Уклінно просимо заповнити Опитування про фемінативи
В лЂто 6593 [1085]. Ярополкъ же хотяше ити на Всеволода, послушавъ злых свЂтникъ. Се увЂдавъ, Всеволодъ посла противу ему сына своего Володимера. Ярополкъ же, оставивъ матерь свою и дружину ЛучьскЂ, бЂжа в Ляхы. Володимеру же пришедшю Лучьску, и вдашася лучане. Володимеръ же посади Давыда Володимери, въ Ярополка мЂсто, а матерь Ярополчю и жену его и дружину его приведе Кыеву, и имЂнье вземъ его.
В лЂто 6594 [1086]. Приде Ярополкъ из Ляховъ, и створи миръ с Володимеромь, и иде Володимеръ вспять Чернигову. Ярополкъ же сЂде Володимери. И пересЂдев мало дний, иде Звенигороду. И не дошедшю ему града, и прободенъ бысть от проклятаго \218\ Нерадьця, от дьяволя наученья и от злыхъ человЂкъ. Лежащю ему ту на возЂ, саблею с коня прободе и́, мЂсяца ноямбря въ 22 день. И тогда въздвигнувъся Ярополкъ, выторгну изъ себе саблю, и возпи великым гласомь: «Охъ, тот мя враже улови». БЂжа Нерадець треклятый Перемышлю к Рюрикови, и Ярополка вземше отроци на конь передъ ся, Радъко, Вънкина и инии мнози, несоша и́ Володимерю, а оттуду Кыеву. И изиде противу ему благовЂрный князь Всеволодъ с своима сынъма, с Володимеромь и Ростиславомь, и вси боляре, и блаженый митрополитъ Иоан с черноризци и с прозвутеры. И вси кияне великъ плачь створиша над нимь, со псалмы и пЂснми проводиша и́ до святаго Дмитрея, спрятавше тЂло его, с честью положиша и́ в рацЂ мраморянЂ в церкви святаго апостола Петра, юже бЂ самъ началъ здати преже, мЂсяца декабря въ 5 день. Многы бЂды приимъ, без вины изгонимъ от братья своея, обидимъ, разграбленъ, прочее и смерть горкую приятъ, но вЂчнЂй жизни и покою сподобися. Такъ бяше блаженый сь князь тихъ, кротъкъ, смЂренъ и братолюбивъ, десятину дая святЂй Богородици от всего своего имЂнья по вся лЂта, и моляше бога всегда, глаголя: «Господи боже мой! Приими молитву мою, и дажь ми смерть, якоже двЂма братома моима, Борису и ГлЂбу, от чюжю руку, да омыю грЂхы вся своею кровью, и избуду суетнаго сего свЂта и мятежа, сЂти вражии». Его же прошенья не лиши его благый богъ: въсприя благая она, их же око не видЂ, ни ухо слыша, ни на сердце человЂку не взиде, еже уготова богъ любящимъ его.
В лЂто 6596 [1088]. Священа бысть церкы святаго Михаила манастыря Всеволожа митролитомь Иваномь, а игуменьство тогда держащю того манастыря Лазъреви. Того же лЂта иде Святополкъ из Новагорода к Турову жити. В се же лЂто умре Никонъ игуменъ Печерскый. В се же лЂто възяша болгаре Муром.
В лЂто 6597 [1089]. Священа бысть церкви Печерская святыя Богородица манастыря Феодосьева Иоаномь митрополитомъ, и Лукою БЂлогородьскымь епископомь, Исаиемь, Черниговьскым епископомь, при благородьнЂмь князи ВсеволодЂ, державнемь Русьскыя земля, и чаду его, ВолодимерЂ и РостиславЂ, воеводьство держащю кыевьскыя тысяща Яневи, игуменьство держащю Иоану. В се же лЂто преставися Иоанъ митрополитъ. Бысть же Иоанъ мужь хытръ книгамъ и ученью, милостивъ убогымъ и вдовицямъ, ласковъ же ко всякому, богату и убогу, смЂренъ же и кротокъ, молчаливъ, рЂчистъ же, книгами святыми утЂшая печалныя, и сякого не бысть преже в Руси, ни по немь не будеть сякъ. В се лЂто иде Янъка в Грекы, \220\ дщи Всеволожа, реченая преже. И приведе Янка митрополита Иоана скопьчину, его же видЂвше людье вси рекоша: «Се навье пришелъ». От года бо до года пребывъ, умре. БЂ же сей мужь не книженъ, но умомъ простъ и просторЂкъ. В се же лЂто священа бысть церкы святаго Михаила Переяславьская ЕфрЂмом, митрополитомь тоя церкы, юже бЂ создалъ велику сущю, бЂ бо преже в Переяславли митрополья, и пристрои ю̀ великою пристроею, украсивъ ю̀ всякою красотою, церковныими сосуды. Сий бо ЕфрЂмъ бЂ скопець, высокъ тЂломъ. БЂ бо тогда многа зданья въздвиже: докончавъ церковь святаго Михаила, заложи церковь на воротЂхъ городныхъ во имя святаго мученика Феодора, и посемь святаго АндрЂя у церкве от воротъ и строенье баньное камено, сего же не бысть преже в Руси. И град бЂ заложилъ каменъ, от церкве святаго мученика Феодора, и украси город Переяславьский здании церковными и прочими зданьи.
В лЂто 6599 [1091]. Игуменъ и черноризци свЂтъ створше, рЂша: «Не добро есть лежати отцю нашему Феодосьеви кромЂ манастыря и церкве своея, понеже той есть основалъ церковь и черноризци совокупилъ». СвЂтъ створше, повелЂша устроити мЂсто, идеже положити мощЂ его. И приспЂвшю празднику Успенья БогородицЂ треми деньми, повелЂ игуменъ рушити, кдЂ лежать мощЂ его, отца нашего Феодосья, его же повелЂнью бых азъ грЂшный первое самовидець: еже скажю, не слухомъ бо слышавъ, но самъ о семь началникъ. Пришедшю же игумену ко мнЂ и рекшю ми: «Поиде†в печеру к Феодосьеви». Азъ же пришедъ и со игуменомъ, не свЂдущю никомуже, разглядавша, кудЂ копати, и знаменавша мЂсто, кдЂ копати, кромЂ устья. Рече же ко мнЂ игуменъ: «Не мози повЂдати никомуже от братьи, да не увЂдаеть никтоже; но поими, его же хощеши, да ти поможеть». Лзъ же пристроихъ семь днии рогалие, ими же копати. И въ вторьник, вечер в суморок, пояхъ с собою 2 брата, не вЂдущю никомуже, придох в печеру, и отпЂвъ псалмы, почах копати. И утрудився вдахъ другому брату, копахомъ до полуночья, трудихомся, и не могуче ся докопати, начах тужити, еда како на страну копаемъ. Азъ же, вземъ рогалью, начах копати рамено, и другу моему опочивающю передъ пещерою, и рече ми: «Удариша в било». И азъ в тъ чинъ прокопах на мощЂ Феодосьевы. Оному глаголющю ко мнЂ: «Удариша в било»; мнЂ же рекущю: «Прокопахъ уже». Егда же прокопахъ, обдержашеть мя ужасть, и начах звати: «Господи помилуй!». О се чинь же сЂдяста 2 брата в манастыри, еда игуменъ, утаивъся, нЂ с кымъ пренесеть его отай, к печерЂ зряща. Егда удариша в било, видЂста 3 столпы, ако дугы зарны, и стоявше придоша надъ верхъ церкве, идеже положенъ бысть Феодосий. В се же время видЂ Стефанъ, иже бысть в него мЂсто игуменъ, — \222\ в се же время бысть епископъ, — видЂ въ своемь манастыри чрес поле зарю велику надъ печерою; мнЂвъ, яко несуть Феодосья, бЂ бо ему възвЂщено преже днемь единЂмъ, и сжаливъси, яко без него преносять и, всЂдъ на конь, вборзЂ поЂха, поимъ с собою Климента, его же игумена постави в свое мЂсто. И идяста, видуче зарю велику. И яко придоста близь, видЂста свЂщЂ многы надъ печерою, и придоста к печерЂ, и не видЂста ничтоже, и придоста дну в печеру, нам сЂдящемъ у мощий его. Егда бо прокопахъ, послахъ къ игумену: «Приди да вынемемъ и́». Игумен же приде з двЂма братома; и прокопах велми, и влЂзохом, и видЂхом лежащь мощьми, но состави не распалися бЂша, и власи главнии притяскли бяху. И взложьше и́ на вариманътью и, вземше на рамо, вынесоша и́ предъ пещеру. На другый же день собрашася епископи: ЕфрЂмъ Переяславьскый, Стефанъ Володимерьскый, Иоан Черниговьскый, Маринъ Гурьгевьский, игумени от всЂхъ манастыревъ с черноризци; придоша и людье благовЂрнии, и взяша мощЂ Феодосьевы с тЂмьяномъ и съ свЂщами. И принесше положиша и́ в церкви своей ему, в притворЂ на деснЂй странЂ, мЂсяца августа въ 14 день, в день четвертъкъ, въ час 1 дне, индикта 14, лЂта... И праздноваша свЂтло въ тъ день. Се же повЂмь мало нЂчто, еже ся събысть прореченье Феодосьево. Игуменьство бо Феодосью держащю в животЂ своемь, правящю стадо, порученое ему богомь, — черноризци, не токмо же си едины, но и мирьскыми печашеся о душахъ ихъ, како быша спаслися, паче же о духовныхъ сынЂхъ своихъ, утЂшая и наказая приходящая к нему, другоици в домы ихъ приходя и благословенье имъ подавая. Единою бо ему пришедшю в домъ Яневъ къ Яневи и к подружью его Марьи, — Феодосий бо бЂ любя я̀, зане же живяста по заповЂди господни и в любви межи собою пребываста, — единою же ему пришедшю к нима, и учашеть я̀ о милостыни къ убогымъ, о цесарьствии небеснЂмь, еже прияти праведником, а грЂшником муку, и о смертнЂмь часЂ. И се ему глаголющю о положении тЂла в гробЂ има, рече ему Яневая: «Кто вЂсть, кдЂ си мя положать?». Рече же ей Феодосий: «ПоистинЂ идЂже лягу азъ, ту и ты положена будеши». Се же сбысться. Игумену же бо преставльшюся преже, о 18 лЂто се сбысться: в се бо лЂто преставися Яневая, именемь Марья, мЂсяца августа 16 день, и пришедше черноризьци, пЂвше обычныя пЂсни, и, принесше, положиша ю̀ в церкви святыя Богородиця, противу гробу Феодосьеву, на шюей странЂ. Феодосий бо положенъ бысть въ 14, а сия въ 16.
Се же сбысться прореченье блаженаго отца нашего Феодосья, добраго пастуха, иже пасяше словесныя овця нелицемЂрно, с кротостью и с расмотреньемь, блюда ихъ и бдя за ня, моляся за порученое ему стадо и за люди хрестьяньскыя, за землю Русьскую, иже и по отшествии твоемь от сея жизни \224\ молишися за люди вЂрныя и за своя ученикы, иже, взирающе на раку твою, поминають ученье твое и въздержанье твое, и прославляють бога. Азъ же, грЂшный твой рабъ и ученикъ, недоумЂю, чимь похвалити добраго твоего житья и въздержанья. Но се реку мало нЂчто: «Радуйся, отче нашь и наставниче, мирьскыя плища отринувъ, молчанье възлюбивъ, богу послужилъ еси в тишинЂ, въ мнишьскомь житьи, всяко собЂ принесенье божественое принеслъ еси, пощеньемь превозвышься, плотьскых страстий и сласти възненавидЂвъ, красоту и желанье свЂта сего отринувъ, вслЂдуя стопама высокомысленымъ отцемь, ревнуя им, молчаньем възвышаяся, смЂреньем украшаяся, в словесЂхъ книжных веселуяся. Радуйся, укрЂплься надежею вЂчныхъ благъ, их же приимъ, умертвивъ плотьскую похоть, источникъ безаконья и мятежь, преподобне, бЂсовьскых козней избЂгъ и от сЂти его. С праведными, отче, почилъ еси, въсприимъ противу трудомъ своимъ възьмездье, отцемь наслЂдникъ бывъ, послЂдовавъ ученью ихъ и нраву ихъ, въздержанью ихъ, и правило ихъ правя. Паче же ревноваше великому Феодосью нравомь и житьемь, подобяся житью его и въздержанью ревнуя, послЂдьствуя обычаю его, и преходя от дЂла в дЂло уньшее, и обычныя молбы богу въздая, в воню благоуханья принося кадило молитвеное, темьянъ благовоньный. ПобЂдивъ мирьскую похоть и миродержьця князя вЂка сего, супротивника поправъ дьявола и его козни, побЂдникъ явися, противным его стрЂлам и гордымъ помысъломь ставъ супротивно, укрЂпивъся оружьемь крестнымь и вЂрою непобЂдимою, божьею помощью. Молися за мя, отче честный, избавлену быти от сЂти неприязнины, и от противника врага сблюди мя твоими молитвами».
В се же лЂто бысть знаменье в солнци, яко погыбнути ему, и мало ся его оста, акы мЂсяць бысть, в час 2 дне, мЂсяца маия 21 день. В се же лЂто бысть: Всеволоду ловы дЂющю звЂриныя за Вышегородомъ, заметавшимъ тенета и кличаномъ кликнувшимъ, спаде превеликъ змий от небесе, и ужасошася вси людье. В се же время земля стукну, яко мнози слышаша. В се же лЂто волхвъ явися РостовЂ, иже вскорЂ погыбе.
В лЂто 6600 [1092]. Предивно бысть чюдо ПолотьскЂ в мечтЂ: бываше в нощи тутънъ, станяше по улици, яко человЂци рищюще бЂси. Аще кто вылЂзяше ис хоромины, хотя видЂти, абье уязвенъ будяше невидимо от бЂсовъ язвою, и с того умираху, и не смяху излазити ис хоромъ. Посемь же начаша в дне являтися на конихъ, и не бЂ ихъ видЂти самЂхъ, но конь ихъ видЂти копыта; и тако уязвляху люди полоцкыя и его область. ТЂмь и человЂци глаголаху, яко навье бьють полочаны. Се же знаменье поча быти от \226\ Дрьютьска. В си же времена бысть знаменье въ небеси, яко кругъ бысть посредЂ неба превеликъ. В се же лЂто ведро бяше, яко изгараше земля, и мнози борове възгарахуся сами и болота; и многа знаменья бываху по мЂстомь; и рать велика бяше от половець и отвсюду; взяша 3 грады: ПЂсоченъ, Переволоку, Прилукъ, и многа села воеваша по обЂма странома. В се же лЂто воеваша половци ляхы с Василькомь Ростиславичемь. В се же лЂто умре Рюрикъ, сынъ Ростиславль. В си же времена мнози человЂци умираху различными недугы, якоже глаголаху продающе корсты, яко «Продахомъ корсты от Филипова дне до мясопуста 7 тысячь». Се же бысть за грЂхы наша, яко умножишася грЂси наши и неправды. Се же наведе на ны богъ, веля нам имЂти покаянье и въстягнутися от грЂха, и от зависти и от прочихъ злыхъ дЂлъ неприязнинъ.
