Попередня     Головна     Наступна





РОЗДЂЛЪ ДЕВЯТЫЙ О ПРАВАХЪ ЗЕМСКИХЪ.


АРТЫКУЛЪ 1.

О отнятье имЂней въ границахъ.


Уставуемъ, еслибы которые княжата, панове бискупове закону Рымского такъ и Греческого, и кнегини панни, вдовы, и земяне мЂли имЂнья люди и земли ловы и лЂсы озера и бобровые гоны у границахъ або иежахъ; а хотЂлъ бы одинъ другого перешедши границу або межу въ землю уступоватися, або люди и земли ловы и лЂсы озера и сЂножати и бобровые гоны отнимати, хотЂчы его съ того имЂнья вытиснути; тогды мають зъ обу сторонъ по осмнадцати свЂдковъ передъ правомъ поставити на кгрунтЂ земляномъ, и кого найдуть судьи близшого ку доводу, тогды кождого стану вышеймененыхъ маеть и зъ шестма свЂдками самъ семый на своемъ кгрунтЂ присегнуть.






АРТЫКУЛЪ 2.

О рокъ завитый на землю выЂхатъ.


Тежъ уставуемъ, ижъ рокъ ку граниченью и всякой копе судомъ положоный маеть быти завитыи, а про то черезъ жадную причыну не маеть далей отложонъ быти, толко съ тыхъ причынъ, которые особливыми артыкулами суть описаны: моромъ, соймомъ вальнымъ, службою нашою господарскою, то есть посельством або войною, и немоцъю правдивою. И коли бы которая сторона кромъ тыхъ причынъ не стала; тогды сторона за своимъ слушнымъ врядовымъ доводомъ передъ судомъ земскимъ маеть речь свою одержати подлЂ заведенья свЂдковъ присяглыхъ, на мЂстцу граничномъ постановеныхъ, и присяги своей, и тымъ же речъ свою маеть не вЂчность одержати. А естли бы передъ тымъ рокомъ былъ немоцонъ, маеть дати вЂдомостъ судьям и сутяжому, а судъ маеть отложыти, поки онъ выздоровЂеть, а коли выздоровЂеть, мають его судьи листомъ обослати и рокъ зложыти; а онъ на другомъ року передъ судомъ первей маеть присегнути на на томъ, ижъ справедливе былъ немоцонъ и для тое форобы на томъ року стати не могъ. Также судья передъ тымъ рокомъ естли бы ся рознемогъ; тогды мають подсудокъ и писаръ на тотъ рокъ предся выЂхати и то судити и отправовати, а тотъ судъ ихъ маеть моцонъ быти яко бы и всихъ трехъ. Такъ тежъ кгды бы ся трафило о граниченье о речъ важную вышей двадцати бочокъ земли; тогды судья або подсудокъ съ писаремъ у повЂтЂ, маючы при собЂ людей добрыхъ, а тую землю объЂхавшы, справовати кончыти и ограничити мають.






АРТЫКУЛЪ 3.

Въ свЂдЂцст†жадного закону не маетъ быти кромъ Хрестіянского Рымского, Греческого закону.


Тежъ уставуемъ, ижъ свЂдки о речъ земскую и доводъ держаня земли, а такъ тежъ и о кождую речъ, не мають у свЂдЂцтва припущоны быти жыдове а ни Татарове, одно Хрестіянского Рымского або Гречоского закону. И вшакъ же може съ тыми Хрестіяны, которые бы патеръ умЂли и вЂрою во единого Бога, на кождый годъ у плебановъ або у поповъ своихъ на сповЂди бывали, тЂло Божое пріймовали, а въ жадномъ подойзрЂнью не бывали, а ни в поволаню у воколицы а ни фальшерствЂ, тые мають допущоны быти свЂдЂцства; а хотя бы и хрестіяне будь Рымского або Греческого закону, которые божего тЂла не пріймують, сведЂцства передъ не мають допущоны быти.






АРТЫКУЛЪ 4.

Хто бы кому свЂдки ганилъ.


Коли бы хто своволнЂ сторонЂ поводовой свЂдки ганилъ, а онъ если бы подлугъ права поставилъ осмнадцать свЂдковъ, а тотъ бы межы тыми осмнадцатма свЂдками не обралъ шести вЂры годныхъ, а оставлялъ хотечы имъ тымъ право конченя переказити, а тотъ яко поводовая сторона другими ся свЂдками не опатрилъ, мЂлъ бы тымъ на одномъ року завитомъ речъ свою упустити; тогды таковый моценъ маеть быти о тое наганенье свЂдковъ своихъ тамъ же передъ судьями первей очыщати. А коли судьи вызнають, ижъ ему тыхъ свЂдковъ свовольнЂ ганилъ и оставилъ, а они се выведутъ; тогды таковый оставуючы тыхъ свЂдковъ, кождого зганеного водлЂ стану повиненъ будеть навезати водлЂ роду ихъ, шляхтича яко шляхтича, холопа яко холопа, такъ яко бы его ранилъ.






АРТЫКУЛЪ 5.

Коли бы хто свЂдковъ наганеныхъ передъ судомъ не очыстилъ.


Коли бы хто тыхъ же свЂдковъ передъ тымъ судомъ своимъ зганеныхъ всихъ не очыстилъ; тогды хто свЂдковъ наганить, а оные свЂдки зганеные не очыстилися, ино тые свЂдки которые не приганеные мають присегнути. А если бы зъ обудву сторонъ межы собою свЂдки одны другимъ наганили; тогды свЂдки тые на обЂд†стороны мають оставлены быти, а знову иншыхъ свЂдковъ зъ обохъ сторонъ поставити мають неподойзреныхъ, и межы тыми которые будуть годнЂйшіе, тые мають быти пріймованы, и сами зъ свЂдками присегати.






АРТЫКУЛЪ 6.

О землю обрубную.


Тежъ уставуемъ, естли которой сторонЂ о землю обрубную доводъ права былъ сказанъ, тотъ свЂдковъ своихъ маеть подлЂ обычаю права осмнадцати передъ правомъ постановити, и якъ тотъ панъ або земянинъ поколе съ тыми свЂдками заведшы присягу вчынить, по толь маеть граница вдЂлана быти. Нижли естли бы право мЂли о землю сумЂсную, а не въ одномъ мЂстцЂ порозну, одна земля отъ другое въ пол-мили або и далей; тогды на кождой таковой далекой межы маеть свЂдковъ особныхъ мЂти, и на кождой межи самъ и зъ шестма свЂдки повонинъ будеть присегнути, а тые свЂдки, которые на первой межи присегнуть, на другой межи того жъ часу свЂдчыти и присегати не могутъ, окромъ тыхъ земль которые тужъ понедалеку отъ себе, на таковые межи тыхъ же свЂдковъ поставити и доводъ подлЂ права чынити можеть.






АРТЫКУЛЪ 7.

О рокъ завитый шестъ недЂлъ.


Уставуемъ, абы на кождый кгрунтъ земляный отъ суду земского заочнЂ рокъ не быдъ зложонъ, лечъ первей сторона жалобливая маеть передъ судъ земскій припозвати, а судъ зъ очевистого мовенья маеть имъ обоимъ сторонамъ рокъ зложыти завитый за шесть недЂль, на который судья съ подсудкомъ и писаремъ мають выЂхавши, яко на року завитомъ мають справедливость чынити, а стороны обЂ д†будуть повинни передъ ими права достояти и сказанье пріймовати. А по сказанью будеть ли ся которой сторонЂ видЂти зъ уближенемъ, тогды по сказанью мають выписъ отъ суду земского вземшы до пановъ радъ нашихъ апелевать.






АРТЫКУЛЪ 8.

Хто бы будучи урядникомъ господарскимъ, маючы имЂнье въ томъ повЂтЂ, мЂлъ зъ штяхтичомъ право о землю.


Тымъ тежъ обычаемъ если бы который урядникъ нашъ, маючы имЂнье въ томъ же повЂтЂ державы своей, мЂлъ зъ которымъ шляхтичомъ копу вести; теды маеть справоватьсе о кгрунтъ земный, яко вышей описано, и маеть ставить осмнадцать свЂдковъ шляхту и иншыхъ людей добрыхъ вЂры годныхъ, а не того уряаду присуду своего, але иншыхъ постороннихъ, и такъ тежъ судьи мають гледЂть листовъ границъ знаковъ, а чыи будуть листы лЂпшые и границы, тая сторона маеть быти припущона ку доводу.






АРТЫКУЛЪ 9.

Хто бы кому граниу або межу сказилъ.


Коли бы шляхтичъ шляхтичу границу сказилъ, або огнемъ выжогъ, або вырубалъ кгвалтовнЂ, або яко кольвекъ инакъ выказилъ, або копцы роскопалъ, або межу сказилъ, а было бы то на него переведено правомъ; тогды таковый маеть заплатити ображоному дванадцать рублевъ грошей, а суду земскому копу грошей, а за кождый копецъ скажоный три копе грошей. А естли бы шлихтичъ шляхтичу межу переоралъ; тогды за переоранье межи три рубли грошей и на судъ земскій пол-копы грошей, а границу або межу черезъ него скажоную маеть за се передъ урядомъ направити по старому. А если бы холопъ простый холопу то учынилъ; тогды за скаженье холопское межы рубль грошей. А пакли бы граница або межа здаласе ему ку кривдЂ, ино маеть правомъ спирати а не кгвалтомъ.







АРТЫКУЛЪ 10.

О лЂсъ сумесный и о проробки.


Уставуемъ, если бы хто лЂсъ сумесный мЂлъ; тогды маеть кождый поля своего гледЂти и противъ себе проробки чинити, а отъ лЂса одинъ другого не маеть заходити, и якъ зоткнутьсе топоры, тутъ маеть быти граница. А вЂдже естли бы одинъ дубъ былъ и большей проробилъ нижли другій, а оному се видЂла бы кривда, и потегнулъ его о то до права; тогды маеть быти выслано и осмотрЂно, и естьли будеть большей проробилъ, таковый маеть на тое мЂстце лЂсу дати противъ проробковъ, хто большъ проробилъ, хотя не такъ доброго якъ тотъ выробленый. А кгды оный сяберенъ его лЂсу только приробить яко оный, тогды иаеть у мЂру лихое и доброе подЂлити на полы; если бы оны съ того лЂсу ему отвести, который большей приробилъ, ино маеть тые проробки свое, што будеть большъ выробилъ, на полы або на ровные части, иле ихъ будеть, роздЂлити.






АРТЫКУЛЪ 11.

О рЂки, где граничать.


Тежъ гдЂ бы рЂка граничыла, тогды кождый съ берега своего маеть до половицы вжывати. А кгды бы рЂка которая граничная на чый берегъ песокъ незначнЂ сыплючы прибавокъ чынила, тотъ прибавокъ маеть быть того пана, чый берегъ естъ; а естли бы рЂка кгвалтомъ идучи инуды пошла, тогды старое рЂчыще маеть быти предсе границою, а того рЂчыща будеть ли въ ней пожытокъ, такъ кождый съ берега своего на половицы уживати маеть. А тая рЂка граничная, которая инуды се обернеть, оба два береги того мають, чыимъ кгрунтомъ пойдеть. А естли хто рЂку прокопалъ умыслнЂ ку шкодЂ сусЂду своему, и о то бы его ку праву позвалъ, и то бы на него перевелъ ведле права, тогды маеть оному право сказати; абы зась рЂку по старому загаиовалъ, и за то будеть повиненъ жалобливой сторонЂ кгвалтъ дванадцать рублей платити, яко бы границу сказилъ, и вси шкоды, што въ пожыткохъ тое речы шкодовалъ, зъ розсудку оправити маеть.







АРТЫКУЛЪ 12.

Коли бы хто своимъ ставомъ иншый ставъ або сЂножати затопилъ.


Тежъ уставуемъ, коли бы хто въ дЂдизнЂ сполную рЂку мЂлъ, то есть оба два бы береги мЂлъ и его были, а на ней ставъ и млыны поставилъ, а сусЂдній выше млынъ затопилъ своимъ ставомъ, хотя бы опослЂ збудовалъ былъ, а онъ поднемшы греблю затопилъ; тогды маеть возного зъ уряду взяти, а вознымъ и сторонами маеть спустити воду, и што будеть шкоду учинилъ, тую шкоду затопленому оправити водлугъ слушного доводу маеть. А естли бы сЂножати затопилъ безъ воли того пана, чыя сЂножать естъ; тогды будеть ли его воля отмЂну взяти, а онъ маеть ему отмЂну дати, а пакли бы на то воли его не было, тогды онъ нехай воду потому держить, яко бы его сЂножати шкоды не было и верхнего млына не затопилъ. Естли бы тежъ половицу рЂки мЂлъ, а присыпалъ греблю къ чужому берегу або сЂножать затопилъ безъ его дозволенья; тотъ тую греблю роскопати маеть и за то не повиненъ будеть кгвалту платити, бы нихто не маеть безъ дозволенья къ чужому берегу греблю засыпати а ни ставу займовати.






АРТЫКУЛЪ 13.

Хто бы на чыей земли посЂялъ збожъе, тежъ коли бы хотЂлъ сЂно косити альбо бы и покосилъ, якъ маетъ заповЂдати вознымъ, абы не звозилъ до права.


Уставуемъ, хто на чыей земли жыто посЂетъ; тогды тотъ, хто свою землю менуетъ, маеть взяти возного зъ уряду, въ чыемъ повЂтЂ се дЂеть, маеть запозвати подъ закладомъ на насъ Господаря и на судъ земскій, штобы онъ жыта не звозилъ и пожавшы поставилъ на той же земли до права, и рокъ положившы, маеть зъ обу сторонъ судъ земскій вывести. А естли бы тотъ, хто заповЂдалъ, правомъ перевелъ, штожъ онъ тое жыто будеть сЂялъ на его власной земли; тогды маеть быти ему такъ земли яко и оное жыто; а гдЂ бы тотъ черезъ заповЂдь або закладъ пожавшы оное жыто и звезъ прочъ, тогды маеть закладъ заплатити и жыто зъ навезкою отдати. А если бы хто будеть на своей власной земли сЂялъ, а онъ ему то заповЂдалъ, а тотъ правомъ не переведетъ, ижъ бы то земля его была; таковый закладъ тотъ самъ платитъ до скарбу нашого господарского и шкоды оному оправити маеть, то естъ, если бы чые жыто за заповЂдью погнило. Або тежъ хто судъ земкій вывелъ и на него наложылъ, а то што жаловалъ не довелъ, тогды тое жыто маеть тому платити и тую шкоду оправити. А хто бы хотЂлъ черезъ границу кому шкоду вчынити; тогды въ таковыхъ речахъ закладъ маеть быти на насъ Господара сто рублевъ грошей, а на державцу двадцать рублевъ грошей; а если бы о межахъ была заповЂдь, тогды закладъ маеть быти на насъ Господара дванадцать рублевъ грошей, а на державцу три рубли грошей, нижли заповЂдь жыту и сЂножатемъ маеть трывати до Божьего нароженья.






АРТЫКУЛЪ 14.

Хто бы земли въ держанью былъ три годы, а другій правомъ не переконавшы жыто пожалъ, або жатое побралъ, або бой учынилъ, або соху зрубалъ барону и колеса.


Тежъ уставуемъ, ижъ коли бы хто которую землю держалъ въ упокою три годы, а съ покоемъ ее сЂялъ або оралъ, а другій пришедшы на тое поле жыто пожалъ, або жатое побралъ и вдарилъ самого або человЂка его, або которого кольвекъ стану, або соху колеса борону зрубалъ и сошники взялъ; таковый маеть платити кгвалтъ дванадцать рублей грошей, а если возметъ безъ бою, то маеть шкоду платити зъ навезкою, коня конемъ вола воломъ навезати, а за соху десеть грошей, а за нароги дванадцать грошей, за колеса дванадцать грошей, за борону шесть грошей заплатити, а потомъ, кгды похочеть, держачого о тую землю маеть правомъ урядовнЂ спирати. А если бы хто въ кого отнималъ, а другій того боронилъ, и въ держанье не далъ; тому маеть быть право, и хто въ земли будеть виненъ, тотъ маеть шкоды и кгвалтъ оправити.






АРТЫКУЛЪ 15.

О увезанье въ имЂнье за долги, або за иншую причыну, якъ се мають справовати.


Уставуемъ, если бы отъ насъ Господара былъ посланъ дворенинъ нашъ увезатисе въ чые имЂнье за суму пенезей, которая бы прислушала до скарбу нашого господарского, тогды тотъ посланецъ маеть пріехати до того имЂнья, и вземшы зъ уряду земского або замкового возного и людей добрыхъ шляхту, и оного имЂнья людей всихъ маетности списати, одинъ реестръ дати до скарбу нашого, а другій до замку або до суду земского, а третій у себе маеть зоставити, для того абы въ часъ помовки мЂлъ ся чимъ выправовати. Нижли естли бы што на комъ было присужоно зъ выроку нашого або пановъ радъ нашихъ; тогды въ таковой речи зи листы нашими маеть судъ земскій увязанье дати, а гдЂ бы ся спротивлено суду земскому, ино замокъ ино повЂтъ маеть моцно увезати, пестерегаючи и заховываючися ведле того, яко о томъ вышей въ роздЂлЂ о судъяхъ естъ написано.






АРТЫКУЛЪ 16.

О имЂнье, которое зволившыся дадутъ до рукъ нашихъ господарскихъ.


Тежъ уставуемъ, ижъ коли бы обЂ д†стороне зволившися и дали имЂнье до рукъ нашихъ господарскихъ до росправы, а мы быхмо которому вряднику нашому господарскому або черезъ листы наши або черезъ увяжчого оное имЂнье до води и науки нашое въ держанье дали; тогды врядникъ воленъ будеть въ томъ имЂнью слушную жывность собЂ мЂти, а зъ двора индей ничого не маеть возити, але будеть повиненъ оное имЂнье со всими речами рухомыми, такъ тежъ и зъ росходы часу держанья собраными, оной сторонЂ, которой прислушаеть, вЂрнЂ а зуполнЂ за листомъ нашимъ господарскимъ отдати, и дозрЂти того, же въ ономъ имЂнью за держанья его жадная шкода и спустошенье не сталося. А естли бы тотъ врядникъ иначей чинилъ; повиненъ будеть оной сторонЂ шкодной всю шкоду и згубу платити, а мы и потомки наши винни будемъ зъ нимъ той сторонЂ справедливостъ учинити на первомъ року яко на завитомъ, а въ небытности нашой ино панове рада наши.






АРТЫКУЛЪ 17.

О имЂнье нероздЂльное межи братьею.


Тежъ уставуемъ, ижъ коли бы братья рожоная, альбо и и дальшая въ роду нижли братья рожоная, лЂта зуполные маючи, мЂли которое имЂнье сумЂстное нероздЂльное, а потомъ передъ правомъ собЂ зровнали и роспишавши подЂлили, або и подЂлившы и передъ врядъ пришедши сознали, або листы и реестры межи себе дали; тогды тотъ вжо дЂлъ промежку себе вЂчнЂ держати мають, а хотя бы и не передъ правомъ але передъ сполными пріятельми своими также во имЂнью собЂ дЂлъ учинили, а тотъ дЂлъ промежку себе давность земскую десеть годъ держали, таковый дЂлъ вжо за таковою давностью земскою мають промежку себе деражати. А если бы братья або кровные якій дЂлъ промежку себе хотя и мЂли, а передъ врядомъ того дЂлу своего сполечнЂ не сознали, а листовъ або реестровъ дЂлчихъ межи себе такъ и листовъ прислучаючихъ на то не розобрали; таковый дЂлъ за вЂчный держанъ быти не маеть, и никоторая давность шкодити не можеть, а то для того, же бы одинъ на другого большей собЂ не привлащалъ части.






АРТЫКУЛЪ 18.

У чужого человЂка не маеть нихто земли закуповати безъ воли пана его.


Тежъ уставуемъ, ижъ не маеть жаденъ бояринъ а ни человЂкъ въ чужого человЂка земли закуповати безъ воли пана своего; а естли бы хто въ чужого человЂка безъ воли пана его закупивъ и што на ней посЂялъ, тогды тое сЂенье и пенези тратитъ. А тотъ человЂкъ, чія земля маеть безъ откладанья пенезей всю землю къ своимъ рукамъ взяти; а онъ на томъ его, въ которого будетъ землю закупилъ, и на поручнику, черезъ чіи руки давалъ будеть, пенезей искати не маеть, для того ижъ онъ то учинилъ надъ тую уставу нашу. Также и чужого человЂка не маеть нихто закуповати безъ воли пана.







АРТЫКУЛЪ 19.

Которые люди приходятъ на волю и засЂдевши волю втекають прочъ.


Уставуемъ, коли бы человЂкъ вольный пришолъ за которого князя або пана и земенина, а сЂлъ на воли, а высЂдевши волю хотЂлъ прочъ засе пойти; тогды первей маеть заслужити тому пану своему только, колько на воли седЂлъ, тожъ пойти прочъ. А естли бы не хотЂлъ заслужити толькожъ; тогды маеть пенези заплатити на кождую недЂлю по шести грошей. А естли жъ бы онъ, заседЂвши волю, втекъ за кого кольвекъ иного; тотъ за кого втечеть, маеть его ему выдати не мнЂй яко отчича, пакли жъ бы на обсыланье его того человЂка выдати не хотЂлъ, а тотъ человЂкъ потомъ отъ него втекъ прочъ, а то бы на него правомъ переведено, тогды за него маеть платити за кождую недЂлю, колко на воли седЂлъ а не робилъ, по шести грошей.






АРТЫКУЛЪ 20.

О найденью скарбу захованого въ земли або у якомъ поклаженю.


Уставуемъ, коли бы ся трафило кому налЂзти въ земли якій скарбъ, гроши, золото, серебро, або иншое яко се трафляеть находити; тогды естьли найдеть на своемъ кгрунтЂ, маеть тому быти чій кгрунтъ, а естли бы на чіемъ иншомъ нашолъ, тогды половицу маеть тому дати, на чіей земли нашолъ, а половицу собЂ взяти, такъ тежъ и на заставной земли на полы роздЂлити мають. Нижли хто бы умыслнЂ на чужой земли кладу искалъ и нашолъ; тогды маеть што будеть найдено все тое отдати, чій кгрунтъ естъ. А вЂдьже таковому найденью хтобы се знати не хотЂлъ, тогды ку праву притягивати ани ку присязЂ его примушати не маеть.






АРТЫКУЛЪ 21.

О портехъ водныхъ и о товарехъ стонулыхъ на водахъ.


Кгды бы ся трафило, воднымъ путемъ везучи якіе товары съ прыгоды судно се розбило, або стонуло при чіемъ кольвекъ берегу; тогды оный товаръ стонулый купецъ або хто кольвекъ маеть добровольнЂ зъ воды выбирати и на берегъ выносити, а врядники наши князи и панове и ихъ врядники земяне и люди простые, и чій кольвекъ берегъ есть, не мають отъ того ничого брати. А хто бы хотЂлъ въ томъ онымъ стонулымъ трудность задавати; тогды тотъ будеть повиненъ всю шкоду, што будеть на томъ шкодовати, совито оправити.






АРТЫКУЛЪ 22.

О дорогахъ старовЂчныхъ.


Уставуемъ, ижъ дороги звЂчные мають быти водлЂ стародавного обычаю такъ широки, абы два возъ форманскихъ розминулися, а возъ порожній маеть уступити возу наложоному, пЂшій Ђздному, возовому Ђздный, естли бы тЂсна дорога была яко у мЂстехъ, або естьли бы хто передъ непріятелемъ утекалъ, тогды возъ застановеный маеть быти, ажъ обминуеть. А часу зимнего кгды снЂгъ бываетъ велкиій, мають поткавшися дорогою половицы дЂлити, а одинъ другого спихати не маеть съ дороги.

А вЂдьже на томъ соймЂ зъ росправы господарское его милость придати рачилъ урядъ подкоморого ку тымъ справамъ судовъ земляныхъ, а то для большое и поспЂшнЂйшое отправы въ справедливости людской, про то што судъ земскій мЂлъ отправовати ведлЂ артыкуловъ урядовныхъ вышей описаныхъ въ томъ статутЂ.
















Попередня     Головна     Наступна


Етимологія та історія української мови ua_etymology:

Датчанин:   В основі української назви датчани лежить долучення староукраїнської книжності до європейського контексту, до грецькомовної і латинськомовної науки. Саме із західних джерел прийшла -т- основи. І коли наші сучасники вживають назв датський, датчани, то, навіть не здогадуючись, ступають по слідах, прокладених півтисячоліття тому предками, які перебували у великій європейській культурній спільноті. . . . )



Якщо помітили помилку набору на цiй сторiнцi, видiлiть ціле слово мишкою та натисніть Ctrl+Enter.