Попередня     Головна     Наступна





РОЗДЂЛЪ ТРЕТІЙНАДЪЦАТЬ, О ГРАБЕЖОХЪ И НАВЕЗКАХЪ.


АРТЫКУЛЪ 1.

О грабенье стада свирЂпъего.


Уставуемъ, естлибы хто пограбилъ на якомъ колвекъ кгрунтЂ стадо свирЂпъе князское, панское, земянское, а держачи стадо жеребца або свирЂпу и колко ихъ уморилъ або охромилъ; таковый за жеребца князского панского земянского повиненъ будеть заплатити осмъ копъ грошей, а за свирЂпу чотыри копы грошей, нижли за кождого съ тыхъ жеребцовъ будеть ли торгуючы што давано, тогды тую уЂну будеть повиненъ платити за слушным доводомъ.






АРТЫКУЛЪ 2.

Якимъ обычаемъ мають се заховати о испашъ и о грабежъ на испашахъ.


Тежъ уставуемъ, ижъ нихто стада свирЂпьего на дЂдизнЂ чужой на испашахъ такъ тежъ и на своей власной займовати не мають, ани въ грабежъ брати, а хто бы на чіей дЂдизнЂ стадо занялъ або грабежъ учинилъ; таковый маеть тому кгвалтъ заплатити дванадцать рублей грошей и шкоду оправити, а што бы се тому стаду стало, подлЂ уфалы вышей описаное. Бо не маеть за испашъ стада брати, бы и засталъ на испаши, але маеть освЂтчивши сусЂдови отогнать, до того пана, чіе стадо есть, и испашъ маеть обвести людьми добрыми сторонними; тогды тотъ повиненъ испашъ заплатити, чіе стадо шкоду вчинило. А вЂдьже вызволяемъ одно стадо свирЂпье, абы на испаши не было займовано, а быдло кони волы и коровы свинье и гуси на испаши мають быти займованы подлЂ обычаю, и скоро занявши маеть обослати того пана, чіе быдло свое на поруку взялъ, а о испашъ на купу шолъ; и што купа на испаши шкоды присудитъ, тотъ панъ чіе быдло занято, маеть платити. А гдЂ бы на обосланье того, кому се испашъ стала, быдла своего на поруку взяти и на купу ити не хотЂлъ; тогды тотъ, хто займетъ, маеть быти зъ людьми добрими сторонними, и што тая мсторона шкоды окупують, онъ маеть въ той шкодЂ своей оставити того быдла только, што бы за его шкоду стояло, а досталь отослати до того пана чіе быдло. Нижли стадо свирЂпье кони и кождое быдло только до светого Юрья безъ пастуха маеть вольно ходити, а по светомъ Юрьи въ тыжъ день кождый маеть около добытку своего сторожу або пастуха мЂти, черезъ все лЂто ажъ до первого дня мЂсяца Октебра. А давность отпра†за испашь не маеть дальшая быти только подлЂ стародавного звычаю до Божъего нароженья. И хтобы о испашъ присужоною, не хотечи платити подлЂ права, далъ се позвати; тогды съ права, достанетъ ли виненъ, маеть совито заплатити.






АРТЫКУЛЪ 3.

Хтобы подъ шляхтичомъ або подъ шляхтянкою грабежъ учинилъ.


Тежъ уставуемъ, хтобы подъ шляхтичомъ або подъ шляхтянкою грабежъ вчинилъ, кони побралъ при костелЂ на торгу або на поли, гдЂ жъ кольвекъ бы, тежъ бою не вчинилъ, або подъ слугою коня взялъ, або зъ воза выпрягъ, хотя бы оная особа при томъ не была, а былъ бы на то передъ врядомъ слушный доводъ; таковый оный, который грабежъ учинилъ, маеть такового навезати и шкоды, если будутъ при томъ грабежи вчинено, за доводомъ оправити.






АРТЫКУЛЪ 4.

О грабежъ коня князского, панского и шляхецского.


Тежъ князского панского, шляхецского коня изъ кождого грабежу безправного вызволяемъ. А естли бы хто безъ права князя або пана и шляхтича, хотя въ небытности его, коня пограбилъ; таковый маеть коня конемъ навезати.






АРТЫКУЛЪ 5.

Яко челядь невольная втеклая маеть быти заповЂдана.


Если бы чія челядь невольная втекла, а заповЂдана бы зъ якого перейму, и женучи за нею въ погоню въ кого ее нашолъ; тогды маеть тому, въ кого челядь зостанетъ, переемъ дати, съ чого будеть первей заповЂдалъ. А естьли бы заповЂди и перейму, въ кого оную челядь нашолъ, недалъ, а тотъ бы ему не хотЂлъ тое челяди безъ перейму выдати, и взялъ поземъ кгвалтомъ, а до права о то былъ позванъ; тогды тотъ за тымъ позвомъ повиненъ будеть сторонЂ жалобливой платити яко за кгвалтъ дванадцать рублей грошей. А естли бы хто чію челядь въ себе ховалъ, а тотъ по колко кроть заповЂди и по торгу закликалъ, оповЂдаючы ее, и потомъ бы тотъ, чія челядь, въ колко недЂляхъ тую челядь свою въ него нашолъ; тогды только маеть, за страву ему отъ кождого челядника на недЂлю по два гроши давши, челядь свою добровольнЂ взяти.






АРТЫКУЛЪ 6.

О грабежъ человЂка князского, панского и земянского.


Уставуемъ, естли бы шляхтичъ чіихъ людей пограбилъ на торгу при церкви на добровольной дорозЂ; таковый маеть сторонЂ обжалованой вины заплатити шесть рублей грошей, а грабежъ зъ навезкою отдати, то естъ коня конемъ вола воломъ навезати. А пакли бы шляхтичъ або хтожъ кольвекъ пограбилъ у чіихъ людей на поли або гдЂ индей, а бою не вчинилъ; тогды маеть заплатити три рубли грошей, а грабежъ также навезати. А мужикъ мужика естли бы при костелЂ або на торгу на дорозЂ пограбилъ; маеть заплатити три рубли грошей, а грабежъ всякій также зъ навезкою платити маеть, коня конемъ, вола воломъ, а корову коровою, и кождое быдло, якое пограбилъ, таковымъ навезавши маеть отдати, або цЂною заплатити, яко нижей описано.






АРТЫКУЛЪ 7.

ЦЂна конемъ рабочимъ.


За коня або за свирЂпу робочую копа грошей, а за третека жеребка отъ робочихъ свирЂпъ копа грошей, а за третячку свирЂпу полтина грошей, за лонское жеребя пол-копы грошей, за лЂтошнее двадцать грошей.






АРТЫКУЛЪ 8.

ЦЂна быдлу малому и великому.


За вола осмдесятъ грошей, за вола стадника осмдесятъ грошей, за корову петдесятъ грошей, зо яловицу сорокъ грошей, и за быка неука сорокъ грошей, за телицу пол-копы грошей, за теля лонское двадцать грошей, а за теля сеголЂтнее дванадцать грошей, за вепра кормного пятдесятъ грошей, за вепра некормного пол-копы грошей, за кнороза сорокъ грошей, за свинью двадцать грошей, за подсвинка десеть грошей, за порося пять грошей, за овцу петнадцать грошей, за барана дванадцать грошей, за скопца барана двадцать грошей, за ягня пять грошей, за козла пол-копы грошей, за козу двадцать грошей, за козеня пять грошей.






АРТЫКУЛЪ 9.

ЦЂна птахомъ домовымъ.


Гусь три гроши, каплунъ шесть грошей, курица пол-тора грошей, утка два гроши, селезень грошъ, голубъ грошъ, утка круговая шость рублей грошей, пава або павъ три копе грошей, лебедь домовый три копы грошей.






АРТЫКУЛЪ 10.

ЦЂна птахомъ на мысливство хованымъ.


Кречотъ красный дванадцать рублей грошей, за бЂлого кречота десеть рублей грошей, серый кречотъ шесть рублей грошей, соколъ шесть рублей грошей, а ястребъ великій три рубли грошей, болобанъ два рубли грошей, за рабца або за кгрокгулца рубль грошей, за дремлюга пятдесятъ грошей.






АРТЫКУЛЪ 11.

ЦЂна збожъю.


Пшеница копа петнадцать грошей, жита копа дванадцать грошей, ярицы копа десеть грошей, ечменю копа осмъ грошей, овса копа шесть грошей, гречки копа пять грошей, гороху копа шесть грошей, проса копа чотыри гроши, илну копа дванадцать грошей, рЂпы бочка пять грошей.






АРТЫКУЛЪ 12.

ЦЂна собакомъ.


За пса домового брехуна три рубли грошей, за наслЂдника и за набрехника звЂринного шесть рублей грошей, за окгара три копы грошей, за узлайника три копы грошей, за выжла три копы грошей, за щайку подъ ястреба три копы грошей, за по дстрелного три рубли грошей, за пса обсочного шесть рублей грошей, за меделянского пса шесть рублей грошей, за хорта подсокольего шесть рублей грошей.






АРТЫКУЛЪ 13.

Если бы кого песъ непривязаный укусилъ.


Уставуемъ, кгды бы кого песъ непривязаный уЂлъ съ чіего прищванья, а онъ бы ставши за позваньемъ передъ урядомъ къ тому прищванью се не зналъ; таковому маеть судъ сказати отприсегнутися, ижъ того не вчинилъ, а гдЂ бы присегнути не хотЂлъ, тогды, жалобливая сторона кгды его въ томъ поприсягнетъ, повиненъ его будеть навезати ведле стану его, якобы его самъ ранилъ рукою своею. Пакли жъ бы хто кому пса умыслнЂ а не отъ руки забилъ або застрелилъ; таковый будеть оного пса повиненъ платити водле цЂны вышей описаное, естли бы его забилъ отъ руки кіемъ або якою бронею не пометомъ а ни стрЂлбою, таковый не повиненъ будеть ничого платити.






АРТЫКУЛЪ 14.

Которое бы быдля або песъ в сусЂдстве шкоду чинилъ.


Уставуемъ, естли бы въ кого песъ домовый або быдля якую шкоду въ околицы чинилъ, а тотъ домовый господарь о томъ вЂдаючы оного быдляти стеречи а пса на привези мЂти не хотЂлъ; тогды таковый будеть повиненъ всю шкоду въ суседст†платити и оправовати, на што слушный доводъ удЂланъ быти маеть.














Попередня     Головна     Наступна


Етимологія та історія української мови:

Датчанин:   В основі української назви датчани лежить долучення староукраїнської книжності до європейського контексту, до грецькомовної і латинськомовної науки. Саме із західних джерел прийшла -т- основи. І коли наші сучасники вживають назв датський, датчани, то, навіть не здогадуючись, ступають по слідах, прокладених півтисячоліття тому предками, які перебували у великій європейській культурній спільноті. . . . )



Якщо помітили помилку набору на цiй сторiнцi, видiлiть ціле слово мишкою та натисніть Ctrl+Enter.