Уклінно просимо заповнити Опитування про фемінативи  


Попередня     Головна     Наступна




Початок: Віршовий полемічний комплекс 80 — 90-х років XVI ст.



ІЗ ЗАГОРОВСЬКОГО ЗБІРНИКА




ОБЪ ОТСТУПНЫХ ОТЪ ЦЕРКВИ


Врагови подобни церковніи врази

и єго милыи и вЂрніи друзи,

Иже Востока свЂтлость нынЂ составляють

и до тмы Запада въ прелесть отбЂгають,

Отъ истины до лжи, отъ вЂры во єресь,

отъ святых сладости во грЂшную горесть

Водимы бывають плотскими совЂты

и не сохранили ко богу обЂты,

Которых ко нему сами учинили

и своими усты оных осудили.

Къ богатому папЂ отбЂгли на пашу,

абы за пЂнязЂ погубити душу,

ГдЂ все им по волЂ будет поблажати,

измышленный Христос, убійца, не мати,

Иже всю вселенную злостями осквернил

и духовный разум на плотскій измЂнил.

Дух же святый истинен, солгати не может,

и людєм прегордым гордость не поможет.

Аще бо кто вержет камень на высоту,

мняще небесную збивати красоту

Всемірнаго солнца, яснаго свЂтила,

на такого падется и оная сила.

И на свою главу воспріймет болЂзни,

да к тому престанет творити соблазны.

И сіи же Христовы церкви не побЂдять,

але сами себе во вЂки безчестять,

И срамоту пріймуть отъ онаго славы,

крЂпость єго и суд сокрушить им главы.

НавернЂться, бЂгуны, ко церкви восточной,

пріидите къ матери святой, непорочной,

Не шукайте Христа на ЗападЂ, въ РимЂ,

и явился нам бог наш во ІєрусалимЂ.

Уже бо не прійдет съ земнаго вертепа,

але отъ божія небесного свЂта.

Папа бо пануєт не на небЂ, въ РимЂ,

и погребаєтся во землЂ и ямЂ,

Не якъ бог владЂєт, человЂк бо тлЂнный,

слава и вЂк єго вскорЂ отмЂнный.

Але цар небесный сидить на столицЂ,

и трепещуть пред ним ангельстіи лицы.

И все созданіє єму ся кланяєт,

отъ него живот и духа мЂваєт.

И самый Петръ въ РимЂ где бы нынЂ востал,

благочестія вже тамъ бы не застал.

Єго намЂстники ѝм бы изгордЂли,

Иже, якъ царове, по нем збогатЂли.

Мусил бы их снова нищеты учити,

але по истынЂ не мог бы смирити.

Праведно ж бы папам Петра памятати,

востанет бо потом он их обличати.

СохранЂмо ж вездЂ Петровы науки

и будемъ Христу и єму ученики.







О ЛЖЕПАСТЫРЄХ


Горе оным, иже церков изражають

и за имЂнія вЂру продавають,

якъ жиды ІудЂ цЂну поставляють,

Оставляють Восток и бЂгуть на Запад

и многими вожами поспЂшными во ад.

Мимо права святого людских наслЂдують

и слова божого ни мало пріймують,

славы бо и чести на землЂ шукають,

До всякои єреси ради ся злЂпити,

а святую вЂру хотять развратити.

Суди ж им, господи, отъ мыслей отпасти,

и нас же избави отъ той прелести.

Вы же, православныѝ, господа любите,

матку духовную честію почтите,

Восточнои церкви уставы храните

и за отступными пастырьми не йдите.

Не даєт бог славы своєи никому

и хочет служити нам єму самому.

И вы, отъ Сіона, Рима не шукайте,

и непобожнои єдности бЂгайте.

Ни, свЂт бо темности не поработаєт,

но всегда собою темность отгоняєт.

Такъ святая вЂра свЂтла єсть и свята,

безъ змазы и єресей, яко дЂва чиста.

Отъ самого Христа до нас возсіяла

и отъ апостолов людей освЂтила.

Всю бо вселенную они научили

и за неи крови своѝ проліяли,

И на вся языки дали єпископы,

Богу позыскавши, якъ честныи снопы.







О ЛАТЫНСКОЙ ГОРДОСТИ


Але во остатній вЂк гордыи римляне

почитають своє, якъ божіє, созданіє,

МЂстца апостолов мнятся содержати,

а их обычаєв не любять хранити,

И все противноє дЂлають Христови,

и не послЂдують святому Петрови,

И божую славу мірскою покрыли,

и духовный разум плотским измЂнили.

Запремо ж ся таких апостолов новых,

да не отлучають нас любвей Христовых.

Святыи папЂжи, первыє блаженны,

иж муки за Христа были сподобленны,

И тыи истинно Христови служили,

и для христіанов души положили.

Яких тепер церков римская не маєт,

и съ жидами дружбу и любов ховаєт.

Христови и церкви зЂло єсть противна

и до восточноѝ матки непокорна.

Але вы, вЂрныѝ, мачоху минайте,

святую отчизну зЂло заховайте,

И не послЂдуйте гордому народу,

держите со Христом пресвятую згоду.

Не подобаєт нам слабовЂрным быти,

да не заведуть нас отъ вЂры зблудити.

Кто православной вЂры отступаєт,

такій со святыми жребія не маєт,

Убог такій и наг, душа єго мертва,

и сам єсть гнусная грЂховная жертва.







ВЂРА ЧТО ЄСТЬ


ВЂра єсть дар божій и людей спасаєт,

але злая єресь души погубляєт.

ВЂра праведников на судЂ прославить

и предъ лицем божіим съ святыми ставить.

ВЂра спасенію пріятель зичливый

и наставник грЂшным и путь добротливый.

ВЂра до царства божієго приведет,

а єресь въ пагубу вЂчную заведет.

ВЂра и отъ смерти многих избавляєт

и слугам божіим въ бЂдах помогаєт.

ВЂра жявет съ богом и въ ней всЂ во бозЂ,

и вЂрныи души ставаются блази.

ВЂра христіаном все творити может,

сила бо божія таковым поможе.

ТЂсною стезею до Христа приходять,

але широкою въ пагубу отходять.

Не хотЂмо ж Христа снова роспинати,

ани крещенія второ поновляти.

Не слухайте лживых учителей новых,

иже отлучають отъ бесЂд Христовых.

Западная мати не нас породила,

але прегордыи дЂти исплодила.

Блудная бо церков нЂсть Христова дЂва,

держащая кубок господнєго гнЂва.

Скверная, сквернити людей навыкаєт

и от спасенія хитро отдЂляєт.

Превелія бЂда Риму работати

и новаго Христа себЂ измышляти.

Премногая ж цнота Сіону служити

и святого духа уставы хранити.

Якъ чистоє злато, господніи слова,

сильнЂйшая огня отъ уст єго мова.

Изъ Ієрусалима вЂрным даровано

и всю вселенную богови призвано.

Восточная церков правдивая мати,

весь свЂт породила духом благодати

И чистою дЂвою Христу обручена,

тЂлом и кровию єго освященна.

Иже прегордому папЂ не голдуєт

и Христу-цареви вЂру заховуєт.

Златоструйный поток, любимицы, пійте,

отческую вЂру хранити умЂйте.

Якъ святыи книги нам оповЂдають

и всякую єресь явно обличають.

Памятайте пыльно о убогом ХристЂ,

который за люди умирал на крестЂ,

И на поклонную оного покору,

иже росказуєт ангельскому збору.

Якъ за наши грЂхи безчестіє пріял

и нас отъ[у]падку милостію поднял.

Не мнимайте ж папу Христову особу,

а ни чудитеся на єго оздобу,

Иже єсть змышленный, не Христов апостол,

и похитительно держить єго престол.

Наука и живот нЂсть єму духовный,

яко блаженный апостол верховный.

Познавайте ж разумно пастыри и волки

и не лучитеся въ невЂрныя полки.

Не хочет бог єдности не по єго волЂ

и за то караєт, абы єго знали,

Потоком и огнем непокорных,

тылу и грЂхови и мирови вгодных.

Велик єсть бог, судія грозный всему свЂту,

предъ которым стануть папы того вЂку,

Которыє смЂють Христовы декрета

вельми зневажати для марнаго злата,

Ламлючи каноны и вызнаньє вЂры,

и власти шукають, яже вышшей мЂры,

Жидовскій опрЂснок честію почтили,

а тайную вечеру Христову змЂнили,

Якъ мертвого трупа, оплатка глытають,

а Христа живого въ хлЂбЂ отмЂтають,

Посполитый народ, безъ крове Христовы

сакраментуючи, утЂшають словы,

И дЂти малыи съ ними отлучають,

о горе, о горе, и сами згибають.

Тамъ правдивый агнець съ костела изгнано,

абы жидовскую пасху праздновано.







КРЕЩЕНІЄ БЕЗЪ МИРА У РИМЛЯН


Крещенія свои безъ мира справують,

не якъ апостоли сіє отправують,

И трехпогруженія въ костели не мають,

и новокрещенных блатом помазують.

Тремя погруженьми тройцу вызнаваєм,

и смерть гнюсную тайно возвЂщаєм,

Ибо вода сія тЂло омываєт

и святоє миро члонки освящаєт:

Слух и очи и чело, перси, руцЂ и нозЂ,

яже просвЂтлены бывають о бозЂ.

И дар невидимо духовный пріємлем,

и бога и отца сыновство пріємлем.

ГдЂ святыи молитвы бывають читаны

и бЂсове тогда бЂгуть изгонимы.

Зъ святых апостолов такъ єсть нам подано,

и отъ святых отцев каноны ствержено.

НынЂ вже римляне письмо преслушали

и набоженства их ново позмышляли.

Вже бо жидовствують съ своими органы,

любо плясальницы въ бога поруганы.

Господь не требуєт пищалей и шума,

иже тщеславніѝ воплють безъ ума.

О мірская! будто богу догожаєш

и умиленіє зъ людей выганяєш.

Гудуть бо трубами, якъ смоки рыкають,

гдЂ божіи ангели приступу не мають.







МОЛИТВА СО СЛЕЗАМИ ПРІЯТНА БОГУ


Лучше йти въ дом плача, а не въ дом веселія,

гдЂ єсть похулено господнеє имя.

Христос-избавитель плакати нам каже

и слезами вЂрный бога найти може.

Не труба и арфа бога умоляєт,

але милостыня небо отворяєт.

Гласы жъ безчинныи воздух наполняють

и по сем, яко дым, поставы не мають.

Але святых молитвы предъ бога исходять

и милость божію мірови приводять.

Не єсть то честь богу, єже грЂх творити,

ниже нечистыми жертвами вгодити.

Святый же дух мЂшканя въ грЂшниках не маєт,

и беззаконников господь погубляєт.

Не тамо дом божій, гдЂ злостям господа,

и не любить Христос, гдЂ мерзости згода.

ГдЂ крест єго честный на нозЂ вкладають,

таковыи собЂ мученія чають.

Такъ и римскій папа Христу досажаєт,

на своих обущах крест выображаєт,

Блудницам же мерзость разрЂшив творити,

и во РимстЂм градЂ посты разорити.







ПАПЂЖНЕ НЕПОКОРСТВО КЪ ХРИСТУ


ДоколЂ ж, о папо, высишся на Христа,

будет бо отъ него на грЂшники помста.

Достоѝн ти святый крест честію почитати,

предъ которым бЂси звыкли трепетати.

Крест нам печать, вЂрным христіаном,

а нападеніє невЂрным поганом.

И святого Петра такъ не заповЂдано,

и тебЂ заклято и не благословенно.

Ни один святитель нигдЂ на вселенной

не согласуєт такъ твоєй власти темной.

И креста на нозЂ свои не вкладають,

котораго въ чести ангели мЂвають.

БезотвЂтен будеш предъ царем распятым

и отъ святых єго станешся проклятым.

Дасть тебЂ бог нозЂ по землЂ ходити,

a ты узаконив людєм цЂловати.

О гордая гордынє, кичишся до неба,

але во глубину снидеши до ада.

НадмЂніє твоє, якъ водная пЂна,

але твоя крЂпость, яко паутина.

Явно всему свЂту, ижъ ся обожаєш,

иже єсь персть и пепел, сего презираєш.

Не буди жъ нам сіє, матку оставляти,

восточную церков, и богом кламати.

Слышите, слышите, всЂ вЂрных народы,

яко изъ папЂжем шукаєте згоды,

Который вам кажет себе обожати

и тлЂнніѝ нозЂ своѝ цЂловати.

Святый наш владыка иным нозЂ вмывал,

апостолом єго, и такъ ѝх научал.

Читайте жъ о ПетрЂ, єст ли папЂ отець,

который не набыл многоцЂнных столиць,

Але терпЂніє въ нищетЂ проходил

и отъ грЂха людей многих освободил,

На діавола брани многіѝ поставил

и кровію єго господа прославил,

Не вбивати, но умрети за люди возлюбил,

и своєго Христа вседушно улюбив.

Живот апостольскій легкій и высокій

и надъ земных царей предъ богом великій.

И римскіи папы тым ся тщеславують,

але духовноє житіє минають

Во многих богатствах и тЂлесных сластєх,

во сла†и чести и по своѝх страстєх.

Але всЂ знаєте, ижъ пышніи гніють

и святого духа въ собЂ не мають.

Въ покорных пастырєх Христос пребываєт,

але горделивых далеко минаєт.

ГдЂ жъ нынЂ папЂжи за вЂру вмирають?

але за их єресь многих убивають...

Пожирають, яко львы, отческіи права,

абы славилася всего свЂта глава.

Христос — глава церкви, a блудницы — папа,

и своих заводить въ пекельніѝ врата.

Христос — глава вЂрных, а єресєм — папа,

иже пойдет съ ними въ пропастніи врата.

ЧеловЂкоугодным всЂм єсть наставник,

a въ лицемЂріи богови противник.

Не єсть всЂм угодно єго наслЂдити,

понеже не могуть так обогатЂти.

Але нищим всЂм Христос єсть учитель

и любящим єго правдивый спаситель.

Таковых пастырей и вы наслЂдуйте,

и себе въ чистотЂ богу приготуйте.







ГОРДОСТЬ ПАПЂЖСКАЯ


О прегордый папо, откинь твои блуды,

иже посмражаєш всего міра студы.

ГдЂ жъ ти Петръ повелЂв посты розоряти,

але подъ клятвою оных заховати.

Почто жъ отъ блудниць дани избираєш

и оным блудити явно позволяєш?

Для чего празнуєш свята изъ жидами,

христоубійцами, божіими врагами?

Клятва апостолов тебе искараєт

и святый их канон тебе обличаєт.

И євангелія чому не читаєш,

до вызнаня вЂры єресь придаваєш?

Святого бо духа отець посылаєт,

который по сыну предпочиваєт.

Научил нас Христос тако вЂровати

и благоговЂйно тройцу почитати.

Але не знаємо, хто тебе научил,

абы и отъ сына дух святый походил.

До третєго неба не был єсть восхищен,

а ни зъ апостолов того не научен,

Которым сын божій духа обЂтовал,

которому прійти изъ отца именовал.

Отець сына родил и духа изліял

и всему мірови познати даровал

Во єдином божест†тройцу вызнавати,

царство и владзу єдну познавати.

Якій євангелист такъ тебе научил,

дабы и отъ сына дух святый походил?

О мудросте земная, богу покорися,

и ты, честный отче, єреси заприся,

Два початки духу святому не учи

и євангелієм сам себе обличи,

Кривои науки остави учити

и святого Петра люби наслЂдити.

Хочеш отмЂняти божеє безумне,

но твоя срамота тебе не омине.

Богом ся на земли смЂєш удавати...

[который по смерти будеш истлевати].

Ключарю до ада, Петра не потваряй

и собе до Христа врата не затворяй.

Не єсть большій слуга надъ своєго пана,

а ни божія власть тебЂ не подана.

Попуєш ли въ РимЂ, не служи сатанЂ,

поповати тебЂ достоѝт смиреннЂ.

Не меч и копіє Петръ ти зоставує,

а ни мужебойства чинити повчає.

Але Христов ярем кажет ти учити,

а ты поучаєшся братоубійствовати.

Якъ можеш учити людей свято жити,

єсли ся богови не хочеш покорити?

Збираючи скарбы, учиши нищеты,

а не пріємлеши Христовы простоты,

Росказуєш себе на главах носити,

будуть ся бЂсове о тобЂ хвалити.

Зъ ними бо згодливе поваги вживаєш

и смутити церков оным помогаєш.

Не долго ти тая ловитва послужить,

а ни Петръ-апостол тебЂ не поблажить.

Єгда на суд божій испустить земля,

искараєт господь беззаконных племя.

Святыи нам книги того не сказали,

ижъ бысьмо папЂжа главою звали,

Иже всю єресь хитро покрываєт

и святого Петра дармо потваряєт.

Не євангеліє заховуєт цЂло,

але разсЂкаєт церковноє тЂло.

МЂвають и гробы златыи оздобу,

але внутри полны чловЂчаго смраду.

Таким себе любить папа оказати,

абы єго таѝн не могли познати.

Але вы, братіє, Христа величайте

и всею душею того почитайте.

Который и душу и тЂло даровал

и царство єго вЂрным обЂтовал.

Никто же не блуди отъ святаго пути

и достоѝн будеш одесную стати.

Путем Христовым отцове ходили

и нам ити стезю благу сотворили,

На лЂво и десно да не возвратимся

и Христу-господу вЂрно прилучимся.

Чужая то слава, и бога минаєт

западная церков, иже отступаєт

СвЂтлости божей и єго дороги,

который погубить вЂчно своя враги.

Але вы пріязни въ бога набывайте

и съ єретиками згоды не мЂвайте.

ВсЂ бо преступницы свои стези мають,

а пути Христова во вЂки не знають,

Яко же бо дыма, нынЂшній вЂк любять

и душу и тЂло для марности губять.

МамонЂ, якъ богу, вЂрно работають,

во златЂ и сребрЂ надежду мЂвають.

Поколя плотію живемо во мірЂ,

утвердите себя во Христовой вЂрЂ,

Старцы и юноши и всякій народе,

будите во вЂки во Христовой згодЂ,

Познайте ясно прелюбого царя

и будете потом, якъ свЂтлая заря.

Нехай же вас хитро мір сей не полонить

а ни прелесть єго до грЂха не зводить.

Иже утЂкаєт, яко звЂр из горы,

и якъ вода быстро минаєт воскорЂ

И скалы и пески валяєт съ высока,

такъ грЂшного слава погибаєт до вЂка.

Міра сего слава сладка єсть и люба,

але якъ морская потопляєт вода.

Которыи єя нынЂ пріобрЂли

и вЂчноѝ жизни за сію презрЂли.

Достойна єсть смЂху и Христа далече,

и души грЂшников во муки привлече.

За честь дочастную мерзости во вЂки

праведно пріємлють злыи человЂки.

Сохрани вас, боже, храните ж и сами,

вси бо єсте богом во вЂру призвани.

Слава бо и злато, якъ тЂнь, мимо ходять

и любящих сія въ пагубу приводять.

Такую то цЂну душЂ учинили

и за небо землю собЂ улучили,

Отступники вЂры, отъ Христа бЂгуны,

абы уводили до церквей новины.

СмЂючи и Христа тымъ вже повторяти,

абы своих страстей волю исполняти.

И съ грЂхами хотять отъ муки спастися,

ты же, боголюбче, отъ них отвратися.

Душе, душе злая, єреси отметай

и на погибели свои воспамятай,

Поверзи, поверзи служити сатанЂ,

будеши терпЂти въ мучимой глубинЂ,

И злато и папа тамъ тебе забуде,

и горе, и плачи — съ тобою пребуде.

Не торгуй душею, второє не купиш,

и лживый пастирь къ тому да не будеш.

Пристояло тобЂ нищету терпЂти,

а не богатства у папы шукати.

Господь, наш спаситель, нищету претерпЂл

и во страданіи увесь мір освятил.

Кто ж тя такъ научил новаго закона,

иже кромЂ бога вынашел сатана.

Мудрость бо плотская Христа преслушаєт

и духа святого въ собЂ не вмЂщаєт,

Которая церкви смущенія творить

и врата до Христа грЂшником затворить.










ЦЕРКВИ СВОЄЙ ХРИСТОС ПОМОГАЄТ


Але Христос убогой церкви помогаєт

и во гоненіях сію утвержаєт,

Иже зневолена, якъ Іосиф, во оковы

и поношеніє поносить Христовы.

Врази креста Христова єѝ утЂсняють,

але терпЂнія не преодолЂвають.

И такъ бога славить, ижъ, в немощи сильна,

и межи турками господеви вЂрна.

И ты, русскій роде, тепер утвержайся,

межи єресями во вЂрЂ мужайся.

Воля єсть господня нам нынЂ терпЂти,

а міролюбцам время богатЂти.

Научив нас Христос мір сей не любити,

и єго и вЂру над душу любити.

И не на роскоши апостолы послав,

на бЂды и скорби ити ѝм завЂщал.

И безоружніи на брани послани,

абы были ѝми языцы спасени.

И не философы, але рыболовцы,

невЂжи, простыѝ и не красомовцы.

Смотрите же Петра, кгды сЂти оставив,

якъ всю вселенную богови уловив.

Весь лик апостольскій ярем Христов несли

и нас, яко дары, господу принесли,

Не шкатулы златом себЂ наполняли,

але нас спастися отъ муки призвали,

Без поваги ходили пЂшими ногами,

их поставил бог на землЂ князями,

И благочестіє всюду насадили

и черніє грЂха сильно погубили,

То их был прибыток — за Христа умрЂти

и братолюбієм єму угодити.

Вся им вселенная скарбы отворила,

але ѝх нищета богу приближила.

Честный отче папо, якъ же Христа чаєш,

и святого Петра якъ тамъ превитаєш,

Кгды будет судити и тебЂ и другим,

и дастся заплата и грЂшным и благим?...

Блаженни жъ нищи, иже Христа ради,

але богатіи найдутся во адЂ.

Нищета Петрова богатых посрамить,

которыѝ єго слухати не хотять.

ГдЂ жъ покора, гдЂ любов, гдЂ тая наука,

[Иже нам зостала от святого лика?]

Их же господь други єму именовал,

на которых духа отъ отца изліял?..







ЦЕРКОВ ЗАПАДНАЯ БЛУДИТЬ


О римская церкве, чому погибаєш

и святоє письмо смЂле отметаєш?...

Плачемося о вас, милыѝ римляне,

твердо-сердечніи жидо-христіане.

Чого Христос не любить, а вам тоє любо,

але смиреніє божіє не любо...

Плачутся святыи на ваше безстудство,

ижъ упадаєте въ вЂчноє проклятство.

Помраченіє ума людей славолюбных

наносить съ западу устав душегубных.

Але покажите вы, римскіє дЂти,

гдЂ вам позволяно заповЂдь презрЂти?..

Шумите словесы, бога обидяще

и євангелія єго не храняще.

Але ваши власти спаситель погубить,

иже беззаконным помстити приходить,

Розкажет и папЂ нагому предстати

и поважность тую отъ него узяти.

Мусите забыти папу Христом знати,

который вас учить себе обожати.

Але древо отъ плода бываєт познано

и благочестіє дЂлами явленно.

Блаженный убо Петръ служній уряд принял

и, яко ученик, смиреніє хранил,

Царства у РимЂ не помыслив мЂти,

але всякую скорбь за Христа терпЂти,

И папам не казал мучительми быти,

а ни православных на єресь нудити.

Але таковы суть намЂстники злыи,

въ которых мЂшкають духи несвятыи,

Которыє крести и мечи пріємлють

и похитительне власти воспріємлють.







О ПРОСТОТЂ АПОСТОЛА ПЕТРА


Убогій Петръ и нищій о ХристЂ памятал

и волю плотскую отъ себе отметал.

Живот єго каждый познати хотите

и єго стезями по бозЂ ходите.

Была єго слава оковы й темница,

не папЂтворная гордая столица.

Апостол бо Христов истинный служитель

и всяких сокровищ конечный неимЂтель.

Ризы бо худыи тЂло одЂяли

и обуви ногам єго послужили.

Постель єму земля, а не одры чудны,

не отъ плачу нищих, иже богу скудны.

ГрЂхов теж за злато никому не простил

и некающимся муки прозвЂстил.

Головою себе не помыслив звати,

а ни господнєй чести похищати.

Але крестная смерть — то єго похвала,

и такая по нем столица зостала.

Убогіи рубы и нагоє тЂло,

иже нужнЂйшои смерти вокусило,

Начальства ж гордаго папам возбраняєт

и єго листами крЂпцЂ завЂщаєт.

Начальником вЂры зватися не хотЂл

и всю свою волю Христу поработил,

Иже міру всему себе укрыжовал,

иже Христа ради кров свою изліял.

Добрый раб и вЂрный теченіє скончил

и душу богови въ руцЂ поручил.

ТеплЂйшій во вЂрЂ, правый исповЂдник,

камень вЂры и святый міру проповЂдник.

Рим єго кров пріял, завЂсив на древЂ,

а Христос отворил къ собЂ єму двери.

О чистьцу не писал и славы не учил

и многіи чада богови прилучил,

Не важився кламства на свЂт выдавати

и въ чистець по смерти души посылати,

О божем царст†и муках повЂдал

и покаяніє прежде смерти подал,

ВсЂм быти готовым предъ Христа приказал,

огнем поновленіє всей твари написал,

Иже во день судный будет очищати,

и явно и страшно свЂт будет палати,

Иже потоп огненный то ся называєт,

им же, яко злато, бог мір очищаєт.

Во огнЂ пламеннЂ, святый Петръ мовить,

всесильный и страшный цар и бог приходить.

Але того чистцу, якъ Рим повЂдаєт,

святый Петръ и Павелъ не проповЂдаєт.

Але запрещають вЂрным не грЂшити,

a грЂшным покуту на землЂ чинити.

Ознаймили всЂм отъ мертвых востати

и душЂ и съ тЂлом заплату пріймати.

A нынЂ папЂжи лЂта продавають

и до чистьцу души грЂшных посылають.

Кто им больше злата за тоє даруєт,

такіи наданья отъ оных пріймують,

Ижъ єму всЂ злости зараз разрЂшають

и на колькосот лЂт въ чистець посылають

Мы же злого грЂха скоро отбЂгаймо

и таким прелестям вЂры не даваймо.

Караєт бог грЂшников дочасно и вЂчно,

и злодЂланіє діаволу прилично.

Царство вЂчноє конца не мЂваєт

и мука мучимым не преставаєт.

Пиθагор-философ, поганьскій учитель,

чистцового огня первый изъявитель,

Такъ разумЂв и писав, а римляне держать

и многих роспутно грЂшити приводять.

Для чего лакомства, и блуды, и убійства,

богопротивніи творять своволеньства?

Скажи ж нам, костеле, якъ о ХристЂ вЂриш,

который безъ грЂха, яко и сам видиш,

Пробывав у тЂлЂ и судити буде

и нашему тЂлу, купно и всЂ люде,

И велить безъ грЂха христіанствовати,

абысьмо достойни єго оглядали.

Кров єго святая рабом єго чистець

и покаяніє грЂхови єсть конець.

А чому ж розбойник до чистцу не послан

и во раю быти co Христом обЂцян?

Але кого ж Христос до чистцу одослав,

абы кто по смерти покуту преймовал?..







ДАР ДУШЕВРЕДНЫЙ


Знайте, христіане, що папЂж вам даєт,

слуга изъ милости вольность обЂщаєт.

Милостивым лЂтом людей поманили

и напротив богу право ухватили.

На пЂнязи певніи отпуст розсылають

и на грЂх охоту людєм повЂдають.

БезцЂнныѝ души тмами погубили

и благочестіє зъ людей разорили...

А чому ж до чистцу бЂсов не пошлете

и милостивого лЂта не подаєте,

Же бысте и ангельми могли учинити,

поневаж хочете въ небЂ рядити?...

Западный костеле, Христов декрет прійми,

иже на судный день услышиш, воспрійми,

Не вбивай, не блуди и пыху поверзи,

и єресь и кламства отъ себе отверзи.

Праведникам указуй стати на правицЂ,

а беззаконником мЂстце на лЂвицЂ,

А третяго чистца встыдайся змышляти,

злыѝ бо не могуть бога оглядати.

Єсли Адам был въ чистцу, a съ ним и всЂ люде,

по вашей науцЂ якъ то правда буде:

Мусил и Христос до чистца вступити,

мог бы и нам въ письмЂ о том дати знати?...

Але святых души отъ ада изводил,

до которых господь подъ землю въ бездну нисходил.

И цар Давид писал, ижъ выйдет изъ ада

душа єго потом и дождал господа.

Не лжите на бога, учители грЂха,

и не насЂвайте прелестнаго духа...







О ПРЕЛЕСТЯХ РИМСКИХ


О великій Риме, такъ прелести родиш

и всякіи злости ты вже переходиш,

Абысь антихриста мЂв себЂ любовна,

которого воля богови противна.

Готовишися єго, якъ Христа пріяти

и послушаніє оному отдати, —

Сына погибели, церковнаго врага,

которого злыѝ мЂтимуть, якъ бога.

Ажъ духом уст Христовых будет убієнный

и зо всЂми єго въ муки воверженный.

О великій Риме, чом отъ бога блудиш

и нечистотами всего міра губиш?

ВсЂ бо отщепеньства въ тебЂ гнЂздо мають,

и всякіѝ блуды тебе не минають.

Плотиугодницы твои єпископы,

а церкви Христовой злыи апостаты,

Иже только пЂняжный закон заховали

и купами людей до пекла погнали.

Безъ покаянія спастися повчають

и отпусты свои за злато мЂняють.

И блуды и вбійства людєм разрЂшили,

которы бы им сребро приносили.

Забыли караньє страшливои помсты

всесильнаго бога за оных лакомства.

Але познай каждый, богу вЂрный рабе,

ижъ преступленіє отъ Запада иде,

И зрады, и фальши, и хитріи власти

разширяются зъ адовы пропасти.

Аще мы умолчим, камень возопієт

и блажащих злобу гнЂв божій побієт.

И явно и тайно церкви ворогами,

абы нареклися земными панами.

ВмЂсто власянины — царскіи порфиры,

одЂяніє их — яже вышей мЂры,

Многими дворами домы их содержать,

и брани и битвы на царства творять.

Жабоястный народ, влоскіи пастыри

на Христа и Петра влагають потвари.

Але Христос Петра жабами не кормил,

а ни устен єго жабами не сквернил.

Токмо видЂніє на приклад показал,

абы и поганов до вЂры пріймовал.

А ни Предотеча саранчи не вживал,

але зеліями и медом ся питал.

Такъ и всЂ святіи скверным ся брыдили

и чистыми себе покарми питали,

Не красили себе, якъ блудныи жены,

и для того были Христу прилучены.

НынЂ жъ багряница — то папина слава,

понеже и сам єсть блудничая глава.

Єго же мнозіѝ люде наслЂдують,

которіѝ вЂрно Христу не пріяють,

Называючися имя христіаны,

дЂла же ѝх творять, яко же поганы.

Але, Христе-царю, сам ты нас сохрани

и нас отъ такоѝ прелести измЂни!...







О ГОНЕНІИ НА СВЯТУЮ ЦЕРКОВ


Каин и Авель д†церкви значили,

иже изъ Адама сыны ся родили,

Которыѝ богу офЂры принесли

и молитвы свои къ богу вознесли.

Але грЂшный Каин богу не угодив

и [зъ] лукавым сердцем къ нему приходив.

Авель же предъ богом простоту указав,

и бог єго дары на офЂру приняв.

А коли молитвы Авель богу отдал,

Каѝн єго зараз убити помышлял,

И по малом часЂ онаго умертвил,

але и бог єго праведно показнил,

И мерзскую жертву онаго отразил,

єго же молитвы вышній не возлюбил,

иже по зависти Авеля погубил,

И братоубійство на земли сотворил,

и кров праведную, яко воду пролил.

И нынЂ таковы Каѝновы внуки,

выникаючи въ остатніѝ вЂки,

Иже снопы злостей на жертву влагають

и души праведных хитро погубляють,

Славицею людскою себе заслонили

и Христово имя себЂ прилучили,

Але суть далече отъ святаго пути,

и въ беззаконіѝ навыкли пребыти,

Свою честь и славу на земли коренять,

а славы божеѝ любити не хотять.

Нарекли на земли славно ѝх имена,

а память смерти ѝм не воспомянена.

И грады и села тысящьми собрали,

a Христовы слуги смЂле ся позвали.

Хотячи и больше и землю посЂдати,

и во дни и въ нощи мамону стяжати.

Але бог єсть святый и злыми ся брыдить,

иже своя враги вовЂки погубить,

Любить за нас чистую пріяти офЂру,

и кажет чистую заховати вЂру.

Безъ єреси и грЂха богу ся явЂмо

и послушанієм онаго почтЂмо,

За послушаніє царство нам даруєт,

за преслушаніє ж муки уготуєт.

Яко Авель, терпЂмо, отъ убійцы брата,

и будет молитва предъ вышним пріята.







НА ЗЛУЮ ЄДНОСТЬ


Нехай же дружатся съ Каѝном римляне,

и положить ѝх бог въ такоє же караньє,

Нехай же ѝх страхи нас не отлучають

от любви Христовы, аще и вбивають

И даров и лестей отъ них не пріймЂмо,

и божеи славы тлЂнным не дадЂмо.

Слышите, слышите, всЂ купно народы,

изъ єретиками не мЂвайте згоды,

Не въ палатах златых господа шукайте,

але єго зъ неба славно ожидайте.

Ложь бо человЂча съ богом не царствуєт,

и лесть неправедных скоро погибаєт.

Кто милуєт Христа, на прелесть не ходи

и во терпЂніи оному угоди.

Остатніи вЂки, але ты спасайся,

и до папЂзскои купи не злучайся,

И страхом и датком уловлен не буди,

и доброту Христову въ сердцЂ соблюди.

ВЂси, яко тебе за кров свою купил,

абысь къ противному єго не отступил.

ЦЂну себє дал господь, себе ж єму продай,

и тЂло и душу єго ради отдай,

Поминай, поминай малость твоєго гроба

и якъ въ нем истлЂваєт земная оздоба,

Фарбованых словес не прійми во слухи,

абы твоѝ врази не имЂли утЂхи.







О МУДРОСТИ МІРСКОЙ


Міра сего мудрость богу непріятна,

иже не истинна и зъ лестью, превратна.

Тую латинскіи учители мають,

а святую мудрость зъ души удаляють.

ХранЂмо, братіє, святую простоту

и нелукавную божію доброту,

Иже святым духом письмо нам подано,

и тымъ наши души часто напаяймо.

Господь свою мудрость съ высоты даруєт,

и праведным єго въ сердца изливаєт,

Иже богословне житіє проходять

и по волЂ єго умы свои водять.

ЧеловЂчая жъ мудрость божієй противна,

тЂлесна, бЂсовска и велерЂчивна,

Святый Павелъ [єѝ] глупством называєт,

и непріязнь зъ неи богови бываєт.

Которую турки и жидове мають,

але не духовне сіи пробывають.

Такъ и латинницы людей прельщають,

отъ божои мудрости всЂх отдЂляють.







ДО БЛАГОЧЕСТИВЫХ


О милыи друзи, всЂ вы христіане,

Познавайте отъ них ваше ошуканьє,

Не напивайтеся зъ горького студеньца,

смердячаго грЂхами даже и до коньца,

Святои ж науки себе научайте,

тую же и чадом своим надавайте.

Вже вам латинницы глупство причитають,

а сами все злоє въ людєх умножають.

Их же училища єресь разсЂвають

и, яко же ядом, души забивають.

Що єсть богу не мило, и вы понихайте,

и святыи книги свои почитайте,

Въ которых наука, и мудрость, и цнота,

побожность, и разум, пречестнЂйшій злата,

Умаляють грЂхов, множать добродЂтель,

будет книголюбець душею пресвЂтел.

Письмо свято и чисто, богодухновенно,

и любящим єго благо и спасенно.

Книги — духовныи раи, разумныи цвЂты,

приводять нас Христови воздати обЂты.

Книги — солнце душам, мысли освЂщають,

книги грЂхов черность въ людєх убЂляють,

Книги въ юности премудрыми творять,

простых и невЂжов ритори сотворять.

Ни Платон, ни Пиθагор, ниже Аристотель,

не обрЂтаєтся духовный сказатель,

Съ которых латины наук ся повчають

и безумную Русь къ собЂ потягають.

Молю ж, Христа ради, на прелесть не йдите,

ани чада ваши на зло не ведите.

О ХристЂ братіє, о русскіє чада,

избавите себе отъ темнаго ада,

Не въ школах латинских розум купуйте,

и ѝх трутизнами души не питайте,

Погубите вЂру и святую славу,

аще суєтную ищите забаву.







КАКО АНДРЕЙ СВ[ЯТИЙ] АПОСТОЛ ПРИШЕЛ ВЪ КІЄВ-ГРАД КЪ НЕВЂРНЫМ


Єгда вознесеся господь на небеса

и єгда яви нам многіѝ чудеса,

Зъ горы оливноѝ отъ земли взыйде,

иже исъ плотію судити нас прійде,

Тогда ученицы всЂм проповЂдали,

народом и царем о нем возвЂщали

И во страны міра слово приносили

и отъ злои лести къ богу приводили,

Всю землю на части собЂ подЂлили

и євангелієм людей просвЂтили.

Отъ них же бысть св[ятий] Андрей первозванный,

отъ числа ученик Христовых избранный,

Изъ Ієрусалима въ Византію дойде

и оттуда паки во Россію прійде,

Та же во град Кієв по ДнЂпру странствова

и посреди поган святый крест знамена,

На горах кієвских молитву сотворив,

дабы тамъ господь благодать отворив,

Дабы имя єго въ Руси величано,

дабы христіанство оным даровано,

Иже о идолєх были упражнени

и во зловЂріи́ бЂсом ослЂплени,

Дабы вже бездушным престала офЂра

и православная возсіяла вЂра,

Вострубив начало проповЂдь святую

и принес въ Россію новину благую,

Якъ скарб небесный, на полунощ принес

и Христово имя пречестноє вознес.

И нынЂ хвалить тя полнощная страна,

иже отъ идолов къ богу призвана.

Прославляй, господа повсегда, Россіє,

ижъ благовЂріє въ тобЂ процвЂтає,

Иже красуєшся святыми церквами

и богови служиш чистыми жертвами.

Великая Россія ажъ до океана

за Володимера свято просвЂщенна.

Воспоминай труды апостолов святых,

посланнаго къ нам, и прочих других.

Святоє начало отъ них нам явленно,

яко отъ самого бога повелЂнно,

Якъ маєм спастися въ благом послушеньствЂ

и не изволяймо во злых отщепеньствЂ,

Которыѝ плотне нас порабощають

и до отступной власти потягають.

Не наши суть пастыри западныѝ отцы,

не нам наставницы папЂзскіѝ ловцы,

Не нам духовницы отметники вЂры,

иже опрЂсноками приносять офЂры,

Не наши пастыри церкви супостаты,

яже ускакують тыном, а не враты,

Иже суть не кротци, и якоже волци,

и злопрехитрыѝ людєм душегубцы.

Не таков был господь наш, иже наш спаситель,

и Андрей-апостол, россійскій учитель,

Яко же влоскіѝ папины присланцы,

иже будуть по сем изъ неба выволанцы.

НЂсть бо ѝх дух со богом, но земная мудрость,

которая творить богу непокорность.

Мы же вонимаймо Христови вгожати

и святоє имя єго величати.

И сохраним твердо гонимую вЂру,

и отбЂгаймо мерзскую офЂру.

И бЂды и страхи ѝх скоро минають,

которыѝ нынЂ на нас повставають.

Ибо и господь наш много за нас страдал,

и нам терпЂнія сам образ прописал.

Та жа святый Андрей крестную смерть пріял,

во Патрєх Ахайских за господа страдал,

Христови благій раб и мірови ловець,

и церквам ахайским был духовный отець.

Не бЂ въ нем гордости, ниже златолюбства,

але нам оставил чины братолюбства,

Всему христіанству и Кієву-граду,

богоизбранному россійскому стаду.

На вЂчный лЂта церков нынЂ стоить,

храм честного креста, въ нем же ся бог славить.

Єсли ж нас бог пріял, икъ нему прибЂжим

и теплую милость къ нему умножим.

И мужи, и жены, и дЂти, и старцы,

всЂ православныѝ братія и отцы,

Ласкове лице Христово узрите,

коли въ день судный предъ него прійдете.

Яко же бо звЂзды изъ неба упали,

тако и отступницы востоку отпали.

Но слава Христови, иже нас спасаєт

и отъ єретиков вЂрных заступаєт.

По лЂтєх же мнозЂх свЂт Руси возсіяв,

князь кієвскій, паганин, Христови увЂрив,

Володимер, єго же патріарха крестил,

кгды отъ идольскоѝ темности отступил,

и себе и люди о ХристЂ просвЂтил.

И за молитвами Андрея святого

вЂруємо нынЂ въ бога живого.







О КРЕЩЕНІИ РУССКОМ


Володимер великій вас у вЂру крестил

и отъ идольскои темности освЂтил.

А то бог даровал зъ милости благоѝ,

абы прилучил вас до воли своєѝ,

Иж мертвым идолом служити престали

и живому богу сынами зостали,

Кгды съ востоку святая вЂра возсіяла

и многобожную прелесть погасила.

Зъ Константинополя, отъ св[ятых] патріархов

просвЂщены єсьмы, восточных ієрархов.

Любите ж и чтите восточныѝ права,

и пробудет съ вами правдивая слава.

Чому ж єсте вЂру марне отступили

и єретицкіѝ науки влюбили?

Чому церков божію нищую творите,

чому о збавенью своєм не радите?..







ПЛЕМЕНИ РУССКОМУ НАКАЗАНІЄ


Отцы ваши вЂру святую любили

и святыи церкви украшали,

Отцы ваши посты святыи хранили

и братолюбіє и милость ширили,

Отцы ваши дЂла добрыи творили

и божієй церкви усердно пріяли,

Отцы ваши во єресь не приступовали

и въ благочестіи души их спасали,

Святых патріархов, яко отцев, чтили

и благословеньство оть оных пріймали,

Отцы ваши святых наук ся учили

и отъ погибельных себе отлучили.

А чому ж вы ими єсте погордЂли

и на зловЂріє себе измЂнили?

Єстли погубите души для мамоны,

вже не помогуть вам римскіи законы,

И не схочет Христос объ вас уже знати,

єсли умыслите єго отступати.

Нехай вЂрять, яко рачать, папЂзскіи дЂти,

але вы въ такіи не падайте сЂти.

Не бойтеся, малая господня чредо,

упасет вы Христос цЂло своє стадо.

Раз єсте крещени, любиміѝ друзи,

мужайтеся нынЂ о преблагом бозЂ,

Отъ втораго креста єреси бЂжЂте

и отъ прелестников себе стережЂте,

Добрую маєте вЂру и науку,

и помощ божію, всесильную руку.

Маємо погоду богу угодити

и цареви царєм любЂмо служити.

Хто вас отлучаєт отъ Христа и правды,

того не пріймуйте лукавой рады.

Єсли бы и ангел не такъ проповЂдал,

яко же Христос съ апостолы подал,

Святоє нас письмо учить не пріймати

и кламливым устам вЂры не давати.







НЕПРІЯЗНЬ ЛАТИНСКАЯ


Злую пріязнь церкви латина даваєт

и благовЂріє зъ неи издираєт.

Такъ и поганове христіан гонили

и мудрости божой себе не смирили.

Марнотравность лЂтам молодым бываєт,

кто y латинников наук уживаєт.

Мало тамъ о ХристЂ науки слыхати,

мало о спасенном пути навыкати.

Упилися мудростію свЂтскои науки

не апостольскіи сіи ученики.

Можете болЂти, якъ вас заразили,

и єще бы рады, щоб души згубили...

Кланяємся на восток, а на запад плюєм,

єгда крещеніє святоє пріймуєм.

Ко свЂту идите, a тмы утекайте,

и отъ поганскои мудрости бЂгайте.







О СВЯТЫХ ТЂЛАХ ПЕЧЕРСКИХ


Маєт земля ваша и святыѝ тЂла,

во славном КієвЂ, ѝх же слава цЂла.

Вже отъ шести сот лЂт въ печерах нетлЂнни

святыѝ постницы по смерти явленни.

Преподобный Антоній, иноком начальник,

общаго житія по бозЂ наставник.

Блаженный Θеодосій, ангельскій сожитель,

игумен братіѝ, Христови ревнитель.

И множество братіѝ святая дружина,

яко благополучная божая маслина,

Отъ святои горы ученіє мЂли

и на высокоє житіє доспЂли,

И ясны и славны их подвиги стали,

и тыѝ истинно господа познали.

Святых молитвами вы нынЂ живете

и ѝх наслЂдуйте и такъ ся спасете,

Пречестно бо они Христу угодили,

иже съ любовію за нас ся трудили.

Побачте очима, кто письму не вЂрить,

и самыми дЂлы нехай ся увЂрить.

Тыѝ не римскому костелу служили,

але патріархов святых наслЂдили.

И то вам єсть, руси, печать христіанства,

принесенный овоц въ началЂ съ поганства.

Якъ честный дар богу, блаженныи рабы,

отъ вашеи персти во небесном стадЂ.

Шесть сот лЂт минаєт, а их чуда славны

и до суднаго дня будуть свЂту явны.

Подземный мученицы горы постигали,

постом и працами тЂла изсушали,

Преже смерти тЂла земли предавали,

кожи их до костей живых присыхали,

Пот чола своєго богу жертвовали

и слезами лице своє омывали,

Чудами своими прославили бога —

отож вам за ними святая дорога

Єсть уготована, и по ней шествуйте,

и во святой вЂрЂ отеческой стойте.

Не ослабЂйтеся страшками гнилыми,

а ни зводитеся науками злыми,

Памятайте оный лик отъ русских рожаєв,

которыѝ были святых обычаєв.

Господь ѝх зоставил на вашу науку,

да пожелаєте честному ѝх лику.

И вЂру правую и дЂла благіѝ

заховайте, богу дары дорогіѝ.

А хто ж вас оскорбить, кгды бог потЂшаєт

и святыми усты радость обЂщаєт?..

И хто жъ вас убієт, аще господь живить,

и святый хранитель отъ злого хранить?..

Не ужасайтеся въ послЂднеє время,

одно облегчайте грЂховноє бремя.

Отъ любви божія да вас не отлучать,

аще и ранами и огнями мучать.

Ревность апостолов въ сердцах распалите

и вЂрность ко богу щире покажите.

Вам то честь и слава за вЂру вмирати

и по сем будете зъ богом пробывати.

Не маш тамъ зависти, и гордость не буде,

и божій зъ богом, и зъ ними бог буде.







ДО ИНОКОВ РУССКИХ


НасЂню божому священная земле,

нехай ваша душа господа подъємле,

Будьте господою всесвятого духа,

явитеся людєм вЂрная утЂха,

И дЂлом и словом будьте совершенни,

въ молитвах и постЂ будьте украшени,

ВЂру утвержайте, церкви не зражайте

и для имЂнія душ не продавайте.

Будьте предтечами братіям спастися,

и кождый Христови любовію смирися.

Претерпите той вЂк, скоро бо минаєт,

угодите богу, иже вас вЂнчаєт.

Щасливыи єсте, при вЂрЂ стоите

и себе и многих богу приведите.

За черныи вретища будете прекрасны,

предъ царем небесным и честны и ясны.

НынЂ скитайтеся, a тамъ почієте

и со ангельскими лики поживете.

Не погоршайтеся, ижъ злость начальствуєт,

поневаж надъ вами Христос царствуєт.

Не скорбите о скорбєх, збирайте въ небЂ,

и не угожайте тЂлесной потребЂ.

Играйте душами, бог вас избираєт

и вашу терпливость часто назираєт.

Не маєте жен и чад, яже суть отъ плоти,

але зъ вами не могуть царове зровняти.

Чада ваши будуть, ѝх же вы спасете

и яже въ чистоту других приведете.

Великая вам слава перед богом дана,

и царская столица єсть уготована.

Ваша нынЂ глава — Христу колесница,

и уста и язык — святая скарбница.

Чистую дань богу, хвалу отдайте

и богомыслієм помыслы красите.

Отчизны на земли мЂти не желайте,

и бЂды и скорби любовно пріймайте.

НынЂ будемъ странны на земли пришельцы,

держимъ незлобіє, яко же младенцы.

НынЂ будем убози, да обогатЂєм,

яко да со Христом царство имЂєм.

Не чудимся, братіє, ижъ злыѝ владЂють,

сіѝ бо вЂчноѝ славы отпадають.

Понеже святіѝ вся нынЂ презрЂли,

и честь, яко же дым, себЂ вомЂнили.

Господь не замедлить и прійдет воскорЂ,

отверзет вам славы царства єго двери.

Якъ добрыѝ рабы, будьте нынЂ вЂрны,

и чисты душею и сердцем смиренны.

И словесы и дЂлы, во славу Христови,

явитеся вЂрны вышнєму цареви.

Минають бо скорби и радость приходить,

и прелесть мірская скоро мимо ходить.











ПРИМІТКИ



Із Загоровського збірника


Вірші із рукописного збірника XVII ст., який належав бібліотеці Загоровського монастиря (с. Волиця-Загоровська, між Володимиром-Волинським і Луцьком). На сьогодні доля цього рукопису невідома. Докладніше про нього див. у статті «Віршовий полемічний комплекс 80-х — 90-х років XVI ст.», с. 25 — 26 цього видання.
Див.: В. П. Колосова. Віршовий полемічний комплекс 80 — 90-х років XVI ст.

Публікація: Добротворский А. Загоровский монастырь, его библиотека и сохранившийся в ней западнорусский литературный памятник XVII-го столетия. — Вестник Юго-Западной и Западной России, год 2-й, т. 1, 1863, июль, с. 1 — 17; август, с. 75 — 115; сентябрь, с. 165 — 196.

Вірші подаються за публікацією А. Добротворського.


О лжепастырєх. Після третього та восьмого рядків, мабуть, пропущено по рядку, що відзначено знаком [...].


Гордость папЂжская. 38-й рядок, мабуть, пропущено.


Церкви своєй Христос помогаєт. 44-й рядок пропущено.

















Див. також:

Опис та фрагменти віршів: В. П. Колосова. Віршовий полемічний комплекс 80 — 90-х років XVI ст.


ВІРШОВИЙ ПОЛЕМІЧНИЙ КОМПЛЕКС 80 — 90-Х РОКІВ XVI СТ. Українська література XIV-XVI ст.

Із Києво-Михайлівського збірника. Українська література XIV-XVI ст.

Із Загоровського збірника. Українська література XIV-XVI ст.


Вірші із Києво-Михайлівського рукописного збірника 80 — 90-х років XVI століття. Переклав В. Шевчук

Полемічні вірші із Загоровського збірника 80-90-х рр. XVI ст. Переклав В. Шевчук


Ірина Жиленко. До історії використання топоніму "Русь", "Рóссія" в українській історіографії...










Попередня     Головна     Наступна


Етимологія та історія української мови:

Датчанин:   В основі української назви датчани лежить долучення староукраїнської книжності до європейського контексту, до грецькомовної і латинськомовної науки. Саме із західних джерел прийшла -т- основи. І коли наші сучасники вживають назв датський, датчанин, то, навіть не здогадуючись, ступають по слідах, прокладених півтисячоліття тому предками, які перебували у великій європейській культурній спільноті. . . . )



 


Якщо помітили помилку набору на цiй сторiнцi, видiлiть ціле слово мишкою та натисніть Ctrl+Enter.

Iзборник. Історія України IX-XVIII ст.