Уклінно просимо заповнити Опитування про фемінативи  


Попередня     Головна     Наступна





В лЂто 6610 [1102]. ВыбЂже Ярославъ Ярополчичь ис Кыева, мЂсяца октября въ 1. Того же мЂсяца на исходЂ, прелстивъ Ярославъ Святополчичь Ярослава Ярополчича, и ятъ и́ на НурЂ, и приведе и́ къ отцю Святополку, и оковаша и́. Том же лЂтЂ, мЂсяца декабря въ 20, приде Мстиславъ, сынъ Володимеръ, с новгородци; бЂ бо Святополкъ с Володимером рядъ имЂлъ, яко Новугороду быти Святополчю и посадити сынъ свой в немь, а Володимеру посадити сынъ свой в Володимери. И приде Мстиславъ Кыеву, и сЂдоша в-ызбЂ, и рЂша мужи Володимери: «Се прислалъ Володимеръ сына своего, да се сЂдять новгородци, да поимше сына твоего и идуть Новугороду, а Мьстиславъ \268\ да идеть Володимерю». И рЂша новгородци Святополку: «Се мы, княже, прислани к тобЂ, и ркли ны тако: не хочем Святополка, ни сына его. Аще ли 2 гла†имЂеть сынъ твой, то пошли и́; а сего ны далъ Всеволодъ, а въскормили есмы собЂ князь, а ты еси шелъ от насъ». И Святополкъ же многу прю имЂвъ с ними, онЂм же не хотЂвшим, поимше Мстислава, придоша Новугороду. В то же лЂто бысть знаменье на небеси, мЂсяца генваря въ 29 день, по 3 дни, акы пожарная заря от въстока и уга и запада и сЂвера, и бысть тако свЂтъ всю нощь, акы от луны полны свЂтящься. В то же лЂто бысть знаменье в лунЂ, мЂсяца февраля въ 5 день. Того же мЂсяца въ 7 день бысть знаменье в солнци: огородилося бяше солнце в три дугы, и быша другыя дугы хребты к собЂ. И сия видяще знаменья благовЂрнии человЂци со въздыханьем моляхуся к богу и со слезами, дабы богъ обратилъ знаменья си на добро: знаменья бо бывають ова на зло, ова ли на добро. На придущее лЂто вложи богъ мысль добру в русьскыЂ князи: умыслиша дерзнути на половцЂ и поити в землю ихъ, еже и бысть, яко же скажем послЂже в пришедшее лЂто. В се же лЂто преставися Ярославъ Ярополчичь, мЂсяца августа въ 11 день. В се же лЂто ведена бысть дщи Святополча Сбыслава в Ляхы за Болеслава, мЂсяца ноября въ 16 день.

В лЂто 6611 [1103]. Богъ вложи в сердце княземъ рускым Святополку и Володимеру, и снястася думати на ДолобьскЂ. И сЂде Святополкъ с своею дружиною, а Володимеръ с своею въ единомь шатрЂ. И почаша думати и глаголати дружина Святополча, яко «Негодно нынЂ веснЂ ити, хочем погубити смерды и ролью ихъ». И рече Володимеръ: «Дивно ми, дружино, оже лошадий жалуете, ею же кто ореть; а сего чему не промыслите, оже то начнеть орати смердъ, и приЂхавъ половчинъ ударить и́ стрЂлою, а лошадь его поиметь, а в село его Ђхавъ иметь жену его, и дЂти его, и все его имЂнье? То лошади жаль, а самого не жаль ли?» И не могоша отвЂщати дружина Святополча. И рече Святополкъ: «Се язъ готовъ уже». И вста Святополкъ, и рече ему Володимеръ: «То ти, брате, велико добро створиши землЂ РусскЂй». И посласта ко Олгови и Давыдови, глаголя: «Поидита на половци, да любо будем живи, любо мертви». И послуша Давыдъ, а Олегъ не всхотЂ сего, вину река: «Не сдравьлю». Володимеръ же, цЂловавъ брата своего, и поиде Переяславлю, а Святополкъ по нем, и Давыдъ Святославичь, и Давыдъ Всеславичь, и Мстиславъ Игоревъ внукъ, Вячеславъ Ярополчичь, Ярополкъ Володимеричь. И поидоша на конихъ и в лодьях, и придоша ниже порогъ, и сташа в протолчех в Хортичем островЂ. И всЂдоша на конЂ, и пЂшци из людей выседше идоша в поле 4 дни, и придоша на СутЂнь. Половци же, слышавше, яко идеть Русь, собрашася бе-щисла, и начаша думати.\270\ И рече Урусоба: «Просим мира у Руси, яко крЂпко имуть битися с нами, мы бо много зла створихом РусскЂй земли». И рЂша унЂйшии УрособЂ: «Аще ты боишися Руси, но мя ся не боимъ. Сия бо избивше, поидем в землю ихъ, и приимем грады ихъ, и кто избавить и́ от насъ?» РусскиЂ же князи и вои вси моляхуть бога, и обЂты вздаяху богу и матери его, овъ кутьею, овъ же милостынею убогым, инии же манастырем требованья. И сице молящимся, поидоша половци и послаша пред собою в сторожЂ Алтунопу, иже словяше в них мужеством. Тако же русскиЂ князи послаша сторожЂ своЂ. И устерегоша рускиЂ сторожеве Олтунопу, и обиступивъше и́, и убиша Алтунопу и сущая с ним, и не избысть ни единъ, но вся избиша. И поидоша полкове, аки борове, и не бЂ презрЂти ихъ; и русь поидоша противу имъ. И богъ великый вложи ужасть велику в половцЂ, и страх нападе на ня и трепетъ от лица русскых вой, и дрЂмаху сами, и конем ихъ не бЂ спЂха в ногах. Наши же с весельем на конЂх и пЂши поидоша к ним. Половци же, видЂвше устремленье руское на ся, не доступивше, побЂгоша пред русскими полки. Наши же погнаша, секуще я̀. Дни 4 априля мЂсяца велико спасенье богъ створи, а на врагы наша дасть побЂду велику. И убиша ту в полку князий 20: Урусобу, Кчия, Аръсланапу, Китанопу, Кумана, Асупа, Куртка, Ченегрепу, Сурьбаря и прочая князий их, а Белдюзя яша. Посем же сЂдоша братья, побЂдивше врагы своя, и приведоша Белдюзя к Святополку, и нача Белдюзь даяти на собЂ злато, и сребро, и конЂ, и скотъ. Святополкъ же посла и́ к Володимеру. И пришедшю ему, нача впрашати его Володимеръ: «То вЂдЂ яла вы рота. Многажды бо ходивше ротЂ, воевасте Русскую землю. То чему ты не казаше сыновъ своихъ и роду своего не преступати роты, но проливашет кровь хрестьяньску? Да се буди кровь твоя на гла†твоей». И повелЂ убити и́, и тако расЂкоша и́ на уды. И посем сняшася братья вся, и рече Володимеръ: «Сь день, иже створи господь, възрадуемся и възвеселимся во нь»; яко господь избавилъ ны есть от врагъ наших, и покори врагы наша, и «скруши главы змиевыя, и далъ еси сих брашно людем» русьскым». Взяша бо тогда скоты, и овцЂ, и конЂ, и вельблуды, и вежЂ с добытком и с челядью, и заяша печенЂгы и торкы с вежами. И придоша в Русь с полоном великым, и с славою и с побЂдою великою. Сем же лЂтЂ придоша прузи, августа въ 1 день. Того же мЂсяца въ 18 день иде Святополкъ, и сруби городъ Гюргевъ, его же бЂша пожгли половци. Того же лЂта бися Ярославъ с мордвою, мЂсяца марта в 4 день, и побЂженъ бысть Ярославъ.\272\

В лЂто 6612 [1104]. Ведена дщи Володарева за царевичь за Олексиничь, Цесарюгороду, мЂсяца иулия въ 20. Томь же лЂтЂ ведена Передъслава, дщи Святополча, в Угры, за королевичь, августа въ 21 день. Том же лЂтЂ приде митрополитъ Никифоръ в Русь, мЂсяца декабря въ 6 день. Того же мЂсяца преставился Вячеславъ Ярополчичь въ 13 день. Того же мЂсяца въ 18 Никифоръ митрополитъ на столЂ посаженъ. Се же скажем: сего же лЂта исходяща, посла Святополкъ Путяту на МЂнескъ, а Володимеръ сына своего Ярополка, а Олегъ сам иде на ГлЂба, поемше Давыда Всеславича; и не успЂша ничтоже и възвратишася опять. И родися у Святополка сынъ, и нарекоша имя ему Брячиславъ, В се же лЂто бысть знаменье: стояше солнце в крузЂ, а посредЂ круга кресть, а посредЂ креста солнце, а внЂ круга обаполы два солнца, а надъ солнцемь, кромЂ круга, дуга рогома на сЂверъ; тако же знаменье и в лунЂ тЂм же образом мЂсяца февраля въ 4 и 5 и 6 день, в дне по 3 дни, а в нощь в лунЂ по 3 нощи.

В лЂто 6613 [1105]. Постави митрополитъ епископа Анфилофия Володимерю мЂсяца августа въ 27 день. Томь же лЂтЂ постави Лазаря в Переславль ноября въ 12. Томь же лЂтЂ постави Мину Полотьску декабря въ 13 день.

В лЂто 6614 [1106]. Воеваша половци около ЗарЂчьска, и посла по них Святополкъ Яня и Иванка Захарьича, Козарина: и угониша половцЂ и полонъ отяша. В се же лЂто преставися Янь, старець добрый, живъ лЂтъ 90, в старости маститЂ; живъ по закону божью, не хужий бЂ первых праведник. От него же и язъ многа словеса слышах, еже и вписах в лЂтописаньи семь, от него же слышах. БЂ бо мужь благъ, и кротокъ, и смЂренъ, огрЂбаяся всякоя вещи, его же и гробъ есть въ Печерьском монастыри, в притворЂ, идеже лежить тЂло его, положено мЂсяца иуня въ 24. В се же лЂто пострижеся Еупракси, Всеволожа дщи, мЂсяца декабря въ 6. В то же лЂто прибЂже ИзбыгнЂвъ к Святополку. В то же лЂто пострижеся Святославь, сынъ Давыдовъ, внукъ Святославль, мЂсяца февраля въ 17 день. Том же лЂте побЂдиша зимЂгола Всеславичь, всю братью, и дружины убиша 9 тысящь.

В лЂто 6615 [1107], индикта, кругъ луны 4 лЂто, а солнечнаго круга 8 лЂто. В се же лЂто преставися Володимеряя, мЂсяца мая въ 7 день. Того же мЂсяця воева Бонякъ и зая конЂ у Переяславля. Том же лЂтЂ приде Бонякъ, и Шаруканъ старый и ини князи мнози, и сташа около Лубьна. Святополкъ же, и Володимеръ, и Олегъ, Святославъ, Мстиславъ, Вячеславъ, Ярополкъ идоша на половци къ Лубну, и въ 6 час дне бродишася чресъ Сулу, и кликнуша на них. Половци же ужасошася, от страха не възмогоша ни стяга поставити, но побЂгоша, хватающе кони, а друзии пЂши побЂгоша.\274\ Наши же почаша сЂчи, женущи я̀, а другыЂ руками имати, и гнаша ноли до Хорола. Убиша же Таза, Бонякова брата, а Сугра яша и брата его, а Шаруканъ едва утече. ОтбЂгоша же товара своего, еже взяша русскии вои, мЂсяца августа въ 12, и възвратишася всвояси с побЂдою великою. Святополкъ же приде в Печерьскый манастырь на заутреню на Успенье святыя богородица, и братья цЂловаша и́ с радостью великою, яко врази наша побЂжени быша, молитвами святыя богородица и святаго отца нашего Феодосья. Такъ бо обычай имЂяше Святополкъ: коли идяше на войну, или инамо, оли поклонивъся у гроба Феодосиева и молитву вземъ у игумена, ту сущаго, то же идяше на путь свой. В то же лЂто преставися княгини, Святополча мати, мЂсяца генваря въ 4 день. Томь же лЂтЂ, мЂсяца того же, иде Володимеръ, и Давыдъ и Олегъ къ АепЂ и ко другому АепЂ, и створиша миръ. И поя Володимеръ за Юргя Аепину дщерь, Осеневу внуку, а Олегъ поя за сына Аепину дчерь, Гиргеневу внуку мЂсяца генваря 12 день. А февраля 5 трясеся земля пред зорями в нощи.

В лЂто 6616 [1108]. Заложена бысть церкы святаго Михаила, Золотоверхая, Святополком князем, въ 11 иулия мЂсяца. И кончаша тряпезницю Печерьскаго манастыря при ФеоктистЂ игуменЂ, иже ю̀ и заложи повелЂньемь ГлЂбовым, иже ю и стяжа. В се же лЂто вода бысть велика въ ДнЂпрЂ, и в ДеснЂ, и въ ПрипетЂ. В сем же лЂтЂ вложи богъ в сердце Феоктисту, игумену печерьскому, и нача възвЂщати князю Святополку, дабы вписалъ Феодосья в сЂнаникъ. И радъ бывъ, обЂщася и створи, повелЂ митрополиту вписати в синодикъ. И повелЂ вписывати по всЂм епископьямъ, и вси же епископи с радостью вписаша, и поминати и́ на всЂх зборЂхъ. В се же лЂто преставися Катерина, Всеволожа дщи, мЂсяца иулия в 11. В се же лЂто кончаша верхъ святыя богородица на КловЂ, заложенЂй Стефаном игуменом печерьскым.

В лЂто 6617 [1109]. Преставися Евпракси, дщи Всеволожа, мЂсяца иулия въ 10 день, и положена бысть в Печерском манастырЂ у дверий, яже ко угу. И здЂлаша над нею божонку, идеже лежит тЂло ея. В то же лЂто, мЂсяца декабря въ 2 день, Дмитръ Иворовичь взя вежЂ половечскыЂ у Дону.

В лЂто 6618 [1110]. Идоша веснЂ на половцЂ Святополкъ, и Володимеръ, и Давыдъ. И дошедше Воиня, и воротишася. Том же лЂтЂ бысть знаменье в ПечерьстЂм монастырЂ въ 11 день февраля мЂсяца: явися столпъ огненъ от земля до небеси, а молнья освЂтиша всю землю, и в небеси погремЂ в час 1 нощи; и весь миръ видЂ. Сей же столпъ первЂе ста на трапезници каменЂй, яко не видЂти бысть креста, и постоявъ мало, съступи на церковь и ста над гробомъ Феодосьевым \276\ и потом ступи на верхъ акы ко встоку лицемь, и потом невидим бысть. Се же бЂаше не огненый столпъ, но видъ ангелескъ: ангелъ бо сице является, ово столпом огненым, ово же пламенем. Акоже рече Давыдъ: «Творя ангелы своя духы и слугы своя огнь полящь», и шлеми суть повелЂньем божьимь, амо же хощеть владыка и творець всЂх. Ангелъ бо приходит, кдЂ благая мЂста и молитвении домове, и ту показаеть нЂчто мало видЂнья своего яко мощно видЂти человЂкомъ; не мощно бо зрЂти человЂкомъ естьства ангельскаго, яко и Моиси великый не взможе видЂти ангелскаго естьства: водяшеть бо я̀ въ день столпъ облаченъ, а в нощи столпъ огненъ, то се не столпъ водяше ихъ, но ангелъ идяше пред ними в нощи и въ дне. Тако и се явленье нЂкоторое показываше, ему же бЂ быти, еже и бысть на 2-е бо лЂто не сь ли ангелъ вожь бысть на иноплеменникы и супостаты, якоже рече: «Ангелъ пред тобою предъидеть», и пакы: «Ангелъ твой буди с тобою»?



Игуменъ Силивестръ святаго Михаила написах книгы си ЛЂтописець, надЂяся от бога милость прияти, при князи ВолодимерЂ, княжащю ему КыевЂ, а мнЂ в то время игуменящю у святаго Михаила въ 6624 [1116], индикта 9 лЂта. А иже чтеть книгы сия, то буди ми въ молитвахъ.










[КІНЕЦЬ]






Попередня     Головна     Наступна


Етимологія та історія української мови:

Датчанин:   В основі української назви датчани лежить долучення староукраїнської книжності до європейського контексту, до грецькомовної і латинськомовної науки. Саме із західних джерел прийшла -т- основи. І коли наші сучасники вживають назв датський, датчанин, то, навіть не здогадуючись, ступають по слідах, прокладених півтисячоліття тому предками, які перебували у великій європейській культурній спільноті. . . . )



 


Якщо помітили помилку набору на цiй сторiнцi, видiлiть ціле слово мишкою та натисніть Ctrl+Enter.

Iзборник. Історія України IX-XVIII ст.