Попередня     Головна     Наступна         (Див. також Лаврентіївський літопис)





СЕ ПОВЂСТИ ВРЕМЯНЬНЫХ ЛЂТ,
ОТКУДА ЕСТЬ ПОШЛА РУСКАЯ ЗЕМЛЯ, КТО ВЪ КИЕВЂ НАЧА ПЕРВЂЕ КНЯЖИТИ, И ОТКУДУ РУСКАЯ ЗЕМЛЯ СТАЛА ЕСТЬ





Се начнемъ повЂсть сию.

По потопЂ трие сынове Ноеви раздЂлиша землю, Симъ, Хамъ, Афетъ. И яся въстокъ Симови: Персида, Ватрь, доже и до Индикия в долготу, и в ширину и до Нирокурия, якоже рещи от въстока и до полуденья, и Сурия, и Мидия по Ефратъ рЂку, Вавилонъ, Кордуна, асуряне, Месопотамиа, Аравия СтарЂйшая, Елмаисъ, Инди, Аравия Силная, Колия, Комагини, Финикия вся.

Хамови же яся полуденьная страна: Еюпетъ, Ефивопья, прилежащия ко Индомъ, другая же Ефивопья, из нея же исходить рЂка ефиопьская Чермна, текущи на въстокъ, Фива, Ливия, прилежащи до Куриниа, Маръмарья, Сурьти, Ливия другая, Нумидья, Масурия, Мавританья противу сущи ГадирЂ. Сущимъ же ко востокомъ имать Киликию, Памъфилию, Писидию, Мисию, Лукаонию, Фругию, Камалию, Ликию, Карию, Лудью, Мисию другую, Троаду, Еолиду, Вифунию, Старую Фругию; и островы неки имать: Саръдани, Критъ, Купръ, и рЂку ГЂону, зовемую Нилъ.

Афету же яшася полунощныя страны и западныя: Мидия, Алъванья, Арменьа Малая и Великая, Кападокия, Фефлагони, Галатъ, Кольхись, Воспории, Меоти, Дереви, Сармати, Тавриани, Скуфиа, Фраци, Макидонья, Далматия, Малоси, Фесалья, Локрия, Пеления, яже и Полопонисъ наречеся, Аркадъ, Япиронья, Илюрикъ, СловЂне, Лухитиа, Анъдриокия, ОньдрЂятиньская пучина. Имать же и островы: Вротанию, Сикилию, Явию, Родона, Хиона, ЛЂзовона, Кофирана, Закунфа, Кефалинья, Ифакину, Керькуру, часть Асийскыя страны, нарицаемую Онию, и рЂку Тигру, текущую межю Миды и Вавилономь; до Понетьского моря, на полънощныя страны, Дунай, ДьнЂстръ и Кавкаисинския горы, рекше Угорьски, и оттудЂ доже и до ДнЂпра, и прочая рЂки: Десна, Припеть, Двина, Волховъ, Волъга, яже \24\ идеть на востокъ, в часть Симову. В Афето†же части сЂдять русь, чюдь и вси языци: меря, мурома, весь, моръдва, заволочьская чюдь, пермь, печера, ямь, угра, литва, зимЂгола, корсь, лЂтьгола, любь. Ляхове же, и пруси, чюдь пресЂдять к морю Варяжьскому. По сему же морю сЂдять варязи сЂмо ко въстоку до предЂла Симова, по тому же морю сЂдять къ западу до землЂ Агнянски и до Волошьски. Афетово бо и то колЂно: варязи, свеи, урмане, готе, русь, агняне, галичане, волъхва, римляне, нЂмци, корлязи, веньдици, фрягове и прочие, ти же присЂдять от запада къ полуденью и съсЂдяться съ племянемъ Хамовым.

Сим же и Хамъ и Афетъ, раздЂливше землю, жребьи метавше, не преступати никомуже в жребий братень, и живяху кождо въ своей части. Бысть языкъ единъ. И умножившемъся человЂкомъ на земли, и помыслиша создати столпъ до небесе, въ дни Нектана и Фалека. И собрашася на мЂстЂ Сенаръ поли здати столпъ до небесе и градъ около его Вавилонъ; и созда столпъ то за 40 лЂт, и не свершенъ бысть. И сниде господь богъ видЂти градъ и столпъ, и рече господь: «Се родъ единъ и языкъ единъ». И съмЂси богъ языкы, и раздЂли на 70 и 2 языка, и расъсЂя по всей земли. По размЂшеньи же языкъ богъ вЂтромъ великимъ разраши столпъ, и есть останокъ его промежю Асюра и Вавилона, и есть въ высоту и въ ширину локот 5433 локти, и в лЂта многа хранимъ останокъ.

По размЂшеньи же столпа и по раздЂленьи языкъ прияша сынове Симови въсточныя страны, а Хамови сынове полуденьныя страны. Афетови же прияша западъ и полунощныя страны. От сихъ же 70 и 2 языку бысть языкъ словЂнескъ, от племени Афетова, нарци, еже суть словЂне.

По мнозЂхъ же времянЂх сЂли суть словЂни по Дунаеви, гдЂ есть ныне Угорьска земля и Болгарьска, От тЂхъ словЂнъ разидошася по землЂ и прозвашася имены своими, гдЂ сЂдше на которомъ мЂстЂ. Яко пришедше сЂдоша на рЂцЂ имянемъ Марава, и прозвашася морава, а друзии чеси нарекошася. А се ти же словЂни: хровате бЂлии и серебь и хорутане. Волхомъ бо нашедшемъ на словЂни на дунайския, и сЂдшемъ в них и насилящемъ имъ, словЂни же ови пришедше сЂдоша на ВислЂ, и прозвашася ляхове, а от тЂхъ ляховъ прозвашася поляне, ляхове друзии лутичи, ини мазовшане, ини поморяне.

Тако же и ти словЂне пришедше и сЂдоша по ДнЂпру и нарекошася поляне, а друзии древляне, зане сЂдоша в лЂсЂх; а друзии сЂдоша межю Припетью и Двиною и нарекошася дреговичи; инии сЂдоша на ДвинЂ и нарекошася полочане, рЂчьки ради, яже втечеть въ Двину, имянемъ Полота, от сея прозвашася полочане. СловЂни же сЂдоша около езера Илмеря, и прозвашася своимъ имянемъ, \26\ и сдЂлаша градъ и нарекоша и́ Новъгородъ. А друзии сЂдоша по ДеснЂ, и по Семи, по СулЂ, и нарекошася сЂверъ. И тако разидеся словЂньский языкъ, тЂмже и грамота прозвася словЂньская.

Поляномъ же жившимъ особЂ по горамъ симъ, бЂ путь изъ Варягъ въ Греки и изъ Грекъ по ДнЂпру, и верхъ ДнЂпра волокъ до Ловоти, и по Ловоти внити в Ылмерь озеро великое, из него же озера потечеть Волховъ и вътечеть в озеро великое Нево, и того озера внидеть устье в море Варяжьское. И по тому морю ити до Рима, а от Рима прити по тому же морю ко Царюгороду, а от Царягорода прити в Понтъ море, в не же втечет ДнЂпръ рЂка. ДнЂпръ бо потече из Оковьскаго лЂса, и потечеть на полъдне, а Двина ис того же лЂса потечет, а идеть на полунощье и внидеть в море Варяжьское. Ис того же лЂса потече Волга на въстокъ, и вътечеть семьюдесятъ жерелъ в море Хвалисьское. ТЂмже и из Руси можеть ити по ВолзЂ в Болгары и въ Хвалисы, и на въстокъ доити въ жребий Симовъ, а по ДвинЂ въ Варяги, изъ Варягъ до Рима, от Рима же и до племени Хамова. А ДнЂпръ втечеть в Понетьское море жереломъ, еже море словеть Руское, по нему же училъ святый ОньдрЂй, братъ Петровъ, якоже рЂша.

ОньдрЂю учащю въ Синопии и пришедшю ему в Корсунь, увЂдЂ, яко ис Корсуня близь устье ДнЂпрьское, и въсхотЂ поити в Римъ, и проиде въ вустье ДнЂпрьское, и оттоле поиде по ДнЂпру горЂ. И по приключаю приде и ста подъ горами на березЂ. И заутра въставъ и рече к сущимъ с нимъ ученикомъ: «Видите ли горы сия? — яко на сихъ горах восияеть благодать божья; имать градъ великъ быти и церкви многи богъ въздвигнути имать». И въшедъ на горы сия, благослови я̀, и постави крестъ, и помоливъся богу, и сълЂзъ съ горы сея, идеже послЂже бысть Киевъ, и поиде по ДнЂпру горЂ. И приде въ словЂни, идеже нынЂ Новъгородъ, и видЂ ту люди сущая, како есть обычай имъ, и како ся мыють и хвощются, и удивися имъ. И иде въ Варяги, и приде в Римъ, и исповЂда, елико научи и елико видЂ, и рече имъ: «Дивно видЂхъ Словеньскую землю идучи ми сЂмо. ВидЂхъ бани древены, и пережьгуть е́ рамяно, и совлокуться, и будуть нази, и облЂются квасомъ усниянымь, и возмуть на ся прутье младое, и бьють ся сами, и того ся добьють, одва вылезут лЂ живи, и облЂются водою студеною, и тако ожиуть. И то творять по вся дни, не мучими никимже, но сами ся мучать, и то творять мовенье собЂ, а не мученье». Ты слышаще дивляхуся. ОньдрЂй же, бывъ в РимЂ, приде в Синопию.

Полем же жившемъ особЂ и володЂющемъ роды своими, иже и до сее братьЂ бяху поляне, и живяху каждо съ своим \28\ родомъ и на своихъ мЂстЂхъ, владЂюще кождо родомъ своимъ. И быша 3 братья: единому имя Кий, а другому Щекъ, а третьему Хоривъ, и сестра ихъ Лыбедь. СЂдяше Кий на горЂ, гдЂже ныне увозъ Боричевъ, а Щекъ сЂдяше на горЂ, гдЂже ныне зовется Щековица, а Хоривъ на третьей горЂ, от него же прозвася Хоревица. И створиша градъ во имя брата своего старЂйшаго, и нарекоша имя ему Киевъ. Бяше около града лЂтъ и боръ великъ, и бяху ловяща звЂрь, бяху мужи мудри и смыслени, нарицахуся поляне, от них же есть поляне в Кие†и до сего дне.

Ини же, не свЂдуще, рекоша, яко Кий есть перевозникъ былъ, у Киева бо бяше перевозъ тогда с оноя стороны ДнЂпра; тЂмь глаголаху: на перевозъ на Киевъ. Аще бо бы перевозникъ Кий, то не бы ходилъ Царюгороду; но се Кий княжаше в родЂ своемь, приходившю ему ко царю, якоже сказають, яко велику честь приялъ от царя, при которомь приходивъ цари. Идущю же ему опять, приде къ Дунаеви, и възлюби мЂсто, и сруби градокъ малъ, и хотяше сЂсти с родомъ своимъ, и не даша ему ту близь живущии; еже и донынЂ наречють дунайци городище Киевець. Киеви же пришедшю въ свой градъ Киевъ, ту животъ свой сконча; и братъ его Щекъ, и Хоривъ, и сестра их Лыбедь ту скончашася.

И по сихъ братьи держати почаша родъ ихъ княженье в поляхъ, а в деревляхъ свое, а дреговичи свое, а словЂни свое в НовЂгородЂ, а другое на ПолотЂ, иже полочане. От нихъ же кривичи, иже сЂдять на верхъ Волги, и на верхъ Двины и на верхъ ДнЂпра, их же градъ есть Смоленскъ; туда бо сЂдять кривичи. Таже сЂверъ от нихъ. На БЂлЂозерЂ сЂдять весь, а на Ростовьскомъ озерЂ меря, а на КлещинЂ озерЂ меря же. А по ОцЂ рЂцЂ, где втечеть в Волгу, мурома языкъ свой, и черемиси свой языкъ, моръдва свой языкъ. Се бо токмо словЂнескъ языкъ в Руси: поляне, деревляне, ноугородьци, полочане, дреговичи, сЂверъ, бужане, зане сЂдоша по Бугу, послЂже же велыняне. А се суть инии языци, иже дань дають Руси: чюдь, меря, весь, мурома, черемись, моръдва, пермь, печера, ямь, литва, зимигола, корсь, нерома, либь: си суть свой языкъ имуще, от колена Афетова, иже живуть въ странахъ полунощныхъ.

СловЂньску же языку, якоже рекохомъ, живущю на Дунаи, придоша от скуфъ, рекше от козаръ, рекомии болгаре, и сЂдоша по Дунаеви, и населници словЂномъ быша. Посемь придоша угри бЂлии, и наслЂдиша землю словЂньску. Си бо угри почаша быти пр-Ираклии цари, иже находиша на Хоздроя, царя перьскаго. Въ си же времяна быша \30\ и обри, иже ходиша на Ираклия царя и мало его не яша. Си же обри воеваху на словЂнЂх, и примучиша дулЂбы, сущая словЂны, и насилье творяху женамъ дулЂбьскимъ: аще поЂхати будяше обърину, не дадяше въпрячи коня ни вола, но веляше въпрячи 3 ли, 4 ли, 5 ли женъ в телЂгу и повести обърЂна, и тако мучаху дулЂбы, Быша бо обърЂ тЂломъ велици и умомъ горди, и богъ потреби я, помроша вси, и не остася ни единъ объринъ. И есть притъча в Руси и до сего дне: погибоша аки обрЂ; их же нЂсть племени ни наслЂдъка. По сихъ же придоша печенЂзи; паки идоша угри чернии мимо Киевъ, послЂже при ОлзЂ.

Поляномъ же жиущемъ особЂ, якоже рекохомъ, сущимъ от рода словЂньска, и нарекошася поляне, а деревляне от словЂнъ же, и нарекошася древляне; радимичи бо и вятичи от ляховъ. Бяста бо 2 брата в лясЂх, — Радим, а другий Вятко, — и пришедъша сЂдоста Радимъ на Съжю, и прозвашася радимичи, а Вятъко сЂде съ родомъ своимъ по ОцЂ, от него же прозвашася вятичи. И живяху в мирЂ поляне, и деревляне, и сЂверъ, и радимичи, вятичи и хрвате. ДулЂби живяху по Бугу, гдЂ ныне велыняне, а улучи и тиверьци сЂдяху бо по ДнЂстру, присЂдяху къ Дунаеви. БЂ множьство ихъ; сЂдяху бо по ДнЂстру оли до моря, суть гради их и до сего дне, да то ся зваху от Грекъ Великая скуфь.

Имяху бо обычаи свои, и законъ отецъ своих и преданья, кождо свой нравъ. Поляне бо своих отець обычай имуть кротокъ и тихъ, и стыдЂнье къ снохамъ своимъ и къ сестрамъ, къ матеремъ и к родителемъ своимъ, къ свекровемъ и къ деверемъ велико стыдЂнье имЂху, брачный обычай имяху: не хожаше зять по невЂсту, но приводяху вечеръ, а завътра приношаху по ней что вдадуче. А древляне живяху звЂриньскимъ образомъ, живуще скотьски: убиваху другъ друга, ядяху вся нечисто, и брака у нихъ не бываше, но умыкиваху у воды дЂвиця. И радимичи, и вятичи, и сЂверъ одинъ обычай имяху: живяху в лЂсЂ, якоже и всякий звЂрь, ядуще все нечисто, и срамословье в них предъ отьци и предъ снохами, и браци не бываху въ них, но игрища межю селы, схожахуся на игрища, на плясанье и на вся бЂсовьская пЂсни, и ту умыкаху жены собЂ, с нею же кто съвЂщашеся; имяху же по д†и по три жены. И аще кто умряше, творяху трызну надъ нимъ, и по семь творяху кладу велику, и възложахуть и́ на кладу, мертвеца сожьжаху, и посемь собравше кости вложаху в судину малу, и поставляху на столпЂ на путех, еже творять вятичи и нынЂ. Си же творяху обычая кривичи и прочии погании, не вЂдуще закона божия, но творяще сами собЂ законъ.32

Глаголеть Георгий в лЂтописаньи. «Ибо комуждо языку овЂмъ исписанъ законъ есть, другимъ же обычаи, зане законъ безаконьникомъ отечьствие мнится. От них же первие сирии, живуще на конець земля, законъ имуть отець своих обычаи: не любодЂяти и прелюбодЂяти, ни красти, ни оклеветати, ли убити, ли зло дЂяти весьма. Законъ же и у вактриянъ, глаголеми врахмане и островьници, еже от прадЂдъ показаньемь и благочестьемь мяс не ядуще, ни вина пьюще, ни блуда творяще, никакоя же злобы творяще, страха ради многа и божия вЂры. Ибо я†таче прилежащимъ к нимъ индиом — убийстводЂйици, сквернотворяще, гнЂвливии паче естьства; ли в нутрьнЂйши странЂ ихъ человЂкъ ядуще и страньствующихъ убиваху, паче же ядять яко пси. Етеръ же законъ халдЂемъ и вавилонямъ: матери поимати, съ братними чады блудъ дЂяти, и убивати. И всякое бестудьное дЂянье яко добродЂтелье мнятся дЂюще, любо далече страны своея будуть.

Инъ же законъ гилиомь: жены в них орють, зижуть храми и мужьская дЂла творять, но любы творять елико хощеть, не въздержаеми от мужий своихъ весьма, ли зазрятъ; в нихъ же суть храбрыя жены ловити звЂрь крЂпкыи. ВладЂють же жены мужи своими и добляють ими. Во ВрЂтаньи же мнози мужи сь единою женою спять, и многыя жены съ единымъ мужемъ похотьствують: безаконьная яко законъ отець творять независтьно ни въздержаньно. Амазоне же мужа не имуть, но и аки скотъ бесловесный единою лЂтомъ къ вЂшнимъ днемъ оземьствени будуть; и сочтаются с окрестными мужи, яко нЂкоторое имъ торжьство и велико празденьство время то мнять. От них заченшимъ въ чревЂ, пакы разбЂгнутся отсюду вси. Во время же хотящимъ родити, аще родится отроча, погубять; еще дЂвическъ полъ, то въздоять и прилЂжнЂ въспитають».

Якоже се и при насъ нынЂ половци законъ держать отець своих: кровь проливати, а хвалящеся о семъ, и ядуще мерьтвечину и всю нечистоту, хомЂки и сусолы, и поимають мачехи своя и ятрови, и ины обычая отець своихъ. Мы же, хрестиане, елико земль, иже вЂрують въ святую Троицю, въ едино крещенье, въ едину вЂру, законъ имамъ единъ, елико во Христа крестихомся и во Христа облекохомся.

По сихъ же лЂтЂхъ, по смерти братьЂ сея, быша обидимы древлями и инЂми околними. И наидоша я козарЂ, сЂдящая на горах сихъ в лЂсЂхъ, и рЂша козари: «Платите намъ дань». Съдумавше же поляне и вдаша от дыма мечь, и несоша козари ко князю своему и къ старЂйшшшмъ, и рЂша имъ: «Се, налЂзохомъ дань нову». Они же рЂша имъ: «Откуду?». Они же рЂша: «Въ лЂсЂ \34\ на горахъ, надъ рЂкою ДнЂпрьскою». Они же рЂша: «Что суть въдали?». Они же показаша мечь. И рЂша старци козарьстии: «Не добра дань, княже! Мы ся доискахомъ оружьемь одиною стороною, рекше саблями, а сихъ оружье обоюду остро, рекше мечь. Си имуть имати дань на насъ и на инЂхъ странах». Се же сбыся все: не от своея воля рекоша, но отъ божъя повелЂнья. Яко и при ФаравонЂ, цари еюпетьстЂмь, егда приведоша МоисЂя предъ Фаравона, и рЂша старЂйшина фараоня: «Се хощеть смирити область Еюпетьскую»; якоже и бысть: погибоша еюптяне от МоисЂя, а первое быша работающе имъ. Тако и си: владЂша, и послЂже самЂми владЂють; якоже и быстъ: володЂють бо козары русьскии князи и до днешнего дне.

Въ лЂто 6360 [852], индикта 15, наченшю Михаилу царствовати, нача ся прозывати Руска земля. О семь бо увЂдахомъ, яко при семь цари приходиша Русь на Царьгородъ, якоже пишется в лЂтописаньи гречьстЂмь. ТЂмже отселе почнем и числа положимъ, яко «От Адама до потопа лЂт 2242; а от потопа до Оврама лЂт 1000 и 82, а от Аврама до исхоженья МоисЂева лЂтъ 430; а от исхожениа МоисЂова до Давида лЂт 600 и 1; а от Давида и от начала царства Соломоня до плЂненья Ярусалимля лЂт 448; а от плЂненья до Олексанъдра лЂт 318; а отъ Олексанъдра до рожества Христова лЂт 333; а отъ Христова рождества до Коньстянтина лЂт 318; от Костянтина же до Михаила сего лЂт 542». А от перваго лЂта Михаилова до перваго лЂта Олгова, рускаго князя, лЂт 29; а от перваго лЂта Олгова, понелиже сЂде в КиевЂ, до перваго лЂта Игорева лЂт 31; а от перваго лЂта Игорева до перваго лЂта Святьславля лЂт 33; а от перваго лЂта Святославля до перваго лЂта Ярополча лЂт 28; а Ярополкъ княжи лЂт 8; а Володимеръ княжи лЂт 37; а Ярославъ княжи лЂт 40. ТЂмже от смерти Ярославли до смерти Святополчи лЂтъ 60.

Но мы на прежнее возъвратимся и скажемъ, што ся здЂя в лЂта си, якоже преже почали бяхомъ первое лЂто Михаиломъ, а по ряду положимъ числа.

Въ лЂто 6361 [853].

Въ лЂто 6362 [854].

Въ лЂто 6363 [855].

Въ лЂто 6364 [856].

Въ лЂто 6365 [857].

Въ лЂто 6366 [858]. Михаилъ царь изиде с вои брегомъ и моремъ на болгары. Болгаре же увидЂвше, яко не могоша стати противу, креститися просиша и покоритися грекомъ. Царь же крести князя ихъ и боляры вся, и миръ створи с болгары.

Въ лЂто 6367 [859]. Имаху дань варязи изъ заморья на чюди и на словЂнех, на мери и на всЂхъ кривичЂхъ. А козари имаху \36\ на полянЂх, и на сЂверЂх, и на вятичЂхъ, имаху по бЂлЂ и вЂверицЂ от дыма.

Въ лЂто 6368 [860].

Въ лЂто 6369 [861].

Въ лЂто 6370 [862]. Изъгнаша варяги за море, и не даша имъ дани, и почаша сами в собЂ володЂти, и не бЂ в нихъ правды, и въста родъ на родъ, и быша в них усобицЂ, и воевати почаша сами на ся. И рЂша сами в себЂ: «Поищемъ собЂ князя, иже бы володЂлъ нами и судилъ по праву». И идоша за море къ варягомъ, к руси. Сице бо ся зваху тьи варязи русь, яко се друзии зовутся свие, друзии же урмане, анъгляне, друзии гъте, тако и си. РЂша руси чюдь, словЂни, и кривичи и весь: «Земля наша велика и обилна, а наряда в ней нЂтъ. Да поидЂте княжитъ и володЂти нами». И изъбрашася 3 братья с роды своими, пояша по собЂ всю русь, и придоша; старЂйший, Рюрикъ, сЂде НовЂгородЂ, а другий, Синеусъ, на БЂлЂ-озерЂ, а третий ИзборьстЂ, Труворъ. И от тЂхъ варягъ прозвася Руская земля, новугородьци, ти суть людье ноугородьци от рода варяжьска, преже бо бЂша словЂни. По дву же лЂту Синеусъ умре и братъ его Труворъ. И прия власть Рюрикъ, и раздая мужемъ своимъ грады, овому Полотескъ, овому Ростовъ, другому БЂлоозеро. И по тЂмъ городомъ суть находници варязи, а перьвии насельници в НовЂгородЂ словЂне, въ Полотьски кривичи, в Росто†меря, в БЂлЂ-озерЂ весь, в МуромЂ мурома; и тЂми всЂми обладаше Рюрикъ. И бяста у него 2 мужа, не племени его, но боярина, и та испросистася ко Царюгороду с родомъ своимъ. И поидоста по ДнЂпру, и идуче мимо и узрЂста на горЂ градок. И упрошаста и рЂста: «Чий се градокъ?». Они же рЂша: «Была суть 3 братья, Кий, Щекъ, Хоривъ, иже сдЂлаша градоко сь, и изгибоша, и мы сЂдимъ, родъ ихъ, платяче дань козаромъ». Асколдъ же и Диръ остаста въ градЂ семь, и многи варяги съвокуписта, и начаста владЂти польскою землею, Рюрику же княжащу в НовЂгородЂ.

Въ лЂто 6371 [863].

Въ лЂто 6372 [864].

Въ лЂто 6373 [865].

Въ лЂто 6374 [866]. Иде Аскольдъ и Диръ на греки, и прииде въ 14 лЂто Михаила царя. Царю же отшедшю на огаряны, дошедшю же ему Черные рЂкы, вЂсть епархъ посла к нему, яко русь на Царьгородъ идеть, и вратися царь. Си же внутрь Суду вшедше, много убийство крестьяномъ створиша, и въ двою сотъ корабль Царьградъ оступиша. Царь же едва въ градъ вниде, и с патреярхомъ съ Фотьемъ къ сущей церкви святЂй богородицЂ ВлахЂрнЂ всю нощь молитву створиша, та же божественую святы богородиця ризу с пЂсними изнесъше, в мори скуть омочивше. ТишинЂ сущи и морю укротившюся, абье буря въста с вЂтромъ, и волнамъ вельямъ въставшемъ засобь, \38\ безбожныхъ Руси корабля смяте, и к берегу приверже, и изби я́, яко мало их от таковыя бЂды избЂгнути и въсвояси возъвратишася.

Въ лЂто 6375 [867].

Въ лЂто 6376 [868]. Поча царствовати Василий.

Въ лЂто 6377 [869]. Крещена бысть вся земля Болъгарьская.

Въ лЂто 6378 [870].

Въ лЂто 6379 [871].

Въ лЂто 6380 [872].

Въ лЂто 6381 [873].

Въ лЂто 6382 [874].

Въ лЂто 6383 [875].

Въ лЂто 6384 [876].

Въ лЂто 6385 [877].

Въ лЂто 6386 [878].

Въ лЂто 6387 [879]. Умершю Рюрикови, предасть княженье свое Олгови, от рода ему суща, въдавъ ему сынъ свой на руцЂ Игоря, бЂ бо дЂтескъ вельми.

Въ лЂто 6388 [880].

Въ лЂто 6389 [881].

Въ лЂто 6390 [882]. Поиде Олегъ, поимъ воя многи, варяги, чюдь, словЂни, мерю, весь, кривичи, и приде къ Смоленьску съ кривичи, и прия градъ, и посади мужь свои. Оттуда поиде внизъ, и взя Любець, и посади мужь свои. И придоста къ горамъ хъ киевьскимъ, и увЂда Олегъ, яко Осколдъ и Диръ княжита, и похорони вои в лодьях, а другия назади остави, а самъ приде, нося Игоря дЂтьска. И приплу подъ Угорьское, похоронивъ вои своя, и присла ко Асколду и Дирови, глаголя, яко «Гость есмь, идемъ въ Греки от Олга и от Игоря княжича. Да придЂта к намъ, к родомъ своимъ». Асколдъ же и Диръ придоста, выскакав же вси прочии изъ лодья, и рече Олегъ Асколду и Дирови: «Вы нЂста князя, ни рода княжа, но азъ есмь роду княжа», и вынесоша Игоря: «А се есть сынъ Рюриковъ». И убиша Асколда и Дира, и несоша на гору, и погребоша и́ на горЂ, еже ся ныне зоветь Угорьское, кде ныне Олъминъ дворъ; на той могилЂ поставилъ Олъма церковь святаго Николу; а Дирова могила за святою Ориною. И сЂде Олегъ княжа въ КиевЂ, и рече Олегъ: «Се буди мати градомъ русьскимъ». И бЂша у него варязи и словЂни и прочи, прозвашася русью. Сей же Олегъ нача городы ставити, и устави дани словЂномъ, кривичемъ и мери, и устави варягомъ дань даяти от Новагорода гривенъ 300 на лЂто, мира дЂля, еже до смерти ЯрославлЂ даяше варягомъ.

Въ лЂто 6391 [883]. Поча Олегъ воевати деревляны, и примучивъ а̀, имаше на них дань по чернЂ кунЂ.

Въ лЂто 6392 [884]. Иде Олегъ на сЂверяне, и побЂди сЂверяны, и възложи на нь дань легъку, и не дастъ имъ козаромъ дани платити, рекъ: «Азъ имъ противенъ, а вамъ не чему».

Въ лЂто 6393 [885]. Посла къ радимичемъ, рька: «Кому дань даете?». Они же рЂша: «Козаромъ». И рече имъ Олегъ: «Не дайте козаромъ, но мнЂ дайте». И въдаша \40\ Ольгови по щьлягу, якоже и козаромъ даяху. И бЂ обладая Олегъ поляны, и деревляны, и сЂверяны, и радимичи, а съ уличи и тЂверци имяше рать.

Въ лЂто 6394 [886].

Въ лЂто 6395 [887]. Левонъ царствова, сынъ Васильевъ, иже Левъ прозвася, и брат его Олександръ, иже царствоваста лЂтъ 20 и 6.

Въ лЂто 6396 [888].

Въ лЂто 6397 [889].

Въ лЂто 6398 [890].

Въ лЂто 6399 [891].

Въ лЂто 6400 [892].

Въ лЂто 6401 [893].

Въ лЂто 6402 [894].

Въ лЂто 6403 [895].

Въ лЂто 6404 [896].

Въ лЂто 6405 [897].

Въ лЂто 6406 [898]. Идоша угри мимо Киевъ горою, еже ся зоветь нынЂ Угорьское, пришедъше къ ДнЂпру и сташа вежами; бЂша бо ходяще, аки се половци. Пришедше от въстока и устремишася чересъ горы великия, уже прозвашася горы Угорьскиа, и почаша воевати на живущая ту волохи и словЂни. СЂдяху бо ту преже словЂни, и волохове прияша землю словеньску. Посемъ же угри прогнаша волъхи, и наслЂдиша землю ту, и сЂдоша съ словЂны, покоривше я подъ ся, и оттоле прозвася земля Угорьска. И начаша воевати угри на греки, и поплЂниша землю Фрачьску и Макидоньску доже и до Селуня. И начаша воевати на мораву и на чехи. БЂ единъ языкъ словЂнескъ: словЂни, иже сЂдяху по Дунаеви, их же прияша угри, и морава, и чеси, и ляхове, и поляне, яже нынЂ зовомая русь. Симъ бо первое преложены книги моравЂ, яже прозвася грамота словЂньская, яже грамота есть в Руси и в болгарЂх дунайскихъ.

СловЂномъ живущимъ крещенымъ и княземъ ихъ, Ростиславъ, и Святополкъ, и Коцелъ послаша ко царю Михаилу, глаголюще: «Земля наша крещена, и нЂсть у насъ учителя, иже бы ны наказалъ, и поучалъ насъ, и протолковалъ святыя книги. Не разумЂемъ бо ни гречьску языку, ни латыньску; òни бо ны онако учать, а òни бо ны и онако. ТЂмже не разумЂемъ книжнаго образа, ни силы ихъ. И послЂте ны учителя, иже ны могуть сказати книжная словеса и разумъ их». Се слыша царь Михаилъ, и созва философы вся, и сказа имъ рЂчи вся словЂньскихъ князь. И рЂша философи: «Есть мужь в Селуни, именемъ Левъ. Суть у него сынове разумиви языку словЂньску, хитра 2 сына у него философа». Се слышавъ царь, посла по ня в Селунь ко Львови, глаголя: «Посли к намъ въскорЂ сына своя, Мефодия и Костянтина». Се слышавъ Левъ, въскорЂ посла я̀, и придоста ко цареви, и рече има: «Се прислалася ко мнЂ СловЂньска земля, просящи учителя собЂ, иже бы моглъ имъ протолковати святыя книги; сего бо желають». И умолена быста царемъ, и послаша я̀ въ СловЂньскую землю къ Ростиславу, и Святополку и Къцьлови \42\ Сима же пришедъшема, начаста съставливати писмена азъбуковьная словЂньски, и преложиста Апостолъ и Еуангелье. И ради быша словЂни, яко слышиша виличья божья своимь языкомь. Посем же преложиста Псалтырь, и Охтаикъ, и прочая книги. НЂции же начаша хулити словеньскиа книги, глаголюще, яко «Не достоить ни которому же языку имЂти букъвъ своихъ, раз†еврЂи, и грекъ и латинъ, по Пилатову писанью, еже на крестЂ господни написа». Се же слышавъ папежь римьский, похули тЂх, иже ропьщють на книги словЂньския, река: «Да ся исполнить книжное слово, яко «Въсхвалять бога вси языци»; другое же: «Вси възъглаголють языки величья божья, якоже дасть имъ святый духъ отвЂщевати». Да аще хто хулить словЂньскую грамоту, да будеть отлученъ от церкве, донде ся исправить: ти бо суть волци, а не овца, яже достоить от плода знати я́ и хранитися ихъ. Вы же, чада, божья послушайте ученья и не отрините наказанья церковного, якоже вы наказалъ Мефодий, учитель вашь». Костянтинъ же възратився въспять, и иде учитъ болгарьскаго языка, а Мефодий оста в МоравЂ. Посем же Коцелъ князь постави Мефодья епископа въ Пании, на столЂ святого Онъдроника апостола, единого от 70, ученика святого апостола Павла. Мефодий же посади 2 попа скорописца зЂло, и преложи вся книги исполнь от гречьска языка въ словЂнескъ 6-ю мЂсяць, наченъ от марта мЂсяца до двудесяту и 6-ю день октября мЂсяца. Оконьчавъ же, достойно хвалу и славу богу въздасть, дающему таку благодать епископу Мефодью, настольнику Анъдроникову. ТЂмже словЂньску языку учитель есть Анъдроникъ апостолъ. В Моравы бо ходилъ и апостолъ Павелъ училъ ту; ту бо есть Илюрикъ, его же доходилъ апостолъ Павелъ; ту бо бЂша словене первое. ТЂмже и словеньску языку учитель есть Павелъ, от него же языка и мы есмо русь, тЂмъже и нам руси учитель есть Павелъ, понеже учил есть языкъ словЂнескъ и поставилъ есть епископа и намЂсника по себЂ Андроника словеньску языку. А словеньскый языкъ и рускый одно есть, от варягь бо прозвашася русью, а первое бЂша словене; аще и поляне звахуся, но словеньскаа рЂчь бЂ. Полями же прозвани быши, зане в поли сЂдяху, а язык словенски един.

В лЂто 6407 [899].

В лЂто 6408 [900].

В лЂто 6409 [901].

В лЂто 6410 [902]. Леон царь ная угры на болгары. Угре же, нашедше, всю землю Болгарьску пленоваху. Семионъ же увЂдЂвъ, на угры взвратися, и угре противу поидоша и победиша болгары, яко одва Семионъ въ Деръстръ убежа.

В лЂто 6411 [903]. Игореви же възрастъшю, и хожаше по ОлзЂ и слушаше его, и приведоша ему жену от Пьскова, именемъ Олгу.\44\

В лЂто 6412 [904].

В лЂто 6413 [905].

В лЂто 6414 [906].















Попередня     Головна     Наступна


Етимологія та історія української мови ua_etymology:

Датчанин:   В основі української назви датчани лежить долучення староукраїнської книжності до європейського контексту, до грецькомовної і латинськомовної науки. Саме із західних джерел прийшла -т- основи. І коли наші сучасники вживають назв датський, датчани, то, навіть не здогадуючись, ступають по слідах, прокладених півтисячоліття тому предками, які перебували у великій європейській культурній спільноті. . . . )



Якщо помітили помилку набору на цiй сторiнцi, видiлiть ціле слово мишкою та натисніть Ctrl+Enter.