‹‹   Головна     Переклад     Див. повний текст літопису за Іпатським списком

ГАЛИЦЬКО-ВОЛИНСЬКИЙ ЛІТОПИС

[Іпатіївський список. За виданням:
Галицко-Волынская летопись (подг. О.П.Лихачевой) / ПЛДР: XIII век. — М., 1981. — 236-425.]
Див. також: Галицько-Волинський літопис за Острозьким списком.

В лЂто 6709 [1201] начало княжения великаго князя Романа, како державего бывша всей Руской земли князя галичкого.

По смерти же великаго князя Романа, приснопамятнаго самодержьца всея Руси...

ОдолЂвша всимъ поганьскымъ языком ума мудростью, ходяша по заповЂдемь божимъ: устремил бо ся бяше на поганыя, яко и левъ, сердитъ же бысть, яко и рысь, и губяше, яко и коркодилъ; и прехожаше землю ихъ, яко и орелъ, храборъ бо бЂ, яко и туръ. Ревноваше бо дЂду своему Мономаху, погубившему поганыя измаилтяны, рекомыя половци, изгнавшю Отрока во обезы, за ЖелЂзныя врата, Сърчанови же оставшю у Дону, рыбою оживъшю. Тогда Володимерь и Мономахъ пилъ золотом шоломомъ Донъ, и приемшю землю ихъ всю и загнавшю оканьныя агаряны. По смерти же ВолодимерЂ оставъшю у Сырьчана единому гудьцю же Ореви, посла и во обезы, река: «Володимеръ умерлъ есть. А воротися, брате, поиди в землю свою. Молви же ему моя словеса, пой же ему пЂсни половЂцкия. Оже ти не восхочеть, дай ему поухати зелья, именемь евшанъ». Оному же не восхотЂвшю обратитися, ни послушати, и дасть ему зелье. Оному же обухавшю, и восплакавшю, рче: «Да луче есть на своеи землЂ костью лечи, и не ли на чюже славну быти». И приде во свою землю. От него родившюся Кончаку, иже снесе Сулу пЂшь ходя, котелъ нося на плечеву.

Роману же князю ревновавшю за то, и тщашеся погубити иноплеменьникы.

...велику мятежю воставшю в землЂ Руской, оставившима же ся двЂима сынома его: единъ 4 лЂт, а другии дву лЂтъ.

Въ лЂто 6710 [1202]. Собравшю же Рурику половци и руси много, и приде на Галичь, оставивъ мниский чинъ, бЂ бо приялъ боязни ради Романовы. И пришедшю ему на Галичь, и срЂтоша и бояре галичкыи, и володимерьстии, у Микулина на рЂцЂ СеретЂ, и бившимася има всь днь о рЂку Сереть, и мнози язвени быша, и не стерпЂвше, и възвратишася в Галичь. И пришедшю же Рюрику в Галичь, и не успЂвши ничтоже.

За то бЂ по смерти Романо†снимался король со ятровью своею во СаноцЂ. Приялъ бо бЂ Данила, како милога сына своего, оставил бо бЂ у него засаду: Мокъя великаго слепоокого, и Корочюна, Вълпта, и сына его Витомира, и Благиню, иныи угры многи. И за то не смЂша галичанЂ ничтоже створити, бЂ бо инЂхъ много угоръ.

Тогда же два князя половЂцкая Сутоевича Котянь и Сомогуръ поткоста на пЂшьцЂ, и убьена быста коня под ними, и за мало ихъ не яша.

Рюрикъ же воротися Кыеву.

Малу же времени минувшю, и приведоша Кормиличича, иже бЂ загналъ великый князь Романъ не вЂры ради: славяху бо Игоревича. Послушав же ихъ галичкыи бояре, и послаша по нихъ, и посадиша и: в ГаличЂ Володимера, а Романа во ЗвенигородЂ.

Княгини же Романовая, вземше дЂтятЂ свои, и бЂжа в Володимерь. И еще же хотящю Володимеру искоренити племя Романово, поспЂвающимъ же безбожнымъ галичаномъ. Посла же Володимеръ со свЂтомъ галичкых бояръ, на рЂчь е попомъ, к Володимерцемь, рекы имъ: «Не имать остатися градъ вашь, аще ми не выдасте Романовичю, аще не приимете брата моего Святослава княжити в ВолодимерЂ». Володимерцемъ же хотящимъ убити попа, Мьстьбогъ и Мончюкъ, и Микифоръ и рЂша: «Не подобаеть намъ убити посла». ИмЂяху бо лесть во сердцЂ своемь, яко предати господу свою и градъ. Спасенъ же ими бысть попъ.

НаутрЂя же увЂдавши княгини, и свЂтъ створи с Мирославомъ и с дядькомъ, и на ночь бЂжаша в Ляхы. Данила ж возмя дядька передъ ся изииде изъ града. Василка же Юрьи попъ с кормилицею возмя, изыиде дырею градною, не вЂдяху бо, камо бЂжаще, бЂ бо Романъ убьенъ на ляхохъ, а Лестько мира не створилъ. Богу же бывшю поспЂшнику: Лестко не помяну вражды, но с великою честью прия ятровь свою и дЂтятЂ, сожаливъ си и рече, яко: «Дьяволъ есть воверглъ вражду межи нами». БЂ бо Володиславъ лестя межи има и зазоръ имЂя любви его.

Въ лЂто 6711 [1203]. Данило посла Лестъко во Угры и с нимъ послалъ посолъ свои Вячеслава Лысого, рекы королеви: «Язъ не помянухъ свады Романовы. ТобЂ бо другъ бЂ. Клялася бо бЂста, яко оставшю в животЂ племени его, любовь имЂти. НынЂ же изгнание бысть на них. НынЂ же идемь, и вземша предае†имъ отчьство ихъ». Король же си словеса приимъ, сжалиси о бывшемь, остави же Данила у себе, а Лестько княгиню и Василка у себе.

Володимеръ же многи дары посла королеви и Лестькови.

По сем же долгу времени минувшю, мятежь бысть межи братома и Володимеромъ и Романомъ. Роман же Ђха во Угры и бися с братомъ и побЂди въза Галичь, а Володимеръ бЂжа во Путивль.

Въ лЂто 6712 [1204]. Возведе Олександръ Лестька и Конъдрата. Придоша ляхо†на Володимеръ. И отвориша имъ врата володимерци, рекуще: «Се сыновець Романови». Ляхо†поплЂниша городъ весь. Олександру молящюся Льстькови о останцЂ града и о церкви святЂй Богородици. Твердымъ же бывшимъ дверемь, не могоша исЂчи, донележе Лестько приЂха и Конъдратъ, и возбиста ляхы своя ти. Тако спасена бысть церкви, и останокъ людии. И жаляхуся володимерци, емше имъ вЂры и присязЂ ихъ: «Аще не был бы сродникъ ихъ с ними Олександръ, то не перешли быша ни Буга».

Святослава же яша и ведоша и в Ляхы. Олександръ же сЂде в ВолодимерЂ. Тогда же яша Володимера Пиньскаго. БЂ бо Инъгваръ с ляхы и Мьстиславъ. Потом же сЂде Инъгваръ в ВолодимерЂ. Поя у него Лестько дщерь и пусти, иде же ко Орельску.

И приЂха берестьяне ко Лестькови и просиша Романовыи княгини и дЂтии, бЂаста бо млада сущи. И вдасть имъ, да владЂеть ими. Они же с вЂликою радостью срЂтоша и, яко великаго Романа жива видящи.

Потом же Олександръ живяше въ БЂлзЂ, а Инъгваръ в ВолодимерЂ, бояром же не любящим Инъгвара. Олександръ же свЂтомъ Лестьковым прия Володимерь. Княгини же Романовая посла Мирослава ко Лестькови глаголющи, яко: «Сий всю землю нашю и отчину держить, а сынъ мой во одиномъ Берестьи». Олександръ прия Угровескъ, Верещинъ, Столпъ, Комовь и да Василкови Белзъ.

Въ лЂто 6713 [1205]. Олександру сЂдящю в ВолодимерЂ, а брату его Всеволоду в ЧервьнЂ, литва же и ятвЂзЂ воеваху, и повоеваша же Турискъ и около Комова, оли и до Червена, и бишася у воротъ Червенескых, и застава бЂ Уханяхъ. Тогда же убиша МатЂя, Любова зятя, и Доброгостя, выехавша у сторожа. БЂда бо бЂ в землЂ ВолодимерьстЂй от воеванья литовъского и ятвяжьскаго. Мы же на преднее возвратимся, случившихся в ГаличЂ.

АндрЂй же и король увЂдивъ безаконье галичкое и мятежь, и посла Бенедикта со воими, и я Романа в бани мыющася и посла и во Угры.

БЂ бо ТимофЂй в ГаличЂ премудръ книжникъ, отчество имЂя во градЂ КыевЂ. Притчею рече слово о семь томители БЂнедиктЂ, яко: «В послЂдняя времена тремя имены наречется антихристъ». БЂгаше бо Тимофей от лиця его. БЂ бо томитель бояромъ и гражаномъ. И блудъ творя и оскверняху жены же и черници и попадьи. В правду бЂ антихристъ за скверная дЂла его.

Въ лЂто 6714 [1206]. Приведоша же галичане Мьстислава на Бенедикта. И прииде к Галичю, и не успЂвшю ему ничто же. Щепановичь Илия возведъ и на галицину могилу, осклабився, рече ему. «Княже, уже еси на галицини могилЂ посЂдЂлъ, тако и в ГаличЂ княжилъ еси». СмЂяху бо ся ему, воротися в Пересопницю. И по семь скажемь о галицинЂ могылЂ, и о начатьи Галича, откуду ся почалъ.

Роман же утече изъ Угоръ. И послаша галичанЂ ко брату его Володимеру глаголюще: «СгрЂшихомъ к вамъ. Избави ны томителя сего Бенедикта». Они же поидоша ратью, а Бенедиктъ бЂжа во Угры. Седе же Володимеръ в ГаличЂ, а Романъ во ЗвенигородЂ, а Святославъ в Перемышли, а сыну своему да Теребовль Изяславу, а Всеволода сына своего посла во Угры ко королеви с дары.

Данилови сущю во УгрЂхъ, король же АндрЂи и боярЂ угорь стЂи и вся земля хотяше дати дщерь свою за князя Данила, обЂима дЂтьскома бывшима, зане сына у него не бЂ.

В лЂто 6715 [1207]. Убьенъ бысть царь великыи Филипъ Римьскыи совЂтомъ брата королевое. Моляшеся сестрЂ, да бы ему нашла помощника. Она же никако могущи помощи брату своему си, и да дщерь свою за лонокрабовича за Лудовика. БЂ бо мужь силенъ и помощникъ брату ее. Юже нынЂ святу нарЂчают именемь Алъжьбитъ, преднее бо имя ей Кинека, много бо послужи богови по мужи своемь, и святу нарЂчають. Но мы на преднее возвратимся, якоже преже почали быхомъ.

Въ лЂто 6716 [1208]. СъвЂтъ же створиша Игоревичи на бояре галичкыи, да избьють. И по прилучаю избьени быша, и убьенъ же бысть Юрьги Витановичь, Илия Щепановичь, инии велиции бояре. Убьено же бысть ихъ числомъ 500, а инии разбЂгошася.

Володиславъ же Кормиличичь бЂжа во Угры, и Судиславъ, и Филипъ. Наидоша Данила во Угорьской землЂ дЂтъска суща и просиша у короля угорьского: «Дай намъ отчича Галичю Данила, атъ с нимъ приимемь и от Игоричевъ». Король же с великою любовью посла воевъ в силЂ тяжцЂ, и великого дворьского Пота, поручивъ ему воеводьство надо всими воими. Имена же бывши воеводамъ с ним: первый Петръ Туровичь, вторый Банко, трети Мика Брадатый, четвертый Лотохаротъ, пятый Мокъянъ, шестый Тибрець, седмы Мароцелъ, и инии мнозии, ихже не мощно сказати и ни писати.

И совокупившеся вси. Первое придоша на град Перемышль. И пришедши же Володиславу ко граду и рече имъ: «Братье, почто смышляетеся? Не сии ли избиша отци ваши и братью вашю? А инЂи имЂние ваше разграбиша, и дщери ваша даша за рабы ваша! А отчьствии вашими владЂша инии пришелци! То за тЂхъ ли хочете душю свою положити?». Они же сжалившиси о бывшихъ, предаша градъ и князя ихъ Святослава яша.

Оттуду же проидоша ко Звенигороду. Звенигородцемь же лютЂ борющимся имъ с ними и не пущающимъ ко граду, ни ко острожнымъ вратомъ, онем же стоящимъ окрестъ града.

Василку же княжащю во БелзЂ, и приидоша же от него великий Вячеславъ Толъстый и Мирославъ и Дьмьянъ и Воротиславъ, инии бояре мнозЂ и вои от Белза, а от Лестка из Ляховъ Судиславъ Бернатовичь со многими поляны, и от Пересопници приде Мьстиславъ Немый со многими вои, Олександръ с братомъ от Володимеря со многими воими. Инъгваръ же посла сына своего из Лучька, из Дорогобужа со многими вои и Шюмьска.

И приЂхаша же и половци Романови на помощь, Изяславъ с ними Володимеричь. Угром же не побЂдившимъ воемь, и гнаша со становъ своихъ. Мика же убоденъ и Тъбаша и главу ему стялъ. Половци же узрЂвшимъ е крЂпци налегоша на ня. Онем же Ђдущимъ напред ними к Лютой рЂцЂ, оже быша не приЂхалЂ ляхо†и русь. И сошедше одва препровадиша рЂку Лютую, половцемъ стрЂляющимъ и руси противу имъ. Ту же Марцелъ хоругве своее отбЂже, и русь взятъ ю, и поругъ великъ бысть Марцелови. И возвратишася во колымагы свои, и рекше во станы.

ОттудЂ же Романъ изииде из града, помощи ища в рускыихъ князехъ. И бывшю ему Шумьскы на МосцЂ, ятъ бысть Зернькомь и Чюхомою и приведенъ бысть во станъ ко князю Данилови и ко всимъ княземь и к воеводамъ угорьскимъ. И послаша ко гражаномъ рекуще: «Предайтеся, князь вашь ятъ бысть». ОнЂмо же не имущимъ вЂры, донележе извЂсто бысть имъ, и предашася звенигородьци.

Оттуду же поидоша к Галичю. И Володимеръ бЂжа из Галича и сынъ его Изяславъ, и гнаша и до НЂзды. Изяслав же бися на мЂстЂ Незды рЂкы, и отъяша от него коня сумныя, потом же возвратишася в Галичь.

Тогда же приЂха княгини великая Романовая видитъ сына своего присного Данила. Тогда же бояре володимьрьстии и галичкыи и Вячеславъ Володимерьскый и вси бояре володимерьстии и галичкыи и воеводы угорьскыя и посадиша князя Данила на столЂ отца своего великаго князя Романа во церькви святЂя Богородица приснодЂвица Марья.

Король же АндрЂи не забы любви своея первыя, иже имЂяше ко брату си великому князю Романови, но посла воя своя и посади сына своего в Галичи. Ятым же бывшим княземь Роману, Святославу, Ростиславу, угромъ же хотящемь е вести королеви. Галичаномъ же молящимся имъ, да быша и повЂсили мьсти ради. УбЂжени же бывше угре великими даръми, предани быша на повЂшение месяца сентября.

Данилу же княжащю в Галичи, тако младу сущу, яко и материи своеии не позна. Минувшю же времени галичанЂ же выгнаша Данилову матерь изъ Галича. Данилъ же не хотЂ оставити матери своей и плакашеся по ней, младъ сый. И приЂхавъ Олександръ, тивунъ Шюмавиньскый, и я и за поводъ. Онъ же измокъ мечь, тя его, и потя конь его подь нимь. Мати же вземьши мечь из руку, умоливше его, остави в Галичи, а сама иде в Белзъ, оставивши и у невЂрных галичанъ, Володиславлимъ свЂтомъ — хотяща бо княжити сама, УвЂдавъ король о изгнаньи ея, съжалиси.

Въ лЂто 6717 [1209]. Приде король в Галичь и приведе ятровь свою великую княгиню Романовую и бояре Володимерьскыи, и Инъгваръ приде из Лучска, инии князи. СвЂтъ створи со ятровью своею и с бояры володимерьскыми, рече: «Володиславъ княжится, а ятровь мою выгналъ». Яту же бывшю Володиславу и Судиславу и Филипу и мучену бывшю. И много имЂния давъ, Судиславъ же во злато пременися, рекше, много злата давъ избавися. Володислава же оковавше, ведоша и во Угры. Володиславу же ведену бывшю во Угры, Яволоду и Ярополку, брату его, бежавшю в Пересопъницю ко Мьстиславу, возведшемъ Мьстислава. И приде Мьстиславъ с ними ко Бозъку. ГлЂбъ же Потковичь избЂже изъ Бозку. И Станиславичь Иванко и братъ его Збыславъ прибЂгоша в Галичь, повЂдающе рать и оступление галичанъ. Княгини же Романовая сыномъ своим Даниломъ и с Вячеславомъ Толъстымъ бЂжавша во угры, а Василко с Мирославомъ ехаша во Белзъ. Времени же минувшю, король спЂашеть рать велику.

Въ лЂто 6718 [1210]. Приде Лестъко к Белзу, убЂженъ Александромъ, Олександръ же не прияше, хотя зла Романовичемь. И прия Белзъ, и да Олександрови, а бояре не изневЂришася, но идоша вси со княземь Василкомъ в КаменЂць.

Король же пусти Володислава, и собра много вои и иде на Галичь. Ставше же во манастырЂ ЛелесовЂ, невЂрнии же боярЂ хотЂша его убити.

И убиша же жену его, а шюринъ его одва утече, патрЂархъ АвлЂскый, и мнозии нЂмци избити быша. И потомъ королеви обратившюся, мнозЂ избити быша, а другия разбЂгошася. Мятежю же бывшю, королеви не могшю въйны учинити за безаконие ихъ.

Володиславу же Ђхавшю на передъ со всЂми галичаны. Мьстиславъ убо увЂдавъ королеву рать великую, избЂжа из Галича. Володиславъ же воЂха в Галичь и вокняжися и сЂде на столЂ.

Данилъ же отъиде с матерью своею в Ляхи, отпросився от короля. Лестько же прия Данила с великою честью. И оттуда же иде в Каменець с матерью си, братъ же его Василко и бояре вси срЂтоша и с великою радостью.

В лЂто 6719 [1211]. Княжаше Всеволодъ в Кые†Святославичь, имЂя велику любовь к детемь Романовое.

Потом же Мьстиславъ Пересопницкый, посадивъ Лестька, поиде в Галичь. Лестько же поя Данила ис Каменца, а Олександра из Володимера, а Всеволода из Белза, когождо ихъ со своими вои. БЂ бо вои Даниловъ болши и крЂплЂйши, бяху бояре велиции отца его вси у него. Видивъ бо Лестько се, и поча имЂти любовь велику ко князю Данилу и брату его Василку.

Затворившю же ся Ярополку и Яволоду в Галичи, а Володиславъ выеде съ угры и чехы своими, и собравъся с галичаны, и приде на рЂку Бобръку. УвЂдавъ Лестко и посла на него ляхы, а от Данила же — Мирослава и Дьмьяна, а от Мьстислава — ГлЂбъ ЗеремЂевичь и Прокопьичя Юрья.

Бывши же сЂчи велицЂ, и одолЂша ляхо†и русь. Данилу же тогда дЂтьску сущю, якоже можяше на конЂ Ђздити. А Володиславъ бЂжа мнозии избити от вои его. И потом же Лестько не можаше прияти Галича, но шедъ воева около Теребовля и около Моклекова и Збыража. И Быковенъ взятъ бысть ляхи и русью. И взя плЂнъ великъ и воротися в Ляхы.

Потом же Данило и Василко Лестьковою помощью прияста Тихомль и Перемиль от Олександра и княжаста с матерью в немь. А на Володимерь зряща: «Се ли, ово ли, Володимерь будеть наю, божиею помощью», на Володимерь призирающа.

Потом же король поиде на Лестька, Данилови же у Лестка сущю. Лестько же посла посла своего ЛЂсътича и Пакослава воеводу, рекый: «Не есть лЂпо боярину княжити в Галичи, но поими дщерь мою за сына своего Коломана и посади и в Галичи». Улюби же король АндрЂй свЂто сь Пакославль и сняся съ Лестькомъ во Зъпиши, и поя дщерь его за сына си. И пославъ и я Володислава в Галичи, заточи и; и в томь заточеньи умре: нашедъ зло племени своему и дЂтемь своимъ княжения дЂля. Вси бо князи не призряху дЂтии его того ради.

Король посади сына своего в Галичи, а Лестькови да Перемышль, а Пакославу Любачевъ. Пакославъ бо бЂ приятель и Романовой и дЂтемь ея. СвЂтом же Пакославлимъ Лестько посла ко Александрови, рекый: «Дай Володимерь Романовичема, Данилови да Василькови. Не даси ли, иду на тя и с Романовичема». Оному же не давшю, Лестько же посади Романовича в Володимери.

Въ лЂто 6720 [1212]. Король отъя Перемышль от Лестька Любачевъ. Лестько же сжалиси о срамотЂ своей и посла к Новугороду по Мьстислава и реки: «Брать ми еси. Поиди и сяди в ГаличЂ». Мьстислав же поиде на Галичь со свЂтомь Лестьковымъ. Галичани же вси и Судиславъ послашася по Данила.

Данил же не утяже Ђхати, а Бенедиктъ Лысы бЂжа во угры со Судиславомъ, а Мстиславъ седе в Галичи.

Въ лЂто 6721 [1213]. Поя у него Данилъ дщерь именемь Анну и родишася от нея сынови и дщери. ПервЂнЂць бо бЂ у него ИраклЂй, по нем же Левъ и по немь Романъ, Мистиславъ, Шеварно и инии, бо млади отъидоша свЂта сего.

Времени же минувшю еха Данилъ ко Мьстиславу в Галич, рекы на Лестька, яко: «Отчину мою держить». Оному же вЂщавшю: «Сыну, за первую любовь не могу на нь востати; а налЂзи собЂ други».

Данилу же возвратившуся к домови, и Ђха с братомъ, и прия Берестий, и Угровескъ, и Верещинъ, и Столпъ, Комовъ, и всю украину.

Лестько же великъ гнЂвъ имЂя на Данилу. ВЂснЂ же бывши, и Ђхаша ляхо†воевать, и воеваша по Бугу. И посла по нихъ Данилъ Гаврила Душиловича и Семена Олуевича, Василка Гавриловича, и биша и до Сухое Дорогве, и колодники изымаша, и возвратишася в Володимерь с великою славою.

Тогда же Климъ убьенъ бысть Хрьстиничь, един от всихъ его воинъ, его же крестъ и донынЂ стоить на Сухой Дорогви.

Ляхы же многи избиша и гнаша по нихъ до рЂкы Вепря.

Льстькови же творящи, Мьстиславлимъ свЂтомъ Данилъ приялъ есть Берестии, Лестько же посла ко королеви: «Не хочю части в Галичи, но дай его зяти моему». Король же посла вои многи и Лестко, и придоша к Перемышлю. Яронови же тогда тысящю держащю в Перемышли, избЂже передь ними.

Мьстиславъ бо †со всими князьями рускыми и Черниговьскыми. И посла Дмитра, Мирослава, Михалка ГлЂбовича противу им к Городку. Городокъ бо бЂ отложилъся; бяхуть в немь людье Судиславли. И Дмитрови бьющися подъ городомъ, придоша на нь угре и ляхове, и побЂже Дмитръ. Тогда же и Василь дьякъ, рекомый Молза, застрЂленъ бысть подъ городомъ. Михалка же Скулу убиша, согонивше на ШирЂцЂ, а главу его сосЂкоша, трои чепи сняше золоты и принесоша главу его ко Коломанови.

Мьстиславу же стоящу на Зубрьи. Дмитръ прибЂже к нему. Мьстиславу же не могшу биться съ угры и просяше зятя своего Данила и Олександра, да быста затвориласта в ГаличЂ. ОбЂщася ему Данилъ и Лександръ ити в Галичь. Данилъ же затворися в ГаличЂ, а Олександру не смЂвъшю.

Тогда же великая княгини Романовая восприимши мниский чинъ.

Потом же приде рать подъ городъ, Каломан и ляховЂ. И многу бою бывшю на Кровавомъ броду, и паде на ня снЂгъ, не могоша стоояти, идоша за Рогожину, идоша на Мьстислава, и прогнаша и земли.

Мьстиславу же повЂдавшю Данилови: «Изииди из града». Данилъ же изииде с Дмитромъ тысячькым и с ГлЂбомъ ЗеремЂевичемь и со Мирославомъ. Изиидоша из града и быша противу Толмачю, угони и невЂрный Витовичь Володиславъ. Наворотившеся на нь, и прогнаша и, и коня от него отъяша.

Данилъ бо младъ бЂ, и видЂвъ ГлЂба Зеремиевича и Семьюна Кодьниньского мужескы Ђздяща, и приЂха к нима, укрЂпляя и. И инии же устрьмилися бяхуть на бЂгъ.

Того же дни бишася всь днь олнЂ до нощи. Тое же нощи увернушася Данилъ и ГлЂбъ ЗеремЂевичь, яста Яньца, младъ сы показа мужьство свое. И всю нощь бистася. НаутрЂя же угони и ГлЂбъ Василевичь. Уверьнувше же ся Данилъ на нь, и гна и дале поприща. Оному же утекши пред нимъ, борзости ради коньское. Данилови же возвратившюся, и единому едущю межи ими, онем же не смЂющимъ наЂхати на нь, донележе взъеха к нему ГлЂбъ Судиловичь, и Гаврило Иворович, и ПеренЂжько.

Оттуду проидоша в Онутъ и идоша в поле. Бывъшю же гладу велику. Поидоша вози и къ Плаву на канун святаго ДмитрЂя. Вземше возы накормишася изобилно и похвалиша бога и святаго ДмитрЂя, яко накорми я. Оттуду же придоша ниже Кучелемина, мысляще, кудЂ преити рЂку ДнЂстръ. Божиею же милостию придоша лодья из Олешья, и приЂхаша в нихъ на ДнЂстръ, и насытишася рыбъ и вина.

Оттуду же приЂха Данилъ ко Мьстиславу. Мьстиславъ же великую похвалу створи Данилови и дары ему дасть великыи и конь свой борзый сивый, и рече ему: «Поиди, княже, в Володимерь, а я поиду в половци, мьсти†сорома своего». Данилови же приехавшю в Володимерь.

Въ лЂто 6722 [1214]. Бысть тишина.

Въ лЂто 6723 [1215]. Божиимъ повелениемь прислаша князи Литовьскии к великой княгини Романо†и Данилови и Василкови, мир дающе. Быху же имена литовьскихъ князей се: старЂйшей Живинъбудъ, Давъятъ, Довъспрункъ, брат его Мидогь, братъ Довъяловъ Виликаилъ. А жемотьскыи князи: Ерьдивилъ, Выкынтъ, а Рушьковичевъ — Кинтибуть, Вонибут, Бутовить, ВижЂикъ, и сынъ его Вишлий, Китений, Пликосова, а се Булевичи — Вишимут его же уби Миндого тъ, и жену его поялъ, и братью его побилъ, Едивила, СпрудЂика. А се князи из Дяволтвы: Юдьки, ПукЂикъ, Бикши, Ликиикъ. Си же вси миръ даша князю Данилови и Василку, и бЂ земля покойна. Ляхом же не престающимъ пакостящимъ, и приведе на ня литву, и воеваша ляхы, и много убиства створиша в нихъ.

Въ лЂто 6724 [1216]. Не бысть ничто же.

Въ лЂто 6725 [1217]. Выиде Филя древле прегордый, надЂяся обьяти землю, потребити море, со многими угры. Рекшю ему: «Единъ камень много горньцевъ избиваеть», а другое слово ему рекшю прегордо: «Острый мечю, борзый коню — многая руси». Богу же того нет терпящю, во ино время убьенъ бысть Даниломъ Романовичемь древле прегордый Филя.

Олександру же отступившю от Данила и от Василка ко Лестькови, не бЂ бо има помощи ни от кого же, развЂе от бога, дондеже приде Мьстиславъ с половци. Изыиде же Филя со многими угры и ляхы из Галича, поима бояре галичкыя и Судислава цьтя и Лозоря, и ины, а ини разбЂгошася, загордЂ бо ся бЂ.

Въ лЂто 6726 [1218]. Тишина бысть.

Въ лЂто 6727 [1219]. Приде Лестько на Данила к Щекареву, бороня ити ему на помощь Мьстиславу, тестеви своему, Кондратови же приЂхавшу мирить Лестька и Данила, познавшю же ему лесть Лестькову, и не велЂ князю Данилу ехати к Лестьку. Филя же строяшеся на брань, мняше же бо, яко никто может стати противу ему на брань. Остави же Каломана в Галичи и созда градъ на церкви пречистое владычица нашея Богородица, яже не стЂрпЂвшю осквернения храма своего и вдасть ю Мьстиславу.

БЂ бо ту с Коломанъм Иванъ Лекинъ и Дмитръ, и БотЂ. Половцем же приехавшимъ видити рати, угромъ же и ляхомъ гонящимъ я. Увернувся половчинъ, застрЂли Уза во око, и спадшю ему с фаря, взяша тЂло его, и плакашася по немь. НаутрЂя же на канунъ святой Богородици приде Мьстиславъ рано на гордаго Филю, и на угры с ляхы, и бысть брань тяжка межи ими, и одолЂ Мьстиславъ. БЂгающим же угромъ и ляхомъ, избьено бысть ихъ множьство, и ятъ бысть величавый Филя паробкомъ Добрыниномъ, его же лживый Жирославъ укралъ бЂ, и обличену ему бывшю, про него же погуби отчину свою.

И побЂдившу же Мьстиславу, поиде к Галичю, бившимъ же ся имъ о врата градная. И возбьгоша же на комары церковныя, и ини же ужи возвлачишася, а фарЂ ихъ поимаша. БЂ бо градъ створенъ на церкви. ОнЂмъ же стрЂляющимъ и камение мещющимъ на гражаны, изнемогаху жажею водною, не бЂ бо воды в них. И приЂхавшю же Мьстиславу и вдашася ему, и сведени быша со церкви. Данилови же приЂхавшю в малЂ дружинЂ с Демьяномь тысячкымъ, не бЂ бо приЂхалъ во время то. Потом же приЂха Данилъ ко Мьстиславу, и бысть радость велика: спасъ богъ от иноплеменьникъ, вси бо угре и ляхове убьени быша, а инии яти быша, а инии бЂгающе по землЂ, истопоша, друзии же смерды избьени быша, и никому же от них утекши, тако бо милость от бога Руской землЂ.

Потом же приведоша Судислава ко Мьстиславу, оному же не помыслившю о немь зла, но милость ему показавшю. Он же, обуимая нозЂ его, обЂщася работЂ быти ему. Мьстиславу же вЂровавшю словесемь его, и честью великою почтивъ его, и Звенигородъ дасть ему.

Въ лЂто 6728 [1220]. Не бысть ничто же.

Въ лЂто 6729 [1221]. Отступилъ бЂ Александръ и створи миръ с Лестькомъ и со Каломаномъ и с Филею гордымъ, Романовичема не престаяше хотя зла. По побЂдЂ же Мьстиславли и по литовьскомъ воеваньи на ляхы створи миръ Лестько с Даниломъ и Василкомъ, Держиславомъ Абрамовичем и Творьяном Вотиховичемь, а Романовича створиста миръ Демьяномъ тысяцькымъ. Отступи Лестько от Олександра.

В субботу же на ночь попленено бысть около Белза и около Червена Даниломъ и Василкомъ, и вся земля попленена бысть, бояринъ боярина плЂнившю, смердъ смерда, градъ града, якоже не остатися ни единой вси не плЂненЂй. Еже притъчею глаголють книги: «Не оставлешюся камень на камени». Сию же наричють белжанЂ злу нощь, сия бо нощь злу игру имъ сыгра, повоеваньи бо бЂаху преже свЂта. Мьстиславу же рекшу: «Пожалуй брата Олександра», и Данилъ воротися в Володимерь, отъиде от Белза.

Въ лЂто 6730 [1222]. Не бысть ничто же.

Въ лЂто 6731 [1223]. Данило и Василка Романовичю бЂаху володимьрьскыи пискупЂ: бЂ бо Асафъ блаженый преподобный, святитель Святое Горы, и потомъ бЂ ВасилЂй от Святое Горы, и потомъ бЂ Микифоръ, прирокомъ Станило, бЂ бо слуга Василковъ преже, и потомъ Кузма, кроткый преподобный смиреный пискупъ володимерьскый.

Богу же изволившю, Данилъ созда градъ именемь Холмъ. Создание же его иногда скажемь.

Божиею же волею избранъ бысть и поставленъ бысть Иванъ пискупъ княземь Даниломъ от клироса великое церкви святой Богородици Володимерьской, бЂ бо преже того пискупъ Асафъ Вугровьскый, иже скочи на столъ митрофоличь и за то свЂрженъ бысть стола своего, и переведена бысть пискупья во Холмъ.

Въ лЂто 6732 [1224]. Приде неслыханая рать, безбожнии моавитяне, рекомыи татаръве, придоша на землю половецькую. Половцемь же ставшимъ, Юрьгий Кончакович бЂ болийше всихъ половець, не може стати противу лицю их, бЂгающи же ему, и мнози избьени быша до рЂкы Днепра. Татаром же возвратившися, идоша в вежа своя. ПрибЂгшимъ же половцемь в Рускую землю, глаголющимъ же имъ рускимъ княземь: «Аще не поможета намъ, мы нынЂ исЂчени быхомъ, а вы наутрЂе исЂчени будете».

Бывшю же свЂту всих князЂй во градЂ КыевЂ, створиша свЂтъ сице: «Луче ны бы есть прияти я на чюжей землЂ, нежели на своей». Тогда бо бЂахуть Мьстиславъ Романовичь в КыевЂ, а Мьстиславъ в КозельскЂ и ЧерниговЂ, а Мьстиславъ Мьстиславичь в ГаличЂ, то бо бЂаху старЂйшины в Руской земли. Юрья же князя великого Суждальского не бы в том свЂтЂ. Се же паки млади князи Данилъ Романовичь, Михаилъ Всеволодичь, Всеволодъ Мьстиславичь Кыевьскый, инии мнозии князи. Тогда же великый князь половецкый крестися Басты Василка же не бЂ, бЂ бо в ВолодимерЂ млад.

Оттуду же приидоша месяца априля, и придоша к рЂцЂ ДнЂпру, ко острову Варяжьскому. И приЂха ту к нимъ вся земля Половецкая, и черъниговцемь приЂхавшимъ, и кияномъ и смоляномъ, инЂмь странамъ всянамъ. По суху же ДнЂпръ перешедшимъ, якоже покрыти водЂ, быти от множества людии. А галичане и волынци киждо со своими князьми. А куряне и трубчяне и путивлици, и киждо со своими князьми придоша коньми. А выгонци галичькыя придоша по ДнЂстру и воидоша в море, бЂ бо лодей тысяща, и воидоша во ДнЂпръ, и возведоша порогы, и сташа у рЂкы ХорьтицЂ на броду у протолчи. БЂ бо с ними ДомамЂричь Юрьгий и Держикрай Володиславичь.

Пришедши же вЂсти во станы, яко пришли суть видЂть олядии рускыхъ, слышавъ же Данилъ Романовичь и гна всЂдъ на конь видЂти невиданьноя рати, и сущии с ними коньници и инии мнозии князи с нимь гнаша видити невидЂное рати. Онемъ же отшедшимъ, Юрьги же имъ сказываше, яко: «СтрЂлци суть». Инии же молвяхуть, яко: «Простии людье суть, пущеи половець». Юрьги же Домамиричь молвяшеть: «Ратници суть, и добрая вои».

ПриЂхавъше же сказаша Мьстиславу Юрьиги же все сказа. И рекшимъ молодымъ княземъ: «Мьстиславе и другий Мьстиславе, не стоита! Поидемь противу имъ». Переидоша же вси князи Мьстиславъ и другий Мьстиславь Черниговьскый рЂку ДнЂпръ, инии князи предоша и поидоша в поле половецкое. Переидоша же ДнЂпръ во день во вторникъ, и усрЂтоша татареве полкы рускыя. СтрЂлци же рускыи побЂдиша и, и гнаша в поле далеце секуще, и взяша скоты ихъ, а со стады утекоша, яко всимъ воемъ наполнитися скота.

Оттуду же идоша 8 дни до рЂки Калкы. СтрЂтоша и сторожьеве татарьскыи. Сторожемъ же бившимъся с ними, и убьенъ бысть Иванъ ДмитрЂевичь, иная два с нимъ.

Татаром же отъЂхавшимъ, на прочьне рЂцЂ КалъкЂ, устрЂтоша и тотарове половецкыя полкы рускыя. Мьстиславъ же Мьстиславличь повелЂ впередъ переити рЂку Калку Данилови сполкы, инЂмъ полкомъ с нимъ, а самъ по немъ переиде, еха же самъ во сторожЂ. Видившу же ему полкы татарьскыя, приЂхавъ рече: «Воружитеся!» Мьстиславу же и другому Мьстиславу, сЂдящема во стану не вЂдущема, Мьстиславъ же не повЂда има зависти ради, бЂ бо котора велика межю има.

Съразившимся полкомъ на мЂсто. Данилъ же выЂха на передъ, и Семьюнъ Олюевичь и Василко Гавриловичь поткоша в полкы Тотарьскыя, Василкови же сбодену бывшю. А самому Данилу бодену бывшю в перси, младъства ради и буести не чюяше ранъ бывшихъ на телеси его. БЂ бо возрастомъ 18 лЂтъ, бЂ бо силенъ.

Данилови же крЂпко борющися, избивающи тотары. Видивъ то Мьстиславъ НЂмый, мнЂвъ, яко Данилъ сбоденъ бысть, потче и сам в нЂ, бЂ бо мужь и тъ крЂпокъ, понеже ужика сый Роману от племени Володимеря, прирокомъ Маномаха. БЂ бо велику любовь имЂя ко отцю его: ему же поручивше по смерти свою волость, да я князю Данилови.

Татаром же бЂгающимъ, Данилови же избивающи ихъ своимъ полкомъ, и Олгови Курьскому крЂпко бившимся инЂмъ полкомъ сразившимся с ними. ГрЂхъ ради нашихъ, рускимъ полкомъ побЂженымъ бывшимъ.

Данилъ видивъ, яко крЂпцЂйши брань належить в ратных, стрЂльцЂмъ ихъ стрЂляющимъ крЂпцЂ, обрати конь свой на бЂгъ, устрЂмления ради противныхъ. БЂжащю же ему и вжада воды, пивъ почюти рану на телеси своемъ, во брани не позна ея, крЂпости ради мужьства возраста своего. БЂ бо дерзъ и храборъ, от главы и до ногу его, не бЂ на немь порока.

Бысть побЂда на вси князи рускыя. Тако же не бывало никогда же. Татаром же побЂдившимъ русьскыя князя за прегрешение крестьяньское, пришедшимъ и дошедшимъ до Новагорода Святополчьского. Не вЂдающим же руси льсти ихъ, исходяху противу имъ со кресты, они же избиша ихъ всих.

Ожидая богъ покаяния крестьянского, и обрати и воспять на землю восточную, и воеваша землю Таногустьску и на ины страны. Тогда же и Чаногизъ кано ихъ таногуты убьенъ бысть. Их же прельстивше и послЂди же льстию погубиша. Иные же страны ратми, наипаче лестью погубиша.

Въ лЂто 6733 [1225]. Олександръ все вражду имЂяше ко своима братома Романовичема Данилови и Василкови. Слышавъ, яко Мьстиславъ не имЂеть любви к зятю своему князю Данилови, радости исполнивъся, понужаше Мьстислава на рать. Мьстиславу же пошедшю на рать, приде на Лысую Гору. Данилови жи приЂхавшю в ляхы и возведшю князя Льстка и поиде противу ему. Мьстиславу же помочь пославшю Олександрови. СрЂтившимъ же имъ, рать вогнаша и в град Белзъ и за мало города не взяша. Наутрея поидоша противу имъ. Мьстиславу же не стерпЂвшю, и возвратися в Галичь.

Данилу же князю воевавшю с ляхы землю галичькую и около Любачева, и плЂни всю землю Бельзеськую и Червеньскую, даже и до оставшихъ. Василку же князю многы плены приемшю, стада коньска и кобылья, и бысть зависть ляхомъ.

И бывшим посломъ от обоихъ и пущенъ бысть ДЂмьянъ и АндрЂй.

И бысть по сихъ, привед Мьстиславъ Котяня и половци многы, и Володимера Киевьского, творяся на ляхы ида, свЂтомъ Александровымъ. СвЂтъ же Александровъ всегда не престаяше о братЂ своемь, рекый, яко: «Зять твой убити тя хочеть». Исправлению же бывъшю около вежи его, самому же Александру не смЂявшю Ђхати, посла Яна своего. Мьстиславу бо рекшю: «Твою бЂ рЂчь, Яню, яко Данилъ второе всаживаеть ляхы на мя». Познавшимъ же всЂмъ княземь Александрову клевету, а Яневу лжю, и рекшим же всимъ княземь: «Приими всю власть его за соромъ свой». Онъ же за братолюбие не прия власти его, и вси похвалиша ему.

Мьстислав же прия зятя своего любовью и почестивъ его великими дарми, и да ему конь свой борзый актазъ, акого же в та лЂта не бысть, и дочерь свою Анну даривъ великими дарами. И с братьею видЂвся в Перемили, и утвердиша миръ.

В лЂто 6734 [1226]. Льстивому Жирославу рекшю къ бояромъ галичькимъ, яко: «Идеть Мьстиславъ в поле и хощеть вы предати тестеви своему Котяню на избитье», Мьстиславу же праву сущюу о немь, и не свЂдущю ничто же о нихъ. Они же емше вЂры, отъидоша в землю Перемышлескую, в горы Кавокаськия, рекше, во Угорьскыя, на рЂку Днестръ. Послаша послы своя рекуще, яко: «Жирослав повЂдал ны есть». Мьстиславу же пославшу отца своего ТимофЂя, яко: «Всуе оклеветал мя есть к вамъ Жирославъ». Тимофею же кленшюся имъ о сем, яко не свЂдущу Мьстиславу ничто же о семь, и приведе бояре вси к нему.

Князю же обличившю Жирослава изгна и от себе, якоже изгна богъ Каина от лица своего, рекы: «Проклять ты! Буди стоня и трясыся на земли, якоже раздвиже земля уста своя прияти кровь брата твоего». Якоже и Жирославъ разъдвиже уста своя на господина своего, да не будеть ему пристанъка во всихъ земляхъ в Рускихъ и во Угорьскыхъ, и ни в ких же странахъ, да ходить шатаяся во странахъ, желание брашна да будеть ему, вина же и олу, по скуду да будеть ему, и да будеть дворъ его пустъ и в селЂ его не будеть живущаго.

Оттуду выгнанъ иде ко Изяславу. БЂ бо лукавый льстЂць нареченъ, и всихъ стропотливее, и ложь пламянъ, всеименитый отцемь добрымъ. Убожьство возбраняше злобу его, лъжею питашеся языкъ его, но мудростию возложаше вЂру на лжюу, красяшеся лестью паче вЂнца, лжеименЂць, зане прелщаше не токмо чюжихъ, но и своихъ возлюбленых, имения ради ложь. Того бо дЂля жадаше быти у Изяслава. Мы же на преднее возвратихомся.

Мьстислав же, по совЂтЂ льстивыхъ бояръ Галичькихъ, вда дщерь свою меншую за королевича АндрЂя и дасть ему Перемышль. АндрЂй же, послушавъ лестиваго Семьюнка Чермьнаго, и бЂжа во угры и нача воздвизати рать. Бывши же зимЂ, прииде ко Перемышьлю. Юрьеви тогда тысящюу держащю, переда Перемышль и бЂжа самъ ко Мьстиславу. Королеви же ставшю во ЗвенигородЂ, и посла вои свои к Галичю, самъ бо не смЂ Ђхати к Галичю: повЂдахуть бо ему волъхвы угорьскыя, яко узрЂвшу Галичь, не быти ему живу. Он же тоя ради вины не смЂя ити в Галичь, яко вЂряшеть волъхвомъ. ДнЂстру же наводнившюся, не могоша переити.

Мьстиславъ же выЂха противу с полкы. ОнЂм же позоровавшимъ на ся, и ехаша угре во станы своя. БЂ бо с королемь Пакославъ с ляхы. Оттуду же поиде король ко Теребовлю и взя Теребовль, и поиде к Тихомлю, и взя Тихомль, оттуду же прииде ко Кремянцю, и бися под Кремянцем, и много угоръ избиша и раниша.

Тогда же Мьстиславъ Судислава посла к зятю своему князю Данилу, рекый: «Не отступай от мене». Оному же рекшю: «Имамъ правду во сердци своемь».

Оттуду же приде король ко Звенигороду. ВыЂха же Мьстиславъ из Галича. Угре же выЂхаша противу ему со становъ королевыхъ. Мьстиславъ же бися с ними, и побЂди я, и гнаша по нихъ до становъ королевыхъ, секуще и. Тогда же Мартиниша убиша, воеводу королева. Король же смятеся умомъ и поиде и земли борзо.

Данилови же пришедшу ко Мьстиславу с братомъ Василькомъ ко Городъку и ГлЂбъ с нима. И молвящимъ имъ: «Поиди, княже, на короля: по Лохти ходить». Судиславъ же браняшеть ему. БЂ бо имЂяшеть лесть во сердци своемь, не хотяше бо пагубы королеви, имЂяше бо в немь надежу велику.

БЂаше бо король изнемоглъся. Льстькови же в то время идущу в помощь. Данилови же бранящю ему не помогати королеви, оному наипаче хотящю. Данил же и Василко посласта люди своя къ Бугу, не даста ему прити. Оттуду же возвратився, иде во свою землю, изнемоглъ бо ся бЂ, ходивъ на воину.

А король угорьскый иде во Угры. Тогда же угони Изяславъ со лестивымъ Жирославомъ, идоста с нимъ Угры.

Потом же Судиславу льстящю подо Мьстиславомъ, рече ему: «Княже, дай дщерь свою обрученую за королевича, и дай ему Галичь. Не можешь бо держати самъ, а бояре не хотять тебе». Оному же не хотящю дати королевичю, наипаче хотящю дати Данилови. ГлЂбови же ЗеремЂевичю и Судиславу претяща ему не дати Данилови, рЂста бо ему: «Аже даси королевичю, когда восхощеши, можеши ли взяти под нимь.

Даси ли Данилови, в вЂкы не твой будеть Галичь». Галичаномъ бо хотящимъ Данила, оттуду же послаша въ рЂчих. Мьстиславъ дасть Галичь королевичю АндрЂеви, а самъ взя Понизье. Оттуду иде к Торьцкому.

Мьстиславу же Немому, давшу отчину свою князю Данилови, и сына своего поручивъ Ивана, Ивану же умершю, и прия Луческъ Ярославъ, а Черторыескъ пиняне.

Въ лЂто 6735 [1227]. Начнемь же сказати бещисленыя рати, и великия труды и частыя войны, и многия крамолы, и частая востания, и многия мятежи. Измлада бо не бы има покоя.

СЂдящу же Ярославу в ЛучьскЂ, еха Данилъ въ Жидичинъ кланятися и молитися святому НиколЂ. И зва и Ярославъ къ Лучьску. И рЂша ему бояре его: «Приими Луческъ, зде ими князя ихъ». Оному же отвЂщавшу, яко: «Приходить зде молитву створити святому НиколЂ, и не могу того створити». Иде въ Володимерь, оттуду же собравша рать, посласта на нь АндрЂя, Вячеслава, Гаврила, Ивана. Оному же въехавшу, ятъ бысть с женою своею, ятъ же бысть Олексию ОрЂшькомъ: бЂ бо борзъ конь подъ нимъ, угонивый и я его до города. И затворишася лучане. НаутрЂя же приде Данилъ и Василко, и предашася лучане. Братъ же да Василкови Луческъ и Пересопницю, Берестий же ему бЂ преже далъ.

Повоеваша ятвязи около Берестия, и угониста и из Володимеря. Наехавшима же двЂима, Монъдуничю Шутрови и Стегутови ЗЂбровичю, на полкъ. И убьенъ бысть Даниломъ и Вячеславом Шютръ, а Стегутъ убьенъ бысть Шелвомъ. Бежащим же ятвеземь, угони я Данилъ, Небра язви четырми ранами, древо же вышибе копье из руку его. Василкови, угонившу его, кликъ бысть великъ: «Братъ ти биетъся назади». Оному же оставшу, обратися брату на помощь, оному же симь утекшу, а и ини разбЂгошася.

Мы же, се оставлеше, на преднее возвратимъся.

Данилъ же посла Дьмьяна ко тести своему, река ему: «Не подобаеть пиняномъ держати Черторыйска, яко не могу имъ терпЂти». Дьмьянови же повЂстящу с нимъ. «Сыну, сгрЂшихъ не давъ тобЂ Галича, но давъ иноплеменьнику, Судислава льстьця свЂтомъ, обольсти бо мя. Ажь богъ восхочеть, поиди†на ня. Язъ всажу половци, а ты своими. Аще богъ дасть его нама, ты возми Галичь, а язъ Понизье, а богъ ти поможеть. А про Черторыескъ — правъ еси». ДЂмьяну же приЂхавшу в Великую суботу. НаутрЂя же на Великъ День приехаста Данилъ и Василько ко Черторыйску, в понедЂлникъ на ночь обьсЂдоста град. Тогда же и конь Даниловъ застрЂленъ бысть с города. НаутрЂя же обьЂхаста град Мирославъ и ДЂмьянъ, рекоста, яко: «Предалъ богъ врагы наша в руку ваю». Данилъ же повелЂ приступити ко граду, и взяша градъ ихъ, и князя ихъ изимаша.

Потом же Мьстиславъ, великый удатный князь, умре. Жадящю бо ему видити сына своего Данила. ГлЂбъ же ЗеремЂевичь, убЂженъ бысть завистью, не пустяще его. Оному же хотящю поручити домъ свой и дЂти в руцЂ его, бЂ бо имЂя до него любовь велику во сердцЂ своемь.

И потом же пустиста Ярослава, и даста ему Перемиль, и потомь Межибожие.

Въ лЂто 6736 [1228]. БЂ Курилъ митрополитъ преблаженый и святый приЂхалъ мира сотворити и не може.

Потомь же Ростиславъ Пиньскый не престаяше клевеща, бЂша бо дЂти его изыманы.

Володимеръ же Кыевьскый собра вои. Михаилъ Черниговьскый — «яко бо бЂ отець его постриглъ отца моего», бЂ бо ему боязнь велика во сердци его. Володимер же всади Котяня и , вси половци. И придоша къ Каменцю. Володимеръ же сос всими князи, и куряны, и пиняны, и новогородци, и туровьци обьсЂдоша КаменЂць.

Данило бо творящуся миръ сотворити с ними, переводя ими, и Ђха в ляхы по помощь, а Павла своего посла ко Котяневи, река: «Отче, измяти войну сю, приими мя в любовь собЂ». Он же Ђхавъ взя землю Галичьскую, иде в землю Половецкую, и не обратися к нимъ.

БЂ бо королевичь вь ГаличЂ и Судиславъ с нимъ, миръ бо имЂяше со Володимеромь и Михаиломъ. Сим же нЂ воспЂвошимъ ничто же, вратишася.

Данилъ же и Василко собравша ляхы многы, идоста Кыеву со Пакославомъ воеводою и Олександро с нима. СрЂтоша же посли от Володимера и Михала: и Воротиславъ Петровичь Юрьии ТолигнЂвичь, хотяще мира. Умиришася, и ляхо†возворотишася въспять.

Въ лЂто 6737 [1229]. Льстько убьенъ бысть великый князь Лядьскый, на сонмЂ убьенъ бысть Святополкомъ, Одовичемь Володиславомъ, свЂтомь бояръ невЂрныхъ. По смерти брата своего Кондратъ прия Данила и Василка в великую любовь и проси ею, а быста шла ему на помощь. И поидоста ему на помощь на Володислава на Стараго. Сама же идоста на войну, остависта же в Берестии Володимера Пиньского, и угровьчаны и берестьяны стеречи землЂ от ятьвязь. В то же время воеваша литва ляхы, мняще мирни суще, и приидоша ко Берестью. ВолодимЂръ же рече: «Оже есте мирни, но мнЂ есте не мирни». И изииде на нЂ и берьстьяне вси избиша Ђ всЂ.

Данилъ же и Василко придоста ко Кондратови, и сгадавшимъ имъ, идоша къ Калешю. И придоша Вепру вечеръ. НаутрЂе же свЂтающю прЂидоша рЂку Пресну и поидоста къ городу. И тое нощи бысть дождь великъ. Видивши же, яко нЂсть кто противяся, пустиша воеватъ и плЂнитъ. Русь же догнаша Милича и Старогорода и нЂколко селъ Володиславьскых заяша, и прияша плЂнъ велик, и вратишася, и приидоша во станы, гадающимъ, како поити к городу на бой, ляхомъ же не хотящимъ битися.

Наутрее же Данилъ и Василько поемь вое свое и поидоста ко граду. Кондрату же любящю рускый бой и понужающу ляхы свое, онЂмь же одинако не хотящимъ. Приступившима же има обЂима ко воротомь КалЂшьскымъ, а Мирослава посласта в задъ града, и инии полкы.

БЂ бо городъ обишла вода, и сильная лозина, и вербье, и не свЂдущимся самЂмь, идеже кто биаше. Егда же си отступяху от боя, они же належахуть на оны, а коли они отступяху, а они належаху на си. За невидЂние не приятъ бысть градъ томь дни. Идущу же камению со забралъ, яко дожду силну; стоящимъ имъ в водЂ, дондеже сташа на сусЂ на метаномъ камении. И возводный мостъ и жеравець вожьгоша. Ляхове же врата одва угасиша градьская.

Данилови же и Василкови ходящима подлЂ града, стрЂляющимъ на градъ инЂмь стрЂлцемь, и бысть ранено мужь, стоящихъ нъ забралЂхъ, 100 и 60. Бывшу же вечеру, и возвратишася во станы своя.

Станиславъ же Микуличь рече: «Кде то мы стояли, ту нЂсть воды, ни гребле высокы». Данила же, всЂдъ на конь, еха самъ на зглядание града, и видЂ, яко тако и есть. Данилъ же приЂха ко Конъдратови и рече ему: «Аще быхомъ исперва вЂдалЂ мЂсто се, то градъ приятъ бы былъ». Кондратови же молящуся има, да наутрЂе пакы приступита ко граду.

Наутрия же Данилъ и Василко посласта люди свои. Онем же стоящимъ и теребящимъ лЂсы около града, гражаномъ же ни камения смЂющимь врещи на нЂ, просяхуся, да бы къ нимъ прислалъ Кондратъ Пакослава и Мьстиуя. Пакославъ же рече Данилови: «ИзмЂнивъ ризы свое, поеди с нами». Данилови же не хотЂвшю, рече ему братъ: «Иди да слыши вЂче ихъ». Не вЂряшеть бо Мьстиуеви Кондратъ.

Данилъ же возма на ся шеломъ Пакославь и ста за нима. Стоящимъ же мужемь на заборолЂхъ и рекущимъ имъ: «Тако молъвъта великому князю Конъдрату: «Сий градъ не твой ли есть? Мы же, мужи, изнемогошеи во градЂ семь, ци иного странници есмы, но людье твои есмы, а ваша братья есмы. Чему о насъ не сожалитеси? Аще насъ русь плЂнять, то кую славу Кондратъ прииметь? Аще руская хоруговь станеть на забролЂхъ, то кому честь учиниши? Не Романовичема ли? А свою честь уничижиши! НынЂ брату твоему служимъ, а заутра твои будемь. Не дай славы руси, не погуби града сего!» И и многа словеса глаголаху.

Пакаславу же рекшу: «Кондрат радъ милость бы учинилъ вамъ, Данилъ лютъ зЂло есть насъ, не хощеть отоити прочь, не приемь града». Росмьявся, рче: «А се стоить самъ. Молъвьте с нимъ». Князь же тъче его оскЂпищемь и соня собе шеломъ. Они же кликнуша с града: «ИмЂй службу нашу, молимся, створи миръ». Оному же много смЂявъшуся и много вЂстовавшу с ними, и поя от нихъ 2 мужа, и приЂха Кондратови.

И створи Кондратъ с ними миръ и поя у нихъ талъ. Руси бо бЂаху полонилЂ многу челядь и боярынЂ. Створиша же межи собою клятву русь и ляхове, аще по семь коли будеть межи ими усобица, не воевати ляхомъ руское челяди, ни руси лядьской.

Потом же возвратистася от Кондрата в домъ свой с честью, богу поспЂвающю има, створиста ему помощь велику, и внидоста со славою в землю свою. Иный бо князь не входилъ бЂ в землю Лядьску толь глубоко, проче Володимера Великаго, иже бЂ землю крестилъ.

Потом же времени минувшу Ђха Василко Суждалю на свадбу шурина своего, ко великому князю Юрью, поемъ Мирослава со собою и ины.

Князю же Данилови будущу во УгровьсцЂ, прислаша галичанЂ, рекуще, яко: «Судиславъ шелъ есть во Понизье, а королевичь в Галичи осталъ, а поиди борже». Данилови же собравшю вои, воборзЂ посла Дьмьяна на Судислава, а самъ иде в малЂ дружинЂ к Галичю изо Угровьска, во третий день бывшу ему на ночь во Галичь. А Судиславъ не стерпЂ передь ДЂмьяномъ но побЂже в Галичь. Данилови же приЂхавшу ко Галичю, Галичь бо бЂ ся затворилъ. Данилъ же взя дворъ Судиславль. Якоже вино и воща и корма и копий и стрЂлъ, пристраньно видити! Потом же Данилъ, видивъ люди своя, яко испилися, не хотЂ стати вь города, но иде на ину страну ДнЂстра.

Судиславу же тое ночи вобЂгшю во городъ, яти бывше от вои его людие, и рекоша, яко Судиславъ уже в Галичи. Данилъ стоаше УгльницЂхъ, на березЂ Днестра. ВыЂхавшимъ же галичаномъ и угромъ и стрЂляшася на леду. Вечеру же бывшу, и ледомъ воставшимъ, и рЂцЂ наводнившися, зажгоша мостъ на ДнестрЂ — безаконьный лихый Семьюнько, подобный лисици черьмности ради.

И приде Дьмьянъ со всими бояры галичкыми, со Милославомъ и со Володиславомъ и со многими бояры галичкыми. Данилови же о семъ веселу будущю, а о мостЂ печаль имЂющу, како ДнЂстръ переити. Гнавъ же Данилъ ко мосту и узрЂвъ, яко конЂчь мосту угаслъ есть, и бысть радость велика.

Наутрея же приде Володимеръ Инъгваровичь, и переидоша мостъ, и сташа по берегу ДнЂстра.

НаутрЂя же уставоше, и обьеха Данилъ городъ, и собравъ землю галичскую, ста на четырЂ части окрестъ его. И собра от Боброкы доже и до рЂкы УшицЂ и Прута, и обьсЂде в силЂ тяжьсцЂ. Онем же изнемогошимъ передаша градъ. Данилови же приемшу градъ, помянувшю любовь короля АндрЂя, и пусти сына его и проводи и до рЂкы ДнЂстра. Изииде же с нимъ единъ Судиславъ, на ньм же метаху камение, рекуще: «Изииде из града, мятежниче земли!»

АндрЂеви же пришедшу ко отцю си и брату, и Судиславу глаголюще непрестаньно: «ИзЂидете на Галичь, и приимете землю Рускую. Аще не поидеши, укрЂпяться на ны».

Изииде же БЂла риксъ, рекъмый король, Угорьскый, в силЂ тяжьцЂ. Рекшю ему, яко: «Не имать остатися градъ Галичь. НЂсть кто избавляя и от руку моею». Вшедъшу же ему во горы УгорьскыЂ, посла на ны богъ архангела Михаила отворити хляби небесныя. Конем же потопающимъ и самЂмь возбЂгающимъ на высокая мЂста, оному же одинако устремисшися прияти град и землю. Данилови же молящуся богу, избави и богъ от рукы силных.

И обиступи град, и посла посолъ, и воспи посолъ гласомъ великом и рече: «Слышите словеса великого короля угорьского. Да не уставляеть васъ Дьмьянъ глаголя: «И земля изимьть ны богъ». Ни да уповаеть ваш Данилъ на господа, глаголя: «Не имать предати град сесь королеви угорьскому». Толико ходилъ на ины страны, то кто можеть одержати от руку моею и от силъ полковъ моихъ». Дьмьянъ же одинако крЂпяшеся, грозы его не убояся. Богъ поспЂшникъ бысть ему. Данилъ же приведе к собЂ ляхы и половцЂ Котяневы. А у короля бЂаху половци БЂговаръсови.

Богъ попусти на нЂ рану фараонову. Град же крЂпляшеся, а БЂла изнемогаше. И поиде от града, оставившю же ему люди за собою, оружники многи и фаревникы. Нападшимъ же на нЂ гражаномъ мнозимъ, впадаху в рЂку, инии же избьени быша, инии язвени быша, инии же изоимани быша. Яко инде глаголеть: «Скыртъ рЂка злу игру сыгра гражаномъ», тако и ДнЂстръ злу игру сыгра угромъ.

Оттуду же поиде король ко Василеву и переиде ДнЂстръ, и поиде ко Пруту, богъ бо попустилъ бЂашеть рану, ангелъ бьяшеть ихъ, сице умирающимъ: инии же изъ подъшевь выступахуть, акы ис чрева, инии же во конЂ влЂзъше, изомроша, инии же, около огня солЂзъшеся и мясъ ко устомъ придевоше, умираху, многими же ранами разными умираху, хляби бо небесныи одинако топяхуть.

И ушедшю же ему за невЂрьство бояри галичкихъ, Данилъ же божьею волею одерьжа градъ свои Галичь.

По семь скажем многий мятежь, великия льсти, бещисленыя рати.

Въ лЂто 6738 [1230]. КрамолЂ же бывши во безбожныхъ боярехъ галичкыхъ: свЂтъ створше со братучадьемь его Олександромъ на убьенье и преднее землЂ его. СЂдящим же имъ в думЂ и хотящимъ огнемь зажещи, милостивому богу вложивашю во сердце Васильку изиити вонъ, и обнажившу мЂчь свой играя на слугу королева, иному похвативши щитъ играющи. Невернымъ Молибоговидьчьмь узрЂвши се, страхъ имъ бысть от бога, рекъшимъ, яко: «СвЂтъ нашь раздрушися». И побЂгшимъ имъ, яко оканьны Святополкъ. ОнЂмь бЂгающимъ, и еще не увЂдавшу князю Данилу и Василку.

Василко же поЂхавшю ВолодимЂру, а Филипъ безбожный зва князя Данила во Вишьню. Другий свЂтъ створиша на убьенье его со Александромъ, братучадомь его. Воехавшу ему во Браневичаве рьли, и приде ему посолъ от тысячкого его Дьмьяна, рекшу ему, яко: «Пиръ золъ есть, яко свЂщано есть безбожнымъ твоимъ бояриномъ Филипомъ и братучадомъ твоимъ Олександромъ, яко убьену ти быти. И то слышавъ, поиди назадъ и содержи столъ отца своего».

Коснятину повЂдавшу, оному же обратившюся на рЂцЂ ДнЂстрЂ, а бояре безбожнии везяхуся инуда, не хотяще видити лича его.

Приехавшу же в Галичь, посла сла ко брату князю си Василкови: «Поиди ты на Олександра». Олександру же выбЂгъшу в Перемышль ко свЂтникомъ своимъ, а Василко прия Белзъ. Ивана же посла сЂдЂлничего своего по невЂрных Молибоговичихъ, и по ВолъдрисЂ; и изимано бысть ихъ 28 Иваномъ Михалковичемь. И ти смерти не прияша, но милость получиша; и некогда ему в пиру веселящуся, одинъ от тЂхъ безбожныхъ бояръ лице зали ему чашею, и то ему стерпЂвшу. Иногда же, да богъ имъ возомьздить.

Въ лЂто 6739 [1231]. Самому же Данилу созвавшу вЂче, оставьшуся вь 18 отрокъ вЂрнихъ и съ ДЂмьяномъ тысяцкымъ своимъ, и рече имъ: «Хочете ли быти вЂрни мнЂ, да изииду на враги мое?» ОнЂм же кликнувшимъ: «ВЂрни есмы богу и тобЂ, господину нашему, изииди с божиею помощью!» Соцкый же Микула рече: «Господине, не погнетши пчелъ, меду не Ђдать». Помолившу же ся ему богу и святЂй пречистЂй богородици, Михаилу архангелу божию, устремися изиити со малом ратникъ. И Мирославу пришедшу к нему на помощь с маломъ отрокъ. НевЂрнии же вси на помощь ему идяху, мнящеся, яко вЂрни суть. И с ними же свЂтъ створиша, лютЂ бо бяху на нЂ. ПриЂхавшу Данилу Перемышлю, не стерпЂвъ Олександръ, побЂже. В том же гонЂ Шельвъ събоденъ бысть, бЂ бо храбръ и во велицЂ чьсти умертъ. НевЂрныии же Володиславъ Юрьевич с нимь свЂтъ створь, гоняше и оли и до Санока, воротъ угорьскыхъ. И гоньзновъшуся Олександру, оставивъшу все имение свое, и тако прииде Угры, и приде к Судиславу, Судиславу же тогда будущю УгрЂхъ.

Судиславъ же поимася, прииде королеви АндрЂеви, и возведе король угорьского АндрЂя. И приде же король АндрЂй и со сыномъ БЂлою, и со другимъ сыномъ АндрЂемь ко Ярославу. Боярину же Давыдови Вышатичю, затворившюся от князя Данила во Ярославли, и Васильеви Гавриловичю, и бивьшимся угромь, оли и солнцю зашедшу, отбивьшимь ся городу имь.

СвЂтъ створиша вечеру. Давидови уполошивъшуся: теща бо его бЂше вЂрна Судиславу, кормильчья Нездиловаа, матерью бо си нарЂчашеть ю, вЂща ему, яко: «Не можешь удержати града сего». Василкови же молъвящу ему: «Не погубимь чести князя своего, яко рать си не можеть града сего прияти». БЂ бо мужь крЂпокъ и храборъ. Давыду же не слушавшу его одинако хотяше предати град. Чакови же приехавшу изо Угорьскы полковь, рекъшу ему: «Не могуть васъ уже прияти, ибо суть велми бьени». Василькови же крЂпко борющу не предати града. Оному же ужасти во сердце имущю, самому же чЂлу, вышедшу со всими вои. И приимь король Ярославль и поиде к Галичю. Климята же с Голыхъ горъ убЂжа от князя Данила ко королеви, и по немь вси бояре галичькЂи предашася.

Оттуда король поиде ко ВолодимЂрю. Пришедшу же ему Володимерю, дивившуся ему, рекъшу, яко: «Така града не изобрЂтохъ ни в НЂмЂчкыхъ странахъ!» Тако сущу, оружьникомъ стоящимь на немь, блистахуся щити и оружници подобни солнцю. Мирославъ же бЂ во градЂ; иногда же храбру ему сущю, богъ вЂдать, тогда бо смутися умомъ, створи миръ с королемь, бе свЂта князя Данила и брата его Василка. Рядомь же дасть Белъзъ и Червенъ Олександру, королеви же посадившу сына своего АндрЂя в Галичи, свЂтомъ невЂрьныхъ галичань. Мирославу же запревъшуся, яко: «Рядомь Чьрвьна не предалъ есми». Порокъ же ему имуще великъ от обою брату: «Пошто миръ створи, сущю ти с великими вои!»

Королю стоящу во ВолодимЂря, князь же Данилъ прия великъ плЂнъ, около Бозку воюя. Король же воротися Угры.

Володимеръ же посла Данилови река: «Идеть на мя Михаилъ, а помози ми, брате!» Данилови же пришедшу створити миръ межи има. Данилъ жь из Руской земля взя собЂ часть Торцький, и паки да и дЂтемь Мьстиславлимъ, шюрятомъ своимъ. Рекъ имъ: «За отца вашего добродЂанье приимете ни держите Торцький городъ».

По тЂх же лЂтЂхъ движе рать АндрЂй королевичь на Данила и иде к Белобережью. Володиславу же Ђхавшу во сторожЂ от Данила ис Кыева, и стрЂте рать во БЂлобережьи. И бившимся имъ о рЂку Солучь и гониша до рЂкы Деревное из лЂса Чертова.

Приде вЂсть Кыеву Володимеру и Данилови от Володислава. Рекшу же Данилу князю Володимеру: «Брате, вЂдаюче обЂю наю идуть наю. Пусти мя, да поиду имъ взадъ». Они же, увЂдавше, возвратишася к Галичю.

Данилови же снемшуся с братомъ и постиже и у Шумьска, и повЂстоваста с ними о рЂку ВЂлью. БЂ бо с королевичемь Олександръ и ГлЂбъ Зеремиевич, инии князи Болоховьсции и угоръ множество. ВидЂвшу же ся Данилу о рЂку Велью с королевичемь, и нЂкое слово похвално рекшу, егоже богъ не любить. НаутрЂя же переидеть рЂку Велью на Шумьскъ и поклонився богу и святому Семеону, исполчивъ полкы свое, поиде ко Торчеву. УвЂдав же АндрЂй королевичь, исполчивъ полыкы свое, иде противу ему, сирЂчь на сЂчю. Идущу ему по ровни, Данилови же и Василкови съехати бЂ со высокихъ горъ; и инии же браняху, да быхомъ стали на горах, браняху сохода. Данилови же рекшу: «Яко же писание глаголеть: «Мьдляй на брань страшливу душю имать». Понудивъ ихъ, ускори снити на нЂ.

Василкови же идущу противу угромъ, а Дьмьяну тысяцькому идущю и инЂмь полкомъ многимъ ошуюю, Данилъ же идяше полкомъ своимъ посрЂди. Велику же полку бывшю его, устроенъ бо бЂ храбрыми людми и свЂтлымъ оружьемь. ОнЂмъ же видящимъ, не хотяхуть сразитися с нимъ, но клоняхуться на Дьмьяна и на иные полкы. Приехавшимъ же соколомь стрЂлцемь и не стЂрпЂвъшимъ же людемь, избиша Ђ и роздрашася. Дьмьянови же сразившуся со Судиславомъ князю же Данилови заЂхавъшу в тылъ имъ, и бодущим Ђ, Дьмьянови же мнящу, яко все ратнии и суть и возбегоша пред нимъ. Данилъ же вободе копье свое в ратьного, изломившуся же ся копью, и обнажи мечь свой. ПозрЂвъ же семь и сЂмь и види стягъ Василковъ стояще и добрЂ борющь и угры гонящу, обнаживъ мЂчь свой, идущу ему брату на помощь, многы же язви, и инии же от меча его умроша. Снемшеся с Мирославомъ и видЂвъ, яко угре сбираються, и ехаста на нЂ два. Онем же не стЂрпЂвшим оскочиша, другим же приехавшимъ и сразившимся, и ти на стЂрпЂша. Гонящимъ же има разлучистася, Потом же видивъ брата добрЂ борющася, и сулици его крова†сущи, и оскЂпищю исЂчену от ударенья мечеваго.

Въ лЂто 6740 [1232]. ГлЂбъ ЗЂремЂевичь собравъ угры приЂха на стягъ Василковъ. Данилови жи приЂхавши к нимъ и понужаюшу ихъ, и никого не вЂдЂ въ нихъ воиника, но отрокы держаща конЂ. ОнЂм же познавшимъ и и хотящимъ мечи посЂчи конь его. Милостивому же богу безъ язвы изнесъшу и из ратныхъ, якоже от конца остроты мечевыи шерьсти претятЂ бывши на стегнЂ коня его. ПриЂхавъ же к нимъ, понужаше свое ехати на нЂ.

Василковъ полкъ гнаше угры до становъ и стягъ королевича подътяли бЂаху, друзии же мнози угре бЂжаща, оли во Галичь становишася.

Стоящим же симь на горЂ, и симъ на удолъ. Данилови же и Василкови понужающима людий своихъ соЂхати на нЂ. Богу же тако извольшу за грЂхы: наворотися дружина Данилова на бЂгъ, онем же не смЂвшимъ гонити, и не бысть пакости во полкохъ Даниловых, раз†тЂхъ убьеных пяти.

Данилови же наутрея собравшуся, не вЂдаше о братЂ, с кимъ кдЂ есть. Королевичь же обратися в Галичь, зане бЂ уразъ великъ в полкохъ его: инЂи же угрЂ бежаша, оли в Галичи становишася.

И бысть брань велика во день тъ. ТЂхъ бо падшихъ много угоръ, а Даниловыхъ мало бояръ, их же имена се быша: Ратиславъ Юрьевичь, Моиси, Степанъ, брать его, Юрьи Яневичь.

Потом же Данилъ увЂдавъ брата своего во здравьи, не престаяшеть строя на нЂ рать.

БЂ бой Торцьвьскый в суботу великую.

Потомь присла Олександръ ко брату Данилу и Василку: «Не лЂпо ми есть быти кромЂ ваю!» Она же прияста и с любовью.

Тра†же бывши, Данилъ же поиде со братомъ и со Олександромъ ПлЂсньску, и пришедъ взя и подъ Аръбузовичи, и великъ плЂн прия, обратися во ВолодимЂръ.

Въ лЂто 6741 [1233]. Королевич же и Судиславъ выведе Дьяниша на Данила. Данилъ же Ђха Кыеву и приведе половцЂ и Изяслава противу имъ, и со Изяславом водися у божницю и со Володимеромъ. Придоста противу Данишу. Изяславъ же льсть створи и вЂлЂ воевати землю Данилову, и взяша Тихомль, и возвратишася, оставьшуся Володимеру с Даниломъ и Котяневи одиному. О лесть зла есть, якоже Омиръ пишеть, — до обличеня сладка, обличЂна же зла есть. Кто в нЂй ходить, конЂць золъ прииметь. О злЂе зла зло есть!

Оттуда же идоша ко Перемилю. АндрЂй королевичь, Дьянишь и угре бишася о мостъ со ВолодимЂромъ и Даниломъ, и отбивъшися имъ. Угре же воротишася к Галичю и порокы пометаша. ВолодимЂръ же и Данилъ поидоста по нихъ. Василко же и Олександръ приде ко брату. И сняшася в Бужьска. Володимеръ же и Котянь, Изяславъ воротишася.

Въ лЂто 6742 [1234]. Отступи ГлЂбъ ЗеремЂевичь от королевича к Данилови.

Данилъ же и Василко и однако идоста к Галичю, стрЂтоша и болшаа половина Галича: Доброславъ и ГлЂбъ, инии бояре мнози, и пришедъ ста на березЂ ДнЂстра. И прия землю Галичьскую и розда городы бояромъ и воеводамъ. И бЂаше корма у нихъ много. Королевичь же и Дьянишь и Судиславъ изнемогаху гладомь в градЂ. Стояше же 9 недЂль воюя, жда леду, дондеже перешлЂ на нЂ. Судиславъ же лестью посла ко Александрови, река: «Дамъ тобЂ Галичь, поиди от брата». Он же поиде прочь. Галичани же думаху яти галичани же выЂхаша по ДанилЂ.

Малу же времени минувшю, королевичь умре. Послаша галичанЂ по Данила Чермьного Семьюнька, а Судиславъ иде Угры.

ВЂснЂ же бывши, Олександръ убоявося злаго своего створения, поиде ко тьсту своему Киевъ. Данилъ же увЂдавъ изииде на нЂ из Галича, угони и во Полономь, и яша и в лузЂ Хоморьскомь. Данилови же не спавъшу три дни и 3 нощи, такоже и воемь его.

Будущю же Володимеру КыевЂ, присла сына своего Ростислава в Галичь, и прия с нимъ братьство и любовь велику, Михаилови же Изяславу одинако не престающа на нь враждою. Оставилъ у него ГлЂба ЗеремЂича и Мирослава, иныи бояре многы. Посла же Володимеръ рекий: «Помози ми, брате!» Данилъ же вЂлъею любовью скоро собравъ полкы поиде.

Михаилъ же не стерпЂвъ отъиде от Кыева. Данилъ же поиде ко Володимеру, и поидоста Чернигову. И приде к нима Мьстиславъ ГлЂбовичь. Оттуда же поидоша плЂнячи землю, поимаша грады многы по ДеснЂ, ту же взяша и Хороборъ, и Сосницю, и Сновескъ, иныи грады многии, и придоша же опять Чернигову. Створиша же миръ со Володимеромъ и Даниломъ Мьстиславъ и черниговьчи. Люто бо бЂ бой у Чернигова, оже и таранъ на нь поставиша, меташа бо каменемь полтора перестрЂла, а камень, якоже можаху 4 мужи силнии подъяти. Оттуда с миромъ преидоша Кыеву.

Изяславъ же одинако не престааше, возвелъ бЂ полвцЂ на Киевъ.

Данилъ бо и вои его бЂ иструдилася. ПоплЂнилъ бо бЂ всЂ Черниговьскые страны, воевалъ бо бЂ от Крещениа до Вознесения, створи миръ, воротися Кыеву.

Половцем же пришедшимъ Кыеву и плЂнящимъ землю Рускую. Данилъ бо бЂ изнемоглъся. Данилъ же хотяше изиити домови лЂсною страною, Володимеру же просящу, Мирославу же помогающу ему: «Изиидемь на поганыЂ половцЂ!» СрЂтоша же Ђ половцЂ у ЗвЂнигорода. Володимеру же хотящу возвратитися, и Мирославу глаголюще на возвращение, Данилови же рекшу: «Не подобаеть воину, устремившуся на брань, — или побЂду прияти, или пастися от ратных. Азъ бо возбраняхъ вамъ. НынЂ же вижю, яко страшливу душю имате. Азъ вамъ не рЂхъ ли, яко не подобить изииги труднымъ воемь противу цЂлымъ? НынЂ же почто смущаетеся? Изиидите противу нимь».

СрЂтЂвшимъ же ся воемь многимь половецькимь у Торчьского, бысть сЂча люта. Данилови же гоняшу по половцех, донележе конь его застрЂленъ бысть гнЂдый. Преже бо инии половци наворотилЂ на бЂгъ. Данилъ же, видЂвъ бЂжащий конь свой стрЂлянъ, наворотися на бЂгъ. Володимеру же ятому бывшу в Торцькомъ, и Мирославу, свЂтомъ безбожьнаго Григоря Василевича и Молибоговичевь, инЂмь бояръмъ многимъ ятымъ бывшимъ.

Данилу же прибЂгшу к Галичю, Василкови же бывшу в Галичи с полкомъ, и срете брата си. Борисъ же Межибожьскый свЂтомъ Доброславьлимъ и Збыславлимъ посла к Данилови, рекый: «Изяславъ и половци идуть к ВолодимЂру». Лесть бо бЂ се. Данилъ же посла ко брату си: «Стерези ВолодимЂра». УзрЂвше же бояре Галичьстии Василка отшедша с полономъ, воздвигоша крамолу. Судиславу же Ильючю рекшу: «Княже, льстивъ глаголъ имЂют галичанЂ, не погуби се, поиди прочь!» Данилови увЂдавшу крамолу ихъ, изииде Угры. ЗимЂ же приспЂвши, иде Василко Галичю, поима ляхы. Данилъ же в то время приде ко брату си изо Угоръ. И воиваша, не дошедше Галича, воротися домовь.

ВЂ лЂто 6743 [1235]. Придоша Галичане на Каменець и вси Болоховьсции князи с ними, и повоеваша по Хомору, и поидоша ко Каменцю, вземши полонъ великъ, поидоша. В то же время послалъ бяше Володимиръ Данилови помощь Торцькыи Данила Нажировича. Данилови же бояре выехавши ис Каменца, снемьшеся со торки и постигоша Ђ. И побЂжени быша невЂрнии галичане. И вси князи Болоховьсции изоимани быша, и приведоша е ВолодимЂръ ко князю Данилови. ЛЂту же наставшу, нача посылати Михаилъ и Изяславъ, грозяча: «Дай нашу братью, или придемь на тя войною». Данилови же молящюся богу, святому архиерЂю НиколЂ, иже каза чюдо свое. Возвелъ бо бяшеть на Данила Михаилъ и Изяславъ ляхъ и русь и половець множество. Кондратови же ставшу, кде нынЂ град Холмь стоить, пославшю ему ко Червьну воеватъ. Василковичем же срЂтившимъ е и бившимъся с ними, поимаша Лядьские бояре, приведоша е перед Данила во Городокъ.

Михаилови же стоящу на Подъгораи, хотяшю снятися с Кондратомъ и ожидающю половець со Изяславомъ. Половци же придоша в землю Галичькую, не восхотЂша ити на Данила, вземшю всю землю Галичькую, возвратишася. То слышавъ, Михаилъ возвратися в Галичь, а Кондратъ побЂже до ляховъ чересъ нощь, и топился бяшеть от вои его во Вепрю множество.

ЛЂту же наставшу, собравъшася, идоста на Галичь на Михаила и Ростислава. Затворила бо ся бЂяста во градЂ. И угоръ множество бяашеть у него. И возвративъшися воеваста около Звенигорода, города же хотяща и нЂ возяста, бЂ бо святаа Богородица в немь, чюдная икона.

Тое же осени умиристася.

ВеснЂ же бывши, поидоста на ятвезЂ, и приидоста Берестью, рЂкамъ наводнившимся и не возмогоста ити на ятвязЂ.

Данилови рекъшу: «Не лЂпо есть держати нашее отчины крижевникомь Тепличемь, рекомымь Соломоничемь». И поидоста на нЂ в силЂ тяжьцЂ. Приаста град месяца марта, старЂйшину ихъ Бруна яша, и вои изоимаша и возъвратися ВолодимЂръ.

Данилови же в томь же лЂтЂ пошедъшу на Михаила на Галичь. Онем же мира просящим, даша ему Перемышль. По том же лЂтЂ Данилъ же возведе на Кондрата литву Минъдога, Изяслава Новгородьского.

Данилъ же в то время шелъ бяше со братомъ своимъ Угры ко королеви, бЂ бо звалъ его на честь.

В то время пошелъ бяше Фридрихъ царь на гЂрцика войною, и восхотЂста ити Данилъ со братомъ Василкомъ гЂрцикови во помощь. Королеви же возбранившу има, возвратистася во землю свою.

И потомь приде Ярославъ Суждальскый и взя Киевъ подъ Володимеромъ, не мога его держати, иде пакы Суждалю. И взя под нимъ Михаилъ, а Ростислава, сына своего, остави в Галичи. И отъяша от Данила Перемышль. Бывшю же межю ими овогда миру, овогда рати.

И шедшю же Ростиславу во поле, богу же поспЂвшу, приде вЂсть Данилу, во ХолъмЂ будущю ему, яко Ростиславъ сошелъ есть на литву со всими бояры и снузникы. Сему же прилучившуся, изииде Данилъ со воии со Холъма и бывшю ему третий день у Галичи. Любяхуть же и гражане. Подъехавшу же ему подъ городъ и рече имъ: «О мужи градьстии, доколЂ хощете терпЂти иноплеменьныхъ князий державу?» Они же воскликнувше рЂша, яко: «Се есть держатель нашь богомь даный!», и пустишася, яко дЂти ко отчю, яко пчелы к матцЂ, яко жажющи воды ко источнику. Пискупу же АртЂмью и дворьскому Григорью возбраняющу ему, узрЂвшима же има, яко не можета удерьжати града, яко малодушна блюдящася о преданьи града, изиидоста слезнами очима и ослабленомь лицемь, и лижюща уста своя, яко не имЂюща власти княженья своего, рЂста же с нужею: «Прииди, княже Данило, приими градъ!» Данило же вниде во градъ свой и прииде ко пречистЂ святЂй Богородици, и прия столъ отца своего, и обличи побЂду, и постави на нЂмЂчьскыхъ вратЂхъ хоруговь свою.

НаутрЂя же приде к нему вЂсть, яко Ростиславъ пошелъ бЂ к Галичю, слышавъ же приятье градьское, бЂжа во Угры путемь, им же идяше на Боръсуков ДЂлъ, и прииде к Бани, рекомЂй Родна, и оттуда иде Угры.

Бояре же пришедше падше на ногу его просяще милости, яко: «СогрЂшихом ти, иного князя держахомъ». Онъ же отвЂщавъ рче имъ: «Милость получисте, пакы же сего не створисте, да не во горьшая впадете».

Данилови же увЂдавшу входъ ихъ, посла на нЂ вое свое, и гнаша по нихъ до Горы и возвратишася.

ПОБОИЩЕ БАТЫЕВО

Въ лЂто 6745 [1237]. Придоша безбожнии измаилтянЂ, преже бивъшеся со князя рускими на Калкохъ.

Бысть первое приходъ ихъ на землю Рязаньскую и взяша град Рязань копьемъ, изведше на льсти князя Юрья, и ведоша Прыньску, бЂ бо в то время княгини его Прыньскы. Изведоша княгиню его на льсти, убиша князя Юрья и княгини его, и всю землю избиша и не пощадЂша отрочатъ до сущихъ млека. Кюръ Михайловичь же утече со своими людми до Суждаля и поведа великому князю Юрьеви безбожных агарянъ приходъ, нашествие.

То слышавъ великий князь Юрьи посла сына своего Всеволода со всими людми и с нимъ кюръ Михайловичь. Батыеви же устремлешюся на землю Суждальскую, и срЂте и Всеволодъ на КолоднЂ, и бившимся имъ и падъшимъ многимъ от нихъ от обоихъ. ПобЂжену бывшу Всеволоду, исповЂда отцю бывшую брань устремленыхъ на землю и грады его. Юрьи же князь, оставивъ сынъ свой во ВолодимерЂ и княгиню, изииде изъ града, и совокупляющу ему около себе вои, и не имЂющу сторожии, изъЂханъ бысть безаконьнымъ Бурондаема, всь городъ изогна и самого князя Юрья убиша. Батыеви же стоящу у града, борющуся крЂпко о градъ, молвящимъ имъ льстью гражаномъ: «ГдЂ суть князи Рязаньстии, вашь град, и князь вашь великий Юрьи? Не рука ли наша емши и смерти преда и?»

Услышавъ о семь преподобный Митрофанъ епископъ начатъ глаголати со слезами ко всимъ: «Чада, не убоимся о прельщеньи от нечестивых и ни приимемь си во умъ тленьнаго сего и скоро минующаго житья, но ономь не скоро минующЂмь житьи попечемься, еже со ангелы житье. Аще и градъ нашь пленьше копиемь возмуть и смерти ны предасть, азъ о томь, чада, поручьникъ есмь, яко вЂнца нетлЂньнаа от Христа бога приимете». О сем же словеси слышавше, вси начаша крЂпко боротися. Тотаромъ же порокы градъ бьющемь, стрелами бещисла стрЂляющимъ. Се увидЂвъ князь Всеволодъ, яко крЂпчЂе брань належить, убояся, бЂ бо и самъ младъ, самъ изъ града изииде с маломъ дружины и несы со собою дары многии, надЂяше бо ся от него животъ прияти. Онъ же, яко свЂрпый звЂрь, не пощади уности его, велЂ предъ собою зарЂзати, и градъ всь избье. Епископу же преподобному во церковь убЂгшу со княгинею и с дЂтми, и повЂлЂ нечестивый огньмь зажещи, ти тако душа своя предаша в руцЂ богу.

Град ему избившу ВолодимЂрь, поплЂни грады Суждальскиие и приде ко граду Козельску. Будущу в немь князю младу именемь Василью. УвЂдавъши же нечестивии, яко умъ крЂпкодушьный имЂють людье во градЂ, словесы лестьными не возможно бЂ града прияти. КозлянЂ жЂ свЂтъ створше не вдатися Батыю, рекше, яко: «Аще князь нашь млад есть, но положимъ животъ свой за нь, и сде славу сего свЂта приимше, и тамъ небесныя вЂнца от Христа бога приимемь». Тотаром же бьющимся о град, прияти хотящимъ град, разбившимъ граду стЂну, и возиидоша на валъ татаре. Козляне же ножи рЂзахуся с ними. СвЂтъ же створиша изиити на полкы тотарьскые, и исшедше изъ града, исЂкоша праща ихъ, нападше на полъкы ихъ, и убиша от татаръ 4 тысящи, и самЂ же избьени быша. Батый же взя городъ, изби вси, и не пощадЂ от отрочать до сосущих млеко. О князи Васильи невЂдомо есть, и инии глаголаху, яко во крови утонулъ есть, понеже убо младъ бяше есть. Оттуду же ву татарЂхъ не смЂють его нарещи град Козлескъ, но град злый, понеже бишася по семь недЂль. Убиша бо от татаръ сыны темничи три. Татари же искавше и не могоша ихъ изнаити во множест†трупъ мертвыхъ.

Батыеви же вземшю Козлескъ, и поиде в землю Половецькую. Оттуда же поча посылати на грады Русьскые и взять град Переяславль копьемь, изби всь, и церковь архангела Михаила скруши, и сосуды церьковьныя бещисленыя, златыа и драгаго каменья взятъ, и епископа преподобнаго Семеона убиша.

В то же время посла на Черниговъ, обьступиша град в силЂ тяжцЂ. Слышавъ же Мьстиславъ ГлЂбовичь нападение на град иноплеменьных, приде на ны со всими вои. Бившимъся имъ, побЂженъ бысть Мьстиславъ, и множество от вои его избьенымъ бысть, и градъ взяша и запалиша огньмь. Епископа оставиша жива и ведоша и во Глуховъ.

Меньгуканови же пришедшу сглядатъ града Кыева. Ставшу же ему на оной странЂ ДнЂпра во градъка ПЂсочного, видивъ град, удивися красотЂ его и величеству его, присла послы свои к Михаилу и ко гражаномъ, хотя е прельстити, и не послушаша его.

В лЂто 6746 [1238]. Михаилъ бЂжа по сыну своемь передъ татары Угры, а Ростиславъ Мьстиславичь Смоленьского сЂдЂ КыевЂ, Данилъ же Ђха на нь, и я его, и остави в немь Дмитра, и вдасть Кыевъ в руцЂ Дмитрови обьдержати противу иноплеменьныхъ языкъ, безбожныхъ татаровъ.

...Яко бЂжалъ есть Михаилъ ис Кыева в Угры, Ђхавъ я княгиню его и бояръ его поима, и город КаменЂць взя. Слышавъ же се Данилъ, посла слы река: «Пусти сестру ко мнЂ, зане яко Михаилъ обЂима нама зло мыслить». И Ярославъ услыша словеса Данилова, и бысть тако, и приде к нима сестра, к Данилу и Василку, и держаста ю во велицЂ чести.

Король же не вдасть дЂвкы своей Ростиславу и погна и прочь. Идоста Михаилъ и Ростиславъ ко уеви своему в ляхы и ко Кондратови. Присла бо Михаилъ слы Данилу и Василку, река: «Многократы согрЂшихо вам и многократы пакости творях ти. Что ти обЂщахъ и того не створих. Аще коли хотяхъ любовь имЂти с тобою, невЂрнии галичанЂ не вдадяхут ми. НынЂ же клятвою клену ти ся, яко николи же вражды с тобою не имамъ имЂти».

Данилъ же и Василко не помянуста зла, вьдаста ему сестру и приведоста его из Ляховъ. Данилъ же свЂтъ створи со братом си, обЂща ему Киевъ Михаилови, а сынови его Ростиславу вдасть Луческъ. Михаилъ иже за страхъ татарьскый не смЂ ити Кыеву. Данилъ же и Василко вьдаста ему ходити по землЂ своей, и даста ему пшеницЂ много и меду и говядъ и овЂць доволЂ. Михаилъ же увЂдЂвъ приятье Киевьское и бЂжа со сыномъ своимъ во Ляхы Кондратови. Приближившимъ же ся татаромъ, то не стерпЂ туто, иде в землю Воротьславьску и приде ко мЂсту НемЂцкому именемь Середа. УзрЂвши же нЂмци, яко товара много есть, избиша ему люди, и товара много отъяша и унуку его убиша. Михаилу иже не дошедшю и собравшюся, и бысть в печали величЂ: уже бо бяхут татари пришли на бой ко Иньдриховичю. Михаилъ же воротися назадъ опять Кондратови.

Мы же на преднее возвратимся.

В лЂто 6747 [1239].

Въ лЂто 6748 [1240]. Приде Батый Кыеву в силЂ тяжьцЂ, многомь множьствомь силы своей, и окружи град, и остолпи сила татарьская, и бысть град в обьдержаньи велицЂ. И бЂ Батый у города и отроци его обсЂдяху град. И не бЂ слышати от гласа скрипания телЂгъ его, множества ревения вельблудъ его, и рьжания от гласа стадъ конь его, и бЂ исполнена земля Руская ратныхъ.

Яша же в них татарина именемь Товрулъ, и тъ исповЂда имъ всю силу ихъ. Се бяху братья его силныи воеводы: Урдю и Байдаръ, Бирюй, Кайданъ, Бечакъ и Меньгу и Кююкь, — иже вратися увЂдавъ смерть канову, и бысть каномь, не от роду же его, но бЂ воевода его перьвый — СебЂдяй богатуръ и Бурунъдаии багатырь, — иже взя Болгарьскую землю и Суждальскую, — инЂхъ бещисла воеводъ, их же не исписахомъ зде.

Постави же Баты порокы городу подълЂ вратъ Лядьскьх. Ту бо бЂаху пришли дебри. Порокомъ же бес престани бьющимъ день и нощь, выбиша стЂны. И возиидоша горожаны на избыть стЂны, и ту бЂаше видити ломъ копЂйный, щетъ скЂпание, стрЂлы омрачиша свЂтъ. ПобЂженым и Дмитрови ранену бывшу, взиидоша татарЂ на стЂны и сЂдоша. Того дне и нощи гражанЂ же создаша пакы другий град около святое БогородицЂ. НаутрЂя же придоша на нЂ, и бысть брань межи ими велика. Людем же узбЂгшимъ и на церковь и на комаръ церковныя и с товары своими; от тягости повалишася с ними стЂны церковныя. И приятъ бысть град сице воими. ДмитрЂя же изведоша язвена, и не убиша его мужьства ради его.

В то же время Ђхалъ бяше Данилъ Угры королеви и еще бо бяшеть не слышалъ приходъ поганыхъ татаръ на Кыевъ.

Батыю же вземшю град Кыевъ и слышавъшу ему о ДанилЂ, яко УгрЂхъ есть, поиде самъ Володимеру, и приде к городу Колодяжьну. И постави порока 12, и не може разбити стЂны, и начатъ перемолъвливати люди. Они же, послушавше злого свЂта его, передашася, и сами избити быша. И приде Каменцю, Изяславлю, взятъ я. Видивъ же КремянЂць и градъ Даниловъ, яко не возможно прияти ему, и отиде от нихъ. И приде к Володимеру, и взя и копьемь, и изби и не щадя Тако же и град Галичь, иныи грады многы, имже нЂсть числа.

Дмитрови же, Кыевьскому тысяцкому Данилову, рекшу Батыеви: «Не мози стряпати в землЂ сей долго, время ти есть на угры уже поити. Аще ли встряпаеши, земля ти есть силна. Сберуться на тя и не пустять тебе в землю свою». Про то же рече ему, види бо землю гибнущу Рускую от нечестиваго.

Батый же послуша свЂта Дмитрова, иде Угры. Король жь БЂла и Каломанъ срЂтоша Ђ на рЂцЂ Солоной. Бившимся имъ полкомъ, бЂжаща угре, и гнаша Ђ татарЂ до рЂкЂ Дуная. Стояша по побЂдЂ три лЂта.

Преже того Ђхалъ бЂ Данило князь ко королеви Угры, хотя имЂти с ним любовь сватьства, и не бы любови межи има. И воротися от короля и приЂха въ Синеволодьско во манастырь святыя Богородица. Наутрея же воставъ видЂ множество бЂжащих от безбожных татаръ и воротися назадъ Угры. Не може бо проити Руское земли, зане мало бЂ с нимь дружины. И оставивъ сына своего УгрЂхъ и вьдасть и ву руцЂ галичаномъ, вЂдаа невЂрьствие ихъ, про то его не поя с собою.

Иде изо Угоръ во Ляхы на Бардуевъ и приде во Судомирь. Слыша о братЂ си и о дЂтех и о княгини своей, яко вышли суть из Руское землЂ в Ляхы предъ безбожными татары, и потосьнуся взискати ихъ, и обрЂте ихъ на рЂцЂ рекомЂй ПолцЂ, и возрадовашася о совокупьленьи своемь, и жалишаси о побЂдЂ землЂ Руское и о взятьи град от иноплеменьникъ множьства.

Данилови же рекшу, яко: «Не добро намъ стояти сде близъ воюющих нас иноплеменьникомъ!» Иде в землю во Омазовьскую ко Болеславу Кондратову сынови. И вдасть ему князь Болеславъ град Вышегородъ. И бысть ту, дондеже вЂсть прия, яко сошли суть и землЂ Руское безбожнии.

И возвратися в землю свою, и приде ко граду Дорогычину, и восхотЂ внити во град, и вЂстьно бысть ему, яко «Не внидеши во град!» Оному рекшу, яко: «Се былъ град нашь, и отець наших, вы же не изволисте внити вонь». И отъиде мысля си.

Иже богъ послЂже отмьстье створи держателю града того, и вьдасть и в руцЂ Данилу. И обьновивы и созда церковь прекрасну святое Богородици, и рече: «Се градъ мой, преже бо прияхъ и копьемь».

Данилови же со братомъ пришедшу ко Берестью и не возмогоста ити в поле смрада ради множьства избьеных. Не бЂ бо на ВолодимЂрЂ не осталъ живый, церкви святой Богородици исполнена трупья, иныа церкви наполнены быша трубья и телесъ мертвых.

Потом же Михаилъ иде от уя своего на ВолодимЂръ сыномь своим и оттуда иде Пиньску. Ростислав же ВолодимЂричь приде к Данилу во Холмъ, одержалъ бо бЂаше богъ от безбожных татаръ. Ростислав же показа правду свою, яко не есть во свЂтЂ с Михаиломъ. Михаилъ же не показа правды воз добродЂанье Данилу же и Василку, но проиде землю его и и пославъ посла иде, въ Киевъ, и живяше подъ Киевомъ во островЂ, а сынъ его иде в Черниговъ Ростиславъ.

Вышедшу же Лвови изъ Угоръ с бояры галичкыми и приЂха во Водаву ко отцю си, и радъ бысть ему отець.

Бояре же галичьстии Данила княземь собЂ, называху, а самЂ всю землю держаху. Доброслав же вокняжилъся бЂ и Судьичь, поповъ внукъ, и грабяше всю землю, и въшед в Бакоту, все Понизье прия, безъ княжа повеления. Григорьи же Васильевичь собЂ горную страну Перемышльскую мышляше одержати. И бысть мятежь великъ в землЂ и грабежь от них. Данилъ же, увЂдавъ, посла Якова, столника своего, с великою жалостью ко Доброславу, глаголя к нимь: «Князь вашь азъ есмь. Повеления моего не творите, землю грабите. Черниговьских бояръ не велЂх ти, Доброславе, приимати, нъ дати волости галичкимъ. А Коломыйскюю солъ отлучите на мя». Оному же рекшу: «Да будеть тако!». Во тъ же часъ, Якову сЂдящу у него, приидоста Лазорь Домажирець и Иворъ Молибожичь, два безаконьника от племени смердья, и поклонистася ему до землЂ. Якову же удивившуся и прашавшу вины, про что поклонистася. Доброславу же рекшу: «Вдахъ има Коломыю». Якову же рекшу ему: «Како можеши бес повеления княжа отдати ю сима! Яко величии князи держать сию Коломыю на роздавание оружьникомъ, си бо еста недостоина ни Вотьнина держати». Он же усмЂявься рече: «То что могу же глаголати». Яковъ же, приехавъ, вся си сказа князю Данилови. Данилъ же скорбяше и моляшеся богу о отчинЂ своей, яко нечестивымъ симъ держати ю и обладати ею.

И малу же времени минувшу присла Доброславъ на Григоря, река, яко: «НевЂренъ ти есть». Противляшеся ему, а самъ хотяше всю землю одержати. Свадивьшеся сами и приЂхаша с великою гордынею. Едучю Доброславу во одиной сорочьцЂ, гордящу, ни на землю смотрящю, галичаном же текущимъ у стремени его.

Данилови же видящу и Василкови гордость его, болшую вражду на нь воздвигнуста. Доброславу же и Григорю обоимъ ловящимъ на ся. Слышав же Данилъ рЂчи ихъ, яко полны суть льсти, и не хотять по воли его ходити, и власть его иному предати, сомыслив же се братомъ, понужи же, видя безаконие ихъ, и повелЂ его изоимати.

Въ лЂто 6749 [1241]. Ростиславъ собра князЂ болоховьскые и останокъ галичанъ, приде ко БакотЂ. Курилови же сущю печатнику тогда вь БакотЂ, послану Даниломъ княземь и Василкомъ исписати грабительства нечсстивых бояр, утЂшити землю. Бившимъ же ся имъ у вратъ, отступився, хотяше премолвити его словесы многыми. Курилъ же отвЂща ему: «Се ли твори возмездье уема своима воз добродЂанье! Не помниши ли ся, яко король угорьскый изгналъ тя бЂ и землЂ сь отцьмь ти? Како тя восприаста огосподина моя, уя твоя, отча ти во величи чести держаста, и Киевъ обЂчаста тобЂ, Луческъ вдаста, и матерь твою и сестру свою изъ Ярославлю руку изъяста и отчю ти вдаста». Инеми словесы мудрыми глаголаста ему много. ВидЂв же, не послуша его, изииде на нь со пЂшьци. Онъ же увЂдЂвъ то, поиде прочь. Онъ же мудростью и крЂпостью удержа Бакоту. Ростислав же изииде за ДнЂпръ.

Слышавъ же Данилъ приходъ Ростиславль со князи Болоховьскими на Бакоту, абье устремися на нЂ, грады ихъ огневи предасть, и гребля ихъ раскопа. Василько же князь осталъ бЂ стеречи землЂ от Литвы, послалъ бЂаше вое свое со братомъ. Данилъ же возьма плЂнъ многъ вратися и поима грады ихъ: Деревичь, Губинъ и Кобудъ, Кудинъ, ГородЂць, Божьскый, Дядьковъ. Приде же Курилъ, печатникъ князя Данила, со треими тысящами пЂшець и трьими сты коньникъ, и водасть имъ взяти Дядьковъ град.

Оттуда же плЂнивъ землю Болоховьскую и пожегъ. Оставили бо ихъ татарове, да имъ орють пшеницю и проса. Данилъ же на нЂ болшую вражьду, яко от тотаръ болшую надежу имЂаху, князЂ же ихъ изъя от руку Болеславльу, князя Мазовьского. Рекшу Болеславу: «Почто суть вошли во землю мою, яко не влах имъ», — рекый: «Не суть вои твои, но суть особнии князи». И хотяше разъграбити е. Они же обЂщашася работЂ быти. Онемь же молящимся, Данилъ же и Василко за нЂ хоти с ними брань створити. Василко же ехавъ убЂди и, рекше умоли и, и дасть ему дары многи на избавление ихъ. ОнЂм же одинако не помнящи добродЂанья, богъ возмездье имъ дасть, яко не оста ничтоже во градЂ ихъ, еже бысть не пленено. И приде ко брату си милостью божиею, обличая побЂду.

Ростислав же одинако не престааше о злобЂ своей, но вои собравъ и Володислава невЂрного, поиде на Галичь. И пришедъ ко ПечерЂ Домамири, и прельсти е Володиславъ, и вдашася Ростиславу, и оттуда поима, поиде ко Галичю, рекый, яко: «Твой есть Галичь». А самъ прия тысячю от него. Слышавъ же Данилъ и Василко, собравша воя скоро поидоста на нихъ. Онъ же не стерпЂ выбЂже из Галича до Щекотова, и с нимь бЂжа АртЂмЂй, епископъ галичькый, и инии галичани. Данилови же и Василку, женущу по немь, вЂсть приде ему, яко тотарове вышли суть и землЂ Угорьское, идуть в землю Галичькую, и тою вестью спасеся, и нЂколико от бояръ его ято бысть.

Данилъ же, хотя уставити землю, и еха до Бакоты и Калиуса, а Василко еха во ВолодимЂръ. Данилъ же дворечкого посла на Перемышль, на Костянтина Рязаньского, посланаго от Ростислава, и владыцЂ Перемышльскому, коромолующе с нимь. И слышавъ Костянтинъ АдрЂа, грядуща на нь, избЂженощью. АндрЂй же не удоси его, но удоси владыку, и слуги его разъграби гордые, и тулы ихъ бобровье раздра, и прилбичЂе ихъ волъчье и боръсуковые раздраны быша. Словутьного пЂвца Митусу, древле за гордость не восхотЂвша служити князю Данилу, раздраного, акы связаного приведоша. СирЂчь, якоже рече приточникъ: «Буесть дому твоего скрушиться, бобръ и волкъ и язвЂць снЂдяться». Си же притчею речена быша.

Въ лЂто 6750 [1242]. Не бысть ничтоже.

Въ лЂто 6751 [1243]. Ростислава розгнаша татарове во Борку, и бЂжа угры, и вдасть зань пакы король угорьскый дочЂрь свою.

Данилу же будущу во ХолмЂ, прибЂже к нему половчинъ его именемь Актай, рекый, яко: «Батый воротилъся есть изо Угоръ, и отрядил есть на тя два богатыря возискати тебе: Манъмана и Балаа». Данилъ же затворивъ Холмъ, еха ко брату си Василкови, поима с собою Курила митрополита. А татарове воеваша до Володавы и по озерамъ много зла створше.

Въ лЂто 6752 [1244]. Не бысть ничтоже.

Въ лЂто 6753 [1245]. Слышавъ же короля Михаилъ вдавъ дочЂрь за сына его и бЂже Угры. Король же угорьскый и сынъ его Ростиславъ чести ему не створиста. Он же розгнЂвався на сына, возвратися Чернигову.

Оттуда еха Батыеви, прося волости своее от него. Батыеви же рекшу: «Поклонися отець нашихъ закону». Михаилъ же отвЂща: «Аще богъ ны есть предалъ и власть нашу грЂхъ ради наших во руцЂ ваши, тобЂ кланяемся и чести приносим ти. А закону отець твоихъ и твоему богонечестивому повелению не кланяемься». Батый же, яко свЂрпый звЂрь возьярися, повелЂ заклати, и закланъ бысть безаконьнымъ Доманомъ Путивльцемь нечестивымъ, и с нимъ закланъ бысть бояринъ его Федоръ, иже мученически пострадаша и восприяста вЂнЂчь от Христа бога.

Данилови же со братомъ Василкомъ заратившимся с Болеславомъ, княземь Лядьскимь, внидоста во землю Лядьскую четырми дорогами: самъ Данило ваева около Люблина, а Василко — по Изволи и по ЛадЂ, около БЂлое, дворьскый же ОндрЂй по Сяну, а Вышата воева Подъгорье. Вземше полонъ, возвратишася. И пакыи изиидоста и повоеваста землю Любльньскую, доже и до рЂкы Вислы и Сяну. И прЂхавша подъ Завихвостъ, стрЂли Василко князь чересъ рЂку Вислу, не могоша бо переЂхати ей рЂкы, понеже наводнилася бяше. И возвратистася, вземша полону много.

Малу же времини минувшу, приЂхавъши же ляхове и воеваша около АндрЂева. Услышавъ же Данило князь со братомъ Василкомъ, совокупиша силу свою и повелЂста престроити праща и иныие сосудыи на взятье града, и придоста на градъ Люблинъ. Одиного дне быста под градомъ ис Холма, со всими вои и пращами. Мечющимъ же пращамъ и стрЂламъ, яко дожду идущу на град ихъ, и уведевъше ляхове, яко крЂпчЂе брань руская належить, начаша просити милость получити. Данилъ же и Василко створиста завЂтъ, положивъ имь, рекоша: «Не помогайте князю своему». Они же обЂщася то створити. Данилъ же со братомъ возвратистася, воеваша страну ту.

Ростиславъ же умоливъ угоръ, много просися у тьстя, да выидеть на Перемышль. Вшедшу ему, собравше смерды многы пьшьцЂ, и собра я в Перемышль. Данилъ же и Василко, слышавше, посласта Лва млада суща, и яко ни во бой ему внити, младу сущу, посла сыновца своего Всеволода, АндрЂя и Якова, иныи бояре. Бившимся имъ на рЂцЂ СЂчници, одолЂ Ростиславъ, многи бо имЂ пЂшьцЂ. Бьющу же АньдрЂю и Якову, сЂкущимъся лютЂ, Всеволъдъ не поможе имъ, и навороти конь свой на бЂгъ. Бившим же ся имъ много, и отъЂхаша цЂли. Данилови же бывши вЂсти, и поиде, собравъ вои многи и пЂшьцЂ и прогняше и землЂ, и иде Угры.

Въ лЂто 6754 [1246]. Придоша литва и воеваша около ПересопницЂ Аишьвно Рушькович. Данило же и Василко ехаша во Пинескъ и предъвариста его, дондеже приходъ его. Онемь же идущимь по полю Пиньскуму, изиидоста на нЂ из града. Поганым же одинако гордость имЂющим во сердци своемь, погнаша е. Онем же не стЂрпЂвшимъ побЂгоша, бЂжащим же имъ падаху с коний. Василко же приведе первый саигатъ ко брату си. Всии же воии его избьени быша, самому же Рюшковичьу у малЂ утекшю. И бысть радость велика во градЂ ПиньскЂ о побЂдЂ Данила и Василка, всь бо плЂнъ отъяста, богу помогающу имъ.

В лЂто 6755 [1247]. Воеваша литва около МЂлницЂ Лековнии, великъ плЂнъ прияша. Данило же и Василко, гнаста и по нихъ до Пиньска. Во Пиньски бо Михаилъ далъ бЂ имъ вЂсть. ОнЂм же ставшимъ осЂкшимся в лЂсЂ, далъ бо бЂ имъ и Михаилъ вЂсть, буда в ПиньскЂ. Данилъ же и Василко погнаша на нЂ, и дворьскый Яковъ вое свое. Лит†же и не емшем вЂры Михайлови, изиидоша и становъ своих. Милостью божиею побЂгшимъ литвЂ, и избити быша, и плЂнъ всь отъяша, а самъ Лонъкогвени боденъ утече. Иде вЂсть Данилу и Василку, и бысть радость велика во ПиньскЂ, градЂ.

Преже же воиныи Данилови Черниговьское сЂдящу ему в ГаличЂ, а Василку в ВолодимерЂ.

Въ лЂто 6756 [1248]. Воеваша ятвязЂ около Охоже и Бусовна, и всю страну и ту поплЂниша, и еще бо Холму не поставлену бывъшю Даниломъ. Гна же по нихъ Василко изъ ВолодимЂря, угони е, и бывшу ему третий день изъ Володимеря в ДорогычинЂ. Оньмь же бьющимся у воротъ Дорогычинъскыхъ, и приде на нЂ Василко. ОнЂм же вьзьехавшимъ имъ противу и не стерпЂвшимъ от лица Василкова, богу помогшу, побЂгоша злии погании. И бысть на нЂ сЂча люта, и гнаша е за много поприщь, и убито бысть князии сорокъ, инии мнозии избьени быша и не востаяша. Посла и во Галичь ко брату си. И бысть радость велика во градЂ томъ ГаличЂ день той.

Василко бо бЂ возрастомъ середний, умомъ великъ и дерзостью, иже иногда многажды побЂжаше поганые, или иногда многажды посылающима има на поганыя. Еже Скомондъ и Боруть зла воиника, иже убьена быста посланиемь. Скомондъ бо бЂ волъхвъ и кобникъ нарочитъ, борзъ же бЂ, яко и звЂрь, пЂшь бо ходя повоева землю Пиньскую, иныи страны, и убьенъ бысть нечестивый, и глава его взотъчена бысть на колъ. И во иная времена божиею милостью избьени быша погании, ихже не хотЂхомъ писати от множества ради.

Въ лЂто 6757 [1249]. Ростиславъ молися тьстеви своему королеви, да пошлеть ему вои на Данила. Поимъ вои идеть в Лядьскую землю. И молися Льстьковой и убЂди ю, да послеть с нимъ ляхы, и посла с нимъ вое. Нарочиты бояры и инии ляхо†избЂгли бяху изъ земли, хотяще ити к Данилови. УвЂдЂв же Ростиславль выходъ, хотяще имъ получити милость у Лестьковича и у матери его. Идоша к нему на помощь, еже по малЂ времени ятъ бысть старЂйши ихъ Творьянъ Даниломъ.

Ростислав же устремися приди на град Ярославль, людем же бывшимъ во градЂ Даниловымъ и Василковымъ и бояромъ многомъ. Видив же крЂпокъ град, поиде к Перемышлю и, собравъ тъзЂмьльцЂ многы, сосуды ратныие и градные, и порокы, исполчивъ воя своя, и пакы поиде ко Ярославлю, и за собою остави град Перемышль. Мыслящу ему: «Аще сего не прииму, да сего держу». Стоящу же ему у града, и строящю порокы ими приимет град, и бысть бой великъ пред градомъ. Оному же велЂвшу своимъ охабитися, да не язвени будуть вои его от гражанъ, дондеже устроить сосуды порочные. Хвалящю же ся ему предъ вои своими и рекушу: «Аще бых извЂдалъ, кдЂ Данила и Василко, Ђхалъ бых на ня. Аще бы ми с десятью воинъ, ехалъ быхъ на ня». Гордящу же ся ему, и створи игру предъ градомъ, и сразивъшуся ему со Воршемь, и падеся под нимь конь, и вырази собЂ плече, и не на добро случися ему знамение.

Слышавъ же Данило и Василко ратное пришествие его, помолистася богу, начаста сбирати вое, и посласта Кондратови рекуще, яко: «Тебе дЂля изиидоша на наю ляхове, яко помощника ти ес※. Пославшу же ему помощь, Данило же и Василко посласта в литву помощи просяща, и послана бысть от Миндога помощь. Не дотягшимъ же обоимъ, явлешу же богу помощь свою над ними, яко не от помощи человЂкомъ побЂда, нъ от бога.

Скоро собравше вои, поидоста. Посласта же АндрЂя, да я видить и укрЂпить град, яко уже близъ есть спасение ихъ. Не дошедшимъ же воемь рЂкы Сяну, сосЂдшим же на поли воружиться. И бывшу знамению сице надъ полкомъ сице: пришедшимъ орломъ и многимъ ворономъ, яко оболоку велику играющимъ же птичамъ, орлом же клекьщущимъ и плавающимъ криломъ своими, и воспромЂтающимъся на воздусЂ, якоже иногда и николи же не бЂ. И се знамение на добро бысть.

Данилъ же воружився, поемь вое свое, поиде рЂцЂ Сяну. Броду же глубоку сущу, и приЂхаша половци напередъ, и приЂхавше видиша стада ихъ. Не бЂ же стражь ихъ у рЂкы. Половцем же не смЂющимъ разъграбити ихъ бес повеления княжа. ОнЂм же узрЂвшимъ и убЂгшимь со стады своими во станы свое. Данилови же и Василко не умедлиста, но скоро придоста рЂку. Исполчивша же коньники с пЂшьци, поидоста с тихостью на брань. Сердце же ею крЂпко бЂ на брань, и устремлено на брань. Лвови же дЂтьску сущу, поручи и Василкови, храбру сущу боярину и крЂпку, и да и стрежеть его во брани.

И видив же Ростиславъ приходъ ратных, исполчивъ же вои свое, русь и угры и ляхы, и доиде противу имъ, пЂщцЂ же остави противу вратом града стрещи вратъ, да не изиидуть на помощь Данилу и не исЂкуть праковъ. Ростислав же исполчився преиде дебрь глубокую. Оному же идущу противу полку Данилову, АндрЂеви же дворьскому тоснущюся, да не сразится с полкомъ Даниловым, ускоривъ сразися с полкомъ Ростиславлимъ. КрЂпко копьем же изломившимся, яко от грома трЂсновение бысть, и от обоихъ же мнози, падше с коний, умроша, инии уязвени быша от крЂпости ударения копЂйного.

Данилъ же посла 20 муж избраных на помощь ему. ВасилЂй же ГлЂбовичь и Всеволодъ Олександрович, Мьстиславъ, не мога АндрЂеви, бЂжаста назадъ ко Сянови. АндрЂеви же оставшу с малой дружиною, возьЂздя крЂпци боряшеся с ними.

ВидЂв же Данилъ ляхы крЂпко идущимъ на Василка, керьлЂшь поющимъ, сильньнъ гласъ ревуще в полку ихъ.

Данилъ же видивъ близъ брань Ростиславлю, и Филю в заднемь полку стояща со хорюговью, рекущю, яко: «Русь тщиви суть на брань, да стерпимъ устремления ихъ, не стерпими бо суть на долго время на сЂчю». Богу же не услышавшу славы его, приде на нь Данило со Яковомъ Марковичемь и со Шьльвомъ. Шелвови же сбодену бывшу, Данила же емшу, исторжеся из руку его, и выеха ис полку, и видЂвъ угрина, грядущаго на помощь Фили, копьемь сътче и, и вогружену бывшу в немь уломлену, спадеся, изъдше. О того же гордаго Филю Львъ, младъ сы, изломи копье свое. Пакы же Данило скоро приде на нь и раздруши полкъ его, и хоруговь его раздра на полы. Видив же се Ростиславъ, побЂже, и наворотишася угре на бЂгъ.

Василкови же сразившуся с ляхы, наворотившимся и не зрящимъ обоимъ на ся. Ляхомъ же лающимъ, рекущим: «Поженемь на великыи бороды». Василкови же рекшу, яко: «Ложь глаголъ есть вашь. Богъ помощникъ нашь есть». И тъкну конь свой и движеся. Ляхо†же не стЂрпЂвше побЂгоша от лица его. Данилови женущу чересъ дебрь глубокую на угры и русь, бьющю Ђ, и скорбяще о братЂ, не вЂдый. УзрЂв же хоруговь его, по ляхомъ женущу, и бысть в радости велицЂ.

Ставшу же ему на могилЂ противу городу, и приЂха Василко к нему. Данилови же хотящу гнати по нихъ, Василко же возбраняше ему. Ростиславу же познавшу, направи конь свой на бЂгъ. Угре же и ляхове мнози избьени быша, и ятии быша, и от вьсих мнози яти быша. Тогда же и Филя гордый ятъ бысть

АндрЂемь дворьскимь, и приведенъ бысть к Данилу, и убьенъ бысть Даниломъ. Жирославъ же приведе Володислава, злого мятежника землЂ. Въ тъ ж день и тотъ убьенъ бысть, и инии угре мнози избьени быша за гнЂвъ. Данило же и Василко не идоста в городъ, и Львъ ста на мЂстЂ воиномь посрЂдЂ трупья, являюща побЂду свою. Гонящим же и приЂздящимъ воиномъ и полунощи, и вЂдущимъ користь многу, яко же всее нощи клику не переста, ищущимъ другъ друга.

Яви же богъ милость свою и дасть побЂду Данилу на канунъ великую мученику Фрора и Лавра. Данилъ же город зажже, еже Ростиславъ создалъ, иде же в Холмъ с колодники многими, иже бЂ создалъ самъ. Лит†же приЂхавшимъ и ляхомъ Кондратовымъ, к нему приспЂвшимъ ко брани и воротишася во свояси. А Ростиславъ бЂжа в ляхы, и поемъ жену свою, иде угры. Про то бо из угоръ пришелъ бяшеть съ женою в Лядьскую землю, мысляще во умЂ своемь взяти Галичь и обладати имъ. Богъ же за высокомыслие его и не створи того, еже онъ мысляше.

Въ лЂто 6758 [1250]. Приславшу же МогучЂеви посолъ свои к Данилови и Василкови, будущю има во Дороговьскыи: «Дай Галич», бысть в пЂчали велицЂ, зане не утвердилъ бЂ землЂ еЂ городы. И думавъ с братомъ своимъ и поЂха ко Батыеви река: «Не дамъ полу отчины своей, но Ђду к Батыеви самъ».

Изииде же на праздник святаго ДмитрЂя, помолився богу и приде Кыеву, обдержащу Кыевъ Ярославу бояриномъ своимъ Ейковичемь Дмитромъ. И пришед в домъ архистратига Михаила, рекомый Выдобичь, и созва калугеры и мниский чинъ и рекъ игумену и всей братьи, да створять молитву о немь. И створиша, да от бога милость получить. И бысть тако, и падъ пред архистратигомъ Михаиломъ, изииде из манастыря въ лодьи, видя бЂду страшьну и грозну.

И прииде Переяславлю, и стрЂтоша татаровЂ. Оттуда же Ђха къ КуремЂсЂ и видЂ, яко нЂсть в них добра.

Оттуду же нача болми скорбЂти душею, видя бо обладаемы дьяволомъ: сквЂрная ихъ кудЂшьская бляденья, и Чигизаконова мечтанья, сквЂрная его кровопитья, многыя его волъжбы. Приходящая цари, и князи, и велможЂ солнцю и лунЂ и земли, дьяволу и умершимъ въ адЂ отцемь ихъ и дЂдомъ и матеремь водяше около куста покланятися имъ. О сквЂрная прелесть ихъ!

Се же слыша, велми нача скорбЂти.

Оттуда же приде к Батыеви на Волгу. Хотящу ся ему поклонити, пришедшу же Ярославлю человЂку. Сънъгурови, рекшу ему: «Брат твои Ярославъ кланялъся кусту и тобъ кланятися». И рече ему: «Дьяволъ глаголеть из устъ ваших. Богъ загради уста твоя и не слышано будеть слово твое». Во тъ час позванъ Батыемь, избавленъ бысть богомъ и злого их бЂшения и кудЂшьства. И поклонися по обьчаю ихъ, и вниде во вежю его. Рекшу ему: «Данило, чему еси давно не пришелъ? А нынЂ оже еси пришел — а то добро же. Пьеши ли черное молоко, наше питье, кобылий кумузъ?» Оному же рекшу: «ДоселЂ есмь не пилъ. НынЂ же ты велишь — пью». Он же рче: «Ты уже нашь же тотаринъ. Пий наше питье». Он же испивъ поклонися по обычаю ихъ, изъмолвя слова своя, рече: «Иду поклониться великой княгини Баракъчинови». Рече: «Иди», Шедъ поклонися по обычаю. И присла вина чюмъ и рече: «Не обыкли пити молока, пий вино».

О злЂе зла честь татарьская! Данилови Романовичю, князю бывшу велику, обладавшу Рускою землею, Кыевомъ и Володимеромъ и Галичемь со братомъ си, инЂми странами, ньнЂ сЂдить на колЂну и холопомъ называеться! И дани хотять, живота не чаеть. И грозы приходять. О злая честь татарьская! Его же отець бЂ царь в Руской земли, иже покори Половецькую землю и воева на