Попередня     Головна     Наступна

Григорій Бутович

Ευωδια

албо Слодковонный дойзрЂлых в молодом вЂку єго милости господина отца Арсенія Желиборского, з ласки Божеи єпископа лвовского, галиц[кого] и Каменца-Подолского, духовных цнот Запах

През Григорія Бутовича усмакованный а на день урочистый святого великомученика Георгія при щасливом в церкви катедралной лвовской, першого акту рочно[го] отправованю самому ж єго, милости господину отцу єпископу при унижоном поклонЂ отданный и дедикованный.

В ЛвовЂ. В друкарня, с позволенєм братским.

Року 1642 мЂсяця априля 21 дня

На преславный клейнот их милостей панов Желиборских

Барзо в кунштах Марсовых можне суть клейноты,

Котрых собЂ набыли продков твоих цноты,

Цный Желиборских доме, бо косы, схиліоне

Быстро на карк варварскій, носиш наостроне,

Не может оным жаден, бы были скрушены,

Доказати, бо крестом святым суть змоцнены.

Страшлива єст ворогом тєлесным оброна,

Страшлива и душевным на гелмЂ корона,

ПревелебнЂйшему єго милости господину отцу Арсенію Желиборскому, з ласки Божои єпископу лвовскому, галицкому и Каменца-Подолского, пану и пастыру, мнЂ велце милостивому

ВЂкопомна некгдысь старожитность, превелебнЂйшій о ХристЂ пане и пастыру, мнЂ велце милостивый, так великую любов ку порядковой власности мЂла, же над иншіє и велможныє речи, в оной смакуючи, перекладала. А причины тому я слушнЂйшои жаднои быти не розумЂю, тылко долгофортунного помешканя з славою их прагненє. Що и мЂла, бо порядок, душею речій (яко и так єст) называла. И яко оных, любо в поганст†зануренный, єднак в собЂ сам святобливый звычай нЂсл, потомности вЂку велице то собЂ важачи, писмом об’ясняючи, подавали. А так поступуючи, до великого розширеня и славы, так себе самых, яко и отчизны своєи, приходили. Що, кгды бы-м живыми (яко мовять) хотЂл доводити документами, мусЂл бы-м долгого часу на тоє отложити годину.

Але, так короткости оного фолкгуючи, яко теж и щуплость матеріи самои уважаючи, на розсудок уважный чителников пуститися мусить. Которую теды и я, найнижшій в православіи святом, кгды неровно оных болшую до вшеляких обрядков церковных хуть и милость, до скутку юж за ласкою Божою идучую, у превелебности твоєй, на том новощасливом духовного пановання року, углядаю, велице, яко бы от гробу з повсталои, ся тЂшу. А аффект той превелебности вашой святобливый хотЂл бы-м не тылко на свЂт в яво подати, але и до неба вынести, абы мЂл ясноє мЂсце межи планетами. Леч не могу так великого тяжару утлыми довтЂпу моєго поднести раменми. Єднак ведлуг сил моих (моцнЂйших до того възбужаючи) яким-кольвек променем, в том діалектЂ руском свЂту об’ясняю. И тую барзо плохую мою працу, яко задаток до далших услуг моих превелеб[ности] твоєй приношу и офЂрую, тоєи надЂи будучи, же ваша милость мой милостивый пан и пастыр, вдячне принявши, мене, найнижшого з слуг своих, в ласце своєй панской и благословенст†пастырском ховати будеш рачил, до которого на тот час з найнижшим услуг моих поклоном пилне ся залецаю и отдаю.

Превелебности твоєй, мнЂ велце милостивого пана и пастыря, найнижшій служебник Григорій Бутович, студент презацнои Академіи Замойскои.

На годныи хвалы єго милости господина отца Арсенія Желиборского, милостію Божією православного єпископа лвовского, галицкого и Каменца-Подолскаго, душевный скуток, здавна єпархіи єго велице пожаданый

Проодон

Авва непостижимый, Бог предвЂчных вЂков

РозумновЂчною всЂх обдарил чловЂков

Словесною душею, с котрои походить

Єдновласность всЂх смыслов, бовЂм она родить

Найменшіє аффекта, обоих строн мЂры,

Іако то єст горливость, невЂрства и вЂры,

Истность, лож, гнЂв, любов, злость, смуток и веселє,

Жарливоє до каждой речи роспаленє.

Єднак не всЂ: єднакой зроженя натуры,

Любо к єдной належать душевной фикгуры,

Иле єст их в животЂ, розны розных смаки,

Бо теж не єст их аффект заровно єднакій.

Ото: в превелебности твоєй углядаю

Розность тую: из домом на вагу пущаю.

Смак душевный, не єст твой, юж смаку подобный,

Котрый собЂ цукруєт Желибор оздобный.

Істность бовЂм оного в МарсЂ фундована

И в валечной МЂнер†моцно вкгрунтована,

Загоны роспущаєт в свЂтыє дворы,

Летить на высокіє рыцерства гоноры.

Ач тя досыть, на ложу крвавом узброєна

Славы своєй, пристойне носила Белліона,

Кто ми єднак некгуєт, же, для вЂчной славы

И Марсовы вложил-єсть под ноги булавы,

Береш в руки крест Христов, палашем згордивши,

Остроносне убозство пріймуєш, не мЂвши,

Живот, над свЂт зацнЂйшій ,влюбил-єсь законный,

Уродил-єсь ¹, ку матцЂ духовной подобный,

Им’я славы в покорны-сь образ выницовал

Ємпирійского Θрону, бы-сь с паном обцовал.

Пріймеш дар пожаданый, бо тя Бог пробачил

И з дЂтинных лЂт собЂ на службу назначил,

Славным тя в том оршаку учинил рицерем,

Корогви єго бы-сь был моцным кавалєрем,

Орла быстроліотного годность ти даровал,

Под скрыдлами бы-сь тыи завше пташки ховал,

Лебедь, в лЂтєх згрЂбЂлый, котрых ти дойзрЂти

В опекунство оставил: усЂ свои дЂти.

Острожного иж собЂ патрона достала,

Велице ся тЂшить и вдова позостала,

Слезы горкоточныє прудко усушуєт,

КвЂтком сличных запахов иж тя полтым чуєт.

Іавне тя Бог пред всЂми увелбил народы

И учинил филярем своєй огороды,

Годными тя приодЂл зверхности дарами,

Архієрейским чином и в нем гонорами.

Лямпы на кшталт небесной род наш розсвЂчаєш

И всякіи недбалства в нем выкореняєш.

Церкви Божой стал-єсь ся ясноє свЂтило,

Котроє на оризонт лвовскій засвЂтило.

Іож под землю вступили шкодливыє хмуры,

И вихрити престали страшливыє буры,

Ирис бовЂм в сличныє фарбы ся прибрала,

Кришталовый дожч засхлой кревинЂ выляла,

Абы вгору весоло шла, на росквитненє

Миловдячны ховоцов, хтивым в насыченє.

Єст юж овоц, єст зацный, с тоєи кревины,

Новои кгды нащепил господар древины.

Церков Божа юж того с маку заживаєт,

АбовЂм ся в вшеляких порядках зновляєт,

През (твоєи святыни) дойзрЂлыє цноты

Острободныє крушить апостатов кгроты,

Досыть ся насытила по долгим прагненю,

Охолоды дость свойму маєт упаленю,

Лявром твоєй оздобы обточаєт скронЂ

Свои, кгды юж тя видить на столечном ΘронЂ.

Квитни ж, полна лилЂю вонностей духовных,

Оздоровляй запахом розумы уломных!

Геликон ти мой зычить, абы-сь поки Феба

Округ земный престанет заживати з неба,

Поты, на той седячи щасливе столици,

Веселыє простирай в Россіи зреницы.

¹ У першодруці: «Єродіись».

Ода першая на собор

Першій щасливе синод отправуєт

Єпископ лвовскій, кгды рок целебруєт

В церкви столечной, як звычай єст давный,

От Бога данный.

На вырок годный чистои Палляды

Днесь з виридаров, райскіє дріады,

Вдячных запахов вонЂ упросЂте,

Там принесЂте!

И вы, которых в моци єст бобково

Древо триумфу данноє ляврово,

ВЂнець уплетши, дайте му для славы

Духовной справы!

Ту теж, Харитесь, уступивши такта

В своєм спЂваню, прибудте на пакта,

Котрыє пастыр овечкам феруєт

И приказуєт!

Небесныє всЂ нынЂ Орфеове,

И вы прійдЂте там, Аріонове,

Вдячного тону музыку всщинайте

И дзвенк выдайте!

Церковне Музы, в спЂваню цвичоне,

НынЂ оставте на филю пещоне

Жродла крышталне, емпирійской воды,

Злотой породы!

Там єдностайне прудко завитайте,

Архієрея на ΘронЂ витайте,

Где засЂл в колЂ споряжати своЂ

Духовенства роЂ!

Вотуйте хтиве, каждая з вас вота,

Чого єст годна зацна єго цнота;

ВЂм, же зрекнете: склепов емпирійских,

И поль єлизійских.

Вотуйте му в том року святобливым

Порядком быти початком щасливым,

Абы юж завше так ишла безпечна

Рота статечна.

Вотуйте, бы мЂл фавор Зодіаку,

В бЂгу дорочном бы ся тЂшил з знаку,

Бы ведлуг єго ходила аспекта

Кажда планета.

Вотуйте, бы мЂл сатурнусовыми

Земный урожай часы золотыми

Приоздобленный, к тому господыню —

Церес-богиню.

Вотуйте, бы теж мЂл Ксенофиліово

Сталне здоров’є и Поликратово

Щастьє в пожитю: лЂта Пріамовы,

Люб Несторовы.

Дайте му вырок з уст своих коралных,

Зычачи зборов в своєй єнералных

Діоцезіи; отправлять щасливе

И святобливе.

Нехай Арсеній, Богом пастыр данный

И Лвовской ново столици выбранный,

Чулый становить способ овцам рядный

В своєй овчарнЂ.

Нехай порядне их ушиковавши,

И богу з оных добрый зыск отдавши,

Станет ся годным небесного Θрону,

ВЂрный Сіону.

Ода вторая до духовных

ВзыйдЂте всЂ днесь Сіонскіи зори,

Омывши темность в Роксолянском мори,

А тварь на себе ясную вложЂте

И засвЂтЂте.

АбовЂм Юно в Ємпиру злоцистым

Юж запалила променем огнистым

Лямпу новую словенского двору,

Из Желибору.

Котрая русскій на оризонт впала,

Зодіак лвовскій собі зпановала,

Вы курс дорочный ку ней навернЂте,

СвЂтлость берЂте.

Навчиться бЂгу от неи нового,

Як не зблудити от пути правого,

Тая вам будет додавать помочи

Темнои ночи.

Тая роспудить страшливыє хмуры,

Тая ускромить вихристыє буры,

Тая вам будет тихою пристаню

В быстрым плываню.

Тая вам коло обернет до неба

Ємпирійского й приведет до Феба,

Жебы-сте вЂчной радости достали

И там зостали.

Ода до презацных родичов его милости отца єпископа

Презащный доме Желиборских секты, Кгды поглядаю на твои аспекты, Барзо высоко уступил-єсь кроку От мого зроку.

Фамиліи

Яко недопыр ку слонечной зари

Своєй не может обернути твари,

Так я не могу прибрать собЂ ноты

На твои цноты.

Леч, люб не єст-єм островидз в той мЂрЂ,

Єднак ми милость ку отчистой вЂрЂ,

Котрую маєш, на Кретовы очи

Даєт помочи.

АбовЂм так-єсь в оной засмаковал,

Же-сь и здоров’я з сумптом не жаловал,

Як бы мутныє очистил-єсь здроЂ

Церкви святоЂ.

Спосродку-сь себе вынурыл Стефана,

Власне, бы Θара пред тым Авраама,

Котрый му в вЂрє, во всем єст подобный

И в дары гойный.

Авраам в собЂ мЂл такую вЂру,

Же Иссака хотЂл на офЂру

Отдати Богу, в надЂи другого,

Люб мЂл єдного.

Стефан кгды в новой ласцЂ обфитуєт,

Андрея в закон Христу офЂруєт,

Не поглядаєт на потомне сыны,

Єго кревины.

З свЂцкой оздобы єго розвлЂкаєт

И вор духовной жалобы вкладаєт —

ТЂло вбогому велможноє духу

Подаєт в скруху.

Ведет, бы на смерть скромного баранка,

Милого сына, сам отець и матка.

Он теж родичов зараз ся зрЂкаєт,

СвЂту вмираєт.

Чинить им досыть в хоти святобливой,

Бы не росквилил старости шедивой,

Берет охотне духовную зброю,

Идет до бою.

О щасливы-сте, родичове мили,

Же-сте в такую войну выправили,

С котрои лупы вЂчныє походять

И свЂт оздобять.

Щасливый замысл, котрый єсте мЂли,

Бы-сте в том станЂ сыначка видЂли:

Щасливый струмень слез, през вас вылляный,

Кгды был обраный.

Ото тропами смЂх за плачем ходить,

Который радость в серцу вашом родить,

Кгды в єпископской тепер єго скронЂ

Зрите коронЂ.

Що уже мЂвши, аффект угасЂте,

Сами ся з єго в духу отродЂте,

Бы-сте в овчарнЂ єдной огороды

Жили, род в роды.

ПРИМІТКИ

Григорій Бутович

Григорій Бутович (роки народження і смерті не відомі) — вихованець Замойської академії; у 1642 р. видав панегірик «Еводія...», присвячений львівському православному єпископу Арсенію Желиборському; можливо, йому ж належить кількаа анонімних геральдичних епіграм у львівських стародруках.

Ευωδια албо Слодковонный дойзрЂлых в молодом вЂку єго милости господина отца Арсенія Желиборского, з ласки Божеи єпископа лвовского, галиц[кого] и Каменца-Подолского, духовных цнот Запах, през Григорія Бутовича усмакованный а на день урочистый святого великомученика Георгія при щасливом в церкви катедральной лвовской першого акту рочно[го] отправованю самому ж єго милости господину отцу єпископу при унижоном поклонЂ отданный и дедикованный. — В ЛьвовЂ: В друкарни, c позволенєм братским, року 1642 мЂсяца априля 21 дня. — Львів: Друкарня братства, 1642. — 4°. — 10 арк. (див.: Запаско, Ісаєвич. — № 296.)

Публікація: Студинський К. Три панегірики XVII віку // ЗНТШ. — 1896. — Кн. 4 — С. 1 — 32.

Подається за першодруком (примірник ЛДМУМ).

Попередня     Головна     Наступна