Головна               Див. переклад Писання проти лютерів

Анонім

СПИСАНІЄ ПРОТИВ ЛЮТОРОВ О ПОКЛОНЕНИЮ СВЯТЫХ ИКОН

Глаголеть в десятословию: ¹ «Не вчини собЂ всяко подобіє», то почто повелЂ сам бог сотворити подобіє херувимска? Тако несмыслени быша лютори, яко и самого бога не єдиногласно и Моісея преступника закону и всЂх пророк сотвориша.

Обычаи бо бЂ во Ветхом законе почитати божественная честне и поклонятися не яко боготворяще вещей, но честию видимою невидимаго бога почитающе. И на славу свою з видимых речей повеле Моісею скинію сотворити по образу, показанному єму на горЂ, и киот завЂта, в нем же скрыжали законныя и прочая вещи в память чудес єго, и сія вся почитаєма и поклоняєма бяху.

И єже глаголеть: «Не вчини собЂ всяко подобіє», добре глаголеть; что мЂли молевати, не видєвши бога? Иліи явился в бури и мглЂ: чи вихор мЂли молевати, або мглу? Моісею при купинЂ огнене явился; что мЂли молевати, чи огнь або куст? и при камени задняя своя явил во окомгненью; то ли мЂли молєвати тЂнь? Але нам задняя и передняя явил в суполности вчеловЂченья своєго. Таже святых праотець преждє закона и у законє праведных пророк просиявших не писаша зраков, ино для того, абы родоначалников не обоготворили и не поклонилися им, яко самому богу.

Частокрот бо они то чинили: идолом кланяхуся, сыны и дочьки своя ризали на жертву, о чом досыт Давид у псалмех и у Деяню (зачало 17) причитают, яко Хамосу, Ельфеору, звездам обоготворивше служаху, яко и Давид заказуєт им: «Израилю, да не будєт в тебе бог нов, ни поклонитися богу чужему». В нас же благодатію Христовою, єгда воплотися от пречистая богородица през духа святаго, не маєм бога иншаго нова и чужа, но Исус Христа, бога истинна от бога истинна, яко ширей пишет у «ВЂрую во єдинаго бога». Тому вЂрую и поклоняюся, и того зрак написую, и пречистой єго матере образ чту и поклоняюся, не боготворяще образ, но от видимых блезков возводим ко небесным ум и память.

И ровняють лютори образы ко идолом. Зовешь ли нас идолниками поваго Израиля? Але мы, вЂрующе Христу, по имяни єго новым именем зовемся — християне. Яко и пророк глаголеть Исаія: «Работающим мнЂ, дасться им имя ново». Видиши ли, иж єсмо християнє, а не идолопоклонницы? ВсЂх бо єресников вЂра по имени их зовется: люторияни, симонити, маркионити, ариянє, євномиянє, саси, євангелики, точию наша по имени Христове, яко лучши всЂх єсть, зовома християне. И на иконах написуєм Исус Христос, а не Аполона или Дня, албо Єремию или иншого ругателя, або звЂрей или птах. И на пречистой богородицы иконє имя єй святоє подписуєм, а не Ардемиду. Також и всЂх святых угодников имена описуєм, возводим ум наш, ревнуючи добраго житія их, размышляючи подвиги их и на помоч их собЂ призываєм.

Яко глаголеть: «Идоли язык сребро и злато, дЂло рук человЂческых: уста имуть и не глаголють, очи имуть и не видят, уши имуть и не слышат» и прочая там. Видиши ли, слову силы не зная, а мешая заровно, но треба слово от слова разумно углянути, разбирая судити, иже о идолех язычных там мовит, а не о наших святых иконах, запечатаных Исус Христом и пречистой именем и прочих святых. И что нам, християном, до идол язычных? Не маєм до их дЂла, мы не язычницы.

...У Афинєх много множество болванов было. И коли хороба их попала, оспа и свороб, и жаден болван не уздравил их, но уробили болвана, имя дали «невЂдом бог» и поставили промеж давных болванов; и оныє давныє боги их не помогли им, но от того образу фикгуры и от тых хороб заразом стали здрави. И опустили вси болваны, почитали тот кумир незнаємаго бога. И пришедшу Павлу апостолу до Афин, рече им: «Мужіє Афинеистіи, проходих соглядая боги ваша, в них же обрєтох кумир невЂдома бога, єго же не вЂдуше како благочтете». И оземши причину, дал им приклад от оного кумира, а, глаголю, крестнаго, проповєдал истиннаго бога Исуса Христа. И видиши ли, иж от видимаго образу крестнаго увел их во вЂру! Что ж апостол не погудил их за то, но єще назвал: «Художайши вы, рече, зру»? Бо от видимаго образу в память грехов своих человЂк приходить, и ум свой горЂ к вышнему возносим, бо на крыж оный кумир вроблен был.

Жена теж кровоточивая образ сотворила в мЂру возраста Христова у градє Панеадє ² на памятку исцеленіа своєго, и у ногу образа Христова господня зеліє росло, и хто того зелія к хоробє приложил, много исцеленіє чинило, и през колко сот лЂт аж до царства законопреступного Иулияна стоял в том градє Панеадє. И видали и апостолове, и многіи святій отцы были, чему не зламали того образу, але попустили вЂрє жены оноє? Иулиян нечестивый ³, гнЂваяся на христіяны и на святого Артемия ⁴, єгда єго во Антиохіи мучил, той образ збил. Знайдеш у толкованю євангелиста Матфея. О чом єще ширєй у мученію святаго Артемія пишеть.

Авгару царю Христос своє воображеніє на убрусе посла на исцеленіє хоробы єго. О том знайдеш свєдоцтва много.

У Лидє Диосполи, єгда святый Петр со святым Іоанном Богословом Енея исцелиша, тот Енея постави церков Пречистой Богородицы. И зваша ю, да пришед видит церков свою. Рече им: «ИдЂте, уже я там єсмь». И пришедше апостоли напрод изнашли образ пречистой на столпє нерукотворен воображен. Потом пречистая богородица сама пришла и обачила свой зрак, рекла: «Благодать моя буди с тобою». И много исцеленіє и чудеса бысть от того образа.

...И глаголють люторы, иж того нЂт у Євангелій. И аще бы то усе было у Євангелій, ни увесь мир книг, что ся на он час дЂяло, не вмєстил бы. И яко заказу нЂт, так теж и росказаня: естли замолчано, явно єсть, яко на власти человЂчи зоставлено. Не пишет теж у Євангелій на восток молитися або кланятися и инших тайностий христіянских: крещенія, венчанія и исповеди, звонов и прочего, то почто вся та люторницы держать? Но мы со Давидом поєм: «Лицу твоєму помолятся богатіи людстіи».

...Пакы єще повєсть певная к тому приложенна быти маєт: аще лютором и иным двоєдушным невЂрно, но для утверженія вЂрных христіян повЂмы. Кгды три цариє волсви приходили на поклоненіє Христу родившуся, они ж, образ Христов и пречистой єго матере написавши, до землЂ Перской принесли, и у скарбє цареве хован был. О том єсть читаніє у Соборнику на рождество Христово ширей, Афродита и Прупина ⁵ философ выклад, которыє были жерцами у Персех, и при них тая звєзда явилася у кумирницы, по которой оныє цари шли на поклоненіє Христу. Тыє ж потом, кгды Христу увЂрили, о сем образє пишут. Бо кгды бы оныє цари не принесли знаку образу, никакож бы им не вЂрено, абы мЂли быти у Вифлиоме и видЂти Христа...

О СВЂЧАХ

Мовили быхмо от письма, ино учит нас апостол духовная словеса духовным предлагати: бо вси вЂдают, иж то здавна было и єсть уставено до церкви свЂчи носити, почен от старого закону аж доднесь. Але и с прикладу, кром писанія, глаголем по Соломону: «Незлобивый всякому словеси вЂру ємлет». «Двоєдушен бо, рече, человЂк неуправлен єсть во всЂх путєх своих». Сице єсть: єгда отроча, коє ли буди, принесе ко отцу совєму вещь якую кольве, непотребна и ничемна сущи,

єю же речю играл, и отец єго, хотя непристойна, но хотя обрадовати и увеселити сына своєго, тешачи єго, абы не плакал, а вдячне от него тую речь пріймуєт и отпустит єго с похваленієм и веселиєм, — тако обретаєтся и бог, сице творя: пріймуєт бо от чистаго сердца принесенноє, не яко вещи оноя требуя, но усердия от коєгождо принесенія смотряя, и исполняєт прошенія єго. И Каин теж дары богу принесе, а кгды не из справедливого сердца, на принос єго бог не внят, а на брата єго Авелевы дары приздри господь. Почто? Понеже от правого умыслу принес любовне або умысльне...

О ПОСТЄХ И О МЯСОЯДЄНІИ

Се бо слышим нЂких глаголющих, яко онсице євангельских сын ни среды, ни пятка и ни коєго поста требуєт. Мы же к таковым речем: коє убо єсть преступлениє, или кий грЂх, єже установленныя посты держати? Не покаянню ли наставник пост, исправленіє жития и путь добродЂтелем духовным и телесным? Глаголет же нЂкій от премудрых святых, яко начало рати противу грєха подвига человЂку пост.

...Тяжко видится теперешним людєм, яко мяса которого дня не поєсть, мнимаєт, иж уже умрет для того, што мяса не єл. И глаголють: «Голоден єсми, ижем не ял сего дня мяса». Что ко сему мают рещи, иж первыи люди, почен от Адама лЂт д†тисячи двЂстє сорок д†лЂтє, аж до потопа мяса не яли и предся живи и дужи были и для того не умерли, же єго не яли. Постяй бо ся легок єсть и совершен и трезвениєм молится: сугубы бо имат крыла и паче вЂтра легшайши. Сия крыла добродЂтелей, и божественный Давид датися єму молится, глаголи: «Кто дасть ми крылє яко голубинє? И полещу, и почію»...

О НАУЦЕ

Глаголють же, яко многи языци умЂти учителем добро. Забыли апостола, рекшаго: «Не во словесЂ царство божіє, но в силє добрых дЂл». И паки: «Господь совЂсть помышленія мудрых, яко суть суєтна». И паки апостол: «Мудрость мира сего буйство от бога». Се бо обретаєм многи научены во всЂх языцех, напротив стоящих правыя вЂры, и в нечестия хулы, и в различныя єреси уклоншихся, и ничтоже пользова их много ученіє, найпаче таковыи краснорЂчиєм прелыцают многих и сами прелстившеся. Сего ради заповєдуєт апостол, глаголя: «Блюдитеся, єгда кто вы єсть крадоводя хитростию и тщетною лестию, ученій человЂческыми, по составленіи мира сего, а не по Христє: в нем же пребываєт все исполненіє божества телесне».

Может бо истенноє слово просветити и умудрити во благих правым сердцем без грамотикия и риторикия. Божественая бо євангельского ученія проповЂдь «не во словесєх человЂческыя мудрости, но в науце духа святаго». И сам сия заказуєт апостол в розноє наученіє не вдаватися, сице рече: «В наученіє странна и различна не прилагайтеся». Понеже ротмистр и жолнЂр люторскый смЂл рушити Христа писмом, верзися на дол и прочая, а предся злым а нестыдливым а злостей своих не престал. Так же и люторы того ж мистра своєго и тыми фортелями пошли, абы всЂх языков писмо вмЂли и им ширмовали...

Сіа книга священноинока Ієвстафія архидіякона. Списана бысть в монастыри Супрясльском, от нароженя сына божія 1580-го.

АНОНІМ

Списаніє против люторов. — Твір дійшов у двох редакціях. Перша — у складі рукопису, що датується 1580 р., друга — в рукопису початку XVII ст.

Передрук твору здійснено у вид.: Попов А. Древнерусские полемические сочинения против протестантов. II. Обличительное списание протне учення протестантов по двум спискам XVI и XVII вєков. — Чтения в императорском обществе истории и древностей российских при Московском университете, 1879, кн. 2, с. 1 — 80; Списание против люторов. — Памятники полемической литературы в Западной Руси. Пб., 1903, кн. 3, ст. 47 — 182.

Подається (уривки першої редакції) за вид.: Попов А. Списание против люторов.

¹ Глаголеть в десятослови ю... — Мається на увазі десять євангельських заповідей.

² ...граде Панеадє.... — місто Панеас. Це стара назва Кесарії Філиппової, що знаходилась у північній Палестині біля підніжжя Єрмону.

³ ...Иуліян нечестивий... — Йдеться про Юліана, римського імператора (361 — 363).

⁴ ...святого Артемия... — Йдеться про сучасника Юліана, якого християнська церква канонізувала як «великомученика».

⁵ ...Афродита и Прупина... — За євангельською легендою, Афродит і Прупін — перські філософи-жерці, які побачили зірку, що вказувала трьом царям шлях у Віфлієм на поклоніння немовляті — Христу.

Головна