». Они рекли: «Боже, даи то», — и того ж часу плебана прывели, которого на то готового мели, и отдали короля з сестрою своею потаемне, нихто c панов-рад духовных и светских, a ни тэж з двору королевского не были o том вЂдоми, толко Радивилове a Кгезъгаило, a плебан, што шлюб давал Ф. A вед же король и шлюб з нею взявшы того не малыи час таил, и пред ся она мешъкала пры матъцэ и y брата своего.\л.290.\

Потом король молодыи лЂта божего нароженя 1547 y Филипов пост ехал до Польщы до отца своего, навежаючы его, и там тое ожэненье свое повЂдил князю МатЂевскому, бискупу краковскому, a пану Яну Тарновскому, пану краковскому, Они ему того дозволили, и он за ся c Польщы прыехал до Вилни.

ЛЂта божего нароженя 1548. У великии пост и панове-рада до Великого князства вси до Вилни к королю зъехалися, и кгды то услышали и довЂдали пэвности Х, панове-рада Великого князства, иж король c тою панею потаемне шлюб брал и сэрдэчне того жаловали, и почали упоминати и просити короля слезно, абы того не чынил и неровни собЂ, подданое своее, за малъжонку не брал Ц. Потом всим людем и всеи земли тое ожэненье королевское было вельми не мило, a многие тому вЂры допустити не хотЂли, и многие пашквилюсы писали o том, y замку к стенам и к ратушы, и к панским домом к воротам прыбивали, которые многие и до короля бывали прыношоны. A потом и до короля старого, отца и матъки его, королевое старое, до Кракова то дошло. Они велми срокго до сына своего писали, абы того не чынил, и за малжонку ее собе не брал. Король Август o то ничого не дъбал, a короля старого, отца своего, так и панов-рад корунных и Великого князства упоминанья и прошенья слухати не хотЂл Ч.

ЛЂта божего нароженя 1547. Король Жыкгимонт Старыи, будучы в Петръкове на соиме валном, постановившы варовне вси потрэбы РЂчы Посполитое, будучы в старости лЂт своих розънемогся, в которои хоробе вжо наполыумерлыи прывезен до Кракова и тамжэ умер [в са]мыи Ш Велик день третеенадцать Щ годины на зуполном зэкгары Э, з жалостью не толко всих подданых своих, але и панств околичных хрестиянских, кгды ж был пан велми добрыи, справедливыи и милосердныи ку подданым своим, мЂл вЂку своего лЂт осмъдесят один год, мЂсецы два, днии сем, пановавшы на Коруне Польскои и Великом князстве Литовском, Руском, Пруском, Жомоитском, Мазовецком и иных лЂт сорок и полътора. О которои смерти королевскои прынесена вЂдомость королю молодому Жыкгимонту Августу c Кракова до Вилна y тыидень по Велицэ дни в недЂлю рано, и на тои жэ недЂли \л.291.\ y пятницу король Жыкгимонт Август y Вилни обыход чынил з марами и свечами по всим костелом, a на трэтеи недели по Велицэ дни у-во второк месеца апрЂля семнадцатого дня девятоенадцать годины зуполного зэкгара року звышменованого послал король панов до рад, до двора пана Радивила, подчашого Великого князства Литовского, по панию Кгашътолътовую, c которою первеи потаемне шлюб брал. И панове, водлуг росказанья королевъского, взявшы оную пани Кгаштолътовую, пошлюбеную малжонку королевскую, сестру пана подчашого Радивила, провадили ее до замъку Виленского, аж до палацу королевского. И король ее поткал y сЂнех y двереи, и тут, з нею прывитавшыся, оповедал усим паном, иж ся вже з нею давно отдал, и шлюб брал, и провадили ее панове и дворяне королевские до палацу, гдЂ и первые королевые мешкали, a король пошол до своего упокою. Которому то ожэненью королевскому панове и вся шляхта рыцэръство, опроч дому Радивилового Ю, не были ради, и вельми смутилися, але того вже иначеи одменить не могли Я. . .



Ф На поле: Шлюб короля Августа з Барбарою Х э переделано из e Ц На поле: Прозба панов литовских королю Августу, абы Барбары в малженство не поимовал Ч На поле: Писание от старого короля Жыкгимонта до короля Августа, абы Барбары в малъженство не брал Ш Послеслова умер видны следы стертых букв; восстанавливаются no смыслу (в т. XVII ПСРЛ эти буквы даны как существующие) Щ н переделано из a Э Ha поле: Смерть короля Жыкгимонта Ю Первоначально после букв ло стояло двоеточие; вого приписано позже Я На этом рукопись обрывается



















© Сканування та обробка: Максим, «Ізборник» (http://litopys.kiev.ua)
25.III.2003








Попередня     Головна     Наступна


Етимологія та історія української мови ua_etymology:

Датчанин:   В основі української назви датчани лежить долучення староукраїнської книжності до європейського контексту, до грецькомовної і латинськомовної науки. Саме із західних джерел прийшла -т- основи. І коли наші сучасники вживають назв датський, датчани, то, навіть не здогадуючись, ступають по слідах, прокладених півтисячоліття тому предками, які перебували у великій європейській культурній спільноті. . . . )



Якщо помітили помилку набору на цiй сторiнцi, видiлiть ціле слово мишкою та натисніть Ctrl+Enter.