Уклінно просимо заповнити Опитування про фемінативи  


Попередня     Головна     Наступна





ПОВЂСТЬ Ω ПРЕСЛАВНЫХ ЧЮДАХ СВ̃ТОИ ВЕЛИКОМУЧЕНИЦЫ ВАРВАРЫ






ПРЕДОСЛОВИЕ


Великую бЂду і вечную муку раб евангельскии, котории един от панна взялъ талантъ, одедичил за тое, їже купли ї придобити ниякого повереннымъ собЂ не учинил талантомъ, кгды, во обрюсе завязавши, в землю его похоронил. Для того як он, обрусом зъвязавши, в земли схавал талантъ, так пан его звезавши розказал, во тму кромешную /201/ вкинути. Тоеи притчи ї я убоявшися, поневаж мнЂ Гсдь мои і Бг̃ъ за игуменством мн̃стря Михаиловского Золотоверхого поверил многоценныи, яко от пяти талантовъ, единъ ї неошацованныи талантъ, от пяти мовлю мудрых двЂ, премудрыя дв̃ы, великомученицы св̃тыя Варвары мощи в дозорЂ, в церкви Св̃таго Михаила тут лежащия, от которых многие чюдо дЂются ї исцеления подаваются, якъ надорожьшее богатство: для того ї, яже бымъ скрываючи молъчаниемъ богатства чюд ї исцелении того мнЂ повЂреного таланта св̃тыя Варвары /201зв./ мощеи, не был отсланъ въ скритость тмы вЂчнои, лишивши того богатства і купцов талантовых, бг̃олюбезных ї мучениколюбезных мовлю дш̃ъ, коториї во дни моего їгуменства дЂялися ї дЂются чюдо сказати умыслилем жебы ї слухаючиї приобретЂния ревности к св̃тои Варвари ї от неи помочи приходячи приимовали, ї я, Ако торжникъ повЂреннаго мнЂ таланта, з добрими талантов пяти торжниками заплату от талантодавца мог приняти. ВЂру зас кождыи мЂи, їже не ложноє пишу и проповЂдаю, вЂдаючи, же Гсдь погубит вся глаголющия лъжу, але правди взях, /202/ мнЂ ї тебЂ читателю на ползу. А поневажь неможно, абым все чюдо св̃тои Варвары могъ бы личити, болшии некоторыи поведати починаю, а напервии:

Апуст Б1108 Вканцлера Г—Г слово пропущено веру (?) дправлено Е Оссолинскии Є—єслово пропущено мощи (?) Жвписано над рядком З—Зречення не дописано в Руси (?) Иваша ІКосова Їскарбъ ЙвЂруи Кна Лзайве Мправлено Нучинилем Одо Пзнак Рнемало Свиправлено з бут Тправлено Утрунку Фтвердо Хбыл Цроку Чдар Шо ЩшкатулцЂ Ювыкинено правлено





Ω МОЩЕХ СВ̃ТОИ ВАРВАРЫ


Мощи св̃тои великомученицы Варвары которого часу ї яким способом до Киева до цр̃ькви Св̃таго архистратига Михаила запроважены, в лЂтописцах нЂзписаного, а естьли і были якии писма, гды путА Киев долго з монастрми опустелыми стоял, тогды ї писма погинули. Еднак от старых людеи повести маемо, їже кн̃зю великому Михаилу /202зв./ Св̃тополку, правнуку св̃таго Владимира Киевомъ обладающу, от грецкогω цр̃я въ дар присланныи сут тыи св̃тыи мощи св̃тыя Варвары, а он, змуровавщи цр̃ькое Св̃таго Михаила на своє імя року от Сотворения СвЂта 6616Б положил в тои цр̃кви на ос̃вщение мощи св̃тои великомученицы Варвары, которые ї дон̃нЂ нЂтленны лежат. А же првдивє св̃тои Варвары мученицы, зъ самых преславных чюдеи познаваи і вЂруи невотпливе. До того приими свЂдетство от концлераВ кралевства Полского Оссолинского, котории, будучи в Киіве за от̃ца митрополита Петра Могилы, повЂдал, же былемъ, мовит, /203/ в Риме, питаемся всюды на заходе, если бы мощи б гдЂ св̃тыя Варвары там были, албо слыхат гдЂ на всходє бо, мовит, маю великую-великую Г—Г къ св̃тои ВарварЂ, знаючи тое певне с прикладов, їже кто поручается св̃тои ВарварЂ, без споведи ї без причастия не умирают. Але, мовит, сказано мнЂ запЂвнЂ, їже мощеи св̃тои Варвары нЂт, ї которыи на всходе бывают, не сказают, толко провят, же гдЂ в вашихД сторонах мают бути. Ї я,— мовит ОссолнискииЕ , вЂрую, їже в Киівє власне сут—суть св̃тыя Варвары Є—є. Просилъ частъ себЂ от мощеи св̃тыя Варвары ї для вЂры его дано часть палца рукиЖ св̃тыя Варвары./203зв./

И чтячи его, приими, читателю, второе сведецтво св̃таго Макария потриарха антиохиского, котории за моего игуменства бывши у Киеве и приехавши в монастыр нш̃ъ Михаиловский, кланяючися з вЂрою мощем св̃тыя Варвары і з слезами мовит нам такъ, їже Елиопол мЂсто, гдЂ св̃тая Варвара замучена была, в моеи епархи не далеко от Антиохии, и кгды пытателемся о мощех св̃тыя Варвары, нигдЂ на Востоце не слыхат; повЂдают, же мают бысти З—З. Так, мовит, вашеИ ся земля у нас не забывается, і вЂрую, же то власнЂи, иже сут мощи св̃тыя Варвары, ї так треба вЂрити. /204/ I просил нас усилне патриархъ, абысмо частъ от мощеи св̃тои ему дали. И за благословениемъ тогдашняго от̃ца митрополита нш̃его Селиверстра КосовоІ, далисмо част от мощеи св̃тои Варвары св̃тыи патриарсе, котрую з великою радостию и з благодарением принялъ, за наїболшии скорбьЇ себЂ почитаючи.

Не тилко теды з повести стародавнЂи и зс тых сведоцтвъ вЂруЙ кожды, ижь сез въ Михаиловскомъ монастыру Золотоверхомъ власнии мощи св̃тои великомченицы Варвары, и з вЂрою к ним приходи, ї помощъ на вшелякую потребу, твою приимаи, але из чюдъ /204зв./ великих от мощеи тых св̃тои великомученицы Варвары дЂючихся вЂруЙ невонтпливе.






ЧУДО 1


Я, іеромонах Феодосии Софонович року 1655 їгуменство монастыря Михаиловского Золотоверхого принялем, поданное мнЂ от блаженнои памяти преосв̃щенного от̃ца Силвестра Косова, митрополита киевского. Того року, пришовши еден мещанин зацны з Луцка, принеслъ руку зъ срЂбра учиненую ї дал завЂсити над мощми св̃тыя Варвары; а запитаны от нас, ноК якии бы знакъ тую руку святои принеслъ, сказал, под сумнением, їже, мовит, заболЂла моя рука была былаЛ /205/ ї скорчилася так, же не моглемъ еи разправити, котрую болЂзнъ неулеченную терпячи, припомянуем М св̃тую Варвару, же у еи мощеи даются їсцеления; млилемъся теды св̃тои о исцелении руки моеи, просячи ї оброкъ учиниленН даО еи мощеи їти, если мя улечит ї так, мовит, мл̃твами еи рука моя скорченая улечена застала, а я свои оброкъ выполняючи, пришолем с подякованем до еи мощеи на поклонение ї руку сребреную на зракП руки моеи улеченнои през св̃тую Варвару еи мощем принеслемъ.





ЧУДО 2


Иоанъ Софонович, мЂщанин ї раица киевскии, едного часу крЂпко бывъ захорел /205зв./ болЂзнию великою, а болЂючи немолоР, припомянул собЂ св̃тую Варвару, от мощеи подаючую исцеления; а за болезнию лютою самъ не могучи поити, послалъ до монастыря Михаиловского к мощем свтои Варвары по воду з руки еи св̃тои з вЂрою, на лекарство своеи тажкои хоробе. Тым часом его великая горячка розпалила, же аж языкъ зъсыхалъ. Радили ему свои, абы чего колвекъ напился на угашене горячки; але он отповидел: хотяи бу-мъС ї умирал, не буду ничего пити, аж воды з ручки св̃тои Варвары принесут. Такую мЂл вЂру ко ст̃ои мч̃нцЂТ. Потом гды принесено воду от св̃тои мощеи, молячися /206/ з вЂрою напился ї зараз, якъ по якомъ смачномъ моцномъ трумкуУ, уснул твертоФ; і перед тым ї сыпляти так не могъ. На тых мЂстъ явилася ему св̃тая Варвара і, взявши его за руку, мовит ему: «Члвче, знаи, мовит, жє я естем св̃тая мученица Варвара. Многии, мовит не вЂруют, абы то мощи мои у Михаиловскомъ правдивии были. Ї сам же знаи, жє мои тои мощи правдивии сут, і всемъ оповЂдаи, абы так вЂрили; а на знакъ того а то уже естъ здоров». Тое мовивши, зникнула, а Иоанъ, учутившися, знашолся так здоров, як бы нимало не хорел, ї благодарячи св̃тую Варвару, ни тилко мнЂ тое чюдовное свое їсцеление /206зв./ от св̃тои Варвары ї о мощах еи упєвненье оповЂдал, алЂ і всемъ до того часу оповЂдает.





ЧУДО 3


Гды кн̃зь Радивил взял быХ мЂсто сеє Киев рукуЦ 1651 а за его прозбою мусЂли дати ему часть от ребра св̃тои Варвары немалую, котрую он отслал за дамЧ бискупу виленскому, котрии до кн̃зя аШ тое писал. Тую часть мощеи свтыя Варвары чесно ховал в своих палацах въ гебановои шкатунцЂЩ. А гды едного часу загорелися безкупскии покои ї не могли їх угасити, що колвЂкъ не выкненоЮ з покоев, то все погорело, ї покои до конца згорели. А гды по згорению розгребли попел, о чюдо! мощи св̃тои /207/ Варвары въ шкатулце цЂлы ненарушении во огни знашли і все дивячися, прославляли Бг̃а ї чюдотворную великомученицу Варвару. СиюЯ чюдо мнЂ повЂдавъ чл̃вкъ зацныи высокои годности, которыи тамъ самовидец былъ тых чудесных мощеи року 1657.





Ясие Ьправлено

Ацр̃кви Бвиправлено з под ВФеодоровны (?) Г учинокъ Д крилошан Е зайве Є—єпропущено слово приносити (?) Жзайве Знапевне Иневонтпливую Іосмнатцети Ї—Їправлено Й—Йслово пропущено прибЂгнувши (?) Кправлено Лказалемъ Мучинилем Нвписано над рядком Оза Пвписано над рядком Рправлено



ЧУДО 4


Давнымъ чюдом великим сее подобное преславное чудо, котрое сталося року 1666. Два служалыи в постъ пред Рожеством Христовым, в котории постъ ї праздник Св̃тыя Варвары бывает, зумовившисяЬ пришли были окрасти з цр̃ерквиА злато ї сребро і всю оздобу, що есть при мощех св̃тои Варвары, їмяна имъ /207зв./ АкдрЂи ї Феодор. Ї еднои ночи, якъ их диявол показуя неякимсь ночиннямъ отомкнути замокъ правых двериї цр̃ькви Св̃тыи Михаило ї пошли просто к мощем св̃тыя Варвары, на образах намЂсных; сребра ї ланцухов ї протчиї не рушевши; а гды почали приходити къ дверем св̃тыя Варвары, гром на них страшныи ударилъ, їскры огненныи іх опалили, а оныи от того грому на землю попадали, от которого один оглох, а другого хороба злая напала, ї разуму отишол. К собЂ потомъ пришовши тот, котории приглох, видячи на собЂ Бжие и св̃тои Варвары чудовное каране, вывел товарыща безумного зъ цр̃ькви, /208/ ї цр̃ьковъ зънову замкнувши, ничего не беручи, побЂгли до дому. Тое чудо в тыжден самъ тои, котории был приглохлъ, ї товарища своего приведши, їсповЂдав пред от̃цем своим духовным в церкви, пред иероманахом Симионом, а иеромонах Симион мнЂ выизнал нескоро потом пред олтарем, прєдБ сумъненемъ, їдучи службу Бж̃ию служити.






ЧУДО 5


Преос̃вщенныи архиепископ чернЂговскии от̃цъ Лазар Боранович ї до сего дня вызнавает чюдо св̃тои Варвары, которая над нимъ показала, гды он великою хоробою болЂл, а утекался до св̃тои Варвары. На тЂх мЂстъ скорое от мощеи св̃тои Варвары /208зв./ получилъ исцеление и от того часу наиболшую къ св̃тои Варвары почал мЂти вЂру, и здоровыи, казане на праздникъ св̃тыя Варвары при мощех ея повЂдаючи, ї свое от св̃тои оповЂдал чюдовное їсцелениє на казаню.






ЧУДО 6


Благородныи болярин ї воівода киевскиї Петръ Василівич Шереметев самъ мнЂ повЂдав чюдовнов уличене жоны своеи болярыне Анны ФеодовныВ. Гды приихал онъ болярин из женою до Киева на воеводство року 1666 мс̃ца декамврия 28 дня от того часу жена его, вЂру великую взявши до св̃тыя Варвары, постановила тои ученикъГ св̃тыи: ноимует крилашенД монастыря /209/ нш̃его Михаиловского, абы кождои нд̃ли при мощах св̃тои Варвары службу Бж̃ию служили в пределЂ за них, и сама завше ходит ї слухает тоеи служби Бж̃еи. Того ж року мс̃ца їюля захорЂла была барзо, будучи бременную, ї 8-го дня їюля тоя тяжкая пришла болярине АннЂ болЂзнь, же ї мовити не могла, і все не сподЂвалися, абы жива была. Тогды болярин тяжко жалосны, не маючи їньшого лекарства, вЂру своеи болярине къ св̃тои Варваре за певную улечение надЂю взявши ї свою преложивъши, послал позно своего слугу вЂрного доЕ Мезецкого з грошми до мнтря, абы за болярыну при мощах св̃тыя Варвары былъ молебен /209зв./ отправленъ; ї зараз св̃щенницы почали молебен отправлять. А гды отпели молебен и слуга пошовши сказал болярину, иже уже отпЂли у св̃тои Варвары молебенъ, за тым словом зараз промовила болярыня, же и легше еи стало ї породила сн̃а, которого названо Владимир. I благодарение св̃тои Варвары за тое чюдовное улеченє отдаючи, постановили оброкъ щонедели сн̃а до службы Бж̃еи ї того Владимира Є—є ї причащати на службЂ Бж̃еи, от них закупленои у св̃тои Варвары, що и чинят неотменно уже два роки тому.






ЧУДО 7


Знову тот же болярин Петръ Василівич Шереметевъ славил, же ї сн̃ъ его Василии /210/ чюдовнЂ за мл̃твами св̃тыя Варвары исцелЂл таким способомъ. ЗахорЂлъ, мовит, был сн̃ъ ншъ Василии ї болЂв барзо тяжко так же уже блискии смерти былъ, и лекарство ему не помогали. Единои ночи уже мы, звонпивши о его животЂ, свЂчу зажогши, ї ладаном накадили; а тогды, мовит, жена моя болярыня Анна, стоечи пред образами, пред которыми свЂча горела, почала плакати: «Св̃тая великомученицє Варваро, помолися Сп̃су ї Пресв̃тєи

Бд̃це абы моему сн̃у, праве умираючему, даровали живот ї здорове. А я твоя оброчница буду вЂчная». Гды такъ молилася св̃тои Варвары болярыня, зараз /210зв./ полегшела болЂзнь сн̃а его Василия, і въ скорем часе оздоровел, а болярыня, оброкъ свои виполняючи, къ свтои Варвары великую вЂру мае, ї чюдное здоровление славят.






ЧУДО 8


Року 1659, мс̃ца мая дня на праздникъ св̃таго Феодосия пришол я въ Печерскиї мн̃стрь ї обачил службы Бж̃еи болЂючаго їгеродиякона Афонасия ї спыталем, що бы за болЂзнь его была. Отповедил иже ижеЖ, мовит, гдЂ тепер служилемъ службу Бж̃ию, напала мя великая трясса ї ледве дослужилемъ, а уже мовит, болши тыждня третего дня мя порывает ї истрезе крЂлко. Я реклемъ: /211/ «Такия болЂзни їсцеляет св̃тая Варвара; прииди къ еи мощем во второк ї прослужи службу Бж̃ию в пределЂ св̃тыя Варвары, ї оздоровеєжь» Послухал мене їеродиякон Афонасиї пришол в понеделок вечер: в наш мн̃стрь, вкусил вечери ї назавтрєе во второкъ, коли его мЂла напасть ї болЂзнь, прослужил службу Бж̃ию, целовав мощы св̃тыя Варвары, ї отбЂгла от него болЂзнь зараз, ї здоровъ от того часу став, ї благодарилъ свою їсцелителницу св̃тую Варвару чюдотворную.






ЧУДО 9


Иеромонах Іосифъ такожде болЂзнию зелною болЂл, на которую не могучи /211зв./ лекарства знаити, утекся з верою до св̃тыя Варвары мощеи, ї з руки еи св̃тои гды воды напился, яд своеи болЂзни зараз вес выблевал ї от того часу досконале стал здоров, благодарячи св̃тую Варвару.






ЧУДО 10


Монах Гаврилъ великую хоробу трясовичную ї огнЂвичную терпЂлъ, а гды не моглъ еи улечити, радили ему братия, їже бы з вЂрою з руки св̃тои Варвары воды напился, ї непивнеЗ так бы могъ оздоровети, але оя маловЂренъ не слухалъ доброи ради ї не хотЂлъ не веречи, абы так улечился. Ї так борзЂи еще его тоя ж болЂзнъ трапила, аж я его довЂдавшися, построфовал /212/ ї казал, абы вЂру мЂл ко св̃тои Варвары невонтьпивуюИ, а потом ї мл̃твою смирившися за маловЂрие, напился воды з руки св̃тои Варвары вмЂсто пЂвного лЂкарства. А гды он меня послухавши, з вЂрою напился з руки св̃тои Варвары, зараз от того часу оздоровел ї дяковал мнЂ, св̃тои ВарварЂ.






ЧУДО 11


Младенец един лЂт осматцетиІ албо быльше попал былъ в хоробу новомЂсечную ї покилко мс̃цеи на новмс̃ца отходил от разуму, и мовил ї учинил лЂдащо не знаючи що дЂял; їмя ему Еустафиї. Пан его, Ї— жалуючи, барзо—Ї фрасовался ї, не знаючи як бы тую его хоробу новомесечную улечити, /212зв./ къ св̃тои Варвары Й—Й и за потронку еи себЂ здавна маючи, оброкъ учинилъ къ св̃тои Варвары, еи помочи св̃тои своего слугу Еустафия поручаючи ї молячи, абы исцелила, к мощем еи св̃тымъ обичаючи его отслати. Ї за тымъ оброкомъ молитвами св̃тои Варвары зараз отступила от Евстафия слуги его тая новомЂсечная тяжкая хороба, ї здоровым от того часу стал. Тое чюдовное їсцеление самъ панъ того Еустафия, пречестныи от̃цъ їгумен кирилскии, мнЂ повЂдал ї привозил его къ мощем св̃тои, дякуючи за исцеление.






ЧУДО 12


За немалое чюдо ї моя видения почитаю /213/ А тоя. Звичаи естъ давныи у монстре нш̃ем Михаиловскомъ, иже бывает в предЂле при мощах св̃тои Варвары кождого тыжня во второкъ служба Бж̃ия ї молебен св̃тои Варвары. Еднаго теды часу року 1660 в постъ великии, жє долгое бываетК набожественство абы братии не тяжко было многое спевания ї читания, казаленъЛ былъ оставити, в постъ великии толко, второкъ молЂбен пЂти у св̃тои Варвары, ї скоро тое учиниленМ, гды мало уснулемъ, здоло ми ся, Ако бы в церкви пришолем к мощем св̃тыя Варвары ї обачю еи в труне седячую не зовсемъ право ї поклонившися, з великим страхомъ реклемъ: «Лящ, св̃тая Варвара, /213зв./ не гораз такъ сидети». Св̃тая легла зараз, криво ногу и руку з труны вывисивши вонъ. Я з страхомъ прошу, абы легла просто; а св̃тая мнЂ мовит: «Не лягу просто, хиба ты поправиш». Я з боязнию мовлю: «Не смЂю тобЂ дотыкатися». ЗновуН мнЂ св̃тая мовит: «Конечне ты направ що криво». А гды я мало доткнулемся мощеи зараз сами мощи право легли. А з жалостю еще во видении толковалем себЂ, їже я то учинилемъ криво, же молебен св̃тои во второкъ оставилем, ї до себЂ пришодши, повЂдалемъ братии видение и сказалемъ, абы во великиї постъ во второкъ бывал у св̃тои Варвары молебенъ, поневаж сама не любит ї зоО кривоз почитает /214/ тое, же оставили есмо молебен. Ї такъ братия охоча почали молебенъ спЂвати.






ЧУДО 13


Знову того ж року фрасовалемся подчасъ сеи междоусобнои брани о скудости мн̃стря ї о небезпеченство здоровА, а гды уснулен, здалемся быти у мощеи св̃тыя Варвары і вижу св̃тую всю лежачую во оливи — полно труно. И речет мне св̃тая, взявши мене за руку: «Не фрасуися, а я з вами естенъ». А я себЂ толковален, иже в писме св̃том през оливу значится мл̃срдия; оливы теды полность, в которои св̃тую Варвару лежачую виделен, есть млсть св̃тои к нам, ї же полно всего еи мл̃твами будет, ї не оскудЂет до конца /214зв./ св̃тая обител и безпечално будет, яко же мл̃твами св̃тыи Михаило и св̃тыя Варвары до сего часу пребыла цела ї неоскудно св̃тая обител, о чом благодаримъ св̃тую.






ЧУДО 14


Року 1668 августа въ 24 дня, Григориї слесар робил работу єдному служалому, которыи служалыи не зуполного разуму будучи пришол к Григорию ї хотЂл без платы свою взят работу ї, добывши шпады, мало Григория не сколол. Григория с того переполоху напала великая болЂзнь, так, же до себЂ приитти не могъ, аж по килко днях хори учинил оброкъ св̃тои Варвары, с котрои руки св̃тои скоро з вЂрою напился воды, зараз оздоровил /215/ ї самъ мнЂ тое чюдовное исцеление свое от св̃тои Варвары оповЂдалъ, благодарячи св̃тую великомученицу.






ЧУДО 15


Иоанъ Колцедан того ж часу хории барзо, за порадою знаючих чюдовънии также св̃тыяП Варвары исцеления, скоро з руки свтыи воды напилсе, зараз оздоровил ї мнЂ тое оказал.






ЧУДО 16


Иван АлеξЂевъ Мещеринов, голова стрелецкии, сказал мнЂ, їже,— мовит,— коли колвекъ альбо фрасунокъ ї туто на мене великое будет, албо Акая колвекъ потреба великая,— всегда прииду к мощем св̃тыя Варвары, ї скоро прослезившися св̃тои мученицы помолюся, /215зв./ зараз помоч значную от неи ї досит учиньне въ моеи потребЂ приимаю; для того,— мовит,— ї моим стрелцомъ, кгды котрии захорЂет, по певное лекарство до св̃тои Варвары їти приказую, все ншии лекарства покинувши; ї они, меня послухавши, скорое исцеление от мощеи св̃тыя Варвары примуют.






ЧУДО 17


Афонасии АлеξЂівич Ушаков ехал водою с ЧернЂгова стрелцами, а гды до Остра приближался, напали на них неприятеле болше нижь их было, ї почали на их стреляти моцно, ї самому Афонасию тамъ пострЂл — любо не барзо жаразливыи достался, аж почал былъ о себЂ вонтьпити. Во которомъ разе еден стрелецъ речет Афонасия: /216/ «ОбЂщался при св̃том Михаиле св̃тои великомученицы Варвары ї молися, уфаи, будем целы». АфонасЂи, услышав, з радостью учинил обЂт св̃тои Варвары ї молитися о помоч просяча почал. Скоро тое учинил, зараз на березе явися їх людеи, и неприятели отихали, ї самъ Афонасии до своих с челна висЂл ї цел с своими чолновыми застал. А так цел чюдовънЂР мл̃твами св̃тыя Варвары до Киіва приехав, молебен при мощех св̃тыя Варвары закупил, дякуючи св̃тои Варвары, ї самъ мнЂ тую чюдовную свою пресв̃тую Варвару оборону оповЂдалъ.

Многая ї иная чюда ї исцеления чюдотворное от мощеи св̃тои Варвары дЂются, которыи не толко сия малая книжица /216зв./ бы не зместила, написалем на ползу ї на поощрение вЂры къ св̃тои Варвары несуменнои слыщащимъ ї чтущим.










Попередня     Головна     Наступна


Етимологія та історія української мови:

Датчанин:   В основі української назви датчани лежить долучення староукраїнської книжності до європейського контексту, до грецькомовної і латинськомовної науки. Саме із західних джерел прийшла -т- основи. І коли наші сучасники вживають назв датський, датчанин, то, навіть не здогадуючись, ступають по слідах, прокладених півтисячоліття тому предками, які перебували у великій європейській культурній спільноті. . . . )



 


Якщо помітили помилку набору на цiй сторiнцi, видiлiть ціле слово мишкою та натисніть Ctrl+Enter.

Iзборник. Історія України IX-XVIII ст.