Попередня     Головна     Наступна

КОНСТИТУЦІИ СЕЙМУ ВАРШАВСКОГО РОКУ 1570 ОСМОГО.

Стефанъ Божію милостію Король Польскій, великій Князь Литовскій, Прусскій и Рускій, Жеиоидскій, Кіевскій, Волынскій, Флянскій и Семигродскій и иныхъ сторонъ Дедичь.

Ознаймуемъ всЂмъ вобецъ и кождому зособна, кому бы то вЂдать пореба, иже мы ведлугъ повинности нашей королевской, опатруючи потребы короны Полской той, надъ которую насъ Богъ приложити рачилъ, а о томъ мышлячы абы въ ней такъ домовый врядъ якъ обеспеченство отъ непріятеля было, иже бысми дома добрый порядокъ постановившы спадней непріятелевы отпоръ дати могли и крывдъ явныхъ, которыи терпятъ речь посполитая сполнаа народу Полского и Литовского, за посегнянемъ и оторваня замковъ и земль презъ непріятеля, поветовать, зложили есмо сеймъ валный всЂмъ станомъ тутъ до Варшавы, на которомъ за радою пановъ радъ нашихъ обоего народу и зезволенямъ пословъ земскыхъ, напрудъ ведлугъ конституцыи давной предъ постановленямъ нашимъ учиненой и рекцесовъ сеймовъ прошлыхъ около справедливости, на которой рядъ весь домовый належить, и которой вси добрыи обычаи въ каждой речы посполитой походять, постановленя нижей описаніи учинили.

АРТЫКУЛЪ 1.

Порядокъ до обираня судей.

Въ кождомъ воеводст†и земли, на которомъ мЂсцу гдЂ ведлугъ старого звычаю обираютъ особъ судовыхъ, назначаючы моцно нынЂшнего сойму день и часъ той: впершый понедЂлокъ по нароженю панны Маріи въ томъ нынЂшнемъ року, а потомъ на кождый рокъ того же часу, до обираня судей судовъ валныхъ постановленныхъ трибуналу коронного, а Познанскому и Калискому, а Радіеве Плотскому воеводству, въ среду Сендомирскому и Раценжу, Мазовецкому въ ВаршавЂ, Равскому въ Болемове, Львовской, Премыской, Синоцкой, землямъ въ Вышни, а Холмской въ ХолмЂ и въ Галичу судіи обирати мають, ведже Холмская въ Холму напродъ, а потомъ Галицка въ Галичу обходитись тымъ порядкомъ мають, воеводство Подляское въ ДорогичинЂ, а въ земли въ Добринской въ ЛипнЂ въ понедЂлокъ предъ святымъ Балтромеомъ, часъ до того жъ назначаемъ и въ иншыхъ воеводствахъ и зеиляхъ, гдЂ судіи земскыи обираютъ, а до тыхъ судовъ валныхъ судіи обирани быти маютъ.

АРТЫКУЛЪ 2.

О выбираню судей.

На которыхъ сеймыкохъ вышей менованныхъ кождое воеводство обырати сполне маютъ и будутъ повынни межи собою особу одну годную богобойную цнотливую, права и звычаевъ судовхъ оного краю умЂетного и осЂлого: а з воеводствъ большихъ, то есть Познанского, Семыкгродского, Сендомырского, Калиского, Плотского по дву, з Рускаго также двухъ, съ которыхъ одинъ въ Вышни, а другий такый разъ въ ХолмЂ а въ Галичу, яко вышей описано, изъ Мазовецкого тры, только тотъ разъ одинъ, а потомъ по два; з Равского дву, съ Подляшъского дву, а зъ землЂ Волынской Добринской по одному, ЗовцынскоЂ, и ЗаторскоЂ также одного, до тыхъ же судовъ постановеныхъ коронныхъ обырати мають. А тыхъ судей обыране маеть быти, кого кольвекъ годного быти найдутъ. А кгды би который таковый былъ обранъ съ тыхъ, которыи на иншыхъ судехъ сидятъ, а естли бы ся притрафило справа зъ рушеня або апеляціа отъ которого з ныхъ, тогды тотъ на той часъ на судЂ въ той спра†вотовати маеть и выйти, кгды иные вотовати будутъ, повыненъ будетъ. Также обраніи судіи до другихъ толко судовъ тривати мають, а иныи на иныхъ иесцахъ до того часу и суду або трибуналу валного обранти быти маютъ часу и дня обыраня тыхъ судей вышей означоныхъ. А жаденъ з алектовъ повторе на судЂ не маетъ быти обыранъ до лЂтъ чотырохъ, опроче того где бы ся въ которомъ воедводстве на того же вси згодили, а жаденъ абы тому не былъ протывній, а иже бы ся того поднялъ, упросили.

Тыжъ если бы тежъ въ которомъ воеводстве для которой справы причини яко колвекъ алекціа не дошла, або смерть або хороба которого електа закрочила, зыншыхъ воеводствъ обрани судіи и справы оного же воеводства отправовати будутъ, неоглядаючися на небытность судей тыхъ, если бы съ которихъ воеводствъ обрани не были.

АРТЫКУЛЪ 3.

Присяга судій.

Тамже предъречоніи судЂ въ воеводствахъ и въ земляхъ обраніи, зъЂхавшыся на часъ и мЂсце судовъ назначоное, маютъ при судЂ земли оное и при вряде судовомъ и старостиномъ ротою судіи земского въ статутЂ описанною присягнути, того доложивши, ижъ практыкованя жаднихъ причынъ зъ нЂ с кимъ чинити не маютъ, а ни престрокги а нЂ ради давати, а нЂ подарковъ давати, и тежъ бы ся о то не старалъ, абы на тыи былъ суды обранъ.

АРТЫКУЛЪ 4.

Яко судити маютъ.

Судити маютъ справедливе з рейстру по воеводствомъ, яко вотуютъ, не отстреляючися отъ права посполитого, яко которая земля уживаетъ, Бога и справедливость его святую предъ очима маючи. А судіи декретъ съ письма θеровати будутъ, на которомъ два албо три судЂ подписатись маютъ. А где бысь трафила розность або ровность вотъ, маютъ заразомъ двай и три знову презъ вотованя пустити, и при той сторонЂ замкненя зоставити маеть, котораа за собою доводовъ правныхъ большей будетъ мЂла, а потомъ болшаа сторона замыкати маеть. А ижь вси справы пановъ духовных, которыи кольвекъ въ земст†в кгроде въ урядЂ подъкоморскомъ ведлугъ права писаного сужоны быть маютъ, и будутъ з рушеня або апеляціи якимъ колвекъ иншымъ обычаемъ припали, або припадати будутъ, предъ тымъ же трибуналомъ подле права посполитого отправованы быть мають. Про то до тыхъ самыхъ отправованя панове духовныи шесть духовныхъ судей с посродку обрати маютъ, которыи присягою обязаніемъ тымъ же при томъ трибуналЂ въ тую же роту на евангелію быть маютъ, съ которымъ до тыхъ же толко справъ духовныхъ шесты свЂцкыхъ, тежъ онихъ же судей с посродку высажоныхъ присяжныи быти и тыи справы судити мають; а тымъ подае права судячи колко разовъ презъ вотованя пущаючы, яко найпервей замкненямъ учинити большую часть съ тыхъ дванадцати маютъ. А где бы была розность вотовъ; тогды маеть быти отослана на сеймъ для декрету, котораа згодность або ровность депутатовъ тыхъ, где бысь до другого сейму на поправу з года не дошла, тогды тоть способъ трибуналу маеть зостати, докулся што лЂпшого черезъ вси станы не найдетъ. Десятины по именяхъ шляхецкыхъ, тымъ же спобомъ, яко и теперь суть, нЂчого не взрушаючы до угоды, котораа маеть быть на соймЂ, откладамы, а вже таковый декретъ, або декрета того трибуналу, таковыя важности быти мають яко и соймовыи. А если бы хто хотЂлъ притивитись декретовы такъ и справу особЂ ожаловати на соймЂ, або за переводомъ предъ насъ Господаря принесъ; тогды таковый каранъ быть маеть яко неслушный взрушитель декрету. А ижъ панове духовныи скаржатъ же за ихъ освЂдченямъ судомъ остатнего стопня права, а не подле права противъ имъ и именяхъ презыски превожоно; тогды старостове отъ екзекуцій и таковыхъ презысковъ суперседовати маютъ до узнаня нашего презысковъ на соймЂ.

АРТЫКУЛЪ 5.

Што судити маютъ и якъ.

Судити маютъ справы вси и каждый зособна отъ судовъ земскыхъ въ справахъ до роздЂленя добръ вейцовыхъ през рушеня апеляціи отосланя лимитаціи и иншымъ якимъ колвекъ обычаемъ, и вси иншыи, которыи колвекъ на соймъ албо за дворомъ нашымъ кролевскимъ такъ и урядовъ яко зъ урядовъ зъ стороны учиненя екзекуціи и декрету, або декрету суду валного трибуналу коронного, того остатнего стопня правного въ тыхъ речахъ, которыи судовы того трибуналу судити належитъ и сужоны бы были, и иншого обтяженя зъ судовъ або з урядовъ старостахъ и врядниковъ ихъ, причыненя справедливости учиненыхъ тыхъ всихъ правъ, которыи будутъ на судехъ, остатнего стопня права будетъ в земтс†або въ кгродЂ пересужоныи и до места старостего для чыненя екзекуціи отосланя, где бы подлугъ тихже ремесу або отосланя безъ вшелякихъ отволокъ екзекованы не были, такожъ справы которыи отъ которыхъ колвекъ трибуналовъ остатнего стопня права прошлыхъ воеводствахъ уфаленныхъ припадали, и иншыи вси справы которыи колвекъ такъ зъ давныхъ якъ и новыхъ позвовъ припадати будуть. А тамъ вже предъ тымъ судомъ вси стороны въ своихъ справахъ судовыхъ роковъ, и роки будутъ мЂли водле ихъ апеляцій и рушеня позвовъ припозвовъ, такъ завытыхъ яко и не завытыхъ з отосланя лимитацій, и иншыхъ въшелякыхъ стопнехъ правныхъ, яко тутъ на соймЂ або за дворомъ, также и на судехъ отъ остатнего стопня права которыхъ колвекъ воеводствахъ мЂти мЂли, жадныхъ не выймуючы, водле ихъ позвовъ припозвовъ контроверсій декретовъ апеляцій и иншыхъ понктовъ правныхъ, жадного не выймуючи, и всихъ тыхъ акцей справы жадной сторонЂ справедливости не уближаючи а ни уймуючи.

Артикуліе поправы статутовыя на соймЂ Берестейскомъ, року 66.

Артикулы поправы статутовыи, которыи з волею Божею и вЂдомостью Господаря королевской его милости, Великого Князя Жикгимонта Августа, съ потребъ правъ земскыхъ панства королевской его милости Великого панства Литовского, за зволенямъ пановъ радъ нашихъ ихъ милости того панства духовныхъ и свЂцкихъ, также князей пановъ врядниковъ его королевской милости, пановъ пословъ земскыхъ и всихъ становъ сойму, на соймЂ великомъ валномъ Берестейскомъ поправленыи, которыи ихъ милости панове рада и вси стани на соймЂ Берестейскомъ поправившы презъ старосту Жомоидского маршалка земского Великого Князьства Литовского державцы Плотенского и Тельшевского пана Яна Ходкевича ку его королевской милости листи до Люблина прислать были рачили, где господарь его милость тыхъ артикуловъ оглядавшы и ихъ ухвалившы, моцу сейму Берестейского до статуту правъ новыхъ вписати росказати рачылъ, умоцняючи то, ижъ хотяй бы и въ статуте што тымъ артикуломъ нижей описаннымъ было противного, тогды вже тыи артикулы презъ въ статутЂ описаныхъ справахъ такыхъ никоторыи моци въ жадного права мЂти и держаны быти не маютъ, але тими артикулами нижей описанными зо всЂми станы Великого Князьства Литовскаго и всей земли того панства належачими радити и справоватся маютъ.

АРТЫКУЛЪ 9.

Въ роздЂле 3: около неданя чужоземцомъ достоинствъ врядовъ и осЂлостей.

Тежъ таки мы Господарь обецуемъ и шлюбуемъ подъ присягою нашею, которую чинилисмо Великого Князьства Литовскаго всЂмъ станомъ обывателемъ его, што жъ въ томъ панст†Великомъ Князьстве Литовскомъ и всЂхъ ему прислухаючыхъ достойностей духовныхъ и свЂцкихъ, городовъ и дворовъ волостей и кгрунтовъ, староствъ, держаней, врядовъ земскыхъ и дворныхъ и поживаня вЂчности и жаднымъ обычаемъ людемъ а ни заграничникомъ того паньства давати не маемъ, але и всЂми потомки нашыми Великими Князьми Литовскими маемъ и повинны будемъ давати толко ЛитвЂ, Руси и Жемуиды, родычомъ старожитнымъ Великого Князьства Литовского. А еднакъ же если бы хто съ чужоземцовъ або заграничниковъ заслужився намъ Господарю въ той речы посполитой Великого Князьства Литовского поточныи и славныи послуги чинили и оказали; таковымъ людемъ якого они будутъ народу мы и потомки наши Великіе Князи Литовскіе на сеймехъ валныхъ съ тутошныхъ мЂстъ Литовскихъ за радою и позволеньемъ всЂхъ радъ нашыхъ пановъ, и тЂ жъ за позволеніемъ всЂхъ становъ земскыхъ сойму Литовскому валному належачыхъ, осЂлостей вЂчныхъ и дочастныхъ ведлугъ годности и заслуги давати будемъ. А однакъ же тыи сами и потомство ихъ будучи обывателми препущенными сего панства Великого Князьства Литовского службу земскую тому жъ панству до жадныхъ достоинствъ и врядовъ духовныхъ и свЂцкихъ не маютъ приходити, а ни отх насъ Господаря припускати або становити, толко зъдавна съ продковъ своихъ уроженцы Великого Князьства, Литва, Русь и Жомоидь яко выше доложоно есть. И если бы одержалъ иншого албо обчого народу чловекъ албо потомокъ который колвекъ уряды духовныи и свЂцкіе противко сему статуту, а напомЂненный того пустити не хотЂлъ; тогды таковый не одно достоинство и урядъ але и именя и маетность свою всю тратитъ на насъ Господаря Великого Князя Литовского*.

^* За симъ слЂдують первый и вторый артыкулы 7-го роздЂла одинакіе слово въ слово съ статутомъ 1566 года.

Артикулы справъ судовыхъ зъ статуту Польского презъ пановъ коронныхъ ухвалены и постановлени.

Вынявшы справы судовъ Польскихъ належныхъ, которыи ся ткнутъ поцтивости, а которыи судовы нашему на соймЂ належати будуть, и где бы хто зъ справы простой справу, которая ся ткнетъ почтивости, чинилъ, на судъ за дворомъ кого позвалъ або вызвалъ; тогды гды будетъ узнана презъ насъ на соймЂ быти справа простая, и маеть таковый вызивачь вину сиженя у вежы и сто гривенъ попасти и шкоды ведле конституціе, а справа маеть быти отослана до права належачого. А еднакъ же въ артикулехъ, которыи ся тикаютъ поцтивости, на судахъ и рокахъ гродскыхъ спеляціа маеть быти до судовъ валныхъ остатнего стопня права трибунальского, вынявшы тежъ справы скарбовыи ведле конституціи роковъ 1562 и 1566 учиненіи, и выкупна добръ кролевскихъ, которыи судовы нашему зоставуеми. А если бы хто старосту або державцу позвалъ о кгрунты нашЂ, которыхъ державца або староста четвертую часть даетъ, або подъ ревизею и мостраню (sic) подпали або подпадали, тако жъ которыи въ старыхъ сумахъ есть записаны; о таковыи добра маеть судъ отослати на соймъ, для узнаня нашего, а намъ самымъ о добра нашЂ ведле статуту чинити и доходити волно завжды будетъ. Тако же о невыданя четвертой части и о добра безъ права взятіи на соймЂ маемъ, вынявшы теже справы права Майдеборского, Немецкого и Хелмского, которыи за остроженя речы въ статуте описаныхъ судовы нашему належати будутъ зъ строны презысковъ на тотъ часъ одержаныхъ, противъ мЂстамъ, такъ тежъ мещане противъ шляхты, то ся заховати маетъ до узнаня нашего, яко около презысковъ духовныхъ есть описано.

АРТЫКУЛЪ 6.

Выведованя.

ВывЂдованя справъ, которыи ся ткнутъ поцтивости, маютъ быть за припозванямъ строны презъ сторону на земскыхъ або на гродъскыхъ рокахъ судовъ того повЂту, гдЂ бы таковый учинокъ пополненъ былъ, што первей будеть по обведеню того пополисного учинку выправована, а то для того куды сторона сторону позоветъ на соймъ, абы тамъ вже обид†сторонЂ были з вывЂданямъ готовымъ до рихлого отправованя справъ. А ижъ бысь справы тыкаючи поцтивости на сеймЂ завжды отсудити и отправовати моглы; тогды отъ початку сейму, который на назначоный день листы своими припозиціею зачинатися маеть завжды и по припозиціи и отправованю при послахъ земскыхъ, вотъ сынаторскихъ, ти день цалый день подле дня маемъ мЂти волный до суженя тикаючихся поцтивости справъ а потомъ поколь одно сеймъ будетъ, маемо отправовати тыи помЂненіи справы, на кождую среду пятницу и суботу не омешкаючы о нихъ справъ сеймовыхъ належачыхъ, а звлаща жаднымъ правомъ и квалтъ суженя подле конституціи Любелской, року 1569.

АРТЫКУЛЪ 7.

МЂйца судомъ.

Великой Полщи Петрикову, до которого тыи воеводства належати будутъ: Познаньское, Калисское, земля Волынская, Лечинъское, Береское ино Влацславское, земля Добринская, Мазовецкое, Плотское, Равъское; въ малой Полщи Люблинъ, до которого тыи воеводства належати удутъ; Краковское, Сендомирское, Руское, Подолское, Любелское, Подляшское, съ тымъ докладомъ, ижъ тые же судіи судивши великои Полски воеводства въ ПетриковЂ, маютъ зась ся изихати на часъ нижей назначоный до Люблина, а такожъ и тамъ осудити маютъ малой Полски воеводства.

АРТЫКУЛЪ 8.

Беспеченство судовъ и сеймиковъ.

Предъ который то судъ особа жадная которого же колвекъ стану и заволаня, котораа бы акцеи правной не мЂла, входити не маеть, аже кого зъ рейстру заволаютъ, до справы своей приступати и до кгмаху входити не маеть, толко самочвартЂ найбольшей входити маеть то есть самъ съ прокураторомъ а два пріатели. А если бы который упорне вшолъ, або въ дому судовомъ воланя чинилъ; тогды маеть на немъ сказана вина двоякаа чотырнадцать гривенъ, которую заразъ подъ таковою же виною не отходячы отъ суду положити судовы повыненъ будетъ, яко противъ непослушному екзекуціа речы осужоныи, и такъ маеть при вотованю, абы жаденъ не зосталъ о прочь тыхъ, которіе до того суду присягли. Тежъ жаденъ такъ насеймику обыраня судей яко и на мЂсце, где суди будутъ справовани, аби не смЂлъ пріЂждати и приходити зъбройне и не з жадними иншими бронми кромЂ меча корда шабелъ шпакги, а хто бы сиЂлъ стрЂлбою, и або з якою иншою бронею вшелякою пріЂхати, абы зъ нею ходити; таковый абы пятмадесять гривенъ былъ каранъ выною завыте неотходячи отъ суду або отъ сеймику, подъ выною чотырнадцятма грывнами, або если бы отъсланъ на екзекуцею ведле справы до мейсца старостего. А где бы хто на сеймику обыраня судей або судіи, або тежъ во трохъ недЂль предъ зачатіемъ суду нашого, або тежъ во трохъ недЂль по отсужоню, яко быти протывному; (sic) не иначей одно яко бы той на сеймЂ при насъ учинилъ.

АРТЫКУЛЪ 9.

Часу судовъ.

Суды на прудъ початись маютъ въ Петръкове въ понедЂлокъ близкыхъ по светомъ Мартине, въ понедЂлокъ близкій по проводной недЂли, а кончитися маютъ покол ся не скончать; а еднако же абы зыншыхъ судовъ нижшыхъ стопневъ подъ тымъ часомъ улженя судовъ валныхъ трибуналу остатнего стопня права отправовались. А Мазовецкы суды до остатнего стопня права, которыи первей судятъ, якъ ся зачали скончитись мають, декрета и справы тыхъ судовъ въ Петръко†печатю земскою кгродскою, а въ ЛюблинЂ печатю земскою Любелскою мають быти печатованы, тако жъ яко ся звыкло при судЂхъ кролевскихъ.

АРТЫКУЛЪ 10.

Утверженіе декретовъ.

А декреты тыхъ всЂхъ судовъ остатнего стопня воеводствахъ о сужоныи, которыи и на потомъ осужоныи на тои валномъ судЂ трибуналу будутъ, опатруеми и утвержаеми такымъ варункомъ, яко суть опатроніе суди новыи на тотъ одинъ разъ за Короля Жигмонта Августа ухваленіи декретомъ сеймовымъ Варшавскимъ остатнего дня Марца року 1564 учиненымъ, яко тотъ декретъ сеймовый въ собЂ самъ обмовляетъ въ тыи слова. Ижъ который колвекъ на сеймъ, або тежъ предъ врядъ, або тежъ передъ насъ за дворомъ якимъ колвекъ обычаемъ былъ позванъ отъ кого же колвекъ ку скоженю; таковой сказни подлЂ ради и нацеи и ухвалы сейму пройшлого Петръковского учиненное отъ позвовъ и отъ речы воленъ быти маеть и есть. А если бы еще на то хто упорный быти хотЂлъ, а приповЂдался на таковыи позвы, и на нихъ если бы што въ не послушенст†содержалъ; таковыи не мають мети нЂякои волности и быти не можетъ ку жадной шкодЂ нЂкому а нЂ презъ урядъ старости и екзеквованы быти мають. А если бы тЂжъ за приповЂданіемъ до суду чыимъ позваный на таковый позовъ станулъ, тымъ не отходячы самъ або прокураторъ его будеть повиненъ положить вини сто гривенъ, половица сторонЂ а другая до скарбу нашего быти маеть. А гдЂ бы досыть за помЂненіи речи неучиненной; таа справа маеть быти отослана, гдЂ добра стороны поводовой лежить, до остатнего дни и скутечного выконченя винъ, а прокураторъ маеть быти сказанъ до вежЂ на тый день сидЂти на днЂ тамъ, гдЂ бы таковые речи черезъ насъ были сужоны.

АРТЫКУЛЪ 11.

Повинность суду земского.

Прихиляючися до права посполитого и звычаевъ давно захованныхъ, гды жъ тотъ судъ отправовати маеть, што напередъ тымъ при судЂхъ нашихъ королевскихъ отправовано бывало, мается до того суду зъЂхати судя и подъсудокъ писаръ оного воеводства, въ которомъ отправовани будутъ, а тимъ присягши таемнимъ а и въ томъ судовымъ всю тую повинность на собЂ относить мають, которую нижели предъ тымъ при судЂхъ сеймовыхъ або дворныхъ и конуы судей нашихъ иншихъ за пробаціею декретомъ обирати и отсылати мають, еднакъ же вотованя на тыхъ судЂхъ мЂть не мають.

АРТЫКУЛЪ 12.

О позвехъ предъ тотъ судъ.

Позвы маютъ быти подъ титуломъ нашимъ кролевскимъ а подъ печатю той землЂ, въ которой позваный осЂлость маеть, а кладеня маеть быти на немъ 2 недЂли предъ роком.

АРТЫКУЛЪ 13.

О записахъ и протастаціахъ.

Записы сознаня освЂдченя и реляціи въшелякіе такъ мають быти важныи и предъ тымъ судомъ сознаня, якъ сеймовыи або земскіи.

АРТЫКУЛЪ 14.

О екзекуціи декретовъ

Старостове и урядникове ихъ вшелякіи декрета повинны ведле приекзековати подъ вынами описанными.

АРТЫКУЛЪ 15.

Опатреня судей.

Тыжъ судіи отъ кождого декрету, за кимъ выйдетъ, по 15 грошей брати мають, а отъ екстриктовъ плаченя маеть быти ведлугь статуту, а панове духовныи депутатомъ своимъ опатреня дати маютъ.

АРТЫКУЛЪ 16.

Поправа трибуналу такъ есть.

А трибуналу того посполитого корунного поправа завжды маеть быти волна за зазволенямъ съполнымъ на соймЂ.

Попередня     Головна     Наступна