Попередня     Головна     Наступна

ЛЂТОПИСЕЦЪ АЛБО КРОЙНИКА О ЗЄМЛЂ ПОЛСКОЙ, ΩТКОЛА ЛАХИ ЛАХАМИ НАЗВАНИ И ПОЛАКАМИ ΩТ ПЄРШИХ И ДАЛШИХЪ КН̃ЗЄЙ И КОРОЛЄЙ СОБРАНО З ЛАТИНСКИХЪ ГИСТОРЇЙ ПОЛСКИХ, НА РУСКИ ЯЗИК СПИСАНО РОКУ 1673

ЛЄХЪ ПЕРШЇЙ

Лехъ албо полякъ едного колЂна сутъ з русю, потомка Афета, сн̃а Адамова албо Ноева, языка словенского ωбое тие народи были и тепер сут военние и славние. Ное бл̃гослови Афета, абый владЂлъ и разширался. Імя тое Афетъ значит «розширене». Для того потомки его славне ωт слави название своЂм мужествомъ и справами рицерскими широко розширилися с того славного народу были два брати роднїе Чехъ и Лєх. Чех /190зв./ з свойми ωсЂлъ межи Дунаемъ і Лабою рЂками і тая земля ωт Чеха назвалася Ческою. Лех тежъ ωсЂл: над Вислою в поляхъ. Ωт котрого Леха ляхами й ωт поля поляками названи. Той Ляхъ много мЂст нЂмецких повоевал і под свою владзу подбилъ аи спокойвъшися мало ωт воини, проездился по полях і усмотрилъ мЂсця до будованъя мЂстъ и замков й найшолъ мЂсце барзо способное для доизбудованя мЂста и ωборони, где много гнЂдъ^А ωрълЂхъ било. На томъ теди мЂсцу заложилъ мЂсто первое й славное і назвалъ его ГнЂздно ωт гнЂздъ ωрлЂхъ, и собЂ за гербъ взялъ ωрла. Потомъ много звитязтвъ доказавши добре, сеи свЂтъ пожегнал.

ВИШЕМИР КНЯЗЪ ПОЛСКЙ

По смерти Леха йнъшие были князи над ляхами, рицерствомъ значние, по которихъ потомо^Б Леховъ Вышемиръ зостал кролемъ полскймъ. Той полское розширивъ панство ажъ до границъ Донского кролевства. А гдй Сивардъ, крол донскй, частими наездами докучал, поляком, тогди Бышемир^В пошовши з рицерством /191/ хорим себе вчинилъ и призвалъ до себе двадцати князеи, стриевъ своих, и просилъ их, абы по смерти его сн̃а, котрого з двох монархою посадили. Они охоче то ωбецали, если сенаторове полские зезволят, а жона Попелева чашу з трутизною наготовавши, дала им пити, жеби каждии за здорове монархи пилъ с тои чаши. Они тои здради не знаючи, ωхоче пили и вишовъши ωт Попеля, всЂ померли. Жена Попелева мовила, же бг̃и их скарали, ижъ изъ злою мислю до манархи пришли, казала тЂла их в ωзеро вкидати. З котрих труповъ за помстою Божиею без числа мишеи виишло, котрие миши ишли на замокъ Попеля и жону и дЂтей его гризти такъ, ижъ нЂ желЂзомъ нЂ огнемъ не могли их ωтогнати, ажъ мусЂлъ в лодЂ на воду втЂкати, але не помогло, бо валим^Г за ними миши пошли, а такъ з'или кроля живого и жону и дЂтеи его.

ПАСТЬ

По зиденю ωт мишей Попеля, собралися панове полские на ωбране монархи. Был тежъ в томъ мЂстЂ КруцЂфЂцнии^Д еден человЂкъ простого стану, але добрии. Тои для родин своего сина приготовалъ напитокъ рознии. А gди панство собралося в долгии час голод голод^Е ихъ притискалъ. Тогди тои чл̃вЂкъ дарма додавалъ имъ /191зв./ всякои харчЂ, що оние панове з великои любве с порадою вчинили его монархою полским, хочь подлого стану. Котрии пожилъ лЂтъ 20, славно докончилъ сего свЂта, сина едного зоставилъ по собЂ. Ωт того Пястя, монархи ишли ажъ до Людвика, свою лЂнЂю вєли. Семовитъ по смерти ωтца своего зосталъ монархою полскимъ мудре и мужне панствомъ радил ωт своего панства часто неприятелеи громилъ: венгров, чеховъ, поморчиковъ до даваня дани себЂ примусилъ. Чтири лЂта былъ на кролевствЂ, зоставивши сн̃а Леска, живота доконалъ Лєско 4.

ЛЄСКО 4

Року 995 [!] Леско Четъвертй барзо молодй, по смерти ωт̃ца своего зостал кролемъ полским і билъ под ωпекунами лЂтъ зросту своего и в молодомъ вЂку умер, прецяж поцътивости, Сємислава сина зоставил.

Року 921 Семиславъ по смерти ωт̃ца своего зостал монаръхою Полскимъ панством мудре керуючи, але ажъ у старости лЂтъ своихъ дождалъ сн̃а, але и то слЂпого. Назвалй его Мескомъ, в том скоро прозрЂлъ. И принесенъ пред всЂх и банъкетъ^Є. А гди питалъ вЂщковъ ωт̃цъ, повЂдЂли; из през него Полска просвЂтится ст̃им крещениемъ, що и стало такъ.Затим Семислав Семиславъ^Е в покою монархою^Ж /192/ ωставивши, скончился. По смерти ωт̃ца своего Меско, котрй слЂпимъ родивъся, зосталъ монархою. МЂлъ семъ жонъ, але з жадною потомъства не мЂлъ. Для того фрасвался^З, же билъ без потомства. НЂкорїе^И теди чужоземци хрестиянъство радили ему, аби принялъ вЂру хрестиянскую и едну жону мЂлъ хрестиянку, ωбецуючи ему ωт Бг̃а потомство. Послухавши той ради, Меско послалъ до кроля ческого Владислава, просячи ижби свою дочку іменемъ Добровку далъ. Ωбицял Владиславъ дочку свою дати, если би сталъ хрестяниномъ, бо чехове вперед приняли вЂру Хв̃у, нЂжъ ляхи. Меско з охотою зо въсЂмъ народом своймъ ωхрестилъся, (року 995)^І. Року 995 вмЂсто Меска назвался Мечеславъ. Понялъ за себе дочку кроля ческого Добровъку, росказавъ теж по всемъ панст†Полскомъ, аби всюди дн̃я 7 марта балвановъ розбивали і полили^Ї, що так учиненно, бо, пред тимъ поляки мЂли за бг̃а сл̃нце, мс̃ць, вЂтеръ, котрого звали Посвитъ, що свищет, вЂючи, Иωвиша, Плютона, Цереру, Ладо, Дияньну, также Лелюмъ, Полелюмъ. Котримъ балъваном празник, ωсобливе 25 мая и 24 июня, /192зв./ що і до сего часу Ладе, Лелюм, Полелюм споминают. На знак правдиваго своего хрестиянства постановивъ, аби под час служби Бож., якъ Ев̃глие читается, шаблЂ с похов до половини выимали, а якъ заспЂвают «Слава тебЂ, Гди», тогди би в похви ховали, такъ сознаючи, иж готови ажъ до смерти бится за вЂру хрстиянъскую. I много поставилъ Мечеславъ церквеи і епископовъ установилъ. З Добровки Влаславовни^Й мЂлъ сн̃а Болеслава Храбърого. Породивши, заразъ умерла і похована у ГнЂзъднЂ. Потом другую жону взял Юдифу. Тая ему вродила сн̃а Мечислава. Затимъ умеръ.

Року 999 Болеславъ Храбрй, ωт своих значнихъ дЂлъ рицерскихъ Храбрй названй, ωбранй на монархию. Той будучи названй набожним ωткупил золотомъ ВойтЂха, ωт прусъ забитого. Котрие мощй Ωтомъ^К, цесар римъскй приехалъ з Риму до Полски, навЂжаючи того. Болеславъ, монарха полъскй, стрЂлъ за 7 мил, великую почест ему чинячи, сукномъ дорогу ему устилалъ, з великим достаткомъ честовалъ у ГнЂзъднЂ. Потомъ Болеславъ, много краевъ і панъствъ, аж до моря Венецкого, й желЂзнихъ столповъ два укополалъ^Л роспростершй границъ, славного сн̃а по собЂ Меска /193/ зоставилъ, ωн умер. Меско албо Мечеслав кролевалъ лЂтъ девят гнюсно, згинулъ.

По смерти Мечеслава Второго стала незгода, бо едни хотЂли Ярослава киевского, але же былъ вЂри грецкои, а видячи то, кролевая, же еи сином погоржаютъ, побравъши всЂ скарби, из синомъ поехала до брата, цесара Саскои землЂ. Дала сина Казимера до Парижа на науку. Котри потом сталъ мнихомъ. Тим часом і Ярославъ киевъскии без ωтпору попустошилъ землю Полскую, а Братославъ ческии з другои сторони повоевалъ Шліωнскъ, Врациславъ, Познан, ГнЂздно попустошилъ. Видячи то панове полские такую шкоду, послали по кролевича Казимера, яко дЂдича. Але кролевичъ ωтмовлялъся, же зосталъ законникомъ. Теди за прозбою пановъ Венедиктъ, папЂжъ, Девятии, разрЂшилъ Казимера ωт габита и позволилъ бити кролемъ полскимъ. Казимер першии року 1041 по вЂстю з наукъ приехалъ до ГнЂздна, зосталъ кролем полским. Перше драпЂжниковъ ускромилъ, потом тих, котрие з дани вибилися, /193зв./ знову дават примусилъ. Потом значние военние штуки показовалъ и взялъ за себе Марию, дочку князя Ярослава киевского, для которои збудовалъ в Крако†церковъ рускую. З нею мЂл чтирох синовъ Мешка, Болеслава, Ωтона, Владислава и дочку Святохну.

Болеславъ ωт смЂлости анЂмушу названии СмЂлии. Року 1068 старшии синъ Казимеровъ зосталъ кролемъ полским. Зараз Вратиславъ, ческии кролъ, поднес воину противъ Болеслава, вторгнулъ до Сліωнска, пустошачи, Болеслав, собравши воиска, рихло прогналъ Вратислава и в Ческои землЂ побравъши користи, вернулъся.

Року 1173 Мечеславъ Третии Старии, братъ Болеславъ^М зосталъ кролемъ полским, але былъ барзо лакомии и ωкрутнии на всЂхъ, новие незносние установлялъ падатки не тилко на простих, але и на шляхтЂ дань бралъ. Для того и двор его нЂкому был невдячний. Гди теди поехалъ до Великои Полщи, сенаторове послали по меншого его брата и дали ему, Казимеру, кролевство.

Казимер Справедливии зостал кролем полскимъ, /194/ права брата своего покасовалъ и шарпачовъ ускромилъ, справедливе пановалъ, за що его всЂ любили. Потомъ принялъ и Мечислава, брата своего, и далъ ему Познанское панство княжение, а самъ пошол на руских князеи воевати, на Всеволода и Владимера, где гди з воиском забавилъся, братъ его Мечиславъ знову кролевства жадаючи, пошолъ з людом до Кракова и взял мЂсто Краковъ, але замку не взялъ, Казимер, тое почувши, вернулся з воискомъ своимъ, взявши князеи руских Романа и инних. А пришедши, взялъ Краковъ и бунтовниковъ годне скаралъ, а иншихъ волно пустил. Потом Прускую землю под себе подбивши, с трутизни умер.

Року 1247 Батии в шестикротъ сто тисячей вишолъ, повоевал всю землю Рускую и Прусовъ и Полскую землю мечемъ и ωгнемъ. А гди Болеславъ з Генрикомъ барзо воиска маючи много противъ татар виишли, татарове все воиско их розбили, Болеславъ ледво сам утЂкъ. А татаре, хотячи знати много люду побили, /194зв./ по едномъ уху в кождого чл̃овЂка ωтрЂзовали, але мЂховъ, девят наполнили. Тогдижъ венъгровъ звоевали, три лЂта держали землю Венгерскую, там и Батия забито.

По виистю татар Болеславъ, кролъ, вернулъся на столицу, кролевалъ лЂт 26 безъ жони увес вЂкъ свои. Бувъ для того Встидливим названъ.

Тогожъ року жона шляхецкая вродила 36 дЂтеи. Тогожъ року в землЂ Краковъскои в Калишу вродилося дитя з двома головами, а ногъ сЂмъ мало. Того трупа нЂ птахи, нЂ пси не или. Тогожъ року у Шліωнску дожчъ ишовъ кривавии 3 дн̃и.

Ягело, великиы князъ литовъскии, з Борисом и Витолтом вехалъ у Краковъ, ωт всЂхъ вдячне принятии и впроважении на кролевство до кролевни в замокъ, зо всЂми братами ωкрестился, Владиславом назван и Великое князство Литовъское, и Руское, и Подолское подвернулъ и присягою потвєрдилъ. Того жъ дня и вЂнчалъся з кролєвною Ядвигою и заразъ в пост великии поехалъ до Великои Полъщи и всЂ розрухи ускромилъ, /195/ потом поехалъ до Литви з множеством пановъ полских и со архиепископом глинензенским^Н. Приехавши до Вилня, росказалъ, абы Лотва^О и Жмод, крестилися. Тамъже княжения подовъши^П Литовъское Витолту, вернулся до Полскои, пошол просто Шліωнска воевати, тамъ мЂста зголъдовавъши, додому вернулся. Затимъ умре Ядвига, ωженилъся з другою жоною.

Того часу Витолтъ Киевъ взялъ подъ Владимером, княземъ киевъским, и татар громилъ. Але посля ωт воискъ Темерияна, великого царя, был розгромлен року 1398. Тои Темерлиянъ страшенъ билъ всЂму свЂту, Азию немалую посЂлъ былъ, Блезета цара турецкого, звЂтяжилъ и в желЂзнои клЂтци возилъ на него вступаючи, всЂдалъ на коня. А гди якого мЂста добивалъ, першого дн̃я сидЂлъ под бЂлим наметомъ, значачи свою ласку, если здадутся, другого дня по червонимъ, знакъ даючи за упоръ кровопролитие, третего по чорним — всего мЂста знищеня.

Потом Ягелю еще взял четвертую жону, князя куевъского дочку, котрая ему уродила двох синов: /195зв./ Владислава и Казимера. ЗостарЂвъшися, умер, похован в КраковЂ.

По смерти Ягеліωна Владиславъ, синъ его, року 1434 зосталъ кролем полским. А ги^Р Жигмунтъ, цесар римскии, помер, за прозбою пановъ венгерских кролем венгерским коронованъ. Потом року 1443 Владиславъ пошолъ на турка воевати мЂста зацние, котрие турчинъ билъ позабиралъ, ωтискалъ. Там своего воеводу семигродского виправивъши, турковъ моцно побилъ; там башу посланого для ωборони Македонии з немалим воиском, так збилъ, же ажъ и сам Амуратъ, цесар, боячися, слалъ пословъ, ωтдаючи мЂста всЂ рацкие, ωтдалъ, примиря просячи. Там кролъ змирилъ з цесарем и присягли собЂ ωдин другому. Затим поселъ приехалъ ωт папежа, радячи, аби присягу и покои розорвалъ с турчином. Кролъ, послухавъши попЂжа, року 1444 з воискомъ пошолъ на турка. Що почувши, турчинъ Амурат дивовался нестатку християнскои присязЂ, собралъ воиска домового, уфаючи, же присяги кролъ не додержалъ. Подле Чорного мора сточилъ валечную воину /196/ з Владиславом. Тамъ барзо много християн турчинъ побивъ, где и самъ кролъ забитии зостал.

КАЗИМЕР ЧЕТВЕРТИ

По смерти Владислава ажъ на четвертии рокъ Казимер, брат его, зостал кролєм полъским року 1447. Петръ, господар волоскии, присягъ кролю и дан поступилъ и просилъ кроля, аби помочи ему давалъ, где мужне штукъ военнихъ доказавъши, Яна сина зоставивъши, померъ. По смерти Казимера, синъ его, Янъ Ωбритъ, зосталъ кролемъ полъскимъ до которого турки присилали, примЂря жадаючи, с котрими до часу примирилъ. Потомъ року 1494 кролъ Ωлбритъ з братом своимъ Владиславомъ учинил раду, а злучивъши воиска ωбоих кролевстъ ити на турка. Але тим часом Іван Василиевичъ, великии князъ московъскии, ударилъ на Литовъские краи и побралъ мЂста Вязму, Хлепен, Мещовъ, Любоцкъ, Серпоховъ, ледво его упросилъ прєз посли князъ Александер литовъскии. Року 1497 собравши воиска великие, Ωлбрит на турка пошолъ, але перше хотЂл Стефана, /196зв./ господара волоского, зогнати с панства, а посадити тамъ брата своего. И пришовши до Лвова, послалъ до Стефана, би ему далъ воиска на турковъ. Обецалъ тое Стефан сполнити и живности дати воиску кролевскому. Але gдy^С ωбачил зраду, послалъ посли до кроля Ωлбрита, жеби тои воини понехалъ але того крол не слухал, любо мЂлъ еще во Лво†идучи, добрии^Т знак, бо еден шляхтичъ заишол билъ в голову и кричалъ: «На свое лихо наши идут!». Кон добрии под кролем упавъ и здох, гди выеждалъ зо Лвова. Едного шляхтича в наметЂ з двадцатми конми Перунъ забивъ. Кролъ на тое не дбаючи, ωблегъ Сачаву. Але за порадою Владислава вчинилъ примире з Стефаном, до того захорЂвши, вернулся до Полщи и пошовъши, воиска полские шкоди великие чинили по мЂстах и селах. За що во лохи, розгнЂвавшися, ударили на полское воиско. Там и сам господар воиска подвЂвъ и значних пановъ позабивано полъских и в неволю побрал. А такъ поляками ωралъ и насЂялъ жолудя, где великое дубя поросло и тая дуброва Лядзскою називается, /197/ недалеко ωт мЂста Ботана названого.

Року 1494 било тепло так великою, же в генвару и февралю квитнули древа, ωстатокъ на марцу посхло ωт морозу. Того жъ року жона подле Кракова дитя вродила з ужемъ посполу, котрии ужъ моцно дитя гризъ. Другая жона вродила дитя з двома головами, една на звичаиномъ мЂстци, а другая — на хвостЂ, бо сЂмъ хвостовъ мЂло.

Року 1498 Стефанъ з своим воискомъ убегши в Подоле, велие шкоди починилъ, много мЂстъ попалилъ, люд побилъ, а других в кеволю побралъ. Тогди князъ московъскии Іван Василиевичъ розгнЂвавшися на Александра, князя литовъского, за границу и за тое, же ЕленЂ, дочцЂ Івана Василиевича, а своеи женЂ не хотЂлъ у ВилнЂ церкви змуровати, воевалъ моцно Литву и побралъ мЂста Брянскъ, ЧернЂговъ, Стародубъ, Новъгород СЂверскии. Князъ Литовъскои послалъ билъ гетмана князя Константина Ωстрозского и Миколая Радивила Москву воевати, але их москва /197зв./ збила и самих поимавъши, до везеня подавано. Тогдижъ и СапЂгу поимали москва и вес СЂверъ спустошила. А кролъ, до Торуня приехавъши, захорелъ и помер у 40 лЂтъ.

Александєр по смерти брата своего Ωлбрита зосталъ кролемъ полъским, змуровалъ церковъ в Крако†рускую для Елени царевни, жони своеи. Где еи руские священники набоженство ωтправовали. Потом Александер, много значних рицерских речии доказавши, доконалъ жития своего року 1506-м похованъ у Вилню. Был кролем чтири лЂта.

ЖИГМУНТЪ I

По смерти кроля Александра, братъ его Жигмунтъ Казимеровичъ зосталъ кролемъ полскимъ. Речъ Посполитую побудилъ з волохами, котрие пустошили землю и самии Лвовъ зодрали. Тих прогналъ, великие воини точилъ з москвою, Смоленскъ взял мЂсто, котрое Витолътъ, князъ литовскии, пред стома лЂти взялъ билъ под москвою. До того с прускими мистрами мЂвалъ воину.

Тогож року цар турецкии Волоскую землю под свою моцъ подбилъ. Потом кролъ Жигмунтъ помер, похован в КраковЂ, /198/ року 1548.

При том кролю нЂякис Яковъ Мелстинскии з Березини мЂста учинилъся Хрстом и к нему присталъ Петръ Заторскии, мещанин краковъскии, а иншие учинилися апостолами и много людеи поωшуковали. Але гди их шалбЂрство в едномъ селЂ познано, рекъ теди тои, що звалъся Хстомъ до Петра: «Петре! Уже приходит мнЂ чаша моя, мушу еи пити». А Петръ рекъ: «И я вослЂдъ тебе иду, не ωставлю тебе!». А такъ побЂгли, а людє киями били, доганяючи, питали: «Прорци намъ, Христе, где тие кии росли».

По смерти Жигмунта Першого, син Жигмунтовъ, Августъ Жигмунтъ зостал кролемъ полским. Справовалъ мудре кролевством, бо Августъ Жигмунтъ покои любилъ, зрос в пещотках при матцЂ презъ 17 лЂтъ, нецвЂчонии у военних справах, еднакъ мудрЂи умЂвъ килка язиковъ, без потомства помер. Потом през часъ немалии без кроля була земля, ажъ Генрикъ князъ Боргонзскии, зосталъ кролем полскимъ, але не долго билъ на кролевст†полскомъ, бо потом гди пришли листи /198зв./ ωт матки до кроля Генрика ω смерти брата его, ωзнаимуючи, а кроля французского, ωнъ радилъся сенаторовъ своих, щоби мЂлъ с тим почати. Они тое до сеиму ωтложили, а гди другое писмо ωт матки пришло с таким указомъ, же если би до 20 дня не прибулъ, то утратит кролевство французское. Для того ωнъ сеиму не ждучи, поехалъ до ФранцЂи, тамъ зостал французским кролемъ. Поляки любо пристлали по его, на кролевство взиваючи, але ωн поехалъ зъ столицЂ ωтцевскои. Поляки порадивъшися, з дому Ягеловъ Анну за кролевую приняли. А Стефана семигродского Баторого за мужа еи, а собЂ за кроля приняли.

Року 1576 Стефан Батории кролемъ зосталъ, але гданщане его не схотЂли и воину поднесли, ажъ ледво их кнзЂ помирили. Потом кролъ уфалилъ трибуналЂ аби толко шест духовних, а шест свЂстцких ωсобъ было. А при болъшои части згоднии декрет аби бивалъ. Затим кроль, зобравъши, воиска, ходил под Полоцкъ и взял под свою моцъ, и Туровлъ и Соколъ тамъ взяли воевод двохъ /199/ Шеремета и Бориса Шеина. В тои часъ Костантин, князъ Ωстрозскии, ЧернЂгова добувалъ, але не добилъ. Потомъ. крол под мЂста московские, взялъ Торопецъ, Невель, Езерища, Псковъ, в которомъ било воевод 4. Того Пскова моцно крол добувалъ, ωблегши штурмами, гранатами, але все дарма. Затим зима наступила. Там ωставил кролъ гетмана, самъ до Вилня пошолъ. Потом змирилъ з Москвою гетман и поляком ωтдал мЂста, але не всЂ.

Року 1583 за Григория, папи римского, Тринадцатого, календар уставили, десятъ днеи помкнули и свята порознили, где мусят ся з велконоцю сЂмо и ωвако часомъ з русю, часом з жидами целеброватъ.

Потом Стефан, кролъ помер в ГроднЂ, року 1587. По смерти Стефана Баторого Жигимунтъ Третии кролемъ полским коронован, кролевичъ шведскии. Того жъ року собор про унЂю. Але тои унЂи панове рускии и шляхта и дх̃овенство руское не приняли.

Року 1597 Наливаико, гетман запорозскии, воиско зобравъши, Литву плюндровалъ, шляхту забивалъ /199зв./ не любячи унЂи. На которого гетманъ короннии Жолъковъскии з воиском полскимъ пошовши, розгромилъ и самого Наливаика поимавши, на СолоницЂ под Лубнями, привезъ до Варшави, где на мЂдянои кобили его спалили.

Року 1599 шведскии губернатор, стрии кроля Жигмунта, виказал послушенство^У кролю и КоронЂ Полскои. Для чого самъ крол Жигмунтъ з воискомъ ходилъ до Шведскои землЂ и знову привернулъ под свою владзу. Року 1600 Мигалъ, господар молтянскии, змовивъшися из шведами, повставъши противъ кроля, посЂлъ землю Волоскую. Господар волоскии втЂкъ до Полщи, а Мигалъ воевалъ ωколо Каменца-Подолского. Тогди и кардинала папежского забито. Затим Замоисцкии, гетман короннии, з иншими панами, собравши колко могли воиска, поишли до Влох, учинили битву з Мигалем и розбили воиско Мигалево, корогвии болеи двохсот воиска мултянского привезши на памятку, по костелах повЂшали.

Року 1604 Дмитрия, котрии повЂдалъ себе бити царевичомъ, князъ Ружинскии с Полскии провадилъ го столици московъскои /200/ на царство. Почувши то, москва ему приязная, забили своего цара власного Феодора Борисова и его царицу Марию Годунову. А Димитрия того приняли. Котрии не билъ Димитрием, але былъ, повЂдаютъ, Гришком, царствовалъ рокъ цЂлии и привезено ему з ПолщЂ нЂякуюс панну за жону. Але в рокъ его баламутню москва познали, тамже в палацу царском забили и пановъ, котрие при нем були, зацнЂиших до Полщи ωтослали, инших побили. А на столици Василия Івановича царем московъским поставили.

Року 1605 судерманское ксїωнже, стрии кроля Жигмунта, с подданства кролевского виломалъся и учинилъся кролем шведкимъ и з воискомъ своимъ переправившися, наехалъ на Инфлянти и посЂлъ и Ригу облегъ. Крол Жигмунтъ того не терпячи, собралъ воиска за справою гетмана Хоткевича литовъского, пошолъ противъ шведом под Ригу. Там же на помочъ кролеви прибил ксіωнже курделянское и, сточивъши битву изъ шведами, шведовъ розбили и самого гетмана шведского /200зв./ забили, девятдесят тисячъ шведовъ забили, а иншие у ДзвЂнЂ рецЂ потонули и сам вожъ утЂкъ ранении.

Року 1611 Жигмунтъ взялъ ωт Москви Смоленскъ. Тих же часовъ забунтовавшися москалЂ, царя своего Василия Івановича постерегли в чомъ и ωтдали ляхом, а кролевича полского Владислава за цара приняли. На том и присягли кролевичу, а Владиславъ кролевичъ писалъся царем московимъ. А поляки ωбняли царствующй градъ Москву, в КитайгородЂ мешкали. Потомъ гетманъ коронй Жолковъскй з войскомъ полъским і литовъскимъ пришолъ, шкод много поробили. Три рокй держали царство Московскоє, на четвертй рокъ, собравши кн̃зЂ мост и бояре воска^Ф немалие, пришовши на денъ ст̃ого Дмитрия, взяли царство ωт поляковъ, ихъ вибивши посадили на столЂци Михаїла Федоровича, року^Х Романовихъ.

Року 1615 Жовъковскї, гетманъ коронй и иншую пани полские на ЦециωрЂ гетману Жолковъскому голову ωттяли ^Ц—и ка^—Ц і казали, аби на копй перед воискомъ татарским голову синъ его возил. /201/ А инъших пановъ кн̃зЂ Корецкого цр̃у турецкому ωттослали.

Року 1619 кролевичъ Владиславъ з великимъ войскомъ ходилъ на Москву, самое столЂци крЂпко, але потомъ примире вчинили декамъра 6 на денъ ст̃ого Николая.

Року 1621 Феωфанъ, патриярха иерусалимъскй, пос̃тил Иωва Борецкого в Кие†на метрополию киевъскую, Ісаїю Копистенского на архиепископию смоленъскую, Исакия Борисовича — на епископию владимерскую, Смоленскомъ [?], Аврамия Стигонского — на епископию туровъскую. Того жъ року цесар турецъкй Ωсманъ поднесъ воину противъ КоронЂ Полъской. Кролъ Жигмунътъ послалъ сн̃а своего Владисла^Ч противъ турка з воском^Ш, самъ посполитимъ рушеням ωстался, воиска збираючи болъше. Владислав, кролевичъ переправившися черезъ ДнЂстръ, стал под ХотЂнямъ у Волоской землЂ ωкопалисъ. Цар самъ турецкй Ωсманъ, маючи войска девет кротъ по сто тисячеи, шол до Волох через Дунай войско 40 дней і 40 ночеи перепровлялося. Впередъ пришол Каракаш-баша і сточил бытву з ляхами под ХотЂнямъ. Тим часом пришол і сам цръ /201зв./ турецкй. В тои бит†14 тисяч турковъ легло нагло. Теж и козацкое воиско з Сагаидачним гетманомъ. Поляки розне рвали таборъ турецкй. Але козаки тихо ночу пробилися ажъ до самого цр̃я турецкого намету. Цр̃ъ, перестрашенй, з намету втекъ.

Тимъ часом много турковъ козали^Щ позабивали. Тамъ цръ турецкй барзо ся стривожилъ. А гди почулъ, же и самъ крол еще противъ туркахъ тягнет, болше му^Ю прибуло три^Я тривоги. До того стал голод в турецкомъ воиску, же шматъ хлЂба по червономъ золотому куповали, а воиска козацкие и полские всюди турковъ били. Для того цар турецкй учинилъ примире с кролемъ Жигмунътом. Турчинъ вернулся до своеи землЂ, а поляки з великим веселям в Полъщу пошли. Тамъ турковъ якъ ωт голоду, такъ ωт бою пропало пят крот по 100 тисячей, за що панове турецкие розъгнЂвавъшися на Ωсъмана царя, тятивою удавили, а сна его посадили на царъствЂ.

Року 1630 гетманъ козацкй Тарас зобравши воиско, збунътовалъся и на поляковъ, противъ котрого гетманове короние з воискомъ под Переясловлемъ воину точили. Тамъ немало козаки ляховъ побили; золотую короговъ збили /202/ гусарскую, потомъ вчинили примире. Тарас, гетманъ, присягъ кролю на подданство, а крол тую войну пребачилъ. Того ж року мор былъ по всей УкраЂнЂ, почался мц̃я іюля, а скончився декавра. Того ж року помер Иевъ Борецки, митрополит киевскии, похованъ в монастиру Золотоверхого Михайла. Року 1633 крол Жикгмунтъ помер, 40 лЂтъ былъ.

Тогож року Владиславъ, синъ Жикгмунтовъ, Четверти, ωбраннй зосталъ кролемъ полскимъ. Тогож року Петръ Могила, воеводич волоскй, архимандритъ печерский, пос̃ще на метрополїю киевскую. Котрому кроль Владиславъ ωтдалъ церковъ столечную метриполитанскую Ст̃ои Софииской, монастир Видубицкий и Ст̃го Сп̃са Печерскомъ монастиру в местечку и Десятинную Бц̃и з слободою СофЂйскою. Котрие всЂ, церкви унЂяти дєржали и пустили били до конца, котрие церкви, одержавши привилиЂ ωт кроля, поωпровлялъ великимъ коштомъ, также и монастиръ Братскій в Кие†розширилъ и коліеумъ уфундовалъ.

Року 1634 кролъ Владиславъ под Смоленскомъ ШеЂна зь /202зв./ московским войскомъ великимъ, котрїе тамъ Смоленска добивали, звоевалъ. А кгди просили о примире, крол з ними вчинилъ примиря, але риштунки военнїе всЂ казалъ ωт нихъ отобрати, ШеЂна отпустил.

Року 1637 гетманъ коронний Потоцки ходилъ на козаковъ за их бунти и декамвра 7 дня под Боровицею тихъ козаковъ розгромилъ. Потомъ знову под Старцем козаковъ громили. Там учинили згоду пн̃ъ КисЂлъ и иншїе панове присягли козакомъ именем гетмана коронного, же над ними не мститися. А козаки вЂрност присягли кролєви и Речи Посполитой. А посля той присяги, взявши Павлюка, гетмана козацкого, в Варша†стратили, а Кизиму, сотника киевского з его синомъ и з иншими в Кие†на палъ позабивали. Тие тЂла много стрЂмили на паляхъ. И постановили поляки, абый болше шести тысячъ козаковъ реестровнихъ не было и гетмана, аби и козаки сами собЂ не оббирали, але кого им кролъ подастъ. И полковники над козаками аби поляки были, а на Запороже, абы полковники на залогу ходячи, перестєрЂгали, жебии якие бунти не щалися. Року 1639 гетман /203/ коронний панъ краковский Кодакъ ωсадилъ. Року 1647 генвара 1 Петръ Могила, метрополит киевский, ωборонца великий и розширитель православия, помер. Поховалъ^Ь в церкви велкой Печерский. По смерти его зосталъ метрополитом Силивєстр Косовъ.

Року 1648 Богданъ Хмелницкий с Чигрина пошолъ на Запороже и с татарскимъ мурзою Тугай-Беет^А сприсягся противъ поляковъ. Тогди гетманове коронние Потоцкий и Калиновский бислали Шемберка, комисара, с козаками рейстровими и з частю полского войска. Тогди и сами гетмани пошли за ними жъ. А гди пришли близко Запорожя, козаки реестровие передалися до Хмелницкого и татаръ и стали против поляковъ. Побачивши гетмани и Шемберко зраду, почали входити, але их Хмелницкий догналъ с козаками и ордою на Жовтих Водахъ у Княжого Байраку, розбили ихъ и Шемберка и з иншими взяли в неволю. А Потоцкого ранного на Запороже ωтослали, там же умеръ. Тогди ж поляки Читринъ⁶ випаливши, вступили под Корсунъ з войском. Стали противъ Стеблева /203зв./ за рЂчкою Росю. Тогдижъ Корсунъ спалили. А Хмелницкий с козаками и татарми припавши, обохъ гетмановъ коруннихъ розгромилъ и татаромъ подавалъ самих и много панов посли Вознесения Гд̃ня, котрие напотомъ повикупалися.

Тогди заразъ кн̃зь ЕремЂяшъ Вишневецкий из ЗаднЂпра уступилъ, а под Прилукою розграмилъ козаковъ полку Уманского и инших. А Кривоносъ, полковникъ Хмелницкого, пришолъ у сороку тисячъ козаковъ до Полоного, где било много шляхти и люду посполитого и взялъ мЂсто Полоное и шляхту, котрие не могли утечи, а жидов велико мнозство вистинали. Вишневецкїй, кн̃зь, до Полщи втекъ тогди. Того ж часу полковникъ Ганжа пошолъ з немалимъ воискомъ козацкимъ под Твилъчин^В. В котромъ мЂстЂ вся шляхта воеводства Браславъского била заперлася и князъ Четвертенский з ними ж заперся. Тогди моцно Ганжа мЂста добивалъ, шляхта с Тилъчина просили примиря. Ганжа з ними примире вчинилъ. Потребовалъ того, аби ему жидовъ видано и такъ шляхта жидовъ со всею маетностю видали, а онъ их побравши ωтступилъ ωт Тилчина. /204/ После его рихло другий полковникъ Хмелницкого Оставъ^Г Иванский пришолъ з войскомъ, добилъ замку Тилчинского шляхту вибилъ. Гсдь^Д кнзь Іоанъ Четвертенскїй забитъ, а княгиню его взято до Умани в неволю. Того ж року кролъ Владиславъ померъ у Вилъню.

Потомъ Хелницкии^Е потягнулъ з войскомъ на поляковъ. А против его пришло все войско полское, Вишневецкий и ДомЂникъ, иншие пани. А такъ притиснули били козаковъ, же почали бити втЂкати, але пани полские с пихою своею еденъ другого не слухали. В томъ Хмелницкому на помочъ притяло^Є орди шестъ тисячъ. А ляхи, взявши язика ω томъ, же и самъ ханъ ідетъ, покинувши увесъ ωбоз и весъ скарбъ, против Воздвиженїя чсн̃аго кр̃ста всЂ рейментарове куди хто луча ночю повтЂкали. А Хмелницкий за ними потягнули^Ж поди Лвовъ. А татаре много селъ и мЂст попалилъ^З и побрали в неволю побрали^Д . Тогди лвовяне многимъ скарбомъ ωткупилися. Потом под Замостя притяг Хмелниц., але также и З[амостя]^И окупил[ося]^И. Части засъ татарскїе и козацкїе по Завислию пустошили. А в томъ зЂма надойшла. /204/ И такъ ωшацованнимъ скарбомъ татаре з людомъ козаки додому повернули.

Року 1649 Янъ Козимеръ, братъ родний кроля Владислава, ωбраний кролемъ полскимъ, с кляштора, габитъ покинувши, вийшол. Заразъ навеснЂ войска полскїе послалъ противъ Хмелницкому. А Хмелницкий также войско зобравши, тягнулъ ис татарми поляковъ воевати. И пришолъ под Збражъ^І. Тамъ споткалъ воиско коронное з гетманомъ. Тамъже були кн̃зЂ Вишневецкий и ДомЂникъ з великимъ войскомъ и не давши поля, заперлися в Збаражю. Тамъ ихъ Хмелницкий през шестъ недель добивалъ и такъ запер, же нЂωткол живности не мЂли, мусили стерво исти, умирали з голоду. А въ томъ сам Янъ Казимер с посполитим рушенямъ притятъ под Зборомъ^Ї. Там татаре кроля ωскочили так, же ледво у Зборовъ ухватился. Затим кролъ през посли упоминалъ Хмелницкого до покою и подданства, ωбецуючися все на жаданя его справити. Тогди Хмелницкий покорне до кроля пришолъ и поклонъ ωтдалъ и покой учияилъ. Где кролъ ему словомъ панскимъ /205/ вшелякїе волности козацкие и руси в бл̃гочестиЂ, в ωтпра†церемонЂ церковной дати все ωбецалъ. Такъже церкви ωт унЂятовъ подавати на бл̃гочестие. До того тежъ становит къ жолнЂромъ на УкраЂнЂ указоватъ не ωбецалъся и на всякую волностъ пункта подалъ, а татаромъ за вислугу позволилъ кролъ много мЂстъ на Подолю. Котрие могли би ся боронили, але козаки упевняли мещан, а такъ за козаками татаре в мЂста ходили и людъ и скарбъ брали.

Тогож року приехалъ до Киева ст̃Ђйший патриярха иерусалимъскїй Паисий, до которого и Хмелницкий приездилъ по бл̃гословенїе. Тогди ж и Адамъ КисЂлъ на воеводство Киевское пиехалъ^Й. Року 1650 Хмелницкий послалъ сн̃а своего старшого Тимоша з воискомъ и татарми у Волоскую земълю, всю попустощилъ и взялъ дочку у Василя, воеводи волоского, за жону. Того жъ року преωсщенний митрополитъ киевскїй Силивестръ Косовъ постилъ чотирохъ еп̃сповъ православнихъ Иосифа Чиплича^К на ^Л—спасенїю лукою^—Л, Иосифа Горбацкого на еп̃спию могилевскую /205зв./ Деоωисия Балабана на еп̃спию холмовскую, Антония ВинЂцкого на еп̃спию премискую.

Року 1651 гетманъ коронний Калиновский, вийшовши з неволЂ татарской, пошолъ з войскомъ под Красное, где заперся билъ Нечай, полковникъ браславскїй козацкий, и взялъ мЂсто. Тамъже и Нечая забито на масляномъ^М недЂлЂ. Ωттолъ пошолъ до ВинЂцЂ. Тамъ в монастиру заперся билъ Богунъ, полковникъ паволоцкий. Где моцно добивало войско деветъ дней. В томъ Хмелницкїй прислалъ на ротунокъ Богуно†Демъка, своего асаулу, з войскомъ. Тогдижъ Калновскїй^Н, мостъ запаливши на Бугу, ωтишолъ до Бару, а дале в Полщу пошолъ. Того жъ року навеснЂ Хмелницкий з ханомъ татарскимъ пошли на Полскую землю. Под Берестечкомъ споткалъ его кролъ Казимеръ зо всЂмъ войскомъ. Тамъ козаки стали в лядаякомъ мЂстцу на болотЂ, где ханъ с татарами ωтступилъ Хмелницкого для того, ижъ барзЂ ляхи на татаръ напирали, нЂжъ на козаковъ. Ωттолъ татаре розумЂли, що змова естъ межи ними. А такъ ханъ взялъ Хмелницкого, пошолъ на ВкраЂну додому. Тоды кролъ козаковъ могъ би всЂхъ погубити /206/ и в болотЂ потопити, але ласкою войско свое задержалъ. Еднакъ сами козаки стривожившися, покинули весъ обозъ, куди хто могъ утЂкатъ почали. А тамъ сами собою загатили болото, же иж якъ по мосту по трупу ходили. Тую речку Пляшовою називали, а другою за милю Ихъва, такъже болотная.

Ωттолъ кролъ пошовъ до Полщи, а Калиновскїй с квартянимъ войскомъ пошолъ на Украину под БЂлую Церковъ. А Хмелницкїй у КорсунЂ болшъ почалъ войска прибирати, послалъ ^О—О тотаровъ. Тимъ часомъ кн̃зъ Радивилъ, великий гетманъ литовскїй, і генсевскии, гетманъ полскїй, з войскомъ литовскимъ под Киевъ пришли. Антонъ, полковникъ кїевский, почалъ билъ с Киева боронитися. Але гди ωбачилъ немЂру, уступилъ с Киева с козаками. А Радивилъ Золотими воротами вехалъ в Киевъ, сталъ самъ у Ст̃ой СофиЂ и з монастировъ, шщо хотЂлъ, бралъ. ТогдЂ Кїева немало спалилъ и монастиръ Братскїй, толко цр̃ковъ ωсталася. Затимъ Калиновскїй под БЂлую Церковъ пошолъ, бо тамъ було войска полки три козацкїе и ωкопалися на предмЂстю ωт Киева. Потомъ Хмелницкий пришолъ з войскомъ /206зв./ и с татарми, где такъ войско лядское стиснули, ижъ перед имъ живности, нЂ конемъ не стало. А потомъ и воду имъ ωтняли, ωт посту Спасова до осени такъ зморени поляки учинили покой з Хмелнцкимъ^П. И позволилъ войску полскому становиска на УкраЂнЂ на ЗаднЂпрю, такъже у воеводст†Бряславскомъ ωт ТЂкича ажъ до ДнЂпра. Поляки, стоячи по становискахъ, великїе кривди не толко людемъ, але и козаком мордерства чинили.

Року 1652 украЂнци не терпячи кривди ωт войска полского, почали перше сами ляховъ забивати по ЗаднЂпру. Для того почали поляки втЂкати. Тогди жъ много ляховъ побито. ТогдЂжъ гетманъ короніїй Калиновский з войскомъ пошолъ за Богъ и сталъ на БатозЂ, послалъ до полку уманского, аби к нему прибували.

Тимъ часомъ дали знати Хмелницкому ω томъ, а Хмелницкии з войскомъ и татарми ^Р—Р поляки невЂдоме пошолъ под Уманъ, а полкъ уманский взялъ из собою. А такъ невЂдоме пошолъ под Уманъ, а полъкъ уманскии взялъ из собою, ^С—а такъ невЂдоме^—С вдарилъ на ляховъ и все воиско розгромилъ. Тамже Калиновского, гетмана, татарин одинъ прости втявши /207/ ему голову в торбЂ принЂсъ. А сн̃ъ Калиновского, котрий тогди ωбознимъ билъ, утЂкаючи у БубновцЂ ωбвалилъся и утонулъ и многихъ пановъ едних побито, другихъ в неволю побрали татаре. В тотъ еще с-под Батога далЂ ходилъ ХмЂмъ^Т, много шкодъ поробивши, додому з ордю^У вернулся.

Того ж року 1653 моръ билъ великїй по всемъ краю Украйнскомъ, почалъся ω СошествїЂ ст̃го дх̃а, ажъ до зЂмЂ тривалъ, страшно било видЂти.

Року 1653-о преставися Иосифъ Коновичъ Горбоцкии, еп̃спъ белорускїи. Тогожъ року Адамъ КисЂлъ, воевода киевский, преставися, Иосифъ во вЂри православной,

Тогожъ року на весну Чернецкий воевода з войскомъ полскимъ попустошилъ места Борщевку, ВЂницу, Погребиша^Ф, Калника. Бугунъ, полковникъ, утЂкъ до Маностирищъ. Тамъ уманскїй полковникъ пришолъ на посилокъ. А полковникъ Бугунъ боронился. Але Чернецкий побилъ, полковника уманского Гродзенка забито, мЂсто самое спалилъ. Козаки в замок ухватилися, а иншїе погорЂли и самъ Чернецкий для великого пожару з мЂста уступилъ. А в том козаки и люд ночю из замку поутЂкали /207зв./ куду^Х хто моглъ, пустий замок ωставили. Тогож року под Жванцем кроль Казимер ωт Хмелницкого в облеженю и позволил козаком, ω що просили, и покои з ними чинил.

Року 1654 генваря 5 Богданъ Хмелницкий православному цр̃ю и великому Алексею Михайловичу поддалъся зо всЂми крайнами ωбохъ сторонъ Днепра. Присягу виконал зо всею старшиною в церк†переяславской. Которой присяги слугахъ^Ц Василий Василевичъ Буторлимъ^Ч, царскй бояринъ. И по всЂхъ мЂстахъ козаки и мещане присягали цр̃ю в церквахъ на вЂчное подданство.

Тогожъ року ωт^Ш середопостю в Киеви на горахъ город заложили. ТогдЂ татаре ωт Хмелницкого ωтступили, а с поляка^Щ примиря взяли. Того жъ року мс̃ця августа 2 дн̃я слонца затменя страшно било, пред полуднем почалося, на годинъ три било сл̃нца часть так малая, якъ мц̃ъ на новю третего дн̃я, и звЂзди видно било в полудне ясного дня.

Того ж лЂта московские войска царские побрали на БЂлой Руси мЂста Полоцкъ, Витепскъ, Невел, Мстислав, Ωршу, Могилевъ, Шклов, Кописъ и иншие мЂста. Самъ царъ с тромастами тисячъ войска пришовши, взял Смоленскъ и до Вилня тягнул. /208/ Почувши то, кн̃зъ Радивил, великий гетманъ литовскй z воиском уступилъ з Вилня, не могучи против царское сили спротивитися. А цар Вилню опановалъ и ияших мЂстъ много попустошено и люду без числа много в неволю москва побрала.

Тогож року 1654 гетманове короянїе у осени под Бряславъ з войскомъ, к ним же и татарє на помоч по Забожю притягнули. Противъ того войска послав Хмелницкий своего наказного гетмана Томиленка з воиском козацким. Тамже на первомъ потканю Томиленка ляхи zабили, войско козацкое розбили. А полковник Зелєнскии бряславскии, Богун вЂницкй, Гогол поднЂстрскй и иншие поуходили до Умани. Року 1655 по Рождест†Христовомъ пришли коронние гетманове под Уман з великою силою и с татарми и побивали преє три днЂ штурмами, арматами, огнистими кулями, кгранатами, где много в мЂстЂ людей позабивали. Але кгди почули, иж идєт Хмелницкй на одсЂчъ к Уманю, мало що воиска zоставивши, против Хмелницкого пошли. Там впєрєд татарє Хмелницкого ωсадили с козаками и Шереметом и Ромодаковского з московскими воиски межи Ставищами и межи Охматовом полю котрое поле /208зв./ тепер називают Дрижиполе, бо там много от морозов дрижало и померзало. Осадивши Хмелницкого, не дали воиску скупитися бо в Букахъ тягло пят полковъ на помоч Хмелницкому, а в Ωхмато†чтири тисячЂ пЂхоти. На том поли ляхи чтири днЂ потужне з Хмелницким безперестанку билися, а Хмелницки, маючи на добром посилку москву, потужнє ωтпор давалъ ляхомъ и татаромъ. Потом Хмелницки с таборомъ рушилъ и москва до Охматова. Там моцно ляхи рубали табор с татарами Хмелницкого, еднакжє не вскурали ничого. У Охмато†воиско свое Хмелницкии наишовъ, а с тим потягнул до Буковъ, тамъ наишолъ полки свого воиска и моцно на нихъ гнЂвался, же на ратунок ему не поспЂшалися. А такъ до Уманя пришовши, нЂкого не наишли, кромъ свого люду. Тогди Хмелницкй за ляхами, а взявши вЂдомост, ижъ ляхи пошли взад, роспустилъ воиска на великй пост.

Того ж року повеснЂ Хмелницкии, а з ним Василїй Василевич Буторлин з московским войском пошли под Каменецъ-Подолскй, хотЂли его добывати, стояли д†нєдЂли, нЂчого не удЂявши, пошли поді Лвов. А лвовяне окупилися, много скарбов ему давши, одержали покой /209/ И ωттолъ послалъ Хмелницкїй Данила Виговского с козаками и москвою под Люблинъ, где, доставъши Люблина, великий скарби тамъ москва и часть животворащаго древа Кр̃ста Гс̃дня. А Хмелницкии з Буртолимомъ^Ю пошли с-поди Лвова восени, але несподЂване под ОзЂрною споткали ихъ татаре и осодили били. А потомъ москва и козаки ωтбили ихъ такъ, ижъ нЂчого не учинивши, прочъ ωтиишли, еднак же козаковъ много постинали, котрїе непорядне ишли додому, хопаючися, не сподЂваючися татар. ТогдЂжъ много войска московского померзло, снЂгомъ запавши, преця ж до Киева добралися. Там Буторлин, захорЂвши, вмеръ, а Хмелницкй до БЂлой Церкви пошолъ.

Року 1656 Хмелницкй почалъ з Ракоцим, кролємъ венгєрскимъ, zностися. А такъ през посли кролєви венкгерскому ωбєцалъ Полское кролєвство. А Ракоцїи ωбецалъ много скарбъ и волностей козаком. ТогдЂ навеснЂ Хмель послал Антона, полковника києвского, наказним гетманом z войском козацким там. Кгди воиско стяглися^Я козацкое з Ракоцим, мЂста полские имъ поддалися и самую Варшаву /209зв./ и столицу Краковъ взялъ. А крол Казимер, видячи перовно, зехал до чужои землЂ. Ракоцй засъ взял Майдебуркъ, мЂсто славное, Плоцкъ, Торунъ и иншие. И своими ωсадил жолнЂроми, всЂ ему поддалися. В томъ Ракоцй зголдовати под владзу всЂхъ пановъ полскихъ, пошолъ додому.

Року 1657 кролъ полскии Казимер с чужой землЂ повернулъ, затягши войска. Тамже и Чернецкий, воевода руский, з войскомъ притяг противъ Ракоцого. Ракоции не могъ ωпертися, бо вже Антонъ з войскомъ потягнулъ на Вкраину, що гди Ракоций ωбачилъ, же ему ляхи ωт Венгеръ дорогу заступили, и собЂ на ВкраЂну уступовалъ. Але ляхи под Межибожем с татарми Ракоцого ωсадили. Ωн, видячи немЂру, з ляхами ω покой почалъ. Прецяжъ для людкости змирили з ним, самого Ракоцого до Венгеръ вомчали, жебъ его ωрда не ухватила, за ним гонячися. Прецяжъ войско з таборомъ его и гетмана его розбили, Ананицкого, засталъ его хорого, а такою новиною ω Ракоцом и своею ходнею причинил ему хороби. А такъ Богданъ Хмелницкий умеръ. Тогож року 1657, похован в Субото†/210/ августа мц̃я 27 дня.

Того ж року преставися Силивестръ Косовъ, митрополитъ киевский, поховалъ^Ь у Ст̃ой Софии в катедлалной^А.

По смерти Хмелницкого ωбрали козаки за гетмана собЂ Юря Хмелниченка меншого. Але ωн, будучи молодимъ, уступил гетманство писареви енералномъ войсковому Иωану Виговскому. Року 1658 мц̃я генвария зостал митрополитом киевскимъ Деωнисий Валабанъ^Б. Тоеиже весни поехалъ с Киева до Чигирина, потомъ болше южъ не булъ. Того жъ року ^В—Іванъ Луговскии^{—В г—}споднее руку на цр̃я. Потомъ^—Г ходилъ к ПоутавЂ^Д на Пушкаря, полковника поютавского^Е , которй не хотЂлъ его мЂти за гетмана. Тамъ войско Пушкарово розбили и самого Пушкаря забито. Того жъ року Данило Виговскй поднесъ руку на цр̃я, пошолъ под Киевъ с татарами и сталъ на Николъскомъ полю ωт Печерского, а киевскии полкъ стоялъ на ШкавицЂ. Але тамъ его воевода киевскй розбили Василий БорисовЂчъ Шереметъ и кн̃зъ Юреи Борятинской и кнняз^Є Иванъ Чадаевъ. Сам едно Виговскои човном втЂкъ. /210зв./ ТогдЂжъ и самъ Виговский Иванъ с татарми и с полками приходилъ под Киевъ, але нЂчого не вчинилъ, поеднался с царскими воеводами, прочъ пошолъ. Року 1659 мця мая Иванъ Виговский послал Гуляцкого^Ж противъ москви, а гди кн̃зъ Трубецкий натер на Гуляницкого, тогдЂ в Конотовъ^З, мЂстєчко заперся Гуляцкий^И, где его москва держали час немалий, ажъ Виговский поднял татар, с котрими потаемне на москву и много москви побили. Потом москва ишла ωборуною рокую^І ажъ до Потивля. ТогдЂ жъ до Виговского приездилъ нЂякийсь БеневЂчъ ωт кроля Казимера, намовляючи, аби цр̃я ωтступивши, при кролю зоставали. Приωбецалъ тое бувъ гетманъ кролю, але заразъ перше заднЂпръские почали ляховъ бити, перше перше^Ї в Переяслови, потомъ в НЂжинЂ и в ЧернЂгови и всюди повибивали ляховъ. Тогди жъ и НемЂрича забито. ТогдЂ жъ под Фантовомъ^Й воиско собравшися, ωтняли булову у Виговъского, септеврия 10 дня. Заразъ тогдЂ жъ Юрей Хмелниченна^К за гетмана. А и Виговскй /211/ по ляховъ поехалъ, тутеж за ними и Данило поехалъ билъ, але в ЛисянцЂ козаки его ухвативъши, москалемъ ωтдали. Проваженъ до цр̃я, вмер на дорозЂ.

ТогдЂ жъ ωзвалъся билъ гетманомъ Безпали козацкимъ, при кн̃зю Трубецкомъ, которй билъ старшимъ, якъ под Конотопомъ войско било, то тогдЂ часу, якъ ляховъ били, писали до кн̃зя Трубецкого, аби на йхъ прозбу приехалъ, а под царскую руку взял. А такъ кн̃зъ Никитовичъ Трубецкой з войском царским притягнулъ до Переясловля. Тамже и Хмелницкии Юрей и все воиско ωбоих сторонъ Днепра утвердили Юря Хмелниченка гетманомъ zа позволенемъ кн̃зя Трубецкого, а они присягли вЂчне жит при цару московскомъ.

Року 1660 мс̃ця августа 7 дня Шереметъ Василей Борисовичъ боярин и воевода киевскии z войскомъ московским с Киева Юреи Хмелницкии z воискомъ козацким с Чигирину пошли на поляковъ. Притягнулъ Шеремет под Любар, а Юрии под Слободища. Там их осадили ляхи с татарми. Не далися, скупити войску там ляхи, в таборъ були ся вломили и гармату южъ були ωпановали козаки /211зв./ почали були втЂкати, але якъ ωбачили, же татаре дорогу имъ zаступили, ωбезпечившися, почали битися и с табору ляховъ вибили, корогов гусарскую и кролевскую zбили. ТогдЂ Виговскй, будучий z ляхами, просилъ примиря, аби и кролю голдовали, але Хмелницкй не хотЂлъ того. Козаки крикнули, аби и zмирилъ з ляхами. Шереметъ зас ωборонною рукою с-под Любаря назад ишолъ под Чуднов, тамъ осадили его поляки, татаре, козаки. Тамъ през три недЂли трвалъ в облеженю аже не стало корму, почалъ з ляхами о згоду трактоватъ.

Рада. Ляхи обецали в цалости Шеремета отпустити, тилко риштунки отобрати, под присягою. В том татаре, як то почули, розгнЂвалися на ляхов. ТогдЂ ляхи, слова нє одєржали, иншихъ межи себе розобрали, а Шеремета татаром оддали. Где запроважєн до Криму.

Zатим зЂма наступила. Хмелниченко ляхомъ по всемъ ЗаднЂпру становиска подавал. За тое розгнЂвавшис, що не хотЂлъ битися з ляхами, але волали: «Zдаимося». ТогдЂ ляхи кривди незноснїе не толко мужом, але и козаком чинили. /212/ Але гетманъ не дбалъ о тое, бо тогдЂ єсли бы и zишлося войско вкупу, мусили бъ вступати ляхи назад с татарми, тогди жъ, якъ здался Хмел ляхомъ. Видячи то, Сомко, гетманъ наказнии заднЂпрскии, с полками своЂми зосталъ под царскою дєржавою. Року 1662 ходилъ Юрїй з ханом кримскимъ, ходил на Сомка. Стояли до зЂми, ничого не учинили, тилко татар полономъ набавили. Другий разъ Юрии под Пєрєясловъ пришолъ с козаками и з ляхами и добувалъ Перєясловля. Кгди почувъ иж кн̃зъ Ромодановскии, тягнєт з войскомъ и гетманом Сомкомъ, одступилъ от Пєрєясловля и сталъ противъ Канєва. Тамъ их войско Ромодановский розбилъ и много козаковъ у ДнепрЂ потонуло. Самъ Хмелницки из старшиною човнами поперепливали, все покидавши. Тое дЂялося іюля 18 дня. ТогдЂ жъ московские воиска пєрєправилися, хотЂли ити к Чигирину. Козаки иншие ходили к Бг̃ослави, там ихъ добре бг̃ославцЂ чостовали, у бєзоднЂ озєра, нагих поробивши, овадами и комарами. Тогди Хмелницки побЂгши, найшолъ орду под Чорним /212зв./ лЂсомъ готовую москву перебудилъ на тои бокъ и много потопилъ москалей. ТогдЂ жъ Каневъ татаромъ видалъ за всЂмъ Хмелниченко за тое, гнЂвъ на их держачи, же напередъ Сомку здалися. ТогдЂ самъ солтанъ стоялъ в мЂстЂ КаневЂ, ажъ ωткупилися мещане. ТогдЂ жъ Хмелниченко ходилъ восни Юрей, хотячи Киевъ воевати, але пошолъ не займаючи Кїева у ВишъгородЂ церковъ розобралъ. Татаре на деревах, на ωбразахъ ДнЂпръ пливали. Еденъ татаринъ на образЂ Пр̃стои Бц̃и до Кїева, любо и не хотЂлъ приплилъ. В Кирилскомъ монастирЂ церковъ спалили и трапезу, и келЂ, много людеи в неволю. Року 1663 Юрїй Хмелницки постригъся в чернцЂ в мнстиру ИрдЂнском от Деонисия Булабана, гетманство zдавши Павлу ТетерЂ.

Того жъ року преставился Гедеωнъ Балабанъ, метрополитъ киевскїй. Того жъ лЂта зехалися еп̃спи до Корсуна на ωбраня метрополити. Гедеωнъ, кн̃зъ Четвертенский, еп̃пъ луцкїй, Антоний ВЂницкий, еп̃спъ премискїй, Іосифъ Тукалский, еп̃спъ белорускій, Адамъ Жилиборскїй ωбраннии на еп̃спию лвовскую. На томъ соборЂ стала була безгода в обраню митрополита. Едни /213/ хотЂли митрополитомъ Антонїя ВинЂцкого, еп̃спа премискаго. I иншїе, якъ посполство, такъ и гетманъ, ωбрали Іосифа Тукалского, еп̃спа бЂлоруского. А такъ розехалися. Почали Бг̃а просити за Іосифа метрополити. Того жъ року Іванъ Бруховецкй виишолъ из Запорожя с коzаками до НЂжина. Тамъ за грамотою царскою раду вчинили ωбирати гетмана. Прислалъ цар Алексей Михаилович своего околничого кн̃зя Данила Кгакгина. Тогди і Самко, гетман, зо всЂми полками. Такъ тєж заднЂпрские полки. На тои радЂ zа помочу Мефодїя, еп̃спа і Василя Дворецкого и инших, котрїе держали за Самком, zабывано. Для того Самко з своЂми полковниками утЂкъ в город московскии НЂжинскии. Оттол потомъ Дворєцкй, взявши Самка и полковниковъ его, zа росказом нового /213зв./ гетмана, якобы и виводится што им противного zадавали. Они сподЂвалися, же ихъ цар губит не каже; але не везучи ихъ на столицу, в БорзнЂ сут потрачени.

Року 1663 Казимєр, крол полскй, мс̃ца октоvрия з войски полскими и с татарми притягнулъ. У РжищєвЂ перєправился чєрєз ДнЂпр, хотячи взяти ZаднЂпря од цара. Тут жє Павел Тетера до кроля прибул з воиском. Тогди много мЂстъ и сЂлъ попустошили, котрїе ему не хотЂли голдовати. МЂстєчко /214/ Девицю вирубали. И ходил аж до Сивска. ТогдЂ жъ под Глуховъ притягъ, чтири недЂли моцно добувалъ подкопами, кгранатами и штурмами, але не добувши, краями литовскими вернувшися, люду много потратил, бо зараз zалогъ лядскихъ всюди повиганяли, а цару zголдовали под владзу.

Року 1664 Сулимка, козакъ с ТорговицЂ, полковникомъ торговицким назвавшися, почал старостъ, врядниковъ забывати. Тим часомъ наспЂлъ Тетера и Маховскии, що с кролєм ходили, того Сулимку розбили и самого поймавши, стратили; козаковъ его болей пятисот живцєм поимавши, бєз жадной фолкги под БЂлою Цєрквою всЂхъ постинали. Того ж року Івана Виговского, воеводу руского, zа варту взявши, тои же Маховскии и Тетєра в Олховце казали рострєляти, для того, иж не йшолъ з кролєм zа ДнЂпръ, але стоял у ФастовЂ, якоби и СулимцЂ до бунтовъ свою порадою бил и листами помагалъ. Чєрнецкй зас, пєрєвезшися ДнЂпръ БЂлой Церк†в КорсунЂ; в ЧеркасЂхъ около Ставищъ, много людей погубилъ, Ставищъ добувалъ. Там же пострєлєн под мЂстом в БЂлои Цєрк†вмєр, тЂло его проважєно до ПолщЂ. На его мЂстцу Яблонского воеводою рускимъ вчинено и полним гетманом. Противъ того то Яблонского Іван Бруховецкй ходил из войском и комликами^Л, але онъ втЂкъ.

Року 1665 Іванъ Бруховєцки ходилъ до цара Алексея Мих. где ему ласку великую цар показал, далъ ему панъ^М великородну Дарїю, племенницу у кн̃зя Юря Долгорукова z великимъ скарбомъ и учинилъ его боярином, то естъ сенаторомъ. Того ж року, якъ Тетера до ПолщЂ пошол, козаки обрали себЂ за гетмана Опару, ясаулу. Тои немного былъ гетманом. Zатягнул татар на ляхов, а так под Лисянкою, трактуючи ω войнЂ, щос примовилъ прикрого мурзЂ Камамбету. Той мурза розгнЂвавшися, отдалъ Опару поляком, а Дорошенка гетманом наставлено. ОпарЂ гетману, крол казалъ голову оттяти.

Року 1666 Маховскии z войском полским выишол на Вкраину. А Дорошенко, гетман, против его z войском до Умани, татар собЂ на помоч затягнул. Оттол татаре и козаки побЂгши zа ВЂницу, под Браиловомъ ляхомъ погромили, самого Маховского живцєм взяли и барзо много шляхти и шляхтянокъ с каретами и ридванами побрали, котріе ехали на празникъ Рождества Хв̃а. Такъ татарє з великою добичю повєрнули додому, а Дорошенко до Чигирина пошол.

Року 1368^Н Іванъ Бруховецкй гетман /214зв./ zаднЂпрскии, не памятаючи на великое царские добродЂйства, умислилъ татарскому хану поддатися, царскихъ воевод по местах заднЂпрскихъ еднихъ позабивал, а инших в неволю побралъ. А zатяг собЂ на помоч шестдесят тисяч орди на помочъ. В тои же час Петро Дорошєнко, чигринскии гетманъ, пошолъ с всЂми коzаками против Бруховецкого. Там на zмо†татаре z Дорошенкомъ зостали. Бруховецкии обезпечился на татар з Гадячого виехал, от своихъ же виданий Дорошенку, zабыти зосталъ. ТЂло его нагое на драбинчастомъ возу сЂномъ прикритое привязано^О в Гадяч, там поховано, а жону его Дорошенко взял до Чигрина. ТогдЂ жъ еп̃спа Мафодїя и Василя Дворецкого взято в неволю до Чигрина. Котрїе держали сторону Бруховецкого. Петро СуховЂй того ж року из Запорожя вишолъ с татарми на Дорошенка, пустошили ко^П Чигрина. Еднакъ не спорали нЂчого, тилко татар полоном надарило. Zатим того ж року декамvра 6 Дорошенко послалъ до цесара турецкого, офЂруючи ему свою зичливостъ, а просячи, жебы и цесар на помоч на его запорожцом не давалъ помочи. Року 1669 приехали турки, ласку, цесарскую Дорошенку /215/ ωсвЂдчаючи, дали ему подарки от цесара. А Дорошенко принявъ подарки, цЂлком поддался турчину ω всЂм краем и санжаки албо привилЂи ωт цесара принялъ. Того ж року zнову СоховЂй z татарми и zапорозцами вишолъ на Дорошенка. А обравши Ханенка гетманом под Уманю почали на Дорошенка воевати, але татаре ωбачили иж; из башею силитрииским турки и татаре пришли Дорошенку на помоч, ωтступили Ханенка и СуховЂя, а втекли у свою землю. Ханєнко зас и СуховЂй на Запороже пошли. ТогдЂ ж Юря Хмелничєнка едучого з Умани татаре взяли.

Року 1670 крол Казимер кролєвство здалъ. Того ж року примас Пряжмовскии и Реч Посполитая Дорошенку, гетману, клейноти войсковие дали: булаву, бунчукъ, корогов, коториЂ Тетєра zавЂзъ бувъ, призиваючи его КоронЂ Полской в подданство. Дорошенко принял клеиноти, леч от турчина ωт^Р не хотЂлъ отступати. Того ж року Пряжмовскии примас и Реч Посполитая обрали Михаила Корибута кролєм Вишневецкого. Коронованъ септєвра, але иншие сенаторЂ не хотЂли Михаила мЂти за кроля. Для того в незгодЂ жили с кролєм.

Тими ж часи, котрїе мали собЂ старишхъ от Дорошенка воевали на царских людей, а кгди Григорїй Григор^С. Ромодановскии пришолъ под ЧєрнЂговъ и добувал его крЂпко и радил козаком Ромодан, абыи крве хрстиянской не проливали, жили ведлуг першои своеи присяги под царемъ /215зв./ православним, на що и козаки позволилися, обрали собЂ за гетмана Демка МногогрЂшного. Так цар права потвердилъ козаком на пунктах, волностїй подал.

Року 1672 Демка, гетмана, свои ж поплЂчники ωковавши, запровадили на столицу. Потом за росказом царскимъ ωбрали zа гетмана Іоана Самоило., бывшого суди чернЂгов^Т. ТогдЂ жъ Михайло Ханенко послал своихъ пословъ, поддаючис кролю. Але тїе посли през все лЂто бавилися у кроля. Потомъ на Запорожя привезли ему булаву, бунчук и корогов на гетман^Т. Ωттол виишол гетман кролевскии із Запорожя Ханенко, ишовъ на Забоже, котрому Уман и Бряславское воеводство и част полского войска пришло к нему против Дорошенка. Котрїе войска всЂ лЂтовали у воеводст†Бряславском, а Дорошенко часто посилал до цесара турєцкого посли, просячи о помоч на ляхов. На що турчин послал янчар и татар ему. А потом і сам, довЂдавшися ω незгодЂ сенаторов полских і о малои силЂ войска полского, несподЂване войска своЂ великїе и визЂра и хана с татарми под Каменец-Подолскии потугою своею і сам притягнул и Дорошенко з воиском. А Ханенко, видячи немЂру, до ПолщЂ вступил. Там войска турецкиє и татарские 9 ден добували ден и ноч. Тамтїе, що було старшини, в мЂстЂ, туркамъ здалися. До того нЂмецъ камянєцки старшии, порохи запалил, от котрих мури падалися. Для того все здалося турчину мЂсто, от вЂку нЂкимъ не нарушонное, ωт самого Бг̃а фундоваяное, либо и Батии всю zемлю Рускую и Подолскую взял, /216/ еднакъ Каменецъ ему не дался. Каменец от скали каменнои названнии, бо от гори долъ барзо глубоки, котрим СмотрЂчъ рЂка ідєт а мЂсто оточиваєтъ скали зас не ужитие втесомъ стоят барзо високїе и труднїе до приступу.

Року 1674 мс̃ца октоvрїя Михаило, крол померъ нємного был кролємъ, молодим будучи, zиишолъ з сего свЂта. Того ж року салтан баша турєцкии з войсками притягнувши и под Уман, славное мЂсто украинское, штучне взяли, бо пєрве казалъ турчинъ старшинЂ якобыи на мир к собЂ виити; але кгди вишли старшина уманская, турчинъ другихъ пословъ в мЂсто послал, абыи и наказнїе старшїе уманскїе на згоду выишли. Оны турєцкой zради не знаючи: всЂ пошли с поклономъ до турчина. ТогдЂ турчинъ не пустил нЂкого мещан вже в мЂсто, а еще з одного боку казалъ войску одступити, гдє през два днЂ и ночи люд в лЂс утЂкалъ. А остатокъ стал добуват, а так остатокъ впєнъ вирубалъ, любо и свого войска до сорока тисяч утратил, але хрестиян на килко сот, тысяч погубил, где едних поповъ до семисот было.

Року 1675. Гс̃дръ цар великии кн̃зъ Алексеи Михаи^У посилал своЂ грамоти до гетмана чигринского Петра Дорошєнка, абыи от неприятєля кр̃ста Гс̃дня ωтступил турчина, а привєрнулся до православного его цар^У. прес^У. /216зв./ ^Ф—и всЂ его ласкаве приняли подданство^—Ф величєства. Ωн того не дбал напоминаня. ТогдЂ Іванъ Самоилович з воиском на его ходил гетман, але ничого не справилъ з ним. Року 1676 Петро Дорошенко доброволне поддался у вЂчност его цар^У. прєс^У. и всЂ его ласкаве приняли в подданство. Року 1678 августа 15 дня турки славное мЂсто взяли Чигрин. Потом року 1679 великии гс̃дръ цар и великїй кн̃зъ Феодор АлєксЂевичъ чуючи, же прехваляется турчин, на Києв послалъ своЂ войска. Под Києвъ Михаила, кн̃зя ЛегуковЂча z многим войскомъ, тудє ж і гетмана малоросїйскаго Іоана Самойловича з многими войски под Києв послалъ. Тамъ войска стояли килко недЂль, але за помочю Бг̃а всемогущаго турчинъ не посмЂлъ имъ ставитися, з соромом назад вернулъ. А войска царскиє славне по добром розряду розошлися до домовъ. /217/

Року 1690 саранча была страшная, котрая трвала всю осень. ПоЂла овси, грєчки, проса, горохи, трави по всємъ маєтся краЂ. Жито хто нє вспЂлъ заволочит, zаразъ поЂла. Посля той саранчЂ много коней, товару, свиней, овецъ поздихало з голоду, бо всЂ лЂси, болота, поля окрила була и зазЂмовала. Такой саранчЂ старїе люде не памятаютъ, жебыи такая була».

Попередня     Головна     Наступна