Попередня     Головна     Наступна





РОЗДЂЛЪ ДВАНАДАЦТЫЙ О ГОЛОВЩЫЗНАХЪ И НАВЕЗКАХЪ ЛЮДЕЙ ПОСПОЛИТЫХЪ.


АРТЫКУЛЪ 1.

О головщинахъ и навезкахъ людей простого стану.


Головщызна панцерному слузЂ пятдесятъ копъ грошей, путному слузЂ тридцать копъ грошей, бортнику двадцать пять копъ грошей, тяглому двадцать копъ грошей, паробку десеть копъ грошей, а жонамъ ихъ совито. А навезка панцерному слузЂ шесть рублей грошей, бортнику два рубли грошей, тяглому рубль грошей, паробку полтина грошей, а жонамъ ихъ совито, а жонца, которая мужа не маеть и не мЂла, полтина грошей.






АРТЫКУЛЪ 2.

Головщизны и навезки тивуномъ, ключникомъ, войтомъ, старцомъ, лавникомъ сельскимъ.


Тивуну, ключнику, войту, старцу головщизна сорокъ копъ грошей, естьли бы невольникъ въ которомъ съ тыхъ врядовъ былъ, тогды ему во врядЂ головщизны двадцать копъ грошей, а навезки рубль грошей. А пакли бы въ ключохъ або у войтовст†которій шляхтичъ былъ; таковому предсе головщизна маеть быти водле стану шляхецского. А навезка тивуну, ключнику, войту, старцу по три рубли грошей, а лавнику два рубли грошей.






АРТЫКУЛЪ 3.

Головщизна ремеснымъ людемъ.


Золотару, органистЂ, пушкару, гафтару, малерови, сокольнику, машталору, кравцу, гафтарцЂ, коверникутымъ всимъ головщизна по тридцати копъ грошей, а навезки по три рубли грошей, а жонамъ ихъ совито. ДойлидЂ, ковалю, столяру, псарцу, возницы, мулеру, шевцу, гончару тымъ всимъ головщизны по двадцати копъ грошей, а навезки три рубли грошей, а жонамъ ихъ совито. Потомужъ и иншыхъ ремесникомъ, которыхъ тутъ не написано, маеть быти плачоно яко дойлидЂ и жонамъ ихъ совито.






АРТЫКУЛЪ 4.

О ношенью жидовскомъ.


Жидове въ коштовныхъ шатахъ зъ ланцуги золотыми сами и жоны ихъ въ золотЂ и въ серебрЂ, такъ тежъ и сребра на пасахъ и на кордахъ носити не мають; але уберъ ихъ маеть быти значный: шапки або биретъ жолтый, такъ тежъ и завиванья бЂлыхъ головъ полотно жолтое, або тому подобное, ижъ бы знакъ и певное розознанье было христіянина отъ жида.






АРТЫКУЛЪ 5.

Жидъ, татаринъ и кождыи бесурмянинъ на врядъ преложонъ и хрестіянъ въ неволи мЂти не маетъ.


Уставуем, ижъ отъ того часу мЂти хочемъ, абы жидъ, татаринъ и кождый бесурмянинъ на достоенство а ни на который врядъ отъ насъ Господаря а ни отъ пановъ радъ нашихъ преложонъ не былъ и хрестіянъ въ неволи не мЂлъ. А естьли бы который зъ нихъ христіянина купилъ у вЂчную неволю; таковый пенези тратитъ, а тотъ хрестіянинъ маеть быти воленъ. А естьлибы хлопа або жонку закупилъ, тогды маеть прійти передъ врядъ и въ чомъ закупилъ, або тежъ и зъ суда въ заплатЂ яко будеть выданъ, до книгъ записати; и будеть ли сума невеликая, тогды тотъ закупъ и закупня за семъ лЂтъ съ тыхъ пенязей маеть выробитися, а кгды бы сума великая была, ино с тыхъ пенязей на кождый годъ выпуску маеть быти хлопу полтину грошей а жонцЂ пол-копы грошей. Нижли маючи таковыхъ закуповъ и дЂтей ихъ въ жидовство а ни въ бесурмянство намовляти а ни обрЂзовати не мають, а который бы смЂлъ то вчинити, а было бы то на него переведено передъ врядомъ; тогды безъ кождого милосердья таковый огнемъ маеть быти каранъ, чого врядъ нашъ съ пильностью стеречи и о томъ вывЂдоватися достаточнЂ маеть. А мамками христіянки у дЂтей жидовскихъ и тежъ кождыхъ дЂтей бесурмянскихъ быти не мають; а хтобы хрестіянокъ ку тому приневолялъ, а то бы слушнЂ ведле права на него было переведено, таковый горломъ маеть быти каранъ. Тымъ же обычаемъ хотя бысмы которому татарину або жиду або которому бесурмянину дворъ нашъ або имЂнье зъ людьми дали; таковые мають се жидове и бесурменинъ на выслугахъ своихъ противъ христіянскихъ людей якъ выступныхъ такъ и тяглыхъ заховати, абы ихъ ку подачкомъ и службам незвыклымъ не приневоляли. А пакли бы тые люди наши за таковымъ зневоленьемъ прочъ отошли и засЂли на земляхъ нашихъ або князкихъ панскихъ и шляхецскихъ; таковыхъ за вольныхъ мЂти хочем, нижли земли ихъ мають зостати при таковыхъ, кому дано водле данины нашое.






АРТЫКУЛЪ 6.

Навезка татаромъ.


Уставуемъ, которые князи и мурзы татарове закону бесурмянского мають оселости имЂнья земскіе зъ наданья продковъ нашихъ и насъ самыхъ, и естли тые бывають на службахъ нашихъ господарскихъ и земскихъ и в ротахъ, або при гетманехъ нашихъ, и въ реестрахъ военныхъ суть написаны; таковымъ навезка маеть быти яко шляхтичу, а жонамъ ихъ совито, а головщизны сто копъ грошей кромъ седЂнья. А которые татарове форминомъ ся жывять, и огородные речы справують, быдломъ торгують, кожы дубять, и якими кольвекъ речами жывность собЂ заробляють; таковымъ навезки рубль грошей, а жонамъ ихъ совито, а головщизна дванадцать копъ грошей.






АРТЫКУЛЪ 7.

ЧеловЂкъ вольный за жаденъ выступокъ въ неволю выданъ быти не маетъ.


Тежъ уставуемъ, ижъ человЂкъ волный за жадный выступокъ въ неволю вЂчную выданъ быти не маеть, а естли бы въ сумЂ великой выданъ былъ; маеть съ тое сумы выроблятися, и выпуску на каждый годъ мужику полтина, а жонцЂ пол-копы грошей. А естьлибы съ тое сумы до смерти выслужитися не могъ, а будетъ ли мЂти дЂти; тогды дЂти не мають се съ тое сумы выробляти. А выпуску дорослымъ дЂтем потомужъ маеть быти, яко вышей описано. А закупнымъ людемъ тымъ же обычаемъ изъ сумы пенежное выпусть быти маеть.






АРТЫКУЛЪ 8.

О человЂку отчизномъ.


Кгды бы который человЂкъ отчизный, отшедши отъ пана своего и заложившися за кого иншого, не далеко въ пети або въ десети миляхъ мЂшкалъ; тогды вже о такового человЂка вЂчнЂ молчати маеть. Пакли бы тотъ человЂкъ отчизный отшедшы отъ пана своего и мЂшкалъ далеко въ колькодесяти миляхъ, а панъ его о немъ не вЂдалъ, а по томъ бы засе пришолъ и перемЂшкивалъ поблизу; тогды хотябы въ ономъ часЂ и давность земская зашла, вольно будеть ему того человЂка за отчича правомъ доходити, только бы давности не омЂшкалъ отъ того часу, якъ ближей прійдетъ.






АРТЫКУЛЪ 9.

Хто бы на человека вольного и невольного права доходити не хотЂлъ.


Тежъ еслибы который человЂкъ не похажалый або челядинъ невольный за кого зашолъ, а повЂдился быти вольнымъ, а онъ панъ, чій человЂкъ або челядинъ, просилъ у въ оного пана права, а тотъ панъ ему на него права дати не хотЂлъ; тогды таковый маеть притягненъ быти ку праву земскому. А естьли тотъ панъ, чій человЂкъ непохожій або челядинъ, зыщетъ правомъ ижъ его отчичъ або невольникъ, а на оного пана, въ кого тотъ человЂкъ, переведетъ правомъ, ижъ въ него просилъ справедливости разъ и два, а онъ не далъ; тогды тотъ панъ маеть навезати оного человЂка або челядина отъ того часу, якъ въ него права просилъ, за кождую недЂлю по шести грошей, а естли бы втекъ, тогды маеть платити потому, яко вышей о головщизнах написано.






АРТЫКУЛЪ 10.

О челядь невольную, которая втечеть отъ пана своего.


Уставуемъ, кгды бы хто чію челядь невольную вывелъ, або вЂдаючи заказъ въ себе переховывалъ, а то бы на него правомъ было переведено; тогды таковый повиненъ будеть ту челядь отъискати, а одыскавши тому пану отдати. А гдЂ бы не могъ одыскати, або не хотЂлъ; будеть повиненъ тую челядъ самъ цЂною платити, яко выше написано, и шкоду оправити отъ того часу, отъ которого ему тая челядь не робила, мужику и жонцЂ за кождую недЂлю по шести грошей.






АРТЫКУЛЪ 11.

О вольныхъ людехъ, которые въ голодъ продають.


Хто бы въ голодъ самъ себе або сына або тежъ которого человЂка вольного въ неволю продалъ, и листъ на то далъ; таковый листъ не маеть быти держанъ, але яко голодъ минеть, а онъ пенезей добудеть, маеть ему пенези отдати. Нижли естли бы хто челядь свою неволную продалъ; тая ведле продажи маеть вЂчнЂ держана быти.






АРТЫКУЛЪ 12.

Хто бы в голодъ челядь свою выгналъ.


Тежъ уставуемъ, естьли бы хто в голодъ челядь свою неволную выгналъ або выбилъ зъ дому своего прочъ, не хотечи ее кормити и переховывати; таковые вжо не мають быти невольными, але вольными. А вЂдьже тымъ обычаемъ, ижъ коли тую челядь выбьеть, тогды се они оповЂдати мають врядникомъ въ повЂтЂ або вряду мЂстскому бурмистромъ або мЂщаномъ, ижъ ихъ выбилъ а кормити не хотЂлъ; а тые, которимъ се оповЂдають, мають обослати того пана, чія челядь, естьли зознаеть, же для голоду выгналъ ихъ изъ дому не хотечи кормити, тогды оная челядь вЂчнЂ маеть быти вольна.






АРТЫКУЛЪ 13.

Невольницы мають быти троякихъ причинъ.


Тежъ уставуемъ, ижъ неволницы мають быти троякихъ причинъ: первые которые суть здавна въ неволи, або зъ невольныхъ се родятъ; другіе которые полономъ заведены суть изъ земли непріятельское; третіе коли бы се сами въ неволю поддали, а хто бы, ведаючы жонку неволную, въ малженство понялъ, хотя человЂкъ вольный, тогды таковый самъ и дЂти ихъ въ неволи быти мають. А естьли бы се невЂдоме поняли, а одинъ зъ нихъ будучи вольнымъ не хотЂлъ въ въ томъ быти; тогды того жъ часу мають се втечи до права духовного, ведле которого ихъ мають розвести, а по розводЂ таковый вольный маеть зостати вольнымъ, а невольный, неволнымъ.






АРТЫКУЛЪ 14.

Если бы хто до кого слугу приказалъ, а тотъ слуга зашкодивши втекъ отъ него прочъ.


Хто бы кому приказалъ слугу, а тотъ слуга шкоду вчинивши тому пану своему втекъ отъ него прочъ; тогды тотъ, хто его приказалъ, маеть ку праву стати, а судъ маеть ему рокъ зложити, на которій маеть его доискавшися ку праву поставити. А естьли жъ бы тотъ на оный рокъ, которій судьи положатъ, того не постановилъ; тогды онъ самъ повиненъ будеть тую шкоду оправити, на чомъ слушный доводъ учиненъ будеть. А естлибы се потомъ оному пану, за кого слуга втечеть, пригодить ли его видЂти на торгу або поткаеть въ дорозЂ; тогды вжо онъ самъ не маеть имати, нижли того приказцы своего смотрЂти маеть. А гдЂ бы хто мЂлъ слугу не приказного, а онъ ему шкоду учинивши прочъ втечеть; тогды онъ, гдЂ кольвекъ его увидитъ або поткаеть, маеть его поймати и вести до оного права гдЂ поймаеть, а передъ правомъ маеть на немъ шкодъ своихъ до доходити.















Попередня     Головна     Наступна


Етимологія та історія української мови:

Датчанин:   В основі української назви датчани лежить долучення староукраїнської книжності до європейського контексту, до грецькомовної і латинськомовної науки. Саме із західних джерел прийшла -т- основи. І коли наші сучасники вживають назв датський, датчани, то, навіть не здогадуючись, ступають по слідах, прокладених півтисячоліття тому предками, які перебували у великій європейській культурній спільноті. . . . )



Якщо помітили помилку набору на цiй сторiнцi, видiлiть ціле слово мишкою та натисніть Ctrl+Enter.