Попередня     Головна     Наступна

7. Охранный универсалъ, выданный городу Львову Богданомъ Хмельницкимъ 1657 марта 9.

Богданъ Хмельницкій Гетманъ зъ войскомъ его Царского пресвЂтлого Величества Запорожскимъ. Ознаймуемъ симъ писаніемъ нашимъ каждому, кому o томъ вЂдати належитъ, a меновите: пану Антонови, наказному нашому, и при нимъ будучимъ полковникомъ, ассауломъ, сотникомъ, атаманомъ и залогамъ, по мистамъ будучимъ, всЂмъ старшимъ и черни войска нашего Запорозского и всему нашому товариству. Ижъ якосьмы черезъ першое постановленіе року прошлого мисто Львовъ зо всими обывателями взяли въ свою оборону, обЂчуючи ихъ, поки бы вЂрне ся и водлугъ слова ку намъ преречоного заховывали, одъ всякихъ якъ своего, такъ и чужого войска наЂздовъ заступати; такъ и теперъ сурово приказуемъ, абы ся жаденъ, такъ зъ пЂшихъ, яко и комонныхъ не важылъ ся набЂгати, або произдомъ якимъ колвекъ способомъ, ани въ домахъ шарпати, але овшемъ, абы ся зъ людьми миста Львова якъ зъ власными нашими обходили, до всякого гандля и купецтва не чинячи перешкоды. Иначей гдыбы хто мЂлъ зъ ними поступовати надъ выразное наше росказаніе и тое бы до насъ доношено, сурове таковый каждый безъ фольги и отпусту караный будетъ водлугъ заслуги и учинку своего, бы тежъ и на горли. Данъ въ ЧигринЂ дня 9 марта, року 1657. Богданъ Хмельницкій рука власна.

© Сканування та обробка: Максим, «Ізборник» (http://litopys.kiev.ua)
27.IX.2004

Попередня     Головна     Наступна