Попередня     Головна     Наступна





[ФОРМЫ ЗАПИСЕЙ]



Даровизна речей рухомыхъ отъ мужа жонЂ правомъ дожывотнымъ.


Я Н. зезнавамъ тымъ моимъ листомъ добровольнымъ записомъ всимъ вобецъ, кому бы о томъ вЂдати належало, теперъ и на потомъ завжды, ижъ я дознавшы противъ себе хути и упріймость и милость и зычливость малжонки мое милое, урожоное панеи Н. хотечи ей то заемною милостью и зычливостью нагородить, зъ упріймой милости мои ку ней малженскей, нынЂшнимъ записомъ моимъ записую доживотье на маетности моей дЂдичной, въ повЂтЂ Н. лежачый въ селЂ Н. и всЂхъ ее принадлежностяхъ, такимъ способомъ: ижъ она помененая малжонка моя милая тые вышъменованые добра, такъ яко се въ собЂ мають, зо всими ихъ доходами и приналежностями, поддаными, ставами, млынами, корчмами и згола зо всимъ тымъ, яко самъ теперъ уживамъ, обнявшы, безъ вшелякое перешкоды и импедыменту близкихъ кровныхъ и повинныхъ моихъ, спокойнЂ ажъ до остатнего кресу живота моего держать уживать маеть. До того той же малжонцЂ моей милой по животЂ маоемъ даю даруе и тымъ листомъ добровольнымъ записомъ моимъ на вЂчность записую вси речи мои рухомые, то естъ: золото, сребро, пенези готовые на имЂнье уданые и мнЂ якимъ кольвекъ правомъ служачое, перла, шаты, коберцы, кони Ђздные, возники, стада быдла рогатое и не рогатое малое и великое, цынъ, мЂдь и увесь спрятъ домовый, што се тылько речъю рухомою назвать и меновать може, все посполитостью завираючы, што теперъ зъ ласки Божое маю, и што еще зъ нею мЂшкаючы прибавлю, прикуплю, и якимъ кольвекъ способомъ набуду, отдаляючи отъ того всихъ близкихъ кревныхъ и повинныхъ моихъ, вольно теды есть и буде помененая пани малжонка моя милая отъ даты того запису моего тое маетности вышей менованое въ спокойнымъ держанью, яко вышей, ажъ до остатнего кресу живота своего тримать. А по смерти моей тые вси речи мои рухомые, отъ мала до велика, што се едно кольвекъ по животЂ моемъ зостане, черезъ мене ей нынЂшнимъ записомъ моимъ вЂчнЂ дарованое, взять, держать, и оныхъ ку потребЂ своей уживать и оборочать, кому хотечы отдать, даровать, продать, записать, и яко хотечы по воли своей шафовать. Въ чымъ помененой малжонцЂ моей милой по животЂ моемъ нихто зъ братьи сестръ близкихъ кревныхъ и повинныхъ моихъ о тые речи рухомые, презъ мене ей по животЂ моемъ вЂчнЂ дарованые и записаные, жадное трудности правное задавать и оное импедіовати не мають подъ закладомъ.






Способъ запису замЂны добръ.


Ставши обличнЂ передъ судомъ шляхетный Н. дЂдичъ Н. зъ одное стороны, и шляхетный. Н. зъ другое стороны, здоровый на умыслЂ и на тЂлЂ и при добромъ розумЂ будучы, явнЂ и презъ вызнанье свое вызнали, ижъ межи собою учинили добръ дЂдичныхъ вЂчною и неодзовною замЂну, давшы собЂ зъ обо полные добра за добра, земли за земли. Такъ, ижъ преречоный Н. далъ и заменилъ добра свои дЂдичные, то естъ весь Н. зо всимъ тое вси дЂдицством и зо всимъ правомъ панствомъ властностью и титиломъ дЂдичнымъ, Н. зъ Н. Который Н. за его добра дЂдичные, то естъ весь Н. преречона, также тежъ зо всимъ дЂдицствомъ тые вси далъ и заменилъ зо всимъ правомъ панствомъ и властностью и титуломъ дЂдичнымъ, такъ ижъ преречоный Н. преречоне добра Н. то есть весь Н. зъ своими потомками будеть держалъ мЂлъ обычаемъ дЂдичнымъ, посядЂ такъ широко довго и въ кругъ, яко преречоные добра або дЂдиуство, преречоные вси Н. въ своихъ границахъ зъ стародавна естъ роздЂлено и ограничено зо всимъ и каждому зособна, пожитки которіе зъ стародавна къ тому Н. дЂдицству приналежали и зо всими, ничого не вымуючи, присеглостями. И также преречоный Н. преречоные добра свои, то естъ весь Н. зо всими тое вси Н. дЂдичствомъ, зо всимъ правомъ панствомъ и властностью и титуломъ дЂдичнымъ, зо всими потомками своими, буде держалъ мЂлъ и въ дЂдизнЂ, осядЂ такъ широко довго и въ кругъ, яко речоные добра або дЂдицство вси Н. въ своихъ границахъ и межахъ зъ стародавна естъ роздЂлено и розграничоно, и также весполъ зо всими и каждему зособна пожитками и прилеглостями, которіе зъ стародавна ку маетности Н. приналежитъ, ничого не выймуючы. И южъ тые преречоные замЂну чынечые дали собЂ зобополнЂ въ преречоные добра такъ одмененые истотные и въ везанье и речоное держанье презъ возные земскіе, будучи повинни и обовязани сполнЂ собЂ и потомки свои взглядомъ преречоныхъ добръ такъ замененыхъ боронить, шчитити, и зобополнЂ се высвобожать, и въ спокояхъ отъ всихъ правныхъ трудностей и першыхъ обовязковъ записовъ позвовъ занесеныхъ, и которые занесены быть мають зысковъ, презысковъ которихъ кольвекъ, и все замыкаючы отъ вшелякого пренагабанья правного, и отъ всихъ особъ стану обое плоти презъ давности земскіе, яко на кототорой особЂ давность належитъ, подъ шкодами земскими або закладомъ ста гривенъ пенезей монеты Польское. О которые шкоды або закладъ одинъ отъ другого взглядомъ преречоное обороны позваное и потомкве его позвани до суду земского Е. або замкового Н. на першомъ року яко завитымъ стать обличне, и занехавши всихъ вымовокъ зволокъ, съ которое кольвекъ причины, або тежъ квитовъ, которіе съ права звыкли быти давани и позволяны, и всихъ инныхъ правныхъ зволокъ, и также рушенья судьи отповЂдать, и отъ суду не отходечи декретови судовому быти послушонъ, то естъ заступить, и о вси сужоные речи досыть учинить буде повиненъ, и потомкове его будуть повинни тыле кроть, иле кроть имъ нихто потомкомъ будеть потреба.






Мужъ жонЂ, жона мужови сполне доживотье учинить тымъ способомъ.


Ставши обличнЂ передъ судомъ шляхетный Н. одтулъ ажъ дотуль, и также шляхетная Н. малжонкове, здоровы на умыслЂ и на тЂлЂ, уживши пріятельское рады, явнЂ и меновите вызнали, ижъ всихъ добръ своихъ дЂдичныхъ и заставныхъ рухомыхъ и нерухомыхъ, которіе теперъ маю и по тымъ мЂти буду, зобополнЂ и сполечнЂ позволили собЂ уживанье до часу живота своего такимъ обычаемъ. Ижъ если бы преречоному Н. первей, нижли преречоной Н. придалосе умерть; теды она Н. вси добра такъ рухомые яко нерухомые преречоного Н. будеть тримать, и оные посядЂ зо всимъ правомъ панствомъ властностью, ничого не выймуючы, и будеть ихъ уживать ажъ до часу живота своего. А по смерти преречоной Н. добра преречоные такъ рухомые яко не рухомые цалЂ зуполнымъ правомъ на потомки преречоного Н. вернесе, безъ вшелякое переказы и спору потомковъ преречоное Н. И также гдЂ бы се преречоной Н. придало первей умерть нижли самому; и теды преречоный Н. добра вси такъ рухомые яко и нерухомые преречоной Н. будеть держать, и посядЂ зо всимъ правомъ властностью зо всими ку тымъ добромъ речами приналежными, и буде ихъ уживать до часу тылько живота своего. А по смерти преречоного Н. добра преречоные, которіе кольвекъ оной Н. приналежали, на потомки преречоное Н. цалЂ вернутъ се, безъ вшелякое переказы и спору преречоного негды мужа потомковъ.






Записъ отъ мужа жонЂ на суму.


Я Н. одступившы свое властное собЂ потомкомъ и добрамъ моимъ належное юрысдыцый, а подъ той листъ добровольный записъ мой собе самого потомки и добра мои вси лежачые рухомые и сумы пенезей добровольнЂ поддавшы, зезнавамъ тымъ листомъ добровольнымъ записомъ моимъ, кому бы то вЂдать належало теперъ и на потомъ завжды, ижъ зосталомъ виненъ урожоной ей милости паней Н. малжонцЂ моей истотней сумы пенезей Н. на долгу позычоного, въ каждый золотой по 30 грошей Польскихъ личечи, которое сумы пенезей, абы такъ при животЂ яко и по животЂ моемъ, оная малжонка моя Н. певна тылько на всихъ добрахъ и маетностяхъ моихъ лежачыхъ рухомыхъ дЂдичныхъ и набытыхъ, сумахъ пенежныхъ и на маетностяхъ, въ сумахъ обычаемъ зоставнымъ заведеныхъ, так тутъ Н. и гдЂ кольвекъ будучыхъ, теперъ презъ мене маючихъ, и на потомъ за ласкою Божею набытыхъ и приспособеныхъ, на всихъ огуломъ, жадныхъ не выймуючы а ни зоставуючы, записую, и утверждаю, и заразъ въ моцъ держанье и уживанье подаю и поступую. Волно естъ и будеть помененая пани малжонка моя тыхъ добръ, которіе теперъ маю и на потомъ мЂти буду, отъ даты того листу моего, такъ при животЂ посполу зо мною, яко и по животЂ моемъ зоставившысе, держать, и того всего яко властности свое ажъ до отданья тое сумы пенезей Н. зол. Поль. уживаю, (sic) кромъ жадное перешкоды одъ мене самого. А по смерти моей дЂти близкіе кревные и повинные мои, не отдавши помененой еи иилости пани малжонцЂ моей, албо тому кому бы то она зъ великое милости свое тую суму пенезей Н. зол. Польск. отдала албо даровала, и кому бы то отъ нее и по ней належало, въ тые добра по мнЂ зосталые уступовать. И никоторое переказы и трудности ей и держачему тыхъ добръ задавать не маю и мочи не буду, и о вшемъ отъ кождого такового, хтобы трудность якую задавалъ, все огуломъ замыкаючы одъ вшелякого пренагабанья правного, и отъ всихъ особъ я самъ а по мнЂ потомкове мои боронить и заступовать, не выймуючи, своимъ властнымъ коштомъ и накладомъ.






Отъ того жъ тойже на доживотье.


Я Н. зезнавамъ тымъ листомъ добровольнымъ записомъ моимъ, кому о томъ вЂдать належало теперъ и на топомъ завжды, ижъ я не будучи до того ни от кого примушоный а ни намовленый, але самъ зъ доброе воли мое, а за радою ихъ милости п.п. пріятелей моихъ и зъ милости моей малженское доживотье на добрахъ моихъ лежачихъ и рухомыхъ, въ Н. на Н. и гдЂ кольвекъ будучихъ, и сумахъ пенежныхъ гдЂ кольвекъ и у кого кольвекъ будь на заставахъ, будь за записами, и якимъ кольвекъ способомъ презъ мене маючыхъ и держачихъ, и речахъ всихъ рухомыхъ: золото, сребро, клейнотахъ, шатахъ, рыштункахъ, конехъ, стадо, быдло, цынъ, мЂдь, збожъю озимнымъ яримъ, такъ въ гумнахъ зложонымъ, яко и на полю засЂенымъ и всимъ, што бы едно речъю рухомою названо и выражоно быть могло, жадное и наменшое речы не выймуючы, ей милости панеи Н. малжонцЂ моей записую такимъ способомъ. Ижъ естли бы Панъ Богъ впередъ на мене смерть допустить рачылъ; мае и вольна буде преречоная пани малжонка моя милая по смерти моей добръ моихъ лежачихъ и рухомыхъ, ойчистыхъ и материстыхъ, спадковыхъ теперъ, и на потомъ по комъ кольвекъ на мене припадаючыхъ, и набытыхъ, также сумъ пенежныхъ, гдЂ кольвекъ будь на заставахъ альбо за записами мнЂ служачыхъ, и всихъ речей рухомыхъ, золота, сребра, клейнотовъ, шатъ, рыштунковъ, кони, стада быдла, цыну, мЂди, збожъя озимнего и ярего, такъ въ гумнахъ зложоного, яко и на поляхъ засЂяного, и всего што бы едно речъю рухомою назвать и выразить се могло, жадное и намнЂйшей рече не выймуючи, спокойнЂ держать и уживать и оными вольно шафовать ажъ до остатнего кресу живота своего, безъ жадное перешкоды въ спокойномъ держанью и уживанью того всего помененой пришлой малжонцЂ моей милой, и трудности правное задаванья отъ потомковъ моихъ. А по смерти ее, теды тое зась иаеть вернуть на потомки мои.






Записъ на вечистую продажу


Я Н. дЂдичъ, я Н. зезнавамъ и ознаймуе листомъ добровольнымъ записомъ моимъ всимъ вобецъ и каждому зособна, кому то вЂдать належало теперъ и на потомъ завжды. Ижъ я маючи вольность, съ права посполитого и статуту земского, добрами и маетностями своими ведлугъ воли и уподобанья своего шафовать, ку доброму и пожитечному своему оборочать, теды маетность мою ойчистую фолварки село Н. въ воеводст†Н. повЂтЂ Н. лежачое, зъ дворомъ зъ людми зъ боярами поддаными осядлыми, подворишными огородниками и подсусЂдками, зъ ихъ повинностями работами подводами чыншами подачками пенежными медовыми и осыпными, зъ кгрунтами зъ землями тамошними пашными и не пашными, зъ полями зъ сеножатьми зъ пущами борами лЂсами дубровами гаями, запустами зарослами вшелякими, садами пасеками зъ бортями , зъ деревомъ бортнымъ и зо бчелами и безъ пчолъ, зъ ловы звЂриными пташими и бобровыми гоны, зъ потоками рЂками рЂчками болотами, съ ставищами зъ ставами зъ млынами, рудами озерами сажалками, корчмами мытами гребельными и мостовыми, и вшелякими пожитками и приналежностями, такъ яко се тая маетность село Н. сама въ себЂ въ кгрунтахъ пожиткахъ при належностяхъ и обходехъ своихъ здавна мЂла и теперъ маеть и завираетъ, ничого на себе малжонки потомки кревные и повинные мои не зоставуючы а ни выймуючы, такъ ижъ менованый не менованому а менованый менованому шкодити не маеть, все огуломъ яко мнЂ служило и належало зъ титуломъ вечистымъ предаломъ, и тымъ листомъ доброволнымъ записомъ моимъ записаломъ правомъ вечистымъ некгды неотзовнымъ и назадъ неворочаючимсе урожоному его милости пану Н.Н. за певную готовую суму пенезей, то есть Н. золличбы и монеты Польское, хотечи въ кождый золотый по 30 грошей Польскихъ, которую суму заразъ отъ его милости одобраломъ. И жонЂ и его милости тымъ же записомъ моимъ квитую и вольнымъ чиню вЂчнЂ, въ которой маетности Н. Н. позволями допущамъ заразъ его милости пану Н. потомкомъ его милости увезанья и увойстя въ вечыстую посесыю презъ возного и шляхту, которихъ собЂ его милостъ способитъ. Также вси права листы и записы на тую маетность належачую его милости пану Н.Н. отдать маю, которіе на его милость и потомки его милости вливаю, а самъ се зъ нихъ зрекаю вЂчнЂ. За чимъ его милостъ панъ Н.Н. и потомство его милости волны тую маетность, помененое село Н. зо всимъ яко се вышей поменило, спокойнЂ держать уживать розмножать и розшырать, пожытковъ собЂ примножать и причинять, любо кому хотечи отдать, даровать, продать, записать, фримарчить, заставить и ведлугъ воли и налепшего уподобанья своего яко властностью своею шафовать. А я молжонка и потомкове мои, отъ даты того запису моего вечистое продажи, въ той маетности вышъпомененой въ кгрунты пожитки и приналежности въ намнЂйшой ихъ хути уступовать, и жадное трудности перешкоды и пренагабанья правного и неправного въ спокойное посесыи его милости самъ презъ себе, малжонку, потомки, кревные повинные близкіе и далекіе, слуги, подданые и направные особы чинить и задавать не маю и не буду моглъ. А по мнЂ потомки мои не будуть о вшемъ отъ вшелякихъ и импедиментовъ правныхъ и неправныхъ зъ екое кольвекъ мЂри отъ кольвекъ заходячыхъ, также отправъ записовъ першихъ и послЂднихъ ручныхъ и зезнаныхъ, отъ вЂнъ привЂнковъ, декретовъ екзекуцый отъ каждое особы его милости пана НН. и потомство его милости и кождого тую маетность отъ его милости держачого, у кождого права суду и уряду и на каждымъ мЂстцу своимъ коштомъ боронити и заступовати, и тые добра очищати и освобожати, и вольными отъ каждое особы отъ всихъ импедиментовъ и тежаровъ учинить (такъ яко бы его милость панъ Н. и потомки его милости въ той маетности въ спокойной посесыи зоставалъ и жадное трудности и шкодъ не поносилъ) маю и повиненъ буду, а по мнЂ потомкове мои мають и повинни будуть тыле кроть, иле бы того потреба указывала. Што все и каждую речъ зособна маю и повиненъ буду зыстить и выконать, а по мнЂ потомкове мои подъ закладомъ Н.Н. зол. Пол. и подъ нагороженьемъ шкодъ за тымъ поднятыхъ, кромъ вшелякого доводу и присеги голымъ словомъ презъ его милость пана Н. и потомки его милости ошацованыхъ. О который закладъ и о шкоды, взглядемъ каждое не досыть учиненью ее приходячые и припадаючіе, и до учиненья досыть тому записови моему добровольного вечистое продажи и кондыцый въ немъ выражонымъ, волно буде его милоети пану НН. и потомковъ его милости мнЂ самого, а по мнЂ потомковъ моихъ, позвать до каждого права суду и уряду, хоть инЂ добромъ и потомкомъ моимъ неналежного, кгродского зеиского и трибуналского, въ которіе кольвекъ повЂты воеводстве, альбо до суду коптурового, которимъ се я съ потомками и добрами моими вшелякими, отступивши свое власное юрисдицыи воеводства повЂту суду и уряду, добровольнЂ поддаю и форумъ тамъ собЂ, гдЂ тылько буде позваный, назначаю. ГдЂ за позвомъ першимъ, яко на завитымъ року, ставши противко тому листови добровольному записови моему и его кондыцыямъ и ликгаментомъ ничого не мовечи, пленипотентови пленипотенцый стороны поводовое, положенью позву, хотя бы невчесне было, ани позвами ничого не жадаючы, термену ничимъ не збіяючи и боронъ жадныхъ не вносячы а ни зажываючы до того мужа кладаючисе, послугою его Королевское Милости Речы Посполитое лекгатами до посторонныхъ панствъ войною ексцептами сеймовым вальными сеймиками повЂтовыми, вторгненьемъ до короны непріятеля креста светого и моровымъ повЂтремъ не вымовляючисе, деляцыи правдивое хоробы свое и умоцованыхъ своихъ большей справы на муиимерта на виктора не заживаючи, малыхъ лЂтъ потомковъ не щитечисе, иншими припадками не вымовляючисе отъ декрету суду и уряду оного, до которого буде позваный, не апелюючы, апеляціи презъ припозвы не попираючы, и освЂдчанья жадного на судъ и сторону не чынечы, и вшелякихъ згола и каждое зособна менованыхъ а неменованыхъ оборонъ и добродЂйствъ правныхъ съ права посполитого походячыхъ и зъ довтепу людского знайденого не заживаючы, и на помочъ собЂ не беручы, закладъ и шкоды отъ суду и уряду оного до которого буде позваный не подходячый его милости пану НН. и потомкомъ его милости и каждому тые добра держачему и о тое правомъ чинячему, заплатить и его милости винковать и добра очищать и весь тежаръ справы, отъ кого колвекъ взглядомъ тое маетности и ее приналежности, его милости пану НН. або потомкомъ его милости и каждому отъ его милости держачему, жадное на себе взять и за разъ за ихъ милость респендовать маю и повиненъ буду, а по мнЂ потомкове мои будуть повинни. ГдЂ бымъ тежъ будучи позваный о которую кольвекъ речъ въ томъ записЂ моемъ выражоно до права не сталъ, або ставши въ томъ се не усправедливилъ и далъ бымъ на себе право перевести; теды тое все, што буде позванъ, на мене на потомкахъ моихъ и на добрахъ моихъ не порядкомъ статувымъ але разомъ всказано и присужоно быть маеть, а судъ або врядъ вшелякихъ екзекуцый на мене и добрахъ моихъ за речъ осужоную ведлугъ права уживати буде повиненъ. Которіе кгды бымъ самъ альбо презъ кого кольвекъ заборонилъ; теды судъ одослать мене маеть на дальшую якзекуцыю, то естъ на баницыю до суду головного трибуналю Любельского, на воеводство которое кольвекъ, Кіевское, Волынское и Браславское, и въ который кольвекъ повЂтъ Луцкій, Влодимерскій або Кременскій, любо на консерваты тыхъ воеводствъ напервей припадаючихъ. За которимъ одосланьемъ процесу правного презъ злое отриманье и присегу на невЂдомость зносити не маемъ и не буду моглъ, и отъ суду ми тое позволено быти не маеть; але баницыя за спротивненье се праву посполитому на мене презъ судъ головный трибунальскій, хочъ безъ бытности стороны поводовое, всказана и публикована быть маеть, по которой баницыи моцная экзекуцыя и за тую суму закладъ шкоды и презыски всказанье на мене потомкахъ и добрахъ моихъ вшелякихъ лежачыхъ и рухомыхъ и сумахъ пенежныхъ, которые тымъ листомъ добровольнымъ записомъ моимъ онарую презъ судъ и урядъ належный одправа его милости пану НН. або потомству его милости або кому бы то право отъ его милости належало, тежъ моцно учинено быть маеть. При которой отпра†если бы се якіе шкоды кому кольвекъ стали, будъ крови розленья або забойство, того такъ на сторонЂ яко и на врядЂ правнымъ и ни якимъ способомъ доходить не маю и потомкове мои не будуть, и о вшемъ зо всего квитовать, кгды бы того потреба была, маю а по мнЂ потомкове мои мають и будуть повинни. А гдЂ бы тежъ за противнымъ всказаньемъ судовымъ пришло его милости пану Н.Н. и потомкомъ его милости, албо держачему добра мои и кождому той записъ мой маючему въ декрету аппелевать; теды тая апеляцыя яко сторонЂ поводовой отъ кождого суду на воеводство Кіевское Волынское и Браславское, або на консерваты тыхъ воеводствъ наипервей пропадаючихъ, для прудшое справедливости допущона быть маеть. Которому то листови записови моему добровольному вечистое продажи и всимъ его кондыцыямъ и ликгаментамъ досыть чинить маю и повиненъ буду съ потомками моими тыле кроть.






Даровизна вЂчистая сумъ записаныхъ и речей рухомыхъ отъ мати дЂтемъ.


Я НН. одступивши свое власное належное юрыздыцыи права и повЂту, а теперешнему записови моему доброволному и всимъ его кондыцыямъ съ добрами и потомками моими подаючисе, сознавамы и ознаймуе тымъ листомъ записомъ моимъ добровольнымъ вливковымъ кому о томъ вЂдать належы теперь и на потомъ завжды. Ижъ я маючи часто молестоване отъ малжонка моего теперешнего его милости пана Н. а бымъ вси суммы добра и права мои, которыи кольвекъ мнЂ належать, на его милость влила, забЂгаючи я теды тому абымъ потомкомъ моимъ милымъ пану Н. сынови и паннЂ НН. цорцЂ вси суммы и добра мои вцалЂ зоставила, суммы мои вси и вшелякіе гдЂ кольвекъ якимъ кольвекъ способомъ и правомъ ленЂ належачымъ, то естъ перше сумму Н. которую маю записаную отъ зошлого урожоного его милости пана НН. малжонка моего, на дворЂ фальварву и селЂ Н. дожывотье собЂ зоставивши; другую суму которую маю НН. прыселку до Н. належачымъ; третее которій ми виненъ НН. Н. которую ми виненъ на листы записы свои добровольные водлугъ права справеные, о чимъ шырей одъ остатнего запису помененые, въ собЂ обмовляе тые иншые всы сумы огуломъ добра лежачые милуючи дЂти мои, которыемъ мЂла о зешлымъ урожонымъ его милостью паномъ Н. даю дарую и на сына моего пана Н. вливамъ. Также томужъ сынови моему На. Н. перше суму Н зол. Пол. а особливе другую суму Н. которую На. Н. отъ пана Н. за вливкомъ права належачого. зол. Поль. которую ми виненъ ННН. 4-хъ суму, которую мнЂ виненъ НН. тое сынови моему вЂчнЂ даю и на его вливаю, до того тежъ сынови моему пану НН. кони стадо быдло вшелякіе цынъ мЂдь, и што кольвекъ речъю рухомою нижей быть названо, даю дарую и не выймуючы, ани зоставляючи записую вЂчнЂ. А цорцЂ моей, паннЂ НН, тую суму Н. зол. Пол. которую маю отъ малжонка маего пана Н. даровано зъ маетности НН. учтивой, даю дарую и на цорцу мою вливаю мЂсто посагу такимъ еднакъ зпособомъ, же бы тыхъ Н. зол. отъ отца своего тестаментомъ ей записаныхъ у брата своего а сына моего, пана Н. не брала и оного первей урядовнЂ квитовала. А гдЂ бы се цорца моя панна НН. упоминала Н. зол. Пол. зъ отчызны отъ отца ей записаныхъ; теды тылько ей сумы Н. мнЂ записаное половину панъ НН. сынъ мой маеть дать сестрЂ своей, а цорцЂ моей, а половину тую другую Н. зол. при собЂ доставити, абы сполна Н. выносила сума посагу цорцЂ моей НН. особли†въ золотЂ , въ сребрЂ, въ штукахъ, въ клейнотахъ, шатахъ; то я сама повинна дать цорцЂ моей, зоставиши собЂ однакъ того всего такъ сумъ яко и речей рухомыхъ доживотное уживанье. А естли бы, стережи Боже, сынъ мой панъ Н. безъ потомнЂ съ того свЂта зышолъ, на паннЂ НН. цорцЂ моей вливамъ и ступуе, сама се зъ нихъ вызуваючысе и вырекаючысе на особу ихъ цедую. Мають и волны будуть помененые потомкове мои, и меновите сынъ мой, вышеречоное сумы всее и каждое зособна поднести, съ подвероныхъ кгвинтовать, и оными ведлугъ воли и уподобанья ихъ и пановъ опекуновъ ихъ диспоновать, о чымъ отъ мене и отъ жадного зъ близкихъ кревныхъ повинныхъ и иншихъ потомковъ моихъ жадное препедицыи и пренагабанья мЂть не мають, и на томъ дала.















Попередня     Головна     Наступна


Етимологія та історія української мови:

Датчанин:   В основі української назви датчани лежить долучення староукраїнської книжності до європейського контексту, до грецькомовної і латинськомовної науки. Саме із західних джерел прийшла -т- основи. І коли наші сучасники вживають назв датський, датчани, то, навіть не здогадуючись, ступають по слідах, прокладених півтисячоліття тому предками, які перебували у великій європейській культурній спільноті. . . . )



Якщо помітили помилку набору на цiй сторiнцi, видiлiть ціле слово мишкою та натисніть Ctrl+Enter.