Попередня     Головна     Наступна





РОЗДЂЛЪ ЧОТЫРНАДЦАТОЙ О ЗЛОДЂЙСТВЂ ВСЯКОГО СТАНУ.


АРТЫКУЛЪ 1.

Хто бы въ кого лице зосталъ.


Коли бы хто лице свое и речы краденые въ чыего слуги або подданного засталъ, такъ на дЂдизнЂ его яко и инде гдЂ кольвекъ; тогды такового человЂка лицованого маеть вести до пана его, просити зъ нимъ справедливость. А естьли бы ему справедливости не вчинено; тогды тотъ, при чіемъ человЂцЂ лицо зостато будеть, повиненъ о то передъ врядомъ нашимъ отказывати и того злодЂя своего передъ судомъ нашимъ поставити. А естли бы оный злодЂй втекъ зъ рукъ его або оное лицо стратилъ, а передъ судомъ не постановилъ, а лица не положилъ; тогды будеть повиненъ оную шкоду заплатити, на чомъ онъ присягнетъ, або слушный доводъ учинитъ, што ему при ономъ лицы будеть згинуло. И тежъ коли бы што въ кого вкрадено, а видитсе ему шкода отъ которого села, а шкодника своего не вЂдаетъ; тогды маеть выпросити право въ томъ селЂ. А естли бы далъ о то всему селу вину; тогды три мужи зъ оного села, которых онъ оберетъ, мають присегнути, якъ в том селЂ шкодника его не вЂдають, а пакли бы о то не присегнули, тогды оное село все оную дають, а пакли бы о то не присегнеули, тогды оное село все оную шкоду всю тому шкоднику маеть платити, а собЂ злодЂя искати.






АРТЫКУЛЪ 2.

Зводъ на злодЂя.


Тежъ уставуемъ, которій человЂкъ пойманъ будеть на злодЂйствЂ, а приведенъ съ чимъ до замку або до вряду нашого, а тотъ бы повЂдалъ заводцу и отъ кого тое лице маеть; тогды маеть на томъ же врядЂ нашомъ того заводцу поставити, або сознаньемъ врядовымъ себе очистити, гдЂ будеть то купилъ, а на которомъ врядЂ оповЂдалъ и въ книги записалъ. А естли бы тотъ заводца того обвиненого въ злодЂйст†передъ правомъ заступилъ, а тотъ бы заступца бралъ се на иншій зводъ, хотечи вести отъ суда вряду нашого на иншого заступцу до иншого вряду; то ему не маеть быти допущоно, але кождый заступца до остатнего зводу маеть быти ставенъ передъ тымъ врядомъ нашимъ, гдЂ ся початокъ сталъ зводу, а лице во вряду будеть повиненъ тотъ ку зводу выкупити, хто се зводитъ. А вЂдьже за выкупенье большей врядъ не маеть только по дванадцати грошей за кождымъ зводомъ; и кождому таковому, хто се выводитъ зъ маетности оного, на комъ лицо зостанетъ, навезка подлЂ стану всказована быти маеть. А пакли бы у того злодЂя маетности свое не было, чимъ лицо во вряду выкупити, тотъ маеть врядъ лицо жалобливой сторонЂ даромъ вернути, а злодЂй яко за злодЂйство и за вси навезки маеть горломъ приплатити. А естли бы заводцы передъ врядомъ нашимъ достаточнего зводу не поставилъ, а зознаньемъ врядовымъ себе въ томъ злодЂйст†не очистилъ; тогды тотъ маеть быти каранъ горломъ яко злодЂй, а шкоды, на чомъ сторона жалобливая присягнетъ, маеть быти плачона зъ дому оного злодЂя. А естли бы остатній себе заводца очистилъ выписомъ врядовымъ, а гдЂ бы рекъ купилъ, або, ижъ то его конь або волъ доморослый, сведЂцствомъ слушнымъ се выправилъ; таковый яко навезокъ такъ и шкодъ никому платити не будеть повиненъ, нижли естли бы тую речъ купилъ, пенези свои татитъ. А пакли бы сторона поводовая, которая позвала, и менила коня або вола своего доморослымъ або речъ дома уробленую, якъ сукно и якую кольвекъ иншую речъ, сторона обжалованая, которая будеть зъ лицомъ приведена, будучи тежъ не подойзреная, менила быти своимъ доморослымъ або дома вробленымъ, а подобенство къ тому стегало, хотя бы обЂд†стороне выдали свЂдковъ годныхъ; тогды за подобенствомъ и за свЂдецствомъ сторона обжалованная при своихъ свЂдкахъ близшая будетъ ку доводу, ижъ то естъ доморослое, або дома вробленое, бо тому бы вжо шло о горло, а вЂдже судъ подобенства всякіе на доброй бачности мають мЂти, и въ речахъ вонтпливыхъ склоннЂйшій маеть быти ку вызволенью нижли ку каранью. А простого стану человЂкъ, которій первый або другій разъ около таковыхъ речей будеть обвиненъ, тотъ ку таковому отводу немаеть быти припущонъ.






АРТЫКУЛЪ 3.

Для покою посполитого застановенье отъ злодЂйства.


Отъ того часу уставуемъ и хочемъ мЂти, абы кождый съ подданыхъ нашихъ и подданыхъ князскихъ панскихъ и духовныхъ и свЂцскихъ и боярскихъ, такъ можного стану яко и меншого, хто бы кольвекъ што въ кого на торгу въ дому або гдЂ кольвекъ коня, вола, корову и иншые всякіе речы купилъ; то маеть на то мЂти баришниковъ людей добрыхъ вЂры годныхъ, и съ тымъ истцемъ, въ кого што купитъ, и съ баришники прійти до вряду замку або двору нашого або до войта мЂстского въ книги врядовые записати, а тыми, естьли будеть потреба, у права себе очистити. Нижли естли бы хто потомъ тую речъ позналъ, и того передъ врядомъ довелъ, же его властная речъ; тогды тотъ, хто купилъ, передъ врядомъ маеть оному, хто позналъ и довелъ, вернути, и будеть ли мЂти, же при томъ лицы много погибло, тогды тотъ, хто купилъ, маеть отприсегнутися, ижъ болшей тыхъ речей не купилъ а ни свЂдомъ.






АРТЫКУЛЪ 4.

О важности лица, за што злодЂй каранъ быти маеть.


Уставуемъ, ижъ кождый злодЂй зъ лицомъ приведеный и правомъ покананый при лицы, которое бы стояло вышей полтины грошей, маеть горломъ каранъ быти. А што бы за полтину грошей не стояло; маеть у столпа дубцы битъ быти, а лицо маеть вернути тому, чіе есть, а навезка на тое лицо зъ маетности его маеть быти плачона, а не будеть ли чимъ мЂти навезки платити, тогды ухо тому злодЂю маеть урЂзано быти. А которое бы лицо вышей полу-копка або за полкопы стояло; при таковомъ лицу маеть быти также у столпа битъ и зъ мЂста высвЂдчити. А которое лице будеть стояти за дванадцать грошей, за то также маеть битъ быти; а потомъ того жъ естли бы се трафило поймати зъ лицомъ, хотя бы тое лице и десети грошей не стояло, тогды вжо маеть быти каранъ яко злодЂй.






АРТЫКУЛЪ 5.

Якъ маеть въ дому чіемъ лицо * зостати.


Уставуемъ, хто бы хотЂлъ у чіемъ дому речи краденые застати; тогды отъ вряду беручи возного маеть передъ врядомъ ознаймити, што ему згинуло, и чого передъ вознымъ въ дому его искати маеть, а въ мЂстЂ мЂстскаго вижа и къ тому людей постороннихъ вЂры годныхъ маючи при собЂ, и при нихъ въ ономъ дому тыхъ речей искати краденыхъ маеть. А скоро бы тамъ што речей краденыхъ нашолъ и того при томъ лицы зосталъ, маеть при томъ же возномъ людехъ сторонныхъ того, кого при лицы зостанетъ, вести до вряду нашого, а естли никого не зостанеть, одно лице знайдеть, однакожъ съ тымъ лицомъ маеть вести або Ђхати до вряду нашого и тамъ далей поступовати ведле права. Пакли жъ хто у своемъ дому крадежу искати не допустилъ, клетей и иныхъ домовъ и схованей отомкнути не хотЂлъ; тогды тотъ, хто не допустилъ, будеть повиненъ тую всю шкоду сторонЂ жалобливой платити ведле доводу або присеги. Тымъ же способомъ, хто бы хотелъ въ чіего человЂка крадежъ зостати, маеть се заховати яко вышей описано; нижли только, з вознымъ и зъ стороною оступивши домъ подданого чіего, маеть того пана або врядника, а не будеть ли врядника а ни тивуна ино старшого, хто въ томъ селЂ будеть, обослати, оповЂдаючи тое, абы не розумЂлъ кгвалтовного наЂханья. Естли жъ бы панъ або врядникъ его при томъ обыску быти не хотелъ; тогды сторона жалобливая предсе съ тыми, кого маеть при собЂ, обыскъ чинити и вси схованья трести, и нашодши съ тымъ до вряду вести маеть.



* Въ рукописи лицо пропущено.







АРТЫКУЛЪ 6.

О гоненье слЂдомъ въ якой кольвекъ шкодЂ покраденой.


Кому бы покрадены кони волы быдло и иные речи въ дому, а тотъ шкодный поднялъ бы слЂдъ тое шкоды своее, и собравшы людей добрыхъ околичныхъ сусЂдовъ водле давного обычаю гонилъ слЂдомъ, а тотъ слЂдъ гдЂ бы ку которому селу або въ чій домъ привелъ; тогды маеть послати до того села або до дому, гдЂ слЂдъ вшолъ, людей добрихъ стороннихъ вЂры годныхъ, абы зъ села своего и зъ дому, гдЂ бы слЂдъ вшолъ, або зъ кгрунту земли села своего слЂдъ вывели. Таковое село або в чій домъ слЂдъ будеть вшолъ, мають тотъ слЂдъ въ тое копы взяти и зъ села або зъ дому и зъ земли своее того села слЂдъ вывести ажъ до иншое границы, куды тотъ слЂдъ пойдеть. А естли бы тое село, до которого слЂдъ приведенъ, отъ себе слЂду не вывели або оть слЂду отбили або выгнавши быдломъ затоптали; на таковомъ зостановившисе копа тая, гдЂ слЂду не отведено або отбито, мають послати по возного до вряду нашого замкового, и съ тымъ вознымъ и люди сторонные копа вся мають оную шкоду осумовати, на чомъ оный шкодный самотреть присягнетъ, и приложить до того села, абы они шкоду заплативши собЂ винного искали. А по сказанью мають черезъ возного и сторону, которіе при томъ были объявити вряду и половину пересуда дати, а врядъ маеть рокъ заплатЂ зложити, и яко рокъ выйдетъ; тогды врядъ оного пана листомъ своимъ напоменути маеть, абы водле права оного суду копного заплату чинилъ, а не будеть ли хто хотЂти, тогды тая шкода зъ уряду отправена маеть быти.






АРТЫКУЛЪ 7.

Хто бы шляхтича першій разъ о злодЂйство безъ лица передъ врядомъ обвинилъ.


Уставуемъ, хтобы шляхтича обвинилъ о злодЂйство безъ лица и безъ кождое слушное причины; тогды таковое обвиненье оному шляхтичу шкодити не маеть, и за таковое обвиненье повиненъ будеть его навезати, яко бы его ранилъ. Пакли жъ бы оного обвиненья якое записованье до книгъ, або гдЂ индей поволанье, або якіе слушные причины, або знаки показалъ, а тотъ шляхтичъ еще отъ того се не отводилъ а ни отприсегалъ; тогды таковый обвиненый будеть повиненъ першій разъ того самъ особою своею отприсегнутисе, и кгды присягнеть, навезки ему дати не повиненъ. Паклижъ бы того шляхтича о злодЂйство передъ врядомъ другій разъ тымъ же обычаемъ обвинено и поволано было; тогды маеть самотреть зъ шляхтою вЂры годными отприсегнутисе, также безъ навезки. Того жъ шляхтича поволаного кгды бы третій разъ о злодЂйство у права было обвинено; маеть самъ семъ зъ шляхтою вЂры годными отприсегнутисе, а въ недостатку свЂдка або двохъ маеть шкоду платити, а собЂ винного искати. А четвертый кроть того жъ шляхтича естли бы у права о злодЂйство было обвинено, а знаки слушные были бы показаны, бы тежъ и лица при немъ не зостали, а сторона поводовая самъ третей его поприсегнула; тогды маеть горломъ каранъ быти яко злодЂй.






АРТЫКУЛЪ 8.

О шляхтичу лЂть зуполныхъ не маючому.


Естли бы се трафило, ижъ бы шляхтичъ въ лЂтехъ чотырнадцати и не большъ обвиненъ о злодЂйство, або приведенъ былъ о злодЂйство зъ лицомъ передъ врядъ; тогды таковому про молодость лЂтъ его не маеть быти поличоно за злодЂйство, и не маеть быти до ката въ руки и на муку даванъ, нижли тую шкоду отецъ его або матка або кровные зъ имЂнья части его повинни зъ навезкою платити, и заплативши то почтивости его шкодити не маеть, а не будеть ли мЂти чимъ платити, ино дати его на выслугу, поки бы то заслужилъ, што зашкодилъ. Тымъ же тежъ обычаемъ можеть се розумЂти и о дЂтехъ людей простыхъ лЂтъ недорослыхъ. А ведьже и таковый хлопецъ недорослый естьли бы въ колку злодЂйствахъ и при лицы былъ дознанъ, таковыхъ врядъ маеть карати водле зданья своего.






АРТЫКУЛЪ 9.

О поволаньяхъ.


Уставуемъ, абы поволанья злодЂйскіе передъ врядомъ оповЂданы и явнЂ высвЂдчоны и до книгъ кождого вряду записованы были, которые книги яко передъ тымъ и теперъ зовуть чорными книгами; таковое оповЂданье и поволанье врядовнЂ записаное маеть у права вездЂ мЂстцо мЂти и пріймовано быти.






АРТЫКУЛЪ 10.

Хто бы злодЂя приличного въ себе въ дому ховалъ, або вЂдомостъ о немъ мЂлъ.


Уставуемъ и сказуемъ, ижъ коли бы хто злодЂя приличного вЂдоме въ дому своемъ ховалъ, або мЂшкати допустилъ, або злодЂя явного отъ шебеницы своими пенезми откупилъ; тогды таковый кождый, естьли бы то на него слушнымъ правомъ было переведено, всю шкоду, которая бы се кому черезъ того злодЂя зъ имЂнья его стала, будеть повиненъ платити и оправовати. Тымъ же обычаемъ естли бы кому злодЂя правомъ поконаного на смерть выданого, а онъ бы его не скаралъ, а потомъ кому кольвекъ отъ того злодЂя шкода будеть се дЂети; тогды тотъ, хто злодЂя пустилъ, будеть повиненъ тую всю шкоду платити и оправовати.






АРТЫКУЛЪ 11.

О покраденье свирна або клети панское шляхецское и тежъ клети мужицкое.


Тежъ уставуемъ, кгды бы покрадено которому пану або земенину свиренъ скарбный або спижарный, а то бы на кого правомъ было переведено; тогды за таковый свиренъ будеть повиненъ заплатити дванадцать рублей грошей, и шкоду покраденую за присегою оправити. Тымъ же тежъ обычаемъ естьли бы мужикъ мужику клеть выкралъ; тогды за покраденье клети мужику три рубли грошей, и шкоду всю зъ дому злодЂйского маеть за присегою плачоно быти. А за навезку объ его злочынство, або колько ихъ будеть, мають горломъ караны быти.






АРТЫКУЛЪ 12.

О лицо, которое найдетъ се въ дому человЂка неподойзрЂного.


Уставуемъ, кгды бы у человЂка неподойзреного за замкомъ было лицо знайдено, а до тое хоромины было вкинено и не приховано; тогды таковый человЂк, естьли будеть неподойзрЂный, маеть зъ жоною и зъ дЂтьми дорослыми, будеть ли ихъ мЂти, отприсегнутисе. Тымъ же обычаемъ, кгды бы лицо засталъ въ чіемъ дому въ гумнЂ або за плотомъ; потомужъ маеть тотъ человЂкъ неподойзрЂный отприсегнутисе, ижъ того не вЂдомъ. А естьли бы въ хороминЂ замкнено было найдено, а тое лицо было бы прихоронено, хотя бы и окно было, куды вкинути; тогды таковое лицо маеть быти поличоно за злодЂйство, съ которимъ, кого при томъ лицы зостануть, маеть быти веденъ до вряду и тамъ зъ нимъ яко съ приличнымъ далей поступовати.






АРТЫКУЛЪ 13.

О злодею, которого на злодЂйст†поймають.


Естли бы злодЂй былъ пойманъ на злочинст†а не въ дому своемъ, а тые речи краденые въ дому еще не были; таковый злодЂй самъ одинъ маеть за тое злочинство каранъ быти, а жона, дЂти и домовая челядь отъ того прожна.






АРТЫКУЛЪ 14.

О знаки злодЂйские на человЂка неподойзрЂного.


Уставуемъ, кгды бы на которого человЂка простого неподойзрЂного, которій еще при лицы не былъ, знаки злодЂйскіе были описаны, а тые знаки были бы слушные, а тотъ неподойзреный былъ бы человЂкъ добрый вЂры годный, при которомъ сторона жалобливая его поприсегнути за своего шкодника хотЂла; за таковыми знаки и присегою стороны жалобливое тотъ человЂкъ маеть быти выданъ на муку, и естли бы се не домучилъ, тогды маеть его навезати водле стану его, вЂдьже большей не маеть быти мучонъ одно разъ.






АРТЫКУЛЪ 15.

Три кроть злодЂя приличного одного дня можеть мучити.


Уставуемъ, кгды бы поймано злодЂя приличного, а на тотъ часъ безъ лица будеть пойманъ; тогды такового злодЂя три кроть одного дня можеть мучити, только бы на которомъ человЂку не образилъ. А естли бы не домучилсе; тогды за кождымъ разомъ муки оное маеть его навезати водлЂ стану его. Пакли жъ бы у въ оной муцЂ злодЂйства на немъ домучитисе не могъ, а оною мукою уморилъ, або на чдонку образилъ; таковый будеть повиненъ за умерлого головщизну а за хромоту пол-человЂка платити водлугь стану его. Нижли естьли бы тотъ злодЂй въ оной муцЂ для чаровъ спалъ, а муки не чулъ, а тые чары были бы при немъ найдены у въ устехъ, або на голо†у волосехъ, подъ пахою, або гдЂ индей; тогды навезки ему дати не повиненъ, и еще таковый приличный злодЂй будеть для таковыхъ чаровъ повиненъ сторонЂ жалобливой шкоду платити, на чомъ присягнетъ.






АРТЫКУЛЪ 16.

О злодЂяхъ и разбойникохъ, которые бы врядника своего поволали.


Уставуемъ, кгды бы чіихъ колвекъ подданыхъ злодЂевъ або розбойниковъ и якихъ колвекъ злочинцовъ поймано, а они бы идучи на смерть поволали врядника своего, ижъ того злодЂйства ихъ свЂдомъ, и тымъ лупомъ зъ нимъ се дЂлили, а тотъ врядникъ былъ бы шляхтичъ; таковый маеть першій кроть отприсегнутисе самъ одинъ. А потомъ естли бы таковыхъ другихъ и третихъ злочинцовъ поймано, а тые также идучи на смерть того поволали и на шыбеницы не отволали; тогды тотъ отъ тыхъ поволаней маеть отприсегнутисе такъ, яко о шляхтичу естъ вышей описано. А за четвертымъ разомъ естли бы тымъ способомъ былъ поволанъ; тогды вжо безъ кождого отводу и присеги и безъ лица маеть быти сказанъ на смерть яко злодЂй. А гдЂ бы тотъ врядникъ не былъ шляхтичъ; тогды за першимъ поволаньемъ злодЂйскимъ, которіе бы то смертью запечатовали, маеть сторонЂ шкоду платити, на чомъ присягнетъ. Пакли жъ бы того врядника нешляхтича повторе таковые жъ злодЂи и тымъ же способомъ поволали, и также смертью запечатовали; таковый нешляхтичъ вжо безъ кождого лица маеть сказанъ быти на смерть яко злодЂй, и по такового за тымъ знаки слушными и поволаньи правными покананого маеть врядъ повЂту кождого зослали, и на врядЂ нашомъ господарскомъ поставившы казати на него фолдровати.






АРТЫКУЛЪ 17.

О человЂка неподойзрЂного.


Уставуемъ, кгды бы шляхтичъ которого нешляхтича неподойзрЂного помовилъ, менуючи ижъ бы его злодЂемъ былъ, и отъ него въ злодЂйст†ему се шкода становила, и не маючи никоторыхъ слушныхъ знаковъ хотЂлъ его о злодЂйство по присегнути; тогды тотъ человЂкъ, яко будучи неподойзреный, близшій будеть самотреть зъ сусЂды собЂ ровными, также людми добрыми и неподойзреными, отприсегнутисе, а судъ ему того маеть допустити. А другій разъ кгды бы того жъ о злодЂйство было обвинено; тогды за другимъ разомъ обвиненьемъ отъ шляхтича маеть быти поконанъ водлЂ права и присеги яко злодЂй.






АРТЫКУЛЪ 18.

О неповоланомъ шляхтичу.


Тежъ уставуемъ, естли бы которому шляхтичу не згола але за причиною слушною дана злодЂйская вина; тогды тотъ позваный отъ того маеть се отвести присегою своею тЂлесною. Тежъ повторе кгды бы тому шляхтичу о тое жъ и таковымъ обычаемъ вина злодЂйская дана; тогды позваный самотреть зъ шляхтичами собЂ ровными маеть се присегою отвести. Третій разъ кгды бы тому жъ шляхтичу тымъ же способомъ вина будеть дана; тогды позваный самъ-семъ зъ шляхтами маеть отприсегнутисе и правъ будеть. А вЂдьже кгды четвертый разъ томужъ шляхтичу въ томъ же вина будеть дана; тогды позваному до права вжо не ему маеть быти отводъ, але на него доводъ присегнути зъ шляхтою собЂ ровною самотрему, и съ права за слушнымъ доводомъ маеть быти каранъ ведле вины и учинку своего.






АРТЫКУЛЪ 19.

О забитье злодЂя при лицы.


Уставуемъ, тежъ хтобы злодЂя при лицы своемъ забилъ, такового злодЂя забитого того жъ часу по ономъ забитью маеть оказати сусЂдомъ околичнымъ и потомъ што нарихлей зъ ураду нашого, которій наближей будеть, вознымъ и стороною обведши до вряду привести и оказати маеть. А потомъ будеть ли о то позванъ до права; тогды врядъ ему маеть допустити отприсегнутися, ижъ его на злочинст†при лицу въ дому своемъ забилъ. Такъ тежъ естли бы се потрафило кому на дорозЂ злодЂя погонити, а онъ бы се поймати не далъ, а въ томъ при лицы былъ забитъ; тогды тотъ, хто гонить въ дорозЂ за злодЂемъ, маеть мЂти при собЂ сусЂдовъ або стороннихъ людей, и съ тыми привезши трупъ передъ врядомъ маеть высвЂдчитисе, ижъ его при лицы забилъ. А будеть ли о то ку праву позванъ; также маеть съ тыми людьми, съ кимъ за злодЂемъ гонилъ, на томъ присегнути, ижъ на злодЂйст†при лицы, яко злодЂя своего, забилъ, а раннего злодЂя зъ лицомъ маеть вести до вряду нашого, такъ яко вышей описано; бо злодЂя при лицы пойманого нихто не маеть и одного дня въ себе держати, але того жъ часу вести до вряду. А хтобы злодЂя черезъ день и черезъ ночь въ себе въ дому держалъ; тогды пришедши до вряду первей виненъ будеть его навезати водлЂ стану. А ранный естьли будеть пойманъ, а до вряду черезъ ночъ и черезъ день держанъ, и тамъ въ дому его умеръ; тогды будеть повиненъ головщизны платити водлугъ стану. Тымъ же обычаемъ естли бы хто злодЂя поймавши и до вряду не ведучи, въ дому въ себе або на дорозЂ, еще правомъ не поканавши, мучилъ; таковый также первей будеть повиненъ его навезати, тожъ потомъ въ право зъ нимъ вступовати.






АРТЫКУЛЪ 20.

Хто бы што вкралъ на дворЂ нашомъ господарскомъ.


Тежъ хто бы на дворЂ нашомъ господарскомъ што вкралъ, а то бы стояло меньшей полукопья, которая бы речъ не о шію шла, и правомъ бы на него переведено або лице вынято; таковому мають уши обрЂзати. А потомъ естьли бы еще што вкралъ, бы тежъ краденая речъ и десети грошей не стояла; тогды вжо горломъ маеть быти каранъ.






АРТЫКУЛЪ 21.

О жонахъ и о дЂтехъ, копюрые уживали речей украденыхъ.


А естли бы въ дому лицо зостато, а дЂти и жона при томъ были и тыхъ краденыхъ речей уживали; тогды они повинни будуть тую шкоду платити и сами головами выдаваны быти, нижли не у вЂчную неволю поколь се выробять, яко тымъ которіе бы закуплены были, а горломъ тотъ самъ злодЂй маеть быти каранъ, которій укралъ.






АРТЫКУЛЪ 22.

О лицу важномъ, што будеть дано до двору нашого господарскаго.


Къ тому уставуемъ, естли бы лицо принесено было до вряду нашого господарского князъского панского и земянского, а было бы тое лицо речъ важная, шаты або серебро або кони добріе, а того бы злодЂя маетность не стояла, не знесла, чимъ бы мЂлъ зъ дому своего сторонЂ жалобливой шкоду платити; тогды таковое лицо важное зъ двора нашого господарского также князского панского и земянского маеть дармо вернено быти тому, чіе будеть, а тотъ злодЂй на шибеницу маеть выданъ быти.






АРТЫКУЛЪ 23.

О слугахъ безъ приказу и о тыхъ, што безъ службы мешкають.


Уставуемъ, хто бы переховывалъ себе якихъ людей безъ службы або слугъ безъ приказу, отъ которыхъ се мели бы шкоды або забойства дЂяти въ сусЂдствЂ, або кому жъ кольвекъ, и подъ часомъ стала бы се шокода отъ таковыхъ або раны або головщизна; тогды тотъ, хто таковыхъ переховываеть, за переведеньемъ правнымъ, хотя бы ему не были припоручонны, виненъ ихъ отыскивати и сторонЂ жалобливой ку праву ставити, а гдЂ бы не поставилъ, маеть шкоду всю або раны заплатити, яко вышей о головщизнахъ естъ описано.






АРТЫКУЛЪ 24.

О блудяги.


Княжата панове хоруговные о блудяги мають се заховати подлЂ давного обычаю, нижли мають брати отъ клячи по шести грошей, а быдло мають давати даромъ. А шляхта, которые седятъ у повЂтехъ, блудные клячи и быдло мають водити и давати до дворовъ нашихъ, а черезъ три дни въ себе мають ховати. А хто бы черезъ три дни въ себе блудягу ховалъ, а ку двору нашому не далъ, а то будеть на него переведено, и лицо въ дому его вынято; тогды маеть въ томъ виненъ быти яко злодЂй. А хто злодЂя зженетъ отъ коней; ино згонного маеть быти дано вряднику нашому шесть грошей, а тому хто зженетъ другую шесть грошей.






АРТЫКУЛЪ 25.

О покраденьи збожъя всякого иле на поли зложонымъ у стыртахъ.


Уставуемъ, кгды бы хто злодЂйскимъ обычаемъ чіе збожъе або сено бралъ, а тотъ, чіе збожъе або сено будеть, беручи засталъ; тогды тотъ, хто застанетъ, маеть поймавши вести съ тымъ лицомъ зъ возы и съ коньми до вряду гдЂ наиближей, а тотъ врядъ будеть повиненъ съ таковымъ справедливость чинити яко зъ иншими злодЂи приличными. А естли бы тые, што по жито або по сено пріЂхали, пойматисе не дали, а въ томъ кого съ тыхъ злочинцовъ забито або ранено; тогды предесе маеть объявити вряду и трупъ або ранныхъ оказати. А будеть ли о то ку праву приятягненъ; тогды того маеть отприсегнутисе, ижъ при збожъю своемъ забилъ або ранилъ, таковый головщизны а ни ранъ платити не будеть повиненъ. Пакли жъ бы тые злочыны змоцнившисе того пана самого або слугъ и подданыхъ его при его збожъю побили и поранили або и забили, а то бы на нихъ слушнымъ доводомъ было переведено; таковые будуть повинни кгвалтъ платити дванадцать рублевъ грошей и раны слугамъ и подданымъ оправити, якого стану будеть, а естли бы шляхтича забито, тогды маеть горломъ каранъ быти водле покананья стороны жалобливое, кому вина будеть дана, а кгвалтъ и шкоды зъ имЂнья и маетности ихъ платити. Также кого бы поймано крадучи сноповье скопъ, або сенные копы, або тежъ жито упрежмо рЂжучи подъ колосъ; таковый, зъ лицомъ кгды будеть приведенъ, маеть у столпа пугами битъ быти, а шкоду зъ маетности его заплатити, естьли што будеть мЂти.






АРТЫКУЛЪ 26.

О покраденью ставу и сажовки.


Уставуемъ, коли бы злодЂйскимъ обычаемъ ловлены рыбы въ ста†або въ сажовцЂ; таковый, кгды будеть пойманъ и приведенъ до вряду зъ лицомъ, маеть каранъ быти яко злодЂй, хотя бы лицо не стояло шацуючы десети грошей.






АРТЫКУЛЪ 27.

О небезпечность отъ огня,


Кгды бы се трафило подъ часомъ отъ огню погрунья въ мЂстЂ або гдЂ жь кольвекъ, або хто на водЂ стонулъ, а въ томъ часЂ што ему згинуло, которая згуба у кого кольвекъ бы се въ рокъ або до року затаеная показала; тогды тую речъ, яко важна будеть, маеть у четверо цЂною заплатити тому, въ кого то згинуло. А естли бы се тая речъ по року або въ колько лЂтехъ показала; тогды маеть цЂною заплатити. А бутеть ли хотЂти сторона жалобливая на него и по року фолдровати; тогды можеть яко на злодЂя, што будеть на воли его, хто маеть, фолдровати.






АРТЫКУЛЪ 28.

Хто бы кого обвинилъ, а передъ врядъ привелъ, маеть того жъ часу описатися, на которій рокъ маеть доводити.


Тежъ коли бы кого обвинивши передъ врядомъ и до везенья або за поруку давши и рокъ отъ вряду ку доводу принявши, самъ безъ слушное причины не сталъ на томъ року, и слушныхъ причинъ нестанья своего презъ посланца за часу не ознаймилъ; тогды врядъ по выйстью оного року обвиненого маеть вольнымъ чинити, а вольное мовенье у права съ тымъ, хто его обвинивши не доводилъ, заховати.






АРТЫКУЛЪ 29.

О человЂка отчизного и человЂка хто его выкралъ.


Уставуемъ, естли бы хто вывелъ або выкралъ чіего человЂка отчизного або челядника невольного, а погоненъ былъ на дорозЂ и пойманъ съ тымъ человЂкомъ або съ челядью; тогды маеть съ тымъ лицемъ веденъ быти до вряду нашого, гдЂ наближей будеть, а врядъ маеть ему справедливость учинити. А естли бы оный къ тому се не зналъ, абы тую челядъ выкралъ; тогды оный, хто его съ тою челядью поймаеть, маеть на него доводити або присегу учинити, ижъ онъ ее вывелъ, а онъ маеть быти каранъ яко злодЂй, а челядь оная маеть вернена быти, чія была. Пакли бы на дорозЂ погонити не могъ, а въ дому чіемъ зосталъ и припоручилъ, а онъ бы тое челяди выдати не хотЂлъ; тогды маеть тотъ панъ, у чіего человЂка гдЂ тую челядъ зосталъ, съ таковымъ справедливость учинити, и найдетъ ли се съ права, тотъ ижъ се выдати хотЂлъ; тогды отъ того часу колько черезъ прируку держалъ, мають тую челедь навезати и навезавши ему челядь вернути, яко о томъ вышей описано.






АРТЫКУЛЪ 30.

Хто кого обвинитъ въ томъ выступЂ, которихъ кривавою виною або горломъ карають.


Хто кого обвинитъ въ томъ выступЂ, которихъ кривавою виною або горломъ карають, а ижъ тотъ выступъ явный не будеть; маеть быти данъ певный часъ ку отводу сторонЂ позваной, а вЂдьже такъ, естли врядъ обачить, ижъ ку слушному се одводу беретъ. А будеть доводъ таковая особа, которая не звыкла людей помавяти, а естьли на оный часъ не доведе, которій доводъ отъ вряду ему будеть назначонъ; маеть быти онъ отпущонъ, волно обвиненому, маеть заховати зъ нимъ право о обвиненье. А естли будетъ речъ межи ровными особами; тогды тотъ, хто кого обвинитъ, маеть се дати посадити зъ обвиненымъ и на него, што будеть вести, доводити. А естьли бы хто на кого не довелъ, то што на него ущипливаго мовитъ, а тотъ бы обвиненый была особа легка, злого захованья посполитый корчемникъ, грачъ (sic) подозрЂный, або передъ тымъ поволаный; противъ таковоиу, хотя будеть доведено, не маетъ тотъ, хто его помовилъ, жадное трудности, хотяжъ обвинено, терпЂти. Такжо тые особы, которые зъ великого а значного жалю, што на него менять, яко родичи о забитье дЂтей, сынове о забитье родичовъ, мужъ о жону, жона о мужа, опекунъ о сироту, и дЂдичъ о таковомъ, по комъ дЂдицство взялъ, або великую шкоду, а значило бы се, ижъ не вымысломъ потвареного помовилъ, але за оболживость зъ жалю и фрасунку; таковые тежъ не мають ничого тепЂти, хотя не доведетъ, а то для того, бы ся ити жаль по жалю не двоилъ. Тымъ же обычаемъ и великій выступъ, который се або маестату особЂ господарской або речи посполитой ткнулъ; того выступу хотя бы хто не довелъ, а мЂлъ бы слушную причину, для которое бы кого въ томъ зыступЂ помовилъ, таковый хотя не доведетъ, не маеть ничого платити *.



* Въ рукописи: «Finis Statuti.» и потомъ помЂщены слЂдующія за симъ формы записей.









Попередня     Головна     Наступна


Етимологія та історія української мови:

Датчанин:   В основі української назви датчани лежить долучення староукраїнської книжності до європейського контексту, до грецькомовної і латинськомовної науки. Саме із західних джерел прийшла -т- основи. І коли наші сучасники вживають назв датський, датчани, то, навіть не здогадуючись, ступають по слідах, прокладених півтисячоліття тому предками, які перебували у великій європейській культурній спільноті. . . . )



Якщо помітили помилку набору на цiй сторiнцi, видiлiть ціле слово мишкою та натисніть Ctrl+Enter.